قضية لم الشمل الفصل الثلاثون 30 - بقلم نهى

#الكاتبة_نهى_الحسون
#قضية_لم_الشمل

السلام عليكم ورحمة الله وبركاته
طاب مساءكم يا احبتي المتابعين
اشكر تفهمكم لتأخري عليكم بتنزيل البارت

جلال
خوف رعب فزع هذا كل الي احس بي
اتصالات ليل نهار وية بيت خالي وبالشافعات يالله اكدر احصلهم وينقطع بسرعة

اسمع اصوات البنات التوم وزوجة خالي الخايفة
اتمنى كون انا طير واروح يمهم

مهيمن .. ها جلال شنو الاخبار يمك يكولون حصلت خالك

.. اي والله حصلت خالي بس ما لحكت احجي وياه
وانقطع بس كل الي كدرت اعرفه ان هم بخير

.. ربي يطمنك عليهم
كنت احجي وية مهيمن
ودك نقالي وكان المتصل خالي
رديت بلهفة

.. الو ها خال هسة شلون بيكم راح تبقون هناك معلگين
حاوبني خالي
.. لا جلال ما اكدر ابقى. عندي بنات واولاد وخايف عليهم من هذولي الانذال خاف يوكعون عليهم

.. بس كلي شنو راح تسوي
.. قررنا انا وكم عائلة من اهل المنطقة. نطلع من الموصل بالخفية وياروح ما بعدج روح حتى بنتي

اسراء راح اجيبها وياي لان عيالها طلعوا كلهم من جماعة داعش ومتطوعين والبارحة اجوني يريدون
اتمم الزواج.

.. الله يلعنهم. زين تسوي اطلع من الموصل وجيبها وياك
شوف خال اذا طلعت من الموصل گبل تجي عالبصرة انا راح ااجرلكم بيت واجهزه. الكم من هسة

مهيمن كال .. وكله حتى يجيب وياه العوائل البقية

.. هذا هو تمام بس اكمل اموري والله يسهل علينا

.. لاتخاف. انا سمعت هواي عوائل نازحين
كدروا يطلعون من الموصل يعني انتوا مو اول ناس راح تطلعون

.. اي هو انا ليش اريد اطلع لان سمعت اكو ناس قبلنا كدروا يطلعون
كنا نحجي اني وخالي واسمع اصوات الصغار
يلعبون يمه. وگلبي رف عليهم

.. خال سلملنا على البنات وخالتي ومصطفى
وكللهم جلال ينتظركم ومحضر كل شي

.. ان شاء الله يوصل انهيت الاتصال وية خالي

وباوعت لمهيمن
.. اكول مهيمن انا اريد ادور على بيت للايجار كون قريب على بيتكم

مهيمن .. اعتبر نفسك اجرت بيت
سحب نقاله واتصل على واحد. من خواله وسأله على بيت ايجار بالمنطقة وخاله انطاه المعلومات
ورة فترة من تبادل المعلومات انهى الاتصال وباوع علية وكال

.. لكينا بيت وهسة تكدر تتطمن
لزمته من كتفه بأمتنان
.. مشكور وكفتك هاي ما انساها لك

رفع حاجبه .. مو كأنك زودتها شوية
.. ليش تكول هيج
.. ما اعرف اسأل روحك اشو كمت تشكر اخوك لان واكف وياك

انا اعرف مهيمن ضعيف بهيج امور ما يحب اظهار مشاعره مو بس هو حتى لاحظت خاله حسن هم جامد مثله ما يعبرون عن مشاعرهم
بس شايل گلب ابيض جبير يوسع هاي العوائل كلها

بس هاي الايام ما اعرف شبي احس جاي يعاني من مشكلة سألته بس هو اتهرب من الجواب وغير الموضوع

وصلنا لبيت الحاج ابو حيدر وطلعلنا حيدر وسلم علينا
حيدر.. ها جلال بشر حصلت بيت خالك

.. اي حصلتهم واتطمنت عليهم.
بس من خلال كلام خالي الخطر فوك رؤوسهم
ما يعرفون على اي ساعة ممكن يهجمون عليهم

اغلب مناطق الموصل صارت رماد
كعدنا بالاستقبال ودخلوا اخوان عناد وابوهم
وبالاخير دخل عناد

باوعت عليه وكلت
.. ولك عناد صاير تشبه داعش عيناً
انت ولحيتك لو اشمرك بينهم تضيع

رفع عيونه وباوع علية .. والله ياريت اروح للموصل
هناك واجاهد على الاقل افيد الوطن
اشو وجودي بالدنياً مضرة مو نفع

