الفصل 9

يسر بفرحة: بجد يا حبيبى؟ مؤمن: طبعا يا يسر انا مستنى اليوم ده من زمان اوى. يسر: ربنا يخليك ليا يا حبيبى، طيب ننزل نجيب فستان سوا مؤمن: اكيد طبعا حتى ممكن ناخد بحر بحر بابتسامة شاحبة: لا معلش انا معايا فساتين كتير هلبس اى حاجة يسر بتهكم: وهى بحر ليها نفس تحضر بعد اللى حصلها؟ الكل بصلها بهجوم يامن: يسر... انا ماسك نفسى عليكى لأقصى درجة لو سمحتى متخليش اعصابى تفلت رقية: انا سكتالك كتير يا يسر بس مش

عشان انتى حامل ده يديلك الحق انك تغلطى فى مراة ابنى انتى سامعة. يسر بدموع مزيفة: وانا عملت ايه لكل ده؟ ماحنا شوفنا صورها على تليفونا كلنا انا مالى. بحر بتعب: ااه يامن بغضب: آه ايه انتى كمان، يسر كلمه كمان وهنسى انك مراة اخويا. يسر بغضب: لااا انت زودتها اوى، سامع يا مؤمن بحر بصراخ: ااااااااااه، الحقنى يا يامن يامن بخضة: مالك يا بحر بحر بوجع ودموع: مش قادرة، الحقنى رقية: الحقها يابنى شكلها بتولد يامن بتوتر: اعمل ايه؟

مؤمن بزعيق: انت لسه هتسأل شيلها ويلا على المستشفى وفعلا يامن عمل كده وطلع على العربية ومامته ركبت ورا جنب بحر وزين جنبه قدام ويسر ومؤمن ركبوا عربيتهم وطلعوا على المستشفى وكانت فى انتظارهم الدكتورة بتاعة بحر اللى يامن كلمها فى الطريق، دخلتها بسرعة الاوضة وكشفت عليها وطلعتلهم برة.. الدكتورة: دى حالة ولادة مستعجلة بس الرحم مش مفتوح يامن: يعنى ايه؟ الدكتورة: يعنى هتولد قيصرى بعد اذنك

وسابته وجهزوا اوضة العمليات ويامن دخل ل بحر... يامن: بحر... سمعانى بحر بدموع: بنتى يا يامن يامن: هتقومى بالسلامة متقلقيش، انا جنبك بحر: احضنى يا يامن انا خايفة اوى حضنها يامن بكل قوته ودموعه بتنزل وهو مرعوب من فكره انه يفقدها.... يامن بدموع: هتقومى بالسلامة وترجعيلى عشان انا مليش غيرك، الدنيا من غيرك ولا تسوى يا بحر، اللى جمعنا وربطنا اكبر من انك تروحى منى بسهولة بحر بدموع وتعب: لو جرالى حاجة..

قاطعها يامن وهو بيطلعها من حضنه وبيحط ايده على بقها: لا اوعى تكملى انتى هتقومى بالسلامة وهترجعى تنورى بيتنا انتى وبنتنا.... تصدقى مخترناش اسمها وهى متصربعة وعايزة تنزل قبل معادها بحر: نفسى اسميها آرين يامن: اسم جميل، آرين يامن الصاوى.

ابتسمت بحر ودموعها نزلت: اسمعنى، لو جرالى حاجة خلى بالك من بنتى حبها يا يامن، طمنها دفيها بحضنك اهتم بيها، البنت مش هتحتاج فى الدنيا من ابوها غير الاهتمام والحضن الدافى والاحتواء، خليك صاحبها وابوها واخوها واغلى ما ليها، دى بنتنا حتة من قلبى انا وانت، عشان خاطرى، كلمها عنى كتير، قولها ماما كانت بتحبك، وفرجها على صورنا، واحكيلها حواديت عن السيرة وعم الصحابة، احكيلها عن امهات المؤمنين، احكيلها عن حب الرسول صلى الله عليه وسلم لعائشة رضى الله عنها، علمها الصلاة يا يامن، خليك جنبها وداعم ليها فى كل وقت فى حياتها.

