قضية لم الشمل الفصل الثامن وخمسون 58 - بقلم نهى

#الكاتبة_نهى_الحسون
#قضية_الشمل

مساء الانوار والسرور عليكم 🌹🌹🌹

ريم

انتبهت لعناد كان مضيق عينه عليهم وسأل الضابط وكله
.. انا شايفكم وملتقي بيكم بس ذاكرتي ما جاي تسعفني
ما اعرف وين شايفكم

الضابط الي كان اسمه همام جاوبه وهو يباوع عليه بنظرة تحدي وكال .. اذا كنت صاحب مشاكل ورجلك ماخذة على مراكز الشرطة فأكيد تشوفنا

كان الضابط يحجي وعناد اتسعت عيونه على غفلة وجاوبه من باب الاحترام للضابط وكله
.. لا مو بالمركز شايفك هسة على كلٍ عوفك مني ما اريد اعطلك
اكيد انت جاي بمهمة

بعدها عناد التزم السكوت ونظرات المعرفة كانت باينة على وجهه

الضابط كله .. يخلق من الشبه اربعين وانت الظاهر شفت اثنين من هذولي الاربعين

انهى كلامه والتفت على ام مهيمن وكللها
.. خالة وصلتنا معلومات تفيد ان ابنج مهيمن عايش وصحته زينة
واحنا جاي نسوي كل الي يطلع بيدنا حتى نوصله

خالة زهرة جاوبته بلهفة وامل وكالت .. يايمة الله يبشرك بالخير ويطمنك
ربي الحمدلله والشكر على رحمتك الواسعة

هم يحجون وانا دموعي نزلت تطالبني بالافراج عنها بعدما كانت معاندة وياي

خوال مهيمن واولادهم كعدوا يسألونهم عن مكان مهيمن وشكد المدة الي ينتظروها وشلون عرفتوا بمهيمن ومنو جابلكم المعلومات
كانت اسئلتهم متلاحقة

وكان الضباط يردون عليها بكل بساطة وكانت اجوبتهم منطقية ومقنعة

لكن عناد باغتهم بسؤال
.. وجلال ؟؟؟؟ اشو محد منكم كال عنه شي ليش هو مو مثل مهيمن الخطر ملاحقه وابنهم حاله حال مهيمن وهم خايفيين عليه
اشو ماجبتوا طاريه

الضابط غمض عيونه بصبر وكله .. بالحقيقة. احنا جايين علمود موضوع جلال مخصوص هي هاي اهم نقطة بالموضوع

سجاد سأله .. شبي البلاء الاسود بالله رحمة على والديكم ما تكولولنا شنو سالفته هالجلال

هو جان يحجي على جلال وانا گلبي يفور عليه جاوبته وانا
مقهورة .. احترم نفسك واحجي عدل
ترة جلال مو يمك
ما اسمحلك تحجي على ابن عمي وهو غايب
بيك خير انتظرهم يجون واحجي بحضورهم هذا الكلام وجه بوجه

سجاد .. هاي شعندها داخلة يم الزلم
جاوبته بغيض .. هاي عندها اسم انا اسمي ريم بنت عم مهيمن وجلال خاف ما تعرف وانت كاعد ببيتهم لا تنسى و حتى بغيابهم بيتهم اله حرمة
ومن تحجي وياي احجي بأدب يا ابن الاصول ما اتوقع ديوانكم علمك هيج تحجي وية بنية

عناد ابتسم بتشفي وسجاد فتح حلكه وخالهم حسن لزمه وكله
.. كافي وبلا مرادد وحشمني واحترم وجودي البنية حقها واحترم المكان الي انت كاعد بي والضباط منا عندهم واجب
لا تكعد تحجي حجي زايد احنا ما ناقصين

سجاد كام يباوع علية ويخزرني عباله يخوفني هو ما يدري هو حتى ما يخوف حتى جلبي. عمى حتى عمة

وعناد حث الضابط وكله اتفضل كمل كلامك سيدي

الضابط كمل كلامه وكال
.. موضوع جلال هو الي جابنا لعندكم احنا
من خلال البلاغ والمعلومات الي وصلتنا كدرنا نعرف ونتأكد ان جلال الملقب بجلال قربان متعاون وية داعش يعني صار مطلوب للعدالة

