رواية خلف الابواب المغلقه الفصل الحادي والثلاثون 31 - بقلم مشاعر مبعثره

رواية خلف الابواب المغلقه الفصل الواحد والثلاثون 31 والثاني والثلاثون 32 بقلم مشاعر مبعثره

31

: والله ما قايلاه حايفتشك ويجيك ، الله يجازيني انا السبب .

: انتي خربتيها خلاص ي امي .

طق قفلت فيها ، قمت كدا لقيت نزار واقف وراي !!! والاولاد في باب الصاله واقفين وظاهر عليهم التوتر والصدمه .

نزار مشى على الغرفه وقال لي : تعالي .

مشيت وراه ، اول ما دخلت قفلت الباب ، انا كنت لسه منهاره ، قال لي : ما تعملي كدا قدام الاولاد خوفتيهم شديد .

: اعمل شنو؟💔

حضني وقال لي : اهدي كل مشكله لها حل ، ما تنهاري قدام اولادك ، انت مصدر قوتهم والشجره المتينه .

هزيت راسي وقلت له : كنت فاكره كدا ، بس اكتشفت اني ضعيفه شديد ، وما بقدر اعمل شي من دونك .

التلفون كان برن قال لي : ردي .

قلت له : دي امي ، ماعاوزه اتكلم معاها .

: ليه لكن .

: لأنها هي الورطتني الورطه دي ، ما قدرت تمسك لسانا وحكت له 😭

: ويعني شنو؟ ما كان مصيرو يعرف ، هاك اتكلمي معاها بتكون قلقانه عليك .

: ما عاوزه !!!

: سمر انتي ما طفله؟ نسيتي القلتو لك؟ يلا اتكلمي ما تخليها زعلانه كدا ، اسي فكري بس في حالتا وهي حاسه بالذنب وخايفه عليك في نفس الوقت .

شلت التلفون ، رديت وطمنتا ، بعداك هو دخلني الحمام غسل لي وشي وقعدني جنبو في السرير وحضني !!!

قلت له : الحيوان دا ح ياخدهم مني ، بس عشان يقهرني ! مع انو ما عاوزهم ولا عندو حاجه يقدما لهم ، لمن كنت براي رماهم علي ، ورفض حتى يصرف قرش واحد عليهم ولا حتى بتصل يسأل ساي

: ما ح ياخدهم منك اطمني .

: بس هو ابوهم وانا اتزوجت .

: القانون قاعد وما ح يظلمك واستحاله يدوهم لراجل مستهتر زيو ، وكونو رماكم زمان وما صرف عليكم دي حاحه بتفيدك ، غير كدا الاولاد الثلاثه في عمر الحضانه ما تخافي

: بس هو قال ما بخلي اولادو مع راجل غريب؟؟ 😭😭😭😭😭😭

: دا كلام ساي عاوز يهددك م اكتر ، ولو وصلا للمحكمه انا بقيف له ، واوكل لك محامي ، ما تخافي ابدا طالما انا قاعد .

وفعلا اتصل بالمحامي ، قبل حتى ما مدثر يرفع القضيه ما بعرف قال له شنو بس شكلو ما كلام مطمن لانو بعد قفل وانا سألتو قال لي : ما تمنعيه من الاولاد لو طلب يشوفهم ، ودي كانت حاجه صعبه شديد علي .

نزار اتصل به وسلم عليه قال له : اولادك في الحفظ والصون . وفي اي زمن عاوز تشوفهم حبابك .

هو كمان ما صدق ، بقى كل يوم عاوز يجي ، والاولاد اصلا ما بحبوه ، شادن نستو وميهلم دا ما بعرفو اصلا ولا بسكت له ، وكمان بتصل بي كل يوم بحجة عاوز يطمن عليهم ، مرات بدي التلفون لهاني من يتصل لاني بكره صوتو يقوم يقول له اديني امك ، كرهني لمن شاكلتو وقلت له : في تلفوني دا ما تتصل تاني واولادك تشوفهم ايام محدده ، وزوجي هو البجيبهم لك محل قاعد بيتي ما تدخلو .

: قصدك انو م اشوفك صح؟

: ايوا !! لاني ما بطيق وشك! وريحة نفسك في البيت بتخنقني .

: بتكرهيني؟؟

: ايوا ، وانت عارف كدا كويس ، تاني ما عاوزه اشوف وشك دا .

: لا الظاهر ح تشوفيه كتير ، انا م اتفقت مع زوجك على كدا وبما انك رفضتي الحل السلمي ، انا حأرفع عليك قضية ضم وباخد اولادي منك .

قفلت فيه ، واول ما نزار جاء حكيت له

قال لي : ما تخافي ، اصلا مافي حاجه اسما ضم في العمر دا هم في فترة الحضانه وانتي الأحق بها .

: دا قبل الزواج يا نزار ، اسي ممكن اخسر الحضانه .

عاينت لمهيلم وقعدت ابكي ، قلت له : مهيلم ما بطيقو ابدا ولا حصل سمح له يحضنو ويشيلو😭 .

: مهيلم رضيع ، ما بفارقك لأي سبب ، انتي ما تشغلي بالك ، انا بتصرف .

حضني ، وقعد يهدي فيني ويطمني لمن نمت .

بعداك هو قام من جنبي شال التلفون وطلع برا اتصل به ، طبعا كان مغيوظ من الكلام السمعو دا ، وحس انو مدثر لسه عندو أمل بس ما بًيِّن لي .

لمن مدثر رد قال له : تاني بيتي دا ممنوع تدخلو ، وفي تلفون زوجتي ما تتصل كلامك كلو معاي انا .

: يا سلام !! واشوف اولادي كيف؟ .

: ذي ما قالت لك المدام انا بجيبهم لك محل قاعد .

هو اغتاظ من كلمة مدام دي ، قال له : معناها بكره عاوز اشوفهم ، انا قاعد في بيت خالي ، وصف له المكان .

تاني يوم نزار قال موديهم له ، وانا اسأل فيه قال لي : ما تخافي مافي مشاكل انا اتفاهمت معاه .

انا فعلا اطمنت بعد كلامو دا لأني خاته ثقتي كلها فيه .

مشى له هناك ، طبعا الأولاد ما بطيقوه ابدا !! ومهيلم دا بس متشبس في نزار كل ما يعاين لوش ابوه يبكي منو ، وهو يحاول يشيلو غصب الا نزار شاكلو

قال له : مافي حاجه بالغصب ، ما تتعامل مع الولد بالطريقه دي وإلا م حأجيبو لك تاني .

مدثر انفعل شديد وقال له : انت بتحاول تهددني يعني؟ ولا فاكر اني ح اخلي لك اولادي .

: ما هدا جبتهم لك لعندي عندك ، عاوزني اجبرهم يحبوك كمان؟؟ .

: جبتهم وهم ما قعدو معاي حتى !!! وولدي ما قادر اشلتو في حضني !!! انتو بتحرضو الاولاد علي .

: نفورهم دا سببو انت!! اسأل نفسك اخر مره شفتهم كانو قدر شنو؟ ياخ شادن بنتك نستك ، وهاني ما بحبك لانك رميتهم ومشيت ، ومهيلم!! عاوزو يتقبل حضنك وهو اول مرة يتعرف عليك؟؟ خليتو نطفه في بطن امو ولا سألت عليه بياكل شنو وبشرب شنو ولا حي اصلا .

: دي حاجه خاصه بينا ك أسرة !!! انت ما تدخل ، لأنك ما بتقربهم حاجه ، انا م حاسمح لك تاخد اولادي ذي م اخدت زوجتي !!!!! .

: انت ما عندك زوجه اسمها طليقتك .

: هه انت يعني مبسوط كدا وشايفا دايمه لك؟ سمر دي انا اكتر واحد بعرفا ، ما بتحب غير نفسا !!! اهلا ما حبتهم ، عشان ما تنخدع ساي😅 ، اتزوجتك بس عشان انتشلتا من الشارع م اكتر ، ولو اي زول غيرك كان اتزوجتو😅 .

: الظاهر انك ما عرفتا ابدا .

: طيب رأيك شنو لو انا اسي قلت لها خلينا نرجع ح تخليك بكل بساطه وترجع لي ، لانها حبتني انا!! و اتحدت بي اهلا ، هي بس مجروحه مني عشان طلقتا....................

32

طيب رأيك شنو لو انا اسي قلت لها خلينا نرجع ح تخليك بكل بساطه!! وترجع لي لانها حبتني انا!! و اتحدت بي اهلا ، هي بس مجروحه مني عشان طلقتا .

نزار عيونو بقت حمراء من الغضب قال له : ما تجيب سيرتا على لسانك فاهم ولالا؟😡 انت قلت عاوز الاولاد وجبتهم لك امهم ما بتخصك باي شكل .

طبعا عصب شديد من كلام مدثر دا واغتاظ بصورة ملحوظه

مدثر قال له : مالك انفعلت؟ ما دا الواقع والحايحصل .

: انت الجنيت على نفسك ، ومدام انت بتتحجج ب الاولاد عشان تصل ل امهم ما تحلم تشوفهم تاني .

ساقهم ومشى خلاه ، ولمن جاء ما حكى لي اي شي انا افتكرت انو الموضوع انتهى خلاص ونمت مطمنه .

بس اتفجأت بمدثر رافع علي قضيه ، وعاوز ياخد حضانة الاولاد لاني اتزوجت ، خفت خوف ، اما نزار كان هادي كأنو عارف .

قال لي : دي خطوة متوقعه اصلا ، ما من جاء هددك بالشي دا ونحن محامينا جاهز ، ما تنسي انو رماكم زمان وما كان بصرف على الاولاد .

: بس........

: ما بس ، عندك جلسه بداية الاسبوع

عاوزه ابكي ، قال لي بصوت حاد : اوعك تبكي

: نزار.............

: البكاء ما بحل مشكله ، وانتي عارفه كدا كويس ، بعدين دموعك دي ما حتشهد معاك في المحكمه .

: انت ليه بتتكلم معاي كدا يا نزار؟

طبعا كان معصب شديد على غير العاده ، حيرني عديل كأنو ما نزار الهادي البعرفو داك ، وما رد على سؤالي كمان .

قال لي : بعدين تحكي للقاضي بكل العملو معاك فاهمه؟؟ خليك واثقه من كلامك ، واياك تبكي او حتى تخجلي من شي ، وطالبي بالنفقه على الاولاد الثلاثه !!!!!!

: نفقه يا نزار؟

: اعملي ذي ما بقول لك ، انا متكفل بالاولاد ، بس برضو اياك تتنازلي عنها فهمتي علي؟؟

هزيت راسي وما علقت ، مع اني كنت موجوعه ، م اتوقعت ابدا يجيب سيرة نفقه وقروش ، ولا بقدر اقول له نفقه ليه؟ ، لأنو في النهايه هو ابوهم والمسؤؤل عنهم ، اما نزار ما مضطر يصرف عليهم 💔

نمت زعلانه اليوم داك وكان باين اني ببكي بس ما حنسني ، ولا حتى جبر خاطري بكلمه واحده 💔

تاني يوم اتصلت ب امي حكيت لها

قالت لي : دا م اصلو ما ولد حلال ، الله ينتقم منو ياخ .

: انا خايفه ي امي ، لو اخد مني اولادي انا بموت والله العظيم..

: لالا ما بياخدهم ما تخافي ، لأنهم صغار ، كلو مني انا ياريتني لو اتبكمت قبل اقول كلام ذي دا .

: قلتيها وخلاص ، انا اسي ما عارفه اعمل شنو ، وسكوت نزار دا ما مطمني ابدا ، كأنو عارف الحايحصل وما عاوز يحكي لي ، فاكر انو بساعدني بالطريقه دي؟؟ .

: اوعك يا بنتي تقولي كلام ذي دا لراجلك ، يقوم يزعل منك ما صدقنا اتسترتي مع راجل بخاف فيك ربنا ، ما تخلي زعلك وغضبك يخليك تخربي بيتك .

انا في لحظة زعل صرخت وقلت لها ، فايدة البيت شنو واولادي مافي؟؟ انا اصلا اتزوجت عشانهم هم .

طبعا صوتي كان عالي لدرجة انو وصل لبرا والاولاد سمعوه 💔 بس مافي واحد فيهم انتبه وفهم قدر ليان !!!

جيت طالعه ، عاينت لي بطريقه غريبه ودخلت الغرفه بس ما ركزت معاها ، مشيت رقدت شويه ، حاولت انوم بس ما قدرت مع الافكار السلبيه ، بس كنت محتاجه الرقده دي لأني ما بقدر اقوم وامارس طبيعتي بالمود دا ، فضلت ذي ساعه كدا ، بعداك لعنت الشيطان وقمت مشيت المطبخ ، لقيت ليان قاعده تطبخ!!!!

: بتعملي في شنو يا بنتي؟؟

ما ردت لي ، قلت امكن ما سمعتني جيت جنبها وعاوزه امسك منها الطماطم البتقطع فيها سحبتا مني بقوة لمن السكين قربت تجرحني

: انا اسفه .

: ما مشكله ، بس انتي بتعملي في شنو؟

: ذي ما شايفا بطبخ .

: تطبخي ليه؟؟ م انا قاعده ، ولا ما عاجبك طبخي يعني؟؟

: المشكله انو عاجبنا كلنا ، وما عاوزين نتعود عليه !!!!

: انتي ليه بتقولي كدا؟ ليان......

كانت بتبكي ، جيت جنبها

قالت لي : خليني بس اتعود امسح دموعي براي ، واهتم بالبيت دا من دونك .

ذادت حيرتي والله راسي عاوز ينفجر عديل واصلا ما ناقصه ولا متحمله ، هم جديد على همومي .

قلت لها : عليك الله يا بنتي ما تقولي كلام مبهم ، والله ما عندي حيل للتفسير والتحليل ، وريني انتي قصدك شنو ؟

: ما قصدي شي.

ختت الفي يدها ومشت الغرفه ، وانا لاحقاها ، ركبت سماعات وشغلت اغاني بصوت عالي ومديه وشها للحيطه ، قدر م اتكلمت معاها ابت ترد لي لمن مشيت منها ، قلت اخليها بعد تهدأ

مشيت طبخت وعملت باقي الشغل

نزار جاء ، قعد معانا شويه ومشى هو زاتو الغرفه تاني ما طلع منها ، لحدي ما جهزت الغداء ناديتو

قال لي : والله يا سمر ما قادر اكل حاجه

: ليه مالك؟ اوعا تكون عيان بس

: تعبان بس من الشغل

هاني جانا داخل قال لينا : ليان قالت لكم اكلو هي ما عاوزه

قلت له : كيف ما عاوزه دا كلام شنو؟

ابوها زاتو كان مستغرب ، قال لي : امكن اكلت حاجه بالنهار شبعتا!!!

: لالا والله العظيم من الفطور ما اكلت شي ، حتى الاندومي الليله ما عملناها .

: ما تكون تعبانه بس

قام على حيلو ماشي لها ، قلت له : والله هي من قبيل تصرفاتا غريبه حاساها بتبكي وبتقول لي كلام مبهم ، ولا راضيه حتى تسمع مني ولا تحكي لي ، بس خاته سماعاتا وراقده ، قلت بعد تهدأ اقعد اتكلم معاها

قال لي : خلاص خليك انا بتكلم معاها

: لالا وانا فايدتي شنو؟؟

ابتسم وقال لي : مجرد وجودك هنا مكسب كبير لينا ، ما تشغلي بالك هي عندها الحركه دي من زمان ، اسي بتكون عاوزه لها حاجه ولا متناقشه مع لين ، هي كتومه شديد

: طيب نحن منتظركم بالغداء

: لالا الاولاد بكونو جاعو ، اكلو ساي انا بالجد ما قادر .

مشيت ختيت للاولاد وانا قعدت منتظراهم

هو دخل ل ليان وبراحه قبل راسا وهي راقده ، لمن حست به قامت

: بابا؟؟

: بنوتي الحلوة زعلانه مالا؟؟

: انا ما زعلانه يا بابا.

عاوزه ترجع ترقد تاني مسك يدها وقعدا جنبو !!

: انا بعرفك كويس ، الرقدة دي ما ساي ، اكيد في مشكله وكبيره كمان ، ولا تكوني لسه زعلانه مني عشان عصبت عليك؟؟؟

: لا طبعا ما بقدر ازعل منك........يتبع♥

الفصل الثالث والثلاثون من هنا

لقراءه باقي الفصول من هنا