الفصل 7

دايما كانت تدعى ربها باكتمال سعادتها وان ربنا يرزقها بطفل من يامن. لحد ما جه اليوم اللى قلب الحياة الوردى لجحيم..... كان يامن قاعد على مكتبه بيراجع القضية اللى مسكها جديد بعد فشل هانى وأحمد فى انه يجيبوله معلومات زيادة عن رائف. وفجأة جات مسدج على تليفونه فتحها ووقف مكانه من الصدمة. المسدج كانت عبارة عن صورة لمراته وهى مربوطة وهدومها متقطعة ومعاها مسدج

«تبعد عن القضية مراتك ترجعلك غير كده نجوم السما اقربلك من ضوفر منها» يامن قرأ المسدج واتجنن وبسرعة جرى على عربيته وركبها وساق بيها بسرعة عالية كل اللى بيفكر فيه انه لازم ينقذ بحر، طول الطريق بيحاول على رقمها مش رادة عليه خالص وده جننه اكتر. وصل لمكان شغلها فى وقت قياسى وركن عربيته وجرى على مكتبها بسرعة لقاه فاضى. جات ندى من وراه ندى: يامن باشا؟ خير؟ يامن بلهفة: ندى... بحر فين

ندى باستغراب: تعبت وروحت البيت هى مكلمتكش؟ يامن: لا، خلاص هرجع اشوفها وركب عربيته بسرعة ورجع على البيت.. دخل لقى البيت ساكت ومفيش اى حد فيه دور عليها فى كل مكان ملقاهاش خالص، ظنونه ابتدت تبقى يقين ان بحر جرالها حاجة.. جاب رقم عمر على تليفونه ولسه هيرن عليه لقي مامته بترن رد بلهفة عليها يامن بلهفة وقلق: ماما.. بحر عندك رقية: ايوة يا حبيبى اهى، تعالى على هنا يامن: طيب هى كويسة؟ اديهالى. بحر بتعب: انا بخير يا يامن...

تعالى بس يامن: انا فى الطريق يا حبيبى اهو نزل وهو بيكلمها وركب عربيته بسرعة وطلع على بيت باباه ونزل جرى بلهفة لجوة قابل الشغالة يامن: ماما وبحر فين؟ الشغالة: فوق فى اوضة حضرتك. طلع جرى على السلم وخبط فى يسر يسر: بالراحة يا يامن فيه ايه. معبرهاش وكمل جرى لفوق وهى طلعت وراه تشوف فيه ايه يخليه يجرى بالشكل ده؟!

دخل الاوضة كانت بحر على السرير ورقية قصادها، جرى بلهفة على بحر وحضنها جامد وسط الموجودين وكأنه بيطمن قلبه انها هنا وقدامه... ويسر وراه كانت هتفرقع من الغيظ، هى أولى بالحضن ده؟ ليه مش عايز يحس بكده؟! بحر: مالك يا حبيبى؟ يامن: خليكى كده شوية انسحبت رقية عشان تجيب اكل ليهم وشدت معاها يسر اللى كانت متصنمة على الباب وقفلت الباب وراها. ♕♕♕♕♕♕♕♕♕♕♕♕♕♕♕♕ رقية: مالك واقفة كده ليه؟ يسر: هيكون مالى؟ ابنك وهو طالع خبط فيا،

قولت اشوف فيه ايه رقية: طيب، يلا ننزل يسر: وهنسيبهم؟ رقية: نعم؟ دى مراته يا قلبى يلا بينا وخدتها ونزلت بيها عشان هى مش ضامنة يسر ممكن تعمل ايه؟ جوة عند يامن.... بحر وهى بتمسح على ضهره: برضو مش عايز تقولى مالك؟ يامن: ليه جيتى هنا من غير ما تقوليلى؟ ومش رادة على فونك ليه اصلا. خرجها من حضنه وبصلها... يامن بخضة: ايه اللى فى وشك ده

بحر: كنت نازله من الشغل وبعدى الطريق جه موتوسيكل خطف الفون من ايدى عشان كنت مطلعاه وبرن عليك، ف وهو بيشده كان فيه شجرة اتخبطت فيها ف وشى من الخضة يامن: فى داهية اى حاجة المهم انتى... بتوجعك طيب! بحر: لا يا حبيبى انا بخير يامن: مروحتيش ليه على البيت؟ بحر: كنت تعبانه اوى عشان كده استأذنت من الشغل بدرى ونزلت ولما حصل اللى حصل جيت على هنا اقربلى. يامن: المهم انك بخير يا حبيبتى، بس مالك ايه الى جرالك.

