رواية قضبان الجنوب ( فصلية ) الفصل السابع والثلاثون 37 - بقلم Hend_AlBoor

و ان كـان الـحـب حـرب
فـ قـد فـزت بـكِ
و أُخـذت تـحـت سـيوفـكِ اسـيـرا

ام معاذ : فتحت الباب و دشيت لهم ..

لك الحگ يا شيخ .. و حنا عاطيك مرة

صفوان : درت ع عمتي ..

هاذ حشم ماهو فصل يا عمة ..

ام معاذ : حشم و الا فصل .. انت رايد حگ

الجد : الحشم ما يصير ياخذ بنت گبيلته يا لميعه .. فاارگي

ام معاذ : بوية حنا بدل الگاع بنهدي حرمة .. و هاذ فضل منا له

صفوان : و انا عندي حرمة ما احتاج حرمة و ان هدوني بنت شيوخ .. ماني ماخذها

ام معاذ : و تفضلها ع بنات الشيخ والله انها ساحرتك هالمعدها اصل ..

صفوان : عمةةةةةةةة .. فااااااارگي

عم معاذ : هدي يشيخ

ام معاذ : والله انك هاوي المشاكل يشيخ

تطلع تشوف حياة على الدرج

اااانتي العباااااس مايضرررربج .. الله ماااا ياااخذج و يفكناااا من شررررج .. من يااااا دااااهية طلعتي لناااا

صفوان : سمعتها تصارخ ع حياة والله لو إني مو بوسط الزلم ، وگفت و كلهم فزوا ..

الگاع حشم حرمتي يابو سراج و غيرها توصل للدم

ابو معاذ : الله يكفينا يا شيخ الي تآمر بي

حياة : طلعت تهد و تصد علية و اني بعالم ثاني من ورا الي حجا صفوان بنص الرياجيل
قشعر جسمي على كل حرف گاله دمعت عيوني

تين : شمالج عمه ..

ام معاذ : اااسكتي ااانتي .. هاااذ الـ يخلط دمه بدم العامة ..

تين : مو بتكم خذت الشيخ .. كضتها كله بيتكم زعلانه .. ليحد ما هلك الزلمة .. شحصلوا الشيوخ من لحمهم غير الغثة ..

ام معاذ : لسااااانج لااا اكصةةة .. تخسييين تحجيين ع بنتي ..

تين : ماحجيت غبن .. تكلمت الـ حصل

ام معاذ : هااااذ الـ يلم الغريبات من الشوارع تفوووو ..

تطلع تدردم  

تين : لا بارك الله بيج .. بعد الله شيسوي بيج استغفر الله

صفوان : طلعوا الزلم صعدت ع حياة ..

ها حبيبتي ..

اجتي علي جان احضنها ..

حياة : عمري

صفوان : اسف گليبي

حياة : ميهموني اني الاهم ويايا

صفوان : فدوة انا

سحبتها من حضني و اضحك

حياة : ليش تضحك؟  علية مو

صفوان : ههههه جا ما وصلت لحضنج شسالفة كرشج واصل ليوين ..

حياة : هههه شسويلة غير ابنك

صفوان : كعدت و كمت ابوس ابطنها

فدوة لروحي الـ ساكنه داخل روحي

حياة : صار فترة يدفر بية

صفوان : هاذ حرك ع عمه جهاد

حياة : يمكن بنية عمري

صفوان : كلشي من الله و منج اموتن عليه .. اهم شي عندي انتي

حياة : فدوة حبيبي الله يحفظك النا

صفوان : و يحفظج يگليبي ،  انا هالايام رايح لبغداد تجهزي

حياة : ليش ..؟

صفوان : اخذج وياي .. اتم فحوصات دماغي يم الدكتور .. و اعرضج ع دكتورة حتى اتطمن عليج ..

حياة : ان شاء الله حبيبي

جهاد : بووو نمررر .. بووو نمررر

صفوان : جااي .. جااي

تين : بالصاله و يصارخ .. هلا بهالصوت رجع ملى البيت .. طلعت عليه

الله لا يحرمني من هالحس

جهاد : الله لا يحرمني من هالوجه بوية ..

صفوان : يلله گليبي رايح انا ..

بستها و نزلت ..

