رواية خطأ طبي «عقاب الاماني» الفصل الثالث والعشرون 23 - بقلم نورمـين

#خطأ_طبي «عقاب الاماني»

بقلــم : نورمين 🦋🖤

...

عقاب

دا البس بالغرفة وسمعت صوت قوي، رجعت للصالة شفت الدكتورة واكعة ومغمى عليها.

ركضتلها بقلق و شلتها حطيتها عالقنفة.

ادري بيها دتعاند حتى ويه روحها الغبية!!

عقاب: اوووف منج دكتوووورة اووووف!!!

شممتها عطر صحصحت، كلبي مقبوض عليها بس ما بيدي شي..

كوة مصبر نفسي بحجة هسة تتعذب ولا بعدين ..

فتحت عيونها ورفرفت بجفونها بضعف.. رئسن حجيت بانفعال.

عقاب: انتِ ليش هيج عنيدة وراسج يابس؟!

اماني: مالك علاقة بيه انت

دفعتني دتكوم كمشتها ورجعتها مثل مجانت وحجيت بحدة.

عقاب: شكو كلما احاجيج وكلتي مالك علاقة؟ شنو هالموديل الجديد هذا بلا؟

اماني: ميخصك ولتدخل بيه، وهسة اذا ممكن تعوفني اريد اكل جوعانة

عقاب: جاهلة ولله

اماني: جاهلة طفلة مراهقة ميخصك، وخر يلا

حجت بازدراء، عكدت حواجبي وبلحظة، صارت جوايه واني فوكها.

نظراتنا التقت، اني الجادة والحدية وهي المصدومة الممزوجة باللارغبة والحزن.

حركت خصلة من شعرها وحطيتها ورة اذنها، واني اباوع باتجاه حركاتي بأبتسامة مستفزة.

اماني: شيل ايدك عني!!!

عقاب: اششش سمعيني

اماني: ماريد اسمعك ولا اريد منك شي بعد..

عقاب: ميخالف تحملي مظل شي وتخلصين مني ..

اماني: شكد سهلة عليك السالفة ولا متأثر حتى .. لهالدرجة مالي قيمة عندك؟

حجت بحسرة، ابتسامتي تلاشت وانفاسي تصاعدت، والصراع العقلي القلبي عندي بلش يطغى.

عقاب: شتريدين مني يعني، شسوي ابجي لو الطم مثلًا؟

حطت ايدها ع گلبي وبأصبعها نقرت عليه وكالت وهي تباوع بعيوني.

اماني: اريد هذا

تصنمت ع وضعي لثواني ممستوعب جرأتها بطلب گلبي!!
وهالشي بحد ذاته سببلي خفقان قوي وتسارع بالنبضات.

استجمعت نفسي ورديت بحدية.

عقاب: ميت ميفيدج ..

اماني: ارجعله الحياة ..

عقاب: متكدرين..

اماني: نحاول، منخسر شي؟

عقاب: غيرج جان اشطر ..

اماني: ميهمني القبلي، المهم اني هسة وشنو اكدر اسوي ..

عقاب: تتعبين هواي هوااااي ..

اماني: قابلة..

عقاب: بس اني ما اقبل ..

اماني: القاضي راضي شعليك ولله حلوة هاي!!

عقاب: يكفي العشتي لسة فشيلي الفكرة من بالج ..
كلتها ووخرت عنها كعدت ع صفحة، لمت رجليها وتقربت حطت ايدها ع ايدي وكالت.

اماني: هذا اغبى شي راح اسوي بحياتي، ولو الاغبى منه هو شعوري الي مادري شلون وشوكت انخلق وصار عبارة عن مشاعر تنبض بكلبي بأسمك وحدك..

باوعتلها بصدمة.. عيوني اخذت نصيبها من الحزن على كلامها لان ببساطة اني ما اكدر ابادلها شعورها!

مو لان ما احبها..

بس لان هيج افضل الها، اني شخص حياتي مو الي وشغلي بحزب عنده نفوذ بالدولة اله تبعات، اضافة لكوني واجهة بأغلب امور الحجي السياسية، شي يخليني بخطر مستمر واغلب وقتي مشغول وحياتي ما مستقرة..