بحر: مش عارفه، ممكن ضغط شغل عشان اليومين اللى فاتوا كانوا ضغط عليا اوى ومش بنام حلو يامن: خلاص يا حبيبى، ارتاحى طيب تعالى نروح البيت بحر: ممكن اطلب منك طلب يامن: اؤمرى يا قلبى بحر: ينفع نقعد هنا مع ماما وعمو محمود؟ وفيه اوضتك هنا، خلينا معاهم ايام الشغل والاجازات ناخدها هناك، ايه رأيك؟ يامن: انتى عايزة كده يعنى؟ بحر: بصراحة.. اه انا بزهق لوحدى هناك وانت بتبقى فى الشغل انا برجع 1 وانت بترجع 9 بليل واحيانا 12

ف لا يا عم خلينا هنا يامن: حاضر..... خلينا هنا والاجازة ناخدها فى بيتنا. حضنته بحر بفرحة وطلعت رقية بلغوها بقرارهم وفرحت اوى بكده ومحمود كذلك. أما يسر ف ضيقتها زادت أضعاف منهم بعد ما عرفت انهم هيستقروا هنا. نزلت بحر ويامن ورجعوا على شقتهم يجيبوا حاجتهم دخلوا الشقة وبحر دخلت اخدت شاور بسرعة وخرجت ويامن كذلك وبعدها طلب اكل. بحر: لحظة هجهز الغدا بسرعة طالما مرضيتش تاكل من عند ماما يامن: لا لا انا طلبت اكل من برة

بحر: ليه طيب؟ يامن: عادى يا بحر.... تعالى اقعدى عايزك بحر وهى بتقعد جنبه: مالك يا حبيبى؟ يامن: انتى فيه حد بيضايقك فى الشغل؟ حد عملك حاجة؟! بحر: لا، ولا اى حاجة، فيه ايه؟ وليه كل القلق اللى انت فيه ده؟ طلع يامن فونه وورا بحر الصورة اللى وصلتله يامن: وصلتنى المسدج دى وصورتك، اتجننت وجريت على شغلك ملقيتكيش وندى قالت انك روحتى، جيت على هنا ملقيتكيش خالص اتجننت ودماغى وقفت مبقتش عارف اعمل ايه...

بحر بدموع: ليه كله عايز يأذينا فى بعض؟ ليه بيوجعونا على بعض بالطريقة دى يا يامن؟ احنا مأزيناش حد. حضنها يامن: محدش هيقدر يفرقنا عن بعض يا روحى، انتى روحى اللى مقدرش اعيش من غيرها، انتى نفسى اللى بتنفسه يا بحر، عمرك شوفتى حد يقدر يعيش من غير ما يتنفس؟ اكيد لا اطمنى يا حبيبتى، احنا مع بعض لآخر العمر ولغاية ما نجيب احفاد كمان بحر: هحكيلهم عليك كتير يامن بابتسامة: هتقوليلهم ايه؟

بحر: هقولهم انك احن راجل أنا شوفته فى حياتى، هقولهم انى مستعدة ادفع عمر فوق عمرى بس تكون موجود معايا. عارف يا يامن لو خيرونى بين الدنيا كلها وبين حضنك ف طز فى الدنيا كلها مش عايزة غيرك انت والله. شدد يامن على حضنها اوى ودعا من جواه ان الحب يديم بينهم. وبعد كده جه الاكل واكلوا سوا وجهزوا حاجتهم اللى هياخدوها معاهم لبيت يامن وناموا سوا بسلام. ♡♡♡♡♡♡♡♡♡♡♡♡♡♡

نزلت بحر الشغل وطلبها رائف وانهارده كان ضغط الشغل شديد وخصوصا على بحر.... رائف: عايزك تعملى فايل لكل موديل خرج من شركتنا الشهور اللى فاتت من وقت ما مسكت الشركة بحر: تمام، هعمله واجيبه لحضرتك بكره رائف: انا عايزه انهارده بحر: الوقت اتأخر جدا ده ميعاد مرواحى، ومش هقدر آخد أوڤر تايم رائف وهو بيخبط على المكتب: ده شغل يا مدام مش وكالة من غير بواب، اتفضلى شوفى شغلك والا مستغنيين عن خدماتك قربت بحر من مكتبه وشدت ورقة

فاضية وكتبت استقالتها بحر: يبقى انا مستقيلة، انا مقبلش انك تكلمنى بالاسلوب ده ولا بالشكل ده، حضرتك بتدينى مرتب لشغلى اللى بيدخلك الفلوس دى، غير كده حضرتك مشترتنيش عشان تعمل كده، بعد اذنك وسابته ومشيت على مكتبها اخدت شنطتها ولمت كل حاجتها ورجعت البيت. استقبلتها رقية وحكتلها اللى حصل.. رقية: أحسن قرار اخدتيه، وهو ليه يكلمك بالطريقة دى أصلا؟ هو ميعرفش انتى مرات مين؟ بحر: انا اللى غاظنى يا ماما انه اشمعنا انا؟

