قضية لم الشمل الفصل الثاني عشر 12 - بقلم نهى

اسعد الله مسائكم ياحبتي المتابعين

#الكاتبة_نهى_الحسون
#قضية_لم_الشمل

مهيمن
وصلت لبغداد وكان الوقت الساعة ب١ الظهر
اتصلت على المحامي الي اسمه ابو سيف
.. ابو سيف انا وصلت لبغداد انت وين
موجود بالمكتب ؟؟

ابو سيف بلهفة.. اي .. نعم انا موجود انتظرك تشرفني بمكتبي
وبعدها سألني .. مهيمن انت تغديت لو بعدك ؟

جاوبته مستغرب .. لا والله ليش اكذب عليك
انا هسة وصلت من البصرة بس لاتكلف نفسك الله عليك
انا جاي بس اكمل وياك معاملة الوصية وارجع للبصرة بنفس اليوم

جاوبني .. لا ميصير عيب علينا تنزل عدنا ببغداد وما نضيفك تعال انا راح انتظرك بالمكتب حتى نتغدا سوا

نهيت الاتصال بعدما اتشكرت منه
ورحت مباشرتاً بوجهي للمكتب
رن نقالي وكان المتصل امي
على طول الطريق وهي ما بطلت اتصال

جاوبتها.. هلا يمة انا وصلت لبغداد وهسة متوجه لمكتب المحامي انتي لا يبقى بالج

كالت وصوتها بي رعشة بجي
.. يا يمة الف الحمدلله على سلامتك ، يمة مهيمن طمني اكلت شربت لو بعدك ؟؟
.. لا يمة بعدني هسة رايح اتغدا وية المحامي

.. اي يمة الله يرضى عليك اكلك لكمة لان انت من البارحة باقي على لحم بطنك كل شي ماماكل
.. لتخافين ما يصير بي شي

.. زين شلون بيك وين راح تنام اليوم وعند منو تبات
.. والله ما ادري احتمال ارجع بنفس اليوم بلكي ما يحتاج اظل ببغداد
اروح للمحامي وافتهم منه ان شاء الله الشغلة ما تطول

.. اي وعفية يمة ما اوصيك اذا رحت يم المحامي مو تعصب

جاوبتها.. شلون بيج يمة وتالي وياج ما كافي اسئلة اريد اروح للمحامي ينتظرني
.. ولك يمة غير خايفة عليك هسة قابل عندي عشرة
واعوفك هيج ما ادري عنك وين ما وين

.. رحمة على موتاج يمة ما تكليلي انا وين رايح وكل شوية متصلة علية هي بغداد هسة الي يسمعج يكول رايح اجاهد

.. مو ادري بيك بسرعة تعصب وتظل تحرك بدمك وخاف تسمعلك كلمة من اهل ابوك تسم البدن وما تتحملهم وتتعارك وياهم امانة عليك يمة لا تعصب واول ما تطلع من يم المحامي تطمني عليك

ادري بأمي مستحيل تعوفني ولو انطيها بعد مجال تخلي الخط مفتوح على طول وتبقى وياي تحاجيني وين ما اروح ومو بعيد تطلب مني افتح كاميرا بس الحمدلله ماكو كاميرا بالاتصال عالخط جاوبتها اطمنها

.. صار يمة وبعدين اكولج كل شي يصير بيني وبين المحامي بعد تأمرين على شي ثاني

.. لا يمة سلامتك ما يأمر عليك عدو
سلمت عليها وانهيت الاتصال وتوجهت للمكتب

وانا متأهب للقادم الاتي عبالك عندي حرب
اكيد عائلة مؤيد راح يطلعون ناس
متكبرين وحقنة وشافين نفسهم

والله العظيم اذا المح واحد منهم يوجه لي نظرة وحدة بعين الصغيرة
امسح بيهم الاراضي ذهابا وايابا واحرك المكتب على روسهم

انتبهت لروحي عاگد حواجبي ولام ايدي بقبضة عبالك عندي عركة
استغفر الله هسة انا بعدني كل شي ما شايف منهم
ولا اعرف عنهم شي وحاد سنوني عليهم بالله طلعوا عكس ما انا متوقع

لالا .. الله لا يگولها يارب كون يطلعون عائلته ناس يستاهلون السحل
حتى اكدر اطفي ناري المستعرة بيهم

وصلت لمكان المكتب ودخلت ولكيت رجال يجي عمره بالخمسين لابس ملابس رسمية منتظرني بباب العمارة الي بيها المكتب