سجاد سأله وهو يباوع علية بتشفي ويتشمت كله
.. يعني قصدك جلال صار ارهابي

الضابط باوعله بطرف عينه .. كلمة ارهابي تطلق على شخص ارتكب اكثر من عملية اجرامية مثل خطف رهائن تهديد
او قتل متعمد لمجموعة ناس وغيرها من الامور المرتبطة بالعمليات الارهابية. اما جلال احنا لحد هسة عندنا سجله خالي من الجرائم
والشي الوحيد الي يدينه. عمله وية داعش وهالشي نطلق عليه عمالة ضد
للوطن

ام مهيمن كامت تلطم وكالت.. يمة الولد ماعنده هاي السوالف الي ذكرتها

جاوبها اخوها وكللها .. هو شعم عليج غير هاي طيبة گلبج طلعتي ملفية ارهابي لبيتج وما تدرين

جاوبته ما اكدر اتحمل احد يحجي على ابن عمي
.. شنو عمو انت ما سمعت الضابط شنو كال قبل شوية جاي يكلك مو ارهابي
لو انتوا عاجبكم تلطشون اللقب على جلال

خالهم حسن التفت لابو سجاد وكله
.. عيب ياخوي ما يجوز هذا الكلام من غير ما نتأكد
هذا جلال يبقى وليدنا وعاش بيناتنا واكل وشرب يم كل واحد بينا.
خلي الضابط يكمل كلامه وفهم الموضوع

التفت الضابط على ام مهيمن وسألها .. احنا نريد نسألج عن كم معلومة بخصوص جلال

باوع علية وابتسم بود وكال وطبعاً هذا السؤال موجه الج وهم نريد تحضر اخته. ونسألها يمكن يكون عندها معلومات تفيدنا

استأذنت منهم حتى اروح اصيح لنور ولو هي ما راح تفيدهم بشي لان ما تكدر تحجي

طلعت لكيت حور واكفة ورة الباب تستمع
باوعت علية ونظرت امل موجودة بعيونها وسألتني
.. اكول ريم. شنو اسم الضابط ما سمعته زين
جاوبتها وكلت.. اسمه همام

جاوبتني وزادت عندها نظرت التفائل
وكالت .. الف الحمدلله ربي هاي بادرة خير

عقدت حواجبي ما فهمت عليها بس ما سألتها لان مو وكتها
لازم اروح اجيب نور

رحت عليها وجانت كاعدة على نفس مكانها وصافنة وسكتة متحجي
حجيت وياها
.. نور حبيبتي لازم تجين وياي تدخلين للاستقبال الضابط يريد يستفسر منج بخصوص جلال يريد يتحقق من كم شغلة

باوعت علية بدون حتى ما تحجي
رحت جبت شالها وحطيته على راسها وعدلته
وكومتها وهي كل شي ما حجت. ما تكدر حتى تقرر
كامت وياي اخذتها للاستقبال

وكلتلها نور الضابط كال مهيمن بخير والحمد لله
حسيت بكف ايدها ضغط على ايدي

وهاي كانت ردة فعلها الوحيدة على كلامي
يا ربي شوكت تطلع من حالتها

دخلنا للاستقبال وهي ما حجت شي كانوا منتظرين منها تسلم
اباوع لعيون عناد تباوع عليها من جوة لجوة. كان ضايج من الضابط الي ابتسم لنور ونهض من مكانه وكلها انت اخت جلال

جاوبته انا بدالها.. اي هي اخت جلال الصغيرة. واسمها نور
الضابط يباوع عليها وجاوبني .. عاشت الاسامي
اتفضلي اختي كعدي

رحت اخذتها وكعدنا يم ام مهيمن وصار الضابط يسأل بنور ويسألني ويسأل ام مهيمن

والاسئلة كانت روتينية مثل وين يروح وويامن يطلع
شنو شغله اوقات رجوعه للبيت وغيرها من الاسئلة
الي تفيدهم وويامن يلتقي وباوع على البقية
كان السؤال موجه للكل