ليش اظلمها وياي اكثر؟!

يكفي الراح والعذاب العيّشتها بي..

اماني: عقاب اني احبك ..

صافن بيها، حروفي تبعثرت وكلبي يدك بقوة وينازع بين ضلوعي عبالك يريد يطلع من مكانه..

حاير بين عقلي وكلبي واحس خلص ما اكدر استمر ع هالحال بعد!!

عقاب: شـ حبيتي بيه متكليلي؟! شو لا حجايه مثل الاوادم لا مواقف بيها حظ، ذكرى وحدة حلوة ماكو بيننا! كله دموع وقهر بقهر!

اماني: اعرف هالحجي كلش زين، وبرغم كلشي كلته وكلشي صار..

سكتت شوية، اخذت نفس ورجعت كملت وهي تلعب باصابعها بتوتر وعيونها عليهن.

اماني: حبيت بيك كلشي، عيوبك قبل ميزاتك، غضبك قبل هدوءك، برودك قبل حنيتك، قسوتك قبل عواطفك، صمتك قبل كلامك، حدتك قبل لينك، سوادويتك قبل توهجك، من كل گلبي اكولك اني احبك عقاب ..

عقاب: مقدر مشاعرج دكتورة .. بس اني ما افيدچ

اماني: ليش ها؟ علمود اختك بيري مو؟

دنكت راسي وفركت عيوني بايديه بقوة، مو بيري السبب.. بس ما عندي عذر احسن منها..

عقاب: اي صح بس هم اكو اسباب ثانية

اماني: بس انت تعرف اصل الموضوع!

عقاب: حتى لو ..

ردت بأنفعال وهي مكمشة بملابسي تجرهن وتحجي وتبجي.

اماني: لييييش هيج تسوي فهمنييي!!! تعرف شكد تعذبت وشلون لسة متعذبة وبرغم كل هذا بعدك مُصر تعذبني!!! شنو من گلب گلبك بس فهمنييي...

كمشتها من ذراعها وحجيت بصوت متحشرج، لان الغصة اكلت بلعومي، مثل نار وكبت ع مكان متروس نفط.

عقاب: هذا اني.. هذا الي كلتي حبيتيه يا دكتورة ..

اماني: لاا انت مو هيج، دتمثل اني اعرفك كلش زين، تسوي نفسك ممهتم ولابس قناع القسوة، بس انت بداخلك طفل صغير.. واكو حنية وطيبة تكفي الدنيا كلها بس انت ضامها!

عقاب: هههه عليج الله؟! ماكو هيج حجي، طلعي هالاعذار من راسج هذا اني.. وهذا طبعي ..

هزت راسها ودموعها تنزل ع خدودها بوتيرة بطيئة.

اماني: حتى عيونك دتكول شي غير الي دتكوله انت!

عقاب: مـو مهم

اماني: هيج رح تتعب صدكني..

عقاب: متعود وداعتج زلاطة عندي..

اماني: اسمحلي اكون راحتك!

عقاب: ع حساب نفسج؟ مستحيل ما ارضاها.. شذنبج انتِ؟!

اماني: بالحُب ماكو ذنب، اني حسوي هالشي من كل كلبي واني الممنونة لان اني اريد اساعدك..

رفعت راسي اخذت نفس، قويت نفسي وحاولت الزم روحي شوية.

عقاب: دكتورة اني وانتِ بيننا اتفاق، ياريت لتتأملين مني شي لان اني ما اكدر اكون مثل متريدين، فرجاءًا لتصعبيها عليه وعليج، وخلي هالكم يوم ينتهن ع خير وكلمن يروح بحال سبيله..

اماني: بس انت ما انطيتني فرصة اعبر عن رأيي، اخذت القرار وجزمت الموضوع من يمك!

عقاب: لان هذا هو الصح وهذا الي لازم يصير

اماني: منو كال هذا الصح والي لازم يصير؟ وشنو هو الصح اصلا!!

عقاب: ابتعادنا عن بعض

اماني: حرام عليك هيج
هزت راسها وحجت بحسرة، دموعها زرفت گلبي والي قاهرني انو ما بيدي شي اسوي..

