قضية لم الشمل الفصل الثاني وثلاثون 32 - بقلم نهى

#قضية_لم_الشمل
#الكاتبة_نهى

مساء الخسر والعافية عليكم
كل عام وانتم بالف خير ويارب من العايدين
يعوده عليكم بالخير والصحة والعافية على گلوب
كل المتابعين
ها انا قد عدت لكم بعد انتهاء الشهر وكما وعدتكم
بنزول الجزء الثاني فلكم مني جزيل الشكر لصبركم وتفهمكم لظروفي

🌹🌹🌹

نور

كان منظر جلال وهو ينوح
مثل الطير المذبوح على خاله وعائلته منظر مفجع
اباوع عليه شلون اتوسد الارض من اثر الفاجعة
لاهو طايل سما ولا هو طايل ارض ما يعرف شنو يسوي

لزمه مهيمن يهدي بي يريد يفتهم منه شنو الي صار ومنو الي نقله الخبر

لكن جلال مجاوب على اسئلة مهيمن كان فاقد وتايه بغير عالم
مهيمن انتبه للنقال الي بعده بيد جلال وسحبه
من بين ايديه وكام يحجي وية الطرف المقابل الي كان متصل على جلال ووصله الخبر ولازال الخط مفتوح

وام مهيمن كعدت يمه بالگاع وحضنته تواسيه
والناس بدت تلتم علينا

وصار ينادي بأسم كل واحد من عائلة خاله مثل واحد ضايع ويدور على اهله ويصيح بأساميهم
اختفى صوته من كثر الصياح

وبعدها لاحظنا على جلال
بدأ جسمه كله يهتز واصطكت اسنانه

وام مهيمن حست عليه
وحشمت ابنها واخوانها وصاحت
.. يبوووي ولكم لحكوا الولد فرت روحه. وراح يروح من ايدينا

كلبي ما اعرف شصار بي ما حسيت على روحي من طلعت للشارع واتجهت على جلال انديلت مكان گلبي
من خوفي عليه
وكعدت يمه بالكاع واني اسأل بام مهيمن بخوف
.. خالة عفية كليلي اخوية شبي ليش هيج يرجف
جنت احجي واني لازمته حتى يثبت

ما اعرف شنو اسوي

اجة مهيمن يركض مصدوم بصياح امه
بعدما كان يحجي بالنقال وية الطرف الثاني
الي كان صديق جلال والظاهر هو الي وصله الخبر

وباوع على امه ورجع باوع لجلال
ما نعرف شنو صار بي كان جسمه كله يرجف ووجهه انخطف لونه

انطاني النقال بالعجل ودنك على جلال حتى يشيله وصاح على اولاد خواله حتى يساعدونه ويشيلون جلال
وبسرعة حطوا بالسيارة

اباوع عليهم اخذوا جلال وراحوا
بقيت واكفة بمكاني ابجي بلا حول ولا قوة
ما بيدي شي اسوي حتى اكدر اطمنه على اهله وناسه

والي زاد حزني انكسار جلال
كانت هاي اول مرة اشوف جلال بهاي الحالة يبجي
مفزوع

اجتي حوراء وگومت امها من الكاع
وام مهيمن كالت .. انطيني عباتي خلي اروح وياهم
والله هالولد مرد گلبي

راحت حوراء بسرعة وجابت عباية امها
ومهيمن بسرعة راح من غير ما ينتظر امه الي جانت تصيح وراه حتى ينتظرها
لان هو جان شكله غريب مصدوم من الخبر وبنفس الوقت مخبوص وخايف على جلال

سيارات الشباب نصها اتحركت وية سيارة مهيمن والبقية يردون يحركون وراهم

وصاحت وراهم .. ولك مؤمل انتظرني جاية وياكم

رحت لأم مهيمن .. عفية خالة اخذيني وياج
كانت مخبوصة وهي تلبس بعبايتها وگالت

.. لا خالة ابقي هنا بالبيت اكيد الناس راح تجي
وهذني ما يدبرنها لوحدهن

كانت تقصد حوراء وريم
عفية ما اوصيج لبسي ثوب اسود وخلي البنات هم يلبسون وحضرن البيت
بعد صار عدنا عزاء

راحت ام مهيمن وهي توصي بينا
وانا بقيت احوم ريم وحوراء يبجون احس عبالك عاصفة وهبت على البيت وكلبته فوك حدر

ريم تبجي بحزن وهي تتذكر اتصالات جلال وية عائلة بيت خاله
كانت ذهولة وهي تكول .. ياريتني ما متعرفة عليهم ولا شايفتهم والله كلما اتذكر مكالماته وياهم گلبي ينعصر
خطية الله يساعد گلب جلال شلون بي
التفتت علية وسألتني

.. زين ما عرفتوا شلون بيت خاله كلهم ماتوا يعني معقولة ما بقى احد منهم عايش

حوراء .. سمعت مهمين يحجي وية اولاد خالي يكللهم كلهم ماتوا بس ما عرف من الولد شلون ماتوا لان جلال اتخربط

كالتها بحزن ودموع
.. الله يفرغ عليه من صبر ايوب ويهون عليه المصاب
خطية عائلة كاملة راحت لا واحد ولا اثنين كلهم

حجيت بصوت واهن واني اتذكر لمعة عيون التوأم وضحكتهم وكلامهم وية جلال من يتصل عليهم
.. حبيباتي رنين ورند

وغمضت عيوني ونزلت دموعي عليهم احتاريت
ابجي على منو بيهم عائلة خاله ولو انعي حالة جلال

بدت الناس تلتم على بيت مهيمن خالات وقرايب وجورايين كلهم على فرد سؤال شنو الصار ومنو المات