نور ماجاوبته والضابط حجة وياها حتى يطمنها
.. اختي لاتخافين احنا بس نريد نسألج على كم شغلة بلكي تفيدنا حتى نكدر نوصل لمهيمن وجلال

ام مهيمن جاوبته.. ياخالة البنية مصدومة من يوم الي اختفوا بي اخوانها وهي على هذا الحال ما تحجي من خوفها

كملت على كلامها.. نور اذا تخاف تلتزم الصمت وتبقى بالايام متحجي
جنت احجي والضابط باوعلها بنظرات عطف
وهذا عناد ورث مثل الجيكارة عيونه على الضابط عبالك يريد ياكله

والضابط لطش كل شوية يسأل ويباوع لنور
عاد عناد طكت روحه وكله
.. سيدي مو كلولك البنية ما تكدر تحجي لاتكعد تحرجه كل شوية تسألها

اخذ كلاص الماي وجاوب عناد
.. انا سؤالي كان موجه للكل مو بس للاخت

كان سؤال الضابط عن جلال وية منو يطلع احياناً
عناد جاوبه .. جلال بالايام الاخيرة جان مرافق
واحد زايعته الدنيا اسمه ابو طبرة.

الضابط شرگ بالماي وكام يكح
عناد كمل كلامه وكال .. اذا تحب ادليك على مكانه

الضابط همام جاوبه وكله .. تمام اذا كانت عندك معلومات بخصوص هذا الي اسمه ابو طبرة تفيدنا
افضل تجي ويانا للمركز حتى ناخذ ايفادتك

وبعدما كمل الضابط تحقيقه واخذ المعلومات
نهض من مكانه وسلم على ام مهيمن وصار يطمنها
وبعدها طلعوا

والخوال وعناد طلعوا وراهم اسمع الضابط كال لعناد
تكدر تتفضل تجي ويانا ناخذ من وقتك
جاوبه اي ميخالف اجي وياكم

دخلنا جوة البيت وسمعنا صوت نقال نور يدك
رحت شفت نقالها لكيت خالتها تتصل عليها
اهوووو هاي هم لحت بالاتصالات

رديت عليها سألتني .. ادري شنو السالفة ليش كلما اتصل على نور انتي تطلعيلي ترة ما صارت اريد احجي وية نور

جاوبتها .. نور طالعة وية ام مهيمن للسوك
.. من ترجع سأليها على الحوالة اشو ماكو صارلها يومين
جاوبتها .. ان شاء الله اكللها
.. ومن ترحع خليها تتصل علية ضروري
..ماشي
سديته من دون ما انطيها مجال بعد تكمل كلامها

جلال

وصلنا للموصل صارلنا ثلاث ايام
اول يوم وصلنا بي جنت حاط گلبي بشيشة من خوفي على مهيمن لا ياخذونه بعيد عني

وصلنا للمعسكر او لمركز تجمعهم جان قريب على النهر
واشجار كثيفة هذا الي كدرت اجمعه من معلومات عن المكان الي وصلناله هذا يختلف عن مكانهم القديم الي كنت اشتغل بي وياهم انا وسلوان صرت اراقب واتمعن بكل تفاصل المكان وصلنا وصادف جان الوكت ليل ظلمة وبس اضوية المعسكر مالية المكان

هو نفسه المعسكر الي كانوا يحجون عنه الضابط علي وهمام
يسمونه المعسكر المجهول.

تسميته اجتي من جهلهم بدواخل ومكونات هذا المعسكر ماكو ما بي اي ثغرة تخليهم يتوغلون للداخل ويبدون بفحص جميع المنافذ الي توصللهم منه للسلاح والمؤونة
دخلت السيارة لداخل المعسكر
اول ما اتوقفت السيارة استقبلنا واحد لابس اسود وعمامته سودة
عرفوني عليه وانا سلمت عليه ،وهو سلم بكل لهفة. وامتنان

دخلنا للداخل لمكتب الامير هي جانت عبارة عن غرفة ما بيها
شباك لاحظت قلت النوافذ بهذا المكان

الغرفة كانت مأثثة بأثاث عادي بيها انواع الاسلحة معلكة عالحايط عبالك متحف كعدنا يمه