بعده عناد عايش بالذنب وكل كلام يربطه وياه
حجيت وياه
.. ولك عناد كول يا الله عوائل صغار وكبار وشباب جاي يرحون بالالاف
شوف مصايب الناس
وراح تهون عليك مصيبتك

عناد.. بس محد قتل اخوه
ابوه جاوبه .. اتعوذ من ابليس كرار كان يومه ومات

كان الاب يحجي بصوت واهن وحزين
وانت مالك دخل هذا قضاء وقدر ولا اعتراض على حكم الله

.. امنت بالله بس غصب عني مو بيدي
كون انا الميت ولا هو

غيرت الموضوع وكعدت احجيلهم على الي كاعد يصير بالموصل والعوائل
عناد سألني وكال .. شنو يعني صدك انت تريد تروح للموصل

.. بالحقيقة انا راح انطي مهلة لخالي
فد اسبوع اذا ما اجوي انا اسافرلهم بعد ما بيها مجال

.. اذا هيج فعلا ناوي تسوي احسب حسابي انا اروح وياك. لهناك
ما تلكة واحد مثلي بايع روحه

ابو حيدر.. بالله ما تسكتون انت وياه
هي مو لعبة ترة عالگة بين الجيش العراقي وداعش

مهيمن .. اي والله وانا سمعت اخذوا جنود من القوات البحرية من البصرة وسفروهم للجبهة هناك رغم مو اختصاصهم

ابو حيدر .. اي طبعاً يسون هيج لان احنا ما عندنا جيش نظامي

وعددهم جداً قليل عود هاي هسة احنا ببدايتها
والله يستر من الي الجاي

وعلى الموضوع لاحظت عناد بدأ يتفاعل ويحجي ويانا من غير ما ينتبه على نفسه

ريم

يكولون فراق الحبيب ماله طبيب ولا له دوى
صحيح لكن اني صار فراق الحبيب دافع لحتى اثبت لنفسي ان اني بكدها وراح اكدر انهض واعتمد على روحي

و راح ابدي من دراستي ادرس واخذ شهادتي
صار هذا الشي هاجسي الدائم اريد اثبت للكل اني
انسانة قوية مو مثلما هم يتصورون

بدت الامتحانات النهائية وبلش وقت الجد
كنت عازلة نفسي ادرس بالغرفة ما اطلع الا للحمام

حتى حوراء وياي كانت تدرس
نور كانت دائما تساعدنا وام مهيمن. دورها تجيب
بالاكل وما تلحك. كل شوية مدخلة علينا صينية اكل شكل تتوقع الاكل راح يرفع نسبة الذكاء عدنا مو نسبة الدهون وقبل لا تطلع تدعيلنا يالنجاح

لأول مرة بحياتي اخاف من الامتحانات
اليوم اول يوم من الامتحانات
بطني كامت توجعني حضرنا نفسنا اني وحوراء لكيت نور كاعدة قبلنا محضرة الريوك وام مهيمن كعدت تقرة علينا ايات وتعبر القران من فوق روسنا

كانت اجواء الامتحانات عندهم تختلف عن جو بيت عمو الله يرحمه كنت اروح وارجع من الامتحان قبل
ومحد ينتظرني غير بس ام محمود الكاهة منتظرتني تسألني عن الامتحان

اهتمام الاهل ينطي طاقة ايجابية وحماسية
سمعت صوت مهيمن رفعت راسي واجتي عيني بعينه
ولاؤل مرة ادير وجهي عنه قبل لا هو يبعد

سأل بصورة عامة .. ها شلونها المعنويات عندكم
حوراء جاوبته.. معنوياتنا نص ونص نشوف الاسئلة
وهي الي تحكم اما ترفع معنوياتنا او تحبطها

كان يحجي وية حور وانا مغلسة عليهم لازمة كتابي بيدي
ونور كاعدة يمي تسمعلي وتأكد على المرشحات

ام مهيمن.. خالة اكلي ودرسي
جاوبتها.. ما اكدر بطني توجعني يمكن اذا اكل اتقيء

مهيمن.. متأذية من شي

ما جاوبته نورجاوبته .. لا تخاف هاي لان امتحانات هيج توجعها بطنها

مهيمن ما كال شي كام من مكانه وكال لحوراء
من ترجعون من الامتحان اتصلي علية حتى تطمنوني

