رواية كحل عرب الفصل الثلاثون 30 - بقلم زينب ماجد

رواية كحل عرب الفصل الثلاثون

- والله يمه هي كالتلي، وكضتلي الباب و انا طلعت خاطر اشوفنه شرايد مني .

- شحجه وياج

- ما حجينه والله بس كالي عليش طلبتيني ، ومن كتله انت الطالبني ، صاح دشي يهدوة...و كضتني مرت عمي

حاكم ما شالته جدامه بعد .. كعد و حط اديه اعلى راسه : ادور اعلى الفاضحني و كسرت جدام بتي ، تالي الفاضحني اخوي ومنكس راسي .

راد يكوم كضاه جبار : لا تستعجل .. امش اعلى بتهم و تحقق وياها ياله تمش لهلها ، لزوم تندف بيتك بالاول .

كاعد يحجون ، طرتهم كواغد و هي حاطة العباية اعلى راسها .. لحكوها حاكم و جبار ..

دشوا للبيت .. كال الها حاكم : بهداي لا تضيعين الحك ... عنج انا احاجيها

يسرررررررى ، يسرررررى وينج .

كامت : ها عمي ؟

-كعدي جدامي بسع

- شكو

- انشدنج .. امس ساعة الطلعت هدوة .. انت وين جنت .

- انا طلعت خاطر امنعها لجن هي ما رضت ... و دفعتني و طلعت .. وما اهيس الا ابوي و امي اعلى راسي ، عاينوها و هي تطلع نشدوني هدوة وين رايحة .. كتلهم بس تشوف الكاع لجن ابوي تبعها خاطر يصيح .. وشافها ويا سرحان .

حاكم : انا امس يم ابوج و ساعة الحجة الحادثة بما انزلت .. كاله جنه مارين انا و مرتي و شفنا سرحان دش لكاع حاكم .. تبعيته خاطر امنعنه و شفته و هو يتمضحك ويا بت اخوي و كضيتهم .

- يجوز شاف سرحان

- شلون يجوز وانت تكولين نشدوج عن هدوة و تبعوها .

- انا هاذ الصار وياي، جاي اخبرنك بيه .

كامت كواغد : تحجين الصكد لا و العباس ابو فاضل هنا اعلكنج و اكصبنج .

- يا جا شنهي كلبتو علي .

- هدوة تكول انت الكلتيلها سرحان طالبها .

- يااااع ، فوكاها تتهمني ام الولد ..

هي حجتها و فز ستار من حجرته و صرخ : اعليمن هاي ام للولد ولج

كضها من شعرها و سحلها و تولاها دفرات و حاكم يجر بيه و يكله : حبلى ولك ، وخر عنها

الا كواغد انهدت عليها بالعود اطك بيها و تكللها : ولج حسة اخذيتي ابني بفضيحة و اخيج جاي يفضح بتي خاطر ترضى بييييييه

كامت منهم وتصرخ وتفشر عليهم و على هدية .. و كضت عباتها و جمارة كاضة بتها و تطيه الها لين تبجي ، كضت بتها و طرتها بالكاع .

البت فرفحت ..يسرى تصيح : حتى بزركم ما اريدنه يالكواويييييييييي*

تبعها ستار و هي ركضت بالشارع، كواغد شالت البت... تريد تسكتها و حاكم رد على كواغد : لو كاعدة ابيتج جان ما صار كل هااااااااااذ ، حاطة العباية اعلى راسج و تفترين و متهيه البيت، لا تقبل منج الحسييييين، بري منج و من بزريتج ... هادة بيتج و مكضيتها فرارررررة ، هجمتي بيتييييي .. دولبتينييي الله لا يطيج .

و كواغد فزت وياه مكاوم .. تتعارك و جبار و ستار يهدون بيهم .

كاعد يحجون .. اشتعل الفشك بالسلف ، و فزت الناس اعلى حس الرمي .. و الكل طلعت من بيوتها.

ركض حاكم و جبار و ستار طلعوا ..

ال ثجيل داكين قصر الشيخ مطر .. و كاتبين اعلى القصر (مطلوب دم ) ... ال ضاحي و عرفوا ال ثجيل مكتوب اعلى قصرهم مطلوب دم ... الزلم كلها شالت تفكها وكبت .

سرحان و الشيخ مطر جانوا بكاع ال منعم .. و بالمضيف مامش غير اخو الشيخ .. جاسم و زناد و حركوا الدنيا بتفكهم .. طلعت الوادم فزاعه و ناس تهدي بناس، و ناس تهدد بناس .

اجا الشيخ مطر و شاف اعلى قصره مكتوب مطلوب دم .. تسودن سرحان .. و يامن يكض ولد الشيخ .

زناد.يكول اطشرهم ، و سرحان يصيح اهججهم و كريم يصيح انعل و انعل ... و كبار الديرة يهدون خافن يكب الثار بينهم و يصير الدم للرجاب

الشيخ مطر : نحلها بالعكل .. ستروا اعلينا و لا تخلون الحك اعلينا .

سرحان : يا حك هاذ و هم فوك ملاعيبهم يكتبون اعلى قصرنا مطلوب دم

- من كون الدم دمك يسرحاااان استر اعلينا و خلينا نحلها بعكل .

- يا عكل الينفع ويا ذول .. سمهم ظا راح نخلص منه ، وراح يظلون ملاحكينا

دش الشيخ ال منعم : بويه السلام اعليكم

- و عليكم السلام

- الزلم الخيرة حاجية ويا ال ثجيل .. وولدكم ما خالين كصرة ، خارطينها اعليهم بالمسبة و الغلط اعلى جدهم ثجيل ، و الوادم مكتاضه

زناد: انعل شيب ابهاتهم ، جا ياهو من امس ولليوم ينعلون بجدنا ضاحي ، نسكتلهم ، لا وعلي ما نعديها .

