تحميل رواية خفقة من قلبك بقلم عهد عامر pdf

انت خليت اكتر يوم متمنياه من وقت م حبيتك اكتر يوم بقول يا ريته م جه، ليه يا يامن؟ انا عملتلك ايه؟

خدها يامن فى حضنه واتحكم فى دموعه بصعوبة...

يامن: معملتيش حاجة، انا اللى مستاهلش حبك، مستاهلش انى افرح بوجوده حتى، انا... انا مسافر يا بحر

بحر بوجع: مسافر؟ رايح فين؟

يامن: مهمة تبع الشغل، الله اعلم هرجع امتى ولا مش هرجع بس.. عايزك تسامحينى يا بحر عايزك تقولى للى فى بطنك ايا كان هو ولد ولا بنت انى بحبه اووى وكان نفسى اكون موجود معاه.

حضنته بحر بزيادة: لا يا يامن انت هتكون معاه وهنفرح بكل حاجه سوا، لو بتقول كده عشان نتصالح ف انا مسمحاك والله بس بلاش تعمل كده ولا تقول الكلام ده، انا خسرت كتير فى حياتى يا يامن بلاش اخسرك انت والنبى، خسارتك بموتى يا يامن بالله عليك ماتعمل فيا كده.

شدد يامن على حضنها وشالها وقلعها الاسدال ونيمها على السرير ونام جنبها واخدها فى حضنه وقلبه بيتعصر حزن عليها.

♡♡♡♡♡♡♡♡♡♡♡

صحيت بحر على اذان الفجر وهى منفوضة ملقيتش يامن جنبها جريت زى المجنونة تدور عليه فى اوضتهم ملقيتهوش، لبست اسدالها ونزلت تحت لقيته واقف وسط امه وابوه واخواته وبيودعهم

بحر بدموع: يامن...

بصلها يامن بلهفة وحمد ربنا انه شافها قبل م يخرج..

نزلت جرى على السلم ومهتمتش بأى حاجة غير انها توصله..

وقفت قدامه وحضنته بقوة

بحر بدموع: متمشيش، عشان خاطرى متمشيش، انا لقيت روحى معاك، انت عرفتنى يعنى ايه امان وحب ودفا وعيلة، متبعدش عنى يا يامن..

يامن بدموع: غصب عنى، حقك عليا، بس اوعدك انى هرجعلك قريب..

بحر: لا يا يامن انت بتكذب عليا..

بصت على محمود ابوه: بابا قوله ميمشيش، قوله انى من غيره هموت مش هقدر استحمل.

يامن: كفاية يا بحر

بحر بصراخ: لا مش كفاية، انت انانى، انت المفروض تفكر فيا قبل ما تقبل المهمة دى، تفكر فى حياتى من غيرك هتبقى عامله ازاى، انا هموت من غيرك يا يامن والله مهقدر

حضنها يامن وسط عياط الكل من كلامها وفضل يهديها بالكلام وانه راجع تانى.

وقفت رقية وراها وحطت ايديها على ضهرها وخرجتها من حضن يامن: حبيبتى خليه يسافر وهو مطمن عليكى بدل م يبقى قلقان حتى علشان يرجعلك بالسلامة انتى واللى فى بطنك، يلا يا حبيبتى.

مسحت بحر دموعها وبصت ليامن

بحر: هترجعلى صح؟

يامن: وعد منى انى مش هجازف وهحافظ على نفسى اكتر من الاول عشان ارجعلك

حضنها بكل قوته وودعهم كلهم وركب عربية الشغل ومشى وهو شايف انعكاس صورة بحر فى المراية ودموعها مش مبطلة نزول عليه وهو حاسس ان قلبه بيوجعه مع كل دمعة بتنزل من عيونها..

اول م العربية خرجت من باب الفيلا بحر وقعت من طولها وبسرعة الكل اتلم حواليها وحاولوا يفوقوها ورقية والشغالة سندوها لاوضتها ورقية فضلت معاها لغاية ما هديت ونامت.

-------—--------------

وصل يامن الادارة وقلبه موجوع على بحر ودخل للمدير اللى حاول يقنعه للمرة المليون انه يعتذر عن العملية الا انه رفض وجهز فريقه واحتياجاته وطارت الطيارة الخاصة بيهم وهو بيدعى ربنا ان بحر تكون بخير...

وبعد مرور 5 شهور........

بحر كل يوم بتستنى يامن او حتى مسدج منه تتطمن انه بخير ودلوقتى دخلت فى الشهر الخامس وتعبها كل مدى بيزيد وكل فترة بتروح تقعد فى شقتهم وسط اعتراض محمود اللى بيصر انها متباتش لوحدها...

