رواية خطأ طبي «عقاب الاماني» الفصل الثامن وثلاثون 38 - بقلم نورمـين

#خطأ_طبي «عقاب الاماني»

بقلــم : نورمين 🖤🦋

...

جرني من خصري عليه، شهكت بصدمة..

اماني: ولا تكول مريض! انتبه لحركاتك!

عقاب: لتظلين خايفة عليه..

اماني: ليش شعندي غيرك اني احبل اجيب؟

رفع حاجبه وابتسم بخبث..

عقاب: متأكدة؟

وهنا حسيت ع الجفصة لجفصتها..!

اماني: ش..شو خلي اشوف شلونها ايدك

عقاب: لتغيرين السالفة متمشي عليه هالحركات!

اماني: زين عاشت ايده خوش مسويها

عقاب: لا بلا؟

اماني: وينهن علاجاتك انطاك دهن؟

رفع حاجبه ساخر..
جبت علاكة الدوا ورجعت..

اماني: اي اي زين منطيك احسن نوعية

عقاب: خلصتي؟

اماني: ها ولتحركها حتى تطيب بساع ماشي؟!

جان يضحك ويباوعلي بعدم تصديق، لان مصرة اظل مغلسة واطنش الموضوع ..

عقاب: صدك لو كالوا ان كيدهن عظيم..!

اماني: ها ريما.. اجيتج..

سويت روحي علساس داحجي وية ريما وفلتت، والا هي البنية نايمة لا يمي ولا صاحت اصلا.

عفته يضحك وملصت..

شربت مي وهفيت ع وجهي، احس من الخجل احتريت..

شلون بيه ويه هالجفصات الي تجي بوقت ابد مو مناسب!!

مرت الايام بهدوء والحجي تحسن وكام ع حيله..

عقاب ايده صارت احسن وفتحها، مقبل يخليها مصبوبة اسبوعين، كوة عافها اسبوع وشالها يكول صارت زينة.

مشفته يشكي منها فعرفت انو صدك تحسنت، وهو من نوع عظمه قوي فبساع التئم.

قسورة وريما بعدهم ع حالهم..

بس الاية انكلبت، كامت ريما تدور الفرص حتى تشوفه وتحجي وياه وهو الي يتجنبها..

سبحان مغير الاحوال هههه.

جنات وميقات علاقتهن مستقرة وية ضرغام و شاهين..

وطبعًا بهالفترة عقاب بلش يعلمني اسوق..

فـ هسة احنه بساحة فارغة وديعلمني.

عقاب: امشي شوية سريع

صحت بي..

اماني: تريد نسوي حادث؟ كل هالسرعة ومو بعينك؟!

عقاب: يا سرعة، ولج انتِ بانزين ما دايسة!!

اماني: لعد شتريد، هذا الموجود

عقاب: ولله لو انزل اركض هم اوصل اسرع من سياقتج!

اماني: هه متضحك

جنت حاطتها ع 10 وحتى بانزين ما دايسة، السيارة اوتوماتيك فتمشي وحدها عالبطيئ..

واني روحي مخموطة، لازمة الستيرن بقوة ومصلبة جسمي ..

كلبي يدك بسرعة وعيوني كوة ترمش تباوع عالطريق..

ادور ما اكدر اشيل راسي واباوع ع مراية السايق ولا ع مرايات الجوانب لان يا دوب مركزة كدامي..

اماني: انت راقبلي المرايات

عقاب: خو ماكو شي؟

اماني: لعد شصير اني اباوع ع 4 مكانات شكلولك كم عين عندي!!

عقاب: وهاي كل ليسوق يحطله واحد يراقب وياه مثلج؟

اماني: واني شعليه، كلمن عليه بروحه، باوع باوع..

عقاب: الله يصبرني..

دست بانزين شوية شو حسيت السيارة طارت رغم هي بطيئة!

حجيت بخوف..

اماني: يا ياااا ولك عقاببب رح ننكلب

عقاب: دكولي يا الله وشيلي رجلج عن البانزين!

شلتها ع كيف ..

عقاب: ليش هيج مكبرتها ممكن افتهم؟

اماني: عقاب اسكت عني خلي اتعلم براحتي

عقاب: شتتعلمين وانتِ كلشي مدتسوين واقل حركة وصرختي!!

اماني: لعد شلون، هو هذا الاكدرله هسة!!

عقاب: اجي بمكانج وتباوعيلي بتركيز شسوي وشلون اسوق حتى وراها تطبقين، تمام؟

هزيت راسي بارتباك، ولله شغلة السياقة خطرة يربي مدري اني خوافة.

بدلنا بالمكانات، كعد بمكان السايق وكال..

عقاب: وهسة انتبهي كلش زين شراح اسوي، شلون اشغل امشي بيمن اطلع لكدام شلون اوكف افتر

اماني: تمام بس ع كيف اشتغل

ابتسملي..
عقاب: تدللين..

وصدك، خليت بالي وياه وكمت اسئله وهو يجاوب ..

حسيت روحي عرفت، ولو اني اصلا اعرف كم شغلة.

وهو بالايام الراحت هواي ساعدني ودربني.

عقاب: وهسة دورج

بتردد..

اماني: ميصير نلغيها ونرجع للبيت؟

عقاب: تؤ.. نزلي

اماني: يعني ما بيها مجال؟

عقاب: ابد

عبست ونزلت من لا جارة..

كعدت واخذت نفس..

حسيت ع ايده حطت ع رجلي..

باوعتله، جان مبتسم وحجة بنبرة مطمئنة..

عقاب: ثقي بنفسج ولتخافين، اني يمج ميصير شي ترا

حسيت كلامه انطاني دافع ..

شغلتها ومشيت بيها عادي، صح جانت اكو خوفة بس شوية شوية تلاشت وسيطرت..

عقاب: عفيه بنيتي وهسة وكفيها

وكفتها واني طايرة من الفرح، اخيرا سويتها!!!

اماني: ها وهسة شلوني؟

رد بهيام..

عقاب: تخبلييين!

ابتسمت بخجل وعيوني تاهت بنظراته..

عقاب: شفتي شلون سهلة؟

اماني: صح بس اني جنت خايفة ..

عقاب: هو هذا هاجس اول مرة يصير صعب، ليش ردتج تكسريه، حتى تتعودين بعد

هزيت راسي بسعادة..

اماني: لو مو انت مجان سويتها، ادري بروحي خوافة ما ادبرها، شكرا حبيبي..

هز راسه بـلا..

عقاب: ايدي لو ايدج الي كمشت الستيرن؟

اماني: ايدي

عقاب: رجلي لو رجلج الي داست بانزين؟

اماني: رجلي

عقاب: عيني لو عينج الي شافت الطريق؟

اماني: عيني

عقاب: اي خلص هذا هو، الشكر لنفسج مو الي..

اماني: لا لا لا..

عقاب: شكو ادور؟

اماني: عيني وايدي ورجلي كلهن تحركن بفعل دافع معنوي سببه انت، فأنت سبب انو اني سقت حلو

ابتسم وكال بمرح..

عقاب: وين اكدر للسانج اني؟!

ضحكت وحجيت..

اماني: متكدر عيني، وهسة اني جعت..

باوع لساعته ورد باوعلي وكال.

عقاب: مظل شي للغروب، سوقي لمطعم خلي نتعشة فد مرة ونرجع للبيت

بصدمة حجيت..

اماني: انيي؟؟؟!!!!

عقاب: لعد اني؟ يلا يلا

اماني: لا لا مستحيل ما اعرف اسوق بالليل

عقاب: شيرادلها هي نفس الشي وضوة السيارة موجود!

اماني: حتلو اخاف ممتعودة، خو مو هستوني تعلمت تريدني اسوق بالليل، لا لا

عقاب: وعلّى، سوقي وانتِ ساكتة

حجيت باندفاع..
اماني: عقااااب اخاف ما اسيطر والشوارع ظلمة!!!

عقاب: بنيتي اني شنو وجودي لعد؟؟؟؟

اماني: لا مو عليك بس ..

قاطعني ..

عقاب: لا تبسبسين، عود اذا شفتج صدك متدبريها اسوق بدالج، راضية؟

هزيت راسي بتردد.

عقاب: انطلقي لعد

انطلقت واني اسوق برزانة، تعجبت ع روحي!

من وصلنا لمطعم، خليتها ع صفحة ونزلنا.

كمش ايدي وكال وهو مبتسم..

عقاب: لو كل ليخافون يسوقون مثلج جان مصار حوادث عدنه!

اماني: يا الله حتى اني مصدومة بنفسي!

عقاب: اني ممصدوم، وجنت واثق انتِ كدها بس انتِ تفتين الگلب بعنادج

اماني: رحت فدوة لليتحمل عنادي..

عقاب: اسم الله عليج ضوايـة..

ابتسمت بسعادة وطبينا، تعشينا وكملنا وعجبني انزل حلويات..

عقاب: هاي من هسة اكلج، بس اشوفج دستي زايد اسحبها منج

اماني: دخليني اكل براحتي متكلي شبيك

عقاب: لمصلحتج احجي..

تذكرت ذيج المرة من اخذلي حلويات، ضحكت وكتله..

اماني: تتذكر ذيج المرة من جبتلي حلويات؟

عقاب: شلون انسى، فقدتي عليهن كلت ساعة وصار بيها سكر

اماني: هههههه وانت جنت تخاف عليه؟

عقاب: مواضح يعني؟

اماني: مادري، جنت افسره انو متريد يصيرلي شي حتى لتتورط بيه

كال بضجر..

عقاب: عقلج وين؟

اماني: لتحجي عليه، هو غير جنت مسودنني بتناقضاتك، ساعة تعاملني مثل الملكة وساعة تلبسني كأن مموجودة، مرة تخاف عليه ومرة متديرلي بال حتلو احترك! خبلتني انت ..

ملامحه تغيرت، رغم جنت احجي بضحك بس هو اخذها ع محمل الجد.

عقاب: اسف..

اماني: لتتأسف حبيبي اصلا اني دا اشاقة!

عقاب: ويكون..

اماني: لتخليني اضوج من روحي لان حجيت بهالموضوع!

عقاب: لا يابة عليمن، بس يعني من اتذكر ذيج الفترة كلش اضوج، واعصب على نفسي شلون عيشتج بمتاهة

مديت ايدي عالطاولة، اخذت ايده كمشتها قوي ..

اماني: انت جان حقك تتصرف هالشكل، اني ما الومك ولا افكر بالراح اصلا ومتقبلة الصار لان جنت استاهله، والله يشهد ع كلامي..

عقاب: مجنتِ تستاهلين، بس غير محجيتيلي الحقيقة الا متاخر، جان مصار كل الصار..

اماني: بس بالحالتين اني المذنبة!

رد بحدة.

عقاب: انجبي!

ابتسمت بتوتر..

اماني: يمكن ميعجبك كلامي، بس اني للان اعتبر نفسي سبب موت بيري، ومستحيل يجي يوم ابطل الوم نفسي او انسى هالشي ابد.. وكلمة ياريت ولو وشيصير مراح يفاركن بالي ابد.

عقاب: غلط حبيبتي غلط..!

اماني: وجهة نظرك هاي واني احترمها، فياريت انت هم تحترم وجهة نظري..

عقاب: اجمل وجهات النظر وجهچ ..

سكتت واني متمعنة بحجايته..

ادور ابتسمت ومشاعري اختلطت..

اماني: خوش طريقة، سكتتني !

عقاب: اعجبج..

اماني: كلش ولله..!

عقاب: دكملي الحلى مالتج، عفتي والتهيتي تسولفين

هزيت راسي ورجعت اكل وهو يباوعلي..

حاط ايده جوه حنچه، وساند نفسه عليها ونظراته الي تلمع..

توترت ومعرفت شلون ابلع اللكمة بعد.

ادور هالطريقة ليصفن عليه بيها تخلي كلبي يدك مثل الدمام .

اماني: ليش هيج تباوعلي؟

عقاب: شلون يعني هيج؟

اماني: امم.. ملامحك سعيدة ونظرات عيونك تلمع وعبالك كدامك فد شي نادر ومميز!

عقاب: اححح، وهو هيج!

حجة بتنهيدة..
عضيت شفتي السفلية بخجل، ومعرفت شحجي..

عقاب: كدامي كاعدة البنية الوحيدة الي هزت عرش گلبي واجت توجت نفسها ملكته و تربعت بي، شلون ما اصفن بيها شلون؟؟

كحيت وحسيت روحي غصيت بالنفس، هواي هيج ع گلبي كلش هواااي!!

انطاني مي وكال..

عقاب: اسم الله اسم الله، هاج شربي وعلى كيفج ادور..

شربت منه، عيوني دمعت من قوة الكحة وهو اجة وكف يمي وكمش كلينس يمسح دموعي بلطف ..

عقاب: شلون صرتي؟

اماني: زينة حبيبي اكعد

عقاب: بس لحظة..

مسح دمعة بلشت تتشكل بمدمع عيني، نظراتي اله صارت عميقة وعجزت ادير وجهي لغير مكان، لكيت نفسي اسيرة اله..

عقاب: وهيج كملت

كالها وكرص ارنبة خشمي بلطف وابتعد.

اماني: ليش هيج تسوي استحي ولله ادور العالم عيونها علينا!

عقاب: شعلينا بيهم اني ومريتـي احد اله دخل بينا؟

اماني: اي بس استحي اني ..

عقاب: يا هالمستحة الي خابصتني بي

كالها بضحك، باوعتله بخزرة..

عقاب: لتخزرين ترا متخوفيني، بعدين هو مو صوجج، صوجي اني .. مردت مسكارتج تسيل وتصيرين باندا كدام العالم بس هو ابو المثل شيكول؟ سوي زين وذب بالشط

سكتت لان قنعني..

اماني: اذا هيج تمام

عقاب: اي

رجعت دنيت الماعون عليه دا اكل، حجة بعدم تصديق..

عقاب: هم بعد حتاكلين!!!!

اماني: ترا هي كلها 4 قطع بقلاوة ليش حاط بالك وياي؟

عقاب: ها العفو، اكلي بالعافية

اماني: ولتظل تباوع اريد اكل براحتي

عقاب: احاول..

ضيقت نظراتي بعدم رضا واخذت لكمة وسويت امممممم مستمتعة بالنكهة..

عقاب: حركاتج هاي لتسويها!!

اماني: اهوو عقاب رجعنا للاوامر!! خليني اكل براحتي شجاك اليوم..

عقاب: تعاي اكليني بعد! ليسمعج يبچي ع حالج يكول هاي مجوعها خطية

اماني: شقصدك عود اني اكل هواي؟

عقاب: لا ابد، اني الاكل هواي

اماني: عبالي

رجعت اكل بضوجة، بس هو مستمر ع نفس الوضعية حاط ايده جوة حنچه وصافن بيه والابتسامة مفاركت وجهه.

كملت، حطيت الماعون ع صفحة وكلت..

اماني: عود انت ليش هيج تسوي؟

عقاب: شسوي؟

اماني: تخلي ايدك جوة حنچك وتصفن عليه..

عقاب: اسند عيـوني لان وحدها متتحمل كل هالحسّن..

رمشت بتأثر وحسيت فراشات دتطير بمعدتي..

هذا منين يجيب هالحجي، واني لوين اظل انصدم ويخونني التعبير!!!

بالطريق، هو الي جان يسوق، الجو حلو فتحت الجامة ونسمات الهوا كامت تلاعب خصلات شعري ..

وبين لحظة والثانية المح عقاب يباوعلي ..

وصلنا للبيت، نزلنا وجان اكو مرة واكفة ع صفحة..

اشرت لعقاب بعيوني عليها، راحلها واني وراه..

عقاب: تفضلي عيني رايدة شي؟

دارت وجهها فعرفتها!

هاي ام الولد الي رفعنا ضدهم دعوة من حاول يضربني ..

-يمة هاي انتِ الدكتورة مو؟

عقاب عرفها واشرلي افوت لجوة..

- تعبت يلا لكيت عنوانج بس خلي احجي وياج شوية فدوة لعينج ..

عقاب: ماكو بيننا وبينكم غير المحاكم، وهسة روحي بطريقج

-الله يخليكم ولله ما بقالي غير هالولد، واحد الله اخذه لتاخذون الثاني مني هم، ابوس ايدكم ولله مالي غيره بعد بهاي الدنيا  ..

تعاطفت وياها وخاصة دتبجي ووضعها مبين تعبان..
بس عقاب نفس موقفه ما تغير.

عقاب: جيتج ع عيني وراسي حجية، واذا تريدين اعتبريني ابنج شتحتاجين اني بالخدمة، بس مال اتنازل تعذريني.

-ليش يا يمة ولله ساعة عصبية الله يلعن الشيطان ..

عقاب: لا شيطان ولا غيره، هذا كله سببه الاستصغار والاستهزاء بأرواح العالم، البلد مو تايه واكو قانون يحمي الكل، لو متأذية زوجتي حجيج هذا وين اصرفه؟ و لو ما رافع ضد ابنج دعوة جان اعتذرتوا؟ اكيد لا، بس لان الموضوع يمسكم صرتوا نادمين وساعة شيطانية! انصحج لتحاولين وياي او وية زوجتي، لان حتى اذا هي تريد تتنازل اني ما اخليها، وابنج يتحاسب يتحاسب

-في امان الله..

كالتها وراحت مكسورة خاطر.. ظليت اباوعلها مقهورة..

طبينا للبيت وحجيت بضوجة ..

اماني: ليش هيج حاجيتها حرام عليك!

عقاب: ما اتصور غلطت بحقها، حجيتلها الحقيقة بدون صبغ

اماني: بس ولله خطية، خلي نتنازل الله عليك!

عقاب: لتفكرين بهالشي مجرد تفكير !!!! تنازل ماكو

اماني: اي لييش ولله يكسرون الخاطر، وشوف شلون ندمانين وامهم تبجي، لتصير قاسي فدوة..

جنت احجي بتوسل، لان صدك قهرتني ..

تنهد وكال..

عقاب: حتى المجرم هم يتمسكن من ينلزم، فلا تنقهرين على احد غلط بحقج مهما بينلج انه نادم، الحق حق وكلنا عدنه عقل يتحكم بتصرفاتنا ونعرف الصح من الغلط لا ساعة شيطان ولا ملائكة، فكري بمنطق امنيتي.. لو كلها تفكر بعاطفتها مثلج جان محد مشى بالقانون وصارت الدنيا هيتة!

كلامه قنعني..

اماني: افف صحيح بس خطية امه..

عقاب: ترا هي هم غلطت بحقج!

اماني: بس ما حاولت تأذيني!

عقاب: ويكون، الغلط غلط ميفرق صغير لو جبير!

اماني: مادري عقاب مادري..

مشيت كعدت بالصالة وظليت صافنة..

جابلي مي وكعد يمي ..

عقاب: شربي ولا تضوجين روحج، كل واحد يدفع نتيجة افعاله..

باوعتله، ادور هزيت راسي بتفهم ..

قدملي الكلاص، اخذته شربت.

ورة كم ساعة.. مشطت شعري وحطيت مرطب لبشرتي..

اماني: باجر منو يجي بعد غير شلتكم؟

عقاب: مادري، شوفي جنات وافتهمي منها

اماني: لا فشلة تأخر الوقت، عود لباجر

عقاب: ع راحتج وهسة تعالي..

فتح ايديه اجيت وهو حضنني لصدره..

عقاب: ريحتج تسطـرني..

اماني: عادية بس انت كلبك رچيچ ..

عقاب: تؤ.. ماكو بخشونة گلبي اصلاً، ومادري ليش بس يمج ينعـم..

اماني: مسويتله سحر!

عقاب: بودي اصدك بس ادري بيج فطيرة متدبرين سوالف السحر

اماني: رحم الله والديك بس قصدت سحر حُبي مو السحر والشعوذة الي ببالك!

ضحك ..

عقاب: ها العفو اني اعتذر ..

اماني: اعتذارك ممقبول ..

عقاب: ليش؟

اشرت ع خدي ..

اماني: هنا بس ينقبل

ضحك ورد بسعادة

عقاب: سهلة لعد!

باسني ولحيته دغدغتني..

اماني: هههه يلا كافي قبلت اعتذارك ..

عقاب: لا حرامات عبالي انزل لغير منطقة

اماني: صير حباب!

عقاب: ما اكدر..

اماني: تكدر تكدر، يلا تصبح على خير..

عقاب: اصبح عليج ..

حضنته واني كوة ضامة مبتسمي، سحر كلماته عجيب غريب ..

ثاني يوم، صادف جمعة ومعدنا دوامات..

جنة معزومين ببيت جيراننا عذراء ام جنات ع الغدا ..

رحنالهم من وكت لان شاهين وضرغام جايبين شواية يريدون يشوون بالحديقة فعقاب يساعدهم باعتباره خبير..

عفناهم برا يسوون بيها وطبينا جوة..

جانت اميمة موجودة هي وامها همين..

سلمت عليهن وكعدنا بالمطبخ.

ام جنات سوت المرگ ورادت تسوي دولمة بس اميمة مقبلت.

كلتلها هي تريد تسوي ورق عنب وية المشاوي..

الي عرفته انو ام اميمة وام جنات معلمات بنفس المدرسة فعلاقتهن قوية وكاعدات سوة يسولفن.

عذراء: اللحم يمج فوك خلي ميقات تنطيجياه..

اميمة: ميحتاج خالة..

عذراء: شلون ميحتاج متحطينه للحشوة؟

اميمة: خالة ورق العنب يختلف عن الدولمة السلگ! ميحطوله لحم مثروم

عذراء: عمري كله اعاملهن سوا بالحشو، هاي اول مرة اسمع منج

اميمة: همزين دريتي لعد

اجتي لميقات كفختها..
لان كاعدة تصور بروحها وجنات تفتر وحدها بالبيت..

ميقات: اووي شبيجج!!!

اميمة: ووجعوي تنام بحلكج، بعدج مصرتي عروس ومن هسة محناية وكاعدة كومي ساعدي اختج

ميقات: اهوو رح تصيرلي عذراء رقم اثنين

اخذت تلفونها وكامت لغرفتها وسدت الباب..

اميمة وراها تدك عالباب..

اميمة: احسلج لتطلعين واذا طلعتي الا اخلي الغدة سم عليج

امها عاطت بيها..
-عوفيها شعليج بيها ادور!!

اميمة: يمة مشوفيها شون ادبسزز!!

-يمج كرباج البنية، كوة كوة عاركتيها

اميمة: يوووه ارجع اكل احسلي ..

اخذتلها لالنكية وكعدت تكشرها وتاكل.

هالحجي اني كاعدة اثرملها البصل ودموعي عشرة عشرة.

اميمة: حساسة الله يسلمج

اماني: هاا.. اي ما اتحمل حرارته

اميمة: واضح واضح

ورة شوية، حطت الحشو بكدر وخبطته وتعلم بينا اني وجنات لان منعرف ..

اميمة: اي وهسة عزيزتي الانيقة ورة ما حطيتي البصل والتمن، تحطين بهارات وملح، بس ها مو تترسيها ملح وتبعريها..

جنات: شكد يعني احط؟

اميمة: هاي ما تعرف شكد، عينج ميزانج

جنات: لا هايهيه

اماني: تمام وبعدين؟

اميمة: جيبي دبس الرمان وكثرييييي، صيري كريمة مو تبخلين هن دبسات، بس هم لصيرين حاتم الطائي وتترسيها ترس عينج ميزانج عزيزتي!

اماني: شسالفتج وية الميزان، واذا واحد ميعرف هيج عالنظر شيسوي؟

اميمة: يركع راسه بالحايط شيسوي

صفنت عليها وجنات حجت..

جنات: ع حجي اميمة اني ثاني يوم اطلك لان فاشلة بالطبخ وماعرف هاي السوالف مال عينك ميزانك لو اسوي الاكلة فاهية  لو تكطع الزردوم من الملوحة

اماني: اني مثلج!!

اميمة هزت ايدها وحجت بغرور..

اميمة: هنيالك يالمسعد يا زوجي المستقبلي، مرتك تنافس شيف شاهين بالشطارة والندارة

جنات: اميمة سوتلنا دولمة رح تخبصناا، شدو روسكم يكرعان

اميمة: اسمها ورق عنب مو دولمة

جنات: لتدققين هن كلهن نفس الشي

اميمة: لاا لاااا مو نفسها ما اسمحلج هيج تحجين!

جنات: ديلا سكتنا، كملي

اميمة: اي وهسة جيبيلي السماگ

جبتلهيا واجيت..

اميمة: تحطين كمية زينة والي تكلي شكد يعني افكس عيونها مبيها مجال بعد ونخلط نخلط نخلط نخلطططط

اماني: متحطين فلفل حار؟

اميمة: اني احبه، بس خاف الجماعة ميحبوا فما خليت

جنات: حطي حطي ليريد ياكل ولميريد هواي اصناف اكو يكدر ياكل منهن

اميمة: تمام لعد

حطت الفلفل وكملت خلط الحشو وكعدنا نلف ورق العنب، لان الاخت كلما نكول دولمة تصيح بينا عبالك شو شحاجين..!

حطينا الكدر عالنار، وغسلنا دنروح نكعد جان ترد تصيح بينا.

اميمة: ع وين ان شاء الله؟!

اماني: نكعد غير؟

اميمة: والحلى منو يساعدني بي عقابي لو ضرغامي؟

جنات: شبيج تقلدين ترا رح اجيچ بالجفجير !

ظليت صافنة ومبتسمة، هالاميمة حالة خاصة متعرفين شقاها من صدكها!

اماني: خصم الحجي، ببالج شي للحلى لو لا؟

اميمة: لا بس انتن شتكولن شنسوي؟

جنات: ولله اني ماعرف اسوي شي، انتن حيرن بهاي الفقرة

اماني: واني ماعرف بس لحلاوة الطحين يحظي

جنات: عالاقل تعرفيلج نوع، مو مثلي بس شاطرة اكل

اميمة: ضغطي رح يصعد من وراجن، انتن امهات بيوت انتن!! حلى متعرفن هنيال الي ببالي اي ولله

جنات: نوريّنا بمعرفتج

اماني: ولله، شو مستلمتنا اكس مربع

اميمة: معناتها احبج

اماني: وهاي انتِ لتحبي هيج تعاملي؟

اميمة: اي بضبط، ولتنصدمين لان ادري بروحي حتى بهالسالفة مميزة

كالتها بغرور، كلبت عيوني بضجر، كل عقلها!!

اميمة: هسة عوفن اللغوة، وحدة تجيبلي بسكت وتطحنه ووحدة تجيب نساتل كيت كات تموعهن

اماني: وانتِ؟

اميمة: اشرف عليجن

جنات& اماني : لا بلاااا!!!

اميمة: وعلة من الله، يلا استعجلن

تحركنا بضجر، اميمة تتأمر عبالك امي ولا جنها اصغر مني!!

جنات: معدنا نساتل، هاي بس بسكت وجبته من ميقات

اميمة: هي وينها هالمطية متطلع

جنات: كاعدة وتعدل بروحها وتخابر شاهيني

حجت بتقليد، اميمة لمت ملامحها بطريقة مشمئزة..

اميمة: ماريد اغلط عالولد ماله دخل، بس اختج توازيني اغلط

جنات: ختولي، وجودها وعدمه نفس الشي اصلا

اميمة: هم صدك، هسة منو يجيبلنا الغراض؟

اماني: اوصي عقاب يجيبهن؟

جنات: اي صح عقاب او ضرغام

اميمة: لا انتن كعدن خاف تروحن متردن، اعرفجن بس تشوفنهم تلزكن الهم

اماني: شكلولج علينه!

جنات: لا هاي تغار حبي معليج بيها لان معدها واحد تلزك بي

رجعت شعرها لورا وكالت بغرور..

اميمة: اني اميمة ما الزك بأحد، لا عاش ولا كان الي يركضني وراه

جنات: هالحجي سمعناه هواي قبل، بس يجي ابن النعال، ااا اقصد ابن الحلال الحجي كله يتغير..

اميمة: عود الله كريم منا لذاك الوكت

....

اميمة

عفتهن جوة وطلعت لبرا وماخذة فلوس بايدي..

شفت عقاب وشاهين وقسورة وضرغام يقطعون باللحم ويحطوه بالشياش، وليث واكف ويصنف..

ليث: اي حبيب اني انقذت حياتكم اصلا مفروض يومية تبوسون ايدي وانتو كايمين ومن تكعدون هم

شاهين شال السجينة الي بايده وكال..

شاهين: تسكت لو اسويك وصل هسة

ليث: يطيك كلبك تسوي هيج بصاحبك؟ مع الاسف اي ولله، انباعت العشرة بدراهم.. الجان وجهه لوجهي يرهم هسة صار لكلشي راهم!!

قسورة: طكطك اشعارك ع ست الحسن الماخذة كلبك مو يمنا، دايخين وداعت امك الحلوة

ليث: هي وينها غير لو تجي، اكللها سمسمة.. يا كمرة اليرسم سما.. يا غيمة بس مو من مطر.. ذوبيلي يا لطخة شكر يمكيجة خدود السما.. سمسمة..

شاهين: ولعباس رح اشمرك بالسجينة وخرر!!

ليث: هو الطعنة منين تجي.. من القريب !

ضرغام: ليث افلت!!!

ركض ليث يضحك وشاهين شمره بوحدة من الحدايد مال الشوي ليمه..

وهو ديركض شافني، اختفت ابتسامته وظل واكف بصدمة!

...

انتهى

لا تنسوا التصويت والتعليق 🦋🖤

#الكاتبة نورمين