وطلع
ياربي الى متى گلبي يبقى يدك من يسمع نبرت صوته
هسة اني مو جاي اعامله ببرود وصد
مو المفروض اكرهه اشو گلبي رافعله علم لوحده

بعيد كل البعد عن تصرفاتي وقرارتي ابد ما يتفق
بدت موجة الامتحانات

وكل يوم اعيشه من الامتحان يعادل شهر من القلق والتوتر
مرت ايام الامتحانات والكل اتعاون علمود يوفرلنا اجواء الدراسة

خطية حتى جلال الي كان باله مشغول وية بيت خاله واوضاعهم
رغم ذلك فرغ نفسه وكعد يدرسنا

واتعودنا كلما نطلع من الامتحان نشوف مهيمن منتظرنا
يم باب المدرسة بسيارته

لاحظت على مهيمن بأخر اشهر بدأ يتغير بملابسه واناقته.
وصار اكثر من قبل ملفت للانتباه

غصب عني اراقب عيون الطالبات
خاف وحدة بيهم. تباوع عليه

وبعدين ارجع اذكر نفسي ان مهيمن مو الي
الي يشوف مظهري الخارجي ونظرات عيوني اللامبالية
يكول هنيالها ما يهمها اي شي

لكن لو يجون يشوفون گلبي شلون نار ينصدمون

صعدنا بالسيارة وسلم علينا
حور ردت عليه السلام واني كالعادة ما احجي
هو يظل يسأل حور عن الاسئلة.

مهيمن.. اخيراً اليوم اخر يوم خلصتوا من الامتحانات
حور.. اي والله بس ارجع اروح انام براحتي بدون ما اخاف

بأول ايام كان يسألني وكنت ما اجاوبه
وهو من عندها بطل يوجهلي اي سؤال
بس بنفس الوقت يظل يحوم حتى يحجي وياي

كال لحور .. اذا نجحتوا لكل وحدة بيكم راح تجيها هدية مني
حوراء فرحت وكامت تدعيله

وصلنا للبيت
ونور استقبلتنا ووجهها متوتر
مهيمن شافها وسألها .. شنو شبيج
نور .. مهيمن خالتي وزوجها جايين بالطريق

مهيمن.. اي هلا بيهم شبيج ضايجة
نور.. ما ضايجة بس همة فاجئوني يجيتهم بدون سابق انذار

نور

ما اعرف شصار بية من سمعت بيهم راح يجون
حسيت بخوف خبر وصولهم يهدد حياتي

وبأثناء ما كنت احجي وية مهيمن وابلغه عن قرب وصول خالتي

اندك الجرس
وكلت لمهيمن .. اتوقع همة اجوي لان جلال طلع يجيبهم

ريم وحور دخلوا يبدلون
وسمعت اصوات السلام ورحت استقبلت خالتي هي الوحيدة الي مشتاقتلها

دخلت عليهم بالاستقبال وخالتي بس شافتني حظنتني
و ظلت تبجي واني هم حظنتها وبجيت على حالها كانت كلش تعبانة

كعدوا بالاستقبال ومهيمن وامه قاموا بالواجب الضيافة
انتبهت لخالة سناء كل شوية تباوع علية متعجبة

وتكول .. نور ما شاء الله سمنانة وحليانة وهواي متغيرة بس نحو الاحسن طبعاً

كانت خالتي تحجي واتذكرت اول ما وصلت هنا ببيت مهيمن كنت ضعيفة و شكلي تعبان وحالتي حالة

حيييييل شكد مر علينا واتغيرت احوالنا
لفت انتباهي نظرات صابر المقززة

كان يحجي وية مهيمن وعيونه تبحلق بية من جوة لجوة
هو الثاني هم مستغرب على التغيير الي صار بية

سألت خالتي .. شعجب اجيتوا للبصرة شنو عندكم شغل هنا ومريتوا علينا

صابر .. لا ماعدنا شغل بالحقيقة احنا اجينا علمود نشوفج

بعدها صابر كام يحجي عن سبب زيارتهم

.. طبعاً احنا سويناها زيارة مفاجئة حتى نتطمن على وضع نور تعرفون هي بمثابة بتنا.

