قضية لم الشمل الفصل الثامن وثمانون 88 - بقلم نهى

🌹🌹🌹
#الكاتبة_نهى_الحسون
#قضية_الشمل ج٢

مساء الخير والعافية عليكم
هاقد وصلنا بعون الله الى محطتنا الاخير
مع ابطال قصتنا

نور

كعدت من الصبح ورحت دگيت باب الغرفة على هنا واخواتها

خالة زهرة
ثاني يوم من وصولهم فرغتلهم غرفة مهيمن القديمة وخلتها بس للبنات حتى ياخذون راحتهم بيها

صارلهم اربعة ايام من وصلوا
وخلال هاي الايام الفاتت اتعودت عليهم

كلما اكعد من النوم اروح عليهم للغرفة حتى يطلعون وياية
لان ادري بيهم لو اعوفهم لليل ما راح يطلعن من الغرفة
يبقن بمكانهم يستحون يأثرون علينا

بس خالة زهرة واني والبنات نحاول وياهم حتى ياخذون راحتهم بالبيت

وحتى مهيمن
صار يطلع من الصبح حتى ريوگ ما يتريگ بالبيت علمود
البنات ما يتقيدون بي

انتبهت عليه خطية صار مثل الخطار يدك الباب من يريد يدخل للبيت يصيح
علينا حتى نسويله طريق ويعبر يصعد لغرفته فوگ

اما جلال
فلا زال متولي مسؤلية البنات
ويتصرف وياهم عبالك اخواته. وحتى هن اذا ما يشوفون جلال يظلون يسألون عليه
الي افتهمته من جلال هو اتكفل بيهم وجابهم للبصرة
بعدما هربهم من الدواعش

اما علاقتي وياهم من اول يوم لهم عندنا صار التقارب بينا قوي وصرنا صديقات كنت استغل وجودي لوحدي وياهم بالبيت بعدما البنات ريم وحور يرحون للدوام فنبقى اني وياهم وحدنا

مرات نگعد ندردش عن اشياء بسيطة تخص حياتهم وعاداتهم وعيشتهم بالجبل
طلعاتهم بالربيع وشلون يسون اعيادهم دبكاتهم
كانت الذكريات حلوة بالنسبة للبنات يتذكرون ايام سعيدة عاشوها
اما بالنسبة الي فكانت تاخذني لعالم ثاني عمري مشايفته
لان عمري مسافرت ولاشفت جبل بس بالتلفزيون

وسألتهم عن دراستهم وشنو شهاداتهم كان مبين عليهم
دارسات وكدرت اعرف عنهم هواي امور
بس شغلة وحدة كنت مترددة اسألهم عنها
وهي عن حياتهم بعدما اخذوهم سبايا
ما ردت احرجهم

كنت صافنة وكاعدة اكوي بملابس جلال و دك نقالي وكان المتصل رغد
اتصلت حتى تأكد علية موعد حجز الصالون

لان عناد قبل يومين فاتح مهيمن وجلال
بموضوع موعد العرس واستأذن منهم وهم وافقوا وباركوله

ومهيمن حجة وياي اني وامه حتى ابدي
اجهز نفسي وگلي اذا تحتاجين اي شي گولي انا موجود

والبارحة خالة زهرة فاجئتني بسوار ذهب كان هذا السوار هدية من مهيمن بساعتها من صدگ بجيت من المشاعر الي احتلت صدري
بذيج اللحظة حسيت بفخر بهديته الي

واليوم مثل كل يوم ريم وحور بالكلية
ونبقى اني والبنات بالبيت لوحدنا اشتغل بالبيت وهم يساعدوني برغم اعتراضي بس كانوا مصرات يشتغلون وياي بالبيت

هَنا گالت .. نور ترة احنا متعودين على الشغل ما نحب الگعدة
احنا عايشين بقرية ونشتغل بنشاط وبابا عنده
دواجن وكم بقرة واني واخواتي واخواني اتعودنا نساعده
ابتسمت وكلتلها .. بس انا ما اريد اكلفكم بشي انتوا ضيوفنا
عيب هسة خالة زهرة اذا تجي وتشوفكم تشتغلون شتگول عني

زينة جاوبتني وگالت.. احنا نكوللها خالة ضجنا من گعدة البيت
ماكو اي احراج مثلما انتوا فتحتوا بيتكم النا
بدون قيود ورحبتوا بينا
واحنا هم فتحنا گلوبنا الكم وملكتوها بطيبتكم وهالشي ما راح ننساه الكم

.. هذا واجبنا الناس لبعضها

بعدما خلصنا شغل كعدت اني وياهم مثل كل يوم نتشمس بالطارمة ونسولف

انتبهت لأازاد سحبت نفس عميق وگالت .. اشتاقيت لأمي ولاخواني ولبابا ما اعرف شنو مصيرهم ووين صفوا بعد داعش اشتاقيت لحياتنا الهادئة البسيطة

حسيت عليها راح تبجي گبل بدلت الموضوع وطلعت نقالي
وصرت اراويهم صور البنات ريم وحور عندي بالنقال
مرات من يطلعون للدوام يطلبون مني اصورهم

جوانا تباوع عالصور وگالت . اني المفروض هاي السنة اول كلية بس الوضع حال بيني وبين دراستي

انتبهت لنظرات عيونها من تباوع على حور وريم
من يطلعون للدوام نظرات عيونها بيهم الف حسرة

جاوبتها .. ان شاء الله يتحسن الوضع وترجعين تكملين دراستج
شفت الامل بعيونهم.
وبعدها اتجرأت اسأل البنات عن الصار وياهم من سبوهم داعش
بدوا يحجولي عن مخاوفهم وشلون دخلوا بحالة رعب مفزع
من اختطفوهم من داخل بيوتهم

واكثر وحدة اتضررت بيهم هي زينة اتعرضت للاغتصاب على ايد واحد نجس من الدواعش وفوك هذا كله اتعرضت للضرب
ترك اثار على جسمه

ونهت كلامها وگالت بعد ما اتوقع راح اكدر اتزوج واكون
عائلة مثل البنات كانت تحجي وبعيونها الف حسرة

