قضية لم الشمل الفصل العشرون 20 - بقلم نهى

السلام عليكم ورحمة الله وبركاته
اسعد الله مساءكم يا احبتي المتابعين ❤️

#الكاتبة_نهى_الحسون
#قضية_لم_الشمل

جلال
رحت اركض راجع للقاعة اريد الحك لعناد واشوف شبي

ومهيمن كان يركض وراي,
دخلنا ولكينا صاير مضارب بالكراسي عركة معتبرة
صرت ادور على عناد

لزمني مهيمن من كتفي.. تعال ارجع وين رايح ما تشوف صايرة عركة بالنعل
لا يلوحك شي

كان مهيمن يحجي ويباوع على القاعة
سمعنا عياط نسوان ومرت وحدة من كدام مهيمن مفرعة ومهيمن التفت علية وعقد حواجبه واتوغل للقاعة وسألني بشك
.. لك جلال هذني شنو انتوا شنو جنتوا تسون هنا

كان يحجي وياية وانا بعدني ادور بالقاعة اريد اشوف عناد وينه
جاوبته .. مهيمن بعدين افهمك هسة مو وكتها

صرت ابعد بالناس من كدامي حتى اشوف
والله وكان اشوف صاحبي واكف على صفحة متكابلين عليه اثنين
يضربون بي وهو يصيح ويتلاوة بين ايديهم مبين ولية مال مخانيث
هاي عركة عناد من غير العركة الكبيرة الي صايرة بنص القاعة
ما ينعرف شنو القصة صايرة خبصة

رحت هديت عليهم ومهيمن لحكني
صرت اتلاوة وية واحد منهم
ومهيمن كام يدفع بيهم ويبعدهم عن عناد الي وكع بالكاع شكله ساحت روحه

اباوع لمهيمن بدون مقدمات دنك على عناد
ورفعه من الكاع وسنده حتى يطلعه من القاعة
انطيت دفرة لهذا الي لازك وبعده يريد يتعارك

ما نعرف هذولي شنو يردون من عناد
لكفت نقاله الواكع من الكاع واخذت سترته وسحبت بطريقي بطل ماي من على الميز وطلعت اركض ورة مهيمن هذا كله الي صار والعركة الكبيرة بعدها مستمرة

رحت ورة. مهيمن الي وصل عناد لسيارته
وفتحله الباب
اباوع لعناد استند على سيارته. ودنك راسه دايخ اقتربت منه. وانطيته بطل الماي

.. هاك اغسل وجهك وفهمنا شنو الصار
اخذ مني الماي وصبه على راسه
باوع عليه وكال

.. جلال والله ولية مال مخانيث شافوني لوحدي وكاموا يبلوني بطياح حظهم واحد انضرب من ورة العركة ووكع بصفي اشو اجوي علية يكلولي ليش ضربته
ونزلوا علية مرة وحدة بالضرب وشكلهم سكرانين

مهيمن بغيض من عناد
.. هي هاي النعرفها
طريق الحرام نهايته الخراب مابي خير
ان شاءالله يكون درس

عناد بصوت ناصي من بين اسنانه
.. اهووو هسة هذا شجابه مو كلت اخوك راح.
هسة تعال شيسكته اكيد راح يوصل كل شي لأبوية
وتعال يا عناد اكعد اقنعهم انا مالي دخل بكل الي صار

مهيمن بغيض
.. هسة شنو راح تخلصون الليل هنا واكفين يالله فضونا

باوعت لعناد وسألته اتطمن عليه
.. ها عناد شلون صرت هسة ما شوية احسن
.. لا لا صرت زين تكدرون تتوكلون لا تعطلون نفسكم علمودي

مهيمن .. لا ما راح نعطل نفسنا علمودك
انا واكف منتظر هذا الاخ شوكت يخلص كلامه حتى اروح

جان يقصدني
سألته .. تكدر تسوق لوحدك
عناد طبطب على كتفي وكال .. لا تخاف يا صاح
اكدر اسوق قابل انا سكران حتى ما اكدر اسوق
هي لطمة على الوجه ، روح جلال لا يظل بالك يمي

انتظرناه يصعد بسيارته شغلها وحرك ودك هورن وسلم علينا وراح

مهيمن .. اتفضل باشا كدامي حسابي وياك بعدين

.. اهوو هم رجعنا لشغلة حسابي وياك
اي مو ادري حتى فلوسي خلصوا من ورة المحاسبة

مهيمن وصل لسيارته وصعد بيها وانا اتبعته
.. جلال ليش احس بيك شاب طايش
الله انطاك عقل شلون تروح برجليك للتهلكة
ليش تخليني اتبع وياك غير اسلوب ما يعجبك

.. مهيمن على كيفك مايحتاج كل هذا الكلام الي تكوله
انا هم مثلك حالي من حالك انعزمت بالحنة
واتفاجئت بيهم مسوين حفلة طرب ورة ال١٢

مهيمن .. هسة تريد تقنعني ان انت ما عندك علم بالراقصات واحياء الحفلة

.. عندي بس حبيت اشوف واجرب لان
اول مرة بحياتي ادخل لهيج اجواء

غمض عيونه بصبر وكال
.. جلال انتبه لنفسك ولتصرفاتك مو كل شي جديد
لازم تجربه ما يصير ، كل شي وله حدود
وانت بتصرفاتك تجاوزت حدودك فاهم

رجعت راسي للخلف وسندته على الكرسي وحجيت بتعب
.. تمام فهمت عليك ابو الهمة.