وگلنا بما ان السنة ما بقى عليها شي وتخلص
نريد نعرف نور وين راح تستقر

وبطريقنا حبينا نتأكد ان هي كاعدة بيت اخوها صدك مو بغير بيت

جلال الي كان جايبهم گله .. ترة مثلما اتفضلت وكلت احنا اخوانها يعني كلامك هذا ابدا مو بمحله وماله داعي

صابر.. لتضوج وتعصب ، انتوا هسة صرتوا اخوانها يعني مصارلكم هواي
واحنا الي ربيناها من الصغر والنا حق نخاف عليها اكثر منكم

مهيمن جاوبه.. صحيح محد ينكر فضلكم عليها بس هي هسه مو صغيرة صارت جبيرة تعرف تخاف على نفسها وتحافظ عليها
وعلى كل حال احنا هسه موجودين اخوانها ومنا ورايح اختنا احنا المسؤوليين عنها.

حتى بعدما تخلص السنة اختي تبقى يمي تعيش معززة ومكرمة
بيت اخوها بيتها ، وانتوا لهنا. كفيتوا ووفيتوا

خالتي حجت وكالت لمهيمن.. بس خلي ببالك. اذا سمعت فد يوم ان بنت اختي عايشة لوحدها ومحد منكم يمها انا بذاك الوكت الي الحق اخذها تعيش يمي

مهيمن.. بهاي الج حق تخافين عليها وتاخذيها عندج اذا شفتينا مقصرين بحقها وتاركيها وحدها مثل ماتكولين
بس طول ما انا عايش واشم الهوى اختي تعيش تحت ظلي. واظن انتوا تعرفون الاصول.

خالتي التفتت علية وسألتني .. خالة نور انتي مرتاحة هنا ولو انا على شنو اسأل مبينة عليج الراحة

للعصر وكاموا ورادوا يطلعون وام مهيمن لزمتهم
واني طلعت مبلغ من الفلوس الي مجمعتهم عندي

وانطيت منهم لخالتي وصابر عيونه ما وكعت بس من يدخل مهيمن لو جلال بسرعة يبعدها. عني

الله ياخذه شكد اكرهه ما احب انطق هاي الكلمة
لكن صابر يستحقها

طلعوا من بيتنا وام مهيمن كالت
.. ما اعرف ليش انا هذا رجل خالتج ولا ارتاحيتله
.. هو انسان تعبان وشالع گلب خالتي
.. الله يساعدها عليه بس بكل عقلها. خالتج جاية تطالب بيج هي ورجلها.
شنو واخوانج وين راحوا
عيب منهم هاي مو اصول ، هي ما لها حق تطالب بيج

بس مهيمن لان يستحي منها ما جاوبها جواب العشاير
والمعروف الاخ هو ولي امر البنية بعد ابوها.
وهو اولى بحماية اخته من اي واحد مو جاية هنا خايفة عليج
هي لازم تخاف عليج من هذا الخنيث الي وياها انتي شابة وهو واحد غريب وعيونه ما تنكسر من يباوع عليج ما يحشم المكان

جاوبتها .. خالة حبيبتي لتضوجين بس اريد اكوبج خالتي مالها لاحول ولا قوة
هذا الكلام كله. كلام صابر هو الي مدرسها شنو تكول

دخلت للبيت
ريم كانت تباوع علية بقلق واول ما دخلت للبيت
اجتي وركضت عليه وحضنتني بقوة وبجت

ريم .. لج نور عبالي اجوي حتى ياخذونج وانتي تروحين وياهم
سمعتهم يحجون بقرب أنتهاء مدة السنة الي بالوصية
وكلت وصلت النهاية وصار لازم كل واحد بينا.يشوف طريقه

يرجع لحياته القديمة.او يبدي حياة جديدة
واني بعدني ما مستعدة لحياتي الجديدة ولا اكدر بعد ارجع لحياتي القديمة

كان كلام ريم مثل الملح الي ينرش على جروحنا

مهيمن دخل للبيت وسمع كلامها وكال
.. ريم مسحي دموعج. نور ما راح تطلع من هذا البيت الا وهي عروسة.

رفعت راسها من حضني وباوعت لمهيمن وهمست من بين دموعها
.. شكراً

شكرته لان مهيمن كدر بكلمات بسيطة يهديء مخاوفها
دخلنا للغرفة وريم كالت

.. تعرفين نور اني من شنو خايفة
.. من شنو
.. خايفة تخلص السنة. وكل واحد منكم يتركني ويروح بطريقه
تعرفين اني كنت وية عمو وهو على فراش الموت وعدته ان احاول ان اساعدكم حتى تبقون مع بعضكم سوية. حتى بعد ما تخلص السنة

