تحميل رواية خدعة صوت دمرت فرحتي بقلم هويدا زغلول pdf

لارين واقفه في القاعه ساعه فرحها. الكل فرحان ومبسوط وبعدها الدي جي قال في المايك

الدي جي

ياريت الكل يركز علي الشاشه هنا لو سمحت في هديه جت للعروسه دلوقتي من أقرب حد ليها

وبعدها الكل ركز معاه الشاشه وبعدها كان تسجيل صوتي بصوت العروسه

لارين

يا بنتي اي الكلام العبيط ده انا عملت العمليه خلاص ورجعت بنت واللي اسمه حازم خلاص هيشيل الليله المغفل

وبعدها الكل كان مصدوم من اللي سمعه وبعدها لارين قالت

لارين

ايه الهبل اللي بيحصل ده هو ازاي التسجيل ده بصوتي كده

حازم

ده كل اللي همك يا ست هانم ايه الكلام الفارغ اللي بيتقال ده انا مش فاهم اي حاجه وعمليه ايه اللي انتي عملتيها

لارين

اكيد انت مش هتصدق الهبل اللي بيحصل ده انت شاكك في ان انا ممكن اكون عملت اي حاجه غلط ولا ايه

حازم

انا اللي بسال سؤال دلوقتي وعايزه افهم ايه الكلام اللي بيتقال ده

وبعدها عمها قرب منها لان باباها كان متوفي وكانت عايشه معاه عمها وقال

العم

ايه لارين اللي بيحصل ده انا مش فاهم اي حاجه والتسجيل ده يا بنتي ازاي بصوتك كده

لارين

والله يا عمي انا مش فاهمه اي حاجه واللي وجع قلبي ان حازم مصدق الكلام ده عليا

العم

الكلام الفارغ اللي انت بتقوله ده ازاي انت تكون شاكك في بنت اخويا انا واثق فيها ثقه عمياء ممكن تكون عملت الكلام ده

حازم

لا والله ودي لعبه بقى عاملينها انتم الاثنين مع بعض ولا تكون حضرتك اللي اتفقنا ثمن العمليه اللي عملتها

العم

انا هدفعك ثمن الكلام اللي انت قلته ده كبير قوي يلا بينا يا لارين عشان نروح على البيت

حازم

استنى عندك رايح فين هي مش هتمشي من هنا قبل ما ارمي عليها يمين الطلاق لا يمكن تكون مراتي ابدا بعد اللي حصل ده

وفي الوقت ده جه مصطفى اخوه واقف جنبه وبعدها قاله

مصطفي

اهدى بس يا حازم مش وقته الكلام ده سيبها تمشي مع عمها دلوقتي

لارين كانت ماشيه ورا عمها وهي لابسه فستان الفرح ودموعها مغرقه وشها وكل واحد في الشارع بيبصلها بنظرات كلها فضول لحد ما دخلت البيت وهي حاسه إن الدنيا كلها وقعت فوق دماغها وبعدها مرات عمها قالت

دلال

جايه تشيلها وهي دي الحطه روحنا على جمل ورجعنا على قطه يا فضحتنا قدام الحاره كلها وقدام الناس اللي عزمناهم واللي كانوا بيباركوا لكم من شويه

شوكت

اخرصي يا وليه انا مش عايز اسمع صوتك خالص ولا كلمه زياده منك ادخلي جوه يلا وسيبيني اتكلم مع البنت لوحدنا

دلال

ماشي يا شوكت بس افتكر كلامي بعدين ولما الحقيقه تبان متقولش اني ما حذرتكش

شوكت

قولتلك ادخلي جوه حالا ومش عايز اشوف وشك قدامي دلوقتي

ودخلت دلال وبعدها اريد تعيط وقالت عمها

لارين

مش عارفه يا عمي اقول لك ايه والله العظيم انا لحد دلوقتي مش مصدقه اللي حصل ده وانت اللي ربيتني من وانا صغيره وانت اكتر واحد في الدنيا عارف اخلاقي وعارف ان عمري ما عملت حاجه تغضب ربنا ولا تكسفك قدام الناس

شوكت

انا مصدقك يا حبيبتي وعارف انك عمرك ما تعملي حاجه غلط ولو الدنيا كلها وقفت قدامي وقالت غير كده انا هفضل واثق فيكي بس اللي حصل ده كبير قوي والتسجيل كان بصوتك بالحرف الواحد وانا مش قادر افهم ازاي ده حصل

لارين

طالما حضرتك واثق فيا يبقى خلاص خدني بنفسك لأي دكتور واعمل ليا كشف قدامك وهتعرف بنفسك ان كل الكلام اللي اتقال ده كدب وافتراء وان في حد بيتعمد يدمر حياتي ويخرب فرحتي

وفي اللحظه دي خرجت دلال من الأوضه وهي واقفه على الباب

دلال

ما هو يا حبيبتي انتي بنفسك قولتي في التسجيل انك عملتي العمليه وبقيتي بنت من جديد يعني حتى لو كشفنا عليكي دلوقتي اكيد مش هيبان حاجه بعد اللي انتي اعترفتي بيه

شوكت

مش انا قولت لك يا وليه اخشي جوه ومش عايز اشوف وشك خالص انتي كل شويه تزودي الطين بله ليه اتفضلي اخفي من قدامي وسيبيني اتصرف بعقلي

دلال

خلاص يا سيدي داخله اهو بس بكره تعرف اني كنت بخاف عليكم

ودخلت دلال وهي ساكته بعد ما قفل شوكت الباب

شوكت

بصي يا لارين انا مش هسمح لحد يظلمك ولا يكسرك ولو في واحد ورا اللي حصل ده هعرفه مهما استخبى ومهما حاول يضيع الحقيقه وخليكي متأكده يا بنتي ان انا عارف ان انتي عمرك ما هتعملي حاجه غلط والموضوع ده مش هينتهي غير لما نعرف مين اللي عمل التسجيل وليه عمله وهنثبت براءتك قدام الناس كلها

وبعدها سكت شويه وبعدين قال

شوكت

ادخلي يا بنتي اوضتك وحاولي ترتاحي الليله دي وربنا يسترها علينا كلنا والصبح بإذن الله نقعد ونتكلم بهدوء ونشوف هنعمل ايه وخلي ثقتك في ربنا كبيره لأنه عمره ما بيسيب حق المظلوم

لارين

حاضر يا عمي وربنا وحده عالم بالنار اللي جوا قلبي وان شاء الله هيظهر الحق مهما طال الوقت

وبعدها دخلت لارين أوضتها وهي لسه لابسه فستان الفرح وقعدت على السرير ودموعها بتنزل من غير ما تقدر توقفها وهي بتفتكر اللي حصل قدام الناس

وفي شقة مصطفى دخل حازم وهو في قمة عصبيته وقعد على الكنبه وهو بيرزع مفاتيحه على الترابيزه

مصطفى

يا ابني اهدى شويه بقى ما ينفعش تفضل بالحاله دي لأن الانفعال عمره ما هيجيب حق ولا هيخليك تعرف تاخد قرار صح

حازم

انت ازاي عايزني اهدى بعد اللي حصل ده انا اتكسرت واتفضحت قدام الناس كلها وكان نفسي اطلعها من القاعه وارد كرامتي قدام الكل في نفس اللحظه

رحاب

ازاي بس عايز تعمل كده والعفش والقايمه والحاجات اللي انت ماضي عليها هتعمل فيهم ايه لازم تفكر قبل ما تاخد اي خطوه

حازم

هي هيكون ليها عين تطلب مني اي حاجه بعد اللي عملته ده والله لاحط صوابعي في عينيها وفي عين أهلها كلهم ولو فاكرين انهم هيضحكوا عليا يبقى غلطانين

رحاب

اهدى بس يا حازم ما ينفعش الانفعال اللي انت فيه ده ولو هي فعلا عملت العمليه زي ما التسجيل بيقول فهي هتثبت وقت الكشف انها بنت وساعتها انت اللي هتشيل الموضوع كله والناس هتقول انك ظلمتها فلازم تفكر بعقلك الأول ونشوف الحقيقه قبل أي قرار

مصطفى

رحاب معاها حق احنا مش هنقدر نفكر طول ما اعصابنا مشدوده بالشكل ده اطلع ريح في شقتك شويه ولما نهدا كلنا نبقى نتكلم في الحوار ده بعقل

حازم

ماشي بس اقسم بالله لو طلعت كدابه مش هرحمها ولا هرحم أي حد كان شريك في اللي حصل

وبعدها قام حازم وطلع شقته اللي فوق وهو لسه غضبان وقفل الباب وراه بعنف

رحاب

فكره في الجون بصراحه بس قولي عملتها ازاي دي ان شاء الله عرفت تجيب صورة البنت دي ازاي