اما ازاد فكالت .. اني سويت روحي مخبلة وحركاتي مال وحدة متلبس بيها جني وكل شوية اگلب بعيوني للاعلى
يختفي البؤبؤ ويبقى بياض العين كانت هاي لعبتي
المفضلة من جنت صغيرة

لدرجة الداعشي الي صرت من نصيبة
خاف مني وطردني من البيت بنص الليل بعد ما سحلني بالضرب اسمعه يكول اطلع ياجني

وانا اخشن صوتي اكله اذا اطلع منها اجي اسكن عندك
وهو انرعب وشمرني بحضيرة الخيل والخرفان

بقيت هناك يم الحيوانات انظف الحضيرة وانطيهم علف
بالنسبة الي مو مشكلة لان الحيوانات انظف منهم
صحيح الحقير ترك كم اثر بجسمي من ورة الضرب بس گدرت انفذ بجلدي وما يلمسني

اما جوانا الداعشي الي اخذها كان مو رجال ما يكدر يسويلها شي بس كان يضربها كلما يقترب منها ويكوللها رددي ورائي
انك رجل عظيم سيدي

تكول .. اني صرت مثل الببغاء كلما اشوفه اردد هَـاي العبارة

واذا بيوم انسى ارددها احصل على ضرب اظل اتلوى يومي كله
كان دائماً يتوعدلي ويهددني ويكول هاي انت السبب العلة بيج
نفسي متتقبلج لذلك مااكدر

كل مرة يطلعله سبب لضعفه ويضربني
اكنت عايشة برعب ما بعده رعب بس رغم هذا بيني وبين نفسي فرحانة

اثر الضرب يروح بس تقربه مني شلون اكدر امحي اثره

وختموا قصتهم المؤلمة بحادث اغتصاب وموت اختهم الصغيرة

بس هنا كان عدها حظ وصارت من نصيب جلال

كانوا البنات يحجولي واني گوة لازمة نفسي لا انهار بالبجي عليهم
هَنا باوعت علية وكالت .. تصدگين حتى جلال ما يعرف عن الصار بخواتي
فقط انتي والضابط تعرفون بموضوعنا

عقدت حواجبي وسألتها .. الضابط
اي نعم من هربنا وية جلال هناك اخذنا لمكان مثل القيادة بيها ضباط وواحد منهم گعد يحقق بموضوعنا وسجل صوتنا وسوى لكل وحدة بينا تقرير بقضيتها

صدك الي يشوف مصايب الناس تهون عليه مصيبته
كنت اتصور محد بگدي بالهموم الي مرت علية وية خالتي ورجلها النجس وتحرشاته بس بعدما سمعت بالصار بالبنات
صرت احمد الله واشكره على حياتي هواي احسن منهم

كنا مندمجات بالسوالف وسمعنا صوت الجرس يندگ
ازاد گامت من مكانها وگالت هاي يمكن خالة زهرة
اجتي من السوگ

ابتسمت خطية صاروا يعرفون وقت رجعوها من السوگ
راحت ازاد تفتح الباب وبعدها

دخلت خالة زهرة للبيت جايبة المسواك. دخلت ازاد وراها شايلة علاگة بيها فواكه

خالة زهرة كلتلي .. خالة نور عفية كومي طلعي ماي لطالب بالباب خطية وصلني بطريقه

رحت اخذت الماي وطلعت للباب كنت متعودة على طالب
مرات اطلعله اخذ منه السجلات من كان مهيمن مسافر

سلمت عليه وانطيته
كلاص الماي اخذه مني وشكرني
بس انتبهت لعيونه كل شوية كانت تعاين وراية

التفتت على مكان نظراته وكان اشوف
ازاد جاي تدخل المسواك الموجود بالطارمة للبيت

رجعت باوعت عليه وهو انتبه لنفسه
وجلة صوته بسرعة وگال
.. ما اعرف ببيت عمتي غير بس جعفر ومهيمن وانتي وباربي
من شوكت صاروا بيت عمتي زهرة جنة عدن وعندهم حورية

ضحكت على كلامه وهو حس على زلة لسانه
وصار يعتذر وراح بسرعة ما اشوف بس غباره

ريم

اليوم قررت اغيب لان ما عدنا محاضرات مسوين يوم ثقافي بالكلية
واستغليت الفرصة حتى اساعد نور بتجهيزات عرسها
لان ما بقى شي على زواجها

واليوم خالة زهرة اخذت هنا وخواتها للسوگ بعدما جلال انطاها فلوس وطلب منها تاخذهم. تشتريلهم وتشوف احتياجاتهم وخالة طلبت منه يوصلهم للسوگ بطريقه

ولو اني ونور وحتى حور وخالة ما قصرنا وياهم بتوفير احتياجاتهم بس جلال اصر يطلعون يشترون

انتبهت لنور
رفعت ثوب ميدي قصير كدامي وگالت
.. هسة بالله هذا وين البسه اذا انا رايحة عند عيال ومبينين ملتزمين مو مال اخذ راحتي باللبس

.. تكدرين تلبسيه بالغرفة
ابتسمت وغمزتلي وگالت
.. وتتوقعين استاذ عنودي راح يقبل البس هاي اللبسة داخل غرفتنا
اذا هو من هسة متحلف لي

ضحكت وانا اتذكر سالفة الجنطة وگلت.. اي والله صدك وجنطة المفخخات كانت خير دليل

بس صدك ما گلتيلي هو شلون جاب الجنطة وجلال ومهيمن
شنو سالفتهم لان اني بس شفت الاغراض الي جايبهم
وراها صاحني مهيمن والتهيت نسيت اسالج

.. سكتي لا تذكريني بموقف البارحة
خرب شلون احراج
البارحة عناد اجاني وجايب جنطة وياه
سلمها الي وگال هاي جنطة نيشانج

وانا الفطيرة سألته مستغربة
.. جنطة نيشاني شنو ؟؟؟ بس امك جابت جنطة النيشان
بيوم عقد المهر

باوع لاخواني مهيمن وجلال الي جانوا گاعدين بالهول يشربون جاي
ويسولفون بينهم مسوين نفسهم على اساس بالهم مو يمنا

