قضية لم الشمل الفصل الخامس وأربعون 45 - بقلم نهى

#الكاتبة_نهى_الحسون
#قضية_الشمل

صباح الانوار عليكم احبتي المتابعين 🌹🌹🌹

اقدم لكم اعتذاري عن الخلل الذي حصل بتنزيل البارت
بسبب تبديل النقال كان جديد ما متعودة عليه فصارت وياي هواي اخطاء بأثناء استخدامه بكتابة البارت

فلكم مني جزيل الشكر لكل المتابعات والمتابعين الذين تفهموا ظرفي وتعاونكم معي دليل على مدى ثقافتكم ووعيكم

بما ان البارحة لم يتم تنزيل البارت
فهذا البارت تعويض عنه
وطبعاً اليوم بالليل نبقى على نفس موعدنا بنزيل البارت ان شاء الله

جلال

كنت راجع للبيت وانا كلش متضايق

اتلقيت التعليمات من الضابط همام
بتجهيز نفسي والاستعداد حتى نباشر بتطبيق الخطة المتفق عليها
والموعد بعد يومين الساعة ب١٢ بالليل ندخل للبيت المقصود
بصفتي شخص مسؤل جاي يتونس

جاي اتعرض بهاي الفترة لحرب اعصاب
هواي امور شاغلة تفكيري وحارمتني من النوم

ووحدة من هاي الامور الي شاغلة بالي
مشكلتي وية عناد صارت عقيمة ونبهتني على شي كنت غافل عنه
وبدت تتراكم الافكار براسي واتحولت لمخاوف
اذا عناد صديقي هيج كانت ردت فعله
زين شلون بية اذا وصل الكلام لأذن مهيمن ويعرف بأبوطبرة
والله يحرك الدنيا على راسي

غمضت عيوني بتعب وانا اتذكر شكل عناد وصده
اليوم من دخلت للمعمل وشافني عناد

كان يحجي وية عامل
وكال .. اكو واحد يسوي سوايتك
انتبه ترة المكينة مو لعبة لازم تشغلها بعدما يطلع السلفان كله
مو وهي تشتغل تسحبه هيج يصير تلف بالسلفان

جاوبه العامل .. صار استاذ عناد
جاوبه. .. عفية تعب روحك شوية واكراميتك موجودة
ابتسم العامل وكال .. ما تقصر كلك خير وبركة

سلمت والعمال وعناد باوع علية ودار وجهه ما رد السلام
وكمل كلامه وية العامل وكال
بصوت يسّمعني وهو يحجي وية العامل .. انتبه بابا انتبه
الله انطاك عقل لو لا.
اشو صاير تعرف وتحرف معقولة انت لهاي الدرجة اثول
ما تميز الزين من الشين

العامل يباوع على عناد مستغرب
انقلابه هسة جان يحجي طبيعي شگلبه

عرفت كان يقصدني الي بهذا الحجي
اتقدمت عليه وكلت .. عناد عندك شي احجي تعال احجي وياي لا تظل تلف وتدور جنك بزونة مضيعة جهالها

.. انطاني ظهره وكال
.. من تصير واحد ادمي وتحط عقلك براسك عود احجي وياك

تركني وراح دخل للمكتب
احس صرت نار كبرة والله من كثر الضغوط راح اطك واموت

منا ضغوط العمل السري وية الضابط همام والتفكير راح يقتلني
ومنا شايل هم شلون راح ابقى محافظ عالسرية وية اهلي

ونوب فوك هذا كله عركة عناد اجة وگلب كل الموازين
وفتح علية باب جنت احاول اتجاهله

بس اريد اعرف عناد شلون عرف بأبو طبرة
اكيد اكو ناس وصلوله هذا الحجي
وكالوا انا مصاحب واحد تعبان وسمعته بالحضيض

اااااخ بالله شحطلها وتطيب
اكيد مهيمن اذا سمع ما راح يسكت من يعرف اخوه مرافق واحد خريج سجون بنظر المجتمع هالشي راح يمس سمعته

انتبهت لروحي جنت امشي بشارع
ما مبلط كله طسات وحفر يشبه حياتي

ريم
عطلة كاعدين بالبيت وانا والبنات كل يوم مسوين فعالية حتى نرفه عن نفسنا ساعة اكعد وية نور وحور واسويلهم ميك اب

ومرات نكعد نجرب نلبس كل ملابسنا وخصوصاً عن قريب
بيت اخو ام مهيمن راح يزوج ابنه الكبير على بنت خاله

وحوراء كل شوية تلبس من ملابسي وتكعد تستعرض بيهم متعجبة
بالحقيقة ملابسي مو مثل موديل ملابس حور

سألتها واني تفكيري شارد لبعيد
.. اي حور كملي شنو سوى ابن خالج محمد من كالوا ابن عمها
يريدها

كنت اسأل حور عن قصة حب ابن خالها اسمه محمد الي
خطب بنت خاله اسمها رشا
كان ابن عمها ناهي عليها

حور.. لج سكتي ما كلتلج شسوى محمد من درة بالنهوى
المشكلة. هو من جان صغير خاله اخو امه يكله بنتي الك ماتصير لغيرك
وهو محمد بنى حبه وكبر ورسم وخطط حياته كلها وهو متأكد رشا
اله

بس اشو هي كبرت وحلت بعين ابن عمها ووكف بوجه ابو رشا وكله بنت عمي الي

ومحمد سمع بالحجي راح هد على ابن خاله اسمه امين
الي يصير نفسه ابن عم رشا الناهي عليها

ولج تالي صارت هوسة وخبصة
بس مو هنا الحجي هي كلها بكوم وطلعت محمد بيوم
كعد يصيح بالشارع يم باب بيت اهل رشا بعالي صوته
واكف كدام امين