هااا يخوي ..

جهاد : اامشش ارد افتهم منك شالصار ..

صفوان : طلعنا بالسيارة نفتر سولفتله كل الصار من اول يوم شفت حياة بالكلية لحد اليوم

لكن يخوي هي رزقي والله كتبه لي .. رزق الحلال ما يضيع

جهاد : و هو يحجي وعيت ع هواي شغلات .. منها ان انا احكم ع الظاهر دون الباطن ..

و ان الـ صار كله بسبب الغبن الجرى منا لحرمته .. اذا ثرت لدم اخوي و خذيت الحگ .. الله ما ينتقم لعبده و ينتصف له ...!

الله الـ يسخر رزق بشر لبشر .. ياخذ حگ مظلوم من ظالم ..

صفوان : و انت الصادگ ..

رجعنا للبيت وكت الظهر .. و العصر مريت للمكتب .. بقيت اشتغل بالخرايط لليل

💬 : عمري وينك اتاخرت بالي يمك

💬 فدا عمرج انا .. خذاني الوكت بالشغل .. جايج گليبي

خذيت الخرايط و رجعت للبيت اكملهن لان صدك الوكت تاخر

طبيت بالسيارة للبيت  انا انزل افتح الباب و ارجع ادخلها نزلت رحت سديتها و رجعت خذيت غراضي

اجت تمشي مثل البطة ..

هلا .. هلا .. هلا ابطوطتي

حياة : هههه هلا حبيبي انتظرتك تسد الباب حتى اجيك ..

صفوان : باستني ..

افيييش .. لا رويحتي لا تعبين نفسج انا اجيج ..

حياة : انطيني عنك

صفوان : لا بوية ثگال

حياة : تاخرت شدعوة

صفوان : حبيبتي لوما رسالتج انا ابات ما داري عن الوكت اصلا

صعدنا فوك خليت خرايطي ع مكتبي بالغرفة .. و طبيت للحمام .. محضرته فدوة لعمرها ..

حياة : جهزتله الحمام من دزلي الرساله .. طب سبح و طلع ..

دوم تطلع بدون تيشيرت ..!

صفوان : انا من جنت ولد ما البس .. جا من تزوجت البس

حياة : حقك ..

صفوان : بعدج تنطين الوان كلما تشوفيني هيج ..

حياة : صفوووان ..

صفوان : ههههه فدوة انا للخجول ..

حياة : اني كارهة عمري الراح قبلك ليش مقبلت بيك

صفوان : و انا كرهت عمري لان تاخرت حياة انا سببت كل هذا بيج انا نطيت بيج  ماتعرفين بالصار

حياة : اعرف ..

صفوان : صفنت عليها ..

شلون .. منين

حياة : معاذ كال ..

صفوان : و له عين يحجيها بوجهج

حياة : من تاكد انو انت اسم الله عليك رحت بدون رجعه .. اتجرأ كولشي يحجي لان هو متاكد اني اول وتالي راحيتله رضيت بي او لا ..

صفوان : انااااا هسةةةة متنددددم كوووونن مااااا ذذذبحته

حياة : كام يصيح باوعت عليه و نرفع حاجبي .. و هو يهد و يصد

و الحاصل شنو ..؟

صفوان : انت الي

حياة : لعد ليش تحرك دمك

صفوان : حياة ان مسج احجي .. احرگ البيت عليهم

حياة : لا ..

صفوان : جا حجى بنذالته و نطق بوجهج لان رفضتي  .. ما يمد ايده .. حياااة

حياة : اذا حجيت راح اودي بيدي للنار .. و ما استفاد شي .. يكفيني اخذ حقي منه من كتله و من نفاه من العرب ..

لا گلبي بس كلام و اعصاب لان اني استفزيته بكلامي

صفوان : شگلتي له

حياة : ها  .. لا شي

صفوان : وجهج احمر .. شكلتي

حياة : بقيت ساكته و هو عاگد النونه و اعصابه بوجهه

لو تموت متوصل للوصله هو بگلبي

صفوان : گامت تمتمت و مدنگه راسها ترفع بعينه و تنزلهن من تحجي
انا بساعتها بردت اعصابي و الابتسامه شگت حلگي

رجف گلبي ..