كل حركة تطلع مني تفسرها هي بغير تفسيرات وهذا الي وصلنا لهنا..!

يمكن من الاول مجان لازم اتقربلها حتى لو بلحظة عصبية!

وخز مؤلم استوطن گلبي جنه ديكولي اتحرك سوي شي لترضخ لعقلك..!

عقاب: الحرام انو اظلمج ويايه .. صدكيني هذا الاحسن النا كلنا ومتاكد حـ يجي اليوم الي تشكريني بي ع هاللحظة.

اماني: ياريت ما عرفتك ولا شفتك ..

كامت للغرفة وحجت بقهر وهي تبجي، دنكت راسي وعصرت عيوني بأصابعي بقلة حيلة.

عقاب: ياريت دكتورة ياريت..

....

اماني

الصداع والدوخة الي جنت حاسة بيهم، بالاضافة لقُربي من عقاب شغلات ساعدت بأن افقد عقلي لفترة واصارحه بحقيقة مشاعري..

ماعرف اذا جان السويته غلط، بس هسة احس نفسي مرتاحة اكثر من قبل.

صح رفضني، بس بطريقة حسسني بيها انو اني استاهل شخص احسن منه، وهاي نقطة زيدت رصيده بگلبي للضعف..

رغم جوابه، اني راضية عن نفسي تمامًا، لان سويت لعليه وبادرت ..

وهو بقت يمه بعد، ع الاقل اكدر اكول ممتندمة، لان لو ممعترفتله جان ظليت الوم بروحي كل العمر.

لان اني من نوع اتندم هواي ع الشغلات الي ممسويتها، واظل اكل بروحي واكول شيصير لو مسوية فلان شغلة، شيصير لو هيج حاجية..الخ

وهسة، كاعدة بالغرفة وصافنة ع اللامكان، وعقلي يودي ويجيب بالافكار ويحلل بكلام عقاب.

هالرجال عنده هواي علامات استفهام بحياته، واني لازم اعرفهن شنو حتى اكدر افهم رد فعله عدل.

ورة وقت طويل..

اجة عقاب.

عقاب: تعاي تعشي

اماني: جاية

راح واني اباوع لجسمه شون اختفى ورة الحايط، ذبيت حسرة وكمت من لا جارة.

مو مال اظل بلا اكل اروح اتخربط وهم ماريده يدنالي لان افقد سيطرتي ع نفسي.

كعدنا نتعشا، البيت هادئ والجو كذلك.

صح مريم جانت تبجي وممفتهمين منها شي بس تحس البيت جان بي روح..

هسة ماكو ميت، لو تذبلك ابرة بالكاع تسمع صداها.

بدون ما اباوع لعقاب، ظليت مدنكة عالماعون كدامي وصافنة بي.

اكلتلي شوية وكمت، ماكو نفس ولا اكو احساس بالجوع اصلا.

عقاب: وين رايحة؟ كملي اكلج

اماني: شبعت شكرا

عقاب: هو انتِ شأكلتي حتى تشبعين؟ يابة دكعدي

غلست عنه ورحت تمددت بمكاني عالكاع بالغرفة.

ورة دقايق اجة، حسيته واكف فوك راسي بس غلست سويت روحي نايمة.

عقاب: دكتورة كومي من الكاع

صمت..

عقاب: ادري بيج منايمة، كومي

رديت بملل.
اماني: ماريد

عقاب: دكومي، الكاع تأذيج

بسخرية كلت.
اماني: علساس جديدة عليه يعني؟ صار شكد تنيمني هيج هستوك يلا عرفت الكاع تأذي؟! هه ولله يا الله ..

ظل ساكت والظاهر صبت الوتر الحساس.

اماني: خليني نايمة لتزعجني بعد

عقاب: مو بكيفج هي

اماني: بكيفمن لعد؟

عقاب: بكيفي اني!

اماني: باقية بمكاني واريد اشوف شلون بكيفك

حجيتها بتحديد، شو هذا كوم وشيلني من الكاع، ظليت ادفع بي.

اماني: نزلنييييي شبيككك انتتتت!!