وغمضت عيوني وما حسيت الا على مهيمن كعدني
.. يالله جلال اكعد وصلنا للبيت

نفضت راسي حتى اصحى نزلنا دك نقال مهيمن
وكان المتصل ابن خاله سجاد يتطمن عليه
.. الو هلا سجاد اي وصلت لا يظل بالكم

دخلنا للبيت ولكينا ام مهيمن ونور ينتظرون
ام مهيمن.. ها يمة اشو اتأخرتوا ظل بالي يمكم

باوعت لنور كانت نظراتها كلها خوف وعيونها حمر
مهيمن كعد يطمن بامه وانا رحت دخلت للغرفة

ونور اجتي وراي تعرج بمشيتها وفاجئتني بكلامها
.. جلال والله اليوم دخلت بخطيتي وكعت گلبي عليك

كنت انزع بحذائي واتوقفت على كلام نور

.. لا تخافين هذا انا كدامج ما بية شي
.. حقك ما تعرف شصار بية من مهيمن يتصل عليك وانت ما تجاوب اجيت اموت بدمي

عيونها جانت تنطق بالخوف من شفت خوفها علية ما اعرف شصار بكلبي اتمنيت اخذها لحضني واطمنها
واكللها هذا انا موجود لاتخافين

بس المسافات الموجودة بيني وبين اخواني
خلت بينا حواجز تنمنعنا نتصرف بتلقائية مثل بقية الاخوة العاديين

يمكن لو كنا عايشيين حياتنا مع بعضنا بصورة طبيعية جان ما واجهت صعوبة اخذها لحظني

اباوع عليها شلون دموعها تلالي بعيونها
اتذكرت خالي من اتأخر يظل يصيح ويعصب
عكس مهيمن ونور كان خوفهم طاغي عليهم
اقتربت منها مسحت على راسها بكف ايدي اواسيها
.. ما جنت اتوقع تأخيري عليكم راح يسببلكم فزع
مسحيها بية هالمرة اطلب منج السماح

نور.. حقك مستغرب لان ما تعرف انت ومهيمن شنو بالنسبة الي
من يوم الي شفتكم صرتوا كل حياتي واماني
ووخوفي عليك اليوم بين محبتك بگلبي

صحيح انا مصارلي هواي من تعرفت بيكم
بس ربي الشاهد يمكن لو يقيسون حبي الكم راح يلكونه
يضاهي حب اخت رابية من الصغر وية اخوها
ويمكن يفوقهم

تعرف ليش افوقها بحبي الكم لان
احتمال هي تكون متحس بنعمة الاخو لان من صغرها تعودت على وجوده بحياتها
ما يحس بالنعمة الا الي فاقدها

.. هاي هي وداعتج بعد ما تنعاد واخذيها مني وعد

.. الله يخليكم الي
اخذت راحتك شكلك كلش تعبان هم يالله تنام باجر وراك كعدة من الصبح
مو تنسى تكعدني اسويلك ريوك

ابتسمت لها .. صار تدللين شريد بعد اختي واصبح بوجهها الحلو وتسويلي ريوك
طلعت وتركتني بدلت ورحت اتمددت على فراشي

ودخل مهيمن وباوع علية بزعل
وتمدد بفراشه وانطاني ظهره ونام

باوعت للسكف وسحبت نفس عميق
واليوم عرفت شلون يكون شعور الواحد من يكون عنده عائلة

والله يا جلال قربان راحت عليك ايام زمان
صار لازم اتنازل عن هذا اللقب
وابطل اجازف بحياتي
لان الظاهر حياتي غالية على عائلتي
ومبين عليهم ما مستعدين يتنازلون عنها ويقدموها قربان

التفتت اباوع لمهيمن كم مرة يجي على بالي احضنه
بس ياخذني التردد والخجل ما اعرف ليش اكون دائما متقيد بالتعبير عن مشاعري وياه وحتى وية نور

جائز هاي ضريبة افعال مؤيد الي احنا جاي ندفعها لهذا يومنا.
وبعد ما نعرف الايام شنو ضامتلنا

نور
اجوي نسوان وحجوا وية ام مهيمن
وطلبوا ايدي.