وبدأ ابو ذياب يحجيلهم عن الي صار ويانا بالطريق
وكللهم عن طلبي ان يكون مهيمن عبد عندي
والامير ابتسم وكال
.. يتدلل جلال اعتبره صار تحت طوعك واذا كنت تريد نحقنه بأبرة
تخليه يفقد السيطرة على حركته وتضعفه
حتى تكدر تسيطر عليه

جاوبته بخوف بس اني ابتسم بوجهه ابتسامة عريضة
.. لا لا ما يحتاج انا اريده وهو بكامل قوته استمتع اكثر وانا اراقب فقدانه لاخر ذرة من قوته وكبرياءه

بعدها طلعنا من يم الامير
وبعدها اخذني للورشة كال هاي الورشة الي تشتغل بيها

انتبهت عليهم دخلوا مهيمن للداخل جايبينه وهم معصبين عيونه
و مقيدنه واخذوه كدام عيوني احس گلبي راح وياه
كوة لزمت نفسي ما اروح وراهم خايف يأذونه

لزمته من ايده وكلتله .. وين ماخذين عبدي الامير حكملي بي
يعني لازم تبقي يمي وين مااكون
‏‎
هو باوع علية وعلى مهيمن الي يتلاوة بغضب وية الي مقيديه
بس ميكدر يكول كلمة لان حلكه مربوط الحمدلله جان فضحنا

.. ما نكدر نجازف ونبقيه يمك خاف يفتح قيوده هذا ثور هايج ودمه حامي والاشخاص الي مثل حالته يستمدون قوتهم من غضبهم
ما نحزر حركته خاف ينفذ تهديده
وصدك يموتك واحنا ما صدكنا نجيبك هنا
شوف شلون يتلاوة وية الشباب

اذا كان على القيد فانا بنفسي راح اتأكد من تحكيم اسره

اريده كدامي هذا طلبي طلبته من الامير وهو وافق عليه
شنو هذا العبد مدلل اني هنا وهو بغير مكان غير يبقى يمي يخدمني واذله

اذا تريد ارجع اسال الامير اتاكد من طلبي

هو سمع كلمة الامير راسا تراجع
اخير شي وافقوا يخلونه بالورشة الي راح ابدي شغلي بيها
تصير بنهاية المقر

التفتت على ابو جراس .. اكولك اكد عليهم ما يسون شي
هذا حصتي اريده صاغ سليم واني الي اهينه واعذبه بيدي

.. لاتخاف عليه هذا جلده خشن يتحمل وداعتك هذا عنده مدة
صلاحية ما تنتهي

.. هو الزين حتى ياخذ وكت طويل مو راسا يموت بيدي

ربطه بزاوية الورشة وطلعنا بعد ما اطمنت محد يسويله شي

دخلني لغرفتي جانت بسيطة حتى هاي ما بيها شباك شنو سالفتهم وية الشبابيك
يعني ماكو اي متنفس اشوف منه المكان ملينا ريحة عثة ورطوبة

ابو جراس .. شوية ارتاح وبعد ساعة اجيبلك صينية العشا
حتى تاكل وترتاح وان شاء الله باجر نباشر بالشغل

تركني وراح
كعدت بالكاع مهدود حيلي محتار شلون اخلص مهيمن واطلعه منا
غمضت عيوني ورجعت راسي وسندته للخلف وانا افكر بكل الي صار
بيني وبين مهيمن كنت مجبور لازم اخذه وياي

ماجان كدامي خيار حتى احافظ على حياته
كان لازم اخذه او يقتلونه
لان عرفت هاي نيتهم من نزلوا وسلاحهم بيدهم لان اعترض طريقهم
اعرف ماراح يتركونه لان مايحبون يتركون وراهم اثر يدل عليهم
هم القتل يمشي بدمهم اسهل منه ماكو عدهم

جنت خايف عليه ما جان بيدي غير بس اخذه
وياي على الاقل اضمن هو عايش

جريت حسرة مهموم. اااااه شجابك وراية مهيمن

يوم ثاني كعدت من نومي ورحت راسا عالورشة حتى ما انتظرت احد ياخذني لهناك رحت عليه لكيتهم لاعبين بخلقته

