قضية لم الشمل الفصل الثالث عشر 13 - بقلم نهى

مساء الانوار والسرور عليكم احبتي المتابعين

#الكاتبة_نهى_الحسون
#قضية_لم_الشمل

نور

صدمة ورة صدمة
هذا حالنا من اول ما دخلت لمكتب المحامي والصدمات صارت تتوالى علينا من كل حدب وصوب

كان شعور جداً غريب من عرفت عندي اخوان
ونوب مو بس واحد لا اثنين
ما اكذب بالاول كنت حذرة وخايفة منهم
لكن سرعان ما اختفى خوفي وحل محله الطمأنينة
من حجة وياي مهيمن وعرفني على نفسه

اكو ناس من نظرة عيونهم وشكلهم ترتاحلهم وتحس وياهم بالامان هيج من الله. مهيمن من هذا النوع
كدر بكلمات قليلة يسحب من الشعور بالخوف ويبدله بأمان

اما جلال فهذا كان بحثاً اخر اي واحد يشوفه راح
يعتقد انه غير مبالي وهواي مستهزء بالموقف مومهتم

لكن بالحقيقة كان جلال اكثر واحد بينا خايف
ما فاتتني نظرات الاهتمام الي يلقيها على مهيمن وعلية
بين لحظة والثانية

ولا فاتتني حركة ايده المتوترة كل شوية يرفع شعره للخلف من نظرات الشك والحذر والاسئلة كلها تدل معاناة جلال

والظاهر هو اكثر واحد بينا كان يعاني ومتأذي من مصاعب الحياة والكتاب مبين من عنوانه

اباوع عليه لجسمه الهزيل التعبان المتضرر
رغم الي هو بي بس كان جداً حريص ان يظهر امامنا
بصورة الشخص المستهزء الي ما عنده هموم
ما يريد نشوف ضعفه

وهذولي الاشخاص الي مثل جلال
على كثر مشاكلهم والصعوبات الي عايشينها وشايفينها
راح تلكاهم كثيرين التمرد والاستهزاء والشقاوة المرافقة للضحك

وكأنه يتهرب من ضغوط الحياة
لكن مع الاسف هالشي ما عبر علية مثلما عبر على المحامي ومهيمن وريم

وبهدوئي كنت اراقب الكل وادرسهم
اباوع لريم شلون لمعت عيونها من سمعت بشرط الوصية خصوصاً الشرط الي. يقتضي زواجها من مهيمن معالم وجهة اتغيرت من الهدوء للمفاجئة وبعدها
اتحولت الى ابتسامة انتصار
عبالك واحد كللها انتي ربحتي اليانصيب

ريم كانت قمة البراءة وجداً طبيعية ومبين عليها طيبة وتتصرف بگلبها اكثر من عقلها
خلال الساعات الي قضيتها وياها ومن اسئلتها للمحامي
كان مبين عليها مو انانية وجداً طيبة

بالحقيقة من كال ابو سيف راح تجي بنت عمكم يتيمة وعاشت تحت وصاية مؤيد

واول ما دخلت علينا للمكتب اني كونت عنها فكرة ان هي مغرورة ومتكبرة وشايفة نفسها

لكن فاجئتني من اجتي علية وذكرت اسمي وابتسمت وسلمت علية
وكأنما كانت تعرفني من زمان وشايفتني
للحظة جمدت بمكاني لان ما متوقعة منها الود

رجعت اباوع لمهيمن كان يكابر حذر ويانا
بس مبين عليه صاحب مسؤلية ويعرف شنو يريد
رغم الصدمات الي مرت علينا اباوع عليه اكثر واحد بينا كان متمسك وهاديء

بس مع الاسف شكلها وصية الوالد وتصرفات اولاد العمة المستفزة. زادت عن حدها وطلعته عن طوره

وهد عليهم ولزم الشاب الي اسمه نورس من ياخة قميصه يتوعدله

وانطاه لطمة على وجهه خلة الولد يسنح بحضن امه
واسيا تصيح .. شنو هاي الوحشية عزة ما ينلام اخوية مؤيد من يعوفكم وينهزم
اثاري انتوا طلعتوا وحوش مو بشر