عقاب: حركة وحدة بعد توكعين و تتكسرين

اماني: احسن مما اظل مكابلتك

عقاب: متاكدة؟!

كالها وفتح ايديه، ظليت مجلبة بركبته ردت اوكع ع شوية.

اماني: انتتتت مخبللللل مو صاحييي ولله!!

عقاب: توج تدرين لعد!!

حطني عالجرباية، فتحت ايدية الملفوفة ع رگبته بتوتر..
وخر عني وراح من الجهة الثانية تمدد.

ظليت صافنة هاي شكو؟ اول تالي؟!!

عقاب: لتظلين تتصفنين، نامي

اماني: دكتاتور!
كلتها بغيض وهو جاوب بسرعة.

عقاب: ادري

درت وجهي دا اكوم، ممرتاحة هيج.

وهم ما كلي ليش هيج سوة، بس نامي! عبالك اشتغل عنده.

عقاب: هووب هووب وين؟

ظليت مغلسة ورجعت لمكاني بلا اي كلام.

مو عديمة كرامة لهالدرجة اني، ترفضني وانام يمك!

عقاب: اووف منج ومن راسج العنيد!

حجاها بضوجة، جنت منطيته ظهري ونايمة بالكاع.

حجيت مقلدة نبرة صوته.

اماني: اووف منك ومن اوامرك المتخلص!

محجة شي واني هم ظليت مثلما اني لحدما سيطر عليه النعاس ورحت بعالم النوم.

للصبح، كعدت لكيته ماكو رحت غسلت لكيته ديخابر بالصالة ويحجي بهمس، حتى ما اسمعه يمكن!

سويت جاي وطلعت جبن وعسل، خلي اكل محد يفيدني، عليمن معاقبة روحي علموده.

كمل واجة كعد كبالي وكال.

عقاب: عاشت ايدج

ببرود رديت.

اماني: ع شنو؟! هو جبن طلعته من الثلاجة حطيته هنا

باوعلي مستغرب.

عقاب: حتى لو ..

ابتسمت بسخرية ورجعت اكل عسل، عباله هيج يجبر بخاطري.

ميدري هالاسلوب يقهرني اكثر مما يريحني.

عقاب: عندج دوام مو؟

اماني: اي

عقاب: يلا اني كايم ابدل لعد، لتتأخرين حتى اوصلج واروح، وراي شغل مهم

اماني: الله ليستر

عقاب: عفوًا؟

شربت جايي وكلت.

اماني: مو وياك داحجي ويه روحي

خزرني وراح، عباله يخوف، لا عيني زمان اول تحول واماني متهتز بعد.

مو بعد رفضك الها!

رحت اخذت ملابسي من يمه، ضربته بكتفه عمدًا وعبرت.

مدري شبيه تخبلت عليه وصرت اتصرف مثل الجهال.

بدلت ولميت شعري ظفيرة للجانب، لبست جاكيتي ودنطلع شو هذا طفر يكول.

عقاب: فتحيها احلى

اماني: عاجبتني هيج

عقاب: بس اني معاجبتني

اماني: ولتعجبك، محد طلب رايك اساسًا

بتحذير كال
عقاب: دكتورة!!

رديت ببرود.
اماني: خيييرر؟

عقاب: شعرج فتحيه هاي اخر مرة احجي

اماني: وشدعوة عليك هيج مهتم بشعري وشلون اسرحه؟!

عقاب: لان أبيج يحترك من تشيليه!

نترت بغضب.
اماني: اعرف نفسك شدتحجييي!! استحي عااااد!

عقاب: فتحيه

اماني: ما

عقاب: مو ترا افتحه غصبن عنج!

اماني: ارجع اشيله بس تروح..

عقاب: حتى راسج اكصه!

اماني: هه خوفتني  ..

عقاب: ولج باباتي كافي عناد بطلي!

اماني: بشرط

بنفاذ صبر كال.
عقاب: شنو؟

اماني: تكولي ليش هيج مهتم بشعري

باوعلي بنظرة لواتة وابتسم.

اماني: شبيك شكو؟

ادنة عليه حصرني يم الباب عالحايط وحط ايده يمه.

