رواية قضية طلاق الفصل الاول 1 - بقلم Aseel🤗

مساء الخير حبايبي. .

البارت ٢

"قضية طلاق"

بقلم الكاتبة Aseel

_____________

رشا : فتحت عيني اشوف سكف غرفة امي وراس امي فوكاية ..

اشوف حلكها يتحرك بس مااسمع شتكول .. رجعت غمضت عيني ومحسيت الا على لغوة يمي ..

اريد اسكتهم ماكدر .. احس لساني مربوط وكلامهم يدك براسي ..

كافي سكتو راسي حيطك ... احجي بكلبي عسا ولعل يسمعون .. بس ماكو .. حاولت وقاومت بس اريد

افتح عيوني ثكيلة كلش كوة كدرت اشوف خيط ابيض ..

كمت افتح واسد .. لحد ماشفت بياض مغوش وناس فوكاية . 

اشوية اشوية بدة الصوت يوضح بس الصورة مغوشة ...

اسمعهم يسولفون ..

الدكتور : بعدة مرتفع واذا يضل هيج احتمال تدخل غيبوبة ..

الدكتور ٢: اعتقد بدت تصحى ..

الدكتور : ابو علاء .. لتخلي احد يفوت هنا .. الي يريد كلهم حالتها حرجة ممنوع دخول ..

رشا: اسمعهم بس ماكدر اجاوب ولا اشوف زين ..

اتمنة اكلهم سكتو راسي ماتحمل صوتكم .. جنت اصيح واغلط عليهم حتة يسكتون بس ميصلع صوت ..

جنت احجي بكلبي ..

الدكتور: اتسمعيني .. ؟؟

اذا تسمعيني رمشي عيونج ..

رشا : حاولت ارمش كوة .. بس مكدرت اسيطر اول مغمضت رمشي

وراها بدة الصوت يختفي ورجعت للضلام ..

_____

زهرة : بيوم زفة رشا جان البيت كلة مخبوص بالفرح ويحير الواحد شلون يعبر عن فرحة برشا ..

بس الي كسر فرحتنة صرختها الي خلتنة نتدمر بقرار صهيب .. شحالها هية ..

دمرها ودمر فرحتها .. ماانسة شلون فقدت وشكت ثوبها واغمة عليها

شالوها حطوها بغرفة خالتي .. ومجانت تصحة ابد.حاولنا اني وصفية وكوة نزعناها وبدللناها ..

اخذوها للمستشفى وجان ضغطها كلش مرتفع وصايبتها جلطة خفيفة .. انصدمنة كلنة شنو جلطة وهية كل عمرها ٢٢ سنة ..

جانت لحظات ماتمناها لعدوي باقين بالطوارئ ومنعرف حالتها شلون تصفة ..

كل دكتور يكول شكل ..

تعبت نفسيتنة .. وحيصير اسبوع وهية فاقدة . 

الدكتور يكول اذ بقت هيج منا ليومين احتمال تدخل غيبوبة طويلة متصحة منها ..

خالتي ماخلت دعاء مادعتة ..

حتة كعدت بحديقة المستشفى وفتحت صدها ونخت  العباس .. خلت الي بالمستشفى كلها تبجي على حالتها .. جانت رشا مو بس بنتها .. هاي صديقتها الكل يحبها ..

دعاء خالتي ماطول للفجر .. وكالو صحت .. الي يسجد والي يتحاضن .. لان جانو مأيسين منها .

وخافو لا تدخل غيبوبة .. لان هواي صارت وياهم ولهسة ماصحو ..

كلة الي صار من ورة صهيب النذل ربي ينتقم منة .

______

رشا :  فتحت عيوني كوة .. هدوء يمي وبس اشوف سكف ابيض وكلوبات .. ضليت صافنة واني اتذكر  الي صار وياي وارجع اختنك .. دموعي تنزل ..

ليش هيج صهيب .. ليش ماعفتني من الاول اذا جنت ناوي تغدرني ..  ليش ..؟؟

دخل علية الدكتور شافني صاحية ضحك بوجهي ..جان دكتور مبين ثلاثيني .. لان حلو ومرتب .. لوماحالتي جان زحفتلة .. يلة اخلي لزهرة ..

الدكتور : حمد لله ع السلامة الاميرة النائمة ..

رشا : الله يسلمك .. ليش شكد صارلي  هنا ..وبعدين اني شجابني للمستشفى ..

الدكتور : صارلج ٨ ايام ... ماشبعتي نوم كافي دلال .. لو عجبج سرير المستشفى ..

رشا : وين اهلي .. 