جلال.. اي ديري بالج من عدنا ترة عضتنا تموت

جان گاعد ويباوع عليهم بتشفي
نائل اتقدم متردد وكال

.. انت صدك همجي وما تحجي الا بأستخدام القوة

جلال .. يالله هاك اتفضل ويكولون جلال اسكت لا تحجي هسة هذا سبونج بوب اذا لزمه اخونا الكبير ومسح بيه الكاع اكو واحد يلومه

ريم .. نائل كافي ماله داعي هذا الكلام
نائل .. وانتي شنو حضرتج معينينج عليه محامي وجاي تدافعين للباشا

مهيمن .. حجية اشتري ولدج وطلعيهم برة ولا والله العظيم امدد هذا المايع بصف اخوه بالگاع بحضنج

جاوبته اسيا بأعتراض
.. حجية بعينك شنو تكول حجية

ورجعت باوعت لنائل وكالت
.. ماما نائل اسكت لا تحجي وياه متشوفهم
شلون حادين اسنانهم علينا مبينين جايين متحلفين نيتهم سودة

نائل .. لا تخافين ماما ما يكدر يسوي شي

مهيمن شنف ردانه معصب ناوي يهد عليه
لكن ابو سيف صار بينهم يهدي الموقف وفرقهم عن بعض حتى يحل النزاع

باوع مهيمن للمحامي وكال بأمر

.. شوف ابو سيف هسة تطلع من المكتب شكو شخص ماله علاقة بالوصية
انت مو كلت هاي الوصية تخصنا انا وجلال ونور وبنت عمنا

.. اي نعم وعمتك اسيا هم من ضمن الاطراف المعنية

.. خلاص ما دام الوصية خاصة بينا
اذن البقية مالهم لزمة وبالحقيقة وجودهم غير مرحب بي واصلاً منو كلك احنا . نقبل تقرة الوصية علينا كدام الناس

الجائز الوصية بيها امور ما يعجبنا احد غيرنا يتطلع عليها

اسيا.. اي بس هذولي اولادي من ناس غربة وهي اصلاً وصية خالهم يعني ...

قاطع كلامها
.. اولادج شي خاص بيج بس احنا ما مجبورين نتحملهم والوصية شي خاص بينا ما نسمح لأي شخص يتدخل بينا

اسيا.. وانت شكو تكمز من يمك هسة مو هذولي اخوانك وياك اشو محجوا شي بس انت كالب الدنيا بصياحك
ومعترض عليهم

انتبهت على جلال استند على عكازته ووكف من مكانه وكال

.. لا مو بس هو معترض على وجود اولادج انا من رأي مهيمن افضل ان تتم قراءة الوصية فقط بينا لان هاي خصوصيات منحب احد يتورج علينا

باوعلي رجل خالتي صابر وحجة وياي بصوت ناصي

.. نور ديري بالج توافقيهم على رأيهم لان معناها يطلعونا انا وخالتج من المكتب وانتي ترحين بالرجلين

يالله كومي وكليلهم انا اعترض على كلامكم
اريد خالتي ورجلها يبقون هنا يمي

باوعت عليه بكره وحقد مدفون بگلبي من سنين
وهسة وبهاي اللحظة حسيت بالقوة والجراءة
حتى احجي واعبر عن الي بداخلي بحرية وبدون ما اخاف من احد

كمت من مكاني يتصميم وحجيت بصوت ناصي لكن مسموع .. اني من رأي مهيمن وجلال فعلاً هذا شي خاص بينا وميحق لأي شخص يتدخل بينا ويسببلنا مشاكل ويعقد الامور فوك ما هي متعقدة

باوعت لصابر نطت عيونه مصدوم من كلامي

جاوبنا
ابوسيف .. اكيد هالشي من حقكم خلاص مادام هذا طلبكم اذن الموضوع طلع من ايدي

باوع لعمة اسيا وولدها
نائل ونورس وخالتي ورجلها وكال
.. انا اعتذر منكم لازم تتفضلون تطلعون برة تنتظرون بعد انتوا سمعتوا بأذنكم طلب اصحاب الشأن وهذا الشي من حقهم

اولاد اسيا اعترضوا وظلوا يحجون بس امهم هدتهم وطلبت منهم يطلعون حتى تفتهم الموضوع

اما خالتي فعدلت عبايتها وكالت خالة احنا راح ننتظرج برةً

لكن صابر وما ادراك ما صابر صار الشرر يطلع من عيونه يتمنى يهد علية وياكلني بأسنانه