اما عمر ف بعد م سمع بالمجازفة اللى عملها يامن كان هيتجنن وكذا مرة يطلب انه يسافرله لكن المدير بيرفض لسرية المهمة، وده خلاه يأجل كتب كتابه من مريم لغاية رجوع يامن او على الاقل ظهور خبر عنه...

أما يامن فا وسط كل اللى فيه كان بيفكر فى بحر وبرائتها وحبه ليها، بيفكر أد إيه هو جرحها وهانها، كل يوم بيفكر يبعتلها رسالة من تليفونه بس بيتراجع، عايزها تستعيد قوتها من اللى عمله وقاله، عايزها تصدق انه محبش حد غيرها.

يامن بتنهيدة وهو بيبص لصورتها فى تليفونه : يا ترى قلبك حن ولا لسه يا بحر؟ انا متأكد انك اول م تشوفينى هتنسى كل حاجة وتجرى عليا بس عايز اشوف لهفتك وحشتينى ووحشنى حضنك وكلامك اوى والله، حقك على قلبى من كل ده، كل حاجة هتتغير اوعدك انى هتغير ومش هزعلك ابدا يا قلبى.

وقفل التليفون ونام وهو بيدعى ربنا انه يرجع سليم ومعافى لحضنها ولبيته.

♡♡♡♡♡♡♡♡♡♡♡♡

عند بحر...

دخلت رقية الاوضة على بحر ولقيتها قاعده ماسكه برواز فيه صورة يامن وباصة قدامها بشرود ودموعها نازلة، حالها صعب عليها وقعدت جنبها ومسكت ايديها

رقية: هتفضلى كده لغاية امتى؟

انتبهت ليها بحر وردت: لحد ما يرجع يا ماما

رقية: يا بنتى انتى خسيتى النص بسبب قلة اكلك، وكمان عشان البيبى، حبيبتى انتى بتاكلى ليكى وليه، اهتمى بنفسك واقوى عشان لما يامن يرجع

بحر: هو يرجع بس با ماما، يرجع، هقوى ازاى من غيره؟ انا من غيره ضعيفة اوووووووى مليش لازمه، ابنك حببنى فى قربه علقنى بوجوده علمنى كل حاجة حلوة فى الدنيا دى بس معلمنيش اعيش من غيره يا ماما معلمنيش انى اقعد من غير كلامه وتشجيعه ليا ولا حضنه، وحشنى، ووحشنى حضنه ودفاه وكلامه وحنيته وحشتنى كل حاجة فيه، يرجع هو بس با ماما يرجع

رقية بتأثر: يعنى سامحتيه؟

بحر: والله سامحته بس كفاية كده، خليه ييجى بقا، قوليله بحر من غيرك تعبانه، قوليله انه أنانى فى انه يمشى كده من غير ما يقولى اى حاجة ولا حتى يحذرنى، سابنى اواجه كل حاجة لوحدى وخلع، طاب كان يعودنى، كان يخلينى ابقى قوية من غيره بدل مانا مش عارفه اخطى خطوة من غيره، قلبى محروق على غيابه يا ماما، دماغى تايهه، حاسة انى جوايا متبهدلة اوى مش هترتب غير فى وجود يامن، خليه يرجع يا ماما.

حضنتها رقية وهى بتعيط على كلامها وفضلت تدعى ربنا ان يامن يرجع لبيته ولحضن مراته بخير.

♡♡♡♡♡♡♡♡♡♡♡

↚

عند يامن.....

جمع المعلومات عن افراد العصابة اللى بتستدرج البنات القاصرات من الصعيد تحت مسمى الجواز وبعد كده الاهل ميعرفوش حاجة عن بنتهم لانها بتسافر مع جوزها...

خطط هو وزمايله للدخول لوكرهم وهو بيدعى ربنا يخرج بخير عشان خاطر بحر وابنه اللى جاى...

فى نفس الوقت كانت بحر صاحية بتصلى الفجر وبتدعى ليامن ان ربنا ينصره ويقويه ويحميه...

يامن اقتحم المكان وبيتسحب لمكان الرهاين بهدوء وهو بيراقب الطريق وف لحظة حصل ضرب نار قوى ويامن استخبى ف اوضة و سمع صوت همهمات بسيطة نور كشاف من اللى معاه لقى انه ف مكان الرهاين وواحد من ورا ثبت السلاح على دماغه ويامن اتشاهد وفجأة حصل اشتلاك عنيف بين الكل ويامن كل اللى فى دماغه يحمى الرهاين وبس ايا م كان التمن.

فى الصبح...