وام مهيمن فرحت وكامت تباركلي وكالت
.. خالة الولد شايفج وياي بالسوك وسأل عليج وعرف بيج اخت مهيمن
وداز اهله حتى يخطبوج له

بس انطيني نقالج حتى اخته ترسل صورة الولد
لان انا نقالي قديم ما يرسل

انطيتها نقالي وفتحتلها البلوتوث
حتى ترسلي صورته لان هنة كاعدات بالهول
قبل شوية دخلت عليهن وسلمت وقدمتلهم العصير
وسألوني كم سؤال عشر داقايق وكمت من يمهم

مثلما علمتني ام مهيمن اذا يجون الخطابة هيج لازم اسوي

طلعت من يم النسوان واجوي البنات ريم وحوراء يركضون شكلهن كانوا واكفات ورة الباب

حوراء.. ها بشري
ابتسمت.. ههه شنو ابشر متكليلي
.. شنو كالوا
.. ما اعرف البنات وامهم مبين عليهم حبابات بس بقى نشوف الولد هسة منتظرة

خالة تجيب صورته واشوفها

شوية واجتني ام مهيمن وانطتني النقال وراوتني الصورة
وكالت .. ما شاء الله عين الباردة عليه كلش حلو ومرتب يا يمة كون الج بي صالح ربي يتمم عليج

.. ان شاء الله خالتي ربي يسمع منج
رجعت ام مهيمن دخلت يم النسوان
و ريم وحوراء
خطفوا النقال من بين ايدية بسرعة
وصارت وحدة تتعارك وية الثانية حتى يشوفون الصورة

واني صرت اتعارك وياهم
.. ولكم انطوني مجال بعدني ما شفته عدل
حوراء .. انتي رأيج مو مهم اهم شي رأي لجنة
التحكيم بالله شو ريم عوبة انطيني خلي اشوف

ريم لازمة الموبايل وتباوع بتمعن
.. اممممم يعني وسط مو كلش حلو. مهيمن اجمل منه بقاطات

حوراء اخذت النقال منها و دفعتها على صفحة
وصارت تتفحص الصورة بتفكير

.. امممممم حلو بس مو احلى من الي بالي
.. بالله شو جيبي انتي وياها والله. موتوني جنكم ذبانات
بس تزنون على راسي

اخذته منها وصرت اتمعن بصورة الولد
وادرس شكله كان حلو مرتب واسمراني وجسمه وسط لا سمين ولا ضعيف

وصرت اتخيله يجي ويشوفني ونتعرف اني وياه على بعضنا
.. شوفوا بنات هو مو كل شي بالدنيا الشكل ،اهم شي الاخلاق والشخصية

يعني مثلا عندج هواي شباب يملكون جمال وجاذبية
مواصفات الجمال عندهم متكاملة بس من تجين لشخصيتهم تلكيها صفر

ريم.. والله بهاي انتي صدقتي كلامج صحيح
مثلاً عندج نائل ابن عمة اسيا

هو شكله حلو ووسيم وكل صديقاتي من كلتلهم اني رفضت نائل ظلن يلطمن من القهر وحدة تكلي الله ينطي الجوز للي ما عنده سنون والثانية تكلي والله حظوظ وبختج كاعد بالعلالي

خطية البنات غرتهم جاذبيته وشكله الوسيم.
هو صحيح حلو ووسيم بس لو تجين لشخصيته
عساه لا يفتح حلكه وتسمعين كلامه التافه
بالحقيقة راح تنصدمين وتنخذلين وراح تكولين حرامات ولا اتوقعته هيج تافه

سألتها.. منو نائل تقصدين على هذا الولد الي شفناه وية عمتج بمكتب ابو سيف

.. اي هو نفسه مو نورس الضخم لا نائل الثاني الناعم

حوراء.. بالله ماعندج صورة لنائل صار عندي فضول اريد اشوفه

ريم سحبت نقالها وكالت

.. ما عندي صوره له بس هسة راح ادخل
على صفحته بالفيس هو دائماً ينزل صوره

فتحت النقال ودخلت عالفيس ودخلت على صفحة نائل
كالت
.. شوفوا هذا هو نائل انتبهوا عليه شلون حلو ووسيم
وصديقاتي من يشوفونه يحسدوني عليه

وعلى حجايتها وجان يدخل مهيمن وزمخ بيها
وسحب النقال من ايدها

كلنا كمرنا على دخوله المفاجيء وريم ضلت تباوع عليه مصفصفة ومتفاجئة

.. بالله شو راويني منو هذا الي حاسدينج البنات عليه

باوع للنقال واتسعت عيونه وكال .. هذا نائل شيسوي بنقالج

ريم جاوبته.. يعني شيسوي بنقالي ابن عمتي ترة عادي جاي اروي للبنات صورته

اباوع لمهيمن النار تريد تطلع من عيونه اول مرة اشوف مهيمن ما يسيطر على اعصابه

.. بالله ما تكوليلي شعجبج بهذا الخنيث انتي هم حاسبته رجال
والله حسافة هذا محسوب عالزلم

ريم .. مهيمن اني ما راح اسوي وياك مشكلة علمود نائل لان رأيك بي ما يهمني

كانت واكفة كدامه وتباوع عليه بتحدي
وكملت كلامها .. على الاقل هذا نائل الي ما عاجبك
كل يوم يتصل علية ويسأل عن احوالي حتى يتطمن علية
حسن من بعض الناس الي ما يعرفون الله وين خالقني

اخذت النقال من عنده وراحت
وقبل لا تطلع مهيمن وكفها بمكانها وكال
.. اذا سمعت بيج او لمحتج تحجين وية نائل بالنقال ما تلومين الا نفسج
. مو تكولين مهيمن ما كال

ريم .. ما اوعدك ما اتواصل وياه بس احاول
لا تنسى هو ابن عمتي مثلما انت ابن عمي
واني بية طبع ما اعرف ارد الي يسأل عني