حياة : ها

صفوان : هاذ رجف .. شجاي تسوين بي هديتي حيله

حياة : خليت اديني و راسي ع صدره

الله يديم نبضه ..

نمنا ع حبنا و كعدنا ع حبنا .. من الصبح جهزنا حالنا و طلعنا .. اول مرة اطلع من البيت صار تقريبا سنة ..

اول مرة اشوف البصرة احساسها يختلف بس احساس حلو  تقريبا سبع ساعات وصلنا بغداد ، نمت بالطريق

رند : بابا اتصل الظهر كالي صفوان جاينت اليوم .. روحي طارت من الفرحة .. اتكئبت صار شهرين روحي مقبوضه .. رتبت حالي ..

سها : شكو اليوم مخبوصه كل يوم حابسه روحج بالغرفه خير

رند : سهااوي اليوم جاينا صفوان

سها : صفوان منو ..؟

رند : شبييج مو سولفتلج ..

سها : هااا الفاقد

صفوان : اكعدي گليبي وصلنا

نزلت و رحت نزلتها دگيت الجرس فتحت الباب رند

رند : اهلاا و سهلاا

صفوان : هلا بيج ، الدكتور موجود؟  انا انطيته خبر

رند : هلكد من روحي يمه دمعت من الفرحه ما شفت احد بس هو .. اصلا فقدت الاحساس بالعالم ..

اتفضل

صفوان : خذيت ايد حياة و طبيت ..

تعالي گليبي ..

رند : دامشي كدامه من حجى التفتت شفت بنية وياه حامل .. گلبي هلكد كل يدك سريع وجعتني دگته .. فضول اذاني رغم عرفت هي زوجته بس متت حتى اتاكد

اسفه مانتبهت ع احد وياك

صفوان : عادي و لا يهمج .. هي نسمه هوا تشرح الصدر .. ماتنشاف النسمه بس احساس ..

رند : اهلا و سهلا بيج

حياة : و بيج حبيبتي تسلمين

بقت صافنه علية البنات نفهم بعض استقبالها لصفوان حسيت صدرها منشرح و وجهها مورد

بس من شافتني و كلامه الها .. القهر وضح بوجهها .. لونها نگلب ..

صفوان : حياة زوجتي

گليبي هاي رند بنت الدكتور الي سولفتلج عنه

حياة : اتشرفت بيج عمري

رند : بقيت ساكته .. مو بيدي و لا بارادتي و لا كرهتها .. بس حسدتها عليه .. شسوت بعمرها و يحبها هيج انسان .. حسدتها مو كره بس مادري .. اختلطت المشاعر ..

صفوان : تفشلت گليبي .. شبيها ما ترد لها ..

رند : العفو تفضلوا اگعدوا اروح اجيبلكم شي تشربوا

حياة : گعدنا بالصاله نزلن بنات اثنين و سلمن

سها : السلام عليكم .. اهلا اهلا استاذ صفوان

صفوان ، حياة : و عليكم السلام

سها : يمة ما شاء الله زووجتك ..؟

صفوان : اي

سها : فدوة الله يسهل الج و تكومين بالسلامة

حياة : اجتي بوستني

تسلمين عمري ..

دكتور هاشم : يااا اهلااا .. هاااي منووو يمنااا اليووم .. اهلااا اهلااا

صفوان : اجه الدكتور من برا گمت بوسته

هلا بيك دكتور الله يسلمك ..

دكتور هاشم : ااااكيد وردتك شيخ

صفوان : اكيد

دكتور هاشم : الله يديمكم

صفوان : تسلم دكتور الله يديم عزك

كعدنا نسولف گال ع باجر انمر للمشفى  لخاطر المفراس و الاشعات

نور : والله انتي گلتي

سها : شي متوقع نور ماكو ولد بسنه الا اذا متزوج او مرتبط

نور : الحب واضح بيناتهم ابد معافوا ايدين بعض

سها : لو شفتي من بابا اخذه من يمها
شون طفل و اخذوا امه .. مادري ليش گلبي نشرح .. اذا اكو هيج حب .. الدنيا بخير ..

حياة : صعدتني لغرفته من جان يمهم مخلتني اشيل الجنطة شلون حبابة مددت اريد ارتاح الطريق تعبني غفيت

سها : رند ..

