رواية قضية طلاق الفصل الثالث 3 - بقلم Aseel🤗

مسائكم عسل مثل دمكم ..

قضية طلاق ..

بقلم ..Aseel

البارت ٤

...............

رشا: طبيت واحس نبضي تغير على فجاأة وصار يدك لحن حلو يعبر على الحب الطاهر البينة ..

وانتفض كلبي واني اسمع صوتة وهوة صاح .

صهيب: يا هلا بالجاينة وعينة علية ..

ام سامر : هلا بيك عيوني شلونك خالة ..

صهيب : والله الحمد لله بشوفتكم ردت روحي

ام سامر: اسم الله عليك خالة روحك سالمة .

صهيب: شو ماكو منشوفكم مشتاقين والله ..

ام سامر: فدوة لكلبك حبيبي

صهيب: هلا بيكم والف هلا ..

رشا: طول ماهوة يحجي عيونة علية خفت لا امي تنتبه .. بس جنت سرحانة بي وبصوتة .. اويلي شكد مشتاقة اشوف طولة ..

جنت مراهقة ومعروف الحب بهيج عمر يصير هوس وادمان .. جنت اتنفسة ..

جانت امي وخالة ام صهيب يسولفن ويضحكن ..

ام صهيب: خالة ماتودين الاستكاين وتصبيلنة بعد ..

رشا :اي خالة تدللين ..

ام صهيب :الله يخليج ويحفظج يارب .

رشا: رحت وديت الاستكاين بالمطبخ وشغلت الجاي عما يحمى لان برد ..

غسلت الاستكاين ورجعت رتبتهن .. ادور على الشكر ملكيتة ..
صحت من المطبخ ..

خالة وين الشكر ..جاوبتني .

ام صهيب: يمج خالة بالكاونتر الفوك اول باب ع اليسرة شكردان اصفر ..

رشا :اي خالة لكيتة ..

رجعت اكمل وانتظر الجاي يحمة محسيت الة نفس وراية فرغت ونداريت ردت اعيط جان يصم حلكي من شفتة هديت لان عبالي طلع ..

صهيب فزعتني .

صهيب :اروح فدوة لهلصوت .. والله عطشان على شوفتج وهسة رتويت ..

رشا: خجلت حيل اول مرة نكون وحدنة واول مرة نتبادل كلام .. من سالفة المحل .

جاوبتة واني احمحم اخفي ارتباكي وخجلي ..

خالة دزتني اصب جاي ..

صهيب : رشا اني احبج .

رشا :من سمعت الكلمة لزمت القوري بدون وصلة انجويت وكمزت ..

اخخخ يمة ..

صهيب: اسمالله شبيج يروح صهيب

رشا: نسيت حتة الجوية ومعت بحجايتة .. عبالك ضربوني ابرة مسكن للالام .. محسيت ابد بالجوية التهيت وياه ..

صهيب :غزالتي .. بعدها توجعج ..

رشا :غزالتي شنو ..

صهيب: اسمج رشا يعني غزال .. وانتي غزالتي الي وبس ...

رشا :دنكت واحس خدودي صارن جمر من الحرارة .....

أأأأني اروح أأأ الجاي برد ..

صهيب: وين تعالي ..نسيت اكلج ..

رشا: شنو

صهيب: احب شعرج واريدة بس الي ..

رشا :عفتة وخذت الجاي واني ارجف .

احس جسمي صار نار .. وخدودي حمر ..

ام سامر: شبيج يمة وجهج احمر بس لا مصخنة .

رشا: مادري يمة اشو فجأة حسيت بحرارة .

ام صهيب: تعالي دادة اشوفج ..

رشا: رحت يمها وحطت ايدها على كصتي

ام صهيب: يا !!! ياخالة موجرة نار شجاج عين ومصلت علنبي ..

ام سامر: يمة بنيتي عرفتج اليوم مو طبيعية كلت حتتمرض ..

رشا: لا يمة مو مريضة بس يجوز لان انجويت وتاذيت صخنت ...