كل ضغط الشغل عليا يخلينى ارجع مقتولة، انا قبل كده مكنش بيحصل كل ده لكن ده بيتعمد يأخرنى انا مش فاهمه ليه؟ رقية: خلاص يا حبيبتى اهدى، اطلعى خدى دوش وغيرى هدومك وصلى يكون يامن رجع وانزلى ناكل سوا. بحر: حاضر يا ماما وجات تقف داخت اوى وقعدت تانى رقية بخضة: مالك يا حبيبتى؟ بحر: مش عارفة يا ماما دايخة اوى رقية: من الغيظ يا حبيبتى ، قومى غيرى هدومك واجيبلك اى حاجة سريعة تروق دمك، وقيسى سكرك يا بحر متهمليش نفسك.

بحر: حاضر يا ماما قعدت شوية وطلعت اوضتها ودخلت تاخد دوش وخرجت ولسه الدوخة مستمرة... ♕♕♕♕♡♡♡♡♡♕♕♕♕♕♕♕ فى اوضة يسر... كانت واقفة مع الخدامه..... يسر: عملتى ايه؟ الخدامة«نعمة»: كله تمام يا ست يسر عملت زى ما قولتى بالظبط يسر: تمام، خدى دول ليكى وروحى انتى واوعى تجيبى سيرة لحد ادتها فلوس كتير ومشيت من قدامها ونزلت ويسر بصت قدامها بفرحة وانتصار. يسر بخبث: اجهزى لخروجك من هنا قريب يا يسر. ♡♡♡♡♡♡♡♡♡♡♡♡♡♡♡♡

رجع يامن من شغله وطلع اوضته لقى بحر نايمة استغرب نومها ودخل اخد دوش وخرج قعد جنبها على السرير يصحيها يامن بحنية: بحر... حبيبتى... قومى يلا بحر بنعس: يامن... حمدلله على السلامة يامن: الله يسلمك يا قلبى... مالك نايمة ليه بحر بنوم: عايزة انام، احضنى.. ابتسم يامن بحب وفرد جسمه جنبها وخدها فى حضنه واستغرب انها سحبت فى النوم تانى بغرق وهى كانت من اقل حاجة تصحى...

بعد شوية صحيوا وبحر لبست عباية وحجاب ونزلوا سوا وايديهم فى ايد بعض ومبتسمين، قعدوا معاهم على السفرة والاكل اتحط والكل بدأ ياكل.. زين بحب: جماعة انا مستعد ادفع نص عمرى وربنا يكرمنى بالحب اللى بينكم اللهم بارك عليكم. يامن: وتدفع نص عمرك ليه قيام الليل هيجيبه زاحف. زين: يا رب، يا رب بحر: والله يا باشمهندس الحب بييجى غفلة من غير تخطيط ولا اى حاجة فجأة تلاقى نفسك حبيت

رقية: والله عندك حق، مش انا هو متجوزة محمود ليا 36 سنة بس اول مرة اقولها انا كنت رافضة اتجوزه وياما اتحايلوا عليا ووافقت ومع العشرة والمودة الحب بينا جه. زين: وانا اعرف ازاى انى حبيت؟

يامن: الحب عامل زى الطلقة اللى بتدخل القلب يا زين وترشق فيه متخرجش غير بموته، شعور حلو اوى تحسه وتحس انك مالك الدنيا كلها بيه، شخص بكلمه منه كفيل ينسيك همومك وتعبك وكل حاجة عديت بيها، حضن صغير قادر يحيك من جديد يا جدع، وتبقى مستغرب نفسك ازاى وامتى بقيت كده؟

فكرة ان فيه شخص مخلوق من ضلعك ومشاركك كل حياتك دى اعظم فكرة فى الدنيا كلها، المودة والرحمة اللى ربنا بيزرعها جوانا لنصنا التانى دى جبارة، احساس انك مش عايز من الدنيا كلها غير الشخص ده بس حابب وجوده، صوته، ريحته، جنانه، كل حاجة فيه تجذبك وتوحشك وتفتقدها حتى لو لسه ماشى ممكملش الثانية، لو حسيت كل ده اعرف انك مش وقعت فى الحب تؤتؤ انت غرقت فيه زى مانا غرقان فى بحر كده، وواقع فى حبها من الدور المليون وانا راضى ومبتسم.