.. ولك امين هذا كدامك راح احجيها بعالي صوتي
اي انا احب رشيوة بنت خالي. وان جان انك صدك زلمة

هذا انا واكف كدامك تعال اذبحني
وصارت لخة واكتلني واكتلك وكل هذا محمد يصيح
احبنها .. احبنها

هي كانت تحجي واني عيوني سرحانة ورايحة بغير وادي اجر حسرات ولهانة

حور.. ها خير اشو صرنا نجر حسرات
.. حلوة قصة حبهم
تدرين حور كنت اتمنى اعيش هيج قصة حب
يجي واحد يتحدى الكل علمودي ويصيح احبها ويسمعني كلام بالحب

غمضت عيوني واني اتذكر حبي لمهيمن وجفاف تعامله وياي

كملت كلامي .. سبحان الله محمد عكس اخوج مهيمن
ذاك كتلة مشاعر متحركة.
واخوج كتلة حجار صلبة خالية من المشاعر

حور.. وشبي عيني اخوية.
مو وكف كدام خواطيبج وكال ريم خطيبتي

باوعت عليها وكلت.. حور هذا ما يدل على شي ومنو يكول هو يريد يتزوجني علمود حب
اشو ما سمعناها منه لا بالكلام ولا شفناها بافعاله

اتخيلي هو حتى طريقة خطوبته تشبهه مثله جافة خالية من المشاعر
اكتفى بأعلان جملة ريم بنت عمي وانا اولى بيها من الغريب
انا اصونها واحرص عليها اكثر من الغريب

وهذا كلامه اذا دل على شي
فهو الشعور بالمسؤلية بتجاهي بس
يعني لا اكثر ولا اقل

حور.. لا حبيبتي انتي غلطانة مو مهيمن الي يربط نفسه ويتزوج علمود هيج سبب
مهيمن ما يحب يكشف مشاعره. ما يوم سمعت منه
كلمة اختي حبيبتي او كلمة تدل على المحبة

لكن بنفس الوقت اعرف كلش زين مهيمن يحبني لدرجة
ينكسر ظهره بالعمالة حتى يشتريلي صدرية للمدرسة وحذاء جديد
يكفي يزّعل الدنيا كلها اذا اني زعلت بيوم
وما يرتاح الا يراضيني

.. ههههه المعادلة معكوسة يمي ما يرتاح الا يبجيني

لكن گلبي جان يحجي لوحده
.. زين وانا شوكت يطولني هذا الحنان
اوووف

حوراء .. هسة عوفج من هالحجب وكليلي شنو رايج بهذا
حلو لولا يعني البسه بالعرس

.. اي والله حلو عليج يجنن

كانت منبهرة تباوع لروحها بالمرايا وتكول
.. ولج ريم اتخيلي هسة اطلع اتمشى كدام زهرة بهذني الملابس مفرعة برأيج شنو راح تسوي

.. عفية حور ستري علينا وكعدي ترة هي متحلفة بيج مو عبالج
موضوع حفافة حواجبج يعدي اليوم على خير

.. اااوف سكتي لا تذكريني ولج والله خفت عليها من
شهكت اول ما شافت حواجبي محفوفات
غير رادت تنجلط

ابتسمت وانا اتذكر شلون قبل شوية
قنعت حور تحف وجهّة من رحنا اني وياها ونور للصالون

ام مهيمن وصلتنا للصالون وكالت انا رايحة من تخلصون اتصلن علية اجي اخذكم لان ما بية حيل كعدة انا رايحة لبيت اخوي

وبالصالون هناك لحيت على حور وام الصالون هم شجعتها وكالت
.. والله لو تسلميني حواجبج غير اتفنن بيهم
وتصيرين غير شكل خلقتج تنگلب گلاب

وحجاية مني وحجاية من ام الصالون وحور هي من غير كلشي ما تحتاج تشجيع تريد تحف من زمان
حواجبها وكانت نور الوحيدة معارضة وكالت

.. لا حور لا تتصرفين من يمج خلي بالاول اتصل على خالة
واشوف شنو تكول

رحت يمها بسرعة واخذت النقال من ايد نور وكلت
.. بربج نور راح تتصلين على ام مهيمن

اكيد راح تكول لا ما تحف

الله عليج باوعي لحواجبها شلون مغيمات على وجههة
يعني دخلت كلية طب وامج ما ناوية تحن عليها

ولو تشوفين البنات بالكلية شنو مسويات بروحهم

.. بس ام مهيمن ما تعترف بشي اسمه كلية وبنات
كلمن وتفكيره
يالله رجعيلي النقال خلي اتصل عليها

حور.. اوووف
عاندت .. لا ما انطي خلي ام الصالون تحفها ونخلي خالة امام الامر الواقع
يعني شنو تريد تسوي تعصب شوية وتنسى قابل هي جريمة

بس فاجئتنا ام مهيمن بردت فعلها الكارثية
سوتنا مجرمات خارجات عن القانون

شمرت حور علية الملابس
وكالت .. هسة شلون راح نبقى خاتلات بالغرفة

.. اني عني دمي مهدور لان اني الي حرضتج عالحفافة
.. يعني الحاف والمحفوف عليه ثنينهم مسحلوين

دخلت نور للغرفة وهي محملة كومة ملابس

سمعنا صوت مهيمن
يسألها قبل لا تدخل

.. شنو هالهوسة جاي تطلعون الملابس الصيفية لو عندكم حلفة

.. لا جاي نشوف ملابسنا حتى نختار شنو نلبس بعرس محمد
.. بس محمد بقى لعرسه اسبوع يعني بعد وكت انتوا شعندكم
من هسة حاركات الجو