وجهه عبارة عن لوحة ازرق واحمر كان بعده مقيد
نايم بالگاع تعبان رحت اقتربت منه اريد اجس نبضه
منظره. اخذ عقلي دنكت عليه

فتح عيونه بالكوة وحجة بصوت واهن
.. جلال ليش جذبت عليهم وكلتلهم اخذت مني فلوس
وهذا الشي ما صار

ابتعدت عنه بسرعة ما جاوبته وصرت اعاين بالورشة خاف يطلع المكان مراقب وفعلا كان شكي بمحله لكيتهم ناصبين كاميرات مراقبة بزوايا الورشة

بقيت جامد بمكاني بعدها رحت طلعت من الورشة ما اريد
ابقى لان مهيمن راح يبقى يحجي

بس بكلبي عهد انطيته لنفسي
ان شاء الله احقق الهدف الي جاي علموده
اخذ بثار كل العراقيين الي قتلوهم هذولة الانجاس

اخذ بثار مدينتي الموصل الي هدموها وهدموا تاريخها وحضارتها

اخذ بثار بيت خالي وصديقي سلوان وانضاف على القائمة اخوية مهيمن هسه من شفت وضعه وشلون ضاربي بدون رحمة

ريم

مر اسبوع على اختفاء مهيمن وجلال وماكو اي اخبار عنهم لحد الان والحال على ما هو عليه

اقرباء ام مهيمن مالين البيت ناس تروح وناس تجي
حتى اصدقاء مهيمن اجوي يتطمنون بين فترة وفترة
اما عناد فبعدما راح وية الضابط للمركز

يوم ثاني اجانا عناد للبيت ونظرة الاصرار والتفاؤل بعيونه
وحجة وية ام مهيمن وكللها اريد مفاتيح المحل
مال مهيمن والسجلات

.. محل مهيمن ما يعزل
راح يبقى يستمر بالشغل
وانا وطالب ابن خاله حسن راح نمشي الامور لحد ما يرجعلنا بالسلامة

طالب كان هذا واحد من اولاد خاله حسن
حباب مهيمن مشغله وياه محاسب عالقوائم

عناد اخذ على عاتقه كل يوم يجي ويجيب السجلات والقوائم ويطلب من ام مهيمن تشوفهم ويكون دائماً محمل بالمسواك

ام مهيمن جاوبته.. يا خالة ليش تكلف نفسك الله يرزقك ويفتحها بوجهك
جاوبها.. خالة انا ما مسوي شي هذا كله من حلال ابنج
يعني حقكم وجاي تصرفون منه وعفية خالة مو تنسين
تخلين وحدة من البنات تراجع القوائم والسجلات
خاف اكو اخطاء او خلل بالسجلات فايتني

.. خالة ان شاء الله ماكو فرق والحلال واحد
.. ميخالف هذا حق الله مابي شي تتطمنون على حلالكم

اتعودنا على عناد يجيبلنا كل يوم مصرف للبيت ومسواك بين فترة وفترة حتى اخو ام مهيمن
حسن اجاها وكللها .. ليش خوية احنا مو موجودين يمج ليش تتقبلين تاخذين من الغريب وترفضين منا العطية

جاوبته وكالت.. انا ما ماخذة من احد وحتى عناد بيوم وافقت اقبل اخذ منه كنت اعرف مسواكنا ومصرفنا مصدره من حلال ابني
انت تعرف كلش زين المحل والمعمل شراكة وية بيت الحجي ابو حيدر و كثر الله خيره الرجال ما نسى اهل صاحبه وقرر يتعامل وية الوضع مثل ما مهيمن موجودوما رضى الشغل يتوقف

ومن عندها اتعودنا عناد ورة ما يعزل المحل يجي ينطي السجلات والمصرف يم ام مهيمن

وبذيج الايام هواي عانينا من ورة كلام الناس بدى ينتشر وصارت قصة جلال ومهيمن على كل السان والاشاعة انتشرت
ان جلال ارهابي وطبعاً ما يحتاج نعرف من ورة هذا الكلام

