قضية لم الشمل الفصل الثامن 8 - بقلم نهى

مساء الانوار عليكم احبتي المتابعين

#الكاتبة_نهى_الحسون
#قضية _لم _الشمل

جلال
كنت امشي ورة ابو بهاء مستغرب على تغيير شكله
وبنفس الوقت متخوف شنو الموضوع
توقف امام بوابة ضخمة وبدأ
يفتحها على وسعها
هناااااا وكان اشوف

الكابووووس الاسود الرايات السود

تشهدت على روحي ووصلت دكات گلبي لحنجرتي

اباوع على راياتهم السود ترفرف
بوسط قاعة تصنيع ضخمة

كانت عبارة عن مجموعة. ورش تصنيع ومختبرات عجيبة بأنواعها وعمال تقنيين واشخاص هواي من مختلف الجنسيات نظراتي تتنقل بيناتهم باستغراب
كلهم يشتغلون على قدم وساق مثل خلية نحل
والعجيب بالامر
انتبهت على حالة ان هذولي العمال الي يشتغلون
من دخلنا عليهم بقوا مستمرين بشغلهم ولا واحد بيهم التفت او رفع راسه
حتى يشوف منو الي دخل عليهم

يعني على الاقل من باب الفضول
شنو القضية هذولي شنو فلمهم شنو يصنعون هنا وشنو شغلهم

اقتربنا لورشة الحدادة
بس مبين شكله مو عراقي
التفت علية ابو بهاء وكال
.. اسمعني جيداً يا جلال
عملك سوف يكون مشترك مع ابو درع
هو ايضاً يعمل على السيارات وسوف يريك كيفية العمل هنا وانت بالمقابل سوف تريه كيفية ربط الجهاز ارجو ان تتعاونوا كما يتعاون الاخوة فيما بينهم

هزيت راسي بالموافقة وانا اباوع لهذا الي اسمه ابو درع وشنو يشتغل

ابو درع حداد كان يلحم مصفحات من الحديد المسلح
على واجهات سيارات صالون حديثة حتى تكون مقاومة ضد الرصاص

انتبهت من صفنتي على كلام ابو بهاء
.. يا جلال هل تسمعني ام تريدني اعيد عليك الكلام
مرة اخرى

هزيت راسي بالموافقة
.. تمام سيدي
.. انت اصبحت منا ويجب ان تقول مولاي الامير

.. سمعاً وطاعة يا مولاي
ما اعرف ليش من احجي وياهم هشكل احس بروحي كاعد اقرة كتاب الف ليلة وليلة

رجع باوع علية بنظرات تدرس وجهي وحط عيونه بعوني عبالك يريد يقرة دواخلي
وهالشي زرع بية الخوف المميت
وصار گلبي يرعد عبالك عندي امتحان

باوعت شلون اتقدم علينا ابو درع
مدري ابو بريص شكله يشبه البرص
ومد ايده القذرة الي كلها صخام ودهن تشحيم اسود
حتى يسلم علية

.. مرحباً بك في دولة الخلافة وبارك الله فيك لاختيارك
في الانضمام معنا لكي نعيد معاً الاسلام الى عهده السابق

هسة هذا بالله شجاوبه
.. يافرحتي بيكم
يمعود والله وانت ما محلفني اكاد اطير من الفرحة

كان كلامي عبارة عن كوكتيل فصحى مخلوطة بعراقي

ابتسم وكال
.. لقد اتطلعت على تقنية الجهاز ورأيت انك قد احسنت صنعاً
كان يحجي وياي وبعده ماد ايده للسلام نزل نظرته وباوع لايده الممدودة
وانا حسيت على دمي وصافحت ايده

.. تسلم يا اخي ان هذا بعض ما عندنا
بعدك ما شايف شي ان شاء الله اكون عند حسن ضنكم

......
نور
فتحت عيوني ولكيت نفسي نايمة بصالة بيت اهل اسيل
هاي شنو شلون وشوكت وليش منو جابني هنا

اتذكرت الصار بية ورجع گلبي انعصر داخل صدري وحتى النفس صار صعب اتنفسه

رفعت راسي ولكيت اسيل وامها يباوعون علية بعطف
نزلت دموعي وكلت بصوت مكسور

.. اسيل طلع امير ما يقصدني الي
اثاري كان يفكر يخطب غيري وانا الغبية مثل العمية
اتبعت امل واهن وصرت ابني احلامي بالرمل
ناسية موج الشط شكد غدار وشلون
بلحظة هدم كل شي