كان مهيمن جاي من الشغل
ام مهيمن .. يايمة مهيمن بعدك ما شفت شي
هاي كل يوم احنا على هالخبصة من ورة بنت عمك
والله جانت الكلية ساترة علينا
وملهيتهن عن المصايب

كانت ام مهيمن تحجي مقهورة وية مهيمن
كنت بعدني خاتلة بالغرفة بالحقيقة ما اتجرأ اطلع واراويها وجهي
يمكن اذا تشوفني تخنكني

.. ليش شنو صاير
.. ولك يمة اليوم بنت عمك سوت سواية هي واختك الغبرة
سوايا ما تتسولف

.. شنو يمة احجي وكعتي گلبي
وبعدها صاح علينا بصوت عال

.. حور .. ريم بالله شو تعالوا شبيها امي

انا وياها واكفات ورة الباب حور حجت
.. عززززة اجاك الموت يا كاطع الصلاة
مهيمن يصيح علينا شلون هسة يشوف وجهي

.. شنو شلون
ترة احنا ما مسوين شي غلط

فتحت الباب وطلعت من الغرفة
ورحت يمهم

وحوراء اجتي وراي
ام مهيمن شافتها وكالت .. ها ولج هم الج عين وتطلعين
ولج انتي شكد گوية عين وما تنكدرين

.. يمة دخيل الله شنو السالفة فهميني شنو الموضوع
جاوبته امه .. باوع لوجه اختك وانت تعرف

مهيمن باوع على وجه حور ونوب كال مستغرب .. شنو شبي وجهة

ام مهيمن .. يعني ماكو تغيير بوجههة
رجع يتمعن بوجه حور وسألها
.. شنو ولج صايرة تحطين مكياج !!!

هو كال هيج وانا ضربت كصتي
.. احلف والله مرتين عود هسة انت حزرتها للسالفة ..

ام مهيمن جاوبته .. يايمة ياريت لو حاطة مكياج هم نمسحه
ولا حافة حواجبها وزالغة وجههة زلغ الي يشوفها يكول تدور على رجل تريد تعرس.

هي كالت هيج وانا عيوني نطت من مكانها معقولة
لا لا مستحيل
هاي العائلة راح تجلطني
الام ترفع والاخ يكب
واحد اضرب من الثاني على اساس

مهيمن باوع على امه بغضب وكال
.. ترة يمة السالفة واكفة ما تسوى ترة الله وكيلج كل البنات يسوون هيج انتي
لو شايفة البنات الي يجون يمنا بالسوك
وحدتهم لاعبة طوبة بوجههة تكولين اليوم عرس ابوها

ام مهيمن .. هو ما خرب اختك غير هذا الحجي مالتك
انت خالها على حل شعرها وهاي النتيجة حفت بدون علمي اليوم
حفت باجر الله يعلم شنو تسوي

مهيمن جاوبها .. شنو السالفة وين الربط بالموضوع شنو علاقة الحفافة بالاخلاق يمة ترى انتي هواي معظمة الامور

همة يحجون وانا النار كامت تفور بگلبي يعني حضرته يبصبص عالبنات مستر حجر طلع عنده عين زايغة عالنسوان
ويتمعن بيهن ويمكن حتى ينعجب بيهن
والله يعلم شنو يسوي بعد

خلص اليوم كله وانا اتگلب بناري
دخلت للمطبخ ولكيت ست حور كاعدة

سألتها بصوت ناصي .. اكيد منتظرة جية جلال للبيت على احر من الجمر حتى يشوف
التغيير صح كلامي لو صحيح

التفتت علية بارتباك كالت .. عمى بعينج ياعوبة شوف شلون راح تفضحني

.. لا تخافين سرج ببير انا ما اكول لاحد حوراء كل شوية تباوع للساعة تنتظر جية الحبيب

.. بعد .. بعد احجي قصة موتي وياج لان راح يصير كتلي رفس اذا استمريتي بالحجي

كنا نحجي انا وحوراء ومر من يمنا مهيمن كان يحجي بالنقال وشايل بيده فايل بي اوراق

.. شوف مثلما وصيتك تبقى وراه وين ما يروح .....

كان يحجي وكمل طريقة لداخل البيت
انا وحوراء وحدة باوعت للثانية

حوراء.. مهيمن ما عاجبني هاليومين وجهه مغيم مثل الي عنده حسبة براسه

جاوبتها وزني اگلب بعيوني .. هو اخوج من يوم يومه مكطوعة عنده الكهرباء ومظلم دومه هيج شنو الجديد

.. عوبة اشو صاير اخوي ما يعجب حضرتج هاي الايام

كنا نحجي ودخل جلال وسلم علينا

.. ها هلو بنات شلونكم
جان يسلم وعيونه على حور

.. واخيراً شرف اخو مهيمن الولد الضال

سألني وعيونه بعدها على حور .. شنو شبيج باربي منو دايس على ذيلج

.. محد دايس على ذيلي.
بس يا اخي عنيت علينا صرنا ما نشوفك. انت حتى بطلت ما كمت
تشتريلنا بيتزا مثل ايام قبل

.. حقج علينا باربي نصيرلج بيتزا لخاطر عيونج الحلوة.

