رواية خطأ طبي «عقاب الاماني» الفصل الحادي عشر 11 - بقلم نورمـين

عقاب: حترجعين للدوام
كلتها وابتسمت.

من صدمتها حجت بهدوء.
اماني: جذاب!

عقاب: لا مدا اجذب ولا اشاقة

اماني: بس.. شلون؟! مو كلما احاجيك متقبل، شصار هسة حتى تقبل؟ يعني ليش شنو السبب؟!

عقاب: تريدين ابطل واغير رأيي يعني؟

اماني: لاااا
كامت وكفت كدامي وحجت.
اماني: اكيد لا مو هذا قصدي بس ردت اعرف شنو السبب الخلاك توافق

عقاب: ماكو سبب محدد، قررت وخلص، ارتاحيتي؟

هزت راسها والاستغراب مسيطر ع ملامحها، تسألني سؤال اني بنفسي ما اعرف اجابته!

كمت اريد اروح للغرفة، صاحت ورايه.
اماني: وين؟!

استغربت من نبرتها، كأنو دتحاسبني! ضيقت نظراتي فهي حجت تبرر.

اماني: اقصد وين حتروح، حتى اعرف احسب حسابك للغدة او لا

رفعت حاجبي بشك، وجاوبتها بتهكم.
عقاب: حسبي حسابج عيني

اماني: تمام

جانت تحجي ومتخلي عينها بعيني، واضح توترت .. درت وجهي ورحت للغرفة واني مبتسم من ردة فعلها.

طلعت الملفات وبلشت اشتغل، هالفترة حـيتم تسجيل وتثبيت المرشحين عالقوائم استعدادًا لتهيئة الانتخابات، فالشغل مكثف.

واني مندمج بالشغل، خابرني ضرغام.
عقاب: ها يابه شصار

ضرغام: هلا، ابشرك التريده تم

عقاب: ولله وكفو

ضرغام: الكفو هاي نكعها واشرب ميها، شوكت تفتح الموضوع ويه الحجي؟

عقاب: لتصير مفلفل مثل شاهين، انطي مجال هالكم يوم

ضرغام: عقاب اريدها يمي تحجي صدك انت، بعز نومي كمت احلم بيها

عقاب: اي ميخالف دولي هسه

سديته واني اضحك، اجتي الدكتورة.
اماني: تعال اتغدى

عقاب: جاي وراج

راحت واني كعدت الملم الملفات، كملت ورحت للمطبخ وكفختني ريحة طيبة.

عقاب: هاي انتِ مسويته؟
جان اكو مرك تبسي ودجاج، استغربت انو هي تعرف تطبخ هيج اكل.

اماني: اي ليش مستغرب؟

عقاب: لا بس .. يعني ممتوقعج تعرفين تطبخين

اماني: للصراحة، هاي اول تجربة الي بالمرك، فانطيني رايك بيها

عقاب: جيبي خاشوكة بلا

انطتني خاشوكة، ضكت المركة مالحة تكطع البلاعيم! كوة بلعتها.

اماني: ها؟ شلونها؟

عقاب: ناوية تصعدين ضغطي وتكتليني مو؟

اماني: لا ليش؟

عقاب: ولج مفرغة جيس الملح كله بنص المركة، ما ضكتيها وشفتي؟

اماني: هن بس 4 خواشيك!

عقاب: ايبااه بس!! لو مسويتهن 5 فد مرة

اماني: اصلا اجيت اسويهن 5 بس كلت لا كافي، لان حطيت 3 بالبداية وجانت ماصخة

عقاب: وما ضكتيها بعد؟

اماني: لا لان التهيت بالدجاجة

عقاب: هنيالي..

اماني: اكلك شو انت هواي تنعثل، متاكدة هسة تطلع طيبة، شو بلا خ اضوكها اني، انت العجب ميعجبك

رفعت حاجبي باستغراب.
عقاب: لا بلا؟ اني ميعجبني العجب؟

اماني: اي ولله لعد شنو مشايف روحك شلون رافع خشمك

عقاب: طبيعتي هيج

اماني: واضح

اخذت خاشوكة ضاكتها، ضيقت عيونها وملامحها تجعدت من الطعم المالح، باوعتلي بنظرة اقرب للبجي، ابتسمت بشماتة وكلتلها.

عقاب: بلعيها احسلج

هزت راسها بلا، وكامت تريد تغسل وتذبها، كمشتها بساع وكلتلها واني اضحك.
عقاب: يلا بلعي، اصلا هي طيبة بس انتِ العجب ميعجبج

حسيتها شوية وتبجي من الفشلة، ما هديتها الا خليتها تبلعها، رجعت كعدت بمكاني وهي وكفت تشرب مي.

اماني: ااععع شون كدرت تبلعها انت، احسها وغفت ببلعومي

عقاب: مو انتِ تنعثلين هواي فـهيج حسيتي

اماني: اهووو ابتليت حجيت حجايه، رح تلزمها

عقاب: كعدي خ نشوف هالدجاجة تنوكل لو هم تكطع البلاعيم

اماني: ما اسمحلك تشكك بقدرتي الدجاجية ابد

عقاب: هه اي من حقج عيني

اماني: ديلا ضوكها وشوف، لاما غيرت رايك بطبخي اني ماطلع اماني

عقاب: نشوف

الدجاجة جانت شاويتها بالفرن، ومبين طيبة بس حبيت اشاكسها، كسرت من الفخذ واكلت، الطعم طيب للأمانة بس سويت بوجهي علامات الاشمئزاز وهي استغربت وضاجت، عبالها صدك مو طيبة.

اماني: ها شلونها؟ طيبة؟!!

هزيت راسي للجانب بلا.
اماني: لا يالله شنتغدة هسة لعد، اني صوجي تندرت وخبصت الدنيا، لو ظالة ع الاكل المجمد احسلي

جانت تحجي بقهر وضايجة، اتذكر بيري هم جانت حيل تنقهر من تطبخ شي ويخرب، وهو بصراحة حقهن لان تعب ومجهود وتالي تخرب الاكلة فاكيد تضوج.

اني جنت اباوعلها وكوة ضام ابتسامتي، باوعتلي وكالت.
اماني: اسفة، حكوم اطلب شي ناكله انطيني تلفونك بلا

عقاب: بالغرفة تلكي

كامت وصلت للصالة، صحت عليها واني فاحط ضحك.
عقاب: تعاي يابة تعاي

اجت يمي متعجبة.
اماني: ترا ماله داعي كل هالضحك لتصير سخيف

عقاب: ماكو اسخف منج، الدجاج طيب هيّ ثولة كعدي اكلي

اماني: مو كلت مو طيبة؟

عقاب: ضحكت عليج

اماني: ولله مو صوجك، اني صوجي امشي بحجيك
دارت وجهها دتروح وهي معصبة، واني كمت لزمتها من جتفها ودرتها عليه.

باوعتلها شويه ودققت بملامحها الغاضبة الي دتتلاشى شوية شوية.

عقاب: انتِ تظلين بعقلية الجهال هاي؟

اماني: هدني ومعليك بيه

بتحدي رديت.
عقاب: ما اهدج وعليه بيج

اماني: اففف يلا لعد خ ناكل هدني لو سمحت

ابتسمت وعفتها، كعدنة ناكل وهي طول الوقت كالبة وجهها، اني جنت كلش مستمتع مادري شكو عبالك، وكلما اباوعلها اخرب ضحك مدري شجاني، وهي تبرطم بالزايد واني ازيد بالضحك، هاي اول مرة اتمضحك هيج وياها!
كملت غسلت وحضرت كهوتي ورحت للغرفة اكمل شغلي.

....

اماني

كوة خلصت غدة، احس عقاب شخط، مستحيل يكون هذا عقاب الاعرفه، يعني جابلي تلفون ورجعني للدوام وهسة يضحك وياي ومنطلق؟!

لا لا اكيد اكو شي غلط بهذا الرجال اليوم، ادور ابتسامته تسحر الواحد من كد جمالها، ليش يضمها لعد!
بحيث اباوعله وممصدكة هذا يعرف يضحك مثلنا! لا وعنده ضحكة حلوة!

بس الي ضوجني الجروح الي بوجهه، كسر بأيده للي ضربه، شلون كدر يشوه هيج اناقة، كلت اكمل غدة واضمدهن اله ميصير يظلن هيج.

وصدك كملت غدة ولملمت المواعين بالغسالة واخذت علبة اعواد تنظيف اذان وديتول ولاصقات جروح ورحتله للغرفة.

طبيت والغراض بأيديه، هو ما شال راسه ولا باوعلي اصلا، ملتهي بملفاته الي مدري شنو هن، ليل نهار حاط راسه بيهن.

جان كاعد عالجرباية، كعدت كدامه وحطيت الغراض بصفي، رفع راسه وباوعلي بتساؤل.

اماني: الجروح الي بوجهك لازم اعقمها

عقاب: ماله داعي يطيبن وحدهن

اماني: لا شلون، ما اطول دقيقتين ولله

عقاب: متعود ما اسويلهن شي فعوفيهن و روحي دكتورة

اماني: اي وشنو يعني تتعود اعقمهن الك، بسيطة!

عقاب: الظاهر اشتاقيتي لحياة الطب، فلا تخافين حـ ترجعين للدوام وتشبعين من هالسوالف

اردفت بجدية.
اماني: انت ليش هيج؟!

ملامحه فرغت من اي تعبير.
عقاب: شلون يعني؟

اماني: متناقض، لابس قناع الحدة والعصبية وانت من جوة شخص مختلف تمامًا

ابتسم وجاوبني.
عقاب: للضرورة احكام، وهذا حكم الدنيا وياي

اماني: شلون يعني حكم الدنيا؟

عقاب: انسي، ضمدي الجروح وفضيني ادري بيج مراح تفكين ياخة عني بعد

ضيع السالفة حتى ليجاوبني، الظاهر ميريد يحجيلي، يلا مو مشكلة، هسة خ اعقم جروحه مدام قبل.

حطيت الديتول عالقطنة الي بعود الاذان، وبلشت اعقم يم عينه، خده وكصته، جنت كاعدة وحاطة مسافة بيني وبينه ومادة ايدي حتى اوصله.

عقاب: ديربالج لتوكعين بالبحر

اماني: ها؟

عقاب: شبيج شاردة؟

استوعبت قصده عالمسافة البيننا.
اماني: ومنو كلك خايفة منك وشاردة؟

عقاب: علساس ممبين، بعدين نسيتي البارحة شصار لو شنو؟ عادي ترا ما آكلج

بلعت ريكي بتوتر ممزوج بالخجل، حجاية وصارت بحلك عقاب بعد شيخلصني من لسانه.

ادنيت عليه بهدوء، وصلت لشفته العلوية دا اضمد بيها، ونتبهت لنظراته عليه، ادور انفاسه الحارة تلفح بشرتي، حسيت روحي انسطرت.

باوعتله ببراءة، رفرفت برموشي بتوتر من هالقُرب، ابتسم وكال بصوته المبحوح.
عقاب: خلصتي؟

اماني: ا..اي اي

عقاب: ديلا وخري لعد

ظليت صافنة ممستوعبة الفشلة الاكلتها.

عقاب: الوو دكتورة.. هل تسمعينني؟ انتِ هنا؟

كمت بسرعة وحجيت بضوجة.
اماني: ترة انت ابد متضحك، خاف عبالك نفسك كوميدي!

عقاب: محد طلب رأيج او كلج ضحكي

اماني: حتلو، من حقي انطي رأيي مثلما القانون يسمح ببلدنا

كام وكف، حط ايدي بجيوب بنطرونه وابتسم باستهزاء، بعيدًا عن الموقف، قلبي رفرف!

تقرب عليه ودنك راسه وكال.
عقاب: لا يابة القانون .. باعي يحلوة ببلدج اكو ديمقراطية وحرية تعبير، اما اني دكتاتور، الاريده بس يتنفذ، ومتطرف برأيي وبقراراتي ومحد اله حق يعترض او يناقش، صار واضح؟!

اماني: فعلًا تلوكلك كلمة دكتاتور

عقاب: ادري ..
رد بثقة، اختل توازني وكمت امتمت من الارتباك، اخير شي قررت افلت.

درت وجهي اريد اروح، لزمني جرني لحضنه وثبت ايده ع خصري، كمشت ايده اريد اوخرها وهو يباوعلي مبتسم بغرور.

عقاب: ليش تشردين من تنحصرين بالزاوية؟

اماني: ما شاردة

عقاب: لعد ليش ما جاوبتيني وردتي تروحين؟

اماني: مو انت دكتاتور؟ فالحجي وياك ماله نتيجة، وبعدين اني اريد ارجع الغراض لمكانهن

ابتسم.
عقاب: هسة لازم اصدكج؟

اماني: اي لان اموت اذا مصدكتني..
كلتها بحزن مزيف واني اقلد، رفع حاجبه ورد.

عقاب: ديلا لعد ما اخليها بنفسج، حـصدكج بس نصيحة، مرة لخ من تجذبين، جذبي جذبة مقنعة

اماني: شنو.. شقصدك؟

عقاب: الغراض بعدهن هنا وانتِ كمتي بطرك روحج، فـ جذبتج مو مقنعة

باوعت بفشلة، يمة منه شكد ذكي وسليط لسان.

اماني: عادي ترا .. نسيتهن

قرب راسه الي وركز نظراته عليه، وكال بجدية.
عقاب: لكلشي محضرة اعذار

كلبي دك سريع، هم من قُربه مني وهم من كلامه ونبرته، حسيته تحول ورجع عقاب العصبي.

فلتت نفسي منه وشردت، بدون لا غراض لا بطيخ وشيريد يكول عني خ يكول.

شربت مي وكعدت استجمع نفسي، الي تبعثرت بسببه.

شنو هالرجال هذا دخيلك يا الله!

عبالك عنده انفصام، شون ممكن يتواجد انسان بهالشكل الغريب هذا؟

قاسي للنخاع، بس بنفس الوقت حنون كُلش!
حاد الطباع، بس مـرن بالنقاش والتعامل!
ابرد من الثلج، بس وكت الحاجة يشعل نفسه مثل الجمـر!
متناقض بالتصرفات، بس مُـراعي بكلامه وافعاله!

…

عقاب

كملت شغلي وتمددت، اييي دكتورة اماني شلون تاليتها وياج؟!

ابتسمت ع مرور ذكريات اليوم ببالي، بجامتها الي لبستها بالمكلوب، طبخها التعبان، فشلاتها ويايه .. ظريفـة وعندها براءة ما توقعت تكون موجودة بيها!

للغروب،  اخذت جاكيتي حتى اطلع، جانت كاعدة بالصالة وفاتحة تلفونها.

عقاب: رح اجيب عشا من برا لتسوين شي

اماني: تمام بس سؤال

عقاب: جواب

اماني: مدام جبتلي التلفون، عادي اخابر اهلي مو؟

كعدت كبالها وحجيت بجدية.
عقاب: اعتمادًا عالفترة الي عشناها، عرفت طينتج شنو، وعرفت انو انتِ انسانة تستحقين الواحد يثق بيج ويأمن بيج، ولذلك قررت ارجعج للدوام وانطيج تلفون، وامنحج كامل الحرية، تريدين تتصلين بأهلج صديقاتج تزوريهم، كلش عادي بس احترمي كونج زوجتي حتلو عالورق بس، واتمنى متخليني اتندم ع هالقرار بفد يوم دكتورة

   ردت بتأثر.
اماني: وعد انو رح اكون عند حسن ظنك ومراح اخليك تندم ع ثقتك بيه عقاب

عقاب: نشوف..

كمت واستوقفتني بسؤالها، الي مديعجبني هالايام.

اماني: وين رايح؟

عقاب: شغل، تردين شي؟
رفعت حاجبي وحجيت.

اماني: لا سلامتك

عقاب: يسلمج الله

طلعت واني افكر، يا رب لتخليني اتندم ع الي دا اسويه، انت وحدك تعرف شكد عاندت نفسي علمودها..!

صعدت بالسيارة وتوجهت لقسورة حتى اجيبه وياي ونروح للكهوة، لان الولد كلهم هناك، متفقين نسوي عيد ميلاد لقسورة ونفاجئه.

اتصل عليه ليث.
ليث: الو ها عقاب وين صرتو؟

عقاب: هسة رح امر ع قسورة ونجي

ليث: يلا لعد بساع، ترا كوة متحمل الكيكة مبينة تخبل

عقاب: هههه ديلاا ميخالف

ليث: ترا احجي جديات، يجوز تجون متلكوها تلاحكوا روحكم احسن الكم

عقاب: افتهمنا ولي عاد

سديته واني مبتسم، شكد يحب الاكل هذا، يمكن لو تنطي كيكة يبيع حتى الحجي هههه.

وصلت لبيت قسورة، اخذته وطلعنه للكهوة، وبالطريق جنة نحجي.

قسورة: زين ما كلك الحجي شوكت التنفيذ؟

عقاب: لا لسة، كال اشوف وقت مناسب وابلغكم

قسورة: اخخخ شيصبرني، اريد ادوس راسه بالقندرة لهالسافل قحطان

عقاب: مصيره يجي بأيدنا، اصبر والك التالي

قسورة: اييي بس كلما اباوع بوجهك واشوف هالجروح ارجع اشتعل

عقاب: عادي يابة زلاطة ذني

قسورة: ههههه

وصلنا للكهوة، نزل قسورة واني رمشت لشاهين حتى يتحضرون.

قسورة: عليمن دكيت؟

عقاب: شو صاير جنك الدكتورة؟

قسورة: ههه ليش هي هم صايرة تتسأل؟

عقاب: كلما ادير وجهي وكالت وين تريد

قسورة: ههههههاي بسلا عاشت دور الزوجة من صدك

عقاب: يمكن هيج

قسورة: بعدين نحجي بهالسالفة

كالها لان طبينه للكهوة، اول ما فتنا تلكونا شاهين وليث وضرغام وبيدهم العاب من هاي التنفتح ويطلع منها ورق ملون، باوعتله فرحان ومصدوم بس اكو نظرة حزينة بعيونه، ابتسمت وكتله بصوت عالي.

عقاب: كل عام وانتَ بألف خير يا عار، عمر النسر ان شاء الله

قسورة: بعد روحي
حضنني وادور راح عالولد باركوله وحضنوه.

ليث: قسورة تلاحكت روحك، جنت رح اكل الكيكة

شاهين: يمعودين وين تاخرتوا، كوة مچلبين بي

ضرغام: ولكم كلساع يتهدد رح اكصها رح اموت جوع ونظل نهدي بي ونكمشه

عقاب: مشوه عابت

ليث: اتجاوزك بأخلاقي

عقاب: هن وينهن؟

ليث: معليك، قسورة تكص الكيكة لو شلون؟

التفتت ع قسورة، الي جان هادئ وحزين، عرفت ديتذكر اهله الي تخلوا عنه..!

من حجينه هيج، ابتسم بتزييف حتى ليبين حزنه وكال بفرح مصطنع.
قسورة: يلا وين السجينة؟

ضرغام جابها انطاهيا لان جانت محطوطة بجهته.
ضرغام: هاك حبيب

راد يكص الكيكة، بس وكفته، شعلت الشموع الي بيهن رقم 27 وكتله.
عقاب: اتمنى امنية

ابتسملي، دار وجهه عالكيكة، ركز نظراته عالشموع، غمض عيونه وتمتم بأمنيته بينه وبين نفسه، ادور فتح عيونه ونفخ عليهن بقوة انطفن، صفكنة وكالعادة ليث رجع يمسلت.

ليث: خلصتوا لو بعدكم ترا دا اموت اني!

قسورة: خلصت ابو بطنين

ليث: ديلا عاد كمت تتمنى مثل الجهال، شكبرك تصير بعد

صحت بي بنفاذ صبر.
عقاب: ليث تاليها احط راسك بالكيكة واخليك تشبع، كافي صم حلكك

ليث: سكتنا عيني صاير حساس

عقاب: حساس مساس ميخصك، انجب وانتظر حالك من حالنا

قسورة كلي بسخرية.
قسورة: روح اخذلك راشدي منه بعد

عقاب: ترا اجيبك انت براشدي الطشك بالكيكة، لا عبالك عيد ميلادك متتحاجى

قسورة: لا عيني لا العفو ..

ابتسمت، هذا كله حجينا بشقة بس هي طبيعة اصواتنا عالية فالي يسمعنا عباله دنتعارك، بس احنه دنسولف عادي.

كص قسورة الكيكة واول واحد اكل طبعا ليث المهموش، ومن بعدها قسورة واحنه، ملطسنا وجه قسورة بالكيكة وخليناه يغسل وينزع جاكيته لان انترسن كريمة.
من رجع انطيناه الهدايا مالته، اني جبتله ساعة فضية اصلية، شاهين جابله قاط لان ثنينهم نفس القياس، ضرغام جابله كفر لتلفونه عليه صورته وليث جابله حذاء جلد.

قسورة: عليمن كلفت روحك ليوثي، جايبلي حذاء وانت موجود شنو هالتبذير؟

ليث: ايا سرسري اني اعلمك شنو فائدتها هالحذاء
متنا ضحك وليث يخونك بي ويدك بي بالحذاء، يكله خلي ادشنها براسك.

كملنا، ضرغام وشاهين وليث نزلوا نراكيل، بس اني جنت اريد اخذ عشة وارجع للدكتورة وهم تعبان اليوم هواي اشتغلت واحس راسي انسطر، قسورة رجع وياي هم، لان اعرفه بهيج يوم ميحب يحتفل ابد، بس احنه نحب نفاجئه ونحسسه بالاهتمام لان هو محروم منه، لان معنده اهل.

صعدنا السيارة، بدون ما اشغل سألته.
عقاب: شبيك مغندب؟ افرح يول!

قسورة: هه افرح؟ شفرح واني دا احتفل باليوم الي اهلي تخلوا عني بي؟

عقاب: الصار صار وراح، وانت مو بحاجتهم بعد، لتظل تفكر بهالطريقة، اني اعتبر هاليوم هو يوم ميلادك الحقيقي لان انت من هالتاريخ انكلبت حياتك وصرت قسورة الي احنه نعرفه

قسورة: صحيح كلامك، بس عقاب خلي نفسك بمكاني، يتركوك اهلك بدار الايتام ويروحون، ويتسجل هاليوم ع انو هو يوم ميلادك، تكبر وتصير شاب وانت مجبور كل سنة تحتفل بي ولله شنو؟ عيد ميلادك!! وهو بالاصل اليوم الي انشمرت بي للشارع بدون اي اهتمام، تتخيل سهلة؟! لك اني كمت اكره هالشهر!

عقاب: مو سهلة اعرف بس...

قسورة: بدون بس عقاب، تدري دوم اسأل نفسي واكول لو امي متريدني، او ابويه مقابل بجيتي لهالدنيا، ليش جابوني اصلا؟ بأي حق جابوا طفل لدنيا وشمروه مثل ميشمرون الزبالة!! بس لو اعرف ليش جان انطفت هالنار الي بصدري، لك 27 سنة مرت عليه واني كل يوم اكول ليش!! ليش!!! وين اكو ام تتخلى عن ضناها بهاي السهولة؟!

عقاب: الام مو الي تخلف، الام الحقيقية هي الي تربي وتكبر ابنها وتتعب وتسهر ع راحته، فـ بعمرك لتكول عنها ام، لان الچلبة حشاك متسوي سوايتها هاي، الچلبة خو حيوانه؟ بس شايف شلون تخاف ع جهالها وتحرسهم وتكبرهم!

قسورة: هه... وسفــة ولله.. !

عقاب: الله يجازيها هي والشفية ابوك، لتنقهر كافي عاد شكد نكدي

ابتسم ودار وجهه، شغلت السيارة والهدوء جان سيد الاجواء، وكفت يم مطعم جبت اكل وصعدت.

قسورة: اي عيني شغل طيب .. حتى اكل من برا تجيبلها

عقاب: قسورة لتظل تمسلت هن لفتين كص

قسورة: حتلو فلافل، دتجيبلها لو لا؟

عقاب: وشتريد انت هسة؟

قسورة: ريما

عقاب: شنو؟ شعندك وياها

قسورة: اريد اشوفها حتى احس صدك هاليوم بي حظ

...

انتهى!

لتنسون التصويت 🖤

#الكاتبة نورمين 🖤