راحت وتركت مهيمن الي عروكه بانت من ورة قبضة ايديه

طلعوا النسوان وام مهيمن دخلت للمطبخ
وشافت مهيمن وسألته عن جلال
جاوبها .. جلال اليوم يتأخر عنده شغل بالمعمل
وحدة من المكاين عطلانة

اكول يمة منو هذولي النسوان
ام مهيمن ابتسمت وكالت
.. يا يمة اليوم اجوي ناس يردون يطلبون ايد اختك نور

وصارت ام مهيمن تحجيله عن الناس المتقدمين
وانطته اسم الولد وعنوانه بالشغل واخير شي راوته صورة الولد الي بنقالي بحيث صرت بنص هدومي
مهيمن باوع علية وابتسم

ام مهيمن .. ها يمة مهيمن شنو رأيك بي
ومهيمن كال
.. طبعاً هذا الولد انا اعرفه وشايفه بالسوك بس ما مختلط بي هواية بس انطوني فرصة كم يوم اسأل عليه
وبعدين اردلكم خبر حتى تحجون وية الناس

.. ان شاء الله يمة بيها الخير
مهيمن .. اي يمة صدك قبل لا انسى جهزي روحج اليوم اخذج وياي لبيت الحجي ابو حيدر خطية هذا ابن ابنه واكع عليه جدرية ماي فاير وحارك نص جسمه

.. يا يمة صخام وهسة شلونه الولد
.. والله حسب كلامهم هسة هو زين وجاي يعالجونه

يمة الله يرضى عليج
فكلت اخذج وياي ونشتريلهم خروف على سلامة ابنهم

.. اي يمة ابو حيدر صاحب واجب يستاهل نواصله ونقوم وياه بالواجب

للعصر اجتي ام مهيمن وكالت
.. خالة نور جهزي روحج ترحين وياي انا ومهيمن لبيت ابو حيدر على الواهس
صايرة اضوج اطلع لوحدي
اتعودت عليج
.. صار خالة انا بالخدمة ما عندي شي اجي وياكم

جنا نحجي انا وام مهيمن وجان نسمع صوت صرخة ريم
ام مهيمن.. يا ستار شبيها بت عمج
ركضنا اني وياها ومهيمن وجلال اجوي على مصدر صوت بكاء ريم
لكيناها بالمطبخ الدموع عشرة عشرة

ام مهيمن.. ها ولج خالة شصار
ريم هزت راسها وزاد بكاءها

صدك كسرت كلبي
ام مهيمن شافتها هشكل تبجي
.. ولج خالة ريمة احجي شصار عمتج اسيا صار بيها
شي

ريم وبصوت منهار .. لالا ياريت عمتي اسيا ولا الصا......
وانقطع كلامها مختنكة بالبجي
اقتربت منها وحطت كتفها اريد بس اهديها ونعرف شنو الموضوع

حوراء تباوع عليها بس ترمش بعيونها
جلال .. يا ستار صار الموضوع يخوف

ام مهيمن لطمت على صدرها
يمة صخام بس لا واحد من اولاد عمتها مات
ريم.. ياريت
وضمت راسها بصدري واستمرت بالبجي

عاد ام مهيمن سمعت هشكل وجان
توكف بنص البيت وتكول بهوسات الفواتح
.. يبوووووووو
خيه اطينا نتسامر لاتونين احو .. احوو

مهيمن..يمة صلي عالنبي هسة شفتهمتي وكعدتي تلطمين

ام مهيمن.. ولك بنت عمك تبجي مفزوعة مبينة تصيح لأمها وابوها مات واحد من اهلها

كابلت مهيمن وكملت هوسات الفواتح
وهي تلطم .. يمة مهيمن جتك طايرة الونة كوم اكعد تلگاهة
هذولي اهلج اهل دلة وفناجين ليش تونين
سم اهلج طواعيين هذولي اهلج اهل غيرة ودواوين
وليش تونين سم اهلج طواعيين

مهيمن بخوف .. ولج ريم احجي شنو القضية منو مات
ريم رفعت راسمها من حضني وهي تناشغ بالبجي
.. اااا مهيمن اظافري انكسرتتتتتتت اااااااااااااا هيء
ورجعت لحضني تكمل بجيها جانت تبجي مثل الطفلة
المهضومة

هي كالت هذا الكلام والبيت انكلب هدوء سنطة اباوع للوجوه.
ام مهيمن اتوقفت عن اللطم والنعاوي وبقت مصفصفة
ومهيمن فاتح حلكه مصدوم يباوع لريم عبالك جاي يباوع لكائن فضائي غريب

وجلال نفس وضع مهيمن
وحوراء حجت بصوت ناصي
.. ردها ان استطعت يا هذا راحت هوساتج على خالي بلاش يا ام مهيمن

ام مهيمن.. الله يسامحج خالة والله سوايتج ما تتسولف
وكعتي گلوبنا علمود ظفر صدك تحجين جذب