وام مهيمن عتبت على اخوها ابو سجاد كلتله خوية الحجاية طلعت من ابنك اعتب عليك شلون ترضاها تشهر بأبن اختك

جاوبها وكال .. وانتي شبيج خايفة عليه وكاتلة روحج هذا مايصيرلج شي

جاوبته وكالت .. الي جاي تحجون عنه يصير اخو ابني يعني
احنا مثل تفال السما كل حجاية مردها علينا

جانت ام مهيمن بهاي الايام مثال الام الصابرة صحيح صحتها ما تعينها بس بقت صامدة وتحاول تأدي واجبها بتجاه بيتها وحياتهم

حتى اخوها حسن ما رضى على ابو سجاد وابنه
وذاك الثاني زعل وطلع من البيت يكوللها خلي الارهابي يفيدج كضيتي طول عمرج تفضلين الغرب على اهلج

جان يقصد بزواجها من ابو مهيمن ورفضها لاخو زوجته بعد ما تركها عمو مؤيد
وبعدها تزوجت ابو حور هم واحد من منطقتهم بس مو قريبهم
هاي طبعاً سالفة سمعتها كالتها ام مهيمن لمرت اخوها حسن وصادف اني كنت موجودة

لكن الشي الوحيد الي رجع لوضعه الطبيعي اني وحور رجعنا للدوام بالكلية
من ثالث يوم رجعنا لدوامنا من بعد ما وكفت معترضة كدام حور
.. حور كافي لشوكت تبقين كاعدة تندبين حظج ومنطوية على روحج تتوقعين اذا بقيتي على هالحال مهيمن راح يرجع او
تنحل الامور لازم ترجعين للدوام

كان ردها بس الدموع
.. مو بيدي غصب عني گلبي صاير مثل النار على اخوي وگلبي شايل هم بحمل الجبال ما اكدر ابوح بي

هاي ثاني مرة حور تحجي بكلام ما مفهوم
باوعت عليها وكلتلها.. حور فكري بمهيمن هو ما تعب كل هذا العمر كله ووصلتي لكلية طب حتى تهدمين كل الي بناه بلحظة ضعف

وام مهيمن حجت وياها حتى تقنعها
ومن بعدها رجعنا للدوام اما نور فهاي المسكينة بعدها عايشة بعالم ثاني لاتحجي ولاتشارك بأي شي عيونها تتحرك فقط من تسمع بأسم مهيمن او جلال

خايفة عليها سألت صديقتي ابوها دكتور اعصاب
كالت بابا يكول لازم يعرضونها على دكتور اعصاب
بنت عمج تعاني من حالة نفسية

اخذت على عاتقي بأول فرصة اخذها للدكتور لان حالتها صار ما ينسكت عليها

خلص الدوام وطلعت لكيت السايق ينتظرني

اتجهت عليه حتى اصعد بالسيارة. اجاني طالب ويانا بالقسم
وسألني .. ريم اريد احجي وياج بموضوع مهم

باوعت لساعتي هسة حور راح تطلع
جاوبته .. اي نعم تفضل بس ياريت تستعجل لان بنت عمي تنتظرني
كال .. ما راح اخذ من وقتج بس حبيت انبهج ترة اكو بعض الطلبة
جاي يحجون بسالفة اولاد عمج على الاساس يشتغلون وية داعش ومن هالحجي فانتبهي منهم واذا تردين اروح وياج لعمادة الكلية
حتى انطيهم الاسماء ما عندي مانع

طبعاً انا بلغتج بالكلام الي سمعته لان انا مريت بنفس موقفج
بس ابوي انسجن صارت تطلع الشائعات والكلام ما انزل الله به من سلطان

هو يحجي وانا النار صارت تاكل بگلبي جاوبته
.. ممكن تكلي منو هم

جاوبني .. ادري كلش زين من انطيج الاسماء راح ترحين تتهجمين عليهم وينگلب الحق ضدج فخلي العمادة هم الي يشوفون شغلهم وياهم وانتي بنية وهذولي آفات. كل شي اتوقع منهم

اتشكرت من الولد واتواعدت وياه باجر نروح اني وياه ونبلغ عنهم
بعدها رحت صعدت بالسيارة وصرت اباوع بالوجوه
ما اعرف صرت اشوف كل اثنين واكفين ديحجون
عبالك يحجون علينا