ام اسيل.. كولي يالله خالة ومسحي دموعج وحمدي ربج
ان السالفة اجتي على هيج
يعني هسة الي يسمعج يكول متفق وياج على الزواج وخلف وعده

.. لا خالة امانة الله الرجال ما واعدني بشي
بس الصوج مني اني
انا الي كنت عمية لدرجة صرت اشوف العطف الي بعيونه حب وعشق

ما اعرف شبية وشجاني يمكن طمعت بعطفه وشكلي اتعديت حدود الحلم وصار لازم ارجع لأرض الواقع يمكن المثلي هواية عليها تحلم واصلاً مالها حق تحلم

انا بنية عشت طول عمري ماسامعة كلمة طيبة
ومن يوم وفاة امي صرت ادور على الامان
ومن لكيت الامان والحنان والكلمة الطيبة ببيت امير
صار عندي امل وهوس شلون احافظ على هاي النعمة
حسيت بنفسي انسان مثل باقي البشر احب وانحب

ام اسيل جاوبتني وهي تمسح على راسي
.. تعوذي من الشيطان وكومي غسلي وجهك
وكولي يا الله. ولاتخلين الموضوع يأثر عليج

.. خالة صعبة
.. بنتي صلي عالنبي ، الله يساعد البنات الي
يواعدوهم الشباب على الزواج وبعدين يقلبون عليهن
هاي من غير سوالف الغدر والخيانة هاي لو انتي بمكانهن شنو تسوين

خالة كومي الله يرضى عليج
بس تشوفين مصايب الناس راح تهون عليج مصيبتج

اسيل.. اي والله ماما كلامج صحيح ياما وياما بنات
تحطمت حياتهن واحلامهن كله من ورة الحب والوعود الكاذبة
وتالي يعوفها ويتزوج غيرها
حمدي ربج على الاقل امير ما وعدج وبعدين خذلج

كانت اسيل وامها يواسوني
واني دافنة راسي بين ادية انا اعرف كلامهم كله صحيح.
بس غصب عني ابجي والله الامر مو بيدي

يعني سنتين مرت علي ما يوم احط راسي عالمخدة. اذا ما احلم بي
واحلم شلون تكون حياتي وياه اذا اتزوجنا
وشلون نخطط حياتنا سوية

اي شي اتمناه كان لامير حصة بي
معقولة اكدر انام وما احلم بأمير

مسحت دموعي كدام اسيل وامها كانت عيونهم مليانة عطف وحزن

سحبت نفس عميق ونهضت من مكاني ونفضت ملابسي
المعكرة بيدي صرت اعدل الكسرات بعناية
صارت عبالك ترتيب ملابسي اكبر همومي

انا لازم اتمالك نفسي مو من صالحي احد يشوفني وانا ابجي منهارة
ومثل كل مرة اتعودت احتفظ بمشاعري وانطوي على نفسي
واكتم حزني بگلبي مو شي جديد علية

همست بصوت مبحوح من البجي
.. مع السلامة تعبتكم وياي
ام اسيل .. وين رايحة ابقي شوية
.. لا خالة لازم ارجع عندي كومة شغل ينتظرني
خطية ام امير وصتني اسويلهم كليجة على باجر

وزحمة ارد طلبها و همة ناس طيبين وافضالهم مغركتني
وهذا اقل شي اسويه الهم

مو ذنبهم انا غبية وفهمت كرمهم وياي غلط
المفروض من الاول اكون فطنة واحمي گلبي من هيج غصة واعرف حدي

ام اسيل غمضت عيونها بقلة حيلة وعطف
اسيل .. نور ترة انتي ما مجبورة تحضرين حفلة خطوبته

........
ريم

مرت الايام وكثرت زيارات ابو سيف وانفراده مع عمو بالاستقبال مانعين دخول اي شخص وياهم
اكيد ديحجون عالشغل الي بقى متراكم بعد رحلة علاج عمو