مصطفى

انا ما عملتش حاجه خالص والله وكنت فاكر ان انتي اللي دبريتي الموضوع ده

رحاب

صحيح انا طمعانه في فلوس أخوك ومش عايزه الجوازه دي من الأول لكن والله ما عملت حاجه زي كده ولا اعرف مين اللي ورا اللي حصل تفتكر فعلا البنت ليها ماضي واحنا مالناش دعوه

مصطفى

يا خبر لو طلع الموضوع كله حقيقه يبقى الفلوس بكره هتبقى ببلاش والجوازه الحمد لله اتفشكلت من قبل ما تبدأ يلا بينا ندخل ننام ولما الصبح يطلع نشوف الدنيا مخبيه ايه

وبعدها رحاب دخلت علي السرير وبدأت تفتكر اللي حصل لما كان حازم عندهم

فلاش باك

كان حازم داخل شقة مصطفى ووشه كله فرحة وهو ماسك علبة حلويات في إيده

حازم

بجد يا مصطفى انا مش قادر اصدق كلها كام شهر وهتجوز لارين انت متعرفش لارين دي حب حياتي ومن يوم ما وافقت عليا وانا حاسس ان الدنيا كلها بقت ملكي

مصطفى

حبيبي ربنا يوفقك ويسعدك والله ما تعرف انا فرحان قد ايه انك هتعمل الحاجه اللي نفسك فيها وربنا يتممها على خير

رحاب كانت واقفه بتبص لحازم وبعدها قالت

رحاب

انا مش عارفه ليه بس مش مرتاحه للبنت دي وحاسه انها مش مناسباك انت طيب وغلبان وبجد محتاج واحده تكون زيك طيبه عشان تقدر تعيش معاك

حازم

انا مش فاهم في ايه بالظبط انا خلاص فاضل حاجات بسيطه واتجوز لارين وانتي جايه تتكلمي بالكلام ده دلوقتي ليه

وبعدها لف حازم ومشي وهو متضايق من كلامها

اول ما الباب اتقفل مصطفى بص لرحاب بغضب وقال

مصطفى

هو انتي غاويه مشاكل والسلام ولا ايه هو انتي ناسيه ان احنا عايشين عنده في العماره بتاعته ولو فضلتي تتكلمي بالطريقه دي انا واثق ومتأكد ان اخويا هيمشيني من البيت وانا مش عايز مشاكل معاه لو سمحتي

رحاب

انت لازم تشوف حل علشان البنت دي تبعد عنه لو فضلت كده انا واثقه ومتأكده ان الجوازه دي لو تمت اخوك مش هيدينا الفلوس اللي بيدفعها كل شهر

مصطفى

وعلى اساس يعني كلامك اللي انتي عماله تقوليه ده هيقدر يديني الفلوس كل شهر اهدي شويه وانا هتصرف في الحوار ده

رحاب

لما نشوف يا حبيبي انت هتتصرف هتعمل ايه يعني بس خلي بالك انت لو ما تصرفتش انا اللي هتصرف انا يستحيل ارجع لعيشه الفقر تاني اللي انا كنت عايشه

باك

وفي شقه نادين

شوكت كان نايم على السرير وفجأه دلال صحته من النوم وقالت

دلال

قوم يا شوكت عايزاك في موضوع مهم جدا انا كنت لسه بتكلم مع اختي دلوقتي وقالتلي يعني حتى لو البنت عملت عمليه الدكتور هيقدر يثبت اذا كانت فعلا كانت بنت بنوت ولا لا

وفي الوقت ده هو صحي من النوم وقال ليها

شوكت

الله يخرب بيتك ايه اللي خلاكي تتكلمي مع اخواتك في حاجه زي دي هو ناقصين كلام ناس

دلال

ده على اساس يا حبيبي ان اللي حصل ده كان بيني وبينك ده اللي حصل كان قدام الناس كلها والبلد كلها عرفت وبعدين انت سايب الموضوع المهم اللي انا بتكلم معاك فيه وماسكلي في دي ليه بقولك ايه انا بكره هحجز لها عند دكتور ونشوف الحوار ده

شوكت

اخرسي خالص وبطلي كلام في الموضوع ده ونامي

دلال

انام ايه هو انا بكلمك في ايه وانت بتقول ايه احنا لازم نعرف كلامها صدق ولا لا ولو طلعت فعلا كانت بتقول الحق وكانت بنت بنوت انا هعتذرلها قدام الناس كلها وهقول اني ظلمتها لكن لو طلع التسجيل حقيقي والبنت فعلا عملت اللي اتقال دي مش هتقعد في بيتي لحظه واحده انت سامع ولا لا

شوكت

انتي عايزاني ارمي بنت اخويا في الشارع ولا ايه دي يتيمه ومالهاش غيري ولو الدنيا كلها قامت عليها انا مستحيل اسيبها

دلال

وانا عندي بنات يا حبيبي واخاف عليهم الناس مبتنساش والكلام بيلف في كل حته ولو فضلت هنا سمعتهم هتبقى في الارض وكل واحد هيقول دي بنت عايشه في بيتهم وعملتلها عمليه ورجعت بنت من جديد مين بعد كده هيجي يتجوز بناتنا لازم نفكر في مستقبلهم قبل أي حاجه

شوكت

انتي مستعجله على الحكم ليه البنت من ساعه ما دخلت البيت وهي بتحلف انها مظلومه وانا واثق فيها ومش هظلمها لمجرد تسجيل محدش عارف جه منين

دلال

وانا كمان مش عايزه اظلمها عشان كده بقولك نكشف عليها ونقفل الموضوع ولو بريئه انا اول واحده هتمسك ايدها وتقف جنبها لكن لو طلعت مذنبه يبقى كل واحد يروح لحاله

شوكت

ماشي يا دلال هنروح للدكتور وهنعرف الحقيقه لكن اسمعيني كويس لو الدكتور قال انها بريئه مش عايز اسمع منك بعدها كلمه واحده تجرحها

دلال

اتفقنا وانا راضيه بأي نتيجه المهم الحقيقه تظهر عشان كل واحد يعرف هو واقف على أرض ايه

وبعدها تاني يوم الباب عند شوكت خبط وفتح وكانت بنته نادين

نادين

صباح الخير يا بابا اسفه ان انا بصحيك من النوم بدري قوي كده بس كنت عايزه اسالك على لارين اصل انا صحيت من النوم ودخلت الاوضه بتاعتها علشان خاطر اشوفها لقيتها مش موجوده

الاب

ايه الكلام الفارغ اللي انت بتقولي عليه ده هكون راحت فين يعني

وفي الوقت ده قامت دلال وقالت لي

دلال

عشان تعرف يا حبيبي ان انا كلامي حقيقي هي اكيد ساعتنا امبارح واحنا بنتكلم في موضوع الدكتور ولما عرفت بقى ان كتبتها تتكشف خدت بعضها ومشيت من هنا

شوكت

اخرسي خالص سكيتي امك يا نادين عشان بجد لو فضلت تتكلم اكتر من كده انا هرمي عليها يمين الطلاق

وبعدين دخل جوا عشان يلبس وكان نازل

دلال

هو انت رايح فين كده يا اخويا او هتقول انك نازل تدور عليها بقول لك ايه البنت دي بعد اللي عملته ده انا مش هخليها تدخل البيت ثاني ولو انت ناوي ترجعها بقى شوف مكان ليك انت وهي تعيش فين

شوكت

دلال ابعدي عني دلوقتي انا مش ناقص اي كلام انت سامعه ولا لا

وبعدها نادين دخلت وقالت

نادين

يا بابا ماما عندها حق بجد لارين كده هتعملي مشاكل جامده وهتخلي خطيبي يسيبني

شوكت

انا كده كده مش هسيبها حتى لو هي اللي عملت كده انا لازم اغسل عاري بايدي هو انت ناسيه ان هي بنت اخويا ولا ايه

وبعدها اخد بعض ونزل على الشارع في الوقت ده نادين قربت من مامتها وقالت

نادين

حلو قوي اللي انتي عملتيه ده يا ست الكل بس مش تاخدي رايي الفيديو باين قوي ان هو متفبرك

رواية خدعة صوت دمرت فرحتي الجزء الثاني 2 بقلم هويدا زغلول

خدعة صوت دمرت فرحتيرواية خدعة صوت دمرت فرحتي الحلقة الثانية

دلال

وانتي يا اختي إيه اللي فهمك اذا كان متفبرك ولا مش متفبرك انتي هتعمليلي فيها ناصحه ما تخليكي في حالك