باوع عليهم وحجة وياي من بين اسنانه وگال .. شمعرفني هي دزتها
هسة اخذيها وفضينا
خاف دازتلج شغلات محضورة ومن هاي السوالف

اخذتها منه واني مستغربة كرم امه وگلتله من باب المجاملة
.. اشكرها عني ولو هي ما مقصرة

جلال من يمه دخل عالخط والظاهر كان مرابط ويانة
وكال.. العب صار بيها شغلات محظورة بس لا حاطة مفخخة بالجنطة
بالله شو نور فتحيها خلي نشوف
شنو دازة

عناد بسرعة جاوبه .. خاب جلال رحمة على اهلك عوفنا
لا تدخلنا بسوالف الاستخبارات مالتك وتكعد تطبقها
براسنا انا ومرتي

وبوكتها عناد بسرعة بدل الموضوع وسألهم عن مكينة بالمعمل عطلانة.
وصاروا يحجون بيها

واني اخذت الجنطة وطلعت من يمهم
وشفتي بعينج المصايب الموجودة بالجنطة

ضحكت واني اتذكر شكل نور المصدوم من فتحت الجنطة
وشافت الشغلات المحظورة بيها من سيتات النوم

.. ما ينلام جلال من گال خاف بيها مفخخة يعني صدگ كلامه
نور كاتمة ضحكتها وگالت

.. لا ونوب عناد المگرود من طلع من البيت اتصل علية گام يحجي علية يكلي
بنت الاوادم ابتليت على عمري واشتريتلج كم شغلة عجبتني
وانا مسافر گلت انيطهم الج بوجهي وانا راجع
ما ردت اهلي يشوفونها لان بيها شغلات خاصة
الج اشو اتخلص من اهلي يطلعولي اخوانج شلون حظ مسكرب ))

.. والله حقه ابتلى على عمره موقف محرج بس تردين الصدگ عاش ذوقه على التحف الي جايبهم يجننون وفيكات

كنت احجي واحرك بحواجبي بخباثة
اباوع لنور انگلب وجهة طماطة وكالت
.. بربج يعني هذا الافة. الي جايب هذني السوالف
تردينه يقتنع بهذا الثوب المستور البسه بالغرفة

.. اكيد لا بس اذ.........

انفتح الباب بكل قوته ودخلت علينا العاصفة الحورائية للغرفة
كانت راجعة من الكلية و العيون حمر من الغضب

نور گبل سألتها.. ياستار استر هَـا حور خيرج اشو داخلة
علينا هايجة صاير شي بالكلية متعاركة ؟؟؟

حور شمرت جنطتها والملازم عالسرير وگالت .. ياريت متعاركة بالكلية جان ارتاح گلبي

.. لعد شكو شبيج معصبة
جاوبتها حور وهي تنزع شالها مثل المختنگة
.. بعد شنو يصير بية من اخوووج استاذ جلول الحنين
ماخذلي هنا وخواتها. وكاعد يفرفر بيهن

اهووووو هاي صاعدة عندها الغيرة فول
هي من غير كل شي كوة ضاغطة على اعصابها ساكتة تشوف
اهتمامه بيهم وسؤاله عليهم
ونوب تسمع بي يشتريلهن ويطلعهم لا هاي هي كملت
يعني هي حقها اكيد مااكدر اتخيل نفسي بمكانها

حور كملت كلامها .. بربكم وين صايرة ياخذ البنات
ويتسوك وياهم هسة افتهمنا هو حنين وحباب
بس مو يطوخها كلش ويگعد يفرفر بيهم بالاسواق

نور صارت تهدي بيها
.. حور كبري عقلج ترة البنات بمثابة خوات لجلال
هو اتكفل بيهم وجابهم للبصرة على مسؤليته

.. هسة اني هم اخت مهيمن بس اشو ولا يوم
طلع وياي للسوگ حتى يشوف احتياجاتي

لو بس اخوج استاذ جلولي حنانه لازم يكون بصورة مباشرة
كولي لأخوج هو مو يشوفني اني ساكتة عليه
معناها اني راضية وموافقة على تصرفاته وية البنات
لا حبيبتي لكل شي وله حدود

اني جاوبتها بضحك واني اغمزلها
.. العفو ست حور ترة هاي اخت جلال الي دتحجين وياها مو جلال بيج خير

احتفظي بغضبج وبطولاتج لجلال من يرجع مو تنفضين غضبج يمنا ومن تشوفين جلال
تنگلب احوالج بكلمتين منه وتصيرين بلبل

نور ضحكت وكملت على كلامي.. اي والله صدك
بس هم گالوها. ما كادر ابوي الا على امي

نزعت حذائها وهي تتوعد
.. هو خلي يرجع بالاول واني اشوف شغلي وياه
وراح اراويكم حور بنت زهرة شنو راح تسوي
بس اريد اعرف هم صارلهم شكد من طالعين
للسوك

نور باوعت للساعة وجاوبتها .. تقريباً صارلهم ٣ ساعات من راحوا

بعدها نور رجعت سألتني على الثوب الميدي القصير
.. ريم هسة ما گلتي هذا الثوب احطه وية الملابس لو ميفيدني

كلتلها.. لج ليش ميفيد ترة كلش حلو

حور اخذته منها وكالت .. بالله شو دجيبي صارلج ساعة
محتارة بأمره. اني راح اخلصج منه والبسه

اخذته منها وراحت للحمام حتى تبدل
بقينا اني ونور وحدة تباوع بوجه الثانية

نور بصوت ناصي .. ريم شفتي الي انا شفته شنو تقصد من اخذت الثوب على شنو ناوية

جاوبتها بصوت ناصي .. اي نعم شفت الي انتي شفتيه
و شكلها ناوية تستخدم الاسلحة الفتاكة على المگرود اخوج

كنا نحجي ودخلت علينا حور بالثوب
يوصل لتحت الركبة والشعر الاسود الفاحم مفتوح
والخدود حمر من الغضب
والعيون كبار حادة بيهم نار الغيرة صنعت منها لوحة. تخطف اعجاب امهر الرسامين