يامن كان بيتكلم وهو باصص فى عيون بحر وماسك ايديها وبحر دموعها نزلت بفرحة وجبر لقلبها ان ربنا رزقها بحب يامن كده وانه مش مكسوف يعبر عنه قدام عيلته واهله، ميلت عليه وحضنته اوى وكأن الحضن ده شكر ليه على كل حاجة عملها ليها. الكل حواليهم كان مبسوطلهم وبيدعى ان ربنا يديم المحبة والمودة بينهم ماعدا يسر كانت باصة عليهم وهى نفسها تولع فيهم..

خلصوا اكل وقعدوا سوا كلهم فى الجنينة وبحر حكت ليامن على اللى حصل ويامن ايد رأيها فى انها متروحش وطلب من زين يشوف شركة كويسة لبحر . ♡♡♡♡♡♡♡••••••••••♡♡♡♡♡ _عملتى ايه؟ @: اللى انت عايزه حصل. _عظيم @: انت سبتها تمشى بسهوله ليه كده يا رائف؟ _: عشان لما المفاجأة اللى محضرينها تظهر يبقى كل حاجه على المكشوف يا يسر يسر بضحك: احبك وانت مدمر الكل كده يا رائف! رائف: جوزك مزودها اليومين دول ولا ايه؟

يسر بضجر: على الآخر وخانقنى كل شوية عايز عيال عايز زفت على دماغه رائف: متجيبيله العيل. يسر: مستحيل انا مش هخلف غير من يامن، انا عايزة اخلص من مؤمن تقولى اخلف؟ رائف: يا غبية... احملى عشان لما مؤمن يتكل يامن يتجبر عليكى، ولا ايه؟ يسر بتفكير: تصدق عندك حق... احمل وانت تخلصنى من مؤمن وطبعا رقية ومحمود مش هيقبلوا ان ابنهم يتربى مع حد غريب ف يجوزونى ليامن بما ان زين اصغر منى بكتير، يخرب بيت دماغك دى رائف بخبث : استاهل

مكافأة بقا يسر بضحك: انت مبتشبعش رائف: تؤتؤ، هستناكى بليل يا قطة وقفل معاها..... ♕♕♕♕♕♕♕♕♕♕♕♕♕♕♕♕ عدا اسبوع ويسر تعبانه ومش مبينه ودايما سكرها مش متظبط وبتنام كتير ويامن قلقان عليها ومش قادر انه ياخدها تكشف ويشوف عندها ايه... رجع يامن من شغله لقى بحر ورقية قاعدين سوا قعد على الكنبة جنب بحر بعد ما سلم عليهم بحر: مالك يا حبيبى؟ يامن: هلكاااان، عايز انام رقية بحنية: طيب قوم يا قلبى غير هدومك وانزل ناكل واطلع نام على طول

يامن بنوم: انا لو شوفت السرير هناااام بحر: معلش، اطلع بسرعة وانزل وانا هجهز كل حاجة يلا يامن وهو بيقوم: حاضر وطلع على اوضته يغير هدومه ويسر مراقباه من تحت لتحت بابتسامة مستفزة. بعد شوية بحر كانت بتحضر السفرة مع رقية وبترص الاكل بشكل مبهر. رقية: تسلم ايدك منظر السفرة يفتح النفس. بحر: الله يسلمك يا ماما. رقية بضحك: اطلعى شوفى جوزك تلاقيه نام على نفسه ضحكت بحر معاها وقاطع كلامهم صوت يامن وهو بيزعق بغضب وبينادى على بحر.

يامن بزعيق وصوت عالى: بحر.... بحر بخضة: فيه ايه؟ وقفنا المرة الى فاتت لما يامن نده على بحر بغضب يامن بغضب: بحر... رقية: استر يا رب ماله ده؟ بحر بقلق: عشان لما اقولك ابنك ملبوس تصدقينى نزل يامن ووقف قدام بحر فى وقت دخول زين ومحمود ومؤمن منن شغلهم بحر: فيه ايه يا يامن؟ رفع يامن ايده وكان فيها شريط حبوب يامن بغضب: ايه ده؟ بحر بجهل: ايه ده؟ وجبته منين؟ يامن: استعبطتى وقولى انك مش عارفة رقية: يابنى بالراحة مش كده

يامن بغضب: لا راحة ولا غيره، فهمينى ايه ده يسر بخبث: تقريبا ده برشام منع حمل يا يامن؟ الكل بصلها وهى اتوترت: مالكم هو اللى سأل... رقية بغيظ: منك لله يامن: انتى مش عايزة تخلفى منى يا بحر؟ للدرجادى؟ بحر بانفعال: للدرجادى ايه انت كمان؟ انا اصلا مش فاهمه ايه الشريط ده؟ ولا عمرى شوفته والله العظيم، انا مستحيل اعمل كده، دانا اللى بزن عليك فى موضوع انى عايزة اخلف هبقى منعاه ليه؟ يامن: اومال ده كان بيعمل ايه فى دولاب الهدوم؟