نادين

يا ماما انا مش صغيره ده انا بنتك وتربيتك وكمان طالعالك انا عارفه اصلا هدفك ايه من اللعبه اللي انتي بتعمليها دي كلها

دلال

عاوزه ايه يا بنت بطني عاوزه ابوكي يطلقني يعني ما تلمي لسانك وتسكتي هو انا يعني عملت ايه عاوزه تلبسيني اى مصيبه وخلاص

نادين

ما انا مش داخله دماغي أن حازم يسيب لارين ده بيعشق التراب اللي بتمشي عليه

دلال

الفلوس يا قلب امك تعمل من الزبال ملك وان كان حازم عنده فالبحر بيحب الزياده الله اعلم بقى هو كان واخدها علشان بيحبها ولا علشان الفلوس اللي هتاخدها لما تتجوز

نادين

معقول يا ماما لارين معاها ده كله طب ولما هي كده عايشه معانا الفتره دي كلها ليه وازاى بابا موافق

دلال

ابوها سايب لها وديعه في البنك بقد كده ده غير حته ارض خاصه بيها اول ما تتجوز يا اختي ويتكتب عليها هتاخدها يعني ابوكي بعد السنين دي كلها مش هيطلع حاجه هيطلع من المولد من غير حمص والديون اللي عليه مش هيعرف يسدها

نادين

اه طيب تمام

دلال

خليكي في حالك بقي وادخلي اوضتك ومش عايزين كلام كتير

وبعدها دخلت الاوضه و عند لارين راحت عند صاحبتها لين إلى أول ما شافتها قالت

لين

والله يا لارين كنت خايفه اكلمك الموقف اللي حصل لك مش أتمناه لحد تعالى يا قلبي اتفضلي

لارين دخلت وراها وقالت

معلش انا مش عايزه اتقل عليكي انا بس اموري تظبط وهطلع من عندك مبقاش ينفع اقعد في بيت عمي

لين

ليه بس كده ده عمك بيحبك أوي يا لارين معقول يكون شاكك فيك بردو

لارين

مش عمى اللي شاكك دي مرات عمي هي اللي بتحرضو عليا انا سمعتها امبارح وهي بتقول ليه تعالى نروح نكشف عند الدكتور نتاكد اذا كانت بنت بجد ولا عامله عمليه وكله هيبان

لين

وانتي خايفه من ايه يا لارين كنتى روحي وخلاص واكسري عين اي حد يتكلم معاكي الفكره ان الموضوع مش سهل وانت بنت وسمعتك

لارين قاطعتها وقالت

لارين

انا مش هروح ولا اتاكد انا واثقه من نفسي وعارفه نفسي على ايه حتى حازم مش اداني فرصه ان انا ابرر له

لين

طب بصي يا لارين لو في حاجه صارحيني وانا والله مش هقول لحد هو انتي فعلا عملتي العمليه دي

لارين

حتى انتي يا لين عموما يا ستي اطمني انا بنت ومش عملت عمليات ودي لعبه اتلعبت عليا يمكن الحسنه الوحيده ان هي اظهرتلي ناس كنت فاكره ان هم بيحبوني

لين

طب ودلوقتي هتعملي ايه انا ما عنديش مشكله تقعدي عندي سنين والله اشيلك فوق دماغي بس لازم نتواصل مع حازم على الاقل نشوف هو هيعمل ايه

لارين

حازم صدق اللي هو سمعه بس نحاول نكلمه يمكن يسمع مني ويعرف ان انا بريئه وان انا بنت وما حدش لمسني

لين

طيب اي رايك تخليني انا أكلمه واشوف كده يمكن اعرف أجل الحوار بيني وبينه

لين حاولت تتصل بحازم بس هو مش بيرد وبصت للارين وقالت

لين

مش بيرد عليا شكله متضايق ايه رايك نسيبه يهدى شويه بعد كده نحاول نكلمه تاني

لارين

مش فارقه كتير لان هو اتخلى عني واحنا لسه في بدايه حياتنا مع بعض معنى كده ان هو لا يؤتمن وان كان هو عايز يطلق فانا مش فارق معايا

لين

معقول يا لارين حازم مش فارق معاكي ده انت كنتو عصافير كناريا والله حاسه أنها عين وصابتكو

لارين

لا يا لين هي مش عين وصابتنا ده ابتلاء من ربنا عشان اكتشف الناس اللي حواليها بتفكر فيا ازاى انا دماغي مش جيبانى أعمل ايه دلوقتي

لين

طب بصي احنا نستنى نشوف حازم هيعمل ايه بناء على كده نتحرك هو لو شاريكي هيفضل يدور عليكي علشان يفهم منك اللي حصل لكن لو هو بايعك هيفضل ينغص عليكي عيشتك لحد ما يطلقك او انتي تخلعيه

لارين

انا لازم ارجع بيت عمي دلوقتي بصراحه هو ما لوش ذنب في اللي حصل ده حتى لما سمعته بيتكلم مع مراته كنت عارفه ان هو ما كانش ساكت ليها على اللي حصل

عند شوكت كان رجع البيت وهو متعصب ودلال أول ما شافته قالت

دلال

مش لقيتها صح والله انا شاكه من الاول ان هي كانت دايره على حل شعرها علشان تصدق ان هي عملت كده

شوكت

شكلك مش عاوزه تجبيها لبر يا دلال اسكتي شويه انا في اللي مكفيني مش كفايه الفرخه اللي كنت بعلف فيها السنين دي كلها علشان تبيض هربت مني ومش لاقيها

دلال

يا اخويا ما انا قولتلك تدبح الفرخه من بدري بس انت اللي قولت لا هاكلها شويه كمان عشان لما تكبر ترمي لحمه اكتر اهي سابتك ومشيت لا طلت سما ولا ارض

شوكت

انت عاوزه ايه دلوقتي مش تخليني اطلع جناني عليكي انا مش ناقص تقطيم

نادين دخلت عليهم وقالت

نادين

فرخه ايه اللي انتم عمالين تتكلموا عليها انا مش فاهمه حاجه وانت يا بابا كنت تشوف لارين مش لقيتها هتكون راحت فين

شوكت

خدى امك وامشو من قدامى واسكتوا بقى خليكم انتو حاطين ايديكم في ميه البطيخ انا اللي في وش المدفع انا اللي عليا ديون انا اللي استغفلتني

دلال كانت هترد بس جرس الباب رن نادين راحت تفتح وكان حازم

نادين

حازم معقول بنفسك جاي لحد هنا وقربت منه وقالت مش لو كنت رضيت بيا كان زمانك بعيد عن الفضيحه دي كلها اتفضل اتفضل

حازم

بقول لك ايه يا نادين انا روحي في مناخيري مش عايز وجع دماغ هو انتى مش مخطوبه ولا العيله كلها هنا شمال ولو خطيبك مش مالي عينك سيبيه احسن يجي يوم الفرح يلاقيكي زي بنت عمك

شوكت طلع على صوتهم وقال

شوكت

انتى سايبه واقف على الباب ليه يا بنت انت تعالى يا ابني ادخل وبالفعل حاجه اللي دخل معاه

نادين بصت على حازم بغيظ وقالت

نادين

انا اه مخطوبه بس فرحانه فيك قوي يا حازم لان انا كان المفروض اكون مكان لارين وانت اخترتها اشرب بقى اما اشوف المسرحيه دي اخرها ايه يا ترى مين اللي عمل كده وقفلت الباب ودخلت

حازم بص ل شوكي وبغل قال

حازم

مش انت كنت قايل ليا ان انا مجرد ما نتجوز الخير هيهل ايه بقى اللي حصل ده انت كنت عايز تلبسها لي وهي مستعمله

دلال

انا مش فاهماك الصراحه يا حازم يعني انت عندك عماره وربنا مديك ومش ناقصك في حاجه مالك بقى

حازم

وانتى شاغله بالك بيا ليه مش يمكن انتى إلى ورا التسجيل دا عشان تلهفى الليله كلها ولا ايه يا عم شوكت

شوكت

انت ملكش انك تكلمنى انا اكتر حد عاوزها تتنيل تتجوز يعني مليش مصلحه أن الجوازه تبوظ

حازم

طب بالصلاه على النبي كدا انا عاوز اعرف هيا فين عشان تمضي تنازل عن القائمه والدهب اصل ميبقاش موت وخراب بيوت

دلال

اه قول كده بقى انك عامل اللعبه دي كلها عشان تلهف الليله كلها لارين هي اللي مجهزه البيت وهي اللي جايبه الذهب انت بقى اللي حاطط الفيديو ده عشان تطلع كسبان من الجوازه دي هو انت بتاجر.