يامن بدموع: ليه بتقولى كده؟ انتى هتعلميها كل ده، هتكونى معاها فى كل لحظة، صدقينى يا بحر، انا واثق فى ربنا ورحمته انه مش هيوجعنى فيكى، كفاية اللى عشناه، خليكى قوية وارجعيلى عشان خاطرى وخاطر بنتنا.... بحر..... بحر دخلت الدكتورة وبصت عليها الدكتورة: هناخدها لاوضة العمليات دلوقتى، متقلقش احنا ادينالها ادوية تنيمها عشان الوجع، لازم ندخلها كل ما الطلق بيزيد بيكون خطر عليها صدقنى

وبسرعة اخدوا بحر ويامن خرجلهم بره وقعد على الكرسى.. رقية: قوم صلى وادعى لمراتك وبنتك يلا... خدوه مؤمن وزين ونزلوا يصلوا فى جامع المستشفى وفضلوا يقرئوا قرآن.... بعد ساعتين..... الكل كان متجمع فى المستشفى مريم ومامتها وعمر ولين، واهل يامن كلهم وكله على اعصابه ومرعوبين على بحر..... اما يامن كان فى دنيا تانيه كل اللى شايفه قدامه ضحكة بحر ووصيتها ليه على بنتهم، كل ما بيفتكر كلامها قلبه بيتعصر من الخوف والحزن.

يامن: يا رب يا رب ردهالى بخير هى وبنتى يارب. طلعت الدكتورة فى الوقت ده وهى شايلة آرين، والكل اتجمع حواليها.. يامن بلهفة: فين بحر؟ ابتسمت الدكتورة ومدت ايدها ب آرين: طيب سمى وشيل بنوتك الاول. ابتسم يامن بدموع والكل قلبه ابتسم لما شافوا آرين. شالها يامن ودموعه نزلت على خدها: آرين يامن الصاوى نورتى حياة ابوكى ودنيته. وباسها فى دماغها وكبرلها فى ودنها بصوت مرتجف ودموعه مش مبطلة نزول يامن: بحر فين؟

الدكتورة: اطمن، مدام بحر بخير احنا نقلناها اوضتها دلوقتى، بس هناخد من حضرتك لين عشان لازم تكون فى الحضانة. رقية بلهفة: حضانة ليه؟ الدكتورة: لازم نطمن عليها عشان هى مولودة فى السابع، وغير كده والدتها مريضة سكر، لازم نتأكد ان البنت مش حاملة المرض من والدتها ونتأكد من صحتها. خدتها الممرضة من ايد يامن ومشيت ويامن جرى على الاوضة اللى فيها بحر... دخل كانت بحر بتفوق من البنج يامن وهو بيمسك ايدها: بحر...

بحر يا حبيبتى حمدلله على سلامتك. بحر بتوهان: يامن... ايدى كبيرة اوى يامن بعدم فهم: كبيرة ايه، مالها؟ بحر بعياط: انت مش بتحبنى، كل اللى انا فيه ده بسببك يامن: بسببى ايه، وانا مالى؟ بحر: انت اللى خدتنى الاوضة غصب عنى و... حط يامن ايده على بوقها وبص لأهله اللى بيضحكوا عليهم وزين اللى بيصور اللى بيحصل يامن: ببتعمل ايه يا زفت انت؟ زين: باخد خبرة الاوضة يا حبيبى رجعوا يضحكوا تانى ويامن شال ايده من على بوق بحر يامن: ابوس

ايدك فوقى هتفضحينا بحر: هتجيبلى شاورما؟ يامن: يادى ام الشاورما، حاضر هجيبلك يا حبيبتى بحر: انت مستخسر فيا الشاورما وانت السبب انى ابقى كده يامن وهو بيضرب ايده على وشه: انا السبب ف ايه يا ولية.. بحر بدموع: فين ماما؟ خليها تشوف آرين هى بتحبها الكل حزن لحالتها وعيونهم دمعت بحر: شافت آرين؟ يامن: اه... فوقى بقا يلا عشان الواد زين بيقول انه عامل مفاجأة دخلت الممرضة فى اللحظة دى وحطت محلول لبحر وبقيت تحط فيه حقن

يامن: هى هتفوق امتى؟ الممرضة: خمس دقايق بالكتير وهتفوق متقلقش. شكرها يامن وخرجت الممرضة وكلهم فضلوا مستنيين بحر تفوق. ♡♡♡♡♡♡♡♡♡♡♡ رائف: ولدت؟ يسر: اه وفى المستشفى مستنيينها تفوق وياخدوها البيت رائف: والبنت؟ يسر بغل: يامن رفض انها تفضل ف المستشفى رائف: متقلقيش انا هتصرف والبنت هتفضل فى المستشفى عشان تبقى وسيلة ضغط عليه. يسر بابتسامة: هو كده، مستنية تخطيطك. وقفلت معاه ودخلت لاوضة بحر. كانوا قاعدين كلهم ويامن بيأكل بحر.