لان كلبت عليه مر من يمي وحجة بصوت ناصي
.. والله وكت الخرسة طلعلها صوت وصارت تقرر وتحجي بزود

بسيطة هين يانور انا اعلمج
شفتي اخوانج واستسبعتي بيهم

بلعت ريكي وارتديت عنه بخوف وانكمشت بمكاني
شنو انا ليش استعجلت هذا صابر شيطان خاف يسويلي شي من نرجع للبيت

رجعت كعدت بمكاني الي كان بصف ريم

وبدة ابو سيف يكمل قراءة شروط الوصية ومهيمن وجلال واسيا يستمعون للمحامي بأهتمام

ابو سيف.. اتوقع الشرط الاول كان واضح اما بالنسبة للشرط الثاني
باوع لمهيمن ولريم
ووجهلهم الكلام
.. اذا واحد بيكم عنده استفسار عن الشرط خلي يكول
مهيمن سأله.. بس اريد اعرف هو اكو زمن محدد لتنفيذ هذا الشرط
حجاها وباوع لريم بتمعن واستغراب

ابو سيف جاوبه.. بالحقيقة ما ذاكر بالوصية تاريخ الزواج
اباوع لمهيمن صد عن ريم شكله كان ما مقتنع بالسالفة
بس فضل السكوت عن الموضوع حالياً
خطية مهيمن انفرضت عليه يتحمل هواي امور
اخذ بطل الماي من كدامه حتى يشرب

التفتت اباوع لريم اريد اعرف شنو ردت فعلها
لكيت الاخت صافنة بغير وادي
كانت عيونها ثابتة على مهيمن كصته كص بنظراتها
ما شالت عينها عنه عبالك بس هو موجود بغرفة المكتب

ابو سيف .. وانتي ريم تحتاجين اعيد قراءة شرط الوصية
ريم بدلع .. لاعمو ما يحتاج تقراها افتهمت كلشي
وعرفت ان مهيمن راح يصير زوجي

هي نطقت هاي الكلمة وما احس الا مهيمن شرك بالماي

وجلال المفضوح طكها ضحكة مثل المتونس على زنكة مهيمن واحراجه

والمشكلة الاخت حجتها وهي مسيطرة يعني الله يحفظها حتى ما خجلت مثل البنات او تستحي
بس شكلها متعود تحجي الي بگلبها بحرية بدون تقييد لا ونوب تباوع علينا مستغربة ليش نضحك

ريم .. ليش تضحكون شنو اني كلت شي يضحك
همست يم اذنها

اباوع لمهيمن صار وجهه احمر طماطة من الغضب
بس كوة لازم نفسه
.. لج ريم كافي لا تلحين بالموضوع عيب البنية
تحجي بهيج امور كدام الكل لازم يكون عندج حياء

باوعتلي مستغربة.. شنو يعني حياء قابل اني كلت شي غلط

اهووو بالله هاي شنو افهمها
ابو سيف جلة صوته وكال

.. ترة ريم عاشت اغلب حياتها بالخارج وية ابوكم
ومن رجع للعراق هي رجعت لذلك لا تستغربون
لسانها وتصرفاتها ما عليهم كونترول

مهيمن .. اهاااااا هنا بنت الدلال الي جنت اسأل عنه
ابو سيف.. اي نعم الوالد الله يرحمه كان مدللها ويحبها ولان يتيمة

كان ابو سيف يحجيها بصفاء نية لكن مع الاسف
كلامه اجة على جروحنا مثل لسعة الملح

مهيمن.. زين طلع الوالد عنده انسانية
يحن على ايتام غيره
وعايف اولاده عايششين بثوب اليتم والحاجة
صدك معادلة غريبة

اتبادلنا اني وياه وجلال النظرات وابتسمنا لبعضنا على سخرية القدر

بعدها ابو سيف كمل قراءة الوصية
وكال
.. البند الثالث من الوصية ينص ان
البيت الي ساكنين بي ريم وعمتها تم بيعه هو واثاثه
بالتاريخ المرقم (...). وتم ايداع المبلغ بالبنك وتقسيمه حسب الشرع على اولاده الثلاثة المذكور اسمهم
مهيمن وجلال ونور

