خطأ طبي «عقاب الاماني» الفصل الثالث وستون 63 - بقلم نورمين

#خطأ_طبي «عقاب الاماني»

بقلــم : نورمين 🖤🦋

...

اماني

كعدنا، الفرحة مسيطرة عليه بس بعدني قلقة ع ريان.

اماني: عقاب.. و ريان؟!

عقاب: بأمان لتخافين

نقل نظراته بيني وبين ماما وريما وكال بنبرة مطمئنة.

عقاب: لتقلقون على ريان، هو بمستشفى زينة ووضعه كلش زين بس يتحسن اخليهم يجيبوه عسى ما بطيارة خاصة

سما: شكرًا متقصر ..

اومئ مبتسم، باوعتله بأمتنان ماعرف شلون اشكره ولا شلون اعبر عن شكري اله!

سما: اني اريد اعتذر منكم.. اسفة على الصار ذاك اليوم، انتوا صاحبين موقف واني بعمري مراح انسى معروفكم هذا وية عائلتي

قسورة: عادي مصار شي، انتِ هم حقج تخافين ع بناتج وبذيج الظروف محد يكدر يلومج اصلاً

عقاب: اني اريد منج شي، مقابل اوافق ع اعتذارج

سما: روحي انطيها الك بس كول

عقاب: لا اسم الله شسوي بيها، اني رايد ارجع اماني واريد اخذ موافقتج حتى ابلش اتصرف

صدمني بكلامه، جان كلش هادئ ويحجي بسلاسة غافل عن العواصف الرعدية الي دتعصف بكلبي.

سما: ما الكة احسن منك لبنتي، ومستحيل أئمنها عد شخص ثاني غيرك لان انت اثبتتلي انك كد حمايتها ومحد يكدر يأذيها مدامك بظهرها..

عقاب: ولله يا حضرة الدكتورة، هذا الي ردته يوصللكم كلكم من اول مرة صار بيننا الخلاف، بس ..

سما: اسفة مرة ثانية.. تأخرت يلا عرفت هالشي بس اني اوعدك، بس يرجع رياض رح اسوي كلشي ممكن حتى اقنعه وتتزوجون انت واماني

قسورة نط من مكانه معترض.

قسورة: لا بلااا بس هو، لعدد وانييي؟!!

سما: انت شبيك؟

ضرب ع كصته، باوع لريما لكاها خربانة ضحك عليه.

قسورة: دكتورة من الاخير وبكل وضوح، اني هم رايد بنتج الثانية، واحبها واتمنى مترفضين

سكتت مصدومة.. باوعت على ريما الي جانت مبتسمة وفرحانة وسألتها.

سما: انتِ شتكولين؟

ريما: شكول، اكيد احبه مدتشوفين عيوني ماما!!!

حجت بأنفعال، خزرتها ماما لان الولد كلهم كاعدين وهاي لا مستحة ولا عيب، جنها وحدة مشايفة.

رجعت لقسورة وكلتله.

سما: انتوا هم نفس الشي، من يجي رياض افتح وياه الموضوعين سوا

قسورة عفص وجهه، وبقية الولد حالتهم مو احسن منه.

عكدت حواجبي باستغراب، ليش هيج رد فعلهم؟!

عقاب تنهد وحجة بمنتهى الجدية.

عقاب: الحقيقة وبكل صراحة، الدكتور رياض بعد ميجي

سما: عززا ليييش؟؟؟

عقاب: رح تتقدم اوراقه للمحكمة باجر وينسجن بتهمة الفساد الاداري وسوء استخدام السلطة بالاضافة لشهادات اشخاص وملفات ملموسة تدينه بشكل كامل بما يخص تجارة الاعضاء والادوية منتهية الصلاحية وغيرها

شهكت بصدمة.. هو صح عقابه اليستحقه بس مهما حاولت اكرهه، يبقى ابوية وبيوم من الايام جان بطلي وقدوتي!

سما: شلوون!!! هو مو عنده حصانة قانونية شلون انشالت شلون سجنوه ولييش!؟؟

عقاب: الليش جاوبتج عليها، اما شلون سجنوه وعنده حصانة فالحصانة انرفعت عنه بسبب كثرة اللغط الي صار ع اسمه، بالتالي اضطروا يرفعون الحصّانة عنه ويسجنوه

ماما خلت ايدها ع حلكها بصدمة ممزوجة بالحزن وكامت تبجي.

ريما حضنتها وظلت تطبطب عليها وتكوللها..

ريما: يعني يا ماما شكد حجينا بهالموضوع وبعدج لسة تبجين، اي شخص ثاني يسوي مثلما سوة هم رح يلكى نفس المصير، انتِ مو دائما جنتِ تكوليلنا شوكت نصير بلد بي القانون اساس الحياة؟ هاج شوفي القانون تطبق حتى ع بابا الي هو سياسي جبير!!

سما: يبقى زوجي وعشرة عمر، شلون تريدوني ما اضوج ولكم اني ورياض بنينا نفسنا سوة، بس مادري ليش اختار هيج طريق .. مجان هيج رياض كلبه طيب!

ريما: بس اختاره وقسى كلبه، واني كتلج ماما كلشي ولا المظلوم، وهو ياما وياما ظلم عوائل وشباب وكتل ناس هم بخطفه الهم وبيع اعضائهم وهم من يبيعلهم ادوية منتهية الصلاحية، ماما الله فوك ويباوع وميقبل بالظلم ابد، عرشه يهتز اذا نزلت دمعة من شخص مظلوم، فما بالج بكل هالعدد الهائل الي بابا ظلمه؟!!

تأثرت حيل بكلام ريما ودموع امي، ماعرف شلون نزلت دموعي واني اباوعلهن.

ماما كامت لان تعبت نفسيتها ودموعها مدتوكف، ريما راحت وراها واني ظليت كاعدة بمكاني ودمعتي ما نشفت..