شافني وابتسم واجة بأتجاهي وسألني
.. انت مهيمن صح ؟
هزيت راسي بالموافقة.. اي نعم
مد ايده للسلام وابتسامته المرحبة مالية وجهه
.. هلا والله بأبن الغالي نورت بغداد يجيتك

سلمت عليه .. بغداد منورة بأهلها
.. تعال تفضل جوة بمكتبي خلينا ناكل لكمة ونسولف
ما تعرف شكد كنت منتظر هاي اللحظة من زمان

كان يحجي وياي عبالك يعرفني من زمان
وبالحقيقة هالشي طمني وبنفس الوقت بعدني متمسك بالحذر ما اتنازلت عنه

دخلني المكتب وكان كلش كبير كان اكو
مكتب بالنص وعلى جانب بعيد من المكتب

كان اكو ميز وكراسي على صفحة و الاكل مفروش عالميز

ووكعت عيني على شاب كاعد على ميز الاكل كان ماد ايده يريد ياكل
وهو اول ما شافنا بسرعة سحب ايده من الاكل

وكفت اللكمة بحلكه من الفشلة
باوع علينا بأحراج

ابو سيف كله .. الله عليك اخذ راحتك ومد ايدك واكل لا تستحي
نظراته كانت كلها شك وريبة

الشاب جاوبه.. والله ما راح اكلك لا
لان اني ميت من الجوع وهاي جيتي من الموصل واجيت راسا بوجهي للمكتب

ابوسيف.. يخسي الجوع تعالوا خلينا ناكل
لان انا مثلكم جوعان

كان المحامي يباوع للشاب ويبتسم ويرجع يباوعلي
ما اعرف ليش احس ورة هذا المحامي سالفة

التفت علية وكال .. تعال مهيمن اتفضل اكعد اكل ويانة ومد ايدك

باوعت للمحامي انتظره يعرفني عالشاب قبل لا اكعد اكل وياه

لان عيب زحمة نكعد ناكل سوية ونتشارك الملح والزاد واحنا ما متعارفين على بعض على الاقل من باب اللياقة والاصول

بس شكله هذا ابو سيف مو ابن ديوان ولا يعرف للاصول

اهووو هسة انا شنو قصتي من يوم الي عرفت بشغلة ابوية
وانا صرت هواي احلل وادقق بالتفكير. وهذا مو طبعي

رحت كعدت عالميز ودك نقال المحامي
استأذن من عدنا وكال
.. انتوا اخذوا راحتكم اكلوا بين ما اخلص هاي المكالمة ما راح اتأخر عليكم

تركنا وطلع برة المكتب يحجي وية المتصل

باوعت للاكل ومعدتي علنت عن اعتراضها لان ناسيها
انتبهت للشاب يباوع علية وتبادلنا النظرات بفضول

للحظة حسيت هذا الشاب انا شايفه بس ما ادري وين
جليت صوتي قبل لا امد ايدي واكل وحجيت وية الشاب

.. هذا ابو سيف شكله نسى يقدمنا لبعضنا

مديت ايدي للسلام وكلت
.. وياك مهيمن من البصرة

هو مد ايده بابتسامه وكال
.. يا اهلاً وسهلاً بيك وبأهل البصرة وانا جلال من الموصل

.. حيا الله اصلك

وضحتله
.. احنا اهل البصرة بينا طبع نحب نعرف الي يشاركنا الملح والزاد

ضحك وكال .. يابة عند البطون تعمى العيون
انا الكدامك هاي جيتي وما ماكل صارلي قرن ، باقي على اكل المستشفى

بديت اخذ راحتي وياه لان من جوابه كان مبين شاب بسيط مو معقد

وبدينا ناكل ونحجي بأمور عامة ونسينا حتى المحامي

وبعدها سألته.. انت منو مسوي بوجهك هيج

بلع لگمته وكال

.. اسم الله عليك سويت حادث سيارة
بقينا نحجي على الاوضاع وبغداد وازدحاماتها

بعدها كملنا اكلنا
وكام الشاب الي اسمه جلال واستند عالعكازات
وكال

..اذا تريد تغسل ترة هناك اكو حمام

اشرلي على باب بزاوية بالمكتب
نهضت من مكاني .. اي والله محتاج الحمام
رحنا غسلنا ورجعنا نريد نكعد

بس فجاءة الشاب اختل توازنه ووكعت العكازة من ايده
وانا اتلاحكت عليه وسندته قبل لا يوكع ويتكسر