رفع راسه من ملف الوصية وباوع لريم واسيا وكال
.. لذلك احب انطيكم خبر بأخلاء البيت لان المشتري
انطة مهلة للحجي مؤيد الله يرحمة مدة. خمسة اشهر
ومضى من الخمسة اشهر شهرين

كان يحجي واسيا بعدها مصدومة من الخبر وشكلها انشلت
ريم جاوبته .. اني ما عندي مانع من اليوم ابدي
اجمع اغراضي وحاجياتي. حتى اسافر وية مهيمن
لبيت زوجي

حجتها وعيونها على مهيمن تلمع
خرب يومها فضحتنا وربي هاي البنية مو طبيعية
عبالك مفخخة كلما تحجي تفجر قنبلة

ومهيمن المكرود عركت كصته وصار ينفاخ
وجلال الشيطان سحب كلينكس من العلبة الي كدامه
وانطاها لمهيمن
وكله.. امسح خوية. امسح غديت ماي
الله يساعدك على هالبلوة

اخذها منه مهيمن بنترة وكال
.. انت انلصم ما اريد اسمع صوتك
..همة كالوها ابوي ما كادرالا على امي

خطية شكله انحشر وما يعرف شنو يتصرف وياها

ابو سيف.. احم خلونا نكمل
البند الرابع
تم صرف مبلغ مالي لكل من مهيمن وجلال ونور وريم
يتم تسليمه شهرياً ولمدة سنة ودلك لتدبير شؤنكم واحتياجاتكم الى حين الانتهاء من تنفيذ شروط الوصية واستلام حصصكم

واضح الكلام لو اعيده
مهيمن.. لا واضح ما يحتاج والله والنعم منه طلع الوالد حنين يفكر بينا شلون نعيش خلال هاي السنة وندبر امورنا وماكو دعم مادي منه

حجاها بأستهزاء
جلال.. يعني راح نبقى عالراتب الشهري زين ليش ما ناخذ حصتنا من هسة يعني احنا موافقين نعيش سوية

ابو سيف.. لا موافقتكم المبدئية غير مضمونة بتنفيذ شرط الوصية لذلك هو قرر هشكل حتى يضمن عدم انسحابكم او التهرب من التنفيذ

نور.. اني ماعندي اي اشكال والمبلغ كولش هواي

ريم بأعتراض .. لا هواي شنو
باوعت لابو سيف وكالت.. هاي شنو عمو هذا المبلغ
كولش قليل هذا لنص الشهر ما يكفي

جلال .. شنو عندج عائلة تصرفين عليها هو بس انتي
نور.. عزة بعينج هذا المبلغ كله ما يكفيج لنص الشهر
لج انا هسة كاعدة محتارة افكر شلون ووين راح اصرفه

ريم.. اني طلعة وحدة للشوبنك اصرف نصه

شكهت اريد انجلط من هاي البنية
جلال .. اهووو وانا اكول هاي البنية ياربي جنها لعابة باربي اثاري طلع متعوب ومصروف عليها كلش هواي

ريم باوعت للمحامي وكالت.. عمو احجيلك كلمة عفية
زود الراتب هذا ما يكفيني

مهيمن بصوت جدي .. اكول بلا كلام زايد انصرفلج
مبلغ مالي حالج من حالنا دبري امورج بيها لا تظلين تتنعوصين هاي مو وياج نور هم بنية حالها من حالج
اشو ما اعترضت

برطمت شفايفها بزعل وباوعت للمحامي برجاء
وابو سيف رفع ايديه بأستسلام وكال

.. اسف عمو الموضوع متفق عليه ومنتهي
ومثل ما كال ابن عمج دبري امورج بيهن واتعايشي مع الضروف حالج حال البقية

بعدها التفت المحامي لمهيمن
.. مهيمن في حال اذا تمت موافقتك على عيش جلال ونور وريم في بيتك عليك ان توقع على هاي الورقة
اسلمك الرسالة خاصة من المرحوم

مهيمن .. بالحقيقة ابو سيف انت فاجئتني بشروط الوصية وهيج قرار ما اكدر اتخذه لوحدي
لا تنسى انا ما عايش بالبيت لوحدي
لازم استشير الوالدة واخذ رأيها بهيج قرار
لان هذا بيتها فارجو منك ان تنطيني مهلة يومين
ارجع للبصرة واحجي وية الوالدة وبعدها اردلك الخبر