مهيمن حجة بصوت هاديء بس مبين عليه كوة لازم
روحه ما يسحلها

.. يعني هذا البجي وروحج مفرفحة كله علمود ظفرج انكسر

ريم مسحت خشمها وكالت .. لا مو ظفر واحد ثلاثة انكسروا هااااك شوووف
مدت ايدها كدامه والشفايف مبرطمة وترجف من اثر البجي

جلال .. لا لا لا ثلاثة ضحايا بوقت واحد
انا لله وانا اليه راجعون. الله يساعدج صدك كارثة
زين طمنينا مأمنة عليهم بالتأمينات لو لا
لو لوحدج راح تتحملين الخسائر الفادحة

مهيمن .. جلال انلصم وسد حلكك انت الثاني لا اجي ابتلي بيك ورب الكعبة

وباوع لريم كمل كلامه
.. والله العظيم احلف عليج انتي مو عاقلة بس اريد اعرف انتي بشنو تحسين

حجيت وياه حتى اهدي.. مهيمن مصار شي انت تعرف ريم

ام مهيمن.. عوفها يمة بنية صغيرة بزر دلال لا تحط بالك وياها

يالله يمة امشينا لا نتأخر على الناس هم يالله نروح لهم اكيد هسة ينتظرونا

مهيمن .. انا طالع كدامكم لحكوني مو تتأخرون

باوع لريم وكال
.. مع الاسف يوم عن يوم تثبتين بتصرفاتج انتي مجرد طفلة بجسد مرة
راح وعافنة وريم زادت بالبجي وضمت روحها بصدري عبالك تريد تختفي

وام مهيمن راحت دخلت لغرفتها وصاحت لحوراء
.. يمة حوراء تعالي حضريلي العباية والجورايب والشحاطة اريد اروح وية اخوج

حوراء طبطبت على ظهر ريم تواسيها
.. كناري حبيبتي لا تزعلين من مهيمن بس هو يتخبل من دلع البنات
ما تشوفيني صرت جعفر ابو الغاز
كله من وراه

وعافتنا راحت ورة امها

وريم رفعت راسها وباوعت علية بخيبة امل
.. نور مهيمن اكيد صار يضوج مني

جلال .. باربي لا تشيلين هم زعل مهيمن
صدكيني تكبرين وتنسيها هسة خلينا بأظافرج الي انكسروا
وين راح يقام العزاء عليهن

شنو رأيكم اسويلكم العزة فوك بالسطح اليوم بالليل
عليكم الله انتظروني اليوم لا تتعشون اشتريلكم بيتزا وبيبسي ونتعشا فوك بالسطح ونجيب ام مهيمن
تنعى شوية والله عليها نعاوي

غير اجيت اكابلها والطم من جو الحماس الي سوته
ينعل بليسج باربي حركتي الجو حرك

غمزتله .. جلال يمكن مهيمن يصيحلك
راح جلال وطلع برة وكال .. مو تنسون اليوم نتعشى بالسطح

باوعت عليها ورفعت راسها ومسحت دموعها
وكلتلها
.. يالله تعالي وياي حتى ابدل راح اطلع وية خالة ام مهيمن ومهيمن
اريد اخذ ذوقج بالملابس

مسحت دموعها وهمست بصوت واهن
.. تمام يالله امشي كدامي خلي نشوف شنو عندج ملابس

وصلنا لببيت الحجي ابو حيدر جان بمركز المدينة
وبيتهم كلش فخم ومرتب
استقبلونا الحجي ابو حيدر وابنه
سمعت مهيمن سلم عليه وكله.. هلا شلونك حيدر الحمدلله على سلامة ابنك

. واني وام مهيمن دخلنا جوة يم النسوان من باب المطبخ واستقبلتنا
ام حيدر واخته وبنية ثانية ما عرفتها وكعدنا بالصالة

بيتهم كان ضخم ما شاء الله مبينين اهل خير
وام مهيمن صارت تتحمدلهم عالسلامة.

وبدوا يحجون عن الحوادث وبعدين سمعنا صوت ولد صغير يبجي. واخت حيدر كامت

ام حيدر كالت .. خطية هذا مصطفى ابوه ما رضى يبقيه بالمستشفى
الدكتور نصحه يطلعه من المستشفى حتى الحرك ما يتلوث لان المستشفى بيها جرثومة

ام مهيمن.. خطية سودة علية
ام حيدر .. انا سمعت من الحجي انتي عندج معرفة
بطب العرب بالله ما تشوفينه
كامت الحجية ام حيدر
وام مهيمن هم كامت واني كمت وياهن

ورحنا مشينا وراها ودخلتنا بغرفة كلها ريحة ديتول

حاطين الولد على سرير مغلف كله نايلون بلاستك
مسوين عليه مثل الحجر الصحي

اخت حيدر كانت كلش حبابة عرفتني على اسمها
كان اسمها رغد

وانطلقنا اني وياها بالسوالف

ام مهيمنسالت باستغراب.. ام الولد وينها ما شفناها

ام حيدر .. والله يا ام مهيمن تعرفين ساعة الشيطان من تدخل بين اثنين تخرب الاكو. والماكو

وهذا حيدر من رجع وشاف ابنه محترك اتعارك وياها
وكاللها هاي السبب اهمالج ، وهي ما سكتت
وكلمة منها وكلمة منه تالي اخذها ووصلها لبيت أهلها ، وهسة هي زعلانة ببيت اهلها