عمر: يعنى ايه يا فندم مينفعش اسافر ل يامن؟

المدير: يعنى اللى سمعته يا عمر، انا مش عايز اجازف بحياتكم انتو الاتنين

عمر: اه تروح تجازف بحياة يامن صح؟

المدير: عمر... الزم حدودك واعرف انت بتتكلم مع مين

عمر: العفو يا فندم بس من قلقى عليه، حضرتك عارف يامن بالنسبالى ايه!

المدير: عارف يا عمر وانت كمان عارف يامن بالنسبالى ايه بس صدقنى لغاية دلوقتى موردتناش اى معلومات عنهم، واوعدك لو وصلى حاجة هبلغك بيها.

سابه عمر ورجع البيت عند بحر وكانت مريم موجوده معاها اللى اتصالحت عليها مؤخرا...

اول م بحر شافته جاى جريت عليه

بحر: طمنى، لقيته صح؟ عرفت عنه حاجة؟

عمر: كان نفسى اطمنك والله واطمن قلبى بس انا مش عارف عنه حاجة.

بحر: يعنى ايه؟ يعنى ايه يا عمر؟ انت مش معاه ف نفس الشغل؟ ازاى متعرفش عنه حاجة؟

عمر: المهمات بتبقى سرية لأقصى درجة خصوصا المهمة اللى طالع فيها يامن، يامن دخل وكر مافيا من اعلى مستوى، ادعيله يا بحر ادعيله

بحر: ادعيله؟ بعد كل ده تقولى ادعيله؟ انا مش بعمل حاجة غير كده، بس عايزة اطمن عليه ده عايز يطمن «قالتها وهى بتشاور على قلبها»، عايز يرتاح، عايز يشوفه، انا مش قادرة اتنفس من غيره، مش قادرة اتخيل للحظة واحدة انه مش موجود

يسر بغل: وهو كان مين السبب ف كل ده؟ مش انتى؟ مش انتى اللى كرامتك نقحت عليكى من كلامه وخيرتيه؟ زعلانه ليه دلوقتى مهو اختار.

رقية: اخرسى يا يسر مش وقتك

بحر بدموع: هى عندها حق يا ماما، عندها حق، انا السبب انا اللى قسيت عليه لحد م قسى على نفسه وحرمنى منه، هى صح يا ماما، انا السبب، انا اللى خليت يامن يمشى

حضنتها رقية: مش صح، انتى روح يامن وهو هيرجع يا بنتى هيرجع ووقتها هتقولى ماما رقية قالت..

وانتى يا ست يسر شاكرين افضالك لغاية كده تقعدى فوق ف اوضتك لغاية م جوزك يرجع لحد ما نشوف اخرتها معاكى.

سابتهم يسر وهى متغاظه من معاملتهم ل بحر وكلمت رائف

يسر: انا لازم احمل بأى طريقة سامع.

رائف بابتسامة خبث: عدى عليا بليل يا قطة.

يسر: تمام

وقفلت معاه وقعدت وهى بتبتسم بنصر انها قربت من هدفها.

♕♕♕♕♕♕♕♕♕♕

الفجر...

كانت بحر قاعدة على سجادة الصلاة وبتدعى ربها ودموعها سابقاها

بحر: يا رب انا مش طالبة كتير انا عايزة جوزى يا رب، عايزة اشوفه واحضنه، عايزة اطمن بوجوده، يا رب رجعهولى سالم معافى يا رب، انا مش مستعدة لأى خسارة والله، نفسى قصر معدتش قادرة استحمل، رجعه لابنه يا رب، رده ليه بخير يا رب.

وفجأة اتفتح الباب وطل منه يامن.

بحر بدموع وتفاجؤ: يامن....

وجريت عليه بسرعة وهى بتلمس كل جزء فيه

بحر: انت قدامى صح؟ انا مش بحلم؟ يامن انت جيت بجد؟

يامن: ايوة يا حبيبتى انا هنا معاكى اهو.

حضنها يامن بكل قوته وبحر مسكت فيه وهى بتعيط بصوت عالى

بحر: اخيرا رجعت، اخيرا، الحمد لله يا رب الحمد لله...

يامن وهو بيتأمل فيها: وحشتينى اوى يا بحر، وحشتينى ووحشتنى كل تفصيلة فيكى.

بحر بدموع: واﻧت تعبت قلب بحر معاك يا يامن، تعبته بقدر حبه ليك، ليه تغيب كده؟ ليه تعمل فينا كلنا كده؟ هونت عليك؟ هونت عليك تسيبنى كل ده وتحرق قلبى عليك؟

يامن: بعد الشر عنك وعن قلبك، كان غصب عنى يا بحر كنت عايز اعاقب نفسى انى اتسببت ف تعبك كده، انتى غالية عليا اوى مكنش لازم اجرحك بالطريقة دى.