الشيخ مطر : دكتهم هاي شنهي

- طالبين دم سرحان

سرحان : وانا الرايح ليهم و اشوفهم الدم شلونه .

- اصبر يسرحان

- من امس وانا صابر، وصلت بيه المواصيل وياهم ، لهنا ، يريدون دمي ، انا رايح ليهم .. و اشوفنهم شلون يهدرون دمي .

- ولك انطر لا تستعجل سرحاااان .

هدهم سرحان و مشى .

حاكم راد ويا ال ثجيل و متعارك هو ناصر من الروس ، ويكله ماكو غيرك سوا هالطلابة ... ولك تفضح عرضيييييي ناصر ، سويتها ويا وليدي و زوجيته بتك ، ورديت لبتي ، ولك بت هاي ما خفت الله بيها

سلطان : لعبوا بعكلك ورديت اعلى خيك يردي

- محد لعب بعكلي يعمي ، بتي الكال يسرى هي الكايلتلها سرحان رايدج ..

- وبتك لونها شريفه شعدها طالعة بنصاص الليالي تجابل الزلم يحاكم .

- بتي زغيرة و بت ناصر تلاعبت بعكلها ... لجن منا و غاد بتك عدك يناصر و بتي عدي ، و من باجر انا مزوجها لبت الشيخ ، و تفض وياك ، لا انت اخوي ولا انا اعرفنك ... بري منكم .

ناصر : دام صدكت ال ضاحي و صدكت اخوك ، جا اسمعها مني ، يبن ابوي ، بتك يو خطت جدامها ال ضاحي ، ينجتلون الاثنين ، بتك و ابن مطير ال ضاحي .. و يا هلا بالدم .

صاح سرحان : ءهلاااااا يا ال ثجيل ءهلاااااا

وكف و تبعته امه .. و هي تصرخ و تردي بيه و تكله : سرحان يمه : ادخيلك الله و دخيلتك رد يوليدي .

طلع سلطان و ردحة وكفت كبال ابنها و تصيح : دخيلك عمي .. وليدي بري ، دخيلتك يعمي

سرحان: ان جانكم عدكم طلابة ، قصر ابوي مال غرض بطلابتي ، جيتكم اعلى اجدامي هاي راية العباس اعلى جتافي ..

شالت الزلم تفكها .. و صرخ حاكم : شنهي تسودنت انت شمالك .

- ان جنتوا حاسبيني من ال ضاحي .. فالي دين وياكم و ديني لزوم ينرد ... و ان جزت حاسبيني ولد اختكم ... فانا جايكم بأسم الخولة

سلطان : نزلوا التفك و خلنا نشوف ... شنهو الدين الألك عدنا يبن ضاحي.

- دامك سميتني بسم جدي، منها و اطيح الخولة ، لجن ديني وياك طلابة حنون .. دشيت طباب خير و حسبتكم خوالي ... و الدين ينرد .

-طلابتنا ويا ابوك موش ويا الزغار يبن مطر

- طلابتكم وياي و قصر ابوي ماله علم بجيتي هاي ، رايد اختص بيك .

اندار الولده و كال الهم ... افضوا الديوان

و ردحة كامت تلطم اعلى راسها : فدوة يمه وليدي رد

شال عبايتها و عدلها اعلى راسها و كال الها : ردي لدارج ، وانا رادلج يمه ...و تطمني .

حجاها و يدش لبيت سلطان ، و العيون تخوزره و بودها تشرب من دمه ... دش المضيف و كاله : شنهي المطلوب مني يبو نعمة

- دخلناك بيناتنا .. و حسبناك وليدنا و تاليتك تدك الرديه ويانا .

- تعرفني ابن جلوب وموش طبايع اهلي الردايا، ولا هي طبايعنا نرضى الفضيحة المرة يو اعلى كص اركابنا، واليسويها ، خل ينشد امه منين حبلت بيه من كون اسلافنا متخلف الردي .

لجن انا اعلى علم الملعوب اللي انلعب علي، انت الك علم بيه و تعرفه ، اكشف اعن اذراعك و كلي الرايدة من اهلي شنهي .

- الملعوب .. ياهو اللعبه انت يو غيرك

- ما حاج اكلك ياهو .. انت تعرفه ازود مني ... طلابتك وياي موش وي ابوي ، و دامها الطلابة عدي ، انا اطلبنك دين و ديني مردود و انت اعرفنك صاحب بخت ، لجن رايد افهم .. شنهي الغاية من المكتوب اعلى القصر .

- قصر ابوي بالحك .. ان جنتم تعرفون الحك

انا اعرف رايد بت حاكم ، ووديت طارش خاطر يشري نهوتها ، و اجانا الطارش ورديناه .

اضمنلي القصر ، و اعتبر البت الك و كل الي يضدونك من البالقصر مفضوحين و طايحين تحت اجدامك .

- اايضدوني

- انا اعرف شتاكل و شتشرب انت و ابوك بقصر ابوي .. واعرف ياهو الجاي يحفرلك ، اطني القصر و انت وليدنا

- القصر قصر ابوي

- تورثه .

- و ان رفضت ؟

- ساعتها تحمل اثام جدك ضاحي و اثام ابوك و اثامك .. وانطر اليجرالك .....

-