ابو سيف.. كلامك صحيح وهذا من حقك خلاص
ننتظرك يومين والله كريم

كلبي نغزني من سمعت كلام مهيمن ما اعرف ليش خفت شلون بية واني الي اتحديت صابر وبكل ضني راح اطلع من بيته وبعد ما اشوفه

بعدها ابو شيف گلب الورقة وكال
.. تم ترك مبلغ مادي بأسم العاملة ام محمود
ويتم تسليمها المبلغ مباشرتا بعد قراءة الوصية
مع رسالة شكر واحترام لهذه المراءة لما قدمته من خدمات وتفاني للعائلة وللحاج مؤيد بالخصوص

وهسة نجي للبند الي يخص الست اسيا اخت المرحوم
سوف تستلم حصتها من بيت ابوها حسب ما ينص عليه الشرع

عقد حواجبها بأستنكار وكالت .. شلون يعني
.. يعني بيت ابوج القديم الي بالمحلة ال.......
راح يتقسم حسب الشرع عليكم انتي واولاد المرحوم مؤيد بصفتهم الورثة وريم بصفتها وريثة اخوج محمد

كامت من مكانها وكالت .. لا مستحيل ما اصدك معقولة اخوية ما يترك لي اي شي من حلاله
يعني هو ذاكر الكل بالوصية بحلاله وحتى ذاكر الخدامة ام محمود ما ناسيها

الا اني واولادي ما ذاكرنا لا ما اصدك مستحيل
اني اتوقع انتوا متفقين بينكم على هاي الوصية

ابو سيف .. ام نورس انا ارفض التجاوز على نزاهة
عملي ترة الوصية مصدقة بالمحكمة وعند القاضي بزمن المروحوم يعني ما بيها اي مجال
للطعن بصحة الوصية
تمت كتابتها حسب الشرع والقانون واي ثغرة ما بيها
وتكدرين ترحين تتأكدين بنفسج

بعد انتهاء من قراءة الوصية دخلوا اولاد اسيا وعيونهم على امهم الي كانت تدردم وكعدوا يستفسرون من امهم

اما اني ومهيمن وجلال وريم صرنا نتبادل النظرات بتوتر لان هاي هي خلصت قراءة الوصية

كنا نتبادل النظرات وكل واحد عنده كومة اسئلة يريد يوجه للاخ بس مترددين

واني وحدة من الناس بعدما خربت وية صابر
خايفة ارجع وياه للبيت وبنفس مستحية اسألهم

نهض مهيمن من مكانه و هو يباوع لساعته وكال
.. انا اترخص منكم صار لازم اتوكل واسافر للبصرة

ابو سيف.. تمام كلما تستعجل يكون افضل حتى اكمل الاجراءات

التفت على جلال وكال .. وانت جلال وين راح تبات اليوم

باوع على المحامي وكال
.. بالحقيقة انا ماعندي مكان ابات بي
بس لا تشيل هم ااجر فندق وابات بي

مهيمن حجة بتحدي .. وليش تبات بفندق وبيت ابوك موجود روح بات بي انت اولى بي من غيرك وكان يحجي ويباوع على اولاد عمة اسيا.

ابو سيف جاوبه.. اي صحيح هاي شلون فاتتني
فعلاً بيت ابوك موجود

نورس بأعتراض .. شنو ..شنو وين كاعدين
واحنا شنو نعرف من عنده ونخلي يبات بالبيت
يعني هستونا التقينة بي شلون تريدنا نأمن بي ونبيته عدنا

نائل .. اي والله صدك وحتى شكله مشبوه
شوفه شلون مگلب بالله طلع حرامي. مجرم خريج سجون

جلال بستهزاء .. لا انا مو حرامي ولا خريج سجون بس شوية بوقت فراغي اطلع اشتغل وية داعش

مهيمن ابتسم على كلامه
وكال.. عسى ما يطلع ارهاب رقم اربعة
غصباً على اليرضى والمايرضى
بيت ابوه اولى بي
والما عاجبه يضرب راسه بالحايط
وانا لو ما عندي وقت ولازم ارجع للبصرة جان هم
ابات ببيت الوالد واريد زلمة يفتح حلكه

جلال.. لا تعصب روحك
خليهم يهذون لوحدهم هذولي مثل الذبان بس يغوغي عالوجه ما يأثرون