وانا اريدج تحجين وية مهيمن هو صاحبه ويسمع كلامه
خلي يروح يرجع مرته خطية الولد مفرفح وهذا وضعه يريد امه

وهي تشوفيها كل شوية تتصل على ابنها تريد تشوفه

ام مهيمن .. الله يهدي سرهم والله كسر خاطري هذا الوليد

كامت ام مهيمن تعاين الحرك مالته

وكالت .. ياااا خية هذا بس زره محترك والحرك مو عميق لا تخافين وداعتج عندي خلطة دهون ان شاء الله
مسحة الرحمن بس يستمر عليها يطيب بأذن الله

ماكو واحد من جواريني وقرايبي استخدمها لخلطتي وما
حمد بيها
انا باجر ادزلج الخلطه بيد مهيمن واخذولي صورة
قبل لا تحطون الدهن وبعد ما تحطونه

حتى اشوف الفرق

ام حيدر .. انطيني رقمج حتى ارسلج صوره على الواتساب وتشوفيهم

ام مهيمن التفتت علية وكالت .. يمة نور انطيهم رقمج
حتى يرسلون الصورة انا نقالي قديم

رغد طلعت نقالها واني رديتلها رقمي وحفظته بجهازها

بعدما انطيتها رقمي رجعنا نكمل سوالفنا
احس بيها تشبه اسيل صديقتي نفس روحها الحلوة بالكلام
لفت انتباهي كلام ام حيدر وية خالة

ام حيدر .. اشو ما ندري عند مهيمن اخت هيج حلوة
وين كان ضامها علينا

ام مهيمن .. والله يا خية هي مو بس حلوة شكل هي حتى
حلوة اخلاق

صار وجهي ينطي الوان واتهربت منهم وشغلت روحي بالسوالف وية رغد

وورة ربع ساعة دك نقالي والمتصل مهيمن
.. الو هلا مهيمن
.. يالله طلعولي انا بالباب
.. ان شاء الله هسة اكول لخالة

انهيت الاتصال وكلت لأم مهيمن
.. خالة مهيمن اتصل ينتظرنا بالباب

ام مهيمن .. اي خالة يالله انتي سبقيني وروحي لاخوج
وانا جاية وراج
كامت ام مهيمن تلبس عبايتها

وام حيدر .. لا لا وين طالعين الله عليكم ابقوا يمنا
انتي وهاي الحلوة على العشا
ام مهيمن تلبس بعبايتها
.. ربي يعمر بيتكم يا خية هم يالله نتوكل
تعرفين طريقنا بعيد ومهيمن عنده شغل

اني كمت من مكاني ورغد كامت وياي حتى
توصلني للباب
سبقتني بكم خطوة دخلنا للمطبخ.
ولكيت واحد واكف بالمطبخ منطيني ظهره
كان يحجي ويباوع على شاشة التلفزيون كانت مقسمة بيها كاميرات مراقبة

اسمعه يكول .. اهوووو هم هذا الغثيث شعنده جاي هنا
بس لا جاي علمود يحرك فلمي عند الحجي

هو يحجي وانا تلقائياً. عيني صارت عالشاشة
ولكيت المقصود بالكلام اخوي مهيمن
صدك اتنرفزت وانقهرت

رغد جانت ما منتبهة على اخوها
كانت تلبس ملتهية تلبس بشالها حتى تطلع وياي

التفت علينا متفاجيء بوجودنا
اتسعت عيوني من شفته
هذا نفسه الشخص الي ساعدني بذاك اليوم

هو بقى يباوع علية مستغرب وجودي ببيتهم
رمش عيونه ما مصدك

حجة بدون ما ينتبه على روحه .. يا محاسن الصدف
حمامة بغداد حطت على بيتنا

اني بسرعة اتمالكت نفسي واتذكرت كلامه على مهيمن
باوعتله وخزرته يغيض

سمعت صوت خالة اجتي وراي حجيت متعمدة
.. يالله خالة بالعجل مهيمن اخوية ينتظرنا
بالباب

هو انا كلت مهيمن اخوية وما اشوف الا هذا ضرب
كصته .. خرب بالحظ الاكشر
ودار وجهه وطلع برة المطبخ بسرعة

هههههههه حل يستاهل

طلعنا اني وخالتي ولكيته واكف يسولف وية مهيمن والحجي

رحنا صعدنا اني وخالتي بسيارة مهيمن

اباوع عليه كل شوية يباوع علية من جوة لجوة
خايف من مهيمن

انا خزرته ودرت وجهي عنه خلي يولي الحقير يحجي على اخوي مهيمن

جلال

.. هلو سلوان بشرني اشتريت النقال لخالي
.. اي جلال اشتريته مثلما كلتلي ونصبت له برنامج الفايبر وفعلت له الانترنيت
وصار تكدر تتصل عليه بأي وقت وتحجي وياه بمكالمة فديو

.. اي والله عاشت ايدك ما تدري شلون مشتاقلهم
.. ولك جلال لو تدري شكد مشتاقلك. يا عار ومشتاق لمغامراتنا

