رواية كاميليا بقلم ندا سليمان | كاملة

الفصل الاول مش عارفة ابدأ حكايتي منين؟ أمممم خليني ابدأها بأصعب لحظة مرت عليا ، في يوم خميس الساعة واحدة بعد نص الليل ، صحيت على صفعة من جوزي ، كان ماسك في إيديه، شريط منع الحمل إللي كنت مخبياه عنه وموبايلي، فاتح عليه رسالة بيني وبين ابن خالتي وبيسألني عنها ، سأل من غير مايديني حق الإجابة ، رماني في قفص الاتهام وحكم عليا من غير ما يسمع كلمة واحدة، أنا حتى مالحقتش أنطق من كتر الضرب! طيب أخلف تاني ازاي وإحنا مش قادرين نصرف على بنت واحدة! مامته بتزن ع الخلفة تاني عشان مش عايشة معانا ولا شايفة وضعنا ، حاولت أشرحله أسبابي بس ماسمعنيش! حاولت أفهمه إني كنت بستلف من ابن خالتي فلوس علشانه وعلشان أكشف على بنتنا ويمكن يوصل لأهلي حالي و قلبهم يحن، بس ماصدقنيش رغم إن الرسايل كلها واضحة قصاده ، اتهمني في عرضي وضربني وأهانّي ، كنت فاكرة الخناقة زي كل مرة هتنتهي...