زين: طيب ايه مش هنروح عشان المفاجأة؟ بحر: اول مره اشوف واحد عامل مفاجأة متحمسلها اكتر من صحابها زين: صارف ومكلف عليها يا جدعان الاه. يامن: طيب ماتقولنا هى ايه؟ زين: لا، اول ما نروح ب آرين بحر: عايزة اشوفها يا يامن خليهم يجيبوها يامن: حاضر يا حبيبتى. لسه هيقوم ف مؤمن خلاه يقعد جنب بحر تانى وراح هو يجيب آرين.

وقف عند باب الحضانه واستنى الممرضة طلعتهاله وباس ايديها الصغيرة ودموعه نازلة انه عمره مهيعيش اللحظة دى ولا يشيل حتة منه. استغفر ربه وحمده على ما ابتلاه ورجع الاوضة عند بحر. اول ما دخل وبحر لمحت ارين اتعدلت بسرعة ومهتمتش بالجرح اللى شد عليها وشالتها من ايد مؤمن بلهفة وهى بتبوسها بدموع... بحر: حبيبة قلبى، حمدلله على سلامتك. وفضلت تتأمل فى وشها وبصت ليامن: بص يا يامن جميلة ازاى، هى لون عيونها ايه؟ يامن: معرفش.

فى اللحظة دى آرين فتحت عيونها وبحر بصتلها ودموعها نزلت اوى بحر: عيونها زرقة يا يامن زى عيون ماما. يامن : الله يؤحمها ويبارك فى عمر آرين بحر: يا رب جت لين وقعدت جنب بحر لين: طنط بحر ممكن اشيلها بحر: بس هى لسه صغيرة يا لينو لما تكبر حبة لين: مممم طيب ممكن ابوسها؟ قربت بحر راس آرين من لين وباستها بحب لين: انا هبقى اختها وهحبها اوى لغايه ما مريوم تجيبلى واحدة زيها. اتكسفت مريم والكل ضحك عليها. بحر: هنروح امتى؟

يامن: المفروض كمان نص ساعة. دخلت الممرضة وقالت: بعد اذنكم يا جماعة لازم ناخد البنت للحضانة يامن: ملوش لزوم احنا ماشين كمان شوية الممرضة: الام مسموحلها تخرج لكن البنت هتفضل ف الحضانة يومين بحر بخضة: ايه؟ لا طبعا مستحيل بنتى تبعد عنى يامن: اهدى يا حبيبتى وصل للممرضة: الدكتورة قالت انها تخرج عادى البنت كويسة وعايزة رعايه من والدتها فى البيت غير كده بنتى مش هتفضل لحظة واحدة، اتفضلى. خرجت

الممرضة ويامن بص لبحر: متقلقيش يا حبيبتى هنروخ بيتنا بيها. رقية: يلا هوونا نغير ل بحر وآرين ونطلع وراكم. كله خرج وفضلت رقية ومريم يغيروا لبحر. برة الاوضة... يسر: انا هروح الحمام ونزلت تدخل حمام المستشفى.. مؤمن: فيه حاجة مش مظبوطة يامن: الهانم والبيه بيخططوا لخطف بنتى، بس على مين والله مهنولهالهم. مؤمن: غلطهم كتر ومش هسكت اكتر من كده.

يامن: الصبر حلو، اللى خلانا سكتنا كل ده مجتش من يومين، كويس انى طلبت مراقبة فون يسر وعرفنا نحدد موقع رائف وسجلنا كل حاجة بتدور بينهم. رجعت يسر وبطلوا كلام ف مسكت فى ايد مؤمن يسر بدلع مزيف: حبيبى انا تعبت اوى، تعالى نرجع على البيت قدامهم. يامن بلهفة: لا خليكم نرجع سوا. خرجت مريم وهى شايلة آرين ورقية ساندة بحر. راحلها يامن وشالها وبحر معترضتش عشان كانت تعبانة اوى. خرجوا كلهم من المستشفى ورجعوا البيت.....

حط يامن بحر على السرير وآرين جنبها... مؤمن: طيب ايه مش هتشوفوا المفاجأة رقية: يابنى حس شوية مش شايف مراة اخوك تعبانة؟ زين: هتخف دلوقتى وهتقوم تجرى بحر: طاب ايه المفاجأة جه جنبها وشال آرين وقال: انا هوري رينو المفاجأة اللى عايز ييجى ورايا كله ضحك وسندت بحر على يامن وراحوا وراه

اتفاجئوا ان الاوضة اللى جنبهم كلها لونها بينك واسم آرين مكتوب بلون ابيض وفيه خطوط بينك على سرير فى النص وعلى الجنب سرير صغير وحواليه العاب كتير، وعلى الارض مفروشة سجادة بيضا وفيها فيونكات بينك حتى الستارة كده. لين بانبهار: واو، تحفة اوى اونكل زين انا عايزة كده زين بحب: عنيا يا لينو. بحر: اللهم بارك يا زين، تسلم ايدك والله. زين: اقل حاجة ل آرين هانم.