حازم

وليه ما تقوليش ان انتي اللي عملتي الموضوع ده بعمل مصلحتك طبعا انت وجوزك عشان تسدوا ديونكم اصل انا ليا نظره في الناس ومن تعاملي معاكوا عرفت ان انتم طماعين

شوكت

مش تحسسني ان انت شيخ جامع وماسك سبحه انت اصلا واخد الجواز ده من اوله لاخره مصلحه اوعى تكون مهرب لارين عندك وعامل المسلسل ده كله علشان تاخد انت كل حاجه لوحدك

حازم

انا قولت اللي عندي شوف بنت اخوك فين عشان تمضي على تنازل على القايمه والذهب بدل ما افضحكم وخلي بالك انت عندك بنت وسابهم ومشي

في الوقت ده لارين كانت واقفه على الباب وسمعت كل حاجه وقالت

لارين

قال وانا اللي كنت جايه علشان خاطر عمي لانه ما لوش ذنب طب دلوقتي انا اتشتت مش عارفه مين الصديق ومين العدو ومشيت بسرعه قبل ما حد يشوفها

عند رحاب كانت بتتخانق مع مصطفى وقالت

رحاب

لا بقول لك ايه يا مصطفى احنا لازم يطلع لنا حاجه مش هنفضل عاله على اخوك اللي ممكن في ثانيه اشيل ايده من علينا

مصطفي

انا مش فاهمك الصراحه انت عايزه ايه انت مالك انت هو انت مش كل حاجه تطلبيها تجيلك مالك ومال حازم حاطه نقرك من نقره ليه

رحاب

انا واثقه ان حازم كان عايز يتجوز لارين جواز مصلحه هيطلع منه بسبوبه كله بيرمي صنارته وبيصطاد واحنا ملناش حظ ولا هما عشان سمك كبير هياكلوا السمك الصغير انا عايزه ابقى زيهم اتصرف

مصطفي

هو ايه اللي اتصرف يا رحاب ايه الطمع ده وقرب منها وقال اوعي تكوني انتي اللي ورا الفيديو اللي اتعرض في القاعه قسما بالله لو ليكي علاقه بالموضوع من قريب او من بعيد هتشوفي وش عمرك ما شوفتيه

رحاب

يا اخويا خليك انت كده مغفل وهتطبطب ودادي وكله عمال يقب واحنا اللي في القاع لحد لما غطسنا وبعدين انا مالي ومال الفيديو اصلا انا بتكلم في ايه وانت بتتكلم في ايه

مصطفي

انا قولت اللي عندي وياويلك مني يا رحاب علشان لارين انا واثق أنها مظلومه

رحاب

مالك يا اخويا عمال تدافع عنها كده ليه هو انت حاطط عينيك عليها عاوز تجيب لي ضره ولا ايه

مصطفي

انا اصلا مش هتكلم معاكي الجدال معاكي بقى عقيم هوفر مجهود واتكل على الله اشوف شغلى واقعدى انتى كلى فى نفسك وسابها ومشي

رحاب

لا ما هو مش بعد الفضيحه دى كلها بردو مش يحصل حاجه انا كنت فاكره ان حازم ممكن يقتلها ويتسجن وانا اتدلع بالفلوس كلها هو ساكت ليه مش عارفه

عند لين كانت قاعده مع لارين بتحاول تهديها وقالت

لين

مع اني كنت معرضاكي ان انتي تروحي هناك علشان محدش يتعرضلك بس بجد انا مصدومه من اللى قولتيه طب دلوقتي مين السبب انا دماغي لفت ما مش معقول يكون الكل مشتبه بيه

لارين

انا اللي مبقتش واثقه في حد خالص دلوقتي انا لازم اوكل محامي علشان اجيب حقي من حازم اللى نيمنى فى العسل وهو متجوزنى مصلحه

لين

طب هتجيبي الفلوس منين والوديعه لسه مش اتفكت انا عندي فكره حلوه انا اخويا محامي ممكن اكلمه يساعدك ولما ربنا يكرمك تبقي تديله اتعابه

لارين

تفتكري هيوافق انا بجد محتاجه ارفع قضيه حازم ممكن يسبقنى ويرفع قضية شرف وساعتها هيبلع كل حاجه وسمعتى انا اللى هتفضل في الطين

وفي الوقت ده دخل نادر وقال

نادر

أنا ممكن اساعدك معنديش مانع وبالنسبة للأتعاب انتى صاحبة اختى هصبر عليكي مفيش مشكله

لين

نادر انت جيت امتى انا مخدتش بالي وانت داخل وبعدين مش كنت بتقول عندك شغل وهتتأخر اسبوع

نادر

خلصت الشغل بدري وقلت اجي اخدك ونتغدى برا بس لقيت عندك ضيوف وبصراحه سمعت كل كلامكم

لارين

انا ممكن اشوف مكان تاني اقعد فيه عشان تبقو براحتكم اصل انا مش ينفع اقعد في مكان انت موجود فيه كفايه الفضيحه اللي انا فيها ولسه هتتحرك سمعته بيقول

نادر

ومين قال لك ان انا هقعد هنا انا اصلا في العاده مش بقعد هنا انا ليا شقه خاصه بيا بقعد فيها فوجودك أو عدمه مش فارق عندى وسابها ودخل ياخد هدومه

لارين

على فكره اخوكي ده قليل الذوق واظاهر أن شغله طفح عليه اعوذ بالله منه

لين

على فكره نادر طيب اوى بس تلاقيه بس ضغط شغل لكن اسلوبه كده في العادي ده اصلا لو اتكلم كلمه حلوه اعرفي ان هو تعبان او سخن

لارين

وانا مالي يا ستي بيعمل اللي هو عايزه وانا هناسبه ولا هتجوزه اصل كانت ناقصه

لين

بقول لك ايه يا لارين بما انك عندي انا عايزه استغلال استغلال وحش قوي بصراحه كده انا نفسي مكرونه بشاميل وما حدش زيك يعرف يعملها ما تيجي نعمل الجريمه دي في المطبخ بما أن كده كده الدنيا خربانه

لارين

والله انت ما عندكيش دم بقى شايفه صاحبتك في المشاكل دي كلها وكمان عايزاها تقوم تعملك مكرونه بشاميل يكش تطفحيها يا شيخه

لين

قومي بس انا والله بعمل كده عشانك مش عشاني والله انا عايزاكى بس تفكي بس اه صح بحبها يكون على وشها جبنه موتزاريلا وشدتها غصب عنها وقالت قومي بقا يا وليه وقامت معاها ودخلت المطبخ

عند نادين كانت بتكلم صاحبتها فى التليفون وقالت

نادين

انت مش متخيله يا ندى انا فرحانه قد ايه ان جوازة حازم ولارين باظت

ندى

اوعي تكوني انت نادين اللي عملت الفيديو ده وحطيتيه يوم فرحها أزعل منك والله

نادين

يا بنت يا هبله هو انا لو عملت كده هكتفي بس ان انا احطه في القاعه ده انا مش بعيد انزله على السوشيال ميديا كلها هو انت ما تعرفيش غلاوه لارين عندي ولا ايه

ندى

اه يا اختي عارفه لدرجه ان انت فضلت تحبي في حازم في صمت وانت عارفه ان هو هيتجوز لارين

نادين

بقول لك ايه بطلي دور التأنيب دا انا أصلا مش عندى دم فريحي نفسك هقفل انا بقا عشان اشوف سكان البيت بيعملوا ايه وقفلت المكالمه وطلعت من اوضتها تشوف امها بتعمل ايه

عند حازم كان بيتكلم فى التليفون وقال.