رند : سها روحي

تدخل عليها و تحضنها تنفجر بالبجي

حياة : كعدت الصبح صفوان نايم

حبيبي ،  حبيبي ،  صفوان

صفوان : ممم ،  ممم ،  ها گليبي

حياة : صباح الورد

صفوان : صباح الحب و الجمال

حياة : رجع نام
هاي شنو گلبي گوم راح يصير الظهر

صفوان : لا يالله ،  گومي بدلي

گمت غسلت وجهي و لبست هدومي

حياة : وين نروح ..؟

صفوان : رح اخذج وياي للمشفى شغله ربع ساعه اخذ مفراس و اطلع اوديج لدكتورة

حياة : تمام روحي

بوسناهن و تشكرهن صفوان على كلشي

نور : استاذ ..

صفوان : هلة ..

نور : اعتذر ع الصار ..

صفوان : و لا يهمج ماصار شي

دكتور هاشم : يلة شيخ

صفوان : يلله گليبي ..

خذيت ايدها و رحنا لسيارتنا تبعنا الدكتور لحد المشفى گعدتها بغرفه الدكتور و رحت كملت كل الاجراءات الطبية ..

الدماغ سليم لكن نصحوني ماضغط عليه لان جزء من الذاكرة تلف ، دكتور هاشم دلاني بدكتورة كلش ممتازه علمود حياة

دخلت وياها للغرفه و هم يفحصون نبض الجنين و جنسه .. طلع ولد .. و انا اشوفه يتحرك بالصورة

ابن روحي ..

حياة : عيونه تدمع و هو يباوع ع بطني و ع تصوير السونار .. يرمش بيهن يحاول يخفي دموعه .. عصرت ايده و بستها ..

دفرني الطفل ..

صفوان : هااا .. جا انا كتلج هاذ جهاد رقم اثنين

حياة : يضحك و يمسح بدموعه  ضحكت

عمري لعد مو عمه

صفوان : هاذ هو جتك الطلايب بو نمر

اخذتها من المشفى خذيتها للسوك اشترت هدوم .. انا من البصرة ماخذيتلها هواي .. وراها و كبل لديالى ..

بالطريق كامت تسئلني ع اعتذار نور حجيتلها كلشي

حياة : ماعرف بالطرق لان مطالعه من ديالى من دخلنا بعقوبة و مرينا من يم الجامعه انتبهت

صفووان

صفوان : انا بقيت ساكت انتبهت للطريق گامت تبجي و تجر بيدي

بووية رااح نندعم هههه

حياة : ماعرف شسوي من الفرح ماعرف اختلطت المشاعر عندي .. حزن و فرح و حب .. حتى ماعرف شاحجي

الله يخليك ..

اباوع ع شوارع بعقوبة وصلنا للفلاحه ابجي و اضحك

خصوصا من دخل شارع الطابو .. حيلي كله يرجف ..

صفوان : كامت تبجي بصوت عالي

ها ،  ها گليبي

وصلنا لباب بيتهم .. بقت كاعده و تبجي
نزلت فتحت الباب و مديت ايدي ..

حياة : حيلي يرجف صار هواي مشايفتهم اتذكر وجوهم من طلعت

خليت ايدي بيده و نزلت دكيت الجرس

ام حياة : راائد شوف الباب عيوني

ابو حياة : اي يلة جاي جاي

يالله ..

يفتح الباب

گلبييييي بنتييييي ..

حياة : ابوية فتح الباب انصدم من شافني و عيونه شلال صارن .. يبجي و يحضن بية و يصيح ..
و اني وياه اشهك بالبجي بحضنه

ابو حياة : حياة روحي ما مصدگ يا گلب ابوج

طلعت امي تركض حافية سحبتني من ابوية تحضن و تبوس و تشتم بية و تبجي

يمةةةة حياااة .. صغيررررتي عمرررري ..
ررراااائد بنييي .. بنتيييي راااائد .. هييي هييي مووو ..

صفوان : انا درت ضهري و امسح بدموعي .. يا ظلم شوفناه لهاي الناس ..؟

بحيث الله خذا حقهم من عدنا هيج .. لكن لطف بينا و لطف بيهم ..