بحر: خلاص يا حبيبى، اللى فات عدى خلاص متحملش نفسك فوق طاقتها المهم انك جيتلى بألف خير وسلامة.

يامن: يعنى سامحتينى يا بحر؟

بحر: مقدرش اعمل غير كده يا يامن...

ومسكت ايدها وحطتها على بطنها وقالت: انا رفضت اعرف نوع البيبى، كنت حاسة انك راجع وهنعرفه سوا، الفترة اللى فاتت كانت قاسية أوى من غيرك، أتارى الدنيا مكنتش دنيا وانت مش فيها يا يامن.

يامن: انتى متعرفيش انا عملت ايه عشان اوصلك، قولت كفاية كده ولازم ارجع جنبك وجنب الفراشة اللى جوة.

بحر: فراشة؟ خلاص قررت انهت بنت؟

يامن: يا ستى بنت ولا ولد مش مهم المهم انه منك.

بحر: عملت ايه بقا؟

يامن: كتير اوى اقلهم انى مكنش ينفع اجى على هنا ولازم اروح الادارة بس انا اصريت ونزلت اخدت ترانزيت 8 ساعات واتنقلت فى مطارات كتير عشان اوصلك قبل طلوع النهار.

بحر: كل ده؟ دانت غاوى فرهضة بقا

يامن بحب وهو بيبص فى عيونها: ده الغاوى ييجى لحبيبه من اخر الدنيا مشى، وانا مش غاوى يا بحر انا عاشق.

وبعدها حضنها يامن جامد وناموا سوا براحة وأمان وحب.......

♕♕♕♕♕♕♕♕♕♕♕♕

تانى يوم الصبح...

الكل عرف ان يامن رجع وكلهم رحبوا بيه واتلموا سوا على الفطار...

رقية: ايوة كده، شوفت برجوعك لميتنا تانى ازاى، دى حتى بحر بتاكل اهى ووشها نور.

اتكسفت بحر من كلامها والكل ابتسم عليها...

محمود: حمدلله على سلامتك يابنى نورت بيتك وحضن مراتك.

يامن بحب: الله يسلمك يا بابا انا كنت مفتقدكم اوى، حتى وانا وسط الموت كان كل اللى شاغلنى انتو..

بحر: بعد الشر عنك، الحمد لله انك بخير.

يسر بخبث: على الله تحافظى عليه بقا بدل م المرة الجاية يروح للأبعد.

الكل بصلها بقرف ومحدش ادالها اهتمام وقعدوا يتكلموا مع يامن اللى كان واحشهم اوى.

بعد الفطار كل واحد راح شغله ويامن طلع الاوضة وساب بحر قاعده مع مامته تحت...

قلع القميص بتاعه عشان يغير وفى اللحظة دى دخلت بحر.....

بحر بصدمة: ايه ده؟؟؟؟؟؟

♡♡♡♡♡♡♡♡♡♡♡♡♡

عدا اسبوعين على رجوع يامن ونزل الشغل تحت اعتراض بحر...

فى المكتب....

دخل العسكرى يطلب الاذن من يامن لدخول شخص ويامن أذنله.....

دخل مؤمن وهو مهموم وحاسس الدنيا كلها فوق دماغه.

يامن: مؤمن؟ فيه ايه؟

مؤمن: عايزك فى موضوع ضرورى يا يامن.....

↚

دخلت بحر على يامن وهو بيغير واتفاجأت بضهره اللى فيه اص.. ابة بالرص.. اص وملفوف بشاش

بحر بدموع: ايه ده يا يامن؟ فيه ايه؟

يامن وهو بيمسك ايديها: ششش اهدى انا بخير

بحر: بخير ايه انت متع.. ور ف ضهرك من ايه ده

يامن: ابدا وانا بنقذ الرهاين انضرب علينا ن.. ار ف اتص. بت ف كتفى من ورا، بس انا بخير والله

بحر بدموع: انا السبب يا يامن

يامن: بس متقوليش كده، حبيبتى الحمد لله انها جات لحد كده وبعدين انا معاكى اهو، قومى يلا البسى عشان نروح نطمن على النونو، يلا بقا

قامت بحر وراحت للحمام وبعد كده رجعت حضنته جامد وباسته ف خده، ابتسم يامن بحب ولبس هو كمان وخرجوا سوا للمستشفى....

♡♡♡♡♡♡♡♡♡♡♡♡

فى المستشفى...