اما انا بهاي الايام رجعت اتواصل مع صديقاتي ندى ورؤى
كلش مشتاقتلهم ورجعت لحياتي القديمة طلعات ونسات وية الشلة وبنفس الوقت اراقب عمو بس الغريب بالامر
عمو لحد الان بعد ما كال اي شي عن اولاده
يعني محدد اي وقت ناوي يلتقي بيهم
الي فهمته يريد يمهد لوجوده بحياتهم قبل لا يشوفهم

قطع حبل افكاري صوت الجرس ورة خمس دقايق

دخلت ام محمود علية للغرفة وبيدها ملابس مكوية
راحت فتحت الكنتور وعلكتهم

كنت مستلقية عالسرير على بطني اگلب بالنقال

سألتها .. اكول خالة منو دك الجرس
.. ما اعرف هذا رجال غريب ما شايفته انطاني ظرف
وكال سلمي هذا الظرف لحجي مؤيد ضروري
يقر......
كنا نحجي
وفجاءة قطع كلامنا صوت صرخة عمو يصيحني بعصبية

.. ريييييييييييم

طفرت من السرير مفزوعة وباوعت لأم محمود
ام محمود.. دخيلك ربي شبي الحجي

ما انتظرتها تكمل كلامها رحت ونزلت الدرج مستعجلة عالسريع
اريد بس اوصل لعمو الي بعده ينادي بأسمي

دخلت عليه بالغرفة لكيته يسعل بصوت عالي ولازم خاصرته
وعمة اسيا واكفة يمه تهدي بي

.. مؤيد الله يخليك اهدي شوية وخلينا نفتهم شنو الصار موزين عليك تعصب

رعبني منظره اول مرة بحياتي اشوف عمو هشكل معصب ومتنرفز
انتبهت عليه اختل توازنه

شهكت بخوف ورحت ركض عليه حتى اسنده قبل لا يوكع

صد ايدي بقوة دفعني عنه بنترة

باوعت عليه متعجبة
.. عمو شكو شصاير ليش هيج انت معصب
شنو سامع شي
ما حسيت الا على راشدي طبع خدي
شهكت متفاجئة من ضربته

الصدمة شلت لساني اتلمست خدي الحار
واني اباوع عليه
سحب مجموعة صور كانت متناثر عالميز وشمرهم بوجهي

مؤيد بعصبية.. لج كلبة حيوانة انا من تالي عمري يجي واحد يهددني بصورج
يساومني عليهن انطيه فلوس حتى يستر عليج

رجع مرة اللخ انطاني ضربة وهالمرة وكعت بالكاع
كنت خايفة منه وعليه ومتفاجئة بنفس الوقت
اريد احد يفهمني شنو الموضوع وصوري ليش عند عمو ومنو هذا الي يهدد عمو بصوري وشلون وصلن صوري عنده

رجعت كمت من مكاني اريد ادافع عن نفسي
.. عمو الله يخليك اهديء شوية و خليني افهمك
صدكني انا ما عندي علم بهذني الصور ولا عندي احد ارسل له صوري

.. لج سكتي حيوانة ما اريد اسمعلج اي نفس
هاي تالي دلالي الج استغليتي ثقتي بيج
سودتي وجهي بحركاتج الطايشة الله يسود وجهج على هاي العملة
روحي طلعي من كدامي ما اريد اشوفج

عمة اسيا التفتت علية معصبة
.. طلعي برة لا يصير بأخوية شي من وراج
الله لا يوفقج شكد طايشة
هذا الي كنت خايفة منه تجيبيلنا العار والله ما اعرف اذا صار على اخوي شي
انتي شتصخمين من وراه والله تصيعين ومحد يردج

عمو رجف جسمه وكعد على السرير وكال بضعف
.. هو انا هذا الي شايل همه
كلما اكول هاي البنية عقلت وتغيرت
تطلعلي بسالفة اقوى من الي قبلها
بس اني لحد هنا وكافي بعد ما عندي اي طاقة تحمل والي بية كافيني

حجيت بتوسل ادافع عن نفسي
.. عمو الله يخليك بس اسمعني والله ما اعرف منو هذا الي دازلك الصور
بشنو تريدني احلفلك ما اعرفه

كنت لازمة الصور بيدي واگلب بيهم
.. شلون ماعندج وياه علاقة وهذني الصور شنو تفسريهن
وشلون يعرف بتفاصيل حياتنا
لج حتى عن مرضي حاجيتله وتحلفين ماعندج شي وياه
اسيا طلعيها برة لا اكوم اجرم بيها
كان يحجي ويرجف
.. يالله خلاص راح اطلع برة بس الله يخليك كافي لتعصب وجهك احتقن لونه