بالطريق اني وحور شافتني وكالت شبيج معصبة
ما بية شي بس اعتب عالقدر الي خلة اليسوى والمايسوى يستشرف براسنا

اااااخ تدرين شنو اتمنى ؟؟؟
اتمنى مهيمن وجلال يرجعون
والله متحلفة بكل واحد حجة علينا واتهمنا اريد ادليهم على بيت واحد واحد بيهم واخليهم يحطون اصابعهم بعيونهم

جنت احجي بقلة حيلة بس لازال الامل يتربع بگلبي ولازلت اقاتل
مستحيل ارضخ مهيمن وجلال راح يرجعون واشتكيلهم
على كل واحد اتجرأ. يحجي ويتبلى عليهم بس خلي يصبرولي

وصلنا للبيت ونزلت من السيارة وجان اشوف سيارة
واكفة يم باب بيت مهيمن وباب البيت مفتوح

مريت من يمها ودخلت البيت شفت واحد كاعد بالهول ويمة جنطة

عقدت حواجبي مستغربة. هذا الرجال شايفته رحت اقتربت من السيارة وسألته بأستنكار

.. انت مو صابر رجل خالة نور ؟؟؟
وهذا منو وياك
نترت بي بغضب .. انتو شلون تسمحون لنفسكم تدخلون للبيت وتكعدون ومابي رجال

جاوبني وهو يطلع من البيت وشال بيده الجنطة وراح عالسيارة واني اباوع وراه
وفتح صندوك السيارة يريد يحطها بيها

عقلي كعد يحلل بسرعة هذولي شعندهم هنا جايين
ودك جرس عندي ان هاي الجنطة الي طلعت من البيت تخص نور
شهكت بخوف
ادركت شنو غايتهم من ورة جيتهم هاي واتربعت كل شياطين
العالم براسي درت وجهي على حور الي جانت واكفة تباوع بحذر عليهم

.. حور بسرعة روحي لبيت خالج حسن خلي يجي لهنا كليلة اخت مهيمن يردون ياخذونها بالگوة
.. بس خاف ما موجود بالبيت
.. روحي صيحي لاي واحد حتى لو هذا سجاد العار هم ميخالف اهم شي يشوفون رجال ويرتدون

حور سلمتني جنطتها وسجلاتها وراحت تركض
وصابر جاوبني .. انت هي على شنو رحتي حشمتي الناس
ترة احنا اهلها شنو قابل خاطفينها

.. انا ما عندي حجي وياك. انا كلامي وية خالتها
تركته ودخلت للبيت اركض

سمعت ام مهيمن بالغرفة يم نور لازمة راسها وهي تتحسب وتصيح ولك يمة مهيمن وينك تعال شوف يردون ياخذون اختك من بيتك وهي مالها لاحول ولا قوة

سمعت كلام ام مهيمن وزاد جناني فتحت باب الغرفة على وسعه ولكيت خالة نور جاي تلبسها شالها وجبتها

عطت بيها بصوت عالي وكلت .. انت هي على وين تردين تاخذينها

باوعت علية سناء وجاوبتني .. اريد اخذ بنت اختي تعيش وياي
.. انتي بكل عقلج اخليج تاخذيها وتطلعين الا على جثتي

جاوبتني .. وانتي منو اصلاً وين جان هذا حرصج على بنت عمج من صارلها اسبوع مريضة وكاعدة ميتة من الخوف فاقدة الكلام من ورة الضيم الي عايشة بي بس حقها تنخرس البنية اذا
طلع عندها اخو ارهابي والثاني ميت

عطت بيها .. انتي منين جبتي هذا الحجي
جاوبتني .. صابر رجلي اجة للبصرة بعدما عجزنا نوصل لنور علمود الحوالة. ومن اجة لهنا سمع بسالفة اخوانها ورجعلي وكال لحكي بنت اختج طلعت عايشة وية ارهابيين وانتي ما تدرين

جانت تحجي وياي وكملت تلبيس الشال لنور
رحت هديت عليها وسحبت من بين ايدها نور الي جانت ترجف مثل السعفة وايديها قالب ثلج