عقدت حواجبي وانا اباوع عليه هو وحور
واحد يباوع للثاني الاخت توزع ابتسامات من جوة لجوة
والاخ يوزع نظرات وانا كاعدة بينهم مثل الطنطل

والحلو بالموضوع يحجي وياي وهو عيونه تعاين بوجههة
ابتسمت على شكلهم
وسألته .. اكول صدك جلال ما لاحظت فرق على وجه حور

باوع بوجههة وكال .. هو انا احس اكو تغيير بس ما اعرف هو شنو
وجههة منور
شنو غاسلة وجها بصابون رگي

هو گال هيج وانا طكيتها ضحكة .. خرب يومك جلال انت فلم
عمي يتر الله على مهيمن على الاقل
اخوك عباله حاطة ميك اب

حوراء برطمت شفايفها بزعل وكامت من مكانها وانطته ظهرهز وكالت .. صابون ركي يحرك عيونك يا احول

كنت اضحك .. لاجلال ما حزرت
باوعت علية وكالت .. عوفي ريم لا تحجين وياه خليه على عماه
طبعاً حقه هو وين يشوف دربه اذا اربعة وعشرين ساعة عنده شغل

كانت حوراء تحجي وياي وجلال واكف وراها يأشرلي يريدني اغششه

ابتسمت وحركت حواجبي واشرت براسي عليها
هو ضرب كصته وكال .. لج حور شبيج زعلتي جاي اتشاقة وياج
انا عرفت بيج مسوية حواجبج وطالعة ما شاء الله گمر
هي من غير كلشي عيونج مدوختني

كنت دائما اكون متواجدة بلقاءات حور وجلال
بمثابة وسيط الحب الي يشكل حلقة وصل بين الحبيبن

دخل مهيمن للمطبخ وطفر جلال من مكانه وعدل وكفته وجلة صوته وكال متفاجيء

.. هاي شنو مهيمن انت هنا عبالي بمكتب المهندس
مهيمن جاوبه وكال .. هسة رجعت منه وانطاني الخريطة
اريدك تجي وياي حتى تشوف القطعة والمهندس يفهمك

جلال .. بالله شو راويني خلي اشوف الخريطة
فتحها وحطها على الميز ومهيمن صاح لأمه

.. يالله يمة استعجلي اجة جلال هم يالله نروح
دخلت نور وهي لابسة جبتها وكالت .. اجتي خالة

.. شنو وين رايحين
نور جاوبتني .. راح ياخذنا مهيمن اني وامه علمود نشوف القطعة مال جلال. وخالة كالت تريد تشوفها وتباركله بيها

اجتي ام مهيمن وطلعوا كلهم
وبقينا انا وحور المطنكرة

.. عابتله كسر جناحاتي يكلي غاسلة وجهج اليوم
لحظات ودخل علينا جلال بسرعة وهو يباوع للخلف

فرش الخريطة كدام حور عالميز وسألها
اكول بسرعة احجي وانطيني رأيج
اشر على مربع بمخطط خريطة البيت وكال

.. حور شنو تكولين احط غرفة النوم هنا . لو هناك

حوراء جاوبته بزعل وكالت.. واني شكو جاي تسألني متكلي

باوع وراه ورجع باوع عليها وكال يستعجلها .. ولج حور عفتهم
واكفين بالشارع ينتظروني ودخلت بحجة نسيت نقالي
علمود تنطيني رأيج

گلبت عيونها وهو لم الخريطة وكال
.. هو مو صوجج انا رايح بع.......

راد يروح وهي كمزت من مكانها بأستعجال وهي تأشر على مكان الغرفة وكالت بصوت ناصي .. ااااا لحظة جلولي حطها هناك احسن حتى لاتصير بالوجه

لمعت عيونه وضحك وكال .. اي هيج من الاول وبردي گلبي
لو ما تجين الا بالعين الحمرة

جلال
رحنا شفنا القطعة وام مهيمن كعدت تدعيلي وتباركلي بيها
وتقرة ايات عن العين

كنت اباوع لمهيمن شلون كاعد يشرح لنور ترتيب الخريطة عالقطعة

انا لازم اليوم اكعد واحجي وية مهيمن عن سالفة الاستخبارات وابوطبرة
حتى يكون عنده علم من يوصله حجي الناس ما يقتهمه غلط

بس هواي متردد لا يعترض طريقي
ومو بعيد عليه يخيرني بين السفر وبينه هو ونور
حتى يمنعني اروح للموصل

دك نقالي واحنا راجعين بالطريق للبيت والمتصل كان ابو طبرة
جاوبته .. هلا شلون اغاني
ابوطبرة.. ها يمك اهلك
. اي والله كول اتفضل امر خدمة

.. ضروري تحضر حتى تاخذ وياك التقرير
ونتفق على خطة الحفلة باجر
.. تأمر انا ما راح اتأخر جاي بالطريق

انهيت الاتصال وباوعت عليهم وكلت
.. انا اترخص صارت عندي شغلة بس ما راح اتأخر

مهيمن سألني .. وشنو هالشغلة
.. صاحبي اتصل علية يكول متلاغي وية ابوه

كال .. مو تتأخر انتظرك حتى نراجع القوائم وسجلات المعمل
وتفهمني. كم مكينة يحتاحلها صيانة
.. تمام ما راح اتأخر

تركتهم ورحت لابو طبرة للكهوة الكوفي وكعدنا
بمكانا المعتاد ودحام كالعادة يبقى يحوم حولنا يراقب المكان

وهمام بلش يملي علية خطوات تحرك الخطة وشنو المطلوب مني
كنت مركز وية كل كلمة يكولها.
همام ختم كلامه وكال .. جلال اذا اليوم بلعوا الطعم
اعتبر المهمة تمت بنجاح هاي اصعب مرحلة تعتبر
لان هنا بلع الطعم يعني تتوغل بينهم وتصير منهم وبيهم

.. زين على هذا كلامك شوكت راح تخلص هاي المهمة

ضحك همام وكال .. انت عبالك هي ليلة ويوم بابا هيح امور
يحتاجلها طولت بال يعني تطبخ كل شي على نار هادئة

عقدت حواجبي مستغرب .. لعد شلون الضابط محمد علي
كال ما بقى شي على التحاقك وية داعش حتى بلغني اترك لحيتي
ما ازينها حتى