الدكتور : برة .. نكمل فحوصات وندخلهم .

رشا : كملت فحوصات وتقريبا ساعة وكملت ..
جان تدخل علية الثور المجنح ونامت فوكاية ..

يمعودة وخري ختنكت .. ويجرون بيها وهية نايمة فوكاية وتبجي ..

ولج وخري ضمي دموعج لفاتحتي راح تموتيني ..

كوة وخرت .. كالت وهية تسحب خشمها وتناشغ ..

زهرة : كلبة حقيرة .. ليش هيج .. ولج طلعت احبج ومادري . 

رشا : امدة وجهج اي والله وخري خنكتيني ..
جتي امي هم تحضن وتبجي ..

وراها اجن الفيلق صفية وتماظر والبنات الباقيات كل وحدة حضنة ودموع .. ماكلكم شبعت خنين بجتفي .. ميعجبهن الة بجتفي يسحبون اقسام ..

كافي عاد لعبتو نفسي .. وخرن عاد ..

جتي زهرة كعدت يمي  جان تكول ..

زهرة : واني اكول متكعد اثاري السرير مريح ..

جان تهمس باذني ..

بيني وبينج تمنيتج متكعدين حتة اضل اباوع للمصقولة الي مشرف عليج .. كل ميمر افكر اعثر كدامة بس خفت لا انسحل من خواني .. وانحرم من شوفتة .

رشا : لخاطر ربج شكد تلغين كافي راسي صدع ..

ام سامر : كافي زهيرة تلحكين ع السوالف لا تتعبوها بنيتي توها صحت على كيفكم ..

رشا : وراها جوي كلهم الي تحمد والي يواسي بالصار ..واني ساعة يمهم وساعة يروح بالي بعيد ..

جان هسة اني يمة .. ليش هيج سويت .. صهيب ..

معقولة كل هلحب يطلع جذب .. .

_____________/

صهيب : كاعد بليل بغرفتي اباوع للاثاث غرفة صاج عراقي .. اختيارنا اني ورشا .. صاج اسود واحمر ..

اجر بجكاير وماكو .. يخلص باكيت افتح الثاني .. يخلصن الجكاير. ودموعي موكفن .. جان هسة نايمة بحضني ..

جان هسة اشم شعرها .. اهمس بذانها ..

اسمع اسمي بصوتها الدافي .. اصبح بعيونها العسلي ..

كل هذا راح .. بورقة ..

ابجي ومخنوك  محد يحس بناري .. بنضرهم نذل وغدر.. ميدرون خيروني اختيارين واحد امر من الثاني ..

ثنينهن موت بالحياة ..

حيصير ١٠ ايام من يوم حنتي لليوم واني على نفس كعدتي .. لا اطلع واطب .. واكل قليل على كد الحاجة ..

كلها تسأل ليش .. وماكدر اجاوب .. اكتفي بسكوت ..

ساعة صارت ب١ ونص بليل .. الجو بارد .. جنا بهيج ساعة نسولف ونتغازل ..

ماعرف اخبارها .. مادري شصار من سمعت الخبر .. ادريها متتحمل .. بس مجبور .. محد يفهمني ..

بيتهم بشارعنة بعد ٣ بيوت .. يعني جوارين .. مكابل الشباك وكاعد .. عسا ولعل المح طيفها ..

رحت مددت ع الجرباية وعيني على السكف والجكارة بحلكي .. اسمع صوت رجاج .. صوت تلفون يرج ..

مشفت منو .. ضل يتصل اخر شي اخذتة دغلقة جان اشوف رقمها يتصل .. اووف يا راحة صهيب .. شحالج هسة .

مكدرت ارد .. مااتحمل عتابها .. عفتها تدك ويفصل وترجع تدك .. اخر شي وصلت رسالة . 

فتحتها جان انصدم .. مضمونها ..

(اني بلباب )..

رسالة من كلمتين خلتني اكمز من فراشي ..
لبست التيشرت وركضت حافي ..

اريد بس اوصل للباب ..

وصلت باب البرة .. وشفت خيالها من جوة الباب ..

من كد ما متلهف الها بودي احضن خيالها ..

من صرت قريب للباب اسمع صوت طكت سنونها من لبرد ..

فتحت الباب جان تصير بوجهي .. صفنت جان تطب بالحديقة .. ابوع عليها بملابس النوم .. بجامة بهارية .. وحافية وبلا حجاب .. وحاضنة ايدها وترجف من البرد ..

لان شتة وشهر ال١ نهايتة ..