اتوجهت للباب اريد اطلع من الغرفة واني ابجي بقهر حايرة
بس قبل لا اطلع عمو طلب من عمة اسيا

.. اسيا اتصلي على ابنج نائل خليه بسرعة يرجع للعراق حتى يعقد على هاي الحيوانة وياخذها وياه بعد ما اريد اشوفها

صرخت مصدومة من كلام عمو احس الصدمات والمفاجئات نزلت على راسي نزلة وحدة

رجعت عليه
كمت ابجي بجزع
.. عمو معقولة تزوجني غصب عني والله اكتل روحي وما اتزوج نائل
انا ما سويت شي
مستحيل اخليك تعاقبني على غلط اني ما ارتكبته

.. انتي تاكلين وحل وتسكتين ما اسمع منج ولا كلمة
يجي ابن عمتج واعقدلكم اثنينكم خليه يستر عليج
ياخذج تعيشين برة انتي تصرفاتج ماتمشي هنا بالعراق

التفت لى عمة وكال
.. اسيا انطيني النقال خلي اتصل على الضابط اركان
خلي يشوفلي حل بهاي المصيبة الي وكعت على راسي
العار منطيني يومين اذا ما انطيه الفلوس ينشر صورها

اسيا.. صار خوية بس انت اكعد شوية
انطته كاسة ماي
.. اشرب شوية ماي بلل ريكك
لا يصير بيك شي من ورة هالغبية.
اخذ كاسة الماي من ايدها وشربها

وهي كملت كلامها
.. لازم تحصدين نتيجة تصرفاتج الطايشة

اخذ النقال وفتحه وكال
.. طلعوا كلكم برة اريد احجي وية الضابط ما اريد اسمعلكم صوت

اجتي اسيا ودفعتني برة غرفة عمو
.. يالله طلعي برة
طلعت وسدت الباب وراها وهي تدردم
.. بالله شو وخري من وجهي
خلي اروح اتصل على ابني نائل واقنعه بلكي يستر عليج بعد هاي سوايتج السودة

كانت الصور بعدهم بيدي نزلت عيوني اباوع عليهن
وجان اشهك بصدمة هذا وجهي اي بس هذا مو جسمي
عزة هاي صوري كلها بالملابس الداخلية
وعندي صور بنفس ملابس حفلة مهر صديقتي ريتاج وواكفة يم ولد
منو هذا الشاب كل صوري عبالك تعود لوحدة ساقطة عاهرة

صرت ابجي بجزع حاطة ايدي على حلكي اكتم صوتي لا يسمعني عمو
هاي مو صوري كعدت عالكاع يم باب غرفة عمو
رفعت راسي ولكيت ام محمود بعدها واكفة يمي
وبعيونها نظرة عطف
.. صدكوني هاي الصور والله مو الي صحيح هاي اني
بس عمري وحياتي ما طاكة هيج صور وبهيج وضعيات
اصلا ما اتذكر انا ماخذة صورة بملابس داخلية

اجتي اسيا ورفعت صورة من الصور
.. زين هاي الصورة مو صورتج بحفلة صديقتج ريتاج
اني شايفتج بهذا الفستان تتذكرين بيوم كلتلج هذا
الفستان مو مناسب لعمرج قصير مكشف من يم الصدر
هم ننكرين ملابسج

هزيت راسي بعجز لاحول ولا قوة شجاوبها وكل الادلة تؤيد صحة كلامها
راحت وتركتني انكوي بناري خايفة

اباوع لأم محمود جمعت الصور من الكاع وهي تتحسب
.. حسبي الله ونعم الوكيل عالظالم
عرض بنية البيوت يعثر ياخالة
وان شاءالله انتي عندج حظ وبخت المظلومات صدكيني
راح تعثرين كل من نصبلج فخ
وربي هو ينطق الحق
مثلما نطق الحق ليوسف وسخر الحق يشهد لصالحه ويثبت برائته

وصارت خالة ام محمود تواسيني وتطبطب علية وتدعيلي
وانا الخوف اخذ مني كل اسلحتي
موضوع صدمة صوري المفاجئة
تركني بحالة عجز حتى ما اكدر افكر شنو اسوي ولمن التجيء بهاي الحالة