همام .. اي نعم فعلاً ما بقى شي وتصير داعشي
.. زين شلون والمهمة هاي مو كلت راح تطول

.. ترة تم ارسالك لهنا مو علمود تقوم بالمهمة وتممها
وانما انت كنت بمثابة ضيف مؤقت بس لتثبيت المواقف وتقوية
تكدر تكول دورة تطبيق هذا كل ما في الموضوع

يالله يا بطل اريدك اليوم بالليل تتأنق وتجهز روحك على حباية ونص
اكشخ ورتب نفسك واتهنى قبل لا تتحول لداعشي قذر

طلعت من يم همام ورحت كعدت يم شط العرب
اباوع لماي الشط كان الدنيا ليل
كنت افكر بطريقة محتار شلون افاتح بيها مهين
وبعد فترة طويلة من التفكير نهضت من مكاني
واتخذت قراري

وصلت للبيت ودكيت الجرس
قررت قبل لا افاتح مهيمن بالموضوع
بالاول احاول اجس نبضه واخذ رأيه واشوف وجهة نظره بالموضوع وعلى ضوء ردة فعله من الموقف راح اقرر
اصارحه او لا. بعد انا وحظي

انفتح الباب وطلع شاغل افكاري بوجهه الهاديء
شافني وصار على صفحة يفسحلي المجال حتى ادخل
وكال .. ها جلال كواك الله اشو اتأخرت

.. كنت يم صاحبي

.. زين انا مو كلت ترجع من وكت للبيت

دخلنا للبيت ولكيت ام مهيمن كاعدة لوحدها بالهول والبنات مو يمها
سلمت عليها وردت السلام ومهيمن كمل كلامه
.. متكلي ليش اتأخرت
.. مو كلتلك كنت يم صاحبي عنده مشكلة وطولت يمه

ام مهيمن قطعت كلامنا وسألتني .. اكلك خالة متعشي لو اصيح وحدة البنات تجي تصبلك عشا

.. لا خالة الحمدلله متعشي.

.. الف عافية خالة تريد اصبلك جاي
كانت كاعدة بالكاع ويمها صينية ببها قوري الجاي وكلاصات وعلبة الشكر
.. اي والله خالة صبيلي اجة بوكته

رحت كعدت بالكاع على صفحة واتكأت عالحايط واجة ومهيمن كعد بصفي وطلب من امه
.. يمة صبيلي وياج

رجع مهيمن باوع علية وسألني .. اي ما كلتلي ياهو هذا صاحبك اعرفه لو لا

وجاوبته .. واحد صاحبي ما تعرفه
هذا اتعرفت عليه من جنت مسافر

.. وشنو هي مشكلة صاحبك
لاتكول انت صرت حلال المشاكل من تالي وكت

باوعت عليه بتفكير هذا مهيمن من يومه يسأل ويحقق بكل صغيرة وجبيرة وما يفوته شي
وانا اعتبر نفسي جداً محظوظ ومسوي انجاز كبير
لان كدرت ان احافظ على السرية التامة لحد الان

من غير ما مهيمن يحس
هو احياناً يشك بوضعي ويتسائل هواي بس انا ما انطي مجال او سبب يخليه يشك غير بس فقرة التأخير عالبيت
بس تعال شلون بية اذا وصله الخبر
اكيد راح يكعد يحلل السالفة بكيفه

اخذ الجاي من امه وانطاني كلاصي
جاوبني بدون اقتناع .. هو ما طلب مني احل مشكلته
هو راد يأخذ رأيي بموضوع المشكلة
خطية كان عنده مشكلة وية اهله
وما يعرف شلون يتصرف

رفع حاجبه وكال .. بشنو ياخذ رأيك

.. خلي احجيلك شنو مشكلته بالاول وانت بعدين احكم وانطيني رأيك

.. كول اسمعك
.. بالحقيقة صاحبي
قبل فترة مو طويلة قرر ينظم ويلتحق بالاستخبارات
ودخل دورة تأهيل

.. اي وين المشكلة
.. مو هو اتخذ قراره والتحق بالاستخبارات وسوى هذا كله بدون علم اهله يعني من وراهم راح قدم

.. وشنو السبب الي يخليه يضم على اهله
مثل هيج شي ترة هو ما مسوي شي غلط

.. صبرك علية شوية جايك بالحجي
مو صاحبي من اتخرج الجهات المسؤلة كلفوه. بمهمة

.. وشنو هالمهمة
بلعت ريگي وكلت
.. المهمة تتضمن بأرساله لداعش ويزرعونه بينهم

مهيمن بقى ساكت ويشرب جاي شكله كان يفكر بالامر
وسألني .. زين هو اذا مسوي هذا كله جا بشنو يريد ياخذ رأيك

.. صاحبي متردد يريد يبلغ اهله ويفهمهم
قبل لا يلتحق او يسمعون بالموضع من غير واحد وتصير مشكلة

والمشكلة ان هو الولد الوحيد لابوه يعني ما عندهم غيره
ويريد ياخذ رأيي ان هو يصارح ابوه لو لا
قبل لا يفوت الاوان

وهو محتار يكول انا خايف اذا صارحت ابوي وعرف بالموضوع راح يعترض وما يخليني اروح

باوع علية وكال .. انت شنو جاوبته
.. انا شجعته بأن يروح يصارح ابوه وكلتله

روح صارح ابوك
ماكو مشكلة بالعكس انا اكول ابوك راح يفتخر بقرارك
من يعرف بأبنه صار ضابط وراح يقوم بمهمة نبيلة
وهالشي يرفع الراس

حبست انفاسي ووجهت له السؤال
.. شنو رأيك بكلامي

باوع علية وكال .. بالحقيقة جلال هنا ماكو شي اسمه رأيك ورأيي
هنا العواطف هي الي راح تقرر