والنسوان يسألون شلون ماتوا ومنو وصللكم الخبر
وبقى السؤال يفتر على روسنا شلون ماتوا مو هم على الاساس كانوا بالطريق

وحدة من الجوارين كالت
.. شلون اتوفوا كلهم

جاوبتها وحدة من خالات حوراء.. اتوقع الدواعش هاجمين عليهم

المرية جاوبتها.. لا خية ما اتصور داعش هاجمين عليهم لان هواي عوائل نازحين اتهجرت وطلعت من الموصل

بس ما عليهم شي طلعوا عادي محد اعترض طريقهم يعني هم مو الوحيدين طالعين
بس اتوقع يمكن صار وياهم حادث بالطريق وانگلبت بيهم السيارة وماتوا

وصارت كل وحدة بيهم المحقق كونان وتحلل وتتوقع بكيفها

كانوا يحجون بينهم واني اسمعهم بقلق
ياربي معقولة حادث سير

لا ما اتوقع حادث لان اول كلمة لفظها مهيمن من غلق النقال وحجة وية خاله كال عائلة بيت خال جلال كلهم استشهدوا

يعني الموضوع من طرف داعش زين شمعنا هم من دون العوائل يعترضون طريقهم

ااوووف ياربي راسي راح ينفجر من كثر الاسئلة
وين جنا وشلون صرنا

اني كنت خايفة على ريم لا يصير بيها شي
من خطوبة مهيمن

وبلحظات قليلة نقلبت كل الموازين بعد خبر فاجعة ومصاب خال جلال
وتبدلت مباهج الخطبة الى احزان وعزاء بالبيت
والخوف والقلق الي كنت احسه لريم انتقل الى جلال

وبهاي الاثناء بين ما كنت اتنقل بين النسوان
واني فكري شارد وكل شوية اتصل على خالة ام مهيمن حتى تطمني على جلال

دخلت نغم وامها وخواتها كانت ووجوهم خايفة وتتسائل
شنو الصاير
ما اعرف ليش من شفت نغم بدون شعور تلقائياً التفتت على ريم

كانت نظرات ريم عبارة عن شرارة نار بأتجاه نغم
وكأنما تريد تاكلها

اااوف منج ياريم شكد حاولت تدفن الم خذلانها من مهيمن بعيد عن عيون الكل

حتى تبين هي قوية وما راح تتأثر بخطوبته
وان هي اقوى من ان يكسرها هيج شي
لكن المشاعر خانتها وغصب عنها نار الغيرة بينت بنظراتها

بلشنا اني والبنات نحضر بالبيت كنت اشتغل وبنفس الوقت اتصل واسأل عن حال جلال
ياربي هونها عليه

كنت اتصل على ام مهيمن وهي تطمني كل شوية
اتصلت هالمرة وبكلبي امل تكولي جلال صار احسن
بس فتحت الخط راسا
كلت .. خالة عفية طمنيني شلون صار جلال

رد علية صوت رجل غريب مو صوت ام مهيمن
بس هذا الصوت سامعته قبل مار علية

.. العفو اختي الحجية اتخربطت واخذوها الشباب للطواريء
والنقال وكع منها من غير ما ينتبهون عليه وانا ماخذه وراهم
كان يحجي بأستعجال

ابتعدت من يم حوراء وخالاتها وحجيت وياه بخوف
.. عفية الله يخليك شنو جاي يصير خالة ام مهيمن شبيها
وليش هي وين

جاوبني بعجل .. والله ما اعرف شبيها اتخربطت ووكعت لايظل بالج

كان يمه اصوات الزلم مخبوصين وهوسة
لكن سمعت واحد قريب عليه كله عناد

مهيمن يكول روحوا يم جلال خاف الدكتور يحتاج شي
لان مهيمن تركه لوحده والتهى وية امه

جاوبه.. تمام انا جاي بس خلي اسلم النقال لواحد من الولد لان وكع من عندها

همة يحجون واني كلبي ما اعرف شبي فز من سمعت
اسم عناد يعني اني جاي احجي وية عناد

جلى صوته وكال .. الو اختي انتي و ياي على الخط
انتبهت على روحي ونفضت راسي

وجاوبته .. ها. اي نعم اني اسمعك

.. انا راح اسد الخط لازم اسلم النقال
وانتي اتصلي مرة الثانية وسأليهم عن وضع الحجية
يالله انا اترخص

همست بصوت واهن .. الله وياك مشكور ما قصرت

انهى الاتصال بسرعة وكأنه ما صدك يتخلص من المكالمة وياي

اتتظرت عشر دقايق واني احوم بس لا يصر على خالة شي ياربي لطفك
دخلت حوراء.. ها اتصلتي على امي شنو كالت عن جلال ما عرفتي شنو بي

باوعت عليها وجاوبتها .. ها لا بعدني ما محصلتها جهازها كله مشغول اتوقع جاي تحجي بالنقال

انتي روحي يم النسوان بين ما اني اتصل
انتظرت حوراء تطلع
ورجعت اتصلت على نقال خالة ام مهيمن
لان مهيمن ملتهي اكيد ما راح يرد علية وهالمرة جاوبني صوت رجل ثاني وكبل سألته عن وضع ام مهيمن

وطمني وكال الحمدلله زينة بس شوية عندها ارتفاع بالضغط

بقينا على هذا الحال
ولليل رجعوا كلهم للبيت
مهيمن .. نور سويلنا طريق خلي ندخل جلال للغرفة