ام صهيب: سودة علية لو ادري مدازتج خما تاذيتي ..

رشا :لا خالة متاذيت ..

ام سامر: .. لعد البنات وين ..

ام صهيب: معزومات عدهن مهر صديقتة انوار وراحن كلهن متشوفيني وحدي ..

ام سامر :الله يحفظهن الج ويرزقهن ببن الحلال ..

ام صهيب: تسلمين بعد كلبي .. بس ها بنتج محجوزة النة من هسة ..

رشا: يمة صرت نار من الخجل بس لا خالة حست علينة ..

ام سامر: هههههههههههه وينها وين الزواج ..

ام صهيب :ربي يحفظها الج .

ام سامر: يلة احنة نترخص مضل وكت والكعدة وياج تخبل انشالله امرلكم غير يوم ..

ام صهيب: هلة بيج باي وكت .. نورتونة حبايبي .

رشا :وراها طلعنة نتمشة وطول الطريق اني مبتسمة وبس ارجف خوف لا امي تحس عليه ..ورجف لان اول مرة احس هلشعور ..

..............
ويا صفنتي وطبت سهام تصيحني حتة اتغدة .. انتبهت على الساعة جانت ب٢ ونص ..

حييل كل هذا اني كاعدة ومحاسة بروحي ..

نزلت سلمت جانو كلهم مجموعين ع الغدة ..

الله يساعدكم ..

ردو :هلة برشيوة ..

ابوية صاحني :.. تعالي بنيتي يمي كعدي ..

رشا :خل اغسل واجي ..
رحت غسلت وجيت كعدت يم ابوية كملنة اكل

وكمت حطيت القوري بين ما يغسلون هوة خدران لان محضر بس اشعل جواه نار ..

غسلت وكفينا المطبخ اني وسهام .. صار الجاي وديتة وحطيتة يم امي حتة تصب ..

ابو سامر :. بوية رشا اليوم رحت لولد صاحبي محامي . وفهمتة على الشغلة مالتج .. كال ماطول

الطرفين ناوين طلاق ماكو اسهل منها ورفعلي قضية كلي اسبوع وتكمل وكلمن يروح لحالة .

رشا: احتصر كلبي واني اسمع هيج صح مجنت ناوية ارجع حتة لو تراجع عن قرارة صهيب لان لو اموت

مااسامحة على السواه .. بس حسيت احساس كلش صعب انخذلت وحسيت كلبي يوجعني ... حاولت اكابر وماخلي احد يحس علية .

ماريد ابين ضعفي كدام اهلي ماريدهم يتأذون ..
جاوبت ابوية ..

رشا: ياريت تستعجل بيها لان اريد ابدي بمعاملة تقديم على كلية زينة بمعدلي حتة لو معهد المهم اخذ شهادة .

ابو سامر: والله عاشت ايدج .. من البداية كتلج قدمي بس انتي عاندتي .

سامر: يابة مو وكتة هلحجي .. طالما تريد هيج يجرالها شعدنة غيرها ..

عماد: اي والله اني باجر اروح اسأل واستفسر على كليات انشالله الكة كلية وحتة لو ملكيت اقدملج على اهلية لو قسطها ١٠ ملايين اهم شي تكونين مرتاحة ..

رشا :متقصر حبيبي ..

وراها كلمن طش لغرفتة ياخذون قيلولة .. الة اني اخذ قيلولة من الماضي .. واجي .. كل مااغمض

عيوني اشوف صورتة .. كل ماسمع اسمي اتذكر اسمي بصوتة ..

حبنة جان طاهر .. جان يخاف يلزمني .. مافد يوم تجرا وحجة كلام يجرحني .. جان حجينة كلة احلام وامنيات ..

حتة مجان يخابرني لقاءاتنة جانت من اروح لبيتهم ويا امي .. لو مرات رسايل صغار اذا ملحك يوكف وياي يدزهن بيد اختة الاكبر منة بحجة تسولف وياي ..