نور شافتها ورفعت ايدها بالدعاء.. الله يكون بعونك يا جلال كنت خوش رجال حباب

هزيت راسي بالموافقة ..
شكلها النخوة والشهامة راح تجيب اجله

رفعت حاجبها وكالت
.. بالله شو انتي وهي عندكم شي احجوا لاتكعدون تبسبسون بصوت ناصي

.. لا سلامتج ما عدنا شي
نور سألتها.. تردين اصبلج غدا

حور ابتسمت بكل رقة وكالت .. لا حياتي تسلمين اني رايحة
اصبلي انتي ابقي هنا انتي وبنت عمج ادعوا لأخوكم
الله ينصره على القوم الظالمين

شمرت طرف شعرها ودارت وجهها وطلعت من يمنا وراحت للمطبخ نسمع اصوات الصحون والكاونتر تتراگع
كان صوت الغضب مرافق كل حركاتها

نور كالت.. عزة هاي كارثة معقولة اني راح اصير حماة
حويرة واكعد اطبق عليها سوالف الحموات لا ماجاي اتخيل نفسي

ضحكت وگلتلها.. لا استلمي الاقوى منها انتي تصيرين حماتها وهي راح تصير حماتي. وهي من هسة ضاربة القواعد بعرض الحايط وطبگتنا سوية وساگت علينا

سمعنا صوت الجرس واني ونور بسرعة نهضنا من مكانة
وصحنا .. اجوي !!!

طلعنا بسرعة من الغرفة ورحنا للمطبخ
لكينا حور واكفة يم الطباخ جاي تحمي الاكل

نور اتوجهت بالعجل للباب حتى تشوف منو

واني اراقب حور وشكلها شلون بالسيقان والشعر المفتوح والشفايف المبرطمة
كانت تتحرك بالمطبخ بكل هدوء عبالك اكبر همها شلون
تصب الاكل

لحظات وكان تدخل خالة زهرة والبنات محملين بالغراض والعلاليك

كانت الوجوه موردة من الحماس وجان يدخل
صاحب الحماس استاذ جلال ومنور الساحة بضحكته
كان شايل كم علاگة وية البنات

اسمعه يكول لهنا .. هنا هذني الغراض نسيتوهم بالسيارة
ما نزلتوها
جان يحجي وية البنات وعيونه كانت تتحرك بالمطبخ بدون هدف
لكن فجاءة اتوقف بمكانه واختفت ضحكته ونظراته ثبتت

على ست حور الي كانت تصب الاكل وحطته بالصينية كان
ظهرها علينا ووجهة على جهة الطباخ

شالت الصينية ودارت علينا راسمة ابتسامة مصطنعة على وجهة وسلمت عالبنات

.. هلو بنات
ردوا عليها السلام باصوات متفاوتة
وازاد اجتي گعدت يمها وصارت تسولفلنا عن السوگ

وحور بصوت ودي
.. بالله شو خلينا نشوف شنو اشتريتوا

اما جلال فبقى بمكانه كص حور من فوگ ليجوة
بلع ريگه

اقتربت منه احذره بصوت ناصي
.. جلولي. ابن عمي الشهم الحگ على روحك

سألني وعيونه بعدها تعاين على حور الي بلشت تاكل من غير من توجهله اي نظرة
ولا مو بس هيج حطت رجل على رجل خلت الولد انسطر

كال .. شنو الحگ على روحي قصدج على عرض سيقان الغزال

هزيت ايدي وكلت.. شوف هذا البطران ولك يا سيقان
بابا انت فلمك احترگ يم غزال البصرة
ولو تلحگ تطفيها لوما تلحك

.. هسة غير افتهم ليش
.. مو حضرتك اليوم قررت تصير كريم
حاتم الطائي واخذت البنات للسوگ

ضرب كصته وكال .. لا يالحمزة لاتكولين
زعلانة

.. اي والله زعلان الاسمر ما يگلك مرحبا
.. بالله شو هاج اخذي هاي العلاكة
خليني اشوف شغلي
هذه المرأة مصختها كثيراً وتحتاج من يسحلها
ويشوفها العين الحمراء وانا لها

گلبت عيوني .. اهووو اني شلون بهذولي الثنين
تركني وراح يمهم

كانت ازاد تسولف لنور ولحور
والبنات كانوا يعرضون بالملابس الي اشتروها خطية كانوا
كلش فرحانين

جوانا .. شكد حلو السوگ عندكم منتوع وكل شي متوفر بيه
حور كانت تاكل وابتسامة المجاملة مرسومة على وجهها
واذا بقت مبتسمة بهذا الشكل اتوقع وجهة راح يشكل

حور تباوع على الملابس والاغراض وتكول
.. الله شككككككككككد حلووووووو الفففففف عافية

كانت تضغط على كل حرف
قاطعهم جلال وحجة وية خالة زهرة الي خلصت مكالمتها
من بيت اخوها

.. خالة اريد اترخص منج حتى اخذ مرتي والبنات
اريد اشوفهم البيت. وبنفس الوكت

اريد حور تطلع عليه وتشوف البيت والالوان
حتى تقرر نوع الاثاث الي يرهم عليه
تعرفين بعد هي ام البيت فلازم هي تختار الاثاث بنفسها
على ذوقها

جان يحجي وية خالة زهرة وعيونه على حور
والست بس سمعت كلامه
نزلت رجليها وعدلت كعدتها وكدر يستحوذ على انتباهها
ونظرات عيونها اتبدلت من الغيرة الى اللهفة

خالة جاوبته.. براحتك يمة البيت بيتك والبنية مريتك
باوع على حور وهو يوجه كلامه للكل وكال

.. ما دام هيج الحجي لعد يالله بنات بسرعة جهزوا نفسكم
حتى اخذكم تشوفون البيت

حور بسرعة راحت تجهز نفسها
جلال صاح من وراها وكال حور بالعجل لبسي عباية ما يحتاج تبديل هو هنا البيت قريب مو بعيد
جاوبته .. اوك هسة طلقة البس عباتي واجي

هنا واخواتها بقوا مترددين
زينة كالت.. جلال انتوا اخذوا راحتكم لا تتقيد بينا
احنا نبقى هنا يم خالة زهرة