باوعت ورة مهيمن ولكيت الشباب شايلين جلال
سألة مهيمن بخوف
.. مهيمن شنو شبي جلال
.. انهيار عصبي والدكتور انطاه ابر مهدئة حتى تساعده يجتاز هاي المرحلة. بدون ما يأذي نفسه
عفية سوي طريق

حجاها بتعب

دخلت جوة للبيت وانطيت خبر للبنات حتى يلبسون حجاباتهم
كانوا النسوان بعدهم بالبيت متجمعات

ودخلوا الشباب وهم شايلين جلال الي كان فاقد
وجفونه حمر
ودخلوه لغرفة مهيمن

ودخلت وراهم ام مهيمن وهي

تبجي وتنعي جلال على فقد جلال لاهله واستقبلوها النسوان

.. الله اكبر عائلة بكبرها تموت ولكم هاي لا صايرة ولا دايرة ولكم الدنيا راح تنگلب بينا

وبدوا النسوان يسألونها عن وضع جلال وبيت خاله
واني بقيت احوم يم غرفة مهيمن منتظرة الولد يطلعون حتى ادخل واشوفه گلبي نار عليه

مهيمن

طلعوا اولاد خالي من الغرفة بهدوء وبقيت انا لوحدي يم جلال اباوع عليه حتى وهو نايم عاقد حواجبه مثل الي جاي يصارع بأحلامه كوابيس والم

نظرات الانكسار الي بعيون جلال خلتني واكف عاجز
امامه شنو الي اكدر اسويه للحظة اتمنيت الالم رجال واكعد اتلاوة وياه حتى ابعده عنه

دك نقال جلال الي كان بجيبي
باوعت للشاشة كان المتصل سلوان صديقه
كنت اسمع جلال دائماً يتصل عليه خصوصاً بالفترة الاخيرة

طلعت من الغرفة حتى ارد عليه الدكتور كال حاولوا توفرون الهدوء للمريض

واول ما طلعت لكيت نور وامي وحوراء وريم كلهم واكفين يم الباب شكلهم يردون يدخلون

.. لاتدخلون على جلال هسة هو نايم خلوه يرتاح

نور.. شلونه ما صار احسن شوية
.. والله ابرة المهديء جابت مفعولها

.. الحمدلله

رجع النقال دك مرة ثانية
وهم سلوان خطية هذا اللاخ نسيته كل شوية يتصل على جلال يريد يتطمن عليه
اشرت لامي وللبنات حتى يسكتون علمود احجي وية الولد

رديت عليه
.. هلة سلوان
.. شنو طمني شلون صار جلال
.. لا الحمدلله هسة احسن ورجعناه للبيت

.. الف الحمدلله. والله مصيبة ونزلت على روسنا كلنا
ما تعرف احنا شكد متأذين عليهم لحد هسة صرخة الاطفال وخاله ترن بأذني

كان يحجي بصوت يرجف بي نبرة البجي
شكله سلوان هم منهار
سألته

.. اكول صدك سلوان شلون ماتوا عائلة بيت خاله كلهم مرة وحدة
انا التهيت وية جلال ونسيت اسألك عن سبب وفاتهم

سلوان جر حسرة وكال .. داعش الله يلعنهم دنيا واخرة هم الي قتلوهم

.. زين ما عرفت ليش قتلوهم
لان انا الي اعرفه الدواعش ما منعوا اي عائلة تطلع من الموصل
شمعنا بيت خال جلال اعترضوا طريقهم وقتلوهم

.. الموضوع وما فيه ان داعش بيها عناصر
وزعماء يديرون خليتهم القذرة

.. اي
.. وخال جلال ابو مصطفى.
قبل فترة بنته اسراء انخطبت لواحد

.. اي وشنو دخل خطوبة بنته بداعش
.. هي هنا تكمن المشكلة مو من سقطت الموصل
ابو مصطفى اكتشف ان خطيب بنته وعائلته كلهم منظمين لداعش وكلهم عناصر فعالة ومساندة للجماعة
يعني بين قوسين ارهابيين

جاوبته بصدمة .. لا تكولها شلون ورطة هاي
كمل وشصار
.. الي صار عيال بنته وخطيبها راحوله للبيت انطوه خبر ان هم يردون يتممون الزواج خلال يومين

لكن ابو مصطفى ما كدر يرفضهم ويفسخ خطوبة بنته من هذا الارهابي
فما لكة كدامه اي حجة حتى يرفضهم وصار يحاول
يماطل وياهم بالوقت

ابو مصطفى جاوبهم .. لا على بختكم يومين شنو؟؟
وين تلحك البنية تجهز نفسها يعني انت كلتها هذا عرس وهي عروسة يحتاجلها تجهيز وترتيبات ومن هاي السوالف

وخطية صار ابو مصطفى يعددلهم بالاسباب الي تستدعي تأجيل الزواج لمدة اسبوع
وبالشافعات يالله وافقوا ينطونه مهلة اسبوع

ومن بعد ما انطوه هاي المهلة كام يخطط يهرب عائلته ويطلع من الموصل وياخذ وياه بنته اسراء

ابو مصطفى كان يكول .. الموت اهون علية من ازوج بنتي لواحد
داعشي ارهابي خسيس قذر صار لازم نطلع من الموصل بأسرع وقت لان هذولي يردون ياخذون بنتي مني

ومن يومها ابو مصطفى صفى كل اموره هناك واتصل على جلال حتى ينطيه خبر ان هو راح يطلع من الموصل ويجيب وياه حتى بنته اسراء