لكن مع الاسف التهيت اراقبكم شلون بدت تنبني علاقتكم سوية ونسيت نفسي
وتالي خلصت السنة واني ما عرفت ابقي نفسي وياكم
صفيت مع الاسف خارج نطاق هاي المجموعة

.. لا تحجين هيج بالعكس انتي المحور الي انبنت عليه علاقتنا
كنتي دائماً ويانا انطيتنا الفرصة حتى نتعرف على اب غائب طول عمره
ومن خلالج كدرت اعرف
ان ابوية كان انسان جداً. طيب لان تصرفاتج
مرايا عكست شخصية ابوية

ريم

عقارب الزمن تتقدم. وشارف بعضنا على الرحيل
لكل منا اتجاه وطريق سوف يسلكه

كل هاي الايام لازلت متحفظة جدا بتعاملي مع مهيمن
الي صار يوم عن يوم
يحاول ان يتقرب ويفتح موضوع وياية

لكن اني بكل مرة ابتعد عنه واقطع عليه المحاولة
هو لاحظ التغيير كل ظنه ان اني كنت مشغولة بالامتحانات ومختفية عنه بالغرفة

لكن بعدما خلصت الامتحانات والحال بقى على ما هو عليه
وهذا الشي اثار حفيظة مهيمن

كنت مثل كل مرة كاعدة وية حور بغرفتها
ونور كانت كاعدة ويانة.

دخل علينا مهيمن وكال بنات ممكن تطلعون برة عندي كلام مهم وخاص وية ريم اريد احجيه

حور ونور كاموا من مكانهم نور كانت مبتسمة
شكلها عندها علم بالشي الخاص الي مهيمن يريد يحجي
لكن اني استوقفتهم وكلت

.. لحظة بنات ولا وحدة بيكم تطلع
باوعت عليه وكلت

.. اني مستحيل ابقى وية مهيمن بغرفة لوحدنا
هذا الشي ما يجوز وعيب على البنية تبقى لوحدها بغرفة وية رجل
مو هاي الاصول لو اني غلطانة

حور ونور يباوعون علية مصدومات من كلامي

مهيمن بغيض وامستغرب.. شكو ريم انا مو اي رجل انا ابن عمج. وانتي متعودة علية. والكلام الي اريد احجي وياج خاص ما اريد احد يسمعه غيرج واريدج انتي الي تقررين

.. حتى لو اني هذا الي عندي اذا تريد شي مني
تكدر تحجي كدامهم بالنهاية نور وحور اخواتك مو غريبة
اني بعد ما عندي ثقة بأي شخص وخصوصاً انت

دائما تدين تصرفاتي وتنسبها للغلط والعيب وتكول
ما تعرفين تتصرفين

وهسة من اريد اسوي الصحيح انت معترض اكدر اعرف شنو تريد بالضبط مني

مهيمن .. ريم كبري عقلج ولا تقفلين
هو انتي لو مندفعة لو متحفضة

يعني لو ابيض لو اسود ما عندج حل وسط
جاي اكلج يابنت الحلال الشي الي اريد احجي وياج خاص بيني وبينج
ما احب احد يسمعه غيرج انتي ، ليش تعقدين الامور

.. اعتذر اني ما اتذكر عندي شي خاص بيني وبينك ومستحيل يصير فلا تتعب نفسك

مهيمن وهاي كدام البنات احب انوه على شغلة
. اتمنى تعوفني بحالي وتسهل علية حياتي وياكم ما اريد كل شوية

داخل علية بالغرفة. هذا الشي يضايقني
صحيح هي غرفة اخواتك والك الحق شوكت ما يعجبك تدخلها

لكن لاتنسى اني وياهم موجودة ، واني عندي خصوصيات ما اقبل اي واحد يتطلع عليها

مهيمن بغضب .. ولج ريم انا مو اي واحد انتي شكاعد تحجين انتي منو. ماجاي اعرفج

جاوبته بكل برود .. اني ريم الجديدة. وذيج القديمة ماتت انت قتلتها بأيدك

بالمناسبة نسيت اشكرك على هذا الشي لان الفضل يرجع الك بوجود ريم الجديدة

فلا تجي تطالبني بيها هسه وانت كنت في يوم من الايام
مستعار من تصرفاتها ومعترض على اسلوبها بالحياة

مهيمن اتمنى تحترم قراري وتطلع من حياتي وتتركني بحال سبيلي

نور قاطعت كلامي.. ريم لحظة اتمنى تنطين فرصة
لان مهيمن عنده شي كلش مهم يريد يحجي وياج