دانيال : هذا صوت امي و ابوية؟
شبيهم ... بسلا صار شي ..

طفرت من الجرباية .. وكعت ..

خرررب حظييي المشگكك .. وووووكتكككك

ركضت ع الدرج مادري شكم درجه اطفر .. طلعت شفت حياة بحضنهم ..

حضنتها وية امي سوا ما حلتها .. و ابجي .. شوفتها و دموع امي و ابوية هزني ..

صفوان : طلع اخوها حضنها هي و امها و يبجي وياهم بقوا عشر دقايق لحد ما استوعبوا و هدئوا درت عليهم

السلام عليكم

ردولي السلام و صافنين بوجهي

ابو حياة :
اتفضل ابني اتفضل ليش واكف

صفوان : (بينه و بين نفسه ) جا واكف اتشمس ..

طبيت للغرفة گعدنا امها جابت مي و ببسي و كيك
ليش تعبتي حالج خاله ..

ام حياة : ماكو تعب ابني تدلل

حياة : بقوا ساكتين حتى صفوان سكت وياهم گاموا يباوعون ع بطني اشرت باصبعي عليه
ابوية و اخوية عگدوا حواجبهم و يباوعون ع صفوان

صفوان : انتبهت عليهم وجوهم نگلبت .. جا ناهبها غير مريتي .. اكيد تحبل

انا صفوان .. حفيد الشيخ ..

ابو حياة : اتذكرك ابني انت الي طلعت من الحادث

صفوان : انا اعتذر ..

ابو حياة : قدر و صار حصل خير

صفوان : اعرف عمي .. و حتى اذا ماهو قدر انا ضد الفصلية .. و غبن بنات الناس

ام حياة : ليش ما گلت لجدك هالكلام

صفوان : الا حجيت و گلت لكن ياعمة لا صار الي صار

حياة انا ردتها قبل لا يحدث الفصل بسنتين و ما صارت القسمة بيني و بينها

سبحانه قدر يصير كل هذا و يوم شفتها هي الفصل تمسكت بيها اكثر و عزيتها

حياة : بدوا يستفسرون و هو يسولفلهم
اخذتني امي للغرفة حتى ارتاح لان حسيت بالم

ابو حياة : ابني البنية ع ذمتك بعقد سيد ماكو عقد محكمة حتى ينطي حقوق للي ابطنها

صفوان : انا ضميت لها مفاجئة اهلها و العقد .. لان اريدها حقي و حلالي بالشرع و القانون .. رايدها دوم

فكرت عمي .. انا رتبت كلشي بمحكمة البصرة و بس نرجع اعقد عليها ..

ابو حياة : الله يبارك بيك و يصون عرضك مثل ما صنت بنتي و عزيتها

صفوان : آمين يارب هي هم عرضي

حياة : بقت امي يمي تحقق رادت الاول و التالي لحظة لحظة احجيلها و اني ما قصرت اخذتني السوالف ، بس فقرات الكتل لغيتها  خفت عليها هي گلب ام ميرتاح ابد اذا حجيتلها ع القسوة الي شفتها

بقينا يومين .. و زارتني ريمان گلبت الدنيا من طبت .. و همين عدت الاسطوانه بس ذكرت فقرة الكتل هههه لان هي صندوق اسراري ..

رجعنا للبصرة طلعنا قبل الفجر ثالث يوم  استغربت ليش ما اجلها للصبح و استغربت اكثر ابوية ما گال ليش هيج بنص الليل، خفت لا صاير شي هناك

صفوان : انا بلغت ابوها اطلع قريب الفجر حتى اوصل للبصرة و دوام المحكمة ممنتهي ..
دزيت رساله لجهاد اتفقت وياه ينتظرنا هو و نوار يم المحكمة

حياة : وصلنا للبصرة الصبح وگفنا و نزل فتح الباب باوعت هذا مو البيت نزلت قريت ع البناية

هاي محكمة .. صفوان شصاير ..