وجلال شجعه وكله خال تعال يمي بالبصرة وانا ارتبلك الامور كلها و جيب اسراء وياك

وبأثناء ما كان يرتب امور محد يعرف بخروجه من الموصل بس انا واهلي وكم واحد من جوارينا الثقة
ليش ما واحد من جوارينا اسمه ابو شمعون كان رجل مسيحي واستنجد بأبو مصطفى ان ياخذه وياه هو وعائلته حتى يطلعهم من الموصل

انت تعرف ابو مصطفى عنده سيارة كبيرة مال حمل وقرر يطلع بيها
وقرر يخلي عائلته ورة وهو يسوق

فخطية ابو شمعون كان كلش خايف لان البارحة الداوعش اجوا وكتبوا على بابه حرف (ن)
وهو خايف من العواقب الي راح تتبع هذا الاجراء

لذلك اجة واستنجد بأبو مصطفى يهربه هو وعائلته

وبوقتها انا كلتله ونصحته لأبو مصطفى ان ما يورط نفسه بهيج امور لان الدواعش يعتبرون اي واحد يقدم المساعدة او يتعاون او يتعاطف مع العوائل المسيحية يعتبروها خيانة ويفروضون عليه اشد العقوبات

بس ابو مصطفى كان قراره ان يساعد جيرانه المسيحي ويهربه هو وعائلته وياه

وانا رجعت كلتله بوقتها
.. ابو مصطفى ترا الموضوع مو هين وانت جاي تلعب بالنار يعني مو كافي انت راح تاخذ بنتك منهم وتهرب بعائلتك لا انت مقرر تساعدعائلة مسيحية يعني الادانة تثبت كلها ضدك انت خاين وساعتها اذا وكعت بيدهم ما راح يرحموك ومحد راح يكدر ينقذك منهم

جاوبني.. عمو سلوان الله اقوى منهم وربك شنو كاتبلنا نشوفه
سلوان .. يعني شنو راح تاخذ وياك عائلة بيت ابو شمعون

.. هذا جار العمر الي صارله سنين جاري واخوية وصاحبي
وهسه اني اشوفه محتاجني وبعازتي لا تتوقع مني انطي ظهري واعوفه
هالشي مو من طبعنا

هذولي جوارينا و تجمنا عشرة عمر صعبة. اتركه وراي يوكع بيد داعش واحنا كلنا نعرف داعش ما راح ترحمهم
بناته الي كبروا وية بناتي يروحون سبايا

.. انت حقك بهاي ابو مصطفى بس هاي العملية كلش خطرة مثل ما كلتلك
وانت اذا بقيت مصر عالموضوع تاخذ جيرانك وياك
انا راح اضطر اتصل على جلال وابلغه بالي راح تسويه

ابو مصطفى.. لا سلوان لا تقلق جلال ما له داعي ترا انت دتبالغ بحذرك
الامور مو لهاي الدرجة خطرة
على كل حال اني قررت وانتهى الامر
من باجر الفجر بأذن الله راح اخذ عائلتي وعائلة بيت ابو شمعون ونسافر

وبوقتها ابو مصطفى اتصل على جلال وكله حضر مكان وياك لعائلة ثانية نازحة وياهم

وجلال كله اهل البصرة يكولون هلا بيكم جيبهم وتعال بيوتهم مفتوحة

ما كدرت اكول لجلال عن نية خاله لكن بنفس الوقت
اتفقت وية مجموعة شباب ان يتوزعون على نقاط ومفارق الطريق حتى يراقبون الطريق ويمهدون
لخط سير سيارة ابو مصطفى

وانا بقيت على اتصال وية ابو مصطفى
طول الطريق وبالنقال الثاني اتواصل وية الشباب الي راح يأمنون الطريق لحد مايوصل
لحدود المدينه ويطلع منها

كنت كلش خايف عليهم وقلق ما اعرف ليش گلبي ناغزني عليهم
وكان بودي اكون وياه بس مااكدر لان اني مطلوب من الدواعش

كان ابو مصطفى يقود سيارة الحمل وابو شمعون كاعد يمه ومصطفى كان كاعد بينهم

وعوائلهم كانوا صاعدين ورة بالخلف
وغطوا السيارة بغطاء خاص بالسلع حتى ما يلفتون الانتباه

وبهاي الاثناء بين ما كنت اراقب الطريق وية الشباب واحجي وية ابو مصطفى بالنقال

وصلني خبر من واحد من الشباب كال
خطيب اسراء واهله عرفوا بهروب ابو مصطفى وعائلته
وحتى عرفوا بمساعدته لعائلة ابو شمعون

يعني الخبر انتشر بسرعة خلال ساعات مو اكثر
وبلحظتها الدواعش علنوا خبر
وذاعوا عن اسم ابو مصطفى وحسبوا من الخونة
الخارجين عن قانون دولة الخرافة

الي افتهمته من المعلومات الي وصلتني
جاي يدورون عليه وبلغوا جميع سيطراتهم الموجودة على طول الطريق

وانا مباشرتا حجيت وية ابو مصطفى ابلغه
.. عمو ابو مصطفى ارجع بسرعة لا تكمل طريقك
.. شنو ليش ارجع شكو
.. عمو خطيب اسراء عرف بخطة هروبك وبلغ عنك
وهسة الكل يدور عليك فانا انصحك ترجع لبيتك
وتبين لهم عدم صحة الخبر

.. شنو سلوان انت شتكول شلون اسلمهم نفسي
هذولي اذا يلزمونا ما راح يرحمونا
اكيد يقتلونا وياخذون بناتنا سبايا.