الدكتورة: مستعدة تعرفى نوع الجنين؟

بحر: اكييد

الدكتورة: مبروك انتى حامل فى بنت

بحر بصت على يامن اللى كان بيتأمل جهاز السونار وصورة بنته جواه وبيسمع نبضها، لحظة صمت العالم كله وهو بيبص لحته منه ومن حبيبته قدامه، عيونه دمعت وبص لبحر اللى دموعها نزلت وحمدت ربنا انها عاشت اللحظة دى مع حبيبها ونور عينيها.

الدكتورة: المهم تاخدى بالك من نفسك عشان متخصلش اى خطورة ف الولادة، وخدى بالك من اكلك عشان مش عايزين الحجز اللى ف المستشفى بتاع الشهر اللى فات يتكرر تانى.

يامن بانتباه: حجز ايه؟

الدكتورة: المدام كانت مانعة الاكل والسكر مكنش متظبط خالص خالص واضطرينا نحجزها اسبوع لحد م تتحسن شوية ونخرجها.

يامن بصلها بحزن وبحر طبطبت على ايده وخرجوا سوا.

بحر: يامن

يامن: نعم يا قلبى.

بحر: تعالى نقضى باقى اليوم ف شقتنا انا نفسى ادخلها معاك اوى دايما كنت بدخلها لوحدى او مع ماما رقية.

يامن: بس كده من عنيا، يلا بينا

اتصل على مامته بلغها انهم هيباتوا ف شقتهم وعدا على مطعم اخد عشا وروح الشقة هو وبحر اتعشوا سوا وفضلوا يرغوا للفجر وصلوا الفجر وناموا فى حضن بعض، وبحر نامت فى أمان كانت مفتقداه طول الفترة اللى يامن كان غايب فيها..

&&&&&&&&&&&&&&

بعد مرور شهر..

كان يامن قاعد فى مكتبه والباب خبط ودخل العسكرى

العسكرى: يامن باشا، حد عايزك بره

يامن: مين

ودخل مؤمن من الباب وهو هموم الدنيا كلها على كتفه وعيونه حمرا اوى من قلة النوم والتعب..

يامن وهو بيقف: مؤمن؟ فيه ايه؟

مؤمن: مفيش حاجة عايز اتكلم معاك بس..

يامن: اكيد طبعا، تحب نتكلم هنا ولا نخرج؟

مؤمن: ياريت نخرج.

خده يامن وقعدوا فى مطعم على النيل

يامن: ها تشرب ايه ولا تاكل ايه

مؤمن: قهوة

طلب يامن طلباتهم وبص على مؤمن ومستنيه يحكى.

مؤمن: طول عمرنا كنا صحاب ومفيش حاجة تبعدنا عن بعض دايما كنا فى ضهر بعض وع الحلوة والمرة سوا، مكنتش اى حاجة تفرقنا، لغايه ما دخلت هى وحولت كل حياتنا لجحيم، انا بقولك كل ده عشان اول ما عرفت انى فى مشكلة انت اول واحد جريت عليه يا يامن، أنا ندمت ندم عمرى انى اتجوزت يسر، واحدة مش بتهتم بأى حاجة غير نفسها، بقيت حاسس انى ATM مش زوج، على طول كنت بقول عادى مهى بتعمل كل ده لمين غير ليا انا بس الموضوع بقى بيزيد لدرجة انها مبتهتمش بيا لما أتعب، فاكر لما جالك دور البرد الشديد قبل ما تسافر بأسبوعين بحر عملت ايه؟

Flash back....

كان يامن نايم جنب يسر وهى بتتقلب حطت ايدها على دماغ يامن لقيته سخن ملهلب.

يسر بخضة: يامن.... يامن مالك

يامن بتعب: بردان... بردان يا بحر

قامت يسر من جنبه بسرعة وجابت غطا وغطته ونزلت المطبخ بعد ما لبست اسدالها وجابت ماية وتلج وخل وفوطة نضيفة وسهرت جنب يامن تعمله الكمادات

عدت اربع ساعات والحرارة مش راضية تنزل .

لبست هدوم خروج بسرعة وخرجت خبطت على باب مؤمن اللى فتحلها وعينه بتقفل حرفيا.

مؤمن: بحر؟ فيه ايه؟

بحر: الحقنى يا مؤمن الله يخليك يامن تعبان اوى وحرارته مش بتنزل

مؤمن: ايه؟ انا جاى معاكى بسرعة

وخرج وهو بيتكلم فى التليفون مع زين اللى صحى وف ثانيه العيلة كلها كانت حواليه

رقية: يامن ماله يا بحر

بحر بدموع: قاعدة جنبه ليا اربع ساعات بعمله كمات الحرارة مش نازله وتعبان اوى يا ماما

زين: يلا نوديه المستشفى

وشاله زين ومؤمن قصاد بعض وبحر اصرت تروح معاهم المستشفى.