وكمان متاخد منه؟ بحر بانفعال : معرفش والله معرف. يسر: فيه ست فى الدنيا متعرفش حاجة عن اوضتها ودولابها؟ ولا انتى عايزة تتوهى الموضوع بحر بغيظ: اتوه ايه، وانتى مالك اصلا؟ سوء تفاهم بينى وبين جوزى انتى مالك؟ يسر: مالى انه جه قدامنا كلنا واتكلم، بس انتى مش عايزة تعترفى بغلطك وانك بتاخدى ده. محمود وهو بيخبط على الارض بعصايته: مؤمن، سكت مراتك بدل مانا اللى اسكتها. وقف مؤمن جنب يسر ومسكها من ايدها: ملكيش دعوة واسكتى.

يسر بعند: لا مش هسكت، انت مش شايف بجاحتها؟ مؤمن: قسما بربى لو ما سكتى لتكونى طالق سكتت يسر بغضب وبصتلهم بخبث. مستنيه طلاقهم زى ما بتتمنى. محمود: فهمينا يا بحر ايه ده بحر بدموع: والله العظيم ماعرف حاجة عنه، هاخده ازاى بس يامن: يا ربنااااااااااا، يا بنتى انا مطلعه من تحت الهدوم فى الدولاب انتى بتفهمى ازاى؟ رقية: يابنى ميمكن محطوط بالغلط

يامن: لو المتكلم مجنون فالمستمع عاقل، ادونى عقل على عقلى وقولوا شريط زى ده تحت هدومنا فى دولابنا فى اوضة نومنا الخاصة هيكون جه منين، فهمووونى بحر بدوخة ودموع: و.. والله، ماعرف حاجة، صدقنى. يامن بغضب: الغلط مش عليكى الغلط عليا انا لما فكرت من الاول انى ممكن اتجوزك وانا معرفش عنك اى حاجة، دى غلطتى لما قبلت بواحدة زيك تكون زوجتى. بحر بصدمة: انت بتقول ايه؟ انت بتقولى انا الكلام ده؟ ليه؟ شوفت منى ايه؟ جرحتك؟ كسرتك؟ خونتك؟

ليه تعمل فيا كده، عموما يا يامن باشا انت عندك حق واحدة زيي لا ليها اصل ولا فصل مجرد انك عرفتها عشان ماسك قضية والدتها وهى ميته بأبشع طريقة عندك حق تقول كل ده، العيب عليا انا من الاول انى شوفتك اب واخ وصاحب قبل ما تكون زوج، بس انا هصلح غلطى دلوقتى ومش هتشوف وشى تانى، ولآخر مرة هقولهالك، انا معرفش حاجة عن اللى فى ايدك.... طلقنى يا يامن رقية بصراخ: لا... بحر يا بنتى متوصلش لكده ده سوء تفاهم بينكم

محمود: وحدوا الله انتو الاتنين، وانت بطل تحكم من غير مبرر، اوضة نومكم دى مبيدخلهاش شغالين عشان ينضفوها؟ قافلينها الاربعة وعشرين ساعة؟! بصله يامن وكأنته انتبه لكلامه دلوقتى بحر بدموع: بعد اذنكم.. وسابتهم وطلعت على اوضتها وفضلت تلم هدومها فى شنطتها... تحت... بص يامن فى أثرها بتوهان ورجع بصلهم رقية: زودتها اوى يا بن بطنى وسابته وطلعت لبحر زين: الموضوع وسع منك وانت كبرته يا يامن.

محمود بعقلانية: حاجة زى دى تتناقش فى اوضة نومكم مش على الملأ كده تحت عيون المتطفلين حتى لو عيلتك، الكلام اللى قولته يجرح أى ست يا يامن، انت قربت على سنة وانت متجوز بحر هل لغاية دلوقتى مفهمتهاش؟ معرفتش امتى بتخبى وامتى بتقول الحق؟ معملتش اى حاجة معاك تشفعلها حتى لو غلطانة؟ سابهم يامن وقعد على الكرسى وحط راسه بين ايديه، وكله بيبصله بحزن قاطعهم صوت رقية وهى نازله ورا بحر