وهو استند على كتفي وكان مصدوم من اثر الهبطة
عدلت وكفته اريد اخذه للكرسي حتى يكعد

وبهاي الاثناء دخل علينا المحامي وشافني والشاب متكئ علية حتى اوصله لمكانه

باوع علينا وعيونه لمعت بدهاء وكال
.. مرحبا شباب اعتذر عن التأخير بس كانت المكالمة كلش مهمة.
كان يحجي ونظراته تتنقل بيني وبين الشاب

بعدها كمل كلامه
.. اي صدك انا اعتذر منكم لان نسيت اعرفكم على بعضكم

جاوبته وانا ذراعي محوطة خصر الشاب الي متكئ علية
.. ما يحتاج تعرفنا على بعضنا سبقناك وتعارفنا

والشاب جاوب .. اي والله مهيمن سبقك
ابتسم المحامي وكال

..اي صحيح انتوا تعارفتوا لكن بس بالاسماء
وانا اريد اعرفكم على بعضكم بصورة ادق

عقدت حواجبي هذا شبي المحامي شكد يحب يلف ويدور

حجيت وياه بقلة صبر.. فهمنا شنو تقصد بهذا كلامك

انتبهت عليه سحب نفس عميق وغمض عيونه
شكله عبالك واحد راح يلقي خطبة قوية واني والشاب بعدنا واكفين على وضعيتنا
وكال

.. مهيمن الي ما تعرفه ان جلال يصير اخوك ابن ابوك

لحظة هدوء قاتل عم المكان
نظرات الصدمة محتلة معالم وجهنا وباوعنا للمحامي
متفاجئين

جمدت بمكاني وحسيت على جلال انكمش بين ايديه

حسيت عليه لان كنت بعدني سانده
وذراعي لافها حوله

همس الشاب بصوت واطي مستنكر
.. هذا شكاعد يحجي

المحامي اختار لحظة حرجة

ابد ما جنت محسب حساب هيج لحظة ولا متخيل الكة روحي بموقف محرج

ولأول مرة بحياتي تخوني الكلمات وما عرفت شنو اتصرف والظاهر الشعور كان متبادل وية جلال

......
جلال

احس گلبي اجة يطلع من بين ظلوعي من كال المحامي كلمة اخوك
شنو هذا الي يصير ، معقولة هذا الشاب الي واكف واني متكئ عليه
يصير اخوي

بقيت مصفصف كل شوية اباوع عليه
وانا الصدمة شلت حركتي
بس انتبهت لمهيمن بسرعة رجع اتمالك روحه
واتغيرت معالم وجهه للبرود
كمل طريقه و وصلني لأقرب كرسي حتى اكعد عليه
وبعدها راح جابلي العكازات وحطهم يمي

ولا كأن الخبر الي سمعه يعنيه بشي
وصار متحفظ بتصرفاته وياية عكس قبل قليل

معقولة ماكو شي اتحرك عنده
ليش انا احس جسمي بعده كله ينتفض ،
يعني الواحد مو كل يوم يعرف عنده اخ بالصدفة

وهالشي جديد علية
مهيمن كال بصوت ثابت
.. اي ابو سيف كمل كلامك شكلك بعد عندك هواي مفاجئات
اتفضل كول بعد شنو عندك غير هذا الاخ كوللنا
خاف ناسيلك واحد منا منا

وانا هم سألته .. اي صدك ابو سيف احجي كول لا تستحي
خلينا نعرف ابونا شنو ضام لنا من مفاجئات

خطية ابوسيف شكله مثل الفارة الي انحشرت بالزاوية من ورة اسئلتنا

جاوبنا .. طبعاً مهيمن انت الابن الكبير من زوجة الحجي مؤيد الاولى
وجلال الابن الاوسط من الزوجة الثانية لابوك

مهيمن راسا رفع راسه يباوع علية وعيونه صارت تجدح شرار
كأنه واحد كله هذا قاتل الحمزة

كمل ابو سيف كلامه
وعندكم بعد اخت اسمها نور من زوجته الثالثة

مهيمن بأستنكار .. زوجة ثالثة !!!!!