عقاب: رگبتج من ضمن المقدسات الي لازم تنستر بعناية.. والشامة الي بيها المفروض تنضم لان اذا صار وشافها احد، تنهتك اسوار گلبه من كد الفتنة والجمال الشايلته..

بلعت ريكي بتوتر واني اباوعله مستغربة كلامه ونبرة صوته، تعالوا قنعوني هذا نفسه عقاب مال البارحة بالليل؟!

عقاب: هسة عرفتي ليش؟

اماني: كلام سخيف، شنو هالتفكير المريض هذا

عقاب: هووب احجي عدل

اماني: شحاجية قابل؟

عقاب: متعرفين علساس؟

اماني: عوفك من هالحجي و يلا نروح

وخر ايده وسمحلي اتحرك، مشيت كم خطوة بعدني ما اتعديته كمش ذراعي وكال.

عقاب: شعرج دكتورة!

باوعتله بعدم تصديق، شكد مُصر!!

فتحته وحجيت.
اماني: راضي سيادة الدكتاتور؟

عقاب: كلش حلو هيج

عوجت حلكي بضوجة ومشيت، صعدنا السيارة وكلمن لشغله.

وصلني وراح، طبيت ملوزة والوجه مكلوب كلاب، بدلت ونزلت لغرفة العمليات عندي كم عملية مهمة اليوم.

صادفتني دكتورة زينب.

زينب: صاير وياج شي؟ شو عبالك ضايجة

اماني: لا حبيبتي بس منايمة زين

زينب: فتحي عيونج زين لعد عندج عمليات مهمة

اماني: اكيد اكيد لتخافين

زينب: من رخصتج ارجع لشغلي

اماني: ع راحتج دكتورة

راحت واني بلشت بالعمليات، ذبيت كل جهدي وطاقتي عليهن بحيث كلهن نجحن، رغم الاخيرة جانت عملية صعبة بس الحمدلله عدت وطلعت منها منتصرة.

الظهر كاعدة بالحديقة منتظرة عقاب واجة دكتور ساري.

كعد يمي، استغربت لان بالعادة يسألني تسمحيلي اكعد يمج لو لا!

ساري: دكتورة ممكن 5 دقايق من وقتج؟

اماني: تفضل اسمعك

ساري: بصراحة دكتورة اني معجب بيج، من اول يوم اجيتي بي لهنا، وحبيت تعاملج وي الكادر هنا وشخصيتج الرزنة، فأذا تقبلين اني اريد اطلب ايدج ع سنة الله ورسوله ..

انصدمت وما عرفت شحجي، ممتوقعة منه هيج شي بهالسرعة!!

ساري: ها شكلتي؟

فرقت شفايفي دا احجي وما احس الا عقاب مزروع كدامي، وعيونه بكصته.

اماني: عقاب!

ساري: منو انت؟ تعرفيه دكتورة؟

عقاب: اني زوجها يا محترم!

وكف ساري ع حيله وهو مندهش.

ساري: زوجها؟ دكتورة هاي صدك؟!!

اندار عليه وسألني ممصدك، اي اني مكلت لاحد متزوجة وهم ما لابسة حلقة اعتيادي عبالها عزباء.

عقاب كمشه من ياخته ودار وجهه عليه.

عقاب: عندك حجي تحجي وياي اني معليك بيها!! كتلك زوجها شبيك ممصدك؟؟

دفع ايد عقاب وحجة بحدة.

ساري: دكتورة مو وياج احجي؟؟ كولي هذا زوجج؟

هزيت راسي بهدوء، وفجأة عقاب ضربه بوكس وكعه بالكاع.

شهكت بصدمة ووكفت كدامه لزمت ايديه.

اماني: لخاطري عقاب لا..

باوعلي وجان يغلي من الغضب، حاولت اهدأه كد ما اكدر وفعلا حسيته لعن الشيطان واستجمع نفسه.

عقاب: هاي حتى مرة لخ من اكلك حجيك وياي، تحاجيني الي وتعوف النسوان يا رجال!

كالها باستهزاء ممزوج بحديته المعهودة، وكمش ايدي وجرني وراه.