حضنه يامن بحب وحمد ربنا جواه انه رضى عن عيلته واتجمع وسطهم والا كان زمانه محروم من كل الفرحة اللى حواليه دى. رجعت بحر اوضتها ويامن شال آرين وحطها فى سريرها اللى نقلوه اوضة بحر... وبحر غيرت هدومها بمساعدة يامن ونامت... نزل يامن تحت كان الكل متجمع.. محمود: انا قررت اننا نعمل حفلة بمناسبة ولادة بحر يسر بغيظ: مهو زين يا عمى كان هيعمل حفلة عشان حملى. محمود: وفيها ايه نعملها بالمناسبتين. بصتلهم يسر بكره وطلعت اوضتها...

يسر بغل لرائف: لازم نخلص من مؤمن الليلة رائف: هو يطلع بس وانا مدبر كل حاجة يسر: تمام ••••••••••••••••••••••••••••••••••••••••• تانى يوم الضهر..... فى الليڤينج... كانت قاعده بحر وشايلة آرين وجنبها كانت رقية... بحر: ماما، ينفع حفلة يسر ومؤمن تتعمل اخر الاسبوع والاسبوع اللى بعده نعمل حفلتنا احنا؟ رقية: ليه؟ بحر: اكون خفيت شوية واقدر على جو الحفلات ده... رقية: ايوة يا بنتى بس...

بحر: مبسش يا ماما، انا مش ناقصة العلاقة بينى وبين يسر تتعقد زيادة كفاية اللى حاصل. رقية: تمام، هكلم محمود واقوله كده. دخل يامن وزين وقعدوا معاهم بحر: حمدلله على السلامة يامن: الله يسلمك... شال زين آرين وقال: حبيبة عمها اللى وحشته. يامن: على فكره دى بنتى هاتها زين: وانا مالى انا اللى شيلتها الاول. وفضلوا يتخانقوا على آرين لغاية ما قطعهم رنة فون البيت فى وقت نزول يسر... يامن: الو... مين معايا

@: ده بيت مؤمن محمود الصاوى؟ يامن بقلق: ايوة مين حضرتك @: انا آسف، البقاء لله، اتفضلوا فى المستشفى عشان تاخدوا الجثة. رمى يامن التليفون من ايده والكل اتخض واتلم حواليه. بحر: فيه ايه؟ زين: يابنى انطق يامن بصدمة: مؤمن مات... الكل بصله بصدمة ورقية اغمى عليها ويسر دخلت فى حالة انهيار مزيفة. فوقوا رقية وسابوها مع بحر اللى جاتلها مريم وشالت آرين وبحر فضلت تهدى فى رقية... وخرج يامن وزين على المستشفى ويسر خرجت

وراهم:خدونى معاكم اشوفه،عشان خاطرى. خدوها معاهم وطول الطريق بتعيط وقلبها طاير من الفرحة انه واخيرا اللى نفسها فيه اتحقق. وصل يامن وزين المستشفى ووراهم يسر... يامن: لو سمحتى فيه واحد جه فى حادثة دلوقتى و... قاطع كلامهم مؤمن وهو بينادى على يامن مؤمن بتعب: يامن... انا هنا بصله يامن وجرى عليه هو وزين وحضنوه ويسر بقيت واقفة مكانها مخضوضة مكنتش مخططة ابدا ان ده يحصل، يعنى ايه لسه عايش؟! يامن: انت بخير؟ قالوا انك..

مؤمن بتعب: نروح البيت واحكيلكم انا تعبان انت شايف دراعى مكس.. ور ده غير وشى اللى متش.. لفط زين: صح، تعالى معايا يلا مشيوا بيه ووقف قدام يسر مؤمن: حبيبتى مالك مخضوضة ليه؟ انا بخير يا قلبى وحضنها وطلعوا بره ركبوا العربية ورجعوا على البيت... فى البيت.. كانت رقية قاعدة بتعيط وجنبها بحر بتهدى فيها رقية: ابنى ملحقش يفرح بابنه ملحقش، اه يا بنى اه