جنت احجي وياه بجزع وخوف
.. لا ابو مصطفى اذا لكوك بالبيت انت وعائلتك وكذبت الخبر ما راح يسون شي عفية الله يخليك ارجع

.. مستحيل ارجع معناها اسلمهم بنتي وهذا راح يصير عار معلك برگبتي

وانا راح استمر بطريقي
سمعته حجة وية ابو شمعون وكال
.. يعني اذا قررت ارجع الهم مو بس راح ازوجهم بنتي اسراء
لا وضيف فوكاها راح اسلمهم جاري ابو شمعون كبش فداء وساعتها الله العالم شنو راح يتخذون من اجراءات وياه

ولطالما ابو مصطفى يحجي وياي بالنقال كان مستمر يقود السيارة وابد ما اتوقف
وهالشي خلاني افقد عقلي من التوتر

.. ابو مصطفى لا تستهين بيهم ابوس ايدك ارجع
لا تنسى انت وياك عائلة واطفال مو مال تكعد تجازف بيهم كلهم

.. لتخاف سلوان ما بقى شي ونطلع من حدود الموصل
كلها شغلة ربع ساعة ونكون طلعنا عن منطقة الخطر

كان يحجي وسمعت صيحة ابنه مصطفى الخايف
.. بابا انتبه سادين الطريق

ابو مصطفى حجة وياي بصوت بي الرعب كله
.. سلوان هذولي واكفين بالطريق ولازمين قاذفاتهم

ويأشرولنا حتى نتوقف
كلتله بتوسل
.. ابو مصطفى اتوقف واسمع كلامهم سوي مثلما اكولك

ابو مصطفى كان يخوض الصراع بين اتخاذ القرار
سمعت مصطفى يحجي وية ابو شمعون يسأله
.. عمو ليش لزمت الصليب شنو راح يصير

سمعت انفاس ابو مصطفى العميقة وكال
.. سلوان ما راح اتوقف وراح اكمل طريقي
مستحيل اسلمهم عرضي وجاري.
راح احاول اجتازهم بكل سرعة
حجة كلامه وطبقه وزاد سرعة السيارة

.. ابو مصطفى لا تستعجل اترجاك اتريث

كال .. شوف سلوان انا بكل الاحوال ميت سواء سلمت نفسي بيدهم او طلعت منا واعترضوا طريقي

بس اكو فرق كبير بين الثنين
على الاقل اموت وانا اقاومهم بشرف ورفعة

احسن من ما اموت بين ايدهم راح يكون بذل وهوان ومو بعيد يمثلون بجثتي وبعرضي

بعدها سمعته تلفظ بكلمات الشهادة وكال
.. (اشهد ان لا اله الا الله وان محمد رسول الله )

واتبعه صوت ابو شمعون الخاشع وهو يتلو صلاته
( باسم الاب والابن والروح القدس امين)

وكانت هاي اخر كلمات اسمعها منهم وبعدها
سمعت صرخات الرعب واتعبها صوت مدوي مفزع
اسكت جميع هاي الاصوات الخايفة

ومن الاخبار الي وصلتني من اصدقائنا الشباب الي كانوا يراقبون الطريق

ان داعش طلبوا منه يتوقف ويسلمهم نفسه وابو مصطفى
زاد سرعة السيارة ورفض يستسلم
وهم ضربوا سيارته بقاذفة.
نسفت السيارة وحولتها الى حطام

وللاسف ما طلع ولا واحد بيهم عايش الكل ميتين
وهسة احنا منتظرين يغفلون عن الجثث حتى ناخذهم وندفنهم.

هاي اذا كدرنا نتعرف عليهم بس مو مشكلة
اهم شي ندفنهم ما نبقيهم هشكل

صار حتى دفن الميت في وطننا خطر وصعب

كان سلوان يحجي بألم وانا دموعي تنزل
لفت انتباهي شهكة البجي الي صدرت من نور
رفعت راسي ولكيت امي حاطة شيلتها على وجهة وتبجي والبنات نفس الشي كلهم يبجون شكلهم
سمعوا كلام سلوان

نور
خيم الحزن على اجواء البيت
وصاروا الجوارين والكل يجون على بيت مهيمن
واجوي اهل عناد امه واخته رغد حتى يواسونا

ام مهيمن كامت واستقبلت ام عناد وصارت تنعي فقد الاحباب ولكل وحدة بيهم مصاب

واني حظنت رغد وبجيت وهي كعدت تطبطب على كتفي وهمست من بين دموعي وكلت بخوف

.. رغد اني كلش خايفة على اخوية جلال لا يصير بي شي من ورة الي صار

رغد.. ربي يفرغ عليه الصبر
الله يساعده مو شوية الصار موقف جلال وحالته ذكرتني بحالة عناد بيوم عرف بوفاة اخوي كرار
هيج انتكس واعتزل عن الكل

ولحد هذا يومج عناد فاصل عنا كلنا
كلشي اتغير بحياته تصرفاته وشخصيته كلها اتحولت حتى لبسه وشكله ما كام يهتم لهم
عكس قبل كان مهووس باناقته وترتيبه

ابد مو هو عناد ابو روح المرحة و الضحكة الي كانت دوم مرسومة على شفافه غابت وما عادت تنذكر

معجزة اذا شفنا عناد يبتسم
وداعتج لهذا يومنا عناد بعيد عنا قريب بس بالجسد
بس عقله وتفكيره دومه شارد ما يهتم بالي يدور حوله
فقط يطلع للشغل ويرجع للبيت ياكل ويسبح وينام

وبيوم سمع الي صار وية عائلة جلال
راح يركض مصدوم وكانت هاي اول ردة فعل طبيعية
تبدر من عناد

فمن هسة اكلج يا نور جلال وراه مشوار طويل لحدما يجتاز هاي المحنة ويبدي يتأقلم وينسى الي صار