وكفت وصفنت علية واني ساكت وصافن .. كأنما نظراتنة تسولف الي بداخلنة ..

سألتها : شجابج بالوقت .. شلون تطلعبن هيج انتي مخبلة .

رشا : خايف علية .

صهيب : طبعا اخاف غير مر.... سكتت مكدرت اكمل

رشا : ليش لابس التيشرت مكلوبي .

صهيب : مادري بي جنت نازعة ومن قريت رسالتج عقل مضل براسي طفرت كبل للباب واني البس بي ..

رشا : لهدرجة مهمة اني

صهيب : اكيد ..

رشا : صهيب .. !!

صهيب : عيون صهي... سكتت ورجعت كملت ... نعم .

رشا : ليش صهيب .. جاوبني بس كلي ليش ...

شوف ايدي .. اثر حنتك بعدها .. ليش كسرتني هيج

جان كلت من البداية ماحبج ماافيدج ..

ليش خليتني هيج .. ليش توصلها للمحاكم صهيب .. ليش دمرتني ودمرت احلامي .. شسويتلك .

صهيب : من سمعت كلامها ودموعها الي تنزل سجاجين بكلبي .. متحملت كعدت بالكاع وابجي مثل الطفل ..

مجبور صدكيني مجبور ..

رشا : ماكو شي يجبرك تسوي هيج بهيج يوم ..

صهيب : اكو رشا .. اكو اشياء ماكدر احجيها ..

رشا كومي روحي لبيتكم انتي جيتج غلط لهنا ..

رشا : اي صح جيتي غلط بهيج وكت للمكان الي المفروض هسة اني بي ..

اعتذر .. ازعجتك ..

صهيب : حجت وراحت تركض وماكدر اصيح عليها ..

طلعت وراها ملحكت شفتها طبت لبيتهم ..

رجعت للوكر مالي واني كسرتي اكثر من قبل ..

شفت صهيب شسويت برشا .. شفت عيونها الي تعشقهم شلون ذبلانات .. ليش هيج دمرتها ..

احاجي واعاتب روحي .... ياناس مجبور ..

___________

رشا بعد مطلعت المستشفى بيومين لان جنت تحت المراقبة ..

رجعت للبيت واني بداخلي حسرة والم .. المفروض ادخلة خطار هسة .. سانداتني صفية وزهرة .. هذني سندي ..

ها عميتن علية بنواحيجن هاي رجعت يمجن باقية واتمدد ..

زهرة : فدوة رشا لا تحمليني الصوج والله احس اني خربط السالفة من ورة عركة الصالون ..

صفية : دسكتي يمعودة علمود عركة عفطية مثلجن يتخاربون .. اكيد اكو سبب قوي . 

لان ادري بصهيب يحب رشا هذا حارب الدنيا علمودها .. ممعقولة كل هذا جذب .

زهرة :اغمز لصفية اريدها تسكت ماكو انطلقت اعضعض بشفتي زوركتها بس تسكت الة كرصتها يلة حست وسكتت بس بعديش بعد ما كتت الاول والتالي ..

رشا : جنت متمددة بغرفتي ويمي زهرة وصفية يسولفن وياي .. بعدين كتلهن اريد ابقة وحدي ماريد احد يدخل

بقيت وحدي افكر بكلام صفية .. صهيب ليش هيج سوة .. اخذني التفكير  .. وغفيت ..

شفت روحي بمكان كلة نار يشتعل مثل الحمم البركانية .. وصهيب واكف بمكان مثل البستان .. اصيحلة . 

بس هوة مقيد بشجرة عملاقة بسلاسل .. ويصيح علية ..

يريد يخلصني بس ميكدر .. فزيت مرعوبة من الحلم .. لكيت زهرة تمسح براسي ومهبوطة من منظري المفزع ..

زهرة : اسم الله شبيج ... رشا .

رشا : صافنة واني ببالي ليش هيج سوة صهيب . 

اريد اروح

زهرة : وين يالله .. تخبلتي انتي تدرين ساعة ابيش هسة ..

رشا : معلية .. اريد اروح هسة ..
نزلت بهدومي ومحسيت بروحي الة واني ببابهم .. ادك عليه ميجاوب ..

كتلني البرد وزهرة تاشر بيدها تعالي ..

تجاهلتها .. دزيلتة رسالة .. ثواني وطلع ملهوف

صفنت بوجها مبين عليه التعب والسهر ..

الكلام الدار بينة جان اكثرة بعيونة ..

شفتة شلون مكسور وهوة يبجي مثل الطفل ..