في غض النظر عن سالفة التحاقه بالاستخبارات
وارساله لداعش بمهمة. انا موضد الفكرة
بالعكس كان اختيار صاحبك جداً صائب وشي مشرف

لكن المشكلة تكمن في تقبل اهله للموضوع

.. شلون يعني

.. يعني لا تتوقع من اي اب راح يوافق يرسل ابنه للموت
وخصوصاً من يتعلق الموضوع عن خسارة اغز ناسه

اكيد راح يعترض والعاطفة بساعتها راح تلعب الدور الاكبر بالقرار
يعني لا تتوقع ينظر للموضوع بعقله

حيرني مهيمن بجوابه
سألته .. لو كنت انت بمكان الاب شنو راح تقرر
.. لا تسأل شخص ما يعرف معنى الابوة
انا ما اكدر اجاوبك لان ما مجرب شعور الحماية الاب لأبنه

.. زين لنفرض لو كنت انا بمكان صاحبي وقررت التحق بالاستخبارات
حتى انجز المهمة بين داعش
انت شنو راح تكون ردت فعلك

باوع علية وعيونه اتمعنت بوجهي وصارت ترسم معانيه
لمعة عيونه وكال
.. تصدك بالله. يعني مجرد طرحك لهيج شي
وانا اتخيلك بمكانه. احس گلبي انقبض وانعصر

.. يعني شنو
.. اكون اكبر غبي لو خليتك اصلاً تفكر مجرد تفكير تروح للموت برجليك

.. زين واذا كنت حاسم الموضوع وقررت اسافر
.. بساعتها اكسر رجليك واكعدك بالبيت
تكعد تسوي خلطة اعشاب وية امي وتساعدها بدگ الهاون

حجيت وياه برجاء
.. مهيمن شنو السالفة ليش عصبت
جاوبني بدون غضب هسة قابل صدك انا رايح

گلنا فلنفرض
ان الموضوع يطلع من ايدك
وانا عندت وحكمت راسي واصريت الا اروح
يعني تعرف انا رجال متكدر تحكمني بتصرفاتي

عقد حواجبه وباوعلي بشك
اتلاحكت للموقف وكلت .. طبعاً انا احجي هيج
لان صاحبي هم رجال ومسؤل عن تصرفاته ويكدر يتخذ قرارته واكيد ابوه ما راح يكدر يحكمه

نهض من مكانه وانطاني ظهره وكال
.. بهيجي حالة اذا كنت مصر تروح للموت برجليك بساعتها راح تكون رجلي على رجلك وتلكاني وراك مثل ظلك

انخطف لوني وجمدت بمكاني مصدوم من كلام مهيمن
احس الظلام صار يحيط بية من كل مكان
جواب مهيمن حشرني بزاوية وضيق علية الطريق
وسد الابواب كلها بوجهي
والمشكلة ما بقى شي على التحاقي بداعش
وعلى اثر جوابه انا قررت التزم الصمت

ام مهيمن .. هسة شلكم بهاي السالفة الي تضوج الخلك
متكلي منين تجيبون هذا الحجي الي يقبض الگلب

مهيمن جاوبها .. والله يمة سأليه ما اعرف شنو كاعد يحس
لا ونوب صاحبه الخروف بكل عقله جاي يريد ياخذ رأي جلال
يعني عاف الناس كلها وجاي لجلال
الغركان بروحه

ام مهيمن .. صدك جذب هسة احجولكم سالفة بيها خير تفتح النفس

ابتسمت وانا اباوع لأم مهيمن شلون نزلت علينا
بالحجي
يعني حتى ام مهيمن الي ما فاهمة شنو السالفة هم اعترضت
مجرد ذكر الموضوع كدامها.

ابتسمت سألتها .. وشنو هاي السوالف الي تعدل مزاجج
ابتسمت وكالت .. انا اگلك يخالة شنو
يعني شحلاتك تجيني
وتگلي خالة اريدج تخطبيلي مرة
اريد اتزوج. هيج سوالف من صدك تفتح النفس وتشرح الگلب

ابتسمت واجتي على بالي غزال البصرة وعيونها
باوعت لأم مهيمن واتخيلت ردت فعلها
من اكللها اريدج تخطبيلي بتج

ابتسمت وانا اباوع للقوري الي بصفها
واتعوذت من ابليس

جلال اكعد واسكت ترة الشيطان شاطر
والله تنبت القوري براسي اذا عرفت عيني على بتها وذايب بهواها

جاوبتها .. خالة شلون ترديني اتزوج واخوي الجبير بعده ما متزوج زحمة من الناس
ترة انا منتظره يتزوج يفسحلي المجال حتى انا اتوكل

اباوع لأم مهيمن دارت على مهيمن واستلمته اكس ومربع
.. جا ما دامك منتظر هذا التيس يعرس
معناها ايّس ياعبيّس راح تبقى معلگ بدون زواج
ترة هذا الرجال امره مو بيده
بيد الماخذ عقله وهالتشوفه كاعد منتظر يحنون عليه

جاوبها مهيمن بكبرياء وكال
.. مو مهيمن الي يكعد ينتظر احد يحن عليه
بس انا بمزاجي وعلى گولتج
عايف الماخذ عقلي براحته اريده يجيني بقناعته

هم يحجون بالالغاز وانا اباوع
هذولي بس لا يشتغلون بالاستخبارات اشو كلامهم كله شفرات صار
لا ونوب واحد يفهم علو الثاني

ضحكت ومهيمن باوع علية وكال

.. خو انت ما ادري شجاك اليوم سوالفك كلها غمة.
هسة من دخلت لحد هسة اريد تحجيلك سالفة بيها خير ماكو