رقية: بحر يا بنتى، يامن ميقصدش، مينفعش اللى بتعمليه ده، استنى طيب لكن بحر مكنتش سامعه لحد كل اللى كان بيرن فى ودانها كلام يامن اللى كسرها ووجعها منه اوى. مشى بسرعة ووقف قدامها يامن: انتى فاكرة نفسك بتعملى ايه؟ بحر:بريح من النسب يا يامن باشا، مش انت ندمان على جوازنا، انا بقى بحلك منه، سيبنى فى حالى. يامن: اسيبك ازاى؟ انتى مراتى بحر بسخرية ودموع: والله؟ لسه فاكر انى مراتك بعد اللى قولته؟ انا كان مالى بكل ده؟

انا واحده كانت حياتها هادية، كانت اكبر مشكلة بتواجهها ان باباها نسى يجيبلها الشيكولاته اللى بتحبها، ليه يحصل كل ده، ليه ف يوم وليله اتحرم من ابويا وبعده امى، ودنيتى متسكتش على كده لا تكمل وجع عليا بعمى اللى المفروض يحمينى واول ما انت ظهرتلى قولت يا رب لو ده عوضك عن كل اللى فات فانا راضية والله كنت راضية بيك ومن غيرك، جيت محسستنيش بأى حاجة، اديتنى كل اللى كنت مفتقداه فى الايام اللى فاتت، لكن مكنتش اعرف ان فيه ضريبة لازم ادفعها، انا مليش دعوة بجو المؤامرات اللى بتحصل دى ولا باى حاجة، ليه كل ده؟

يامن: ممكن تهدى؟ بحر بانهيار: متقوليش اهدى، انت كسرتنى، ندمان على جوازك منى؟ ندمان انك دخلت عيلتك واحده زيي؟ ليه؟ جايبنى من الشارع ولا عشان مليش كبير يقفلك؟ بس لا يا يامن انا كبيرة نفسى وكفيلة بيك وبأى حد يتجرأ يجيب سيرتى ولو بحرف، طلقنى يامن: انتى بتقولى ايه، انا مستحيل اعمل كده، انتى مجنونة؟

بحر بانهيار وهستيريا: انا مستحيل اعيش معاك، انت شكيت فيا، شكيت فى حبى ليك، شكيت فى شرفى، انا هبقى مجنونة بجد لو فضلت يوم تانى على ذمتك وراحت ل محمود ومسكت ايده واترجته بحر بدموع: لو بتعتبرنى بنتك زى ما بتقول طلقنى منه، طلقنى وانا مش عايزة حاجة، انا تعبت من كل ده، والله تعبت ومبقاش عندى طاقة اواجه بيها اللى بيحصل. رقية بدموع: واهون عليكى تسيبينى يا بحر؟

بحر: محدش هاين عليا بس انا خلاص جبت اخرى، زهقت من انى كل شوية تطلعلى حاجة تدمرنى وتدمر حياتى اكتر، انا كنت هشة واتقويت بابنك وهو دلوقتى سحب منى القوه دى بعزم ما فيه، خلينى الملم جروحى مع نفسى، خلينى امشى برضايا بدل ما ييجى اليوم اللى يمشينى فيه غصب عنى.

سحبها يامن لحضنه وسط اعتراضها وفضلت تعيط جامد فى حضنه وهى بتضربه على ضهره، فى الوقت ده يامن ندم ندم عمره على اللى قاله، اتمنى انه كان ميرجعش البيت اصلا، ازاى قدر يوصلها للانهيار ده، ازاى؟ يامن بندم: حقك عليا، انا آسف والله آسف، معرفش ازاى قولت كده سامحينى، انا اهون عليا اموت ولا انى اشوفك فى الحالة دى، قلبى بيتقطع عليكى يا عمرى، حقك عليا والله حقك عليا، كل اللى عايزاه هعملهولك بس متبعديش عنى.. بحر.... بحر

خرجها من حضنه كانت فاقدة الوعى ومش بترد يامن بخضة: بحر... بحر ردى عليا رقية بخضة: يا قلبى يا بنتى، طلعها الاوضة يا يامن، وانت يا زين كلم الدكتور بسرعة. شالها يامن وطلعها الاوضة بسرعة وقعد جنبها وبقى ماسك ايديها وهو بيمسح دموعها اللى على وشها ودموعه بتنزل يامن: انا غبى، انا مش عارف ازاى الكلام ده طلع منى ولا انى اوجعك بالشكل ده، انتى متستاهليش منى كده ابدا، حقك عليا.