وصلوا المستشفى والدكتور قال انه واخد نزلة برد شديدة والتهاب رئوى شديد وانه هيفضل يومين كده سخنين وعلقله محاليل يستمر عليها 3 ايام.

وخدوه وروحوا وكانت بحر بتسهر جنبه دايما وبتاخد بالها منه ومن علاجة وادويته وكانت مش بتخلى حد يهتم بيه زيها وغيرها.

back..

مؤمن: وقتها حسيت انى فعلا متحبتش بالطريقة دى ولا عشت كل ده، كل ما بتعب كانت هى تنام وماما اللى تقعد جنبى، ياما كانت بتسخنى على ماما وبابا وزين وانا كنت زى الغبى ماشى وراها.

وضحك بألم: تعرف انى اشتريت فيلا جديدة وكنت هديها هدية ليها فى عيد ميلادها، من كتر حبى ليها... بس مكنتش اعرف انها كده والله ك كنت اعرف

يامن بقلق: مالك يا مؤمن؟ يسر عملت ايه؟

مؤمن: هحكيلك....

♕♕♕♕♕♕♡♕♕♡♕♕♕

يسر بفرح: انا حامل يا رائف، اخيرا

رائف: كده ننفذ خكتنا بقا

يسر: لا استنى شوية... لازم اعرفه انى حامل ونفرح قدام العيلة ونبان اننا اسعد اتنين عشان مبقاش فى موطن الشبهات وقت اللى هيحصل

رائف: دماغك حلوة، تمام خدى وقتك بس مش اكتر من اسبوع

يسر بشر: واقل من كده كمان، دانا مصدقت حاجة تقربنى من يامن، وعشان المفاجأة الحلوة دى ليك عندى هدية هتشكرنى عليها.

رائف: هدية ايه؟

يسر: افتح الواتس كده..

↚

فتح رائف الواتس ولقى صور ل بحر بشعرها كتير وهى قاعدة فى البلكونة وهى وقاعدة فى صالة البيت وهى وبتضحك وبتبص لبطنها بتأمل.

اتأمل فيها رائف لدرجة انه مسمعش يسر بتقول ايه لغايه ما زهقت وقفلت تجهز المفاجأة لمؤمن....

رائف بشر: نضرب عصفورين بحجر ونبعت تحية ليامن باشا بمناسبة رجوعه....

وكلم واحد صاحبه وبعتله صورة من صور بحر وقاله انه عايزها تبان انها بتضحكله هو ويحط صورته معاها من غير ما وشه يبان، بمعنى اصح صورة تبين ان بحر بتخون يامن...

♡♡♡♡♡♡♡♡♡♡♡♡♡♡

دخل يامن البيت هو ومؤمن وقابلهم زين فى الطريق وقرر يامن انه يخلى الليلة سهرة جميلة مع اخواته فى جنينه الفيلا واتفق معاهم على كده وكل واحد طلع اوضته عشان يبلغ مراته وزين طلع يجهز..

دخل يامن وكانت بحر بتقرأ فى كتاب، اول ما شافته جريت عليه وحضنته بحب

بحر: وحشتنى يا حبيبى، حمدلله على سلامتك يا قلبى

يامن: وانتى كمان والله، الله يسلمك، ها عامله ايه والكتكوته عامله ايه؟

بحر: زى الفل ومستنياك من بدرى

يامن: ادينى جيت، جهزيلى الحمام بقا اخد دوش عشان هنزل اسهر مع زين ومؤمن فى الجنينه

بحر: حاضر يا حبيبى، طيب مش هتتعشى؟

يامن: هاكل معاهم، انا مصدقت يا بحر اننا نتجمع سوا تانى، انتى مش متخيلة انا فرحان بحاجة زى كده ازاى.

بحر: حبيبى ربنا يديم المحبة بينكم يا رب ويديم حبكم لبعض ولمتكم يا رب، خلاص انزل اسهر معاهم وانا هجهزلكم انتو التلاتة عشان خفيف ايه رأيك؟

يامن بابتسامة: لو مش هتعبك

بحر بحب: تعبك راحة يا قلبى، ايه رأيك اعملكم ايه؟

يامن بتفكير: مش عارف شوفى الساهل عليكى واعمليه

بحر: فيه اكله اسمها كباب تركى او دونر كباب طالعة تريند وناس كتير جربتها هعملهالكم عشان عايزة اكلها بصراحة

يامن بضحك: فار تجارب يعنى

حطت بحر ايديها حوالين رقبته: عندك مانع؟

يامن: لا طبعا يا باشا وانا اقدر؟

بحر بضحك: طيب يلا ادخل خد دش وانا هنزل اعملها وخلال نص ساعة كل حاجة هتكون جاهزة....