بحر: اهدى يا ماما، الم.. وت علينا حق، مينفعش اللى بتعمليه ده لازم نحمد ربنا ونصبر على الشدة والبلاء ربنا قال «وبشر الصابرين الذين إذا أصابتهم مصيبة قالوا إنا لله وإنا إليه راجعون». اصبرى يا ماما واحتسبى اجرك عند الله رقية: ونعم بالله، راضية والله راضية يا بنتى بس قلبى قايد نار مؤمن ده حتة من قلبى من روحى اول فرحتى اول واحد اسمع منه كلمه ماما، ابنى وحبيبى واغلى ما ليا هو وكل اخواته، مش قادرة يا بحر

حضنتها بحر وعيطت على عياطها. محمود بحزن: آرين فين يا بنتى؟ بحر: فوق مع الدادة يا عمى فى الوقت ده دخل يامن وزين وهما بيسندوا مؤمن ويسر وراهم ومنظرها غنى عن الكلام شافتهم رقية وقامت جريت هى ومحمود على مؤمن وحضنوه. رقية: مؤمن يا حبيبى يابنى يا حبيبى، حمدلله على سلامتك. انت عايش صح؟ انا مش بيتهيألى؟ مؤمن: انا بخير يا ماما والله بس قعدونى انا مش قادر اقف اكتر من كده

قعد فى الليفينج وكلهم حواليه مستنيين يعرفوا ايه اللى حصل وخصوصا يسر.... يامن: تقدر بقا تحكيلى ايه اللى حصل؟ مؤمن: كنت طالع على الشركة الصبح زى العادة ولقيت فرامل العربية باي.. ظة مهما دوست حاولت اركن معرفتش روحت لا.. بس ف شجرة على الجنب العربية اتقل.. بت. رقية: يا لهوى يا حبيبى الف بعد الشر الحمد لله ان ربنا نجاك الحمد لله. بحر: حمدلله على سلامتك يا باشمهندس مؤمن: الله يسلمك يا بحر...

خلونى اطلع انام عشان مش قادر اما واخد مسكنات تهد جبل سنده يامن وطلع ويسر قاعدة مكانها. رقية باستغراب: ماتقومى ورا جوزك يا يسر يسر بتوهان: ها... اه اه قايمه وقامت وراه فى الوقت اللى يامن نزل فيه وهو شايل آرين رقية: والله مانا عارفة ايه اللى جرالها بحر: الصدمة وحشه عليها يا ماما برضو ربنا يعينها. رقية: يا رب يا بنتى يامن: طاب ايه الحفلة على معادنا اخر الاسبوع؟ رقية: حفلة ايه يا يامن انت مش شايف حالة اخوك؟

يامن: شايف عشان كده بقولك الحفلة نخليه يفك شوية. بحر: بص يا يامن هما يعملوا حفلتهم اخر الاسبوع واحنا اسبوع آرين نخليه وراهم بشوية اكون خفيت وعرفت اتحرك يامن: انتى مش هتحضرى الحفلة يعنى؟ بحر: لا مش هقدر، اصلا الجرح كل مدى بيشد عن اليوم اللى قبله ف بدل م اعمل مجهود زيادة وكمان عشان آرين يامن: تمام. اتفق مع مؤمن انهم يعملوا الحفلة برة الفيلا ويحطوا تأمين وحراسة على الفيلا... تانى يوم....

دخل يامن من شغله على صوت خن.. اق مؤمن وزين.. زين: اوعى انا اللى هشيلها مؤمن: انا عمها الكبير يبقى انا الللى هشيلها يامن بزهول: فيه ايه رقية بضحك: اهم ع الحال ده يابنى من وقت ما ارين صحيت وكل واحد فيهم بيتخانق مع التانى عشان يشيلها يامن وهو بيشيل آرين من امه.. يامن: لانت ولا هى، اوعوا كده وشالها وباس دماغها: حبيبة قلب ابوكى انتى. زين: المفروض تديهالى انا عاملها هايلامان ف الاوضة بتاعتها مؤمن : هى بقت كده يعنى تمام

وخرج وسابهم ووقتها زين شالها من ايد يامن وفضل يلعب معاها بوشه وهى تبتسم. بعد شوية رجع مؤمن وهو شايل شنط كتير فى وقت نزول يسر.. يسر: ايه ده كله؟ مؤمن وهو بيحطهم قدام اهله وبحر ويامن: لعب لآرين ولبس بحر: بس ده كتير يا مؤمن مؤمن: مفيش حاجة تكتر على حبيبة عمها وشال آرين بحب صافى تحت نظرات غل يسر اللى هتم.. وت وتخ.. لص على آرين وبحر. ♡♡♡♡♡♡♡♡♡♡♡♡♡♡♡♡♡♡♡♡♡ يوم الحفلة...