.. اي يا اخي حقي طگت روحي اريد اعرس
وانت واكف حجر عثرة بطريقي
يا اخي اتحرك شوية اتلحلح خلينا نشوف رحمة الله

جلال
وصلنا لمكان البيت المشبوه
ونزلت من السيارة الفخمة بعدما نزل ابو طبرة قبلي يتفحص المكان
جايب دور الحارس الشخصي
ودوحي نزل من السيارة وفتحلي الباب

نزلت وعدلت سترتي موديل سبورت
وباوعت لساعتي بضجر

اتوجها للبيت وشافونا الحماية واستوقفونا يم الباب
وسألنا .. انتوا منو ؟؟
ابو طبرة وكف كدام واحد منهم وكال
.. ( ابو كنعنان يسلم عليكم )

الحماية بس سمع بالاسم فتح الحاكية وانطى خبر وسمعنا صوت واحد جاوبه بلهفة وكله

.. لك غبي شلون تخلي يوكف بالباب بسرعة .. بالعجل
دخله للبيت لك هذا من طرف ابو كنعنان

والحارس بسرعة اتحرك فتحلنا الباب وهو يقدم اعتذاره
من عدنا

ودخلنا للبيت
وصرت اعاين الوجوه والمكان
وابوطبرة ودوحي (دحام ) يمشون وراي
دخلنا والوجوه تباوع علية

اجة رجل كبير بالعمر شعره مصبوغ اسود
رحب بينا بحرارة

ابو طبرة بصوت ناصي .. هذا صاحب البيت حسب المعلومات الي جمعناها

هزيت راسي بالموافقة
الرجل مد ايده كدامنا بترحيب وكال
.. اتفضل .. اتفضل باشا

دخلنا للصالة
وكال.. هلة والف هلا بالباشا ابن الباشا جلال نورت البيت بجيتك

ابتسمت بثقة .. منور بوجودكم يالغالي
رفعت راسي اباوع على المكان واحفظ الوجوه وانا امشي لداخل الصالة

وبهاي الاثناء وجان انصدم صدمة عمري
وجمدت بمكاني
وحجيت بصوت مبهوت ما مصدك عيوني

.. مهيمن ؟؟؟؟!!!!!!!

ابو طبرة اقترب مني وكال بصوت عالي .. شنو باشا ليش اتوقفت

ما كدرت امثل اكثر راح اتخبل مهيمن شلون وصل لهنا
بسرعة التفتت على ابو طبرة

وكلتله .. .. ابو طبرة انا ما اريد منك اي شي غير بس اخوي ما يصير عليه شي

ابو طبرة ارتبك متفاجيء .. اخوك شيسوي هنا
.. والله ما اعرف بس كل الي اعرفه
ان مستحيل اخلي احد يلمس شعرة من اخوي

.. اوكف لحظة قبل كل شي بالاول خلي افتهم اخوك شنو يسوي جاي هنا بهذا البيت
يعني الي اعرفه عن اخوك سجله نظيف ما عنده سوابق
زين تعال هذا اخوك شلون كد يدخل لهذا البيت
انت تعرف كلش زين مو اي واحد يكدر يدخل لهنا الا كان عنده
واسطة قوية تدخله

جاوبته بسرعة وانا اتوغل لداخل البيت ما اريده يشوفني
.. ابو طبرة ما عندي جواب لسؤالك بس كل الي اعرفه
اخوي ما عنده هيج سوالف. وشوف شنو سبب جيته

ابو طبرة كام يلعن ويسب وكال .. من اشتعلت صفحتك جلال انت واخوك متكلي منين طلعلنا هذا

جنت احجي وية الضابط وانا احاول اعرف سبب وجود مهيمن هنا
راح اتخبل مهيمن شيسوي هنا

اباوع عليه من المكان الي انا واكف بي
كنت اشوفه بس هو ما يكدر يشوفني
كان راص على اسنانه بغيض وبقلة صبر
وعيونه نار تعاين بالوجوه.

كانوا البنات يمرون من يمه وحدة منهن اجتي وكعدت يمه
بس هو كان مبين عليه حاي يدور على شي
حتى ما انتبه على البنية الي كعدت بصفه

كان ابو طبرة يحجي وية الرجال صاحب البيت
وكم واحد من الرجال الي يتوافدون عالبيت
هم يحجون وانا احس بروحي واكف على اعصابي

بالي كله يم مهيمن
ابو طبرة لكزني وكال من بين اسنانه
. . باشا ابو اوس يسألك. شنو اسم شركتك بدبي

انتبهت عليه واتذكرت المهمة .. ها اي اسمها شركة ال ( ...)
للاستيراد والتصدير
وصرت احجيلهم عن الاوضاع وشلون نعبر البصاعة عن طريق
الميناء

ابو اوس سألني .. زين باشا منو الي يخلصلكم البضاعة ويعبرها
ابتسمت بثقة وجاوبته .. بالحقيقة انا عندي معارف هواي
بتلفون واحد مني الهم يخلصون كل اجراءات البضاعة

ابو طبرة سأله .. زين انتوا شلون تستلمون بضاعتكم
منو المخلص الي يدخلها

ابو اوس جاوبه وكال .. لا يابة مخلص شنو
احنا ننطي رشوة للمسؤل وهو يگوم بالواجب

كان ابو طبرة يسحب المعلومات وانا عيني على مهيمن
بعد ايد البنية عن كتفه. بنترة

جان يباوع عليها بتقزز مثل الي يريد يخنكها
انتبهت لأبو طبرة جلى صوته ثلاث مرات

هاي اشارة معناها صار لازم نطلع من البيت
قبل لا الشرطة تتداهم البيت لان هسة على وصول ويسوون كبسة