كانت رغد تحجي عن عناد واني اقارن تصرفات جلال
خلال هاي الايام الفاتت

فعلاً كلام رغد عن عناد تقريباً ينطبق على
جلال كان عبارة عن جسد خاوي فقط يتحرك
يروح يكعد بالاستقبال يم مهيمن وخواله واصدقائه من باب الواحب وواحد منهم عناد الي ما تركه ولا لحظة

لكن كل هذا ما كدر. يسحب استجابة او اي ردة فعل من جلال
ما يحجي ولا يشارك بالكلام فقط يتحرك ويسوي الاشياء الحياتية الضرورية

وهالشي زاد خوفي عليه ومهيمن مثل مخاوفي بس ما يعلن عنها كدامنا لكن عيونه فاضحته
كانت عيونه على جلال تراقبه بكل خطوة مثل الي يراقب بطفل صغير خايف يسوي بروحه شي

كنا كل هاي المدة مشغولين بجلال ونسينا سالفة الوصية ولحد ما اتصل المحامي ابو سيف على مهيمن وطلب منه ان يجيبنا لبغداد حتى نكمل توقيع الاوراق

لان مدة السنة انتهت وصار لازم يسلم حصة كل واحد بينا الا ريم تبقى حصتها يم المحامي لمدة سنة ثانية وراح تستمر عالراتب الي مخصصه لها عمها وتبقى تعيش ببيت مهيمن طول هاي المدة هو ولي امرها

مهيمن اعتذر من ابو سيف وكله عن وضع جلال
وابو سيف قرر هو يحضر يعزي جلال ويجيب وياه الاوراق ويسلمها لنا

واستغرقت كل هاي الاجراءات يومين
وطول هاي اليومين جلال حاضر ويانا بس بالجسد
لكن هو وتفكيره بغير عالم

ومهيمن تقريباً قرر عنه اغلب القرارات ومن ضمن القرارات
ان يتم ابقاء جميع اموال جلال بالبنك بالوقت الحالي وعدم التصرف بيهم وسلم دفتر الشيكات الخاص بجلال بيد مهيمن ومهيمن كدام المحامي سلمه بيدي وكال

بقي عندج لان جلال مو بحال هيج امور
وانا عندي هواي امور شاغلتني خاف يضيع مني

هذا كله صار وجلال انطى موافقته حتى من غير ما يسأل او يستفسر
غركان بحزنه يا ترى شوكت ناوي يصحى من هذا الحزن ويرجع لنا والله اشتاقيتله

مشتاقة لنظرة الحنان الي بعيونه من يسألني عن احوالي
ومشتاقة لضحكته ولمعة عيونه

وبين كل هذا الصار فاجئتنا ريم بسؤالها
ريم .. عمو ممكن تفهمني اذا اني خلصت مدة السنتين
ولو هسة هي سنة خلصت وما بقت الا سنة وحدة
واكون كملت مدة السنتين صحيح كلامي والا اني غلطانة ؟؟؟

.. لا صحيح كلامج
.. زين سؤال من بعد ما تخلص هاي السنتين
الي حرية الاختيار بأن اطلع من بيت ابن عمي واعيش بغير بيت

ابو سيف باوع لمهيمن وجلى صوته.. اي طبعاً انت حرة هاي اكيد من بعد ما يكون بينكم اي ارتباطات خلال هاي الفترة

باوعت لمهيمن بتحدي وكالت لابو سيف
.. لا اتطمن عمو ماكو اي شي يريطني بأبن عمي غير بس صلة الدم والقرابة. غيرها ماكو شي

مهيمن بأعتراض.. حتى لو مو بكيفج تطلعين من هذا البيت ما عندنا مرة تطلع بكيفها
وتعالي عند منو تردين تعيشين وانتي ما عندج اقرباء غيرنا

التفتت عليه وهي معصبة وكالت..
.. ابن عمي العزيز لا تخاف علية اتطمن
اني اعرف حدودي
بس شكلك نسيت شغلة وحدة مهمة وهي ان اني اكدر اعيش ببيت زوجي

ابو سيف جاوبها .. اكيد طبعاً بيت زوجج اولى تسكنين بي وهاي بعد بقت يمج من تتزوجين تكدرين ترحين
.. اوكفي لحظة عن اي زواج تحجين عن بيت يا زوج تعيشين بي وانتي بيضة ما تعرفين تگلين

اباوع لمهيمن كان يحجي بغضب
جاوبته ريم بثقة
.. الي راح يتزوجني علمود يحبني الي لنفسي مو علمود طبخي. واذا عالطبخ فهذا مو سبب قوي حتى
ينجح زواجي ولخاطر زوجي وابو بيتي اتعلم الطبخ وكلشي اسويله باوعت لأبو سيف
صحيح كلامي والا انا غلطانة

اباوع عليه نطت عيونه وفتح حلكه يريد يحجي ورجع
سكت لم ايده بقبضة يريد يطلع حركته بشي

ابو سيف جاوبها بارتباك محرج وهز راسه بموافقة
.. كلامج كله صحيح وما عليه غبار

عاط بي مهيمن وشكل ابو سيف راح يصير ضحية غضب مهيمن
.. اوكف عمي لحظة انت شنو سالفتك اشتغلت علينا مفتي مال زواج. ما عليك منها هاي ما تعرف شنو كاعد تحجي عبالها الزواج لعبة

اصلا هذا الموضوع بكبره غير قابل للنقاش حالياً انتي هسة يالله نجحتي من السادس وراج كلية عود كملي دراستج ووتلحكين عالزواج العرسان ما طايرين