.. بس اصبرلي ضاملك مفاجئة انتظرني
بس يصير الي ببالي الا اراويك اماكن الي تتمنى بأحلامك تشوفها

.. اي ولك قبل لا انسى تعرف ابن الاسطى توفيق
.. اي هذا الهتلي شبي
.. ولك قبل يومين عثروا عليه مقتول

.. لا تكولها شنو السالفة اشو صاير القتل بفلس
.. والله يا جلال الوضع كلما اجاله يتدهور
جاوبته .. هو الوضع بالعراق العظيم كله تعبان

نور

دك نقالي برنة رسائل الواتساب
فتحت الرسالة وكانت من رقم غريب
مكتوب بيها
.. هلو نور اني رغد بنت الحجي ابو حيدر
ورسلت صورة كانت لرجلين ابن اخوها الصغير

جاوبتها .. هلا بيج حياتي رغود
جاوبتني .. نور هاي صورة مصطفى خلي خالة ام مهيمن تشوفها

وفعلاً رحت واخذت النقال لخالة وشافت الصورة
كالت كتبيلها خلي ترسلي صورة بعدما تحط الدهن
علمود اشوفه شلون صار

رديت لها كلام خالة وهي جاوبتني
.. حياتي نور راح نتعبكم ويانا
.. لا يا عيني تعبكم راحة امانة عليكم
أي وقت تحتاجون تراسلون خالة ام مهيمن اني نقالي موجود

وصدك من هذا اليوم اكتسبت صديقة جديدة حبابة
وصرنا دائما نتراسل بسوالف بنات

مرات تحشش وتضحكني لو ترسلي نكات
احس هاي البنية الله رسلها الي حتى تعوضني عن اسيل صديقتي
لان اسولة دائما مشغولة بدراسة الماجستير
وما فارغة مثل قبل وفوك هذا كله انتقلوا من مكانهم وسافروا استقروا بأربيل يعني التمت عليها دراسة والنقل

احلى شي برغد كامت ترسلي الاكلات الي تسويهم بيدها
تنطي لاخوها ابو راس اليابس وهو ينطيها لجلال

صحيح جلال يوصلها نصها طايرة لان غشاش
بس انعم الله عليه
يكلي شلون ما اشوف انا والمسكين عناد صرنا المرسال
مالت الخلفوكم

وكل مرة تريد ترسلي حاجة. تتصل علية تنطيني خبر
واليوم نفس الشي اتصلت علية
رغد بصوت خجول وبتردد
.. هلو نورة حبي رسلتلج الزيت مالت الشعر الي ردتيه بيد عناد وراح ينطي لجلال بس انتي اكدي عليه

.. يا عمري رغودة ليش تكلفين نفسج كليلي شكد سعره ترة والله ما اخذه
رغد.. احنا صديقات وما بينا هاي السوالف يالله خلي اروح امي صاحتني مع السلامة من تستخدمينه على شعرج كليلي بالنتيجة
.. اوكي حبيبتي تسلمين

وتعودنا اني وياها نتراسل شنو ناكل
وشنو نسوي نكص صور لأكلنا وللاماكن الي
نطلع لها وحدة ترسلها للثانية

واليوم سويتلها كيكة. لان اني اختصاص بالمعجنات
كلت انطيها لجلال

ابتسمت واني اتذكر كلامها البارحة
من فتحنا مواضيع الخطبة الزواج
هي سألتني عن عمري ومواليدي
واني هم سألتها كانت تقريبا اكبر مني بسنة

وسألتها
.. اكول رغودة شعجب ما متزوجة لحد الان
.. ماكو واحد اجة على المرام وانا اتعودت على دلال بيت اهلي والي يجون كلهم يردوني اسكن وية اهلهم

عوفج مني وكليلي انتي ليش ما متزوجة لحد الان

.. اني بالحقيقة محد دك بابي. شكلي ما يعجب العرسان
.. عميان وربي عميان
يعني بربج هذا الجمال كله وتكولين ما نعجب اني شنو اكول

.. لا تضوجين رغودة هانت ربج ما ينسى عبده
قبل فترة اجوني خطابة. ومنتظرين مهيمن بعده
يسأل عن الولد

رغد.. لالالا لالا لا. نور لا تستعجلين وتوافقين

عقدت حواجبي مستغربة وجاوبتها
.. ههههههه هو بالاول خلي تطلع موافقة الجهات العليا
ويقبل اخوية مهيمن والله كريم

رغد.. بعدج صغيرة على الزواج عفية لا توافقين
.. هههههههه والله كلامج ضحكني هو اني ما صدكت احصل عريس وانتي البطرانة جاية تكولين رفضي

اضحك على كلام رغد وقاطعتني خالة ام مهيمن بكلامها وياية
كانت كاعدة تطحن بخلطات الاعشاب الي تداوي بيها الناس وتعبيهم بكبسولات شفافة

ام مهيمن.. شكد عيب من اهل الولد لحد الان ما مرجعيلهم خبر كلما اسأل مهيمن يكلي بعد انطيني مجال اريد اسأل عن سابع جد للولد يالله انطي موافقتي
بالله عليج هذا شحجي وياه