يامن: تسلم ايدك من قبل اى حاجة.

وباسها فى خدها ودخل ياخد دوش وبحر نزلت تجهز الاكل ليهم وهى فرحانه ان البيت ابتدى يرجع فيه الحب والامان والدفا.

قررت تعمل ماربل كيك مع الاكل، حضرت وصفة الكباب ودخلته الفرن وبعد ربع ساعة الريحة انتشرت فى البيت كله لدرجة ان الكل اتجمع عندها فى المطبخ من حلاوة الريحة

كانت واقفة وضهرها للباب وبتبص على الفرن وبتلف لقيت العيلة كلها وراها

مؤمن وزين ومحمود ورقية واخيرا يامن

بحر بخضة: بسم الله الرحمن الرحيم، فيه ايه؟

رقية: ايه الريحة الحلوة دى؟

بحر: كباب تركى

محمود: والله يا بنتى جريتى ريقى لدرجة انى عايز اكل دلوقتى

بحر بحب: يا خبر يا بابا عنيا هو قدامه عشر دقايق ويطلع وعامله حساب الكل متقلقوش

زين بهيمان: ياما الريحة بس عامله كده اومال طعمه عامل ازاى

بحر: والله انا زيي زيك حاسة انى عايزة اهجم ع الفرن من حلاوة الريحة

ضحكوا عليها وسابوها وخرجوا ووقفت معاها رقية وبقيت تتفرج عليها وهى بتجهز الحاجة وحبت نظام بحر وانها بتفرض حب الدفا والعيلة على الكل.

رقية: يا بختنا بيكى يا بحر

ابتسمت بحر وحضنتها وقالت

بحر: يا بختى انا بوجودكم.

وكملت السلطه والطحينه وعملت الكيكة كان الفرن خلص وخرجت الكباب وحطت الكيكة تستوى وجهزت

الساندوتشات بالسلطة والطحينه ورصت السفرة جوة وبره

رقية باستغراب: جوة وبرة ليه؟

بحر: جوة ليا انا وايسر وحضرتك وبابا محمود وبره ليامن وزين ومؤمن

رقية باستغراب: ليه كل ده؟ مايقدوا معانا!

بحر: مهو بصراحة يامن قالى انهم اتقفوا يقعدوا سوا ف خليهم يا ماما مصدقت يامن يرجع مع اخواته زى الاول

رقية معاكى حق خلاص جهزى انتى السفرة بره وانا هجهزها هنا.

خلصوا تحضير السفرة والكل قعد ياكل وكله عجبه الاكل وشكروا بحر عليه ويسر كانت بتولع من الغيرة وان بحر بأقل مجهود بتكسب قلب الكل..

♡♡♡♡♡♡♡♡♡♡♡♡♡♡

كان قاعد يامن ومؤمن وزين بيلعبوا كوتشينة سوا وجوة قاعدة بحر ورقية ويسر اللى كانت ف عالم تانى

رقية: انتى كده ليكى يومين فى اول السابع صح؟

بحر: اه يا ماما، كل ما معاد الولادة يقرب انا بتوتر اكتر

رقية: ليه يا قلبى؟ ربنا يقومك بالسلامة يا رب، متقلقيش

بحر: يا رب.

دخلوا الشباب من الباب وهما بيضحكوا وقعدوا معاهم فى الصالون وكل واحد جنب مراته.

زين بمرح: كل واحد جنب مراته وانا جنب امى.

مؤمن: محدش قالك خليك سنجل

زين: اجمعلى عروسة وانا هوافق يا عم

ضحكوا عليه كلهم.....

بحر: عامله ماربل كيك حلوة اوى اجيبلكم واعملكم جنبها شاى ولا نسكافيه ولا هوت شوكلت؟

مؤمن: ارحمينا يا بحر هنفرقع م الاكل

بحر بمرح: معروفة اصلا ان الشتا بيجوع، وغير كل ده الليل بيجوع برضو..

ضحكوا عليها كلهم

رقية: معاكى حق انا اعمليلي نسكافيه

محمود: وانا شاى

يامن وزين ومؤمن: نسكافيه

يسر بخبث: وانا هوت شوكلت

بحر: وانا احترت يا باشا والله.

الكل ضحك ورقية قامت وقفت وقعدت بحر

رقية: اقعدى انتى كده عشان تعبك وانا هخلى حد من البنات يعمل ونقطع الكيك سوا

بحر: حرام يا ماما البنات نايمين ومتدفيين

رقية: معاكى حق، خلاص قومى يا يسر اعملى الحاجة عشان حمل بحر وتعبها.