طلعت الكارت من جيبي وانطيته لابو اوس وكلتله
.. هذا كارتي بي كل ارقامي اي شي تحتاجه
انا موجود وان شاء الله ما اقصر وياكم

رجع دوحي حط ايده على خصره
معناها خلص شغلنا وية ابو اوس

استأذنت من عنده والتفتت لابو طبرة
واني امشي وياه هو ودوحي
كان ابو اوس يمشي ورانا يريد بوصلنا للباب

صار عقلي بحالة فوضى اريد اطلع اخوي من هذا البيت قبل لا يداهمون المكان

اتوقفت فجأة اتوقفت وابو طبرة ودوحي اتوقفوا وياي
ابو طبرة.. باشا هم يالله نطلع

جليت صوتي وكلت لأبو اوس
.. ابو اوس بلا امر عليك محتاج الحمام

.. تعال اتفضل هذا هو منا الحمام
راد يجي وراي وانا اشرتله
.. ابو اوس اخذ راحتك

دوحي بقى يم ابو اوس وابو طبرة اجة وراي
التفتت عليه وكلت .. شنو وين جاي وراي ترة رايح للحمام

جاوبني من بين اسنانه وكال .. باشا حمايتك واجبي
مشت كدامه ووصلت للحمام وابو طبرة بسرعة دفعني وكال
بغضب

.. انت ما تكلي شكاعد تخبص ترة انت طلعت عن الخطة
.. لحظة ابو طبرة خليني افهمك

لزم زندي وهو يسحبني يريد يطلعني من الحمام وكال
.. جلال بسرعة خلي نطلع بالاول من هذا المكان وبعدين فهمني

نترت ذراعي من ايده وكلت .. ما اطلع منا واخوي موجود بهذا البيت واذا يشوفونه هنا يلقون عليه القبض

باوع للساعة وكال بأستعجال .. ولك جلال من يوم الاسود بيوم
عرفتك بي راح تخرب الاول والتالي
اوعدك اخوك انا اطلعه من السجن اخذها كلمة مني بس امشي خلينا نطلع

كان ابو طبرة يستعجلني حتى اطلع
.. صعبة اخوي اعرفه كلش زين ....
جنت واكف احاول اقنع بهمام

وما احس الا واحد هجم علية ولطمني على وجهي ببوكسي
ومطلني بالكاع واهد علية يريد يكمل
وهو يحجي .. ولك جلال العار .....

اتسعت عيوني وانا اشوف مهيمن فاقد من الاعصاب
ابو طبرة كتفه من الخلف وقيد حركة مهيمن
وصار يتلاوة وياه حتى يتركه

مهيمن .. ولك عوفني خليني ازوعه العافية واربيه من جديد
لك سكط كول شجا.........

ما لحك مهيمن يكمل كلامه لان الشرطة اقتحموا البيت
وصار الصريخ والشردة بفلس

والبيت صار عبارة عن فوضى
عياط البنات والغلط والسب والضرب والتجاوزات على
الشرطة بس كل هذا

ما كدروا ينفذون منهم بحيث سحلوا الكل عالمركز
ومن ضمن المسحولين انا ومهيمن ودوحي وابو طبرة
كلنا دخلنا للسجن

نور
الي كاعد يصير ويانا بهاي اللحظة زلزال
ضعضع شملنا.
شلون وليش وشوكت كل هذا صار

مهيمن
رجع للبيت بالليل بوقت متأخر وهو يرعد من الغضب
امه تسأله. شنو الصاير

بس هو ما يرد عليها
دخل للغرفة وسد الباب وراه بكل قوته رج اركان البيت رج
اسمعه جاي يتوعد وتحلف بجلال

ليش شبي جلال شنو صاير
اندك الجرس ورحت حتى افتح الباب
طلع وراي مهيمن وكال .. رجعي دخلي جوة
انا طالع افتح الباب

جان يحجي ويمشي متوجه للباب
فتح الباب وكال .. عناد اريدك بأي وسيلة تطلعلي جلال
شنو تريد انا حاضر فلوس واسطة توكل محامي
ادفع غرامة شتريد تسوي سوي. اهم شي عندي
تطلعه الي من السجن وتحطه بيدي

لطمت على خدي عزة بعيني جلال بالسجن
وبقيت مصدومة من الي سمعته
ومرت الساعات وانا ما غفت عيني ولا مهيمن كدر ينام كل شوية اسمعه يحجي بالنقال

امه تعبت وياه وما حصلت منه جواب رادت تعرف شبي معصب
والبنات ريم وحور الفضول يقرة عندهم الف

جنت كاعدة بالهول انتظر اسمع خبر عن جلال
عيوني ثگلت من النعاس
رجعت راسي للخلف وسندته عالحايط
وغمضت عيوني بتعب من كثر التفكير

لكن فجأة فزيت من غفوتي على صوت عركة مال زلم
واصواتهم العالية

نهضت من مكاني مفزوعة ورحت اركض على الصوت وجان اشوف مهيمن وجلال متزانكين

جلال نتر ايد مهيمن وكال .. انا اعرف منو الي كلك
ماكو غير عناد بس بسيطة انا اله خلي يصبرلي
جان يحجي وهو متوجه يريد يطلع برة البيت

ومهيمن صاح بي .. لك سكط وين رايح
جلال ما رد عليه

ركضت ورة مهيمن وجلال خايفة وصلت
لباب الشارع وصحت وراهم
.. لك جلال وين رايح عفية. لاتتهور

مهيمن ابوس ايدك روح وراه
راحوا من غير ما يلتفتون علية
لطمت على خدودي بخوف ياربي دخيلك

يتبع

اتمنى لكم قراءة ممتعة
اختكم نهى الحسون