...........
جلال
رحت ورة ابو درع وجان اشوف الجهاز مالتي عالميز
اسلاكه طالعه شكلهم كانوا يتفحصون طريقة الربط

كوة لزمت نفسي ما اركض عليه واخذه
اتمالكت نفسي
باوعت لابو درع فتح غطا المحرك
وانا صرت اعاين المكان اريد اعرف وين مخارج هاي القاعة
انتبهت على شباك

ابو درع.. انظر هناك عدة اقسام من التقنيين
قسم ادامة وقسم مدرعة وقسم مفخخة
انت راح تعمل مع قسمين فقط قسم المدرعة وقسم المفخخة لان كلا القسمين يحتاجون السرعة القصوى بتنفيذ العمليات الانتحارية او المداهمة

هو يحجي وانا جسمي يرتعد
هم هذولي نفسهم الي ديحاربون عالحدود
اي انا سامع عنهم وشايفهم بنشرات الاخبار

ربي دخيلك انا شلون دخلت بهاي الدوامة
لا وانا تالي عمري اشتغل وية ارهاب

ابو درع كمل كلامه
.. انا يجب ان اتركك لوحدك حتى تكمل عملك
وسوف نلتقي فيما بعد حتى اعرفك على بقية العناصر

.. ان شاء الله
جاوبته وعيني عالجهاز
طلع وتركني بالورشة كانت عبارة عن ضوء اصفر معلك فوك ميز الادوات وعلى الميز كان الجهاز ينتظرني

رحت بسرعة عليه لزمته بيدي وصرت اتفحصه واگلب
غمضت عيوني وحسبت للعشر هنا صار لازم اتخذ القرار واختار بين اثنين
اما اتنازل عن حلمي وتعب السنين وارجع ابدي من الصفر واشتري مقابله دم اخوتي العراقيين

او احط ايدي بإيد هذولي ويتحقق حلمي على حساب هدر دم الابرياء وساعتها اكون بعت تراب الوطن
ونفسي وشرفي ومبادئي

وجان اتخذ القرار الي ما منه رجعة
ياوطن خلينا انا وياك على الزمن
لزمت الجهاز وبديت افككه بأيدين ترجف عين عالباب وعين على الجهاز
كطعت كل الاسلاك محيت حتى شكله

بعدها اتلفتت حولي بالمكان ادور على مخرج
طلعت من الورشة والعرك مالي جبيني

صارت عيوني تحوم على مخرج
سألت واحد مر من يمي وين الحمامات
اشرلي على نهاية الممر

مشيت بكل هدوء حتى ما الفت انتباههم
توجهت على الحمامات فتحت الباب
الريحة كانت نتنة كريهة
الله يلعنكم شكد قذرين

صرت ادور على منفذ اطلع منه
ما بقى عندي وقت بس يشوفون شكل الجهاز المكسور
راسا يعرفون بهروبي

شفت شباك فوك للتهوية حجمه وسط
اتسلقت بروحي العزيز
صرت اتعلك بالحايط وصلت للشباك وطلعت راسي بالاول وشفت الوضع بالخارج
شكل الحمامات بالخلف لان كانت على بعد متر من سياج المعسكر الي كان محاط بأسلاك شائكة

توكلت على الله وبديت اطلع جسمي من الشباك شوية شوية
صحيح كان حجمه وسط لكن اكيد مو مناسب لجسمي الرجولي
وتجرح جسمي من قطعة زجاج صغيرة باقية بالشباك الي كسرته
مو مهم كان شعور الخوف والقتال علمود الحياة هو الي يحركني
انسلخ جلدي من صفحة خاصرتي
بس هذا كله انا ما احس بأي شي
ويا روح ما بعدج روح

طلعت جسمي كله ووكعت على كتفي بالكاع لان الشباك كان عالي لزمت خاصرتني ونهضت من الكاع
ورفعت راسي حتى اعاين ارتفاع السياج

كان ارتفاعه تقريباً مترتين ونص
سمعت صفارات الانذار بالمعسكر
واصوات العناصر العالية صارت خبصة
ربي دخيلك
يمكن عرفوا اني هربت

صار رمي مفزع بالجو
ما اعرف منو المقصود اني لو غيري من هذا الرمي
سمعت صوت انفجار
وصوت ابو بهاء ينادي على العناصر