صفوان : امشي عمري و تعرفين

حياة : طبيت وياه .. شفنا جهاد و وياه ولد .. مافتهمت شنو ديصير و ليش جابني

صفوان اذا عندك شغل خليني بالسيارة

صفوان : حبيبتي الشغل ميمشي الـ بوجودج

حياة : حبيبي فهمني

صفوان : رحت گصيت وصل انتظرتا شوي و هي قلقة و تسأل و اني اهدا بيها طبينا ع قاضي الشرعية سلمته الملف قراه و بدا يسأل

حياة : گبال القاضي وكفت يلله افتهمت من حجى وياه ع العقد و سئله ع الشهود و قدموا جهاد و الولد جناسيهم

واگفه وراه و دموعي تجري لزمته من قميصه من ورا گمت ماكدر تشيل طولي

صفوان :  لزمتني حسيت بثگلها التفتت عليها تبجي

(بهمس) ها .. ها گليبي .. ليش ليش

قدمتها يمي لزمتها حتى تهدا القاضي طلب نوگف واحد گبال الثاني و لقنا  .. هي الموت تحجي فدوة لربها .. اليوم انكتل ادري بروحي ..

حياة : ماتحمل لا الصدمات و لا المفاجئات حسيت گلبي يوگف من الفرح الشعور الي فوگ حده يوجع وقعنا و طلعنا هو متمسك بايدي و يمشي

صفوان : بوسوني و باروكولي و باركولها و سبقونا لشغلهم صعدنا بالسيارة انهدت بية و تبجي

حياة : اني اعلمك صفووان .. اااني اااعلمك

صفوان : اهدأ بيها و  ميت ضحك ع عصبيتها

جا حتى عصبيتج تاخذ الروح ..

حياة : شسووويت بية شدتسوووي

صفوان : سجلتج باسمي ابوي انتي ..

رجعنا للبيت تلگتنا وجه الخير حبوبة بالباب

الجدة : بشر يولدي  شطلع

صفوان : نمر يمة نمر

الجدة : صلوات بالمباارك يمةة بالمباارك  بوووو ساالم

الجد : جيييت يحررمة جيييت شمالج تصارخين ..

الجدة : جايك شيخ بالطريق .. بووو سالم

الجد : اللهم  صل ع محمد و اله .. بووو نمر

صفوان : يحضنون بية و يبوسون .. جا انا الشايله ابطني ..

الفضل لله و لها بوية

الجدة : هاااذي الحررريم .. الله يبارك بالبطن الـ تشيل السيد يمةةةة

حياة : طلعن البنات ع حس جدتهم يباركن و يبوسن بية .. الظاهر متلهفين ع الطفل من زمان

مرت ايام و الحال مستقر .. اتواصل وية اهلي و ريمان ..
صفوان الـ جنت اذا مر ما انتبه له .. هسة تكفيني بالدنيا فتحته للباب و طبته للبيت ..

قربت ولادتي .. صفوان كلما يجيني تقلصات اني ماعرف لا البكر عبالي طلوكه و هو ميعرف و يركض بية و نرجع ..

اخر شي فعلا جانت طلوگه بس روحي طلعت احس .. بقيت اطلگ ساعات .. و كل اشوي دكتورة تدخل علية تكول بعد
اني احس بالتعذيب .. اريد بس اجيبه من الالم حسيت هاي نهايتي ..

بس من سمعت اول صرخه له .. لا كمت احس بالم و لا اسمع اصوات الممرضات بس صوت طفلي ..
اباوع عليه و هن يسوله فحوصات .. روحي لابت عليه  اريد اكوللهن ع كيفجن من تلزمن ..

صفوان :خليتها بغرفة خاصة انتظر برا هلكت من القلق شسالفة راح يخلص اليوم و وحده تطلع و وحده تطب ..

شسالفةة اااارد اطب ..

الممرضه : استاذ مو بيدنا 

جهاد : ابو نمر هدي ..

صفوان : جدي و حبوبة بالكاع كاعدين ما تحملو ع الكراسي و عماتي .. العشيرة كلها جاية ..

ياهو بقى يم زينة و تين ..؟

جهاد : خالي بدر هسة بالطريق جابهم وية اهله

صفوان : جاي احجي وية جهاد انا من توتري ارد اجلب برگبة بشر و اتهاوش .. تعبت نفسيتي ..

من سمعت صوت الطفل لزكت بالباب افتح بيها ما تنفتح ..

جهاد : كلها طفرت ع صوته .. حتى انا گلبي فز له ..