بس جلال اصر عليهم يجون ويانا ويشوفون البيت

حور

كل التوعد والغضب اتبخر بكلمة منه كدر يغير مزاجي
من الغيرة العمياء الى اللهفة
رحت لبست عباتي وشالي ورجعت بسرعة
مثل البيب بيب كنت كلش متحمسة بس

انطفى الحماس من شفت
هنا وخواتها صاعدات بالسيارة وية جلال ويضحكون وياه
ونور وريم كانوا صاعدين وياهم
بقيت واكفة بمكاني اعاين السيارة مقبطة ماكو مكان
بدت الحرارة تصعد لراسي

شنو هذا ناصب علية لو يضحك على روحه
التفتت وشافني ودك هورن حتى اصعد
اشرتله بغيض وكلت
.. وين اصعد اكعد بحضنك مثلاً

لمعت عيونه وگال .. اذاتكعدين بحضني معناها اسوي حادث
ما تقبل غلط

عضيت شفتي على زلة لساني بس اني متعودة احجي هاي العبارة (وين اكعد بحضن السايق )
من اشوف ازدحام بالسيارة

ريم كانت كاعدة كدام نزلت وكالت
.. تعالي اني وياج نكعد كدام والبقية ورة
رصيت على اسناني ورحت صعدت بالسيارة ولطشت روحي كلش حتى اسوي مجال لريم
صعدت ريم بصفي بالگوة وصرنا حشر

كان جلال يحجي بالنقال
وشغل السيارة
مد ايده بصف وركي حتى يغير اتجاه الگير
وايده طخت وركي بحيث كمزت وكتمت شهكتي
ودرت عليه خزرته

بس هو كان يباوع گدام ويحجي بالنقال منطلق يضحك
وشكله ما منتبه
كنت حابسة انفاسي لان الاخ بقت ايده
ثابتة بمكانها ملامسة وركي

ورة فترة وصلنا للبيت وتوقفت السيارة
ونزلنا كلنا واني بس شفت البيت اتبخر
كل زعلي منه ولمعت الدموع بعيوني

نور گامت تصلي على النبي وريم اتبعتها بالكلام
وهنا والبنات التفتوا على جلال وكالوا
جلال مبارك عليك البيت
انت تستاهل كل الخير

دخلنا للداخل وگلبي يدگ صار يخفق بسرعة
كان جلال واكف بالباب البنات فاتوا من يمه قبلي
ووصلني الدور. اريد ادخل لزمني من زندي استوقفني وگال
.. على وين ياحلو

باوعت عليه .. شنو ما تريدني ادخل للبيت
عادي اروح ارجع بالسيارة انتظركم
ترة ما ميتة على بيتك

جنت احجيها وگلبي يفور
گال بالعجل يسكتني .. هوب .. هووب شنو القصة جعفوري هدي اعصابك علينا
ترة ردتك تفوت لبيتك وانت بأول دخلتك
برجلك اليمين

ما عرفت وين اودي وجهي من الفشلة
شلون بية ياربي صار عندي تضارب
من كد سرعة التغيير بالمشاعر كل دقيقة بحال
راح يخبلني هذا الجلال

دخلت والبيت ومنظره سلب كل اهتمامي
وصار جلال يشوفنا البيت والغرف كنت اتنقل وية البيت من مكان لمكان
كان البناء كلش مرتب والوان الاصباغ هم كلش حلوة

وصعدنا فوك للطابق الثاني كان عبارة عن غرفتين وحمام
كان گلبي يرفرف من الفرحة انتبهت لجوانا اجتي تركض
ولزمت جلال من كف ايده وسحبته وراها وكالت
.. جلال .. جلال شوف هاي حمامة بانية عشها
يم الشباك

عزة هي لزمت ايده وانا عقل ما بقى براسي
صرت اوج وانطفي بناري وجهي احتقن من الغيظ

ريم اجتي يمي وكالت .. حور من تردين تأثثين البيت
تاخذيني وياج حتى اكعد اصمم الديكورات

جانت الاخت منطلقة تحجي واني بالي مو يمها اصلاً
بس احرك راسي بالموافقة وعيوني على جلال والبنات
المتجمعات يم الشباك وهو وياهم حتى نور كانت تعاين من الشباك

بس جوانا ايدها بعدها لازمة جلال
وكانوا منطلقين بالسوالف
احس بروحي راح انفجر بعد خلص صبري

درت وجهي حتى انزل وكلت
.. اني نازلة راح انتظركم بالسيارة وانتوا اخذوا راحتكم
ما عليكم مني.

كنت احجي وعيني على ايدين جلال وجوانا
انتبهت لجلال التفت علية وشاف اتجاه نظراتي
وبسرعة نفض ايده من ايد جوانا
رفعت حاجبي وگلت .. بعد وكت. خاف تصير زحمة
اما ست جوانا اصلاً ما انتبهت للموقف مدري هي تسوي روحها ما منتبهة ضاعت علية السالفة

بسرعة اقترب مني ولزم كف ايدي قبل لا انزل وگال

.. اي صدگ حور قبل لا انسى بالله شو تعالي نزلي وياي خلي ناخذ قياس الغرفة علمود
نشوف القياسات للاثاث

التفت على البنات وكال
.. انتوا اخذوا راحتكم البيت بيتكم

نزلت وراه كنت مطنگرة وضايجة منه ومن ثقل دمه

.. ترة ما يحتاج ناخذ قياسها مبينة الغرفة
مربعة خمسة في خمسة شنو نسيت بيوم اختارينا مكانها بالخريطة لو حتى هاي نسيتها

انتبهت عليه سد الباب واجة اقترب علية
كان يباوع علية وبعيونه
لمعة وكاحة

كال .. اي كملي شكد كلتي القياس ترة انا ناسي

ارتديت للخلف وبلعت ريكي وگلت .. اااا القياس
خمسة في خمسة
سبقته بالكلام

.. بالله شو بعد عن طريقي اريد ارجع للبيت
ابتسم وكال .. انتظري خلينا نتفاهم

ما لحكت ابتعد عنه لزمني من زندي
ولمني عليه ارتعد گلبي بس بعدها نار الغيرة اكبر من انساها
ضربته على صدره وگلت

.. بعد عني ما اريدك تلمسني.
روح كمل فقرة الالفة وية ست جوانا

دنگ راسه وگال .. اشم ريحة غيرة بالموضوع
دفعته من صدره وابتعد.
.. هسة يالله شميت ريحة الغيرة ولك انا احتركت كلني وفحمت من وراك وانت حضرتك هسة يالله بديت تحس على دمك.

قرب راسه يم اذني وگال .. اي كملي

رفعت راسي اباوع على وجهه القريب مني وغرگت بلون عيونه بلعت ريگي اقوي نفسي وگلت

انتبه لنفسك وراجع تصرفاتك
اهتمامك بالبنات زاد عن حده واني مو ملاك
من اشوف حنانك واهتمامك بيهم اكثر مني اني خطيبتك
وحسب ما اعرف حبيبتك هاي اذا كان باقي حب بگلبك الي

ابتسم .. عفو عليج شكد طماعة
اذا هو صاحب الگلب بكبره كله على بعضه ملكج
فماله داعي تسأليني اذا باقي حب بگلبي الج

نظرات عيونه وكلامه هذا المعسول
سلب مني كل الغضب وحل محله رجفة گلب

عاين بعيوني وكال .. حور ادري حقج تغارين
من اهتمامي للبنات كنت اتوقع منج تتعاطفين مثلي وياهم وتكونين اكثر رحمة مني وتتفهمين موقفي
بس الصراحة انا مصدوم بتصرفاتج

ترة هم اجوي ليمنا شاردين من ظلم الدنيا
محد رحم بيهن وكاعدات هنا بلاحول ولا قوة.
بحاجة رحمتنا فلا تصيرين انتي والدنيا عليهم

اتهربت من نظرات عيونه ودنگت راسي
بخجل كلامه خلاني احس بالذنب
حسيت بروحي حقيرة انانية

جليت صوتي وگلت بذنب .. لا جلال بالعكس اني متعاطفة وياهم حتى شاركتهم بملابسي واشيائي اي شي يردونه ألبي
الهم بسرعة ترة اني حبابة. وحتى حبيتهم

بس شغلة وحدة مااكدر البيها وعقلي يقفل بيها ويصير يشوف كلشي
بالاحمر من الغيظ

حسيت عليه
دنگ راسه وهالمرة همس بأذني وگال
.. اي كملي وشنو هي هالشغلة
همست برجفة
.. انت
سألني .. اني!!!
.. اي انت شنو تريد يكون حالي من اشوفها لازمة ايدك
ويتقربون منك ترة اني بشر مو ملاك

ابتسم .. اي كملي
وطبع شفايفه على اذني كان الاخ مستغل الوضع
ارتعدت وكملت كلامي بصوت ناصي

.. خلي روحك بمكاني تقبل تشوف سجاد يلزم ايدي
وتشوفه هيج دائماً يتقريب علية

شهگت متفاجئة على عضته لمكان النبض بركبتي
اتعثرت بكلامي.. هاي شششنو عضيتني

.. اياني وياج تجيبين سيرة الكلب ابن خالج وانتي بحضني
انتبهت لروحي ولمكاني هاي شوكت صرت بحضنه والاقوى
من هذا كله العباية مفتوحة

حاولت ابعده وبصوت ناصي حجيت .. لك انت شنو شوكت لحكت

همس يم اذني وگال .. على فكرة عجبني ملمس الورك الترف بالسيارة وطمعت اشوف ملمس الباقي

اتسعت عيوني وشهگت وضربته على صدره وكلت
.. عزة بعينك يا خبيث يعني كنت تعرف انت شكاعد تسوي ومنتبه لحركة ايدك يعني حضرتك كنت تلعب بأعصابي

جاوبني وهو يضحك
.. هو منو بينا بدا بالخباثة ولعب الاعصاب
انا لو انتي اشو وصلت للبيت ولگيت الغزال يتمرجح بوركه كدامي
ومسويلي عرض سيقان مو زين مني
الله ستر ما سويت حادث من وراج
بالله شو تعالي خليني ارتوي

جنا غرگانين بعالمنا وفجاءة اندك الباب بصوت عالي
ووصلنا صوت ريم

.. ترة ما طلعت كل هذا الوقت تقيسون بالغرفة

كمزت من حضن جلال ودفعته عني
وهو انخبص مثلي وصاح .. ولج باربي ترحين
منا انتي والقنابل مالتج لا اجي ابتلي بيج

كنت ادكم عباتي واعدل شالي بأيد ترجف
وسمعت صوت نور تكوللها
.. ريم تعالي خاف رجعوا يبنوها للغرفة من جديد

جلال عدل شعره وملابس وفتح الباب وطلع وهو يدردم عليهم. وكال
.. خيييييير سالمين اكو واحد مسلطكم علينا
ردتكم وياية عون اشو صرتوا علية فرعون
عود انا شاد الظهر بيكم وماخذكم للتمويه
ما ادري بيكم هيج تصيرون عكرة وعثرة وياية

تركهم وراح وكال .. يالله انا بالسيارة انتظركم استعجلوا

كملت تعديل اثار الجريمة وسحبت نفس عميق
وطلعت وياريتني ما طلعت

ريم باوعت علية وكالت
.. يمعودة ام الغيرة
وين الزعل راح والتوعد لجلولي اشو صفيتي للغرفة وياه

جليت صوتي وهمست .. ريم اكلي تبن لا تخليني اكوم عليج
ريم بأنتصار .. وين يروح المطلوب النا.
هَـا حور نسيتي شسويتي بية بيوم اقتحمتي الغرفة علية اني واخوج

غمضت عيوني بقلة صبر
وكلت.. جان عايزة والتمت بعد شيخلصني من ست كناري
طحت بحلك المايرحم

ريم

كنا كلنا واكفين بالباب نبجي نودع البنات
اتصل ابو هنا على جلال
وبلغه انه راح يوصل للبصرة وطلب منه يوصفله العنوان
وبوكتها جلال راح عليه وجابه من كراج السيارات

والبنات شافوا ابوهم وانگلب البيت مناحة وبجي
صاروا يشتكون لأبوهم عالظلم الي جرى عليهم
وهو يبجي موجوع عليهم

كان مهيمن موجود بس شاف الموقف وسمع الكلام
طلع من البيت وصاح لجلال

رحت وراه وسألته .. شنو مهيمن وين طالع مو عيب منا الرجال هستوة واصل تعوفه لوحده

مسح وجهه وباوع بوجهي وكال
.. ولج ريم زحمة اظل واكف اسمع البنات يحجون
لابوهم شلون هتكو حرمتهم ردت افرغلهم البيت ويحجون
براحتهم
انا رجال واحس بي واعرف هيج امور تصير كلفة عليه من يعرف بعرضه انتهك واحنا واكفين فوك راسه

بعد هذا اللقاء الصار بين الاب الفقير المتعب
وبناته كان زوج هنا منتظر بالباب وجلال ومهيمن اصروا عليه يدخل يمهم بس هو رفض مبين عليه مرتبك والوضع
صعب بحيث ابوهم قرر ياخذهم ويسافر بيهم بنفس اليوم

وجلال ومهيمن لزموه على الغدا بالكوة وافق
وطلبوا منه يبات اليوم وباجر يسافر بيهم

بس الاب وزوج هنا اتشكروا من جلال ومهيمن
وكانت نظرات الامتنان مالية عيونهم

ابو هنا.. ما اعرف شلون اشكركم على وكفتكم وية البنات
وانت يا جلال هذا جميلك راح يبقى دين بركبتي
ما. راح انسالك هالمعروف

جلال جاوبه .. ما يحتاج تشكرني البنات عرضي ومثل اخواتي

بعدها سلموا علينا البنات واخذناهم بالاحضان
خالة زهرة لمتهم لحظنها وصارت تبجي عليهم
وطلبت منهم يبقون وياها على تواصل

وجلال نظراته بيها الم فراق وراحة بنفس الوقت
سافروا البنات

وكلنا دخلنا للبيت وجان ننصدم بست حور دتبجي
كلنا سكتنا وجلال راح وكف يمها وسألها مستغرب

.. هاي شنو جعفوري يبجي لاتكول جنت تبجي على البنات

حور جاوبته .. اي ابجي على البنات لان سافروا راح اشتاقلهم

الكل هنا دخل بحالة هدوء وصدمة من كلام حور
عاد استاذ جلال ما يفوته شي

لكزها بكوعة بخاصرتها وكال .. ودي اصدگگ بس قوية .. قوية حيل قوية
ولك جعفوري علينا هاي السوالف تريد تقنعني هسة انت
جاي تبجي عليهم مو ورم گلبي بذيج الايام

مهيمن كمل على كلام جلال
.. اصلاً ما استبعد اشوفج تذبين وراهم سبع حجارات
خاف يرجعون عليج ولج حويرة ما عرفناج هاي انتي لو محدثينج

دفعته حور وراحت .. عابتلكم خبيثين
ترة انا والله احبهم وراح اشتاقلهم

هي كلها بصفحة وسالفة طالب وصدمته بسفر
هنا والبنات
خطية هذا المكرود
اتعود بذيج الايام كل يوم يجي ويشتري جبس وحلويات
ويصيح لحور

يكللها جعفوري جبتلك جبس وحلويات الك وللبنات البقية
حور سألته .. حدد بالضبط منو البنات
جاوبها مرتبك .. كلكم اهم شي حورية عدن من تدخلين بالحلويات صيحي بصوت عالي
وكولي هذا طالب ابن خالي الحباب اشترى الحلويات
خليها تعرف اسمي على الاقل
والعافية بالتداريج

بس خطية اليوم جاي وجايب الحلويات وياه وفرحان
وجان حور تطلع له مثل كل يوم وتاخذ منه الحلويات
وقبل لا تدخل جوة للبيت كالت
.. على فكرة قبل لا انسى ترة حورية عدن سافرت وية ابوها
وخواتها

شهك ونطت عيونه. وخمط علاكة الحلويات من ايد حور
وكال .. سااااااااافرت لاتكوليها
حتى بعدني ما لحكت ابني جسر المحبة بيني وبينها
بقى عالنص يعني راحت فلوسي على الخالي بلاش

حور كالت .. لا تضوج جيب الحلويات انا اكلهم
.. خاب دطيري انتي وشكلج هذا
مصدگة روحج اشتريلج حلويات

عافها وراح واخذ العلاگة وياه وهو يدردم
حررررام عليكم كسرتوا قلبي
يافرحة ما تمت

جلال

اتصلت على حور وطلبت منها تسويلي طريق
اريد اشوف نور وهي عروسة اريد اباركلها

بعدها دخلت للبيت وگلبي ينتفض لكيت بس نور كاعدة بالهول ببدلة العرس وبقية البنات كلهم طلعوا

جانت كلش حلوة طالعة
اقتربت عليها وهي كامت من مكانها
عيوني لالت بالدموع وصارت كل ايامنا الحلوة تعرض صورها كدام عيني

ما انسى حرصها وخوفها علية واتصالها وسؤالها
مثل خوف الام على ابنها هيج كان حالها

شكد ايام مرت علينا اتعودت عليها
كل يوم تكعد الصبح وتسويلي الريوگ
كانت تهتم بكل شي يخص حياتي

كنت واكف كدامها واعاين عليها وهي لابسة الابيض
مثل الملاك دنگت عليها وبستها من كصتها

.. مبروك يا احلى واجمل اخت بالكون
طلعت سلسة ذهب معلگ بيها مدالية مكتوب عليها اية الكرسي ولبستها

اباوع عليها شلون انهارت دموعها مثل الطفلة والغصة كتمت صوتها
ولميتها لحضني وكلت
.. لا لا لا تبجين لا يخرب المكياج ويرجعج علينا عناد
يكول غشوني. على الاقل صبري منا لحد ما يوكع بالفخ
وبعدين خربي المكياج

ضحكت على كلامي واختلطت دموعها وية ضحكتها
وانا استغليت الفرصة وبسرعة انسحبت وطلعت من يمها

ورحت وكفت بالشارع يم مهيمن
وهو الثاني هم كان يعاني من زواج وفراق نور
كان معصب ويصيح بهذا ويغلط على ذاك
صرت اعرفه هذا طبعه

باوعت للساعة كانت بال٤ ونص
سألت مهيمن .. هو عناد بيش الساعة گلك راح تجي الزفة

مهيمن جاوبني .. كال بال٤ الزفة توصل

.. لا تكولها
رفعت نقالي واتصلت على عناد
وحجيت بتهديد
.. اكول ابو الشباب مو جنك تأخرت نص ساعة عن الموعد
شوف ولك عناد تجي على اختي تاخذها لا والله اجيك واجيبك سحل للعرس شنو مخلي اختي تنتظرك صارلها نص ساعة
ترة ما صارت هاي

اسمع عناد يضحك وكلي بأستعجال .. وصلنا وصلنا ما يحتاج تسحلني والقاط نظيف انا جايك اركض

وصدك انهيت الاتصال وياه وجان اسمع اصوات السيارات والهورنات

اسمع مهيمن يكول لامه بالباب
.. هسة الا انا موجود يالله ياخذونها من البيت يعني مو جلال كافي والله موقف صعب

جان يدردم والحواجب معكودات
وصلت سيارات الزفة ووكفت سيارة العريس يمنا
اباوع لمهيمن كوة على اعصابه واكف
باقي على شعرة ويكللهم روحوا رجعوا ماعندكم مرة يمنا
خطية لحظة الفراق وترك الاخت للبيت صعبة

نزل عناد
من السيارة واجة سلم على مهيمن وجماعته اتجمهروا بالباب وصاروا يهوسوله

اسمع مهيمن يهدد بعناد ويكله
.. شوف ولك عنيد والله العظيم اذا اجتني اختي بفد يوم
والمح بعيونها نظرة حزن بالقران احطك بالصندوك
واشوف شغلي وياك

عناد طكها ضحكة وكال .. هسة ما افتهمت انت جاي تخوفني
لو جاي تحذرني لو تريد تهنيني بيوم عرسي

ضربته على كتفه وكلت .. هو يحطك بالصندوك وانا تلكاني هناك انتظرك بالمزرعة

جنت اذكره بأختطاف ابو طبرة
عناد جان مصر .. خلصتوا تهديداتكم يالله بعدوا عن طريقي
خلوني اتهنا بحلالي.

فات وهو يكول
شلون اثنين عبالك عوانس وكاطعين بقسمتهن
فاتت الهوسة ورة عناد للبيت
مهيمن
اشر على روحه
.. هذا علينا يقصد احنا العوانس

ضحكت .. اي علينا شكلنا وغفنا على گلبه
اتجهت لسيارتي وصعدت بيها اريد اشرد من الموقف
الصعب

ما اشوف الا مهيمن صاعد بصفي وكلي
.. على وين ان شاء الله
.. اريد انسحب ما اكدر اشوفها تطلع من بيتنا

باوع للباب وكال .. اخذني وياك انا مثل حالك
ونوب جماعة السوگ نصهم جماعتي
شيخلصني من السانهم

سألته.. زين والناس مو زحمة اثنينا نتركهم
جاوبني وكال .. دطلع .. اطلع
خالي حسن وخالي الثاني موجودين كلش كافي يسدون مكاني
بس هي امي زهرة كون تخليني اعاني تحطني بوجه المدفع يالله ترتاح

حلل ربطة العنق وفتح الدكمة وانا سقت السيارة ووصلت بيها
يم الكورنيش
نزلنا من السيارة ووكفنا يم تمثال السياب طلعت جيكارة وكعدت ادخن واعاين على شط العرب

اجة كعد يمي وباوع لشكلي وكال .. خير سالمين ابو الشباب
اشو وجهك انگلب لونه

جاوبته.. ترة الواحد مو كل يوم تتزوج اخته وتطلع من البيت
الشعور كلش صعب
اتعودت على وجودها ودورها بحياتي

جاوبني وكال..اذا انت اخت وحدة وهيج تكول
انا شسوي عندي اثنين خوات يعني راح اعاني مرتين من الموقف

لزمت كتفه وگلت.. الله يساعدك انا اخت وحدة واندليت مكان گلبي

جاوبني وهو يتكيء للخلف بكعدته وكال
.. بس لا تضوج وتشيل هم اختنا
ترة انا من اختاريت عناد لنور مو عن عبث
بس وزنت الامور بعقلي وشفت عناد اولى من الغريب
على الاقل من يريد يسوي شي لنور
گبل احطه بالصندوگ واراويه النجوم بعز الظهر

اتصنمت بمكاني ووكعت الجيكارة من ايدي والتفتت عليه
وكلت بصوت حذر

.. يعني انت اختاريت عناد علمود
تمون عليه وساعة الغلطة تحطه بالصندوگ وتشوف شغلك وياه بكل سهولة

هز راسه بكل ثقة جنه قطاع طرق
.. اي نعم
بلعت ريگي وحليت ربطتي وگلت
.. معناها افتهم من كلامك انت اختاريتني لاختك حور
لان تمون علية مثل عناد
وهم راح تحطني بال .. بال.. بال..

كملها مهيمن والضحكة الشيطانية على وجهه .. بالصندوك عفية بالشاطر
نعم ومثل الخروف
ديروا بالكم مني الي يتجاوز على خواتي يلكاني بوجهه

نهضت من مكاني وانا احجي بصوت عالي بضحك
.. ظلم والله ظلم غير تكتب بالعقد هذا الحجي حتى الواحد ما يقترب من اختك مو تنصبله فخ وتخلي على عمى وجهه

حط رجل. على رجل وكال .. القانون لا يحمي المغفلين
الي مثلك انت وعنيد تحتاجون واحد لازم سيفه عليكم
حتى تسون الف حساب قبل لا تسهون عن نفسكم

***
***
***
***
***
***

يتبع

تم تنزيل التكملة بالبارت الوراه
لان البارت ما يتحمل اكثر من ٦ الالف كلمة وصار لازم
اقسمه نصين

اتمنى لكم قراءة ممتعة
اختكم نهى الحسون

ء