اتذكر مرة من جنت سادس .. جنت احسة ضايج حيل كل مااشوفة من بدة الدوام وهوة مو على بعضة ... من شفت امي تريد تروح لخالة ام صهيب ..

كتلها ماما اريد اروح ضايجة وختنكت اريد اطلع ..

ام سامر: بس يماما مبقة شي على امتحاناتج ..

رشا: يمة لعبت نفسي من البيت والدوام اريد اروح يم البنات..

ام سامر: سودة علية ادري صاير ضغط عليج... بس اريدج تطلعين معدل ترفعين راسنة بي ..

رشا :انشالله مافشلكم . ..

مشينة واول مطبينة سلمت على خالة والبنات ..

اشوية وصاحتني اختة الجبيرة اسمها انوار ..

انوار :. رشا تعالي وياي بالغرفة نسولف واشوفج ملابس الجدد اخذ رأيج بيهن .. وخلي الكبار يسولفن هنا .

رشا: باوعت لامي هزت راسها بمعنى روحي ..

رحت وطبيت لغرفتهن بس احسها على اعصابها انوار .اشوية وطب صهيب .. كلبي كام يضرب طبل

كمت اسمع دكاتة توترت حيل .. شفت عيونة شلون تلمع لهفة الي ..

طب وكل لاختة ..

صهيب: انوار طلعي وضلي ورة الباب لا يجي احد

انوار :خوش انوب جنا مراسيل هسة مراقبين .

صاح بيها وخزرها :. انواااار ..

انوار: اسفين عيني خاف جرحنة الخانم ..

صهيب :وتالي عاد ..

رشا :طلعت وسدت الباب كتلة لا خلي مفتوح .

صهيب: شبيج رشا تخافين مني ..

رشا: لا بس احسن لا اختك تفهم غلط ..

صهيب: معليج بيها شتفهم خل تفهم .

رشا :شبيك صهيب مو على بعضك ..

صهيب :.. تعبت رشا لوين نضل هيج ..تعبت واني اتحسر على عطرج اتمنة الزم شعرج .. الزم ايدج ..

اخاف الوث برائتج الي حبيتها .. تعبت واني اشوفج كبالي تفترين وماكدر امنع عيون الكل وهية تباوع عليج

رشا :صهيب انت تدري انت تسوة الكل .. وماكو احد يعنيلي بكدك ..

صهيب: خايف اخسرج .

رشا: ليش تحجي هيج ..

صهيب: انتي هلسنة سادس وسنة التجي كلية واكو هواي شباب احسن مني واغنى مني ..

خايف لا تفكرين بغيري .. وتعوفيني ..

رشا :صهيب اني ماكدر ابدلك بالدنيا انت اول حب بحياتي ..

صهيب: تعبت واني اتخيلج بهذا شعرج تفترين كدام شباب الجامعة ..

متدرين شنو الافكار التجيني .. دموت يومية
خايف لا اهلج يرفضوني لان اني حدي سادس وانتي حتكملين ويصير فرق شهادات ..

وانتي تدرين لولا الظروف ووفاة ابوية مجان تركت الدراسة وبديت اشتغل حتة اعيش امي وخواتي ..

رشا :كافي صهيب لا تكمل .. اذا تريدني ماكمل عادي اكمل بعد منتزوج .. ويجوز نقدم سوة .. .

صهيب: اوكفي رشا شكاعد تحجين اني مكتلج بطلي هذا مستقبلج ماكدر ادمرة بانانيتي وتفكيري السلبي .

رشا :انت مستقبلي صهيب .. واني واثقة بقراري .. واذا يوم تندمت ارجع اكمل لان بس اخذ الشهادة واطلع معدل زين .. اترك .. وانت تعال تقدم ..

صهيب: رشا اريد اليوم قبل باجر تصيرين الي ..

رشا: صهيب

صهيب: عيونة صهيب .