حازم

مش تنسي ان انتي كمان ليكي مصلحه في اللي حصل وكنتي عايزه تعملي اكتر من كده بس انا قولتلك لا نكتفي بالفيديو ده على امل ان جوزك يغسل عاره بايده ويتسجن واحنا نقسم مع بعض بس لا هو واقف جنبها وبوظ كل اللي احنا خططنانه

دلال

علشان هو واحد غبي فاكر نفسه ابوها بجد مع انه هو كمان كان هيموت على الوديعه اللي كانت تتفك لما لارين تتجوزك اهو لا طال لا سما ولا أرض بس الى مش فهمته إيه مصلحتك

حازم

جالي ضرائب وتصالح على العماره كلها وده هيكلفني مبلغ وقدره فمش عايز ابيع اي شقه في العماره واخسر ثمنها عشان اعمل تصالح وادفع الضرائب عرفتي ليه عاوز امضي لارين على تنازل ما هو مش هيبقي خراب من كله

دلال

طلعت مش سهل يا حازم زي الثعلب المكار طب مش تقول اومال ليه عامل ان انت بتحب لارين طلعت مصلحجي زيك زيي بالظبط

…

رواية خدعة صوت دمرت فرحتي الجزء الثالث 3 بقلم هويدا زغلول

خدعة صوت دمرت فرحتيرواية خدعة صوت دمرت فرحتي الحلقة الثالثة

حازم

ما هو انا كان لازم امثل عليها اني بحبها يا حبيبتي اومال يعني كنا هنقسم الفلوس إزاي لما اخدها منها انتي ناسيه ان احنا دافنينه سوا ولا ايه

دلال ضحكت بخبث

لا يا حبيبي انا مش ناسيه ولا حاجه انا بس عارفه انك طول عمرك مكار ودحلاب وبتعرف تضحك على اللي قدامك بكلمتين حلوين زي ما ضحكت عليا كده وخلتني اقع فيك

حازم

وطي صوتك في الكلام اللي انتي بتقوليه ده لحد يسمعك أومال

دلال

محدش هيسمع ولا نيله المهم دلوقتي البنت دي ترجع غصب عنها عشان تقدر تمضيها علي تنازل وتهددها بالفيديو انك هترفع عليها قضية

حازم

همتك معايا يا حبيبتي بقا مش هوصيكي ماشي

وبعدها قفلت المكالمه وافتكرت الإتفاق اللي كان بينهم

باك

دلال كانت قاعده مع حازم في كافيه وقالت له

دلال

بص يا حازم انا جتيه عشان اقولك ان شوكت ناوي يا خد الفلوس كلها ليه لو انت اتجوزت البت بنت اخوه هو اللي قالي الكلام ده

حازم

انتي بتقولي ايه يا دلال ازاي الكلام ده هو عايز يخلف وعده معايا ولا إيه لا ده انا اروح فيه في داهيه هو جوزك ده هيستهبل ولا إيه احنا بينا إتفاق

دلال

والله بقا هو قالي كده وناوي يخلي بيك وانت عارف عشان انا بحبك جيت قولت لك الكلام اللي دار بينا انا وهو

حازم

يعني فعلا شوكت قالك الكلام ده يا دلال ولا عشان انتي بتغيري من البت عايزاني افشكل الجوازة عشان انا عارفك كويس الغيرة اللي عندك دي هتودينا في داهيه

دلال

لا طبعا اذا كان انا كنت اكتر واحده متسفادة من الجوازة دي عشان الفلوس اللي هتطلع لنا بعد انت ما وعدتني انك تاخد نصيبك من شوكت ونهرب انا وانت بعيد ولا انت نسيت

حازم

لا منستش طبعا وانا كنت عند وعدي ليكي بس الظاهر كده ان جوزك هو اللي عايز يخلي بيا وانا بقا مش متجوز البت دي خلاص وهفشكل الجوازة

دلال

طيب ازاي وانت خلاص اتفقت علي كل حاجه وعلي القاعه وعزمنا الناس وكل الامور ماشيه تمام انا عندي حل كويس

حازم

حل ايه قولي اللي عندك يا دلال

دلال

الحل هو اننا نعمل فضيحة للبت دي يوم الفرح بال AI

حازم

ده اللي هو ازاي يعني ناويه علي ايه يا دلال عرفيني عايزة تعملي ايه بالظبط

دلال

انا هعملها تسجيل بصوتها انما ايه هفاجاك يا حبيبي انت بس اصبر عليا كده

حازم

ماشي وانا معاكي لحد لما نشوف اخرتها ايه مع جوزك ده انا مبحبش اللي يطلع عيل في الاتفاق وجوزك ده اكبر عيل

وبعدها عملت دلال الفيديو بتاع الفضيحة عشان تفضح لارين قدام الناس كلها

وعند لين كانت بتتكلم مع لارين وقالت لها

لين

بصي يا لارين انا كلمت نادر وفهمته كل حاجه وهو مستنيكي في المكتب عشان يسمع منك بنفسه ويشوف هتقدري ترفعي قضيه ولا لأ وأنا هوصلك لحد هناك وبعدها عندي مشوار مهم وهرجع آخدك

لارين

طيب انتي مش هينفع تأجلي مشوارك ده وتيجي معايا الاول عند اخوكي ده اصل انا مش عايزة ابقي معاه لوحدي يعني في اول مقابله كده

لين

يا بنتي هو انتي رايحه تتقدمي له هههههه أنتي رايحه له في مقابلة شغل وخلاص يلا بقا عشان انا لازم اروح مشوارى

لارين

ربنا يخليكي ليا يا لين والله انا مش عارفة اقولك ايه لانك بجد لو مكنتيش واقفه جنبي انا كان زماني ضعت ومكنتش عرفت أعمل ايه في اللي انا فيه ده

لين حضنتها

انتي اختي يا لارين قبل ما تكوني صاحبتي ومش هسيبك غير لما حقك يرجع لك واطمني انا اخويا محامي جامد مش اي حاجة يعني يلا يا حبيبتي عشان اوصلك

بعد شويه وصلت لارين مكتب نادر وخبطت على الباب ودخلت ونادر بص لها وقال

نادر

اهلا وسهلا اتفضلي

لارين

انا لارين اللي لين كلمتك عني

نادر

ايوه ايوه عارف هي لين حكت لي علي كل حاجه بس انا احب اسمع منك برضو اللي حصل فياريت تحكيلي كل اللي حصل من أول يوم عرفتي فيه اللي اسمه حازم ده لحد يوم الفرح

لارين بدأت تحكيله كل التفاصيل وهو ساكت بيسمع لحد ما فجأه قال

نادر

طب مش يمكن يكون التسجيل ده فعلا بصوتك ويمكن انتي اللي قولتي الكلام ده وبعدها بتحاولي تنكري انك عملتي كده وانك شريفه

لارين قامت واقفه وقالت بعصبية

لارين

انت بتقول ايه هو انت ازاي تتكلم معايا كده وانت تعرفني منين عشان تقول عليا كده

نادر

اسمعي يا مدام ولا يا آنسه انا محامي ولازم أشوف كل الاحتمالات ومش هصدق أي حد غير بالدليل والأشكال اللي زيكم كتير وكل واحده بيدتحاول تضحك على القانون بطريقتها الخاصة

لارين

تصدق اني انا غلطانه اني جيت لواحد مريض زيك ومفتكر كل الناس كدابين ومش محترمين انت ليه بتتكلم معايا كده بجد ليه واحنا اول مرة بنتقابل فيها

نادر

وانتي مالك خايفه ليه كده وبعدين انتي ليه هربتي لما عرفتي ان عمك عايز يكشف عليكي الا اذا انتي فعلا غلطتي وعمليه العمليه دي بجد

لارين

برضو لسه بتتمادي في فلة زوقك انت انسان وقح وانا مش هقعد ثانيه واحده في المكان ده وانت آخر واحد ممكن أثق فيه

وخرجت بسرعه وهي دموعها على خدها ومسكت تليفونها واتصلت بلين وقالت

لارين

شوفتي اخوكي قليل الذوق واللي مش محترم عمل ايه يا لين اتهمني في شرفي وقال يمكن التسجيل بتاعي انا انا خلاص تعبت من الناس كلها ومش عايزه مساعده من حد سيبوني في حالي

وقبل ما لين ترد كانت لارين قفلت المكالمه وهي ماشيه في الشارع بتعيط ولين قالت لنفسها

لين

اهو ده اللي كنت خايفه منه ليه كده بس يا نادر تعمل في البنت كده يعني مش قادر تنسي اللي حصل معاك زمان استغفر الله العظيم انا عارفه اني لو اتصلت بيها مش هترد عليا

وفي اوضة نادين كانت بتكلم حازم في التليفون وبتقول

نادين

انت وحشتني اوي يا حازم ونفسي اجي لك

حازم

يا نادين اعقلي انتي مخطوبه يا ماما ومش هينفع كده خالص افرضي خطيبك عرف انك انتي بتحبي واحد تاني

نادين

وفيها ايه لما يعرف يعني انا بصراحه نفسي اقول للكل اني بحبك انت انا عايزاك تحس بيا بقا يا حازم ارجوك

حازم

يا حبيبتي انا معاكي بس برضو انتي عارفة المشاكل اللي انا فيها ومش عارف اخلص منها خالص اعمل ايه بس يا نادين علي العموم انا هستناكي في شقتي لو عرفتي تيجي بكرة

نادين

خلاص يا حازم انا هاجي لك بكرة متتصورش انا فرحانه اد ايه دلوقتي يا حبيبي ياا مع السلامه

