رواية خطأ طبي «عقاب الاماني» الفصل الرابع عشر 14 - بقلم نورمـين

#خطأ_طبي «عقاب الاماني»

بقلــم : نورمين 🦋🖤

...

عقاب: حتى راسج اكصه اذا تكصيه!!

بانفعال ردت.
اماني: لا بلا وانت شعليك!! ما ظل بس شعري ما تدخلت بي!

عقاب: اتدخل ونص، شعرج متلعبين بي يظل مثل ما هو وديربالج اشوفج لاعبة بي لو كاصته سانتيم!

اماني: هه بعد شعندك اوامر استاذ عقاب؟ خاف ميعجبك اتنفس خلي اكطع النفس فد مرة

عقاب: لا خاف تموتين خطيه

بغضب صاحت.
اماني:  عقاااب!

ابتسمت ع عصبيتها، ملامحها صارت حلوة وهي معصبة، فحجيت بهدوء واني اباوعلها ومبتسم.
عقاب: عيونـه

سكتت وملامحها ارتخت، اشرتلها بحواجبي بشكو، الظاهر كلمة عيوني صدمتها.

اماني: اريد اكص شعري ورجاءا لتدخل

عقاب: متكصيه وانتهى الكلام

اماني: عجيب، شعليك انت!! شعرك هو لو شعري؟

عقاب: شعرج طبعا

اماني: لعد اني الاقرر وانت مالك حق تحجي

عقاب: كص ماكو، تريدين تغيير؟ خصليه، صبغيه مدريني هاي سوالفجن سويها وسكتي

اماني: ليش غير افتهم!

ضوجتني بملحتها، فرديت بأنفعال.
عقاب: لان احبه ارتاحيتي؟!

وسعت عيونها بصدمة وحجت بتوتر.
اماني: ش..شنو تحبه ليش تحبه؟

عقاب: احب الشعر الطويل بشكل عام، مو عبالج لان شعرج حبيته

اماني: ليسمعك يكول شكد ممهتم وانت صار ساعة تعاركني حتى ما اكصه، لا واضح متحب شعري
حجت بسخرية وضحكت، كلت خلي ادارك الوضع الظاهر زلكت كبالها.

عقاب: تنجبين لو ادكج صفر هسة

اماني: متكدر
بثقة كالت

عقاب: وليش هيج واثقة؟

اماني: لان تحبه
جرت خصلة من شعرها لوتها وكالت بغرور، ما انكر كلبي رفرف لحظتها بس كلت لا خلي ادوس بريك، اني ماريد تاخذ علاقتنا هيج اتجاه.

عقاب: لتوثقين زيادة، واحد مثلي خسر كلشي عزيز عليه بالدنيا ميوكف بوجهه شي بعد

كلت بجدية ومشيت لما شفت ملامحها الواضح عليها الاحساس بالذنب، لحكتني والصمت جان سيد الموقف منا لحد ما وصلنا للكافيه.

..

قسورة

كعدنه بالكافيه اني وريمتي، ممصدك اخيرًا وقت خاص بينا وحدنا!

قسورة: جوعانة نطلب اكل؟

ريما: لا اريد شي دافي متت من البرد

قسورة: كهوة جكليتية عادي؟

ريما: ايييي احبهاا

ابتسمتلها ووصيت ع ثنين كهوة جكليتية حاارة.
شفتها تفرك ايديها ببعض حتى تدفيهن، وخشمها احمر من البرد.

قسورة: تتراجفين مثل الطير المهلس، ليش ملابسة زين؟

ريما: لتصيرلي حنون هسة

قسورة: نجبي وهاج
مديتلها جاكيتي الجلد الثمين هههه.

باستغراب حجت.
ريما: هاي صدك طلعت حنون

قسورة: شعبالج لعد، حطيها ع جتافچ وادفي

ريما: وانت؟

قسورة: ما بردان

ريما:  دنيا موت برد شلون ما بردان، هاك عيني هاك ماريدها
وخرتها عن جتفها، لزمتها ورجعتها عليها وحجيت بحزم.

قسورة: ترا لابس زين مو مثلج، خليها يمج ولتعاندين

زمت شفايفها وهزت راسها بـاي، بودي اضمها بكلبي، جنها جكليتة يبو عليك يگلبي..

شوية ووصل الطلب، شربنا الكهوة والاجواء غريبة، احسها ممرتاحه وياي وهالشي احبطني نوعًا ما، عيونها ع باب الدخول مبينة تنتظر اختها، وكلما تلتقي نظراتنا تدير وجهها او تسوي روحها تلعب بتلفونها، حسيت نفسي ممرغوب بيه، وهالشي خلاني اضوج واسكت.

ورة شوية، هي كسرت الصمت لما سألت.
ريما: ممكن اسألك سؤال؟

قسورة: ممكن

ريما: شكد صارلك تعرف عقاب؟  ااا يعني انتوا علاقتكم قوية فدا اسئل من باب الفضول

قسورة: صار 7 سنين ونص تقريبًا

ريما: هاا يعني هواي

قسورة: اي

ريما: شلون صرتوا اصدقاء؟ شلون التقيتوا يعني؟

باوعتلها بنظرة خو ماكو شي وابتسمت، رئسن حجت تبرر.

ريما: اذا متريد لتجاوب، اني بس لان ماكو سوالف دا اسئل هيج

قسورة: اهاا، اي عادي ماكو مشكلة
باوعتلها وابتسمت نص ابتسامة، ممقتنع بحجيها وحسيتها تريد تحجي وياي ومتعرف شلون، فرجعلي الامل.

قسورة: بالتقاطع التقينا جان ازدحام فظيع

ريما: بالشارع؟

قسورة: لعد وين؟ ببيتكم يعني

ريما: سخيف، بس يلا كمل

ضحكت.
قسورة: اني جنت امسح جام السيارات وهو يبيع كلينس

ريما: صدددكككك؟؟؟؟!!!!!

ردة فعلها قوية بس متوقعها هيج فكملت بلا ما اهتم.

قسورة: اي ومنا بدت صداقتنا، جنة نتساعد سوة يوم اني شغلي زين يوم هو، يوم ثنينا ماكو وهيج منا لمن شافنا الحجي، هم جانت ازدحام الشوارع، مسحت جام سيارته وعقاب باعله كلينس، فهو انطانة فلوس هواي رجعناهن ومقبلنا ناخذهن، ههه تدرين بوكتها انخمط گلبي من شفتهن لان بحياتي مشايف هيج فلوس، ووراها اخذنا شغلنا حرس وياه، وقوت علاقتنا بي وصداقتنا كبرت، بعد شعندج استفسار سؤال؟

ريما: ليش جنتوا تشتغلون هالشغل؟ وليش اخذكم الحجي شغلكم؟

قسورة: اااخ سالفة طويلة خليها بعدين ماريد اخرب مزاجي

ريما: لهدرجة محلوة حياتك جانت؟

ابتسمت بحسرة وعيني ع الطاولة، شتكللها هسة!

قسورة: لا يابة شكو قابل، حياتي تخبل اصلا

باوعتلي بشك، قررت ارجع الاسئلة الها.

قسورة: شمخلصة دراسة؟

ريما: اشعة وسونار وانت؟

قسورة: حدي للسادس وبنچرت

ريما: ياا صدك؟

قسورة: شو خلصتيها يا صدك ويااا وجعا لهالحلك، مجذب عليج قابل؟

ريما: لا بس انصدمت..

قسورة: لتنصدمين لعد

ريما: اذا كلامك كله هيج غموض وصدمات فما اكدر اتحكم بنفسي

قسورة: خلينا نحجي عنج لعد؟
بسؤال كلت وهي هزت راسها بابتسامة.

ريما: اي عادي

قسورة: خو ما اكو اسرار وشي؟ حتى من هسة ما اسأل

ريما: لا عيني اني كتاب مفتوح كل سر معندي

ابتسمت وحطيت ايدي ع لحيتي وسألتها السؤال الي مقلق گلبي.

قسورة: هم حبيتي احد بحياتج؟

ببساطة ردت.
ريما: لا وما اعتقد رح احب احد

اجابتها عبالك مي بارد ونزل ع گلبي، بس تكملة كلامها سببلي استفهام ثاني!

قسورة: ليش شناقصج ومتحبين؟!

ريما: مو هيج، انما اني شخصية متطلبة و ما اتوقع الكة شخص ع كد المواصفات الي ببالي

قسورة: فلوس وسيارات مو؟

شمرتني بجنطتها وحجت بسخط.
ريما: نجب اني مو مادية

قسورة: لعد شقصدج بالمواصفات؟شتريدين يعني؟

ريما: الماديات متهمني لان تروح وتجي واختيارك هو الي يدوم، الي احبه اريده مثل بابا، بحبه ووفائه لماما، بحنيته علينا، بحرصه بشغله، بصدقه وية العالم، وامانته وخوفه من الله، فارس احلامي الاول والاخير هو بابا وماعتقد اكو رجال ثاني حـ يجي من بعده

قسورة: حجي حلو بس متعرفين المستقبل شضاملج.
كلامها سببلي صراعات بداخلي، معنى كلامها انو هي حتى محاطة ببالها فكرة تتزوج، واني كل عقلي اريدها تحبني!

ريما: الله كريم لوقتها

هزيت راسي ودخنتلي جكارة والافكار تتضارب بمخي، يمكن لو باقي ع سالفة الماديات احسن، بحجيها هسة احس نفسي ضعت اكثر من قبل.

ريما: كافي تدخن خنكتني

قسورة: خلصت
نفخت اخر نفس منها وطفيتها.

ريما: التدخين مو زين ع الگلب، ليش تدخن؟

قسورة: هم سالفة طويلة هاي

ريما: شطلعت هاي سوالفك كلهن طوال

قسورة: حظي بعد

اجوا عقاب واماني ووجوههم متتفسر، كالعادة يعني اكيد تكافشوا.

عقاب: سلام

قسورة: هلا بالحبيب استريح

دنيتله الكرسي كعد وحط العلاليك بالكاع.

قسورة: ليش هيج ويه صاحبي دكتورة، مشيلته كل الغراض؟؟
كلتها بشقة، وردت بضوجة.

اماني: هو ميقبل اخذ منه شسويله.

عقاب: نزل نراكيل

قسورة: كاعد بكلبي ولله

ابتسملي ودار وجهه.

ريما: نراكيل شنو يمعودين الجكاير تكتل مو ادور نركيلة!!

عقاب: ندري، شنو الجديد؟

ريما: يعني تدري ومستمر تدخن!

هز راسه بهدوء، اندارت ع اختها وحجت متعجبة.
ريما: انتِ مو دكتورة؟ متحاجي متكليلة مو زينه!

اماني: عليمن، مو كلج يدري

عقاب: صح عفية عليج

ضحكت ع ردة فعل ريما الي صفنت تباوعلهم، جبت النراكيل وطلعنا برا بالحديقة ندخن.

قسورة: شصار شو وجهك مكلوب

عقاب: مصار عادي نقاش حاد اني والدكتورة

قسورة: متاكد شو احسك مو ع بعضك؟

عقاب: بعدين اسولفلك، احجيلي شنو الوضع يمك؟

تنهدت واخذت نفس من النركيلة نفخته وكلت بضجر.
قسورة: مدري يخوي، يبدو انها مليوصة

عقاب: شلون؟

حجيتله كلشي صار، وهو بكل برود رد.
عقاب: حلو خوش حجي

قسورة: لا بربك؟

عقاب: شبيك مستمطي، ماديات ميهمها، يهمها يكون خوش ولد واعتقد انت خوش ولد، بعد شكو حتموت؟!

قسورة: صدك اني خوش ولد؟
كل عقلي سألته ممصدك روحي!

عقاب: لا انت واحد ساقط وسرسري وطايح حظك، بعد؟

قسورة: كم مرة كتلك اليوم مو وكت شقاك الجايف؟

عقاب: يخي مو انت مطي، فتيت كلبي ادري كل اليحب ينكلب ابو الرصاصي مثلك؟!!

قسورة: احترم روحك

ضحك بقوة ووخر النركيلة.
عقاب: ذكرتني بالدكتورة، كلما احاجيها وكالت احترم روحك واحجي عدل

قسورة: ايبااه حتى اختها نفس الحجاية تصدك! واني يمكن انعديت

عقاب: اي مو يكولون ليحب شخص يكوم يقتبس من كلامه !

قسورة: ايييي وعلي..!

...

اماني

وصيت ع تحلية لان احس بروحي تعبت ودخت من الفرة، عقاب وقسورة طلعوا ينركلون برا وريما جانت فاتحة فونها تراسل وتطك صور.

اماني: المن دصورين؟

ريما: لمتابعيني حبيبتي

رديت بسخرية.
اماني: ايبااه

عاطت بصوت جفلني
ريما: اوكفي!

اماني: شكو ولج؟

ريما: هالحجاية منين متعلمتها؟

بتعجب: يا حجاية؟ بعدين شجاج عطتي وكعتي كلبي عابت

ريما: كلمة ايبااه، من عقاب متعلمتها مو؟ احنه منكول هيج كلمة

بعدم اهتمام.
اماني: اي وشنو يعني؟

ريما: يعني متأثرة بي!!

بنفس اللهجة الغير مهتمة كلت واني اكل.
اماني: واذا؟ مدا افتهم شنو الغريب عندج؟

ريما: يعني تحبيه؟

غصيت بلكمتي من ربطها العجيب.
اماني: شهالحجي، وشنو الربط بين الموضوعين اساسًا!!

ريما: الي يحب يتأثر بالي يحبه ويكوم يحجي مثله!!

اماني: حجي فارغ

ريما: شو باعيلي بلا

رفعت راسي اباوعلها واحاول اضم ارتباكي عنها وامثل دا اكل وبس.

اماني: بشري لكيتي شي؟

ريما: تحبينه متاكدة وحركاتج هاي اكبر دليل ع حبج اله

اماني: الظاهر اليوم مخج ضرب،  كومي خ نرجع تعبت ومالي خلكج بعد

ريما: عبالج تخلصين مني هيج؟ وراج وراج اظل ونشوف يا دكتورة، هه كال حجي فارغ كال

اخذت العلاليك وغلست عنها، عفتها تحجي وفلتت، بت الاوادم شون تعرفني!!!

طلعت للحديقة، جان عقاب ديدخن وصافن ممنتبه لوجودي، قسورة شافني فضربه ع رجله خفيف واشرله باتجاهي، عاف النركيلة واجاني، اخذ العلاليك مني كلهن ومشى للسيارة بلا ميكول شي، لحكته ضايجة ادري اني شمسويه وكلب وجهه عليه اففف!!

قسورة طب حاسب الرجال واجة ورانه هو وريما، كعدت لورا ضايجة فتحت الشباك واخذت نفس قوي، اليوم جان حلو بس ع اخر شي تعكر مزاجي.

شغل السيارة وساقها والكل جان هادئ، مدري شعجب حتى قسورة الي ميسكت هم ساكت!

عقاب: سدي الجامة باردة

اماني: مختنكة اريد هوا

عقاب: دسديها هسة، هوا بارد نروح نتمرض

سديتها بقهر، يعني هو خايف ع نفسه يتمرض، بس عادي اني اختنك..

وصل ريما لشارع بيتنا، هاي بالكوة لان مقبلت كلتله ارجع وحدي بس هو اصر ينزلها يم بيتنا، ادور وصل قسورة وظلينا بس اني وياه.

عقاب: تعاي لكدام

اماني: ما بيه حيل

عقاب: كتلج تعاي

تأفأفت بوجهه ونزلت، كعدت بالصدر وكتفت ادية بانزعاج.
اماني: مرتاح هيج؟ ايدية عادي احطهن بجيوبي لو هم متقبل؟

نتر بيه.
عقاب: حدج لهنا وبس!

اماني: لا بلا صدك؟ خاف ضوجتك عيني

عقاب: ولا حرف راسي انسطر منج

اماني: ادور!!! يعني اني احجي هواي؟ هاا كول كول شو سكتت

عقاب: يا طلابة الما تفض، وج بوية سكتي دايخ اني!

اماني: ودوختك سببها اني؟ بحيث بس اسكت تصير زين مو؟

عقاب: اي انتِ سببها يلا ارتاحي، واذا تنفستي نفس ادور اشمرج من السيارة! زين لو لا؟
ردت احجي بس خزرته خوفتني فسكتت.

وصلنا للبيت، نزلت وركعت الباب وهو ظل صافن عليه، بس اني غلست ووكفت يم الباب، اجة فتح الباب فطخت ببالي شغلة.

اماني: شوكت ناوي تنطيني مفتاح البيت؟

باوعلي ببرود.
عقاب: ممطولة انتِ اساسًا فماكو داعي

اماني: ش..شنو؟!!
بتعجب حجيت بهدوء، شيقصد بممطولة؟!

طب وطبيت وراه، سديت الباب ولحكته للغرفة، جان ديبدل.

تخصرت ووكفت حجيت بنفاذ صبر.
اماني: هسة تفهمني كلشي من البداية لهنا، انت شنو براسك؟ وشنو قصدك ممطولة هنا؟!!

باوعلي بنص نظرة مستصغرني وابتسم، دار وجهه وحجة ببرود.
عقاب: بعدين افهمج

تقدمت عليه بغضب، عود ليش هيج ماخذني بالعين الصغيرة دوم!
اماني: ماكو بعدين، هسة تحجي يعني هسةة!!!

بتحدي رد.
عقاب: واني كلت بعدين يعني بعدين

اماني: هسةةةةةة!!!

عقاب: صوتج!!
بتنبيه خزرني لان عليت صوتي

اماني: مااااا، احجي!

شو هذا ابتسم واخذ خاولي وراح، ظليت اصيح وراه عقاب عقااب ماكو لابسني.

.....

عقاب

من حسيت روحي جفصت بسالفة شعرها، كلت خ ابتعد عنها لان اني اريد ارجعها لاهلها، مو مال اخليها تتعلق بيه هالفترة.

وهي مدري شبيها تخبلت ونكلبت طفلة تعاند وبس تريد تتعارك وتنكد ع اي حجاية احجيها، ادور اخر شي كالت ' ما ' لو اني كوة لزمت روحي عن الضحك، لا رسميا تخبلت هاي، تخيلتها جاهلة عمرها 6 سنين.

طبيت اسبح وعفتها تصيح وراي، كملت وطلعت لابس تراك والمنشفة ع راسي.

شسورت شعري وهي كاعدة بالصالة، بعد احسن خلي انام براحة قبل لتجي.
تمددت وغمضت عيوني، انرسمت ببالي صورتها وهي تبتسملي بالسيارة، كلبي دك سريع فتحت عيوني وكلت بسخط.

عقاب: استغفر الله شهالبلوة حتى من اريد انام لاحكتني!!

طبت الدكتورة.
اماني: منية هاي؟

عقاب: وانتِ شكو؟

اماني: مثلما انت تدخل بيه اني هم ادخل بيك

عقاب: ايبااه

اماني: اي، يلا سولف منو هاي
كعدت ع طرف الجرباية وحجت بثقة.

عقاب: دكومي منا الله يخليج، كومي

اماني: وتاليها وياك؟!!

عقاب: رجعنا!! يابه رحميني خلي انام، أجلي النكد لباجر

اماني: يااا هاي عليه تكول نكدية؟!!

حطيت المخدة ع راسي وصحت.
عقاب: ع ابويةةةة مو عليج، وخري عني فضيني!!!

اماني: وشكتلك اني، اكلتني حاصل فاصل !

عقاب: اللهم طولج يا روح

خبلتني عزا لعزاها طكت فيوزاتها اليوم، هاي ابد مو الدكتورة يمكن مبدليها بأختها!

صار الوضع هدوء، شلت راسي من بين المخاد شفتها متمددة بمكانها، تنهدت ودرت وجهي عنها وغطيت بالنوم.

....

اماني

مرت 3 ايام واني وعقاب علاقتنا متوترة، هو صح قبل مجانت احسن، بس ع الاقل مجنة نتجاهل بعض، هسة عبالك مسوين مسابقة ملك التجاهل والاستفزاز، محد بينه يتنازل وواحد مثكل وجهه عالثاني.

عقاب كام يتاخر للعصر يلا يجي، وباليل مياكل فما نلتقي عالعشا، واني كاعدة وساكتة بمكاني، مدري شوكت ناوي يرجعني للدوام، يمكن نساني، ادور ما اريد اتنازل واسئله، وظالة هيج اضرب اخماس بأسداس.

واليوم ماما وبابا يمي بالبيت وعقاب بالدوام.

رياض: اكيد مرتاحة باباتي؟

اماني: وداعتك انت وماما مرتاحة وماكو شي من الي ببالكم

سما: زين لشوكت تظلين هيج؟ ليش متطلكين ماماتي ترا انتِ ممجبورة تعيشين وية رجال متريديه!

اماني: منو كلج ماريده ماما؟ اريده واحبه هم

سما: دتسمع بنتك شتكول؟

هز راسه بعدم رضا ورد.
رياض: سمعت، بس اني اعرف بنتي شنو ومستحيل اصدك بحجيها

باوعلي وكمل: بابا احنه عليمن نضحك؟ نعرف تزوجتي تحت التهديد، واذا علمودي فأحجي وية حجي حمزه نرهم سالفة انفصالكم لان خلص اني وياه بحزب واحد ومراح انسحب، وهو مراح يرفض وتكدرين ترجعين لحياتج

اماني: بس اني ما اريد بابا افهمني، اني مرتاحة بحياتي هاي، ولله مدا يأذيني عقاب ولا معيشني بحزن مثل ما متخيلين! بالعكس هو رجال كلش زين

سما: وج امي اخته ماتت ع ايدج وتريدين تقنعيني مدا يأذيج؟!!

اماني: ولله اي، بعد؟

رياض: زين ليش مدا تشتغلين؟

اماني: ماخذة اجازة، بهالكم يوم ارجع

رياض: اماني!!
حجاها بحدة خازرني

اماني: نعم بابا!

رياض: البارحة مريت للمستشفى مالتج بالصدفة، كالوا داومتي يوم وبعد مشافوج، وميدرون بيج وين وحتى خبر ممنطيتهم!!

تنهدت، شون سالفة هاي!
اماني: اي بابا صح لان عقاب كلي بعيدة هاي، رح اسوي نقل لوحدة قريبة هنا

خزرني بشك، درت وجهي عنه وماما هم تباوعلي بسخط، المن ارضي اني مادري..!

رياض: عالعموم، احنه نترخص وانتِ ديري بالج ع نفسج واذا احتاجيتي شي احنه موجودين ترا

حضنته.
اماني: حبيبي بابا

رياض: بنيتي العاقلة، فكري بكلامي زين.

هزيت راسي، وحضنت ماما وبستها، ادور ودعتهم وسديت الباب.

تذكرت من هددني بأختي حتى اتزوجه، وشلون جان يعاملني بالبداية، وشلون بدة يلين وتغير وياي، ومن سئلته شنو نهايتنا كلي اطمئني، زين هسة اني بيمن اصدك و ورة منو امشي؟ ضعت والمتاهة هاي مو ناوية تخلص!

العصر، جنت ضايجة والوضع ملل، كمت لبستلي تراك من ملات عقاب، شلت شعري كباية وحطيت حُمرة وكمت اشتغل بالبيت اكنس وامسح، رابطة الفون عالتلفزيون ومطلعة اغاني كاظم الساهر، ارتب واغني بصوت عالي ومندمجة.

اماني: ودلع عيني دلع، دلع روحي دلع، دلععع!!
اغني واهز بمكاني واهوس بوصلة المسح، جفلني صوت عقاب المتعجب.

عقاب: شدسوين ولج؟!

اماني: انظف مدتشوف؟

عقاب: دتركصين مو تنظفين مثلما داشوف
كالها بشك، تخصرت.

اماني: اي دا اركص، بيها شي لو هم ممنوع عندك؟

تقدم جرني من ايدي.
عقاب: دكتورة ريشج منفوش هالفترة، لتخليني انتفه! صيري حبابه زين لو لا؟

اماني: ماصير، شتسوي؟
كلتها بعناد وعيوني بعيونه، خزرني وجرني عليه.

عقاب: لتخليني اعاملج باسلوب ثاني

اماني: شو بلا عاملني؟!

عقاب بغضب: شيوجعج انتِ شبيج متخبلة متفهميني!!!

نترت بي.
اماني: انتَ خبلتني انتَ!!

عقاب: لا اله الا الله وج يابة تعوذي من الشيطان وكعدي عاقلة

  ...

انتهى!

لا تنسوا التصويت 🖤

#الكاتبة نورمين 🖤