رشا :تحبني ؟؟

صهيب: اموت عليج. .. والله يشهد على كلامي وستر خواتي احبج اكثر من روحي ومايوم اخليج تندمين .

رشا: صهيب اني راح اتحجب حتة متضل شايل هم الي يباوع علية ... شعري راح اخلي بس الك ..

صهيب: رشا احبج ورب الكعبة احبج واتنفس هواج ..
متدرين شكد ريحتي كلبي من كلتي هلحجاية ..

رشا: جنت اني واكفة وهوة كاعد على جرباية ام النفر ..
كتلة ..
اني صار لازم اروح لا يضل بالها لامي ..

صهيب: احبج غزالتي ..

رشا: اني هم احبك صهيب ..

طلعت رحت يم امي وانوار بس تخوزر بية وتنافخ .
مدري منو دايس على ذيلها ...

طلعنة من بيتهم واني احس كلبي طاير .. ياناس اعشقة واعشق كلشي بي واهم شي حواجبة ..يمةة تموت

فعلا كملت السادس اجة تقدملي بس ..
الي صار واحد من عمامي رفض بحجة يريدني لواحد من ولدة .. وضل معارض وخطية صهيب يروح ويجي ..

ويودي مشيات ويجيب مشيات لحد ماقتنع من شاف صهيب متمسك بية ..

تقريبا ضل بال٣ اشهر ..

طبعا مقدمت على كلية لان كتلهم اريد ارتاح من تعب السادس .

طلع معدلي ٨٥ نقهرت بوقتها وضليت بس ابجي ..
اهلي يواسوني ويفهوني انو هذا المعدل زين وحلو .

واني قافلة .. ومنها طلعت حجة ارتاح وماقدم ..

ونخطبنة ... وجانت احلة لحظات بعمري بوكتها ..
لان محد حاس من يصوم عن شي يحبة وهوة محرم عليه ..
سنين واحنة ننتظر هاي اللحظة ..
تحقق حلمنة ..

جابلي موبايل لان مجان عندي مجنت اشوف الة. داعي لان جنت من احتاج اتصل على صديقاتي تلفون ماما موجود فمشفت الة داعي ..

بس من جابلي صهيب موبايل عبالك جابلي الدنيا

صرنة نتخابر طول الليل والنهار . .. قليل نتفارك ..
زاد حبنة وتعلقنة ببعض وشوقنة ولهفتنة زادت وهوة يتغزل بية وبعيوني .

جان يكلي عيونج عشقي وشعرج اوكسجيني ..

مرت حياتنة كلش حلوة جنا منتظرين يجهز نفسة لان امكانيتة على كد الحال وبابا واخواني قررو يساعدو بس هوة رفض وهذا الشي خلا يكبر بنظر بابا..

طولت خطوبتنا ٤ سنوات .. بس احنة عقدنة محكمة بعد الخطوبة بسبوع ..

لحد ماقررو يوم العرس .. جنت احير شجهز ..ومن نطلع نشتري الذهب اطير فرح وممصدكين ..

رغم كلام انوار الي يسمم... بس انطيها الاذن لطرشة اهم شي عندي حبيبي .

كملنة كلشي واجة يوم الحنة وجانت من اسعد ايام ..

من اجة حناني جان وجهة مخطوف مثل المتوتر واكثر من مرة وكعت الكلادة من ايدة وهوة يلبسني

كوة كمل وطلع قبل اهلة .. جنت مستغربة تصرفة ..

بس فهمت ثاني يوم من صدمني بطلاق ..

صحيت من قيلولتي واني جنت ناوية انساه ...

مرت الايام تركض وصار موعد الجلسة وبيوم الموعد لبست احلة ماعندي .. وكشخت وطلعت اجنن ..
جنت مترددة اسويها لو لا

بس سويتها ونزعت الحجاب .. لان ماريد البسة علمودة .. اريد البسة واني مقتنعة بي .. اريد احرك كلبة .

نزلت واني ضافرتة صفح وطولان صاير جوة وركي .