مهيمن قاطعها بكبرياء وكال
.. لا نور عوفيها ريم ما طلبت غير حقها

باوع علية وكال
.. هذا هو يابنت عمي يجرالج التردينه.
بعد ما راح اخليج تشوفين رگعة وجهي وراح ابتعد عنج
وعيونج تشوف

طلع من الغرفة والبيت كله
وحوراء راحت تركض وراه

نور.. ليش هيج سويتي ريم مو مهيمن راد يفتحلج گلبه
ويحجليج كان منتظر هاي اللحظة تخلصين امتحانات
ليش صديتيه وبعدتيه عنج

جاوبتها.. نور الي انكسر عمره ما يتصلح
واذا يتصلح فراح تشوفينه كله عيوب واثار
مهيمن بيده هدم كل شي لحد يلومني من اصده

نور

اليوم كلنا كاعدين ننتظر النتائج على احر من الجمر
ريم وحور عيونهم شاخصة على شاشة النقال

جلال طلع وكللهم انا رايح لأقرب مكتب اخليهم يطلعون النتائج بسرعة

بس بشرط اريد البشارة
ريم جاوبته .. والله اذا نجحت نذر علية. على كولت خالة اعزمك على عشا بالمطعم

.. هاي هي ما دام صار بيها عشا معناها راح تدللني باربي.
زين يصير اجيب وياي فيلق بيت خالي
حتى يتعشون واطلعج كسر

ريم .. والله حتى بيت خالك وراح انتظرهم من يجون اعزمكم بعد شتريد
اكو احلى من هيج هدية

.. لا والله ماكو اكرم منج

التفت على حوراء وكال
.. وانت جعفوري شنو بشارتي من اجيب النتيجة

حوراء بغرور وكالت .. بشارتك اسويلك احلى برياني
من ايدية عمرك ما ماكل منه. وبشرط وياك فيلق بيت خالك كلهم ياكلون منه بعد شتريد

.. اكلكم شنو قضيتكم وية الاكل معقولة شكلي يوحي
بالمجاعة حتى انتوا نزلتوا علية بالاكل

ريم بتوتر .. يالله عفية جلال. روح جيب النتيجة
والله كلبي على نار

رحت عليه ودفعته وطلعته من البيت
.. جلال روح لا تكعد تلعب بأعصابهن خطية

وبهاي الاثناء دخلت ام مهيمن ووجهّها ما يتفسر
كنا وحدة تباوع لوجه الثانية بتساؤل

.. شنو شبيها خالة هي وين كانت طالعة
حوراء صافنة على امها وجاوبتني
.. والله ما اعرف شبيها بس هي كانت ببيت خالي حسن
شوفي شنو صاير

تركنا ام مهيمن دخلت للهول لوحدها وانا والبنات
بقينا ننتظر جلال بالمطبخ

وبعد انتظار دام نص ساعة
ريم تتصل على جلال بس ما يرد عليها
اندك الباب وحوراء راحت تركض تفتحه

وكان جلال ووياه مهيمن
واني وريم وكفنا نباوع بترقب على جلال

جلال صاح بصوت عالي وكال
.. حوراء الف مبرررروك والله رفعتي راسنا معدلج
٩٤ وكسور

حوراء صرخت بفرحة وراحت ركضت حضنت مهيمن الي كانت نظرات عيونه كلها فرح
وفخر بأخته

ريم الي بقت جامدة من الخوف
سألته .. جلال وريم شنو طلعت

دنك جلال بحزن ورفع راسه وكال
بصوت خرعنا كلنا وكال
.. لج باااااااربي واخيرااااااا نجحتي

هو كال ناجحة وهي ريم اغمى عليها
واول الواصلين لها مهيمن وركضنا
جبنا كلاص ماي ورشينا على وجهها

ومهيمن يطبطب على خدها بخوف

فتحت عيونها وكعدت ترمشهم دايخة وسألت
جلال.. كول والله ناجحة

جلال باس ايده وحطها على كصته وكال
.. ولج باربي شبيج فضحتينا يعني الله وكيلج ناجحة
بس بالدفرات كلها ستينات وتايرات يعني عالحافة

يعني لو بس انفخ عليج توكعين

وهي بعدها تباوع على جلال ضحك وكال لاباربي اضحك وياج
والله معرفتج معدلج واحد وسبعين