في الوقت ده كانت دلال سامعه كل حاجه وقالت لها

دلال

انتي بتكلمي مين يا بنت انتي ومين ده اللي هتروحي عنده انتي اتجننتي ولا إيه

نادين

بقولك ايه يا ماما انا اعمل اللي انا عايزاه ومحدش يتكلم معايا لو سمحتي وبعدين انا بحب حازم وهو كمان بيحبني ياريت بقا ملكيش دعوة بيا وخليكم انتو في الفلوس اللي انتو بتجروا وراها دي

قالت كلامها وسابتها ومشيت ودلال بسرعة اتصلت بحازم وقالت له

دلال

اسمع لما اقولك يا حازم كله الا بنتي انت سامع ولا لأ ابعد عنها يا حازم

حازم

جرا ايه يا دلال ماهي بنتك هي اللي بتجرى ورايا وهي اللي بتتصل بيا كل يوم وبعدين يا حبيبتي اللي عنده معزة يلمها يا دلال

دلال

بقا كده يا حازم بقا ده كلامك معايا وبعدين انت عارف اللي بيني وبينك يعني كفايه عليك انا

حازم

وفيها بعني لما يبقا البت وامها يا دلال ما انتو الاتنين حلوين وعجبني الله وبعدين البنت طالعه لك انتي جوزك مش مالي عيونك وحبتيني وهي خطيبها مش مالي عيونها وحبتني اعمل أيه انا بس

دلال

اه يا واطي يا ندل اسمع يا حازم كله الا بنتي انت سامع ولا لأ علي الله تتعرض لها ولا تخليها تقابلك

وقفل السكه في وشها وهي قالت لنفسها

دلال

اه يا جبان يا واطي ماشي يا حازم اما وريتك مبقاش انا دلال

وعند مصطفى قاعد في الصالة ودخلت عليه رحاب وقالت

رحاب

الحق يا مصطفى انا لازم احكيلك على اللي سمعته دلوقتي قبل ما الموضوع يكبر اكتر من كده لان اخوك حازم بقى بيلعب بالنار وانا مش مطمنة خالص للي هو بيعمله ولا على اللي ممكن يحصل بعد كده

مصطفى باستغراب

هو في ايه يا رحاب وايه الكلام الفارغ اللي انتي بتقوليه ده هو اخويا عمل ايه يعني عشان تدخلي عليا بالشكل ده

رحاب

انا سمعته بوداني البيه كان بيتكلم في التليفون مع البنت اللي اسمها نادين وبعدها دلال امها وكان فاتح الاسبيكر وانا سمعت كل كلمة وطلع ان هو بيضحك على الاتنين وكل واحدة فاكرة انها الوحيدة اللي في حياته

مصطفى

انتي اكيد فهمتي الكلام غلط يا رحاب ازاي حازم اخويا يعمل كده طيب ولاربن دي ايه بقا ما هو كان هيتجوزها

رحاب

انا عارفه هو بيعمل كده ليه ده هو كلم البنت الأول وكان عمال بيحب فيها والظاهر لما دلال عرفت ان بنتها بتكلمه اتصلت بيه وفضلت تهزقه وتقوله ابعد عن بنتي وهو بكل برود قال لها ان بنتها هي اللي بتجري وراه وانها بتحبه وفضل يعايرها ويقول لها ان الام والبنت الاتنين معجبين بيه وانا من ساعة ما سمعت الكلام ده وانا قلبي مقبوض

مصطفى

طيب بقولك ايه يا رحاب سيبك من اخويا ده ومالكيش دعوة بالموضوع ده خالص وانا هتصرف معاه بطريقتي ومش عايزك تدخلي نفسك في مشاكل احنا في غنى عنها

رحاب

وهتعمل ايه يعني يا مصطفى انا شايفة اخوك بيلعب على الكل وبيضحك عليهم وبيوهم كل واحده بكلام حب وكل واحدة فاكرة انها الوحيده في حياته

مصطفى

وانتي عايزة منه ايه يعني هو مش اهم حاجة انه بيدينا الفلوس اخر كل شهر وواقف جنبنا ولا انتي بتدوري على ايه يا رحاب وليه عايزة تفتحي على نفسك وعليا فتوحه هو حر يعمل اللي هو عايزة

رحاب بضيق

انا مش بدور على حاجة والله غير اني اعرف اخوك ليه بيعمل كده وليه عمال يضحك على الستات واحدة ورا التانية لان اللي يخدع الناس بالشكل ده ممكن في يوم يخدع اقرب الناس ليه وانا مش عايزة اصحى في يوم الاقيه لعب بينا احنا كمان

مصطفى

متخافيش طول ما انا موجود هو مش هيقدر يعمل معانا اي حاجة وبعدين واضح انه شايف مصلحته مع دلال وجوزها والبنت اللي اسمها لارين والفلوس اللي بينهم ومش هيسيب السكة دي غير لما يحقق اللي في دماغه

رحاب سكتت لحظة وقالت

رحاب

ماشي يا مصطفى انا قولت اللي عندي وربنا يستر بس انا حاسة ان اخوك رايح في طريق نهايته وحشة وان كل لعبة وليها يوم وتنكشف

وعند لين دخلت مكتب اخوها نادر من غير ما تستأذن ووشها كله غضب وقالت

لين

ممكن اعرف انت ايه اللي انت عملته ده يا نادر هو ينفع تستقبل بنت جاية تطلب مساعدتك بالشكل ده وتخرجها من مكتبك وهي مكسورة الخاطر وبتعيط في الشارع

نادر رفع عينه من الورق وقال

نادر

وهو انا عملت ايه يعني يا لين انا سمعت منها كام كلمة وسألتها شوية اسئلة طبيعي جدا اي محامي يسألها قبل ما ياخد قضية وانا مش شايف اني غلطت في حاجة

لين

لا انت غلطت وغلط كبير كمان لانك من اول لما هي اتكلمت معاك وانت شككت في شرفها واتهمتها انها ممكن تكون هي اللي عملت التسجيل وبعدها جايه تمثل دور الضحية وهي كانت جاية مستندة عليك بعد ربنا وانت كسرت ثقتها في الناس كلها

نادر

صاحبتك نفسها قالتلي تفاصيل كتير وانا كان لازم احط كل الاحتمالات قدامي لان القانون مبيشتغلش بالعواطف ولو انا صدقت كل واحد يدخل مكتبي من غير دليل يبقى اقفل المكتب احسن يا لين واقعد في البيت

لين بعصبية

حرام عليك يا نادر انت ليه بتعمل كده وانا واثقه في صاحبتي لارين ان عمرها ما تعمل حاجة بالشكل ده دي بنت محترمة ومتربية ومستحيل تمشي في السكة دي وكل اللي حصل لها انها وقعت ضحية ناس عديمة الضمير وانت بدل ما تطمنها زودت وجعها

نادر

انا مبقتش اثق في حد خالص بعد اللي شوفته في حياتي وكل انسان بيبقى ليه وشين وانا لازم اشوف الوشين قبل ما احكم

لين اتنهدت

لا يا نادر المشكلة مش في الناس المشكلة فيك انت وانك لحد دلوقتي مش قادر تنسى اللي سها عملته فيك لما خانتك مع صاحبك انت من يومها وانت شايف كل بنت ممكن تكون كدابة وخاينة وده ظلم كبير للبنات المحترمة اللي ملهاش ذنب في اللي حصلك

نادر سكت شوية وقال

نادر

بقولك ايه يا لين انا مش عايز افتح الموضوع ده تاني لانه انتهى من زمان ومش حابب حد يفكرني بيه

لين بعتاب

لا يا نادر وانا هفضل افتح الموضوع لحد ما تفوق لان صاحبتي شريفة ومظلومة وانا عايزاك تقف معاها وتدافع عنها وتجيب لها حقها ولو فضلت تعاملها بالطريقة دي يبقى انت مش الاخ اللي طول عمري كنت فخورة بيه وبقول للناس كلها انه سندي وضهري وانا مش هسكت غير لما اشوفك واقف جنبها وترد لها اعتبارها

وسابت المكتب وخرجت وهو قاعد مكانه ساكت وافتكر اللي حصل زمان والسبب اللي خلاه مش بيثق في اي واحده

باك

كان نادر رايح بيت خالد صاحبه وخبط على الباب وفتح خالد الباب ولما شافه اتوتر وقال

خالد

ااا نادر انت ايه اللي جابك هنا دلوقتي يا صاحبي انا والله مكنتش متوقع اشوفك في الوقت ده خير في حاجه ولا ايه