صفوان : ولدت و محد فتح الباب .. اجتي ابالي صورة امي ماتت ع ولادة زينة .. كمت ادفع بالباب و اضرب بيها

حيااة ، حياة ، افتحوا البااب

حياة : حسيت بس ع صوت صفوان خطية كامن يركضن فتحن الباب

صفوان : اول منفتحت الباب طبيت ركض

شساالفة ..

حياة : اني مستنده ع المخاد و گاعده شدولي مغذي و انطتني ابرة مسكن
طب ركض علية حضني عصرني حيل وجهه احمر من الاعصاب

شبيك روحي ماكو شي

صفوان : مافتحووا .. شمااالكم تاخرتووو

حياة : لزمته من وجهه بديني و ابتسمت

ما سئلت ع نمر ..؟

صفوان : انعل نمر و ابو و عشيرته .. يتعوض هوو .. لكن انتي ما تتعوضين

حياة : حشااك حبيبي الله يحفظك النا

التهيت بصفوان انتبهت ع اهله كلهم ملتمين ع الطفل .. ابتسمت

هههه باوع وراك ..

صفوان : التفتت العشيرة كلها فوك راسه .. ضحكت عليهم .. رجعت باوعت عليها ..

هم لهم نمر و انا لي امه ..

حياة : تروحلك فدوة امه

شاله جده و اذن و كبر باذنه كلهم يتسابقون يردون يشيلوا اني و صفوان كاعدين ساكتين و نشاهد

جهاد : عمة شسالفة جيبي جا انا ما شلته ..

حليمة : هاااك الله يرزقك بطفل سند له

جهاد : الله يسمع منج

خذيته و انا و تين كمنا نلعب عليه ..

تين : لااا تلزم ايده ماتشوفه طري ..

جهاد : ااانتي لاا تخلين اصبعج بحلگه

تين : فددوة انااا .. جاي اشوفه جوعان لو لا

حياة : رجعت للبيت بالليل مرت الايام و ابني ماشوفه غير بس من ارضعه اصلا ميبقى دقيقه بالكاع اربعة و عشرين ساعه شايلي

حتى اذا نام ينام بحضن جده و جديته گلت يوم يومين يملون بس لا مرت اشهر و هم متعلقين بي و جان يسعدني هالشي

صفوان : يلله گليبي تاخرنا

حياة : اخذت نمر

صفوان : اي هياته جا العالم سبقتنا

حياة : يلة كملت

رحنا للمزارع نغير جو كل سنة هيج نزلنا العشيرة كلها ملتمة يسولفون و يضحكون اكو وجوه تشمر سم علية بس اتجاهلت ،  گام صفوان شايل نمر

وين رايحين

صفوان : رفعته ليفوك .. هاااذ الذيب اروح اعلمه ع ركوب الخيل

حياة : ركوب الخيل
اخذه و ركض بي ، ياااا

صفوووووان ..  جييييب ااااابني

ركضت وراهم عيني ع صفوان اريده يرجع الطفل بعده وينه وين ركوب الخيل
وگف و دار علية وصلت ليمه

تريد تموت الطفل يا خيل بعده صغير

صفوان : باعي حولج ..

حياة : باوعت .. الخضارة .. المكان نفسه الـ جنت اجي بي اشكي لله همي ..

مرت سنة ع وجعي سبحان الـ غير حالي من هم لفرج نزلن و اني اباوع حولي و على صفوان
كام يمسح بدموعي

صفوان : انتي الـ خذوج مني ظلام النفس .. لكن الله رفض و قدر

انتي نصي الي ابتعد يوم خلقي و تهنا بالدنيا بس ردينا التقينا باصعب ضروف

انا الـ احبج حب ما صار و لا رح يصير

حياه : شايل نمر بيده ع صدره و حضني بيده الخ .. تمسكت بي

و اني اموت عليك صفوان ..

ــــــــــــــــــ الــنـهـايــة ــــــــــــــــــ

نـازك : لـن تـتـزن الـحـيـاة مـا دامـوا المـنافـقـيـن طـلـقـاء ...

و لا تـاخـذوا مـا لـيـس لـكـم بـه حـــق
فـقـد خـلقـنـا كـل حـواء بـ ادم و كـل ادم لـ حـواء ..