حطيتها وراي وصرت ادفع بخالتها لحد ما طلعتها بالطارمة
هي تدفع واني ادفع جان خوف نور مصدر قوتي
كانت لازمة قميصي من الظهر

وانا گلبي يحوم ويترقب جية اي واحد يفزعلنا من بيت خوال مهيمن المشكلة هذا الوقت كلهم بالشغل

حجيت بتهديد وتوعد .. شوفي لج انتي اخر من يحجي على الحرص لانخليني احجي سوالف زوجج

.. احترمي نفسج وديري بالج تجيبين سيرة زوجي على لسانج رجلي محترم وهو الي ربى نور من جانت صغيرة

..بالله ما تكرمينا بسكوتج ترة سالفة نور وانقطاعها عن الكلام كان سببه تحرشات زوجج بيها
شهكت ولطمت على صدرها

.. لا تسوين روحج متفاجئة
دخل صابر للبيت وهو يصيح .. لا تظلين تمسلتين بالحجي
وتحجين بكلام اكبر من راسج
بالقران لو رجال جان عرفت شلون الطمه على حلكه واكسر سنونه واخليه يتوب يحجي ويباوع بوجهي

اتخصرت كدامه وكلت .. لا انا مو رجال انا بنية بس الساني يعادل عشر زلم
يالله هسة تاخذ مرتك وتراوينة عرض اكتافك وترجع منين ما اجيت
ترة راح يجون خوال مهيمن ويراونك النجوم بعز الظهر

خالتها غافلتني ودارت من وراي سحبت نور من ايديها
اتخبلت اجة عقلي

حرت شلون اتعامل وياهم وكعت عيني على عصى الماسحة رحت عليها وانطيتها دفعة اتعثرت للخلف وجريت نور وحطيتها وراي مرة ثانية ورفعت الماسحة وصحت
.. شوفوا انتي وياه اذا هسة ما اتحركتوا وطلعتوا منا بالقران اتصل على الشرطة واقدم بيكم بلاغ مالكم حق تاخذون نور

وياكم انتوا مو بكيفكم نور جبيرة وهي الي تقرر

سناء جاوبتني وكالت .. حبيبتي هاي هي كدامج مكالت شي ولا اعترضت من بدلتلها وجمعت غراضها كانت متقبلة الموضوع

جاوبتها.. نور متكدر تحجي ولو تحجي جان شفتيها تفضل الموت ولا ترضى تروح ترجع وياج يم صابر

وهسة انتي اذا تردين تاخذيها فلازم تنتظريها ترجع تحجي وتوافق بنفسها كدام الشرطة يالله يسمحولج

جنت احجي والماسحة بيدي وهي وصابر واكفين بالطارمة وباب الشارع مفتوح

حور دخلت وكالت .. ريم رحت لبيوت خوالي محد موجود واتصلوا عليهم وهسة هم بالطريق راح يجون

.حسيت بالضعف والخوف مهما يكونون رجال اثنين وخالتها الافة واكفين كدامي واني وحدي

وصابر كال ..يلة سناء ترة طولتيها جري بنت اختج دنروح سعدون مستعجل

واني سمعت اسم سعدون زاد جنوني رفعت العصاية كاتاهم الي يتقرب والله اكسره بيها

بهاي الاثناء الي جنت اتمنى من رب العالمين واحد من خوال مهيمن يوصل
ندك الباب وجان اسمع صوت عناد الي دخل مستغرب لان الباب مفتوح هيج

.. خالة خو ما صايرشي عليكم شنو هالعياط

يتبع

احداث البارت القادم

دخلت عالورشة وجان الكة مهيمن كوة ياخذ انفاسه
لاااااا ياالله دخيلك هذا منو الي مسوي بي هشكل رحت
اقتربت عليه بكل برود وانا كوة لازم روحي ما اركض عليه واتطمن عليه.

حركته برجلي اريد اشوفه
رفع راسه بالگوة وگال بصوت مكسور
.. جلال احلفك بالدم الي بينا تخليهم يقتلوني

اتمنى لكم قراءة ممتعة
اختكم نهى الحسون

.