مهيمن بصوت رزين باوع لريم وكال برسمية
.. الف مبروك ريم

وهي كامت تبجي من الفرحة
.. مهيمن اني نجحت واخيراً نجحت
كانت ريم تحجي بنصر
ورجعت تبجي وتحجي وية نفسها بصوت مسموع
لو عمو موجود كان فرح بنجاحي الله يرحمك باعمو
تعال شوف ريم شلون تغيرت

دخلت ام مهيمن وباركت للبنات وحضنت حوراء فرحانة بيها
بس بنفس الوقت كانت تخزر بمهيمن
بالحقيقة كلنا فرحانين بحوراء وحضنت ريم
وكالت عفية بالسباعية الج عندي هدية اشتريلج تراجي انتي وحور

اجة الليل ومهيمن سوى كباب شوي ووزعه عالبيوت
بمناسبة نجاح البنات

وبعد العشا كنا كلنا كاعدين بالهول
ومهيمن دخل علينا يريد يكعد يم امه مثل ما متعود كل يوم
باوع لوجه امه وسألها

.. خيرج يمة شبي وجهج شاحب

ام مهيمن.. لا تكول يمة
لا انا امك ولا اعرفك ولا تعرفني
ولا تجيني وتطلب رضاتي ولو عندي يمك خاطر من صدك تطاوعني وتخليني اروح اخطبلك بنت اخوي

كلنا اتفاجئتا بكلام ام مهيمن باوعت لريم راسا لكيت وجهها مابي تعابير بس كان اصفر

مهيمن ..يمة ليش تحجين وياية هيج
جاوبته بقهر .. يمة شتريد مني اسوي وانا اشوف بنت اخوي اليوم اجوها خطابة بقيت اطحن بنفسي من وراك
انا اليوم اجيتك واطلبك بحگ رباي بيك
اذا صدك انا امك تريح گلبي وتوافق

اباوع عليها تحجي وترجف من القهر والوجه شاحب
مهيمن كام على حيله وانطاها ظهره
وكال.. براحتج يمة سوي الي تردينه بعد ما عندي شي اخسره
لان الظاهر الي اريده خسرته من زمان

طلع وتركنا ام مهيمن سحبت نفس براحة وكالت
.. يمة هسة ارتاح گلبي

التفتت علينا وكالت
وهاي صارت الفرحة فرحتين
حضروا روحكم. باجر اخذكم واروح احجي وية اخوي
اخطب منه بنته واحجزها قبل لا يجون الناس يخطبونها

جلال

يوم ثاني

.. الو ها سلوان بشر شنو خالي شسوى طلع لو بعده
سلوان.. اي جلال اليوم طلع هو وكم عائلة من المنطقة

حطهم بسيارة الحمل مالته وغلفناها بجادر حتى ما يشوفوهم

وخالك ساق السيارة بيهم ادعيلهم الله يعبرهم سلامات
.. ان شاء الله

كنت احجي وية سلوان ودك نقالي بخط ثاني وكان المتصل خالي

.. سلوان غلقه هذا خالي يتصل
.. يالله روح وطمني عنهم

انهيت الاتصال من سلوان
ورديت بلهفة على خالي
.. ها خال بشرني
.. اتطمن تقريباً. راح نطلع من الموصل
اسمع اصوات رنين ورند يصحون جلاااااال اليوم
نشوفك
.. ان شاء الله اشوفكم واشبعكم حلويات
واشتريلكم العاب بس تعالوا

سألت خالي .. اكول خال العوائل وين
جاوبني .. صعدتهم كلهم ورة
جلال كلنا عفنا الغالي والنفيس في سبيل ننجوا بأرواحنا

.. تعالوا وانا راح استقبلكم ببوابة البصرة
انا وكم واحد راح يفتحون بيوتهم حتى يستقبلون العوائل
الي وياك

.. اي عفية عليك انا كلت لأم مصطفى جلال مجهزلنا كل شي حتى ما تاخذ وياها اي شي

ابتسمت وانا اباوع لمفاتيح البيت الي جهزته بيدي

.. يالله جلال انا لازم اغلق النقال
.. الله وياك بس خال مو تنسى تطمني عليكم وخلينا على اتصال

ريم

اثاري الكلام مو مثل الفعل
جذب الي يكول احب وانسى
وحذب الي يكول ما يمهني واقسى

وعادي خليه يروح ويبتعد
الي خلقه خلق غير شنو قابل بس هو بالكون
اي وبعد كلت لنفسي الحياة ما تبقى عليه
وانا راح اكدر اعيش بحياتي من دونه

بس اشو من صارت صدك وشفته نوى الرحيل وقرر يبتعد
اشو الروح تريد تهجر صاحبها

اليوم خالة ام مهيمن ومهيمن وحوراء يردون يرحون
لبيت خاله حسن حتى يحجون وياه بموضوع نغم

مريت من يم المرايا
وباوعت لوجهي من العام لهسة
شكد اتغيرت حياتي لا عدت اني ريم القديمة ولا اعرف
هاي ريم الجديدة الثنين جاي يعانون واثنينهم يحبون مهيمن ويدورون عليه بكل مكان
بس كل وحدة بيهم تحبه على طريفتها
.....................................