جاوبته .. اي زوجة ثالثة شبيك مستغرب ترة الشرع حلل اربعة
والظاهر الوالد الله يرحمه شكله حب يطبق الشرع بس خطية ما لحك على الرابعة

ابو سيف .. عمو جلال راح تبقى كل شوية تعلق على كلامي لو تخليني اكمل الموضوع

وكعت عيني بعين مهيمن اشو هذا خزرني عبالك طالب عنده ويريد يعلمني حسن التصرف

حجة بتحذير.. اتفضل ابو سيف كمل كلامك
وعوفك منه شكله بعده ما مستوعب الصدمة من ورة سوالف ابوه
معذور ابن دلال وروحه ترفة بسرعة يتأثر

رفعت حاجبي ونظراتي تتحداه
وابو سيف كعد يجلي صوته لان التوتر داخل الغرفة بدة يشتد
ابو سيف.. بالحقيقة حبيت بالاول اجتمع بيكم انتوا الاثنين قبل البقية حتى افهمكم على كل شي ما اريدكم تتفاجئون

وتنفعلون كدام بقية اقاربكم حتى لا تصير تصادمات بينكم واحراجات

مهيمن.. عن اي اقارب تحجي
جلال .. اي صدك عن اي اقارب تحجي

التفت مهيمن علية وكال
.. شنو حضرتك الصدى مالتي وكل شوية مكرر كلامي وراي

جاوبته بستهزاء .. لا اني الببغاء
وانت شدعوة عليك هشكل متحسس مني
هسة شنو حجينا

مهيمن بتحذير.. انتبه لكلامك ولا تستخف دمك
لا اجي اعلمك شلون تحجي

جاوبته بتحدي .. ما تكول لروحك اشو كل شوية تباوعلي بنظرة مستفزة
عبالك واحد بي گمل وخايف يعديك

جاوبني بغضب.. يالله بالله هذا شحجي وياه
هسة من اكوم اعدل حلكة اكو واحد يلومني

ابو سيف كام من مكانه حتى يهدي شرارة الجدال
بيني وبين مهيمن بعد ماشافني تحفزت اريد اكوم

.. لحظة شباب ممكن تهدون. ترة مو حلوة بحقكم
تتعاركون بينكم وانتوا اخوان

جاوبت المحامي .. والله عمي لو ما معرفنا على بعضنا
ومخلينا على عمى وجهنا هواي احسن، على الاقل من كنا غرباء وما نعرف بعضنا البعض كنا اكثر الفة وواحد بدة يتقبل الثاني
اكثر من تقبلنا هسة واحنا اخوان

هزيت ايدي .. لا ونوب فوكاها طلع اخوي الكبير

ومهيمن جاوبني بتلقائية .. غصباً ما عليك اخوك الكبير وتاج راسك بعد اذ........

كالها وكأنما شغلة طبيعية ومفروغ منها
حتى هو انتبه لروحه وقطع كلامه بعد ما حس على هفوة لسانه
الي بيها اعترف باخوتنا من دون مايشعر

بعدها رجع لتحفظه والتفت على ابو سيف وكال
.. كمل ابو سيف اريدك تحجيلي التفاصيل كلها

وبعدها صار ابو سيف يحجيلنا عن مؤيد وشلون فكر يكتب الوصية
بس لحد الان ما فتحها
وبعدها كام يحجيلنا عن اقارب ابونا وكم شخص
وانا ومهيمن بقينا نستمع بصمت بعد الشرارة الي صارت
كل واحد بينا كعد بصفحة
وصار يسأل ابو سيف عن الشي الي يخصه

وكل شوية استرق النظرات واباوع لمهيمن بحذر وهو يحجي وية ابو سيف
بدون ما ينتبه علية بديت ادرس شخصيته وتصرفاته من خلال كلامه وية ابو سيف

بس مبين عليه شخيصته قوية ورزن نزلت عيوني اتفحص ملابسه كانت ملابسه جداً بسيطة لكن كلمة حق تقال

شخصيته فارضة هيبته على الكل حتى انا جلال قربان ابو لسان الي ما يسكت سكتني
بس غير هو اخوي الكبير وانا ولد حباب ومؤدب واحترمه

ابتسمت وعيوني بعدها تراقبه
صادني وانا اباوع عليه
وصديت عيني منه

انهى كلامه ابو سيف وگال .. عندكم اخت اصغر منكم اسمها نور هي هم ما تعرف بوجودكم وراح تجي هي وخالتها وزوج خالتها

كل الي اطلبه منكم ان تتقبلونها كأختكم وما اريد
هاي حركات المشاحنة بينكم تصير كدامها
لان خطية هي كلش حساسة وبسرعة تخاف من الناس الغربة

مهيمن.. شكل الوالد كلش مخربها بالدلال

ابو سيف.. مع الاسف نور هم مثلكم ما تعرف بوجود ابوها ولا عاشت عنده

جلال .. لا الاله الا الله ويكلك ليش تحجي شنو قصته
الوالد شغلته كانت يخلف ويذب عالناس