نادر

ابدا يا خالد انا كنت جاي اقعد معاك شويه لاني بصراحه مخنوق ومش فاهم سهى مالها بقالها يومين متغيره معايا كل ما اكلمها تقولي مشغوله وتقفل المكالمه بسرعه وكأنها عايزه تبعد عني وانا تعبت من التفكير وقولت اجي احكيلك وافك معاك شويه

خالد

وانت مكبر الموضوع اوي ليه كده يا صاحبي ما هي اكيد عندها ظروف ولا حاجه وبعدين سهى بتحبك ومفيش داعي تقلق نفسك بالشكل ده

نادر

والله يا خالد قلبي مش مرتاح وكل ما اكلمها احس انها واحده تانيه خالص وانا مش قادر استحمل بعدها عني بقولك ايه اوعى كده خليني ادخل نقعد جوه ونتكلم براحتنا ولا انت هتسبني واقف علي الباب كده

ودخل نادر البيت وهو بيقول

نادر

ياريت بقا تعملنا كوبايتين قهوه عشان نقعد ونتكلم براحتنا

وفجأه لقي سهى خارجه من اوضة النوم

اتجمد مكانه وبص لها بصدمة وقال

نادر

ايه ده سهى انتي بتعملي ايه هنا

سهى اتوترت لكن حاولت تبان قويه وسكتت وخالد قال

خالد

ااا اهدى بس يا نادر واسمعني الاول والله الموضوع مش زي اللي في دماغك خالص

نادر بعصبيه

وانت بقا عايز تفهمني ايه انا عايز اعرف دلوقتي خطيبتي بتعمل ايه في بيت صاحبي وفي اوضتة نومه اتفضل قولي

سهى ببرود

انت عايز مني ايه يا نادر انا اصلا ما بحبكش ولا عمري حبيتك وكل اللي كان بينا كانت خطوبه وبس وانا بحب خالد ومش هكمل معاك

نادر حس ان الدنيا لفت بيه وقال وهو صوته بيتهز

نادر

اه يا خاينه يا واطيه يعني كنتي بتخونيني مع صاحبي وانا اللي كنت فاكر انك متغيره بسبب ظروف وجاي اشتكيله منك الاقيكي عنده جوه في اوضته نومه لا وكمان بتقوليلي انك بتحبيه بكل بجاحه

خالد

اهدى بس يا نادر خلينا نتكلم بعقل ومتكبرش الموضوع كده يا صاحبي

نادر زقه بعيد عنه وقال

نادر

مفيش بيني وبينك اي كلام ومن النهارده لا انت صاحبي ولا أنا اعرفك وخلي الواطيه دي تنفعك عشان انت وهي اوطى من بعض بس انا بقا مش هسيبكم

قال كلامه وخرج من البيت وهو مكسور القلب

رجع نادر من تفكيرة واتنهد وهو بيمسك تليفونه واتصل على لين

لين

الو يا نادر خير في حاجة

نادر

اسمعي يا لين انا فكرت في كل اللي قولتيه وراجعـت نفسي ويمكن فعلا انا ظلمت صاحبتك وحكمت عليها من غير ما اديها فرصه تدافع عن نفسها وانا خلاص قررت اساعدها واقف جنبها لحد ما الحقيقة كلها تظهر

لين

بجد يا نادر يعني انت فعلا هتتكلم معاها وتعرف ظروفها كلها وهتساعدها ربنا يخليك يا خويا

نادر

ايوه يا لين انا هسمع منها تاني بس المره دي من غير احكام مسبقه ولو طلعت مظلومه هبذل كل اللي اقدر عليه عشان اجيب لها حقها من اللي عمل فيها كده

لين

ربنا يفرح قلبك يا نادر انا كنت واثقه ان قلبك لسه فيه خير خلاص بكره هجيبها معايا على المكتب وتقعدوا تتكلموا براحتكم

نادر

تمام وانا مستنيكم بكره وان شاء الله خير

وفي بيت شوكت كانت دلال قاعده قدامه وهو كان باين عليه القلق والتوتر

شوكت

انا هتجنن واعرف البنت دي راحت فين بقالي ايام بدور عليها في كل مكان ومش عارف عنها حاجه عنها وخايف لتكون حصل لها مصيبه ولا تكون عملت في نفسها حاجه بسبب اللي حصل يوم الفرح

دلال

وايه يعني اللي هيحصل لها يا اخويا سيبك منها دلوقتي وخليك في المصيبه اللي احنا فيها حازم ناوي يرفع عليها قضيه ولو سبقنا يبقا احنا اللي هنلبس في الحيط ولازم نلاقيها قبل ما يتحرك

شوكت

طب وبعدين هنعمل ايه دلوقتي انا صحيح زعلان منها وغضبان بسبب اللي حصل بس برضو دي بنت اخويا ومش عايز حد يأذيها

دلال

يا راجل فوق لنفسك دي هي اللي خلت الناس تاكل وشنا بالكلام ولازم تجيبها بسرعه عشان تغسل عارك بايدك بعد اللي عملته في العيله قبل ما الدنيا كلها تضحك علينا

شوكت

والله يا دلال انا مش قادر اصدق اللي حصل لان ابوها قبل ما يموت وصاني عليها وقاللي خلي بالك من البنت وانا متأكد انها شريفة ومحترمه وعمرها ما تعمل حاجه غلط وانا كنت واثق فيها

دلال

بقولك ايه بلاش ضعف دلوقتي انت لازم تدور عليها في كل مكان وتجيبها غصب عنها وبعدها نشوف هنعمل معاها ايه المهم محدش يسبقنا ليها ولا حازم يعرف يوصل لها قبلنا

شوكت

انا بدور عليها في كل مكان وكل يوم بسأل الناس وبلف عليها في كل حته واكيد في يوم هلاقيها وساعتها هاشوف ساعتها انا هعمل فيها ايه البنت دي

ورجعت لين البيت ودخلت عند لارين الي كانت قاعدة في أوضتها وبتعيط ولين حضنتها وقالت لها

لين

والله يا لارين أنا جيت أعتذر لك من إللي حصل لأن نادر كلمني من شوية واعترف إنه غلطان وإنه ظلمك لما اتسرع في حكمه عليكي وقال لي إن هو ندمان على كل كلمة قالها وعايز يعتذر لك بنفسه ويقعد معاكي ويسمع منك

لارين بضيق

بس أنا عمري ما هخلي أخوكي ده يدافع عني أبدا أخوكي ده إنسان مريض يا لين وإنتي ما شوفتيش هو كان بيكلمني إزاي ولا اتهمني في شرفي بإيه وخلاني أحس إن الدنيا كلها ضدي بعد ما كنت فاكرة إني رايحة لحد يساعدني لقيته بيكسرني أكتر

لين

معلش يا لارين حقك عليا أنا والله ما كنت أعرف إنه هيكلمك بالطريقة دي ولو كنت أعرف ما كنتش سيبتك تروحي له لوحدك بس اصل أخويا فعلا عنده ظروف قديمة صعبة هي اللي خلت ثقته في الناس كلها تهتز بس انا لما كلمته عنك والله قالي انه مستعد يقف جنبك لحد ما حقك يرجع لك

لارين

أنا مقدرة كلامك يا لين بس أخوكي صعب قوي وأنا مش عارفة هتعامل معاه إزاي بعد اللي حصل لأن الكلام اللي قاله وجعني أكتر من اللي حصلي

لين

لا والله هو مش صعب ولا حاجة ده نادر أخويا شهم وجدع وكل الناس بتشهد له بالنزاهة هو بس زي ما قولتت لك انه كان معندوش ثقه في حد بس هو بعد ما راجع نفسه عرف إنه ظلمك وأنا متأكدة إنه أول ما يسمعك هيبقى أول واحد يدافع عنك أرجوكي يا لارين اسمعيه لأن محدش هيعرف يساعدك غيره

لارين

خلاص يا لين أنا هاجي معاكي بس بشرط إنك ما تسيبنيش معاه لوحدنا

لين ابتسمت

حاضر يا حبيبتي وانا هفضل قاعدة معاكي من أول دقيقة لحد آخر دقيقة ويلا بينا دلوقتي نروح له

وبعد شوية دخلوا مكتب نادر ولما شافهم قام من مكانه بسرعة وقال

نادر

أهلا بيكم اتفضلوا وأول حاجة قبل أي كلام أنا لازم أعتذر لك يا آنسة لارين عن الطريقة اللي اتكلمت بيها معاكي المرة اللي فاتت أنا بس كنت متعصب ومتأثر بحاجات قديمة وده عمره ما كان مبرر إني أجرحك أو أضايقك

لارين

حضرتك إنت ما شوفتش نفسك كنت بتكلمني إزاي وعلى العموم أنا سامحتك عشان خاطر لين لأنها صاحبتي وأختي لكن غير كده أنا عمري ما كنت هرجع أقعد قدامك تاني