ريم
وين مااروح التفت
وجهك باقي بكل مكان
معطر بعطرك شما مر الزمان
والك بالكلب حسرة ومنك حرمان

گلبي ياعمري باقيلك وفي
لك بي شمعة ابد ماتنطفي
حتى لو گلبك قاسي وجفي
ابقى اني ذاك الوفي
وابقى بعد اطيب انسان

الغلطة غلطة گلب
حب الي مايحب
يركض وراه
يتمنى رضاه
واكبر مناه
يشم هواه
وهو لاهي ماحسبله بيوم ابد حسبان

فاركتك ويومها اني حلفت
بحبك الغالي وعليه اقسمت
ما اعود ولا ارجع
مهما الگلب يتوجع
يجيله يوم ويقنع
حبنا ابد ماينفع
ولا بعد ننجمع يوم بزمان

هدى سعد
....................................
نور

اليوم يجون بيت خال جلال واني گلت لجلال راح اسويلهم اكل واروح انظفلهم البيت وجهزه خطية
بس انتظر ام مهيمن ومهيمن وحور يطلعون لبيت خالهم اليوم مهيمن راح يفاتح خاله ويطلب ابد بنته نغم منه
نغم نجحت ومعدلها اعلى من معدل حوراء بدرجتين

كلها بكوم وريم بكوم والله گلبي ممرود عليها
اباوع عليها. كانت نظراتها
ضايعة وعيونها تراقب مهيمن الي كان يجهز بروحه
ويمشط شعره كدام مغسلة الحمام

شافني وكال .. كلي لجلال خلي ينتظرني من يريد يروح يجيب بيت خاله اريد اروح وياه انا وخوالي

جان يحجي وعيونه على ريم
جاوبته وكلت .. جلال فوك بالسطح ديتصل على سلوان

.. تمام انا رايح

دار وجهه وراح اتوجه للباب
اباوع لريم فتحت حلكها ومدت ايدها
تريد تستوقفه. لكن باللحظة الاخيرة غيرت رأيها وراحت دخلت لغرفة حور تبجي

ام مهيمن طلعت من غرفتها لابسة العباية وحوراء طلعت وراها ضايجة هي الثانية ما راضية على
الي يصير

رحت وراهم حتى اسد الباب ومهيمن همس يمي بصوت ناصي قبل لا يطلع وكال
.. روحي شوفي شبيها ريم
مو هذا الي رادته وكالت ابتعد عنها
هاي هي وانا رايح ابتعد عنها

سكتت ما جاوبته شي.
طلعوا وراح صعد بالسيارة وامه صعدت يمه بالصدر واخته ورة.

شغل السيارة. وبعده ما محرك
وجان نسمع صوت صياح جلال المفزوع
التفتت خايفة شنو شصار گلبي وكع بين رجلية

لحظات وكان يطلع جلال من باب المطبخ وهو يصيح مثل الطير المذبوح.
طلع يركض حافي بالشارع هايم على وجهه ويضرب على راسه يصيح بصوت منكوب

.. ولك مهيمن الحك علية. بيت خالي كلهم انقتلوا
كعد بالكاع
وصار يهل التراب على راسه ويردد
وينادي بأسماء بيت خاله واحد واحد

واحنا واكفين كلنا فوك راسه اني ومهيمن وريم وحوراء مصدومين بس انهار دموعنا تجري مانعرف شنكدر نسوي بهاي الفاجعة

ام مهيمن كاعدة يمة بالكاع ماخذته بحضنها وتبجي وياه

الى هنا يا احبتي اصل معكم الى نهاية الجزء الاول من قضية لم الشمل.

فشكراً لكم ولمتابعتكم
ودعمكم لي هو السبب بكل ما اقدمه لكم

يتبع

اتمنى لكم قراءة ممتعة
ولنا عودة ان شاء الله انتظروني
مع احداث الجزء الثاني

اختكم نهى الحسون