استعدت يسر وتألقت بفستان ازرق ومشيت مع مؤمن اللى اصر فى اليوم ده ياخد فونها بحجة انه مش عايزه يشغلها عن الحفلة. وصلوا الفندق الى فيه الحفلة ودخل مؤمن ويسر وسط تسقيف الناس حواليهم ووصلوا لترابيزتهم اللى قاعد عليها يامن ومامته وباباه وزين. رقية: مبروك يا حبايبى، وربنا يقومك بالسلامة يا قلبى يسر: اللهم امين شوية وجه رائف عليهم واللى يسر اتفاجأت بيه.... رائف: مبروك يا استاذ مؤمن، ايه ده الف سلامة عليك مؤمن: حاد..

ثة بسيطة الحمد لله رائف: لا خد بالك مش كل مرة تسلم الجرة يامن وهو بيحط ايده على كتف رائف: لا هتسلم، طالما حواليه اخواته. رائف بخبث : اكيد، عن اذنكم، مبروك يا مدام يسر مره تانيه سابهم ومشى ومؤمن بص ليسر: هو يعرفك؟ يسر بتوتر: ل... لا معرفوش رقية: هو مين ده يابنى يامن وعينه على يسر: ده كان مدير بحر فى شركتها يا ماما وبحكم البيزنس والوجه العام اضطرينا نعزمه على الحفلة عشان كان فيه شغل ليه مع الشركة بتاعتنا. شوية

وفون يامن رن وكان عمر عمر: كله تمام يامن: تمام، أمن الحفلة من برة والفيلا عمر: كله تمام وتحت السيطرة، بس فيه حاجة يامن: حاجة ايه؟ عمر: بحر اتحركت من الفيلا وف طريقها ليك يامن: ايه؟ عمر: مش عارف فيه ايه المشكله انها لوحدها. يامن: اقفل طيب قفل مع عمر وكلم بحر اللى كانت منهاره ف العياط يامن: بحر.. فيه ايه بحر: انا داخله عليك يا يامن اطلعلى بره يامن اتوتر وطلع وقف على باب الفندق وبحر نزلت من العربية وجريت حضنته

وفضلت تعيط يامن بقلق: بحر... فيه ايه؟ مالك؟ بحر: آرين يا يامن يامن: مالها؟؟ بحر: آرين اتخط.. يامن بجنون: انتى بتقولى ايه... تعالى خدها ودخل الحفلة وقفها جنب مامته اللى اتخضت من منظر بحر واعتذر يامن من الضيوف ومشيوا ماعدا رائف اللى وقف ف اخر القاعة بيدور على تليفونه ويامن ابتسم بخبث على خطته اللى ماشية بالمللى. وفجأة النور كله اتطفى وباب القاعة اتفتح ودخل منه عمر وقفل الباب وراه. وظهر نور على الشاشة فيديو...

كان عبارة عن يسر وهى مع رائف فى بيته وهما بيتفقوا على كل حاجة بينهم، بعدها فيديو تانى بيوضح ان يسر عارفة كل حاجة وباين فيه اعتراف رائف على نفسه بقتله لمامة بحر. بحر بصدمة: انتو؟ انتو اللى ورا قت.. ل ماما؟؟ يسر: الفيديوهات دى ملعوب فيها انا اصلا معرفش مين ده يامن باستخفاف: عجبتينى، بس للاسف الفيديوهات دى متسجلة بأمر من النيابة وانا بنفسى اللى زرعت الكاميرات وتسجيل الصوت فى الشقة والعربية. مؤمن: تاخدى المفاجأة الاكبر؟

انا عارف ان اللى ف بطنك ابنه مش من صلبى رقية: ايه؟؟ انت بتقول ايه يا مؤمن مؤمن: دى الحقيقة يا امى، انا عرفت ان عندى عيب يمنع من الخلفة اينعم مؤقت بس موجود ولسه متعالجتش منه ف ازاى مراتى تبقى حامل؟ يسر بدموع: حتى انت يا مؤمن، دانت اكتر واحد عارف ان يامن من زمان كان عايزنى وانا فضلتك عليه مؤمن بزعيق: فضلتى ميين، اخويا انضف من انه يبص لواحدة وس.. زيك. بحر بدموع: بنتى فين؟