ابو سيف.. ما اكدر اجاوبك عن هذا الشي لان
ابوكم تارك بالوصية لكل واحد بيكم رسالتين
الرسالة الاؤلى اسلمها الكم هسة والثانية اسلمها بعد تنفيذ شروط الوصية

كنا نحجي واندك الباب ودخل السكرتير
واخذ الاكل من عالميز
وابو سيف كله
.. طلال دخل البنية المنتظرة برة
.. استاذ ادخلها لوحدها لو هي والمرافقين

.. دخلهم كلهم اكيد ما راح تقبل تدخل لوحدها هي تخاف من خيالها

وكفت على حيلي مثل الي ياخذ وضع الاستعداد
منتظر تدخل بنية من هذا الباب يكولون عنها تصير اختي الصغيرة مجرد طرق الاسم بتفكيري جسمي قشعر

انتبهت لأستاذ مهيمن الي مسوي نفسه مو مهتم ويكابر
عدل گعدته واتقدم للامام وذراعه مستندة على رجليه
وعيونه كل شوية تصد عالباب

انفتح الباب وجان تدخل منه بنية شابة
واول ما شفتها هيج من الله گلبي رف عليها

كانت بنية كلش ضعيفة ومحجبة وبسيطة وبنفس الوقت حلوة

ودخلو وراها مرة ورجل
سلم عليهم ابو سيف واشرلهم على الكراسي حتى يكعدون
اباوع عليها شلون كعدت
كانت هادئة او تمثل الهدوء لان حركة ايديها وهي تفركهم مع بعضهم
تدل على توترها وارتباكها

بدة ابو سيف يسأل نور عن احوالها بعدما قدم نفسه لها
بصفته المحامي

لكن
لفت انتباهي شغلة ان نور ابد ما حجت والي كان يجاوب المحامي عن اسئلته هذا رجل خالتها

شكو شبيها متحجي
وهذا الرجال نزل على المحامي بالاسئلة
الي يسمعه يكول ورث الي خلفوه وجاي يستفسر عنه
ما ادري ليش ما حبيته

جاوبه المحامي .. قبل لا اجاوبك عن اسئلتك احب بالاول اعرف نور على اخوانها وبعدها نتناقش بالموضوع

مجرد ما ذكر ابو سيف كلمة اخوانها انتهت عليها رفعت راسها مصدومة وباوعت علينا بنظرات متسعة متعجبة وصارت نظراتها تتنقل بيني وبين مهيمن

للحظة خلتني اشك بروحي انا عندي راسين مو راس واحد
هاي البنية غير شفافة وسهلة القراءة
حجت بصوت ناصي كوة ينسمع
.. اخواني

وجان يهتز الجبل الصامت الي كاعد بصفي وجلة صوته وكال بكل هدوء يطمأنها بحنية

.. اي اخوانج انا اسمي مهيمن اصير اخوج الكبير

هاي شنو ولا عرفته طلع لطيف وية الجنس الناعم
اشو بس علية كشر عن انيابه

والتفت واشر علية وعفس وجهه وكمل كلامه
.. وهذا يصير اخوج الثاني اسمه جلال

جاوبته.. وشبيك تحجيها وانت ضايج عبالك واحد شم ريحة خيسة

ابو سيف .. جلاااااال شكلنا

نطق اسمي بتحذير وهو يأشرلي بنظرات عيونه على نور
انتبهت عليها باوعتلي بحذر وخوف
غيرت معاني وجهي وابتسمت
.. ههههههه شبيك يا عيني غير اضحك وية اخوي الكبير فديته
باوعت عليها

.. لتخافين مني انا جلال قربان ترة لا يغرج شكلي هذا
انا بالحقيقة احلى من هيج بس الحادث گلب الخلقة

سمعت مهيمن يستغفر بصوت ناصي من بين اسنانه

.. استغفر الله ربي واتوب اليه هذا منين ينطفي
جاوبته .. والله اذا بقيت على هالحال بأذن الله تدخل الجنة من وراي

سألني مستغرب.. ليش
.. لان راح تكضيها تستغفر ربك كل شوية من وراي
قاطع كلامنا صوت رجل خالتها المستنكر

الرجال.. اخوااااانها !!!
رفعت حاجبي وجاوبته .. اي اخوانها شنو ما عاجبينك

.. لا ما عاجبيني ولا مقتنع بيكم اصلاً
مهيمن .. مشكلتك هاي اقتنعت او ما اقتنعت نفس الشي لا تقدم عدنا ولا تأخر
مهيمن كان يحجي ونظراته تتحدى الرجال يعترض على كلامه