يسر: واقوم انا ليه ان شاء الله مانا حامل زيها.

الكل بصلها بتفاجؤ

رقية بدموع: حامل؟ انتى بجد حامل يا يسر؟

يسر بتأثر مزيف: اه يا ماما لسه عارفة انهارده

وبصت على مؤمن ودموعها نازله: انا حامل يا مؤمن...

مؤمن كان زى الصنم مش مدى اى ردة فعل، ويامن وزين كذلك.

بحر استغربت الكل وحضنت يسر وباركتلها..

مؤمن بصعوبة: مبروك... مبروك يا حبيبتى.

وحضنها بشرود وعينه جات فى عين يامن اللى حس بوجع الدنيا كلها فى قلبه على اخوه

يامن فى نفسه: ازاى يسر حامل ومؤمن مش بيخلف؟!

قطع الكلام مسدج على تليفونات البيت كله فى نفس الوقت وكله استغرب وفتحها كانت لبحر مع واحد بشعرها وبتضحكله....

ومكتوب مسدج تحت الصور «مش واجب برضو تعملوا DNA للبيبى ولا ايه»

بحر فضلت باصة على الفون بصدمة وفجأة وقعت من طولها ويامن لحقها بسرعة......

↚

يامن لحق بحر وطلع بيها على اوضتهم بسرعة وكلهم وراه ماعدا يسر...

يسر: يخربيت غبائك يا رائف حبكت معاك دلوقتى! أديك ضيعت اليوم والمفاجأة.

وطلعت وراهم بعصبية كانت بحر فاقت وبتعيط فى حضن يامن.

يامن: اهدى يا حبيبتى، اهدى

بحر بدموع: اهدى ايه يا يامن انا مبقتش فاهمه حاجة، انا ليه فى كل ده ذنبى ايه عشان يحصلى كده، ليه من البداية اصلا امى تموت وبعدها حياتى تتحول 180 درجة، ليه كل ما اقول ان حياتى اتظبطت ترجع تسود تانى ليه، انا تعبت والله تعبت، كفاية بقا كفاية

رقية: يا حبيبتى ده مقدر ومكتوب ربنا مش هيسيبك ابدا واللى عمل كده مش هنسكتله ابدا.

يامن: وغلاوتك عندى انتى وبنتنا مهسكت بعد كده، ربنا يقدرنى واجيب اللى عمل كده تحت رجلك، بس عشان خاطرى كفاية انتى تعبانه اوى، متزوديش تعبك اكتر من كده

بحر: مش قادرة يا يامن... مش قادرة

طلب يامن من الكل يخرجوا برة وقعد مع بحر يهديها لغايه ما راحت فى النوم ونزل تحت كان مؤمن وزين قاعدين جنب بعض وكل واحد مهموم...

قعد يامن قصادهم

زين: انا مش فاهم مين بيعمل كل ده وليه؟

يامن: قرب وقته بعد كده مش هسكتله

مؤمن بانتباه: انت تعرف هو مين؟

هز يامن بدماغه وسكت

مؤمن: يعنى انت عارف مراتى بتخونى مع مين وساكت؟

يامن: وطى صوتك يا بنى، واﻧت فكرك لو اعرف ان يسر اللى بتساعده من البيت هنا كنت سميت عليها؟ دول مش ساهلين وخصوصا رائف ده، اللى خلاه يوصل لحد من جوة بيتنا هيخليه يعمل الاكتر من كده بعدين ف لو سمحت نهدى ونفكر مش لازم ابدا يسر تعرف اننا كشفناها

زين برزانة: يامن صح، احنا لازم نبان قدامها طبيعيين جدا ومش كده وبس نجهز حفلة بمناسبة حملها وانت تجيبلها هدية كمان

يامن: بالظبط

مؤمن: انتو اتجننتوا؟ احتفل ب ابن مش ابنى؟

يامن: مؤمن انا مقدر كل اللى انت فيه والله بس لازم تسمع كلامنا واوعدك ان الحفلة دى هتكون نهايتهم......

♕♕♕♕♕♕♕♕♕♕♕

تانى يوم على الفطار

الكل بيفطر ف جو متوتر، يامن بص ل مؤمن وغمزله انه يبدأ

مؤمن: احم... انا عارف ان البيت متوتر وخصوصا يامن وبحر، علشان كده انا قررت انى على آخر الاسبوع هعمل حفلة بمناسبة حمل يسر، ده بعد اذنك طبعا يا بابا.