دخلت رقية ومعاها الدكتورة ويامن خرج برة ووقف قدام باب الاوضة قرب منه زين زين: هتبقى كويسة ان شاء الله يامن: يا رب، انا جرحتها اوى يا زين زين: المهم انك تداوى ده يامن: هعمل كل اللى عايزاه المهم انها تكون بخير. كانت واقفة يسر وهى شمتانه فى بحر بطريقة متتوصفش وفى نفس الوقت متغاظة ان يامن لسه متمسك بيها للدرجادى... طلعت الدكتورة ووراها رقية يامن بلهفة: طمنيني، بحر عامله ايه؟

الدكتورة : عندها انهيار عصبى شديد، ايه اللى وصلها للحالة دى؟ حالتها دى غلط عليها وعلى الجنين قبل اى حاجة يامن رفع دماغه بسرعة وقال: جنين؟ الدكتورة: ايوة، مدام بحر حامل. وقع الخبر على الكل زى القنبلة وخصوصا على يامن اللى اتأكد انه ظلمها فى اللى حصل. الكل مشى من حواليه ومهتمش لكلام حد ولا مباركاتهم كل اللى فى دماغه انه ظلم بحر..... ♡♡♡♡♡♡♡♡♡♡♡♡♡♡♡♡ دخلت يسر اوضتها بغيظ يسر: حامل؟ بعد كل ده وحامل؟

كل تخطيطى راح فى الارض... اعمل ايه اعمل ايه؟؟ مسكت فونها وطلبت رائف رائف: ايه يا مزة نقول مبروك؟ يسر: بلا مبروك بلا زفت، بحر حامل انتفض رائف من مكانه: نعم؟ حامل ازاى يعنى يسر: هو ايه اللى حامل ازاى؟ هى ناقصة غباء؟ حامل يا رائف رائف: عرفتى ازاى حكتله يسر على كل اللى حصل رائف: يعنى حوار الشريط اللى حطيناه تحت هدومها مأثرش وطلعت حامل، وطبعا دلوقتى يامن مش هيسكت وهيدور على اللى عمل كده يسر بخوف: اكيد طبعا

رائف: زغللى عين البت، خليها متنطقش يسر: تمام رائف: يسر... انتى لازم تحملى فى اقرب وقت؟ يسر: نعم؟ ده ازاى؟ رائف: سيبى كل ده عليا، المهم دلوقتى تنزلى للبت دى ونتكلم بعدين. قفلت معاه يسر ونزلت للشغالة وعطتها فلوس كتير عشان متنطقش وطلعت من غير ما حد يشوفها، او متهيألها كده. ♕♕♕♕♕♡♡♡♡♡♡♕♕♕♕ فى بيت مريم.... سميرة: يابنتى هتفضلى حابسة نفسك كده؟ قومى وروحى شغلك انتى بقالك كتير مبتنزليش مريم بدموع: مش قادرة يا ماما،

قلبى بيتحرق حضنتها سميرة: بعد الشر عنه يا حبيبتى، ليه كل ده مريم بدموع: بحبه يا ماما، بس مش قادرة ليه عمل فيا كده ليه؟ سميرة: بكرة ربنا هيعوضك بالاحسن، اسمعى منى مريم: انا عايزة عمر يا ماما. قاطع كلامهم جرس الباب وهو بيرن سميرة: هروح اشوف مين وانتى قومى اغسلى وشك يلا، انا محضرة الغدا بره مريم: حاضر قامت تغسل وشها وسميرة فتحت الباب سميرة باستغراب: ايوة؟ مين حضرتك؟! عمر: آنسة مريم موجوده؟ مريم سمعت صوته وبسرعة راحتله

مريم: عمر؟ عمر: تتجوزينى؟! مريم: ها؟ عمر: تتجوزينى.... انا عرفت انك متخطبتيش وضحكتى عليا ودلوقتى انا جاى اقولك انى مقدرش اعيش من غيرك، تتجوزينى بصتله مريم وبصت لمامتها اللى طلبت من عمر يدخل ودخل عمر وهو فى ايده بوكيه ورد عمر: يا بنتى ردى عليا مريم: موافقة. رمى عمر بوكية الورد من ايده على الترابيزة، ورفع ايده للسما. عمر: اخيراااااااا، دا كم هرمنا يا جدع حمدلله ع السلامة. ضحكت مريم وسابتهم سميرة تعمل حاجة لعمر يشربها.

♕♕♕♕♡♡♡♡♡♕♕♕♕♕♕♕ عند بحر... كانت نايمه فى سريرها ومفتحة عنيها ودموعها نازله بحزن دخل يامن وبص لحالتها وقلبه وجعه عليها اوى قعد على طرف السرير ومسك ايدها يامن بحزن: مبارك يا حبيبتى انتى حامل بصتله بحر ودموعها نزلت اكتر: بجد؟ هز يامن راسه: اه... بجد بحر: الحمد لله يا رب، الحمد لله أثبت برائتى من عندك الحمد لله يامن قلبه وجعه وقال: مش محتاجة حاجة تثبت براءتك يا بحر.