جه عمر وهو شايل آرين واداها لبحر اللى شالتها بلهفة وهى بتبوس فيها وخدتها رقية من ايديها يامن: على أد انى مكنتش عايز بحر ولا بنتى يبقوا موجودين دلوقتى، بس لازم كل حاجة تبان قدامهم. مؤمن: ليه عملتى كده؟ ليه خونتينى وانتى على ذمتى؟ رائف بشماتة: ومين قالك انها على ذمتك؟ بصله الكل بصدمة ورجعوا بصوا على يسر مؤمن: انطقى ايه الكلام اللى بيقوله ده؟

رائف: اقولك انا مراتك متطلقة منك من سنة تحديدا وقت دخول يامن حياتكم، اتطلقت واتعرفت عليها وحكتلى انها مش مرتاحة معاك وعايزة يامن بأى طريقة وانا كنت ممكن اعمل اى حاجة عشان اوصل لبحر خصوصا بعد ما شوفتها واتعاملت معاها وحبيتها، اتفقت معاها اننا نخطط سوا عشان نفرقهم عن بعض وف النهاية نتخلص منك وهى تكون حامل عشان تجبر يامن على الجواز منها ويطلق بحر، وبرغم كل اللى عملناه الا ان حبهم كان بيزيد وكل حاجة نعملها عشان نفرق بينهم يتمسكوا ببعض اكتر من الاول.

بحر بدموع: وانت فاكر كل الناس قذرة ومعندهاش قلب زيك؟ انا عملتلك ايه؟ ايه اللى أذيتك فيه عشان تنتقم منى فى قت.. ل امى، انا حتى معرفكش ولا عمرى شوفتك غير انا مسكت الشركة واول م شوفت منك وش معجبنيش سيبت الشركة كلها واتخليت عن حلمى وقعدت ف بيتى، فهمنى ايه اللى عملته يستاهل عقاب بمو.. ت امى وانك تفرقنى عن جوزى؟

رائف: مش انتى اللى كنتى مقصوده كانت مريم، بس لمت اللعبة اتقلبت معاكى منكرش انى فرحت وخصوصا انى كنت مراقبك من قبلها، عرفتك بعدها انك اتجوزتى يامن ف الوقت اللى كنت هظهر فيه واحميكى يعنى باختصار كان زمانك معايا وف حضنى انا مش هو قرب منه يامن وضربه فى وشه وفضل يضرب فيه لغايه م عمر وزين شالوه بالعافية. مؤمن: عمرى ما كنت اتخيل انك وس.. للدرجادى. يسر بغل: كنت مستنى ايه؟

انا من البداية مش بحبك واتجبرت اتجوزك وجوايا كنت مستنيه يامن. مؤمن: ليه؟ دانا حبيتك، خسرت الدنيا كلها عشانك، كنت مستعد اجيب الدنيا كلها تحت رجلك، دى جزاتى تخونينى؟ تعيشى معايا وتعيشينى سنة كامله فى الحرام؟ محمود بغضب: انتى ملتك ايه لكل اللى عملتيه ده؟ يسر: انا مش غلطانه انا كنت عايزة يامن، واتجننت لما عرفت انه اتجوز، بقى انا استناه كل ده واتجوز اخوه عشان افضل جنبه وهو بمنتهى البرود يتجوز غيرى؟

بحر: مش نصيبك، ليه مبصتيش من ناحية ان ربنا مش رايدكم لبعض؟ ليه عملتى فى جوزك كده، انتى ارتكبتى اعظم كبائر الدنيا كل ده مش هامك؟ يسر: سيبنالك انتى التقوى يا ست بحر. يامن: عمر، دخل القوات يقبضوا عليهم رائف: يقبضوا على مين انت اتجننت؟ وف لحظة كان ساحت بحر وحاطط على رقبتها س.. لاح رائف: أمن خروجى من هنا بدل ماقتلهالك بحر بصراخ: الحقنى يا يامن يامن: نزل اللى ماسكه ده بدل والله اندمك على كل اللى عملته

رائف: كده خسرانه وكده خسرانه يا يامن، خليهم يوعوا اخرج من هنا فلتت يسر ايدها من مؤمن وراحت وقفت جنبه: صح كده يلا يا رائف رائف: يلا على فين يا حلوة؟ يسر: هاجى معاك رائف: لا انتى دورك خلص معايا لحد كده باى يا قطة وف لحظة ض.. رب طلقه على يسر جات فى قلبها ووقعت ج.. ثة هامدة فى لحظتها، بحر فضلت تصرخ من المنظر وكل اللى شافته يوم وفاة والدتها اتعاد قدامها وهى بتصرخ وتعيط.