من صدمتي بتصرفه ظليت اباوع عليه ممصدكة شسوة وهو يجرني وراه بسرعة.

صعدنه بالسيارة وجان ينهد عليه.

عقاب: شعندج ويه هذا الكلب؟؟؟؟

اماني: ما عندي شي، مجرد اجة طلب ايدي عباله ممتزوجة

عقاب: وانتِ ليش مكايلتله متزوجة يا خاتون؟

ضحكت بصدمة، كل عقله يعني!!

اماني: اولًا ممجبورة احجي لياهو الجان خصوصياتي، ثانيًا والاهم ايدي ما بيها حلقة او شي يدل ع انو اني متزوجة، فلا تلوم العالم لان حقها!

عقاب: اي حقهم ولله صحيح اني شون فاتتني هالشغلة شكرًا لان كلتيها

جان يحجي باستهزاء، نترت بي.

اماني: ديربالك تلعب دور الزوج وياي، البيناتنا اتفاق خاف ناسي خلي اذكرك!

عقاب: ما ناسي حتى تذكريني، بس مدامج ع ذمتي تحترميني وتحترمين كونج مرتي وراجعة الي!

اماني: ما اعتقد سويت شي غلط او يسيئ الك، هو اجة صارحني بمشاعره بكل ادب، وجنت رح ارفضه بأدب، ماله داعي الاكشن الي سويته كله!

عقاب: برأيي اله داعي، ومنا ورايح متحجين وياه، يجي منا تروحين مناك وديربالج اشوفج كاعدة يمه مثل هسة!!

اماني: شتسوي يعني؟

عقاب: جربيني وشوفي شسوي

اماني: تغار؟
بتحدي اردفت، سكت شوية ورد.

عقاب: اكيد، غير مرتي شنو ناقص غيرة اشوف مرتي تنخطب كبالي واسكت

اماني: حلو طلعت تغار عليه
حجيت بسخرية واني اضحك، ماعرف ليش الموضوع ديضحكني!

عقاب: الغيرة الي دا احجي عنها مو نفس الي ببالج، اكو غيرة ع العرض والشرف وهاي هي الي اقصدها فلا تروحين زايد بتفكيرج

اماني: جذاب..
همست لنفسي مبتسمة، عباله اصدك هالحجي المصفط.

كال غيرة ع العرض كال ههههه..

بالطريق، تذكرت شون ضرب ساري وجان عصبي حيل، ابتسمت ..

يغار عليه بس ينكر!

ادور اجة لعقلي سؤال، شنزله اليوم من السيارة؟ وليش ما اتصل عليه حتى اطلعله مثل كل مرة؟!

انداريت عليه.

اماني: عقاب

عقاب: تفضلي

اماني: شعجب نزلت واجيتني اليوم؟

باوعلي بحدة ورجع عينه عالطريق.

عقاب: لازم جان عاجبج توافقين ع ساري وخربت عليج

اماني: متضحك

عقاب: ليش غالقة تلفونج؟

اماني: يمته غالقته؟ لا مفتوح اصلا

عقاب: دشوفي، دكيت شكد يطلعلي مغلق فاضطريت انزل وهمزين نزلت ولله

طلعت تلفوني لكيته مطفي شحن، شعجب مو جان بي بالاربعين!

اماني: مخلص شحن

عقاب: هم عرفت اني

رجعت التلفون وحطيت الجنطة بالكشن الورا.

شفت علاليك، سألت.

اماني: شنو هاي العلاليك؟

عقاب: غدة ومسواك للبيت

اماني: اهاا ..

وصلنا للبيت، نزلت ودا اريد اخذ من العلاليك اطببهن شو هذا ميقبل.

عقاب: اني اجيبهن روحي طبي انتِ

اماني: خلي اساعدك مو ثكيلات ترا

عقاب: ما يحتاج، يلا تحركي

دفعني ع كيف، مشيت وطبيت لجوة، ذبيت جنطتي وكمت اخذ العلاليك اصفي الغراض واحط بالثلاجة.

كملت ترتيب الغراض، حطيت الغدة الجاهز الجايبه وكعدنا نتغدة.