.. يا اخواااان لقد غاروا علينا بالهاونات
استخدموا المدفعيات من المخارج

بعدها بدت اصواتهم تقترب على جهتي
ربي سترك راح يشوفوني

رجعت للخلف ورفعت راسي وبعدها انطلقت اركض بكل سرعتي واتسلقت عالسياج
هي قفزة وهي وكعه من الجهة الثاني للسياج

من حلات روحي بسرعة نهضت من وكعتي وباوعت للمكان داير ما دايري كانت بساتين واشجار تحيط بالمكان
وركضت على وجهي بكل سرعتي صرت انافس الفهود بسرعتي وكأنما جهاز السرعة الي صنعته ربطته برجلية يا روح ما بعدج روح

اذا يلزموني والله يثرموني بالمثرامة
ربي نجيني من القوم الظالمين
.......

ريم
يومين مرت علية عمو ما يقبل يشوفي او يحجي وياية
والمشكلة عمو فاجئنا اليوم بموقفه الصارم حتى من عمة اسيا

واول ما دخل للبيت صاح لعمة اسيا و دخلوا بالغرفة وسدوا الباب عليهم
بعد نص ساعة بدت اصواتهم تعلى وصار صياح
وكان صاحب الصوت العالي هو عمو

شكو شنو صاير
المشكلة ما اكدر انزل
بقيت واكفة على الدرج اريد اعرف شصاير حتى ام محمود طلعت من المطبخ
وتباوع على غرفة عمو

ورها طلع عمو من الغرفة وصاح بصوت منفعل ومعصب
.. ام محمود تعالي ساعدي اسيا حتى تلم ملابسها وتطلع
لان راح تسافر

انرسمت على وجهي علامات التعجب
.. عمة اسيا راح تسافر معقولة
طلعت عمة اسيا ورة عمو تتوسل بي
.. مؤيد انطيني فرصة بس افهمك ترة الي وصلك
الكلام يكذب عليك يريد يوكع بيني وبينك

.. اسيا رحمة على والديج سكتي وخليني متحملج ما دام النفس بعدها عليج طيبة لا تخليني اتخذ اجراءات بحق اولادج واسحب منهم مساعدتي وانتي تعرفين شنو اقصد

.. مؤيد ابوس ايدك اسمعني انت لازم تعرف انا سويت كل هذا علمود مصلحتك
.. اسياااا يا مصلحة تخليج تطردين طفل صغير من بيت ابوه

اريد اعرف شلون انطاج گلبج تطردينه وتكذبين علية وعلى امه
منو انطاج الحق تحجين نيابة عني

.. بس شكلي انطيتج مجال اكثر مما تستحقين
انتي كفر اسميج اختي
اباوع لعمو لطالما يحجي كان لازم خاصرته موجوع ا
توجه للباب يريد يطلع من البيت وكال

.. جمعي كل غراضج والسايق ينتظرج بالباب حتى ياخذج لبيت خالة امي
خالة فليحة تبقين عندهم
منا لحد ما يحين موعد طيارتج
منا لذاك الوكت ما اريد اسمعلج اي نفس
ولا تفكرين ترسلين واسطات وناس حتى يصلحون الوضع بينا
لان ساعتها ما راح اسكت وافضح كل سوالفج

طلع من البيت وترك عمة اسيا تحوم بالبيت وتتصل على اولادها

.....
نور
طلعت من بيت خالة سناء
وشايلة بيدي سلة الكليچة اليوم حفلة خطوبة امير
وام امير وسرى اتصلوا واكدوا علية اجي للخطوبة

لبست فستاني الي اشتراه امير
بلعت الغصة ودست على كسرة گلبي ورفعت راسي بتصميم
ادعي ربي ان ينطيني القوة والصبر حتى ما انهار
كدام الناس ربي طلع حبه من گلبي
مثلما دخل بگلبي من غير ما احس

لبست شالي كانوا بنات خالتي واكفات يمي يباوعون علية بأعجاب
كانوا بنات صغار تتراوح اعمارهم بين ال ١٣ سنوات وال ١٦سنة
.. نور صايرة تخبلين
جاوبتها الثانية.. صاير مثل عروس حلوة
ابتسمت بوجههم بدون ما اجاوبهم اتعودوا على سكوتي