اتسلل عمر من ورا رائف بهدوء محترف وبسرعة شال ايده اللى ماسك بيها بحر ووقع منه المسدس وبحر جريت على يامن اللى حضنها بخوف وامان. واخيرا تم القبض على رائف ويسر الاسعاف شالتها بعد ما اكدوا وفاتها والكل رجع البيت. ♡♡♡♡♡♡♡♡♡♡♡♡♡♡ بعد مرور 3 سنوات.... كان يوم فرح زين على حنين زميلته فى الشغل اللى حبها وقرر يتجوزها على ترابيزة كان قاعد يامن وبحر وهى شايلة آرين اللى كانت لابسه فستان زى بتاع بحر بالظبط

وجنبهم محمود ورقية ومؤمن. يامن بمرح لمؤمن : شد حيلك يا بطل محتاجين نفرح بزيادة مؤمن: يا عم توافق هى بس بحر: هتوافق متقلقش مؤمن: وياترى الثقة دى منين؟ بحر: من وراك بص مؤمن وراه ولقى ندى صاحبة بحر جاية عليهم مبتسمة قام مؤمن وسلم عليها واخدها الترابيزة ندى بهمس: انا موافقة يا مؤمن بصلها بصدمة وهى سابته وراحت سلمت على بحر ويامن والباقى وقعدت جنب بحر بخجل جه مؤمن وقعد جنبنم مؤمن: أبا انا عايز اتجوز

محمود وهو بيضرب كف على كف: عايز ايه يعنى؟ مؤمن: نروح انا وانت والحاجة والواد ده نخطب ندى ومعانا ست فرخات يامن: ست فرخات دانت مبزر قوى. بحر بهزار: طبعا ست فرخات هى سعدية اقل من بنتنا ف ايه؟ ضحك الكل بسعادة ووصل عمر اللى كان شايل محمد على ايده وعنده سنتين ومريم ماشية جنبه اول. ما محمد لمح آرين نزل من ايد عمر بسرعة وجرى عليها محمد: رين... رين.... بيبى يامن: عندك يا حبيبى روح عند ابوك عمر: مالك بالولد يلا

يامن: ياعم ده بيعاكس بنتى قدامى يا عم عمر: براحتك يا محمد اتحركت آرين من على رجل بحر ومسكت ايد محمد. آين: حمد .. العب معايا عمر: بنتك اللى بدأت بالتحرش اهو. ضحكوا كلهم عليهم وطلعوا على الاستيدج يتصوروا جنب زين وحنين بفرحة وحب وبعدها اشتغلت اغنيه وكله رقص عليها سلو...

يامن: عمرى ما كنت اتخيل انى اوصل للحظة دى معاكى، عدينا بحاجات كتير اوى سوى بس لسه حبك فى قلبى زى ما هو، اتجمعنا صدفة بس بعمرى كله. ربنا يديمك ليا يا قلبى انتى وآرين بنتنا والنونو اللى ف الطريق.

بحر بابتسامة: وانا عمرى ما كنت اتخيل انى اوصل معاك لدرجة الحب دى، وجودك أمان لقلبى وراحة ليا، بعرف اتنفس وانت معايا واما بتبعد بحس ان الدنيا فضيت من حوليا، عوضتنى عن حنان امى وسند وامان ابويا، عيشتنى اجمل ايام عمرى حتى فى وسط كل حاجة حصلت انا بحبك، ولآخر يوم فى عمرى حبك مش هينقص درجة يا حبيبى. حضنها يامن وجواه قلبه فرحان بوجودها وانه معاها.

«الجزاء من جنس العمل، قبل ما تخطى خطوة فى حياتك حط ربنا قدامك، خلى ربنا دايما فى قلبك وعقلك، طريق الشر اخرته شر وطريق الخير دايما خير. اعرف ان ترتيبات ربنا كلها راحة وامان ليك، حتى لو الترتيبات دى جات عكس مانت عايز او حتى تقيلة عليك خليك فاكر ان ربنا عايز كده. الحب لما يكون فى النور احسن من الضلمة، الحب الصافى برضا ربنا واهلك افضل من الدرا وانك تتركب معصية وذنب عشان كلمة.

حط الكلمة دى فى مكانها الصح ووقتها الصح وهتفرق جدا معاك، هتلاقى نفسك بتقولها من غير قيود ومن غير خوف هتقولها كل ثانيه وانت قلبك مطمن ومرتاح، مع زوجتك او زوجك فى حلال ربنا. الامان والسكينة والطمئنينة بتيجى بمصاحبة طريق الله عز وجل والقرآن، دايما خلى القرآن صاحبك فى الدنيا عشان يكوز صاحبك فى الاخرة. واخيرا اتمنى تكونوا استمتعوا بالرواية وعجبتكم».