والله لو ما اهضمه جان صفرت له على هالقصف
خلة الرجل يبلع لسانه و يسكت

يعني بس باوع لمهيمن وسكت مانطق ولا حرف

.....
ريم

اليوم راح اشوف اولاد عمي مؤيد احس بلهفة كبيرة للقائهم
يمكن الدم يحن او لان هم من ريحة عمو مؤيد الله يرحمه
كنت احضر بنفسي ومحتارة شنو البس اريدهم ياخذون عني فكرة حلوة حتى يتقبلوني
لبست جينز اسود بسيط وقميص اسود قصيرلحد الورك
وشعري القصير بقيته نازل ما رفعته احس بالامان اكثر
وهو نازل على جانب وجهي

لبست نضاراتي الشمسية الي كانت ماركة ديور
مغطية نص وجهي واخذت جنطتي وطلعت من الغرفة

ونزلت ولكيت عمة اسيا واولادها محضرين نفسهم قبلي ووجوههم مقلوبة

نورس شافني ونهض من مكانه
.. يالله جاهزين حتى نروح
جاوبته .. اي نعم اني جاهزة

اسيا.. لعد يالله خلي نروح لمكتب ابو سيف ونفتهم شنو الموضوع

صعدنا بالسيارة متوجهين للمكتب
رن نقالي وكان المتصل ابو سيف يستعجلنا بالحضور

نهيت الاتصال وكلبي زادت دكاته
هسة اولاد عمو شنو وصلوا لو بعدهم ما جايين
ما كدرت اسأله عنهم كدام عمة اسيا
ما اريدها تعرف بحضورهم
حتى ما تكعد تخططلهم او تكدر تسويلهم كل شي اتوقع منها
بعد الي سمعته من عمو بخصوص طرد ابنه جلال وهو صغير من بيت ابوه
صرت ما اثق بيها

وصلنا للمكتب
وشافنا السكرتير ودخل للمكتب حتى ينطي خبر لأبوسيف بعدها طلع وفتحلنا الباب

ودخلنا واول ما دخلت عيوني بدت تدور بالمكان وجان نظراتي توكع على بنية ضعيفة

تركت ابو سيف يسلم على عمتي اسيا واولادها
واني غصب عني لكيت رجلية ماخذتني لعند نور

اقتربت منها وبادلتني النظرات بأرتباك
ابتسمت ومديتلها ايدي بالسلام

.. شلونج نور اني بنت عمج اسمي ريم

ابتسمت بتردد وبادلتني السلام وحجت بصوت ناصي
.. هلو ريم

كان مبين عليها خجولة وتستحي تحجي
انتبهت لحركة قريبة
التفتت وشفت واحد واكف عالعكازة مبتسم
باوع علية وكال

.. وانا ابن عمج الوسطاني اسمي جلال
بادلته الابتسام وجاوبته متفاجئة بشكله ما يشبه الصورة .. جلال قربان هاي شنو شصاير بيك

جاوبني .. هاي شنو حتى انتي تعرفين بلقبي
باوعت عليه هو ونور وجاوبته
.. اني تقريباًً اعرف عنكم كلشي

جاوبني .. لعد ما دام تعرفين عنا كلشي
التفت وعفس وجهه واشر على مكان خلفي

وكمل كلامه .. معناها اكيد تعرفين اخونا الكبير مهيمن

التفتت وباوعت عالمكان الي اشر عليه جلال
وجان اشوف الشخص الي اول ما دخلت كانت عيوني تدور عليه

باوعت عليه كان كاعد لوحده على صفحة وباله مو يمنا
كانت عيونه تباوع على عمة اسيا واولادها والشرر يطلع من عنده
وبالمقابل اولاد عمة اسيا نفس الحالة كانوا
يباوعوله بتكبر ومستغربين

نائل حجة بصوت ناصي
.. اكول هذا ليش هيج يباوع علينا. كأنه طالبنا بثار

نورس باوع على اولاد عمي بأستغراب وسأل ابو سيف

.. ابو سيف شنو القضية هذولي منو شنو يسون هنا
.. هذولي اولاد عمك مؤيد الله يرحمه
وبدأ ابو سيف يعرفهم على بعضهم البعض