اسيا بغيض .. شترجى منكم مبين عليكم تربية شوارع ما اعرف اخوية شنو كان بفكر بيوم قرر ينطي حلاله لهيج شكولات

مهيمن يباوع عليها بهدوء واستصغار
وجلال حط جنطته على كتفه وعدل عكازاته وكال
.. امشونا لبيت عمتنا نتونس نفتح كنتورها وشنريد نلبس

كان يحجي الكلمات ويحرك بحواجبه بتجاه اسيا الي
كانت راح تنجلط من سوالف جلال

.. يالله ابو سيف دلينا على بيت ابونا لان كلش تعبان واريد انام
خطية كان مبين عليه التعب

انتبهت عليهم اتوجهوا للباب يريدون يطلعون كمت من مكاني واستوقفتهم
.. ممكن لحظة

التفتوا علية جلال ومهيمن والبقية يباوعون بفضول
حجيت بصوت ناصي وية ابو سيف
.. انا اريد احجي وية مهيمن وجلال لوحدنا ممكن

ابو سيف .. اي عادي عمو اخذوا راحتكم راح افرغلكم المكتب
الكل طلع من المكتب
وبقيت لوحدي يم مهيمن وجلال وكلبي يريد يطلع من مكانه احس بروحي صار عندي حق واكدر احجي
كنت مستحية ومرتبكة ما شلون اوصللهم ان اني خايفة ارجع وية صابر بعد ما انطيت بي كدامهم

مهيمن .. نور اتفضلي احجي كلتي عندج كلام
رفعت راسي وكلت
.. بالحقيقة انا اريد اروح اعيش ببيت ابوي من اليوم

جلال.. الحمدلله صرنا اثنين على الاقل مو لوحدي ابقى وية هذولي

مهيمن سألها بشك.. وليش هشكل تردين تطلعين من بيت خالتج مستعجلة شنو السبب

بلعت ريكي وكلت .. ااا انا خايفة من رجل خالتي
خاف يسويلي شي

جلال بغيض.. والله العظيم عرفته ناقص اول ما شفته كلبي ما ارتاحله هيج من الله

مهيمن .. انتظر جلال لحظة خلي نفتهم
باوع علية وسألني
.. يعني افتهم من كلامج هذا ان رجل خالتج هددج

.. تكدر تكول هيج شي
مهيمن .. خلاص هاي هي ما ترحين وياه
حتى ببيت مؤيد ما اريدج تبقين. اذا توافقين تجين وياي للبصرة هناك يم امي واختي ما عندي مانع بيتي مفتوحلج واذا تشيلج الكاع تشيلج عيوني

كان مهيمن يحجي وياي بنخوة
ولاول مرة بحياتي احس بروحي عند سند

جلال بصوت ناصي.. وجلال ابن البطة السودة تخلي يبات ببيت مؤيد يم عصابة ابو طبر

جاوبت مهيمن.. لا لا مهيمن ما اريد احرجك وية اهلك
بيت الوالد موجود وانت روح سافر حتى تاخذ من تحجي وية امك بموضوع الوصية

ترة الموضوع مثلما هو صعب عليك راح يكون هم صعب على امك

لاتنسى احنا اولاد زوجها من غير نسوان واخاف تحسس من الموضوع ومو اي وحدة راح توافق تستقبل
اولاد زوجها يجون يعيشون ببيتها

مهيمن ابتسم وكال يطمني.. معذورة وحقج تحجين هيج
لان بعدج ما تعرفين الوالدة. وكرمها
هي بيها طبع كريمة وية الكل وتوكف للغريب قبل القريب وانتي سالفتج تختلف

من اللحظة الي عرفت بيج انتي اختي و بنت ابوي
ومن عندها صرتي عرضي وتنحسبين علية
يعني انا ما مسوي براسج فضل

جلال كمل .. نور هذا واجب الاخ بتجاه اخته
يحميها ويصونها

حجاها جلال بهدوء
كلبي غرد على كلامهم وصار مثل العصفور الي يفرد جناحاته فرحان

.. ربي يسلمكم اني ما اريد شي بس تجون وياي
اجمع غراضي من بيت خالتي واروح وية جلال ابقى ببيت ابونا. وانتظرك علما تمهد لوجدونا عند امك احسن

مهيمن .. خلاص هذا هو براحتج اذن خلينا نتوكل

نور طلعنا من المكتب وصابر كل شوية يخزرني

كام من مكانه وكال
.. يالله امشونا اتكسرنا تكسر من الانتظار
وكف مهيمن كدامي وكال
احنا رايحين وياك للبيت حتى نور تجمع غراضها
وتجي ويانا.

