رواية خلف القضبان روح يتيمة الفصل الرابع والأربعون 44 - بقلم الكاتبة جيهان آغا

السلام عليكم ياحلوين شلونكم مشتااااقه طن شوق 😚💕 ، كل عام وانتم بخير بمناسبة عيد الفطر المبارك اعاده الله علينا وعليكم بالخير والسعادة وتقبل الله منا ومنكم صالح الأعمال

ولان احبكُم حبيت اعايدكم بطريقتي الخاصه وانزل بارت حلو وجميل واحداث جميله مثلكم

صلو على سيدنا محمد وعلى ال محمد

وتعالو نقره البارت + قراءة ممتعة مقدماً ♡

_
_
__________

جنت نايمه كمت على صوت لوجين كعدت ظليت اغمض وافتح عيوني راسي مصدع ولوجين تبجي كمت اسكت لوجين شلتها ورحت للمطبخ

سويت لها حليب سكتت عفتها بالصاله ورحت غسلت وجهي ورجعت لصاله انْدگّ الموبايل
سحبته طلع رعد رديت

: هلا وينك

رعد - هلا بويه عندي شغله اخلصها وارجع

نور - تمام لا تتاخر ارجع على الفطور

رعد - ان شاءالله

نور - ان شاءالله اكلك رعد

رعد - كولي

نور - العصر اروح للخياطه والجهال اعوفهم يم بتول

رعد - ماشي هسه اروح عندي شغل خلي واحد من الولد ياخذج واني ارجعج لا تتأخرين

نور - ماشي ياكَلبي دير بالك على نفسك

رعد - ماشي بويه وانتِ هم

نور - ادلل

سد الخط اباوع على لوجين تضحك هههه
خليتها بحضني وابوس بيها وهي تضحك

هايمامي على شنو تضحكين من اروح فدوه لهل
ضحكه

سحبت الموبايل اخابر الخياطه دكيت شوي وردت

: هلا عمه شلونج اكلج عمه اليوم اجي اخذ
الملابس كملتيهم اها تمام اي من اجي اخذي القياسات لا شوي واجيج ان شاءالله
ماشي عمه مع السلامة

سديته ورجعت نيمت لوجين شمرت الشال على راسي ونزلت جوه البيت هدوء الكل نايمين اول ايام رمضان بس تيلا جانت بالمطبخ رحت يمها

: هلا بتيلا شنو وين ماما جوان

تيلا - ماما جوان راح

نور - وين راحت

تيلا - انا مايعرف ماما

نور - ماشي البنات وينهم الولد

تيلا - ماما كل نوم نوم

نور - اممم تمام

عفتها ورحت للحديقة الجو حلو لاهو شته ولا صيف جو هادئ مُحير سكيت الورود كملت وصعدت فوك كامو الجهال سبحتهم ورتبتهم
كعدتهم بالصاله شغلت التلفاز ورحت للمطبخ

احضر فطور شغلت القرآن بالموبايل
وبديت احضر الفطور اندك الباب وايدي بالطبخ
غسلت ورحت افتح طلعت بتول

بتول - هلا داده شلونج

نور - هلا ياكَلبي الحمد لله انتِ شلونج

بتول - بخير داده شو ماكو وينج

نور - ملتهيه ويه الجهال

بتول - نور احسج مالج خلك اكو شي

نور - ابتسمت كتلها

: دخلي جوه احجيلج

بتول - اي يلا خير ان شاءالله

نور - دخلت راحت يم الجهال تبوس بيهم

بتول - يمه فدوه شنو هل جمال والنظافة
ما شاءالله كبرانين

نور - ههه شالعين كَلبي

بتول - الله يساعدج حبيبتي اني واحد ومتعبني

نور - صدك وين ابنج

بتول - نايم جوه كلت لتيلا كل شوي تروح تشوفه

نور - اي
كامت باوعت عليه صغرت عيونها كالت

بتول - امممم وضعج ماعاجبني احجي شبيج

نور - ابتسمت كتلها
: مابيه شي كَلبي

بتول - نويره مو عليه والله احجي داده احنا مو خوات احجيلي شبيج

نور - باوعت عليها سكتت

بتول - مدام سكتي يعني اكو شي احجيلي ماعوفج اليوم

نور - اخذت نفس بتعب وكلت

: تعالي بالمطبخ نحجي

بتول - اي يلا

نور - رحنه للمطبخ كعدنه على الكرسي وماعرف احجي لو اسكت باوعت عليه كالت

بتول - نور احجي شبيج

نور - نزلت دمعه من عينه مسحتها بسرعه
كتلها

: بتول تعبانه شغل بيت وجهال ورعد حيل تعبانه

بتول - ياكلبي هذوله كلهم روتينا كلنا والله مو بس انتِ بس احس اكو شي ثاني مضوجج احجي

نور - اخذت نفس وكلت

: بتول رعد متعبني والله ماعرف شلون اتعامل واتصرف ويه طبعه

بتول - شبي بعده عصبي

نور - مادري ياختي مادري اريد افهمه طبعه صعب والله

بتول - نور كَلبي رعد كلنا نعرفه ونعرف طبعه شكد صعب احجي صاير شي جديد

نور - باوعت عليها وكلت

: اي احسه متغير صار فتره دائما عصبي
ومشغول ومدافهمه وكل هذا ميخالف والقهر مو هنا القهر صاير يرجع متاخر للبيت والله خايفه يكون راجع لسوالفه

بتول - لا لا مستحيل ماتوقع بس يمكن عندهم شغل بالدوام ومشغول

نور - ماعرف مدافهمه وماعرف شلون اتصرف
ولمنو احجي نصحيني شسوي ويا ماكدر احجي ويه خاله جوان ولا احب ادخل احد بينا متعوده مشاكلنه نحلها بينا بس مادري ضايعه

بتول - شوفي داده زين سويتي حجيتيلي ويبقى بيني وبينج وسالفة رعيد خليها عليه اتاكدلج من ركان ونشوف شنو الشاغله بس الي اريده منج هسه لاتشغلين بالج وخليج طبيعيه يعني لا اطنكرين تعرفي هذا يتخبل اذا اطنكرين علي

نور - ههههه لا والله دمشي حياتي طبيعيه اصلاً ماعرف اطنكر بكلمتين منا اضحك ويا على كولته فطيره شسوي

بتول - هههه الله يحفظكم صدكي هو يحبج و اكو شي ثاني مشغول بي وراح اتاكدلج لكن مال يرجع مثل قبل مستحيل يرجع اخويه واعرفه عنده طبع
اذا عاف اي شي مستحيل مايرجعله اطمئني

نور - ان شاءالله حبيبتي

بتول - تمام داده اروح هسه اشوف شنو نحضر فطور تعالو بعدين ويانه فطرو

نور - والله اتمنى بس تعرفين جهال مايكعدون راحه ماريد ازعجكم

بتول - ياااا شلون هيج تحجين ترا جهالنه هما وعادي يلعبون ويه ادم شهر رمضان حلو كلنا نلتم
وتبارك راح ترجع لا تفكرين هيج

نور - ماشي حبيبتي ان شاءالله

بتول - اي داده هو صدك وينه رعيد

نور - طالع يكول عندي شغل شوي ويرجع

بتول - خير ان شاءالله ماشي داده نشاوف على الفطور لازم تجين

نور - ان شاءالله ياكَلبي

راحت بتول واني رحت اكمل الفطور وبالي مشغول
كملت الاكل اذن العصر صليت ولبست عبايه خليجيه ونزلت الاكل جوه ويه اكلهم ناكله على الفطور وصعدت اخذت الجهال خليتهم يم بتول وكلت لأحمد ياخذني يم الخياطه وصلني وراح واني بقيت يمها انتظر تكمل الملابس البيدها حتى تاخذ قياسي واخذ ملابسي شوي اتاخرت لان نسوان جانو جايين قبلي بقيت انتظر تخلص دك الموبايل جان رعد رديت

رعد - ها بويه وينج

نور - بعدني يم الخياطه

رعد - خلصي بسرعه جايج بالطريق اني

نور - ماشي
سد الخط كلت للخياطه

عمه فدوه بس اخذي القياس علمود اروح مستعجله

: ماشي يمه هسه اخذ قياسج وذني ملابسج شوفيهم

نور - انطتني الملابس حلو مخيطته بس اكو قطعه
حسيت الكصه شوي مخربط كتلها كالت هسه اعدله واحنا دنحجي دك الموبايل رديت

: ها ياعيني

رعد - اني يم الباب

نور - رعد بعدها مامخذه القياس

رعد - لعدددد شنو جانت تسوي

نور - باوعت على المره فشلت سمعت صوته وهو يصيح ابتسمت بوجها وابتعدت كتله

: شبيك تصيح هسه اخلص

رعد - نووور 5 دقائق فقط واشوفج بالسياره

نور - هاي شبيك

سده بوجهي شبي هذا ياربي صبرني
رحت يم المره كتلها

عمه عذريني بس مستعجله فدوه بسرعه خلصي

: ماشي يمه

نور - اخذت القياس
واخذت الملابس وطلعت من بيتهم التفتت اشوفه كاعد بالسياره يحجي بالموبايل كُلش ضجت منا فتحت باب السياره وصعدت سد الخط اول ماشافني شغل السياره كتله

: رعد شبيك ليش هيج سويت

رعد - نوور مالي خلك الحجي سدي الموضوع

نور - ترا عيب المره سمعتك من صيحت عليه اني مو جهاله هيج تصرف وياي

سكت ماحجه شي كتله

: ها ماعندك حجي

رعد - سدي الموضوع

نور - رعد شبيك بس فهمني احسك متغير احجيلي لاتبقى ساكت اكو شي صاير شي احجي

سكت مارد عليه دك موبايله غلقه كتله

: منو هذا لو هم راح تسكت

اني هيج كلت لو هذا تخبل عليه كام يصيح ويعيط جمدني بمكاني من الصدمه شبي هذا

رعد - ليييش تلحين
منو مايكووون مالج شغل مو مهمممممم

نور - نزلت دموعي كتلها
: وكف السياره

رعد - دخيلك ربي صبرني ليييش البجي

نور - دموعي واني حُره كتلك وكف السياره

رعد - نوور لاتخبليني فوووك خبالي

نور - كتلك وووكف السياره ماتسمع

وكفها نزلت من السياره صار عصبي كام يصيح
عفته وضليت امشي بسرعه الخياطه مو كُلش بعيده علينه اني امشي وهو يمشي ورايه بالسياره
نزل جام السياره وصاح

رعد - صعدددي لا تفضحيني هسه الناس شتكول

نور - مارديت علي كملت طريقي صاح

رعد - كتلج صعددددي ويامن احجي

نور - التفتت كتله
: عوفني ارحمني ترا تعبت وياك

رعد - لا حول ولا قوة الا بالله ولج بويه ليش اتعبيني فوك تعبي كتلج صعدي ليش تعاندين

نور - ما اصعد شوي واوصل روح انت

صار عصبي كال

رعد - نوووور بالقرآن اذا ماتصعدين هسه اعرف شلون اصعدج وتعرفين خبالي

نور - التفتت عيونه تجدح خفت منا من يعصب كلشي اتوقع منا صعدت لا هو حجه ولا اني
التزمت الصمت بس نار بكَلبي تحركني حرك لو بس اعرف شبي هيج متغير شوكت ارتاح ماعرف

رجعنه للبيت رحت للغرفه بدلت ملابسي كملت دخل ماهتميت كال

رعد - من شوكت صاير ماتسمعين كلامي

نور - ما رديت رتبت الغرفه بسرعه ردت اطلع مسكني من ايدي بعصبيه عيونه بعيوني كال

رعد - تعااالي ويامن احجي اني

نور - شتريد مني

رعد - جاوبي على سؤالي

نور - غمضت عيوني اخذت نفس بتعب كتله

: رعد مو كافي ترا اني تعبت ولكل صبر حد
بالنهاية اني بشر

عفته وطلعت برا كافي اني هم تعبت ويا لشوكت ابقى اتحمل اعصاب اعصاب شوكت نخلص من اعصابه ماعرف

شمرت الشال على راسي ونزلت جوه التوأم بتول منومتهم ويه ابنها بس لوجين كاعده بدلتها وكعدتها يم خاله جوان رحت ساعدت البنات بالفطور رتبنه السفره كلهم التمو كعدو نزل رعد ضل يباوع عليه

ماهتميت اخذت لوجين كعدتها بحضني اذن فطرنه كلهم يحجون ويضحكون واني بالي مو يمهم عقلي مئة فكره وسؤال يدور بي حتى ماشتهي صافنه على الفطور ماحسيت غير صوت بتول اجه بأذني

بتول - يااا الووووو حول حول ههههه

نور - ها ويايه ؟

بتول - اي شبيج صافنه امي صارلها ساعه تحجي وياج

نور - ها والله ماانتبهت
خاله كلتي شي عذريني مانتبهت

جوان - عادي يمه ماصار شي
شبيج ليش ما تاكلين وصافنه

نور - التفتت على رعد مسوي نفسه مامنتبه على حديثنه والعكس صحيح
زوجي واعرف طبعه كتلها

: لا خاله مابيه شي يمكن تعبانه علمود الصيام

سيف - اول ايام يحس الشخص بتعب بسبب عدم تعود الجسم على الصيام منذ فتره

نور - اي يمكن صح كلامك

واحنا دنحجي بجت لوجين ردتها من الله حتى اكوم وفعلاً كمت بحجة لوجين

: اني لازم اروح موعد اكل لوجين

جوان - يمه كلشي ما اكلتي

بتول - اي والله مايصير كملي شوربة العدس على الاقل

نور - ماشتهي وهاي نحسه بس تبجي ماتسكت جوعانه اعرفها انتو كملو بالعافيه

تبارك - نويره من تخلصين شغلج نزلي يمنا الليل طويل نكعد نسولف

نور - والله صعبه اني اجي من وره الجهال بس انومهم اخابركم انتو تعالو تعللو يمنا

بتول - خوش فكره

تبارك - ماشي حبيبتي لعد احنا نجيج

نور - تمام ياكَلبي انتظركم

عفتهم وصعدت فوك اكلت لوجين ونومتها
فرشت السجاده وكعدت اقره قرآن شوي وحسيت علي رجع ماهتميت كملت القران مر ربع ساعه طلعت برا الغرفه اشوفه جايب التوأم ويا جانو نايمين جوه وكاعد بالصاله وديلعب وياهم وهما فرحانين يضحكون ويحضنو ويبوسون بي هذا هم حظ يحبون ابوهم اكثر مني التفت عليه كال

رعد - هابويه لوجين نامت

نور - اي

كلتها واني دامشي من وره خشمي عود مطنكره
رحت للمطبج اشرب مي وجان يدخل سعد حبيبي شكد حلو يمشي كال بصوته وحروفه المامفهومه هههه بس اني افهم عليه

سعد - امه امه

نور - يقصد مي هههه نزلت لمستوا شلته وبسته
من اروح فدوه لهل صوت عطشان يمامي
هسه اشرب ابني اطيب مي

شربته دخل رعد سويت نفسي ملتهيه ويه سعد
كال

رعد - سويلي كَهوه قبل لا اطلع

نور - كتله بثكل

: كهوتك خلصانه بس العادي اكو

ضل يباوع ضاج من طريقة كلامي بس ماحجه شي راح للغرفه واني بقيت بالصاله ويه الجهال شوي وطلع كاشخ ومرتب نفسه وريحة عطره كل عاده تفوح طكني الفضول ماتحملت اسكت غرت لصراحه كتله

: وين طالع

وهو يعدل بساعته رد

رعد - ليش تسألين مهم يمج تعرفين

نور - ليش مومهم مثلاً

رعد - ماعرف اسئلي اسلوبج وياي

نور - باوعت عليه ماحجيت شي هو رد

رعد - رايح للكوفي

نور - كالها وفتح الباب راد يطلع كتله

: رعد

التفت عليه ردت اكله لا تتأخر بس ماكلتها اااخ مني كتله

: ماكو شي

سد الباب وطلع
اوووف يارعد اووووف راح تخبلني

اني احجي ويه نفسي والتوأم يضحكون عليه

: اي يمه ضحكو على امكم ليش ماتضحكون بقت عليكم جهال ابوكم شنو اتوقع مثلاً

مر الوقت نيمت الجهال وخابرت على بتول
والبنات يجون رتبت الصاله وجبت اجباس ونساتل وحلويات ومكسرات وعصائر رتبتهم

اجو تبارك وبتول ومرت حيدر وسيف كعدنه نسولف ونضحك كلمن وتشكي من زوجها هههه كالت بتول

بتول - اااخ لو احجيلكم على ركاني صخام الصخمني ولكم نحس اوي بكل شي نحس لو بال اكل ممنوع البصل ممنوع اكثر بهارات مايحب الاكل المالح ولا يحبه حاد وكل هذا بچفه وسالفة كل شوي بتول اكويلي القميص مستعجل سالفه ثانيه من هيج يكول اريد اخنكه

تبارك - يااا خطيه شطالب هههههه

بتول - ولج مو بالطلب بالوقت يجيني بنص
الشغل يطلب

حور - صح كلامج ولعد سالفة كل شوي وين الساعه وين الملابس وين الشاحنه وين المشط طبعاً كدامه لو بس شوي يركز ويدور بس مايفيد

نور - ههههه لان يتعاجزون يدورون

حور - بضبط

تبارك - لعد اني شكول مالي كل شوي تبارك جيبي هذا تبارك ودي هذا تبارك اريد هذا تبارك وتبارك من الصبح لليل كله تبارك تجيب وتودي ولكم كلاص مي مايجب لنفسه عجوزي

شمس (زوجة سيف) : هههه الله يساعدج لا اني زين مايتعبني بس مضوجني بسالفه يعني هسه رمضان واحد يشتهي ياكل يتحله من هو يكون موجود ماكدر اكل براحتي كله شمس هذا مُضر
هذا يسمن هذا هيج يسوي وهذا مو زين وهذا دهون مشبعه يبوو شحجيلكم كل شي اكله

اخذلي محاضره لو تشوفون من وره تركني بالببسي وتركني بال اندومي وعلى كولت بتول ممنوع بهارات اكلنه هو صح صحي بس فاهي ماطيب

بتول - اي عيوني بعد دكتورنه وكلامه صح و طبعه هيج من الصغر جداً نظامي واكله دائماً صحي

تبارك - غير يخاف عليج بالحق تفرحين

شمس - افرح شلون ما افرح بس مرات الواحد يشتهي مثلاً اندومي شكد احبه مانعه منع تام ممنوع نهائي

بتول - ههههه هذا معتبرج مريض عنده

شمس - يمكن هههههه

نور - هههه

تبارك - وانتِ نويره رعوده بشنو متعبج

نور - ابتسمت كلت بكَلبي كولو بشنو مامتعبج
شحجي وشعدد هما هيج ويشكون من ازواجهم
لو يجون يشوفون مالي يحسون بالنعمه كتلها

: بالعكس رعد مايتعبني بشي بس عصبيته مرات اتعبني فقط

شمس - معقوله يصير عصبي عليج وانتِ هلكد تحبي ومهتمه بي

نور - لا مو قصة عليه بس هيج مرات من يتعصب اتركه ماكدر احجي ويا من يهدى احجي واتفاهم
ومثل ما اني احبه واهتم بي هوَ هم يحبني ويهتم بيه

حور - يمعود منو الموعصبي كلهم هيج

بتول - اي والله بس مالي موعصبي كُلش لا اهون من رعيد هههه فديته ولكم شو شتاقيتله خلي اكوم اخابره لحظه

تبارك - ههههه مخبله

بتول - ههه يااا غير زوجي من حقي اشتاقله شتكولين نويره

نور - ههههه اي طبعاً حقج

كامت جابت الموبايل وكعدت خابرته وفتحت مكبر الصوت شوي و رد

بتول - هلا حبيبي هلا ياكَلبي مشتاقتلك

: شنو حالمه بيه انتِ

نور - هههههه

حور - ههههه خوش رد

تبارك - تستاهلين هههه

بتول - هاي شبيك اكلك مشتاقتلك شنو حالمه بيك من زينك عود احلم بيك هيج ترد عليه من امداني

: هههه ولج بويه شكول لعد

بتول - كلشي لا تكول احساس ميت ومشاعر طاكها الجفاف حظي

نور - ههههههه

ركان - لا شلون طاكني جفاف خلي اسمعج شعر امل الجفاف اشوف منو مشاعره ميته

نور - باوعت علينه كامت تسوي حركات عود سمعو راح يلقي شعر خربنه ضحك عليها كال ركان

ركان - يكول الشاعر

بتول - باوعت على البنات ابتسمت كتله

: اي شيكول

ركان - يكول نايم وأحلم بيچ وسط المطر

بتول - ااالله اي كمل

ركان - يكول
نايم وأحلم بيچ وسط المطر
صحيت لكيت السقف يخر ههههه

بتول - من امداني

نور - ههههههه

تبارك - ههههههه هو هذا الشاعر مالج صدك امداج

حور - ههههه كلت هسه يتغزل بعيونها

بتول - كلهم ضحكو فشلني السخيف كتله
: تعرف شنو اني الغبيه المشتاقه لواحد مثلك

: هههههه لا ياروح ركانج والله خوش شعر شبيج

بتول - يضحك عليه سديته بوجه والبنات خربانين ضحك

حور - هههههه بنات بنات سمعو شيكول الشاعر

شمس - ههههه اي شيكول

حور - يكول نايم وأحلم بيچ وسط المطر

شمس - صحيت لكيت السقف يخر هههههههه

تبارك - ادري بتول شجابج على السقف ههههه

نور - ههههه

بتول - حظي داده شحبيت بي من امداني

نور - هههه لا ترا ماقبل ركان مثل اخوي

بتول - اي عيني لا تقبلين

شمس - كلنا هسه يسمعها ذاك الغزل المضبوط ثاري السقف خر مالحك خطيه ههههه

حور - بضبط هههههه

بتول - هههه كافي ولكم فشلني الله يفشله

نور - هههههه

خربت ضحك على سوالفهم صارت بال12 راحو واني لميت الصاله وغسلت المواعين ورحت للغرفه
تمددت كعدت اقلب بالموبايل شوي ورجع رعد

خليت الموبايل على الميز علمود انام كال

رعد - نور

نور - شتريد

سحبني الا كال وهوَ يناظر بعيوني

رعد - اعتذر

نور - على شنو

رعد - الموقف الخليتج بي كدام الخياطه

نور - ههه متعوده عليك مو شي جديد
ضل يباوع عليه تقدم باس راسي وعيوني وايده تلامس وجهي بهدوء كال

رعد - عذريني دوم لكل تصرف اسوي اخلقيله الف عذر

نور - اعذرك اذا اعرف شبيك مو بدون سبب اعذرك

رعد - نور بويه اني حيل مضغوط هاي الفتره
دشوفيني حتى بعطلتي اشتغل راعي تعب العمل شوي

نور - والله ياحبيبي هذا شغلك وهذا انت ومو شي جديد هذا مو عذر وخلي نفرض شغل ادلل بس احجيلي شبيك

رعد - اااخ كل الوجع بيه وربج

نور - اي احجيلي لا تكتم

رعد - مستلم مهمه خطر.ه بالموصل مهمه سريه
ولازم كل شي يخص المهمه اني اديرها المقدم سلام بس يثق بيه وكلفني المهمه بسريه تامه وهاي المهمه دروبها العوجه هواي و تعبتني

نور - اممم خوش عود صدكتك

هيج كتله وابتعدت انادريت لطرف الثاني رجع سحبني الا كال

رعد - نور بطلي حركات الجهال تعرفين ماحبها

نور - والله ياحبيبي عود من تحجيلي ابطل

رعد - مو حجيتلج

نور - رعد والله حافظتك حفظ مو عليه هاي السوالف وتعرف المشكله شنو عدم صراحتك دتخلين اشك بهواي امور وياخوفي يطلع الي
ابالي صح علمود اتخبل رسمي

رعد - هوب هوب شبيج حللتي وصدكتي وخفتي داكلج هاي المهمه متعبتني ماكو شي ثاني

نور - صفنت علي ياربي اصدكه لو ماصدك ماعرف حرت كتله

: رعد اذا سبب تغيرك هاي الفتره بسبب المهمه سهله فتره وتعدي بس اذا اكو شي ثاني منا منا وفهمك كفايه ياويلك مني بعدك ماشايفني من اترك شي اتركه والله

تقدميت شميت قميصه وخليت عيني بعينه بنظرات حاده كتله

: تذكر اذا بس شميت بيوم ريحة خيانه لو سوالف العربده ساعه وحده ما اكعد يمك وهسه تكول وين تروحين وراح اكلك بيوت الله هواي اكعدلي بجامع اخدم الناس ولا ابقى هنا خوش

صفن ماحجه شي ابتعدت وانداريت لطرف الثاني وسويت نفس راح انام وهو ضل كاعد وصافن ماعرف بشنو يفكر بس يمكن قسيت علي بالكلام

بس لا لازم يعرف اني مستحيل اقبل بالخيانه مره صارت قبل الزواج كلت ميخالف بس اذا تنعاد هسه
واني بكلشي مامقصره ويا لا وستين لا لهنا وبس لا الفلوس تهمني ولا المناصب ولا البيوت كلهم مكملات حياة فقط

اذا اني مامرتاحه بحياتي شسوي بالفلوس

بين افكاري نمت كمت الصبح اشوفه لف ايده على خصري حاضني ونايم ابتسمت واني اناظر بي وهو نايم وجان يوصله اشعار على الموبايل كمت شوي

علمود انوش الموبايل سحبته وجيت افتح الرمز مايفتح مغيره نقرة على الأشعار من الانستا طلع حساب اسمه مجهول لا ينعرف بنيه ولا ولد نقرة

على السهم يبين شنو كاتب بدون ما افتح الرمز نقرته وياريت مانقرته جمدت بمكاني من الصدمه عيوني مارمشن جان مكتوب

: انتظرك اليوم تجي لا تتأخر

اني قريتها مدري شصار بيه بس لا تطلع بنيه

تحرك كام شافني سحبني الا راد يبوسني ابتعدت بسرعه كمت من السرير استغرب كال

رعد - شبيج

نور - ضليت اباوع عليه انطيته موبايله وكتله بكل هدوء ماحبيت استعجل كلت اتاكد اول كتله

: رعد منو هاي ؟

باوع على الأشعار توتر كال

رعد - مومهم بويه لا تشغلين بالج

نور - هو شنو المومهم اكلك منو هاي جاوب

رعد - نور راسي يوجعني وهسه كايم من النوم والدنيا رمضان لا تسويلنه سالفه بغير وقت افهمج

نور - لا والله لا حبيبي هسه فهمني احسن ماريد افهم من نفسي ومئة فكره تجيبني وتدويني بكل وضوح كول منو هاي يلا

باوع عليه كال

رعد - شنو ماتثقين بزوجج ؟

نور - بلا ولان اثق ماحكمة علي بسرعه وبكل هدوء كتله منو هاي حتى افهم من زوجي لان اثق بي

رعد - خوش جواب دبلوماسي

نور - لا تغير الموضوع

رعد - ماغير

نور - منو هاي

رعد - شغل

نور - نعمم يعني بنيه صخام الصخمني
وياشغل هذا

رعد - هههههه تغارين عليه

نور - رعددد جاوب

رعد - كتلج شغل والله

نور - جذاب

رعد - حلفت شبيج

نور - رحت كعدت على السرير مقابيله وكتله

: يلا احجيلي شنو هذا الشغل اليوم ماعوفك يلا احجي

رعد - هههههه احبج

نور - احجي اكلك

رعد - شغل من ضمن المهمه والله ماكدر احجي ممنوع مهمه سريه عود من تكمل افهمج

نور - صفنت بعيونه كمت ماحجيت شي عود زعلانه ضل يضحك كام سحبني الا باوع بعيوني وباس راسي كال

رعد - وربج الي تحبي وتعبدي ماكو شي من الي ابالج فَ لا تفكرين ولا تشغلين بالج اطلع اكبر غبي اذا اخونج بيوم ولج انتِ مو بس مرتي وام جهالي انتِ بنت كَلبي

نور - ضليت اباوع بعيونه وهو يحجي ابتسم
كال

رعد - كتلج اكبر غبي اذا اسويها فَ لا تفكرين وحضريلي الحمام اريد اسبح واطلع عندي شغل

نور - شنو شغلك

رعد - هههههه شنو سالفتج اليوم

نور - انت وتصرفاتك سالفتي

رعد - حلو والله تعرفين تحجين

نور - نتعلم ليش لا ماكتلي شنو شغلك

رعد - اكو ملف واوراق لازم توصل للمقدم واني المسؤول فَعليهِ بيدي لازم اوصلهم ومن ارجع احجيلج سالفة الرساله

نور - رعد

رعد - عيونه وكَلبه انتِ

نور - بنيه لو ولد صاحب الرساله ؟

رعد - بعدين اكلج

نور - رعد والله ما اسامحك اذا تخوني وتذكر حبل الكذب قصير ويجي يوم وتنكشف

هيج كلت تقدم بتجاهي باوع على عيوني وشفتي تقدم باسني ابتعد كال

رعد - ولج بويه ورب الكعبه احبج مستحيل اخونج كبري عقلج شوي من اروح فدوه لعقلج

نور - باوعت على عيونه كتله

: خلص لعد روح وانتظر رجعتك بفارغ الصبر علمود تحجيلي

رعد - ههههه تدرين احب غيرتج عليه

نور - باوعت علي بنظرة مامقتنعه

عفته عود مطنكره واضحك ماعرف اطنكر مثل نسوان العالم

حضرتله الحمام راح سبح واني الجهال كامو
بدلتهم واكلتهم وهو طلع بدل اخذ اوراقه باس راسي وباس الجهال وطلع الله يستر من هاي الطلعه

مر اليوم عادي صار الصبح وهو ماكو اخابره مغلق
من يكون مغلق معنى بعده مامكمل المهمه او عنده شغل مهم هيج مفهمني وماعرف بعد

مرت الساعات وصار الليل خابر كال بالطريق انتو افطرو كتله ماشي

اخذت فطوري ونزلت جوه فطرنه كلنا كملنه شوي كعدنه سوالف وضحك ويه البنات الجهال كامو يتنحسون وقت نومهم سلمت على البنات وصعدت فوك نومتهم

بس لوجين بقت سحبت الموبايل اخابره شوي ورد كال نص ساعه واوصل

واني بقيت انتظره وادعي يوصل بسلامه تمددت وخليت لوجين يمي نامت حبيبتي

واني هم ماحسيت غفيت شويه وماحس غير لمسات ايده على وجهي وشعري فتحت عيوني باسها وكال

رعد - مشتاكلج حد النخاع وربي

نور - امممم خوش عود اصدك

رعد - ههههه صدكي

نور - اي نصدك ليش لا المهم خلصت

رعد - اي

نور - يلا لعد احجيلي

رعد - نور كتلج مهمه ليش العناد

نور - اي ميخالف احجيلي شنو مهمتك

واني داحجي دفن راسه برقبتي

رعد - مهمتي مشتاكَلج

نور - بعدته كتله
: رعد بطل سوالفك ولا تغير الموضوع

رعد - ماحب الملحه تعرفين ؟

نور - ماحب الغموض والاسرار بينا تعرف ؟

رعد - ههههه خوش

نور - اي

ضل يباوع ويبتسم شال لوجين حطها بالسرير مالها ورجع سحبني الا يناظر بعيوني ويتلمس برموشي وخدودي تقدم باس عيوني وكال

رعد - معقوله هيج تفكرين هاي ثقتج بيه عيوني
غير عيونج ماتشوف وماريدها تشوف

نور - لا والله حبيبي تشوف وتشبع شوف عليمن هاي السوالف هو انتو الزلم مايملي عينكم غير التراب

دفن راسه برقبتي اخذ نفس وكال

رعد - واذا مرتي ماليه عيني شلون ؟

نور - سكتت ماحجيت شي شوي وابتعد عينه بعيني كال

رعد - تغيرت هواي بحياتي
بس اعصابي ماكدر اتحكم بيها

حقج عليه واعتذر واعترف غلطان بتصرفي بس والله مضغوط من الشغل نور بويه تحمليني اذا انتِ ماتتحملين منو يتحملني

نور - اتحملك بس اعصابك خلي تطلع على شي يسوى مو على كلشي عصبي وتصيح اني مو طفله

تصيح عليه كدام الخياطه ولك والله الجهال اذا واحد صيح عليهم يزعلون فما بالك كبار ؟

رعد - اعرف وكتلج غلطان واعتذرت

نور - اقبل اعتذارك لان كلنا نغلط بس ياكَلبي اذا الغلط تكرر الاعتذار مايبقى طعمه

سكت ماحجه شي تلمست وجهه ورموشه بسته بخده كتله

نور - اعرف بيك تحبني واني اموت عليك مو بس احبك بس سؤال اذا هلكد تحبني يهون عليك زعلي ؟ وتفشلني كدام الخياطه ؟ وتكسر بخاطري على شي مايسوى؟ جاوب

رعد - لا

نور - لعد ليش هيج اتعبني وياك اذا تحبني قلل عصبيه والله تعبت ويه اعصابك وبعدين تعال حتى لو مستلم مهمه حبيبي افصل بين شغلك وحياتك الشخصية لا تصير بالبيت ضابط مايصير هيج بالبيت كون رعد الاب الحنون والزوج الحنون اليحب عائلته وبس رعد الضابط عوفه بالمركز من تنزل

رعد اذا اني اتحملك جهالك من يكبرون صعبه يتحملون ابوهم اذا على كل شي تصيح وعصبي وتفشلهم اصلا راح يبتعدون عنك مايصير هيج ياحبيبي

رعد - ليش تحسسيني مسوي جريمه ؟

نور - مو جريمه بس بسبب اعصابك دتجرح التحبهم وهاي مو اول مره هيج اسوي كدام اهلك كلت ميخالف كدام خواتك واخوانك كلت ميخالف
بس كدام الناس الغربه والله زحمه هاي الخياطه جم مره هيج تفشلني كدامها حتى كامت تعرف بطبعك هسه تكول شكد تكبرين المواضيع وحقك هيج تكول لان ماحاس بالشعور لو تحس جان فهمت عليه

: نظراته مال واحد ندمان بس ماحجه فجأه كال

رعد - نور

نور - عيونها

رعد - اني

نور - ماكمل غمض عيونه شوي وكال

رعد - لازم اصلحه لازم

نور - شبيك حبيبي ؟

مارد بس ضاج مدري انقهر مدري تندم ماعرفت افسر نظرات عيونه كتله

: رعد حبيبي شبيك كمل انت شنو ؟

رعد - اني غلطة بموافقتي لمهمه
ولازم اصلح غلطي قبل ماادفع ثمنه

نور - شنو هو ؟

رعد - بعدين اكلج سوالف الشغل
لا يروح تفكيرج بعيد

نور - ترا دتخوفني احجي شنو السالفه

رعد - ماكو شي بويه كتلج سوالف الشغل لا ادوخين نفسج و تعالي انام نعسان وتعبان وبس بحضنج اكدر انام

نور - كالها وغمزلي يريد يغير الموضوع اعرفه كتله

: مشكله ماكدر انام

رعد - ليش

نور - راح اضل افكر شنو سالفتك

هيج كلت ابتسم دفن راسه برقبتي كال

رعد - بالعكس لا تفكرين وريحي بالج
اكلج

نور - كول

رعد - مشتاكلج ميت شوك صدكي

نور - ابتسمت اخذ نفس من رقبتي وجان نسمع صوت بجي لوجين ابتعد بسرعه كمت اشوفها تبجي شلتها اسكت بيها كال

رعد - شبيها ليش تبجي

نور - مرات تكوم بالليل فجأه تبجي

رعد - شو انطيني ياها

نور - انطيته وهيَ تبجي لوتيه بس راحت يم ابوها سكتت وهو يحجي ويضحك وياها وهيَ تضحك ويه ابوها باوع عليه كال

رعد - هههه هاي مثل تيلا تعرف شوكت تبجي

نور - هههه حضك شسوي

رعد - هو هم هيج

نور - نحجي وهيَ تضحك على ضحكة ابوها
وهو يحجي ويضحك وياها

رعد - ها حبيبت ابوها تضحك فدوه لضحكتج بويه

نور - ههههه لوتيه

رعد - لابنيتي بنت ابوها تسكت يم ابوها

نور - يحجي ويبوس بيها وهيَ تضحك ابتسمت واني اشوفهم دعيت من كل كَلبي الله يحفظ جهالي وزوجي ويبعدنه عن المشاكل ومصائب واحزان الدنيا

ومرت الأيام وحياتنه جميله لكن مو ورديه لان ماكو بيت بدون مشاكل وبالأخص مشاكل بين الزوجين تصير ويه الكل شي طبيعي بس الموطبيعي هو شلون نحل المشكله اني ورعد كل مشاكلنه نحلها بينا لان محد راح يفهم مشكلتنه
غيرنه احنا رعد عصبي وكُلش عصبي مو بس عصبي واني هادئه اي مشكله تواجهنا بهدوء اتصرف اذا هو نار واني نار كلنا نحترك لازم واحد منا يكون هادئ وهيج تستمر الحياة

بعد مرور اول اسبوع من رمضان بيوم من الأيام جنت بالمطبخ احضر فطور اجه كلي شنو شغله

وكلي البنيه جانت هيَ الربط بينهم
بالمهمه وعندها معلومات تفيدهم واني صدكته
بس رحت اتاكد من بتول كالت صح كلامه ركان يعرف لان وياهم جان

وبيوم من ايام رمضان الجميله طلعنا برا نفطر علمود الجهال كُلش فرحو وغيرنه جو بالمول اخذهم رعد يلعبهم شكد حلوين والتوأم فديتهم
نفس الملابس البسهم يخبلون

هما يلعبون واني ورعد نضحك
على ضحكتهم الحلوه واحنا نلعبهم جتي مره جبيره بالعمر ويه بنيه تطلع بال 13 سنه بعدها صغيره باوعت علينه المره ابتسمت كالت

: ذوله جهالج داده

نور - اي حجيه جهالي

: ما شاءالله على امهم طالعين حلوين

نور - ههه تسلمين حبيبه عيونج الحلوه

: وهذا المفلطح زوجج

نور - هي َهيج كالت واني خربت من ضحك كتلها
: اي حجيه زوجي

باوع عليها رعد كال

رعد - حجيه شنو شفتيني علمود هيج تكولين
كل هذا الجمال ومفلطح

: اي مفلطح

رعد - رحمه الله والديج وشنو معنى

: ياااا هذا مايعرف مفلطح شنو لعد شنو يعرف
الله يساعدج يمه

نور - هههههه والله حجيه يعرف كلشي لاتشوفي هيج متمسكن

رعد - لا اشو ماعرف مفلطح شنو جديده هاي

: سوالف عجايز عتك شمعرفك بيها

نور - هههه بعدج شباب وينج وين العجايز

: اي والله هم صدك
فدوه لهل ضحكه الحلوه يايمه

نور - هههه حبيبتي حجيه فدوه لكلامج

رعد - اي هيَ فدوه وحلوه واني مفلطح حضوظ

: يمه من السانك يمه الله يساعد مرتك

رعد - ديلا استلم حجيه شمسويلج هيج تحجين عليه دشوفين شلون شاب حلو مرتب

: اي يمه الله يحفظكم كُلش حلوين
يمه شنو اسمج

نور - اسمي نور

: الله يحفظج شبهتج ببنتي
الجبيره بالخارج اشتاقيتلها وشبهتج بيها

نور - نزلت دموعها وهيَ تحجي كتلها
: تسلمين حجيه ماكو فرق عتبريني بنتج

: الله يرضى عليج يمه وانت مصكوع ديربالك عليها مريتك اذهبه ما شاءالله

رعد - بعيوني حاطها وربج

: اي خوش تستاهل هههه الله يحفظكم يمه يلا اروح اني

رعد - تسلمين حجيه

نور - هلا بيج حجيه

راحت المره باوعت على رعد ضحكت كتله

: لعب جهالك يامفلطح ههههه

رعد - ماعندي حظ ويه الناس كل هذا الجمال و مفلطح ملطح مدري شنو

نور - هههه فديت احلى مفلطح

رعد - احترك ابليسج

نور - ههههه ليش

رعد - خلي يحترك احسن

نور - هههههه خوش

رعد - لا تضحكين

نور - يااا شلون اريد اضحك يعني تمنعني ؟

رعد - ها هيج صار الحجي

نور - اي

رعد - سهله اعلمج بالبيت ميخالف

نور - هههه اي وشنو تعلم مثلاً

باوع عليه غمزلي كال

رعد - نرجع وتلحكين تعرفين

نور - منحرف مايفيد وياك ههههه ،

_
_
______

حبايبي الحلوين الى هنا وصلنه نهاية البارت
ان شاءالله نال اعجابكم

اني نزلته على قناتي التلكرام
لكن اكثركم كالو ماعندنا تلي نزلي بالواتباد
ونزلته لعيونكم الحلوه ،

لا تنسون تعليق جميل مثلكم
وتصويت بالنجمه 🤎

وقناة التلي نزل اول جزء من البارت هناك

واي معلومه تخص الابطال واي سؤال عندكم هناك بقناة التلي دوم ارد على اسئلتكم وانطيكم اخر اخبارهم وهذا القناة طلبتو مني انزله لان ماطلع عند البعض في البحث 👇🏻

من خلال رابط الدعوه تلكون قناة التلي👇🏻💕

وحساب الانستا انشر هناك ايضًا
كلشي يخص الرواية والابطال 👇🏻

ونختم البارت بأجمل سطر

سبحان الله الحمد لله لا اله الا الله الله اكبر

والان نلتقي وياكم في وقت لاحق و انتظروني بروايتي الجديده عن قريب ان شاءالله 🤍

في امان الله وحفظه 😚💕

#خلف القضبان روح يتيمة
#بقلم الكاتبه جيهان آغا