بس صحيت على روحي من كلي جيتج غلط

صح اني ليش جيت .. وين كرامتي .. ليش امشي ورة كلبي ..

اني شجابني هنا . اعتذرت منة وركضت حتة ملحك يلزمني .. اول مطبيت ..

استلمتني

زهرة : انتي شبيج مثل الخبلة .. فزيتي من نومج .

والله لو واحد من اخونج شافج لا يعصرج يطلع صهيبات صغار منج.. لان ادري بيج صهيب يمشي بدمج متتوبين مو وصلتي الموت من وراه ..

رشا : صعدت لغرفتي وكعدت ع الجرباية ابجي ..
مو بيدي بعدني احبة ..

متدرين الي بداخلي شنو .. ولج حلم عمري جان بلحظة يروح .. ولج جان هسة المفروض بحضنة اني المفروض نايمة على صدرة. ..

زهرة : هوب هوب عمي وين رحتي .. اشو بعد  اشوية يصير حجي فوك ال🔞

رشا : زهرة تعبت كافي تشاقين حسي بناري شوية .. كليلي شسوي .. تعبت هذا هذا (وااشر على كلبي )  يوجعني .. احس كلبي معصور .. رحتلة عسا ولعل اعرف السبب بس ماكال ..

زهرة : خل يولي هلنذل ميستاهل دمعة منج ..
كافي لا تمردين روحي .. لا تشوفيني اتشاقة واضحك .. ترة بس اريد اغير جو عليج ..

رشا : زهرة شوكت موعد الجلسة مال محكمة ..

زهرة : عوفج هسة من هلسالفة وكليلي هاي مرت اخوج الحية شو ماكو شعجب ..

رشا : لج لا تحجين عليها اصلا حبابة مادري هوة اني مو جنت بالمستشفى ..

ولا تغيرين الموضوع .. كليلي الموعد شوكت .. .

زهرة : الموعد جان قبل ٤ ايام بس بسبب حالتج تأجلت القضية للشهر الجاي .

رشا : حنام اني ...

زهرة : تريدين شي ..

رشا : اي ..

زهرة: كمت لحيلي .. كولي حبيبتي ..

رشا : اترجاج سكتي وبعد لتحجين اريد ارتاح ..

زهرة : هوة مو صوجج غير كلت اخفف عنج .. ...

رشا : عطت بيها دكافي شكد تلغين ..
جان تأشرلي على حلكها بحركة خيط وابرة عود خيطتة وبعد متحجي ..

سكتنة واشوفها تتكلب .. مثل السمجة الي مزوهرة غصب عني ابتسمت رغم القهر الي بية ..

اعرفها اذا عدها حجاية متنام اذا متحجيها ..

صحتها وهية عبالك ممصدكة كمزت كالت ها ..

احجي زهرة شضامة ..

زهرة : اخاف تضوجين ..

رشا : ليش اكو شي اكثر من هيج يضوجني ..

احجي وخلصيني ..

زهرة : حماتج هاي ام راس المربع ..

رشا :ابتسمت ..  زهرة تسميها هيج لان راسها صدك جبير ومربع بس هاي خلقة الله .. شبيها حماتي ..

زهرة : جتي لهنا بيوم الزفة تريد نرجع الذهب .. وكالت الهدوم والغراض الكم ..

رشا : وهذا الشي الي يضوج .. ولج اخذو فرحتي .. اخذو كلبي .. شنو قيمة الذهب مقابل كسر كلبي ..

زهرة : ولج مو بس هيج ..

رشا : لعد شنو بعد ..

زهرة : بقت الحلقة بيدج هم يريدوها اليوم من جنتي نايمة جتي وهية نافخة صماخهة تريدها بس امج زفتها خوش زفة .. تربيتي بعد كلبي خالتي ..

رشا : صفنت على ايدي اني ليش بعدني لابسة الحلقة .. مديت ايدي اريد انزعها ماكدر كمت ابجي واني احاول اجر بيها ..

الحلقة مو صغيرة على ايدي بس ماعرف ليش حشرت .. صرت اتعارك وياها واصيح طلعي .. عليمن باقية بيدي ..

هدتني زهرة .. ونزعتني ياها على كيف بسرعة طلعت .. لعد ليش مكدرت انزعها ..

نزعتها واني من شفتها خارج ايدي اتاكدت صهيب بعد ميجمعني بي شي ..

كسرني وكسر كلبي .. خرب فرحتي .. الله ينتقم منك يا انذل بشر شفتة .. 

.......يتبع ...

لا تنسو التصويت والدعم حبايبي ..

تحياتي . Aseel
😍