.. لا اصلا هذا الموضوع بالذات لازم اناقشة وية عمو ابو سيف
لان مستقبلي كله مرتبط بي

عافت مهيمن يفور من الغيض من ورة كلامها وحجت وية ابو سيف

.. عمو عندي سؤال ثاني
ابو سيف .. سألي عمو بعد شنو عندج من استفسار

جان يحجي ويباوع لمهيمن بحذر كان مبين عليه راح ينفجر من الغيض

.. بعد عندي فقرة اريد استفسر منها
فرضاً اتقدملي واحد للزواج قبل لا تخلص السنة الثانية
الي حق اتزوج لو الا تخلص السنة الثانية يالله يحقلي

هي كالت هيج ومهيمن انفجر

.. استغفر الله ولج غضب اليوم ما ناوية تجيبيها على خير

گلبت عيونها .. انت شكو معصب منو داسلك على طرف
ابو سيف حجة وية مهيمن .. كلامها صحيح
فعلاً سؤالها ما بي شي يخليك تعصب

باوع عليها وكال .. لا عمو ريم ماكو مشكلة اذا صادف
اتقدملج واحد قبل انتهاء السنة الثانية هي كلها قسمة ونصيب

مهيمن كال.. وضيف فوكاها ماكو قسمة ولا نصيب يصير اذا ما تم موافقتي

ريم .. شلون يعني الا بموافقتك
.. شنو نسيتي انتي مسؤليتي حالج من حال نور
انا ولي امرج يابعد عمج

لمعت عيون ريم من نطق هاي الكلمة

ابو سيف .. بهاي انت كلامك صحيح يعني هي الاصول تكول هيج

ريم.. اكيد الرجال الي راح اتزوجه لازم يكون صاحب اخلاق وذوق ويخاف علية وما عليه غبار
فعادي مو مشكلة خلي مهيمن يسأل عن زوجي المستقبلي فديته

باوعت لمهيمن وصل حده منها وهي مثل الي كامت تلعب بالنار حتى تحركه بيها بس بنفس الوقت جاي تحرك نفسها

رحت عليها حتى الم الموقف المتوتر
اقتربت منها ولزمت ايدها حتى نطلع اني وياها من الاستقبال وكلت
.. عمو ابو سيف تعبناك ويانا اليوم
واحنا فوك تعبك طولنا عليك بمشاكلنا واستفساراتنا

ابو سيف .. لا عمو بالعكس تعبكم راحة
انتوا اولاد الغالي وهذا الشي الي جاي اسويه واجبي
وقليل بحقه

بعدها مهيمن اتشكر منه
لان اجة للبصرة حتى يكمل اجراءات الوصية
هذا كله صار وجلال ما حاول يشارك ويانة بأي كلمة

كام من يمنا وترخص من ابو سيف وطلع
واني وريم طلعنا وراه

وكنا وحدة تباوع للثانية
ريم بصوت ناصي .. نور ما حاولتي تحجين وياه
جاوبتها واني اباوع عليه شلون صعد الدرج اكيد راح لمكانه المفضل السطح كان اغلب ايامه الكاه هناك كاعد

.. ليش هو ينطي فرصة حتى احد يقترب منه ويسولف وياه ريم ما تشوفينه شلون منطوي على نفسه

الطريق لگلب جلال كلش صعب كنا نحجي اني وريم وما فاتتني نظرات الاهتمام من حوراء
كانت تحوم حولنا.
حتى تتسمع شنو نكول عن جلال هذا حال حوراء

اتجاه جلال كانت مثل البزونة الي تدور على جهالها الضايعيين
لكن الي ما تعرفه ريم ان حوراء كانت الشخص الوحيد الي كدرت تسحب استجابة من جلال

كانت تصعد للسطح بالخفية من غير ما احد ينتبه عليها حتى كانت دائما تاخذ وياها اكل لو تسويله كيكة لو فطائر ما تصعد وايدها فارغة كانت هاي طريقة حوراء بالمواساة. بالاكل

اتذكر بأول ايام كان جلال يصدها ويطردها ويبعدها عنه لكن هي ولا كلت ولااهتمت لصده بالرغم انا من يمي خفت منه من عاط بيها ولزم معصم ايدها
بغضب وكللها بتحذير

.. سمعيني ولج زين اذا صعدتي مرة الثانية وراي صدگيني اشمرج من فوك السطح من غير ما يرفلي جفن

جاوبتها وهي تنفض ايدها منه .. اي ميخالف عود من
اصعد مرة الثانية اشمرني من السطح هسة تعال اكلك لكمة

باوع عليها بغيض ودفع الصحن واتبعثر الاكل بالكاع
دنكت ولمته من الكاع وراحت نزلت

ورجعت يوم ثاني وثالث ورابع وخامس وهم قابلها بنفس الصد والعناد
ما لان الهة كان اغلب وقته يشتغل على جهاز غريب ما اعرف شنو هو بالضبط بس كل الي اعرف ان هالشي ماخذ كل وقته او وسيلة حتى ينسى بيها حزنه. على عائلته

كانت واكفة كدامه وهي شايلة بيدها ماعون بي اكل ابتسمت بوجهه ولا كأنما البارحة مرزلها او حاجي عليها

حتى اني اخته ما اتجرأ اقترب منه من اول مرة
صدني حتى بدون ما يوجهلي كلام فقط دار وجهه عني وبعد ما عدتها صرت بس اراقبه من بعيد ما حبيت اضايقه. كان رده مع الكل الصمت