نورس بأعتراض.. زين وهذولي وين كانوا وهسة يالله عرفوا عندهم اب

نهض مهيمن من مكانه بتهديد
.. انت هي انتبه لكلامك ولا تظل تحجي بكلام اكبر من راسك

نورس بتحدي.. وانت منو حتى تعلمني شنو احجي

.. انا ابن مؤيد الكبير و انت جاي لهنا مستطرق يعني مالك لزمة
جاي حتى تسمع المحامي يقرة الوصية
فأحسنلك تحترم نفسك وتروح تكعد يم امك وتسمع بهدوء محد طالب رأيك بينا

((وين جنا وليش جايين لهنا وشنو نريد نسوي ))
هذا الشي راجعلنا انا واخواني محد له دخل
احنا بكيفنا شوكت ما يعجبنا نظهر و نحضر بالوقت الي يصرفلنا فاهم لو اعيد كلامي عليك مرة الثانية

نائل.. ابو سيف هاي شنو كول كلمة يتجاوزون علينا واحنا كاعدين بمكتب

كان جلال واكف يم نائل اتكأ عليه ولزمه من علباته
وكله .. اذا تكلم الكبار فعلى الزعاطيط ان يلتزموا الصمت
صير حباب وروح اكعد يم ماما
ابو سيف بتوتر .. جلال مهيمن اترجاكم بلا مشاكل
اتفضلوا كعدوا

والتفت على عمة اسيا وكال
.. وانتي ام نورس كولي للشباب خلي يلتزمون الهدوء
ميصير هيج والله صارت فوضى
هنا مكتب محامي محترم

اباوع لأسيا كانت بعدها صافنة مشلولة من الصدمة خطية
نفضت راسها ما مستوعبة الي يصير كدامها
شكلها كان مثل واحد سحبوا البساط من تحته ووكع على وجهه

التفت على اولادها وكالت
.. اهدؤوا شوية خلونا نفتهم شنو الموضوع وشنو يصير هنا
شفت واحد كاعد يم مرة كبيرة ما عرفتهم كال
.. اي والله ابو سيف فهمنا شنو الموضوع صارلنا ساعة كاعدين مثل الاطرش بالزفة

كلتلنا تعالوا علمود الوصية واحنا اجينا ولحد الان انت ما فاتح الوصية

ابو سيف جاوبه .. العفو شنو كلتلي اسمك
.. اسمي صابر
.. اخ صابر انت مو من ضمن الاطراف المعنية انت كاعد هنا بدون سبب

.. لا انا بمثابة ابوها لنور لان ربيتها على ايدي واعرفها كلش زين فقيرة واذا تركتها يمكم لوحدها وما حجيت راح تاكلون حقها
اني هنا حتى لا يطرا على بالكم هي لوحدها

ابو سيف .. شوف اكولك انا وافقت على دخولك للمكتب لخاطر نور
لان اعرف بيها تخاف تبقى لوحدها وية ناس غربة ما تعرفهم
يعني انت اي دور مالك في بالوصية مجرد مستمع فاهم لو اعيد

بعدها ابو سيف التفت على جهة عمة اسيا واولادها وكال بصوت امر

.. اترجاكم تسكتون وتخلوني اشوف شغلي لا تجبروني
اتخذ اجراءات صارمة واطرد الكل وابقي فقط الاطراف المعنية بالوصية

بعد كلام ابو سيف الغاضب الكل التزم السكوت

واولاد عمة اسيا. كل شوية ينافخون بضجر

وعيون مهيمن تراقبهم مثل الصياد شكله ينتظرهم يزلون بكلمة حتى يشوف شغله وياهم
وجلال رافع حاجبه يتحداهم واشر بأثنين اصابعه على عيونه ووجههة على عيونهم بحركة ( ترة جاي اراقبكم
وهمس بصوت ناصي يهدد اولاد اسيا
وكال وعيونه على مهيمن
.. اريد من الله واحد بيكم ينطق كلمة، والله اهده عليكم

وعمو ابو سيف فتح الوصية وبدأ يقراها

ابو سيف.. بسم الله الرحمن الرحيم
تمت كاتبة الوصية (..) في اليوم
المصادف وذكر التريخ واسم اليوم
وبحضور الشهود .... شاهد اول ..... شاهد ثاني

وبعدها انتقل ليرد تفاصيل الوصية
قام الحاج مؤيد بكتابة الوصية لتقسم املاكه الخاصة

وقرر ان يتم تقسم املاكه الخاصة بين اولاده الثلاثة المذكور اسماءهم
مهيمن مؤيد.. جلال مؤيد.. نور مؤيد
حسب ما ينص عليه الشرع
اما ما يخص املاك اخيه التي تخص ابنته ريم والتي بقت تحت وصايته فسوف يتم تحويلها اليها في حينه