گلبي يكوم يغرد من اشوف حرص مهيمن علية ربي ما يحرمني من حنانهم
.. خالة حقه لان هذا زواج مو لعب اكيد لازم يسأل ويتأكد من الولد واهله حتى يتطمن علية

جنا نحجي

دخلو علينا البنات راجعات من المدرسة

ريم جانت لازمة كارت درجاتها وتهفي بي على وجها
.. اوووووف والله حارة
حوراء دخلت وراها وكالت .. طبعاً تصير حارة من ورة درجاتج الزفت

الظاهر اليوم استلموا نتائج الفصل الاول
كمت من مكاني.. بالله شو خلي اشوف راويني

انطتني النتيجة وجان اشوف الخطوط الحمراء منورة النتيجة والدرجات الزفت

.. عزة بعينج ياريم اليوم شيخلصج من مهيمن

......

جلال
انهيت الاتصال وية. مهيمن
والتفتت على عناد
الي صاير اعصاب وكل شوية كايم على العمال

.. خير سالمين شبيك معصب
.. ما معصب يتخيلك
.. انت من لفيت للمعمل من الصبح والوجه مكلوب
ما تكلي شبيك

.. والله ما بية شي
بس اتعاركت وية اخوية اليوم
كمت من مكاني
.. يالله ابو الشباب مو تنسى توصي الحارس
علمود يتاكد من اقفال المعمل

كام وياية .. شنو وين رايح
.. شنو وين غير ارجع للبيت
.. اذا هيج انتظرني اخلص القوائم الي بيدي
ونروح انا وياك اوصلك بطريقي

رفعت حاجبي وكلتله
.. هاي شنو معرفتك والله ، من شوكت نزلت عليك الحنية
وصرت توصلني

عناد.. اكلك. بلا لغوة زايدة كلتلك اليوم اوصلك يعني اوصلك
لو اعرف اخذك سحل لبيتكم

ضحكت على شكله المعبس مااعرف ليش
.. عمي انعم الله تعال وصلني ما اكول لا ما يرد الكريم الا البخيل

بالطريق واحنا راجعين
عناد .. تدري انا نسيت اشكر مهيمن على وكفته وياي

باوعت عليه ورفعت حاجبي .. هاي شنو اليوم انت بايسون كلك حركات

اشو صاير كلش مؤدب ومحترم
من شوكت انت متصافي وية مهيمن
ليش مو جنت قبل كم يوم ضايج من مهيمن لان عرف بموقف العركة

عناد مسح وجهه وعدل نظاراته الشمسية
.. بالحقيقة كنت متوقع انه راح يحرك فلمي يم ابوي
لان تعرف انا وياه مو على توافق

بس اتفاجئت لهذا يومك ابوية واخواني ما عندهم علم
بأي شي صار وشكلي استعجلت بحكمي على مهيمن

طبطبت على كتفه وكلتله .. مو كلتلك لا تحكم على
ابو الهمة والله مو لان اخوي احمد بي گدامك

مهيمن شايل طيبت گلب ما شايلها احد بس هو ما يحب
يبين كدام احد هالشي وانا الي كدامك واحد من الناس

لحد هذا يومك ما شايف حنانه الا من ادور وجهي عنه
وانطي ظهري يالله اعرف بي

يعني عندك مثلا انا من بديت وياه الشغل لليوم
ولا مرة گلي كلمة (عفية )
ورغم شطارتي بالمعمل ولا مرة اسمعه يثني على شغلي

بس من وراية اتفاجيء اسمع من الناس ان مهيمن
وين ما يمشي يحجي بية ويتفاخر بشغلي كدام الناس

عناد.. الله يبلغنا من حنانه وطيبة گلبه
ضحكت .. شفت مو اكلك انت اليوم موطبيعي
تكلي ماكو شي شكلها شمس البصرة ضاربتك وساطرتك سطر

عناد.. والله يا صاح. شكلها هالمرة شمس بغداد
ضربتني
.. حييييييل شوداك على شمس بغداد صاير لعقلك شي

وصلنا لمنطقة مهيمن وباوعت عليه
نزلني براس الشارع لا تدخل السيارة الشارع كله
طسات

عناد.. لا يابة فدوة الك السيارة وراعيها
.. يا اخي ما اعرف ليش احس ورة كرمك وياي قصة
بس ما علينا نصبر ونشوف هذا الكرم الي نزل عليك فجاءة شنو غايته

ابتسم وكال .. ولك انا من يومي الناس تصيحني ابو الكرم لان انا كريم

.. لا انت مو كريم عناد ابو راس اليابس التيس

وصلنا يم باب بيت مهيمن
ونزلت وسلم علية وكال هاك قبل لا انسى
هاي العلاكة دزوها الاهل اخذتها منه
وراح

التفتت وشفت سجاد
ابن خال مهيمن واكف بالباب كان منطيني ظهره ومنطلق ديحجي بس ما عرفت ويامن يحجي

بس استوقفني اسم حوراء
بقيت واكف بمكاني اسمعه يكول
.. ولج حوري من فدوة رحت لهذا الطول. ما. الله يهديج
وتوافقين تتزوجيني

يتبع

اتمنى لكم قراءة ممتعة
مع تحيات اختكم نهى الحسون