الا حوراء كان يحجي وياها بغضب ويبادلها الكلام من غير ما ينتبه على نفسه حوراء الوحيدة الي كدرت
تاخذ منه استجابة على الاقل بغضبه يثبت ان هو انسان
يكدر يعبر عن غضبه بعد ما ايسنا كلنا منه حتى مهيمن اكثر من مرة يطلب منه يطلع وياه للشغل او يطلع وياه
يغير عليه جو لكن ماكو ما بدر اي رد. او جواب من جلال

انتبهت هواي مهتم بهاي القطع السكراب الغريبة كان مشغول يضبط بالجهاز من خيم ظلها عليه يحجب ضوة الشمس عنه رفع راسه وباوعلها بتعب وقلة صبر

.. انتي شنو سالفتج ما تعبين عوفيني بحالي رحمة على والديج انتي شنو ما رايدة روحج لا تخليني اطلع من طوري واتجاوز عليج وساعتها تشوفين مني شي ما يعجبج

هنا عاد حوراء فاجئتني وفاجئت جلال من عاطت بي مثل الي طفح بيها الكيل وانفجرت وكالت .. اكول انت شنو سالفتك والله خبصتنا
ترة انت مو اول واحد يفقدله ناس اعزاز على گلبه ولا اخر واحد وهذا حال اغلب الناس يعني انت برأيك اذا بقيت تصدنا وتبعدنا عنك وتعاملنا بقسوة راح

تكدر تنساهم او تنسى حزنك عليهم جلال كافي اصحى على نفسك ترة بيت خالك ماتوا خلاص بعد ما يرجعون

حوراء بكلامها القاسي خلت جلال يطلع العاصفة الكامنة جواه
هد عليها ودفعها حيل لدرجة ان حوراء اتعثرت ووكعت بالكاع من اثر دفعته وصدر منها صرخة متفاجئة وخايفة بنفس الوقت

اتقدمت اريد اتدخل خاف يسوي بيها شي لكن اترددت

احس بتدخلي راح يزيد الامور تعقيد ويزيد غضب جلال من يعرف اكو شخص ثاني شاهد على غضبه
صارت حوراء تفرك بزندها والظاهر اتأذت من وكعت بالكاع

سمعت شهكات بجيها
باوعت لجلال الي كان واكف وكف متصنم بمكانه ومتفاجيء من ردة فعله وياها بانت على وجهه تأنيب الضمير والتردد المصاحب للاهتمام

غمض عيونه ودنك وقترب منها وكال بصوت خشن يصوجها

.. شفتي عنادج وين وصلج مو كلتلج انا بلاء اسود ابتعدي عني هسة هيج احسنلج مو كلتلج انا غير مسؤل عن تصرفاتي من اعصب وهسة شفتي شلون ردي
يالله حبابة كومي وروحي نزلي

حوراء باوعت للاكل الي اتبدى نصه وعيونها كلها دموع وكالت

.. زين شلون وهذا الاكل الي سويته حرامات المن
يروح

اباوع لجلال بقة صافن بوجهة مستغرب اكبر همها مو الم وكعتها كان اكبر همها. شلون الاكل وين تودي

وكأن خلصت مشاكل العالم وما بقت غير بس هاي المشكلة. باوعتله بتوسل

.. عفية جلال بس هالمرة اكل هاي الفطائر والله امي اذا شافته تملص اذاناتي وتطين عيشتي

كانت تحجي بعفوية اني من يمي ابتسمت على كلامها
وفعلاً حوراء كدرت توصل لگلب جلال وتخترق حصون حزنه ببساطتها وطيبة گلبها وعفويتها

اباوع على جلال قربان كعد بالكاع كدامها بقلة حيلة
وسحب الماعون بغيض وكعد ياكل

.. وهذا انا راح اكل زقوم يالله ارتاحي بس فكيني من الملحّة مالتج

لكن جلال ما شاف نفسه شلون كان ياكل بشراهة. عبالك اول مرة يدخل الاكل بمعدته

او بالاحرى هو كان ما ياكل بالاصل كان فقط يسد جوعه بشي بسيط. كانت دائماً وترجع صينة اكله ترجع مثل ما هي. وما متغير بيها شي غير بس وصلة خبز صغيرة وماي

حتى ام مهيمن عجزت تحاول وياه ما كدرت تخليه ياكل اكثر من هيج وهالشي اثر على جسمه وصار يوم عن يوم يضعف

ومن هذا اليوم اتعودت حوراء تصعد بهدوء وبدون ما احد يشوفها ومثل كل مرة تكون مسويتله اكلة شكل

وجلال كان ما يوجه لها كلام بس يشوفها ياخذ منها
ماعون الاكل ويكعد ياكل بهدوء من غير ما يحجي وياها اي كلمة والحلو بالموضوع كانت حوراء هي الي تحجي وتسولف وتجاوب نفسها

ما خلت شي ما حجت بي حتى عن جورينا كامت تحجيله واخير شي تكعد تسأله عن السكراب الي ماعد يشتغل بي. وهو ما يجاوبها يكمل اكله ويرجع يكمل شغله

كنت كلش فرحانة بتقدم حالة جلال صحيح شي بسيط بس على الاقل كدرت حوراء تخليه ياكل

ياترى هم راح يجي اليوم واشوف ضحكة جلال ترجع له من جديد

والله خايفة لا تكون ضحكته ماتت وية موتت بيت خاله

كان الوقت ليل وكنا كلنا نايمن تقريباً لكن فجاءة
سمعنا صياح جلال ومهيمن
نهضت من مكاني مفزوعة ورحت لمكان صياح الولد وام مهيمن والبنات تبعوني
رحت يمهم اريد اشوف شنو الصاير

يتبع

اتمنى لكم قراءة ممعتة
اختكم نهى الحسون