نادر ابتسم

خلاص بقى المسامح كريم وأنا أوعدك إن من النهارده هتعامل باحترام وأعتبر إن القضية دي قضيتي أنا كمان ودلوقتي عايز أعرف بعد اللي حصل يوم الفرح ليه ما روحتيش تسألي إدارة القاعة مين الشخص اللي جاب الفيديو وسلمه لهم لأن أكيد الشخص ده شافوه أو فيه كاميرات سجلته

لارين

والله يا أستاذ نادر الموضوع ما جاش في بالي أصلا أنا كنت منهارة ومش قادرة أفكر وكل اللي كان في دماغي إني أهرب من نظرات الناس وكلامهم

نادر

يبقا احنا كده لازم نبدأ من هناك لأن ده هيبقا أول خيط ممكن يوصلنا للحقيقة ولو عرفنا مين اللي سلم الفيديو للقاعة هنقدر نعرف مين اللي وراه ومين اللي خطط لكل اللي حصل

لارين

خلاص أنا معاك قولي أعمل إيه وأنا هعمله

نادر

بكرة الصبح هنروح القاعة ونسأل الإدارة ونراجع الكاميرات ولو احتجنا هنطلب نسخة رسمية وبعدها هنمشي ورا كل خيط لحد ما نوصل للشخص الحقيقي اللي عمل المؤامرة دي

لارين بارتباك

طيب هو أنا لازم برضه أعمل الكشف اللي كانوا طالبينه ده

نادر

أيوه طبعا لأن ده هيكون دليل مهم يثبت إن كل الاتهامات اللي اتقالت عليكي كانت باطلة والطب دلوقتي بيقدر يوضح الحقيقة بكل سهولة فما تقلقيش من النقطة دي خالص

لارين

خلاص تمام وأنا موافقة وهعمل كل اللي تقولي عليه

وعند مصطفى داخل على حازم وهو قاعد في شقته وقال له

مصطفى

عايز أعرف دلوقتي إيه اللعبة اللي إنت بتلعبها دي وإيه علاقتك بدلال وبنتها وإيه اللي إنت ناوي تعمله بالظبط لأن اللي بسمعه عنك كل يوم بيخليني مش مطمن

حازم

هو في إيه يا مصطفى إنت جاي تحاسبني ولا إيه مالك داخل سخن عليا كده ليه

مصطفى

أيوه بحاسبك لأنك أخويا وأنا شايف إنك ماشي في طريق كله غلط وكل يوم بتدخل نفسك في مشاكل جديدة ومش خايف من عواقب اللي بتعمله ده

حازم

بس أنا حر يا مصطفى وأعمل اللي أنا عايزه وبعدين أنا بصرف من فلوسي وما باخدش منك ولا مليم واحد يبقى مالكش دعوة بيا

مصطفى

أنا ما قصدتش أتحكم فيك لكن خايف عليك وخايف في يوم تقع وقعة ما تعرفش تقوم منها لأن اللي بيلعب بمشاعر الناس عمره ما بيكسب في الآخر

حازم

أنا عارف أنا بعمل إيه كويس وما حدش يعلمني أمشي حياتي إزاي وكل اللي بشوفه صح بعمله من غير ما أستأذن حد

مصطفى

طب والبنت الغلبانة لارين مين اللي عمل فيها كده ومتأكد إنك بعيد عن اللي حصل ولا يمكن إنت اللي كنت عايز تفسخ الجوازة بأي طريقة

حازم

وأنا هعمل فيها كده ليه ولو كنت مش عايز الجوازة كنت أنهيتها من غير لعب عيال لأن أنا ما بحبش ألف ولا أدور ولو عايز أعمل حاجة بعملها وش

مصطفى

ماشي يا حازم اعمل اللي إنت عايزه لكن افتكر إن كل حاجة بتتعمل في السر بيجي يوم وتنكشف وساعتها محدش هيقدر ينقذك من نتيجة أفعالك ولا من الناس اللي إنت فاكرهم دلوقتي في صفك لأن أول ما المركب تغرق كل واحد فيهم هينط وينجي بنفسه

وسابه وخرج من الشقة وحازم فضل قاعد مكانه بيفكر في اللي هيحصل بعد كده

وتاني يوم راحت لارين ونادر على قاعة الفرح وراحوا للمدير ونادر قال

نادر

احنا محتاجين مساعدتك في موضوع مهم انا عايز العامل اللي استلم الفيديو يوم الفرح

المدير

تحت أمركم أنا ساعدكم بكل اللي أقدر عليه لأن اللي حصل يوم الفرح كان غريب علينا كلنا

وبعدها جه الراجل العامل ونادر قاله

نادر

انت ممكن تفتكر الشخص اللي سلمكم الفيديو وتقدر تعرفه لو شوفته تاني

العامل

أكيد يا باشا لأن وشه محفور في دماغي ومش ممكن أنساه

وبعدها دخلهم أوضة المراقبة وبدأ يشغل تسجيلات كاميرات يوم الفرح وكلهم كانوا مركزين في الشاشة وفجأة الراجل قال

العامل

استنى هنا هي دي الست اللي جابتلي الفيديو وقالتلي أشغله قدام الناس كلها من غير ما أقول مين اللي جابه

لارين بصدمه

دي مرات عمي دلال معقوله هي اللي عملت كده ده هي بنفسها اللي كانت بتحرض عمي عليا وكانت بتكرهني من زمان

نادر

يبقا كده الحمد لله كده احنا وصلنا لأول خيظ في الحقيقة ودلوقتي هنروح القسم ونعمل بلاغ رسمي ونثبت كل اللي وصلناله

وفعلا راحوا القسم وسلموا نسخة من الكاميرات وأقوال الراجل وبعد دقايق خرجوا معاهم الظابط ومعاه قوة من الشرطة وراحوا كلهم على بيت شوكت وأول ما دخلوا شوكت قال لارين

شوكت

انتي رجعتي يا مقصوفة الرقبة

ولسه هيقرب منها منها الظابط وقف قدامه وقال

الظابط

ابعد عنها يا راجل انت احنا جايين نقبض على واحدة اسمها دلال لأنها متهمة في قضية تشهير وتلفيق أدلة

وبعدين وراله صورة من الكاميرات وهو بيسأله

هي فين مراتك دلال

خرجت دلال وهي مرتبكة

ااا هو في إيه يا حضرة الظابط أنا معملتش حاجة واللي في الفيديو ده مش أنا

العامل

لا انتي اللي سلمتني الفيديو بنفسك وكنتي مصرة أشغله قدام الناس كلها

نادر

دلوقتي الأدلة كلها بقت موجودة وإنكارك مش هيفيدك

واتقبض على دلال وراحت القسم وهناك وبعد مواجهة طويلة بالأدلة اعترفت وقالت

دلال

أيوه أنا وحازم اللي خططنا لكل حاجة وعملنا الفيديو عشان نبوظ جوازة لارين لأن شوكت كان طمعان في فلوسها وحازم كان عايز ياخد نصيبه وبعدها يهرب وأنا وافقته على كل اللي حصل ده

لارين أول ما سمعت الاعتراف دموعها نزلت من غير ما تحس وشوكت قال بصدمة

شوكت

اااه يا واطيه يا زباله

وبص للارين وقالها

سامحيني يا بنتي والله ما كنت أعرف إنهم خدعوني بالشكل ده وأنا ظلمتك واتهمتك من غير ما أسمعك حقك عليا يا بنت أخويا

لارين مسحت دموعها

أنا سامحتك يا عمي لكن اللي انكسر جوايا صعب يرجع وأنا خلاص هبدأ حياتي في مكان تاني بعيد عن كل الوجع ده

وبعد انتهاء الإجراءات خرجت لارين مع نادر ولين وكان نادر بيبتسم وقال

نادر

الحمد لله إن الحقيقة ظهرت وعرفت إنك إنسانة محترمة وإن اللي حصل كان ظلم كبير وأنا سعيد إني قدرت أساعدك

لارين

والله يا أستاذ نادر انا مهما شكرتك مش هوفيك حقك لأنك وقفت جنبي لحد ما رجعت لي كرامتي وربنا يجازيك كل خير

نادر بابتسامة

أنا معاكي في أي وقت ولو احتجتي أي حاجة هتلاقيني جنبك دايما

ومن يومها بدأت المسافات بينهم تقرب يوم بعد يوم لحد ما راح نادر طلب إيد لارين من عمها وهي واقفت علطول لانها اعجبت بيه وعاشت معاه اجمل ايام حياتها

وبكده تكون خلصت قصتنا