اخذت السلة وطلعت من البيت وشافني زوج خالتي ووياه صديقه سعدون

مشيت وتركتهم ما سلمت عليهم المعروف عني الخرسة
يعني ما احجي وية اي بشر بالمنطقة
عكس صورتي وانا ببيت اهل اسيل وبيت امير
اكون منطلقة بالكلام وما خايفة

سمعت سعدون يحجي وية رجل خالتي صابر
يكله .. ولك صابر هاي الصاروخ منين

زميت شفايفي بصرامة وعجلت بخطواتي عالسريع
شكد اكرهم الله ياخذهم
سمعة سعدون وصابر بالمنطقة زفت وكلها تصيح منهم الغوث

وصلت لبيت امير وهناك كانت اجواء البيت يعمها الفرح
واول ما دخلت استقبلتني الدكتورة سرى
.. شنو هذا الكيك نور وين جنتي دافنة كل هذا الجمال عنا
ابتسمت بخجل وجاوبتها .. حتى انتي حلوة
كانت لابسة فستان ابيض واسود قصير
رحت حطيت السلة عالكاونتر

وشفت كراتين قطع الكيك والعصاير بأنواعه
وسلة كبيرة كان بيها علب المهر
اشكال كولش حلوة

دخلت ام امير بكرسيها المتحرك وكان امير يدفعها
رحت سلمت عليها وباركتلها بخطوبة ابنها
وحرصت ما اخلي عيوني توكع على امير
لكن اين المفر
قاطع كلامي امير وكال

.. وانا مالي كلمة طيبة يعني مو شكلج نسيتي تباركيلي
رفعت راسي ووكعت عيني عليه ورف گلبي غصب عني
كان لابس قاط رصاصي وطالع يجنن
ماشاء الله

همست بصوت ناصي.. امير مبروك ربي يسعدك
.. مشكورة ويوم الالج اشوفج عروسة وبشرط
هذا الي يتزوجج انا اروح اسأل عن اصله وفصله منين
لان احنا ما نزوج بناتنا لأي واحد

ابتسمت على كلامه الطيب وياية مث ماهو متغير
سرى.. استاذ امير هسة ما افتهمنا تزوجني لو تزوجها
ما اعرف ليش احسك هاي الايام صاير مثل دلالة تزوج البنات

كنا نحجي ورن نقال امير رد عالمتصل وبعدها
غلق النقال وكال يستعجلنا
.. يالله بنات جهزوا نفسكم راح يجون عمامي وجايبين وياهم الشيخ
يالله استعجلوا خلونا نروح

رحنا لبيت العروس
وكانت الناس متجمعة بالفرح خطبوا وبعدها عقدوا لأمير وبنت خاله المرحوم اسمها دينا عقدوا للعرسان
كان بيت العروسة صغير وكانوا مخططين بس يعقدون
تنتقل الخطوبة لبيت امير هناك يسون الحفلة لان بيتهم اكبر

ياربي صبرني

رجعنا لبيت امير وهناك بدت الحفلة واشتغل الديجي ودخل امير وكعد يم عروسته
وانا احس برجفة برد وصلت لكلبي اشوفه شلون
يهمسلها ويلبسها الكلادة.

غمضت عيوني وابتعدت من كدامهم وصرت اقدم
الحلويات والعصاير عالمعازيم
رربي يسعدهم ويبعد عنهم كل شر
ما لي حق اتحسر على شخص هو بالاصل مو الي

كانوا المعازيم هواي والاطفال بدوا يزعبلون البيت
صرت اركض وراهم والم كراتين العصاير الي بالحديقة

وعيوني بعدها تدمع من وحدها
جبت اكياس بلاستك خاصة بالزبل وبديت اجمع
الزبل حتى اطلع اذبهم بالحاوية
كانت الحاوية قريب عالباب

عدلت شالي على راسي
وطلعت برة يم الباب وبيدي اكياس الزبل
وقتربت من الحاوية وعيوني تدمع

لفت انتباهي حركة بداخل سيارة
كانت واكفة بالجهة المقابلة الي

داخلها رجال كبير بالعمر كان يباوع علية بصورة غريبة
مسحت دموعي حتى اركز هذا منو وليش هشكل يباوع علية

يتبع

اتمنى لكم قراءة ممتعة
مع تحيات اختكم نهى الحسون