صفنو علية بس محجو شي خلوني براحتي ..
ورحت للمحكمة اول مطبيت صار كبالي ..

نطت عيونة وهوة شافني بلا حجاب .. اجة يتقدم علية بس المحامي مالتة لزمة ..

واني رافعة تك حاجب واباوعلة بغرور .. وعبرتة بدون مااسلم ..

شاور المحامي مالتة واجة المحامي حجة ويا ابوية .. بس ابوية كلة يصير خير ..

ورة اشوية ابوية كلي .

ابو سامر : بوية رشا صهيب يريد يحاجيج قبل لا تدخلون .. صح على اعصابي قبلت بس كلت اشوفة شيريد هلنذل ..

رشا :عادي بابا كلامة ميأثر بشي بية حشوفة ..
رحت واني متوقعة الكلام الي حيكولة ..

طبيت للقاعة الفارغة الي جانت بصف الممر الي واكفين بي ..

اول مطبيت سحبني من زندي وعاط بصوتة ..

صهيب: انتي تخبلتي متقصدة تحركين كلبي بسوالفج هاي ..

رشا: وانت شنو دخلك بية حي الله خطيب جنت وحنطلك ..

صهيب: بس خطيب .. اني صهيب نسيتني بسهولة ..

رشا :انت الي بديت مو اني ..

صهيب: مجبور رشا لخاطرج سويت هيج ..
راح تفهميني بعدين ..

رشا :صهيب لتحاول انت انتهيت بالنسبة الي ..

صهيب: انتي الي لا تحاويلن تمثلين رشا .. بعدها لمعة عيونج من تشوفيني .. بعدج تحبيني .

رشا : غلطان هواي صهيب .
مو اني الي انكسر وارجع ارضخ ..

لو تصير الهوة ماتنفس بعد

عفتة طلعت واني ارجف كلبي مكسور .. عقلي مشوش ..
اكو فاصل شعرة بين الحب والكره .. على كد المحبة يصير الكره ..

بس اني احبة .. وبعدة كلبي ينتفض من يشوفة ..
دتأذة حيل واني اتذكر السواه ..

كملنة الجلسة واني اتذكر كل ايامنة ونزلت دمعة متمردة لتكشف زيف الشخصية الي اني تقمصتها ..

مثلت دور البرود والا مبالاة وكان داخلي يتقطع الم .
نزلت دمعة تعلن استسلامها لقرار القاضي وهوة حكم بطلاق وصدق الامر مع الشهود

طلعنة واني بوجهي للسيارة محجيت شي بس صافنة ..

وصلنة واول مطبيت للبيت كبل صعدت لغرفتي ..
وشمرت روحي ع المخدة واصرخ بعلو صوتي بس كاتمة بالمخدة ..

صهيييب عفتني .. مو كتلي ماعوفج ...
اصيح وابجي ..

لحد مغفيت من التعب ..

كعدت المغرب نزلت مالي نفس .. لكيتهم ينتظروني .
كعدت بحضن امي وسويت نفسي نعسانة .

جنت احاول استمد طاقتي منها اريد طاقة حتة اتحمل الايام الجاية

مرت الايام ..يوم امر من القبلة ..
جنت اكضيها نوم واكل وابقة سهرانة ..

لحد مايوم جنت كاعدة بالغرفة مالتي بعد ماكملنة غدة وشربنة جاي .. وكلمن راح لغرفتة ..

جنت متمددة على الجرباية بعالمي الخاص .
طبت سهام مفزوعة ووجها مخطوف ..

سهام: رشا الحكي ..

رشا :شكو سهام شصاير ..

سهام :صهيب..

رشا :شبي احجي

سهام: اخذو الشرطة هسة والدنيا مكلوبة يمهم ..

رشا :رجف كلبي بطاري من سمعت واكع بشدة ..

يتبع .....

لأتنسو التصويت حبايبي محتاجة دعم ..

تحياتي الكاتبة ..
Aseel

❤❤❤❤❤ احبكم