وسوف يتم تسليم حصص الجميع
لكن بعد اتمام شروط الوصية المفروضة على الاطراف المعنية
وهم
مهيمن مؤيد ..جلال مؤيد ..نور مؤيد ..ريم محمد

فتح ورقة ثانية من الملف وبدة يعدد شروط الوصية

الشرط الاول
يجب على كل من جلال ونور وريم
المذكور اسماءهم في الوصية العيش في بيت الاخ الاكبر مهيمن مؤيد لمدة سنة كاملة

انتبهت لوجه مهيمن انصدم من شرط المحامي
وجلال بقة يباوع للوجوه بشك
اما اني فگلبي انتفض من نظرة مهيمن اتجاهي واتجاه نور وجلال احس بي صار يدرسنا من جديد عبالك اول مرة يشوفنا

عزة هذا عيونه مو طبيعيات اربكني

انتبهت لاولاد عمة اسيا وهذا رجل خالة نور
نهضوا من مكانهم معترضين

نورس.. انا اعترض شنو هذا الكلام من كل عقلك نخلي
ريم تروح تعيش ببيت واحد هسه عرفناه وين كاعدين

صابر.. حتى انا اعترض على هذا الشرط
ابو سيف الغي هذا الشرط من الوصية
لان مستحيل نوافق نترك نور تسافر وية واحد هسة عرفته
وهي نور بالاصل تخاف من خيالها

جاوبهم ابو سيف
.. مع احترامي الكم بس انتوا مالكم اي حق تتدخلون
لان اصحاب الرأي موجودات والبنات بعمر قانوني يسمحلهن بأتخاذ القرار

وهالشي راجعلهم وعلى فكرة بعدني ما منتهي من
قراءة بقية شروط الوصية بعدنا بس بأول شرط

بقوا اولاد عمتي وصابر يدردمون وانا ونور وجلال ومهيمن بحالة صدمة

مهيمن .. ابو سيف كمل قراءة شروط الوصية وما عليك منهم خليهم يهذون لوحدهم ما راح يقدمون او يأخرون نريد نعرف شنو الي النا وشنو الي علينا
كال هذا الشي وعيونه عليهم

ورجع ابو سيف يقرأ بشرط الوصية الاول للتوضيح
ومهيمن كعد يسأله بعض الاسئلة
وجلال

وبعدها كمل ابو سيف كلامه
وفي حال اي واحد من الاطراف رفض اوتراجع عن تنفيذ هذا الشرط سوف يأخذ نصف حصته وتقسيمه على الثلاثة الباقين

جلال.. لا يابة انا عني موافق ما عندي مانع اسافر وية مهيمن للبصرة واعيش وياه بنفس البيت

خزره مهيمن كوة لازم روحه ما يهد عليه ويسحله
رص على اسنانه وكال.. خلي ابو سيف يكمل كلامه

ابوسيف.. الشرط الثاني املاك ريم بالتحديد تبقى تحت
وصاية مهيمن بشرط اتمام زواج مهيمن من ريم

في حال موافقة الطرفين على تنفيذ هذا الشرط
يتم تسليمهم حصصهم مباشرتاً
اما في حال عدم موافقة مهيمن على هذا الشرط فراح

تتسجل نص حصته بأسم ريم واذا ريم رفضت الزواج
من مهيمن فراح تبقى كل املاكها تحت وصاية مهيمن لمدة سنتين ويكون المسؤول عنها في كل صغيرة وكبيرة وهو الي يقدر مصروفها الشهري

عمو ابو سيف كمل قراءة الشرط واولاد اسيا
نهضوا يحجون معترضين بغضب على هذا الشرط

نورس .. لاااااااا لهنااااااااا وحدكم سكتنالكم بما فيه الكفاية
بس صار كلامكم يدك بالعظم

لو نعرف نقتل وننقتل ما نخلي ريم تتزوج هذا
واشر على مهيمن
هو مهيمن من مبين لازم روحه غصب عنهم
ومنا شروط الوصية الي ضغطت على اعصابه
واخر شي هذا نورس تجاوز بكلامه

مهيمن هد عليه وزنگه من ياخة قميصة
.. خااااااب شو تعال. صارلك ساعة تسربت وانا كوة متحملك

جلال .. هلا والله عالوا بيك يل منك تجي العيلة
والله كام علينا ابو زيد الهلالي

يتبع

اتمنى لكم قراءة ممتعة
مع تحيات اختكم نهى الحسون