بحر: لا محتاجة يا يامن، لما توقفنى قدام اهلك وتعمل كل ده ابقى محتاجة، لما ثقتك فيا تتهز ابقى محتاجة يا يامن. يامن: والله ما اتهزت انا شوفته ومعرفتش اتمالك اعصابى، انا هموت على طفل منك يا بحر، حاسس حياتى مش هتكمل غير بيه، حته منك ومنى سوا، ليه مش حاطة نفسك مكانى؟ بحر: انا لو حطيت نفسى مكانك فانت هتستحقر نفسك اوى يا يامن، خلينا يابن الناس نفضها بالمعروف احسن ليا وليك. يامن: قصدك ايه؟

بحر بدموع: قصدى طلقنى يا يامن، مش عايزة اقعد معاك ولا حتى اشوفك. يامن بوجع: للدرجادى؟ بحر: اه، سيبنى يابن الناس اشوف حياتى اللى ملهاش اول من اخر دى وانا مسحولة فيها. يامن: واللى ف بطنك؟ بحر: ابنك زى ما هو ابنى وقت ما هتحب تشوفه تعالى فى اى وقت وقف يامن وقرب من دماغها وميل عليهاوقال: عشم ابليس فى الجنة يا روحى وباسها

فى دماغها وفى ايديها: حمدلله على سلامتك، ومبارك على الحمل، ووعد منى مش هتشوفى وشى تانى بس متطلعيش بره البيت ده. وسابها وخد هدومه ودخل غير بسرعة وطلع نزل على شغله وهى غمضت عنيها بوجع على كل اللى وصلتله، حست انها رجعت لنقطة ابعد من نقطة الصفر. ♕♕♕♕♕♡♡♡♡♕♕♕♕♕♕♕ دخل يامن لمكتب مديره يامن وهو بيأدى التحية: تمام يا فندم المدير: مهمة جديدة يا يامن، لكن خطر يامن: خير يا فندم

المدير: قبل ما اتكلم فى تفاصيلها، المهمه دى مش بسيطه، انت هتلعب مع اكبر زعماء مافيا فى شرق آسيا، نسبة نجاك من هناك متتعداش ال 10٪ انت ليك حرية الاختيار، الرفض او الموافقة، هقولك التفاصيل وانت حر معاك لغاية بكره وترد عليا... قاطعه يامن: موافق. رجع يامن البيت وطلع على اوضته هو وبحر ودخل لقيها قاعدة على الارض وساندة دماغها على السرير وباصة قدامها بشرود ودموعها بتنزل بكترة...

قلبه اتعصر من الحزن على منظرها ولام نفسه للمرة اللى مش عارف عددها بسبب اللى عمله فيها . قعد قدامها ومسك ايديها ومسح دموعها .

يامن : انا عارف انى غلطت وعارف أن اى اعتذار فى الدنيا مش هيردلك كرامتك اللى جرحتها انا مش عارف ده حصل ازاى وحصل ليه اصلا، انا ثقتى فيكى ملهاش حدود يا بحر، انا بحبك وكلمه بحبك متجيش ذرة عن اللى حاسه ناحيتك، سامحينى على اول غلطة اغلطها فى حقك من وقت جوازنا، سامحينى عشان خاطر ابننا ولا بنتنا اللى جايين، انا مقدرش استغنى عنك يا بحر، مقدرش للحظة افكر انى ممكن اعيش فى الدنيا دى وانتى مش فيها، قلبى من غيرك خراب يا بحر انتى اللى بتعمريه وانتى اللى بتزرعى فيه كل حاجه حلوة....

ردى عليا طيب. بصتله بحر ودموعها نزلت تانى بحر: ارد اقولك ايه؟ اقول ايه وانا سمعاك بتهينى وتهين اهلى قدام عيلتك كلها؟ انت اكتر واحد عارف انا كان نفسى فى طفل ازاى، اكتر واحد عارف انا مخططة ل بيبى منك ازاى، وريتك كل حاجة كنت عملاها حصل ولا لا؟

وريتك ازاى هعلمهم وازاى هحفظهم قرآن من وقت م يبدئوا ينطقوا حتى، كذا مرة تدخل من شغلك وتلاقينى بتابع كورس معين او بودكاست بيتكلم عن التربية والتعامل مع الاطفال واقولك عشان لما يبقى عندى بيبى اربيه احسن تربية حصل ولا لا؟ تيجى ف لحظة تمحى كله ده؟ تمحى كل لحظة عشناها سوا؟