خالتي سألتني مستغربة .. صدك خالة نور يعني وافقتي
عالشرط راح تسافرين وياهم
جاوبتها .. اي خالة انا راح اروح وية اخواني

صابر شهك متفاجيء
.. شنو وين كاعدين نخليج ترحين وية اثنين شباب
ما نعرف اصلهم من فصلهم عود هستونا عرفنا بيهم
اخوانج غير نسأل عنهم ونتأكد من خلفيتهم
وانتي شعرفتي منهم حتى توثقين بيهم وتوافقين ترحين وياهم واثقة منهم

قاطع كلامه ابو سيف وكال
.. اخ صابر. ابوها الحجي مؤيد الله يرحمه قبل لا يحط الوصية اتحقق من
خلفيات اولاده وعرف عنهم كل شي والحمدلله
سمعتهم نظيفة وما عليها غبار وهو لو ما متأكد وواثق من من نزاهة مهيمن واهله ماكان حط هيج شرط بالوصية
فرجاءاً لا تكعد تصرح من يمك بأمور ما تخصك

بعدها المحامي ابو سيف سلمنا كل واحد بينا المبلغ المالي الشهري الي حجة عنه قبل قليل وسلمنا لكل واحد رسالة خاصة من حضرة الوالد وكال من اليوم راح نبلش بتسليم الراتب
والرسايل اتمنى تقروها ولا تحلون غضبكم على ابوكم وتقصيره يتحكم بيكم وبقراراتكم

اخذت الفلوس وعيون صابر تريد تطلع
من ماكانها

بعدها طلعنا من المكتب وانا احس بروحي عبالك سجين وطلقوا سراحه
اتمنى اصيح بعالي صوتي. اني عندي اخوان
ابتسمت على افكاري

طلعنا خارج المكتب واجانا صوت ناعم
التفتنا شفنا ريم اجتي بتجاهنا تهرول وكالت
بلهفة .. مو تتأخرون انتظركم راح اخلي خالة ام فلاح
تسوي عشا

كانت تحجي ويانا وعيونها على مهيمن
جاوبتها .. لا تكلفين نفسج ما نريد نتعبج

جلال.. عمي عوفيها هسة هي شمسوية
الله يخلي ام فلاح راح تطبخلنا

باوع لريم وكال .. عمي باربي الله يكثر خيرج
وتعزيمنا

المشكلة جلال يحجي وياها والاخت سرحانة تباوع لمهيمن الي انكلب وجهه احمر منها وصار يتهرب من نظراتها وكل شوية يستغفر

اقتربت منه وهو باوع عليها وشافها بعدها تباوع علهي وكال
.. شكو تباوعين مضيعة شي بوجهي

ما اهتمت لسؤاله وسألته غير سؤال
.. وانت مهيمن ما تجي عالعشا

خرب هاي البنية عبالك عايشة بغير عالم
جاوبها
.. لا لا انا بس اجيب نور للبيت واسافر للبصرة

.. امانة اذا سافرت سلم على خالة ولا تتأخر علينا
احنا ننتظرك

صد نظراته بعيد عنها وكال
.. الله كريم

بعدها اتحرك بتجاه الشارع العام واجر تكسي
وكال يالله شباب اتحركوا ما اريد يجني علية الليل وراي سفر

وصلنا لبيت خالتي ودخلت للبيت ومهيمن وجلال
بقوا بنتظروني بالباب

وصابر دخل للبيت وضل يحوم ويغلط علية وعلى خالتي

صابر .. شفتي سناء مو كلتلج هاي كلبة ولئيمة واول
ما عرفت عندها ورث وحلال راح تطلع من عدنا وما تعبرنا

سناء.. الله يهنيها شريد منها خليها تعيش يم اخوانها
احسن انت مو ذاك اليوم كنت تشتكي من مسؤليتها وتريد تزوجها لسعدون

خلاص هاي اجوي اخوانها وراح يرحيونك من مسؤليتها

كانت خالتي تحجي وية صابر واني اتحرك بالغرفة عالسريع احضر بغراضي وكم غرض من امي
محتفظة بيهم وحطيت مستمسكاتي وشهادتي بالجنطة
وسمع بكلام خالتي كسرت خاطري

دخلت يمي وهي توصيني اصير فطنة وحذرة من الناس الي رايحتلهم
واني اقتربت منها وطلعت من جنطتي فلوس من الي استلمتهم
من المحامي وانطيت لخالة سناء نصهم
وحجيت وياها بصوت ناصي
.. خالة انا ما ناسيتج بس ما اريد انطيج الفلوس كدام صابر خاف يلغفهم منج
وان شاء الله ما راح انساكم انتي والبنات

سناء.. يا خالة خليهم عندج خاف تحتاجين ما عليج بكلام صابر انا ما اعلق عليه
ادري بيج طبية

حطيتهم بيدها وكلتلها خالة اخذيهم لخاطري
اخذتهم وضمتها بصدرها حتى ما يشوفهن صابر

خلصت جمع غراضي القليلة وحطيتهم بجنطة وسلمت على خالتي والبنات
سناء.. مو تنسن من توصلين تطمنينا عنج
.. ان شاء الله خالة

صابر.. لا تخافين عليها هاي بزونة بسبع ارواح ما يصير بيها شي

طلعت من بيتهم ووكفت بالباب واني ابتسم على كلامه
لان يخاف من مهيمن وجلال فما بيده يسويلي شي بس يكدر يحجي خطية

طلعت بالباب وشافني مهيمن اتوجه علية واخذ الجنطة من ايدي
كنت بس اوزع ابتسامات
جلال .. عبالك وحدة طالعة زعلانة من بيت عيالها
ما مصدكة

اتسعت ابتسامتي وجان يقاطعنا سعدون
سعدون.. هذولي منو الي واكفة تتمضحكين وياهم بالباب انتي شنو سالفتج كل يوم اجي الكاج واكفة وية واحد

دفعه مهيمن على كيف من كتفه وكال
.. انت هييي خير سالمين حضرتك منو حتى تكعد تحاسبها

سعدون بكل ثقة .. انا خطيبها
شهكت ولطمت صدري والتفتت على مهيمن
.. والله كذاب. اصلاً هو وصابر يردون يزوجوني بالكوة
لوما رب العالمين سخرلي اولاد الحلال وخلصوني منه
كان الله يعلم بحالي شنو صار

مهيمن رجع دفعه من صدره وهالمرة اقوى خلاه يرتد للخلف وكله
.. شوف حباب هاي البنية الي صارلك ساعة تحجي بعرضها تصير اختنا. وحق الكعبة لوما عمرك
والشيب المغطي راسك جان خليتك فرجة
لأمة لا الاله الا الله بس احتراماً لعمرك وراح اسويها لله واخلي سبيلك فهسة اتحرك من كدامي بدون ولا حرف

جلال .. يالله حباب اتوكل ارجع لأهلك ماشياً على القدمين احسن ما ترجعلهم زحفاً على الركبتين
ترة وداعتك الاخ هنا حاد سنونه ينطي فلوس علمود يتعارك

خزره مهيمن وكال بتحذير .. جلاااال
وجلال غمزله وكله بصوت ناصي
.. هاي شبيك كلنا نضيف شوية بهارات حتى سعدون يخاف ويشرد بروحه العزيزة

وفعلاً طلع صابر على اصوات الولد
وشاف سعدون
واخذه وراح وكل شوية يلتفوتون ويباوعون علينا

....

مهيمن
بالطريق للبصرة راجع وانا محمل بهموم فوك همومي

سافرت لبغداد وانا احس بروحي مظلوم
وجنت ناوي اخذ حقي من اخواني
اشو اجيت ولكيت اخواني مظلومين اكثر مني

محد بيهم مرتاح واسوء من عيشتي
جلال الي مبين عليه التعب والضيم ونور المسكينة

سحبت نفس عميق
وغمضت عيوني
.. بيمن ادعي عليك يا مؤيد حطيتنا بطريق القدر
وتريد منا ننجمع

طلعت الرسالة الي سلمها الي ابوسيف وكعدت اكلب بيها
ياترى شنو كاتبلي مؤيد بالرسالة

يتبع

اتمنى لكم قراءة ممتعة
مع تحيات اختكم نهى الحسون