الوضع جان هادئ، تعبت الصراحة من المناكر وراسي دايخ.

ورة شوية، جنت دا الم بالمواعين وارتب المطبخ.

اجة عقاب طلع دلة واخذ علبة البُـن.

اماني: جيب اني اسويها

عقاب: متعرفين شلون احبها

اماني: عادي علمني..

باوعلي وسكت..

ظليت صافنة، حجايتي بيها شي؟ ليش هيج جر بوش!

جنت واكفة اباوعله وهو يشتغل، حط كوب واحد اله.

اماني: اني هم اريد ترا مو بس الك

عقاب: صار

حط كوب ثاني، ابتسمت بعرض هههه مسيطررة عليه!

ديلا هي مال كلاوات هو اني اكبر مسطرة بالكوكب كله..

عقاب: ممكن توخرين؟

اماني: بشنو ضارتك شو واكفة ع صفحة لا يمك ولا گرباك!

عقاب: ما احب واحد يوكف فوك راسي ويباوعلي

اماني: خوش غمضت

سديت عيوني، ثواني وحسيت ع ايديه حطت ع اكتافي.

فتحت عيوني وكلت.
اماني: ها ها شكو؟

عقاب: برا المطبخ دكتورة!

دفعني رحت كعدت بالصالة.

هسه كهوة وجايتني حاضرة شبيه لازكة اباوعله مادري.

ولو جنت اريد اتعلم لطريقته مال الكهوة هاي بس يلا ما مقسومة، حالها حال هواي شغلات..

شوية واجة شايلهن بصينية، حطها اخذت كوبي وتذوقت بعدما نفخت عليه.

اماني: اممممم احترك لساني

عقاب: هو هيج لعد غير تطيها مجال تدفى شوية!

اماني: مو نفخت عليها!

عقاب: فلسين نفختج..

اماني: لا هاي انت نفسك دنية وراها، هاك ماريد بطلت اخذها الك

اطيتهيا، ضحك وشرب من كوبه، استغربت شو هذا ما انصمط لسانه مثلي!!

اماني: اطيني كوبك بلا ..

عقاب: شنو؟

اماني: كوبك مال الكهوة اطينياه ..

عقاب: شسوين بي؟

اماني: اسبح بي

خزرني بنظرة ملل.

اماني: شسوي بي برأيك يعني؟ اكيد اشربه!

عقاب: خو شربي من كوبج؟

اماني: لا اريد كوبك

عقاب: امري لالله، هاج يابه

اخذته منك مبتسمة.
اماني: شكرا شكرا

شربت منه كمع احتركت حرك لان عبالي دافي، شفته يشرب ومسيطر معبالي حار.

اماني: اخخخخخخخ امممم يمة حلكي احترككك

عقاب: يابة مو كتلج ع كيفج شجاج ما شاايفة؟!!

اماني: لعد انت ليش ما احترك لسانك؟ ليش بس اني

سكت شوية وضحك، جنه افتهم ليش بادلت وياه بالاكواب.

عقاب: باباتي متعود اني لا تجيبين روحج عليه انتِ رقيقة متتحملين

جنت اريد اهجم عليه، بس اخر حجايتين شفعن اله.

اني رقيقة؟ اي اي ادري بروحي هيج.

بس هو عنده سحر خاص بي.

بحيث حتى الكلام العادي يطلع من لسانة مثل البشارة.

اماني: هاا مادري..

عقاب: عوفي يبرد وشربي

هزيت راسي بالموافقة، ابتسملي بادلته بخفة وكلبي لوحده مسوي زفة بنبضاته.

ورة شوية، صدك برد يلا كدرت اشربه ولو لساني اذاني بس ميخالف.

عقاب جان مكمل، سمعنا صوت قوي اني ما اهتميت بس عقاب راح يشوف.

كمت اريد اروح للغرفة وعقاب جرني نيمني عالكاع وحضنني اله بقوة..

وراها ما حسيت شون الرصاص كام يمطر علينا من كل جهة حتى الشباك انكسر!!

……

انتهى!

لا تنسوا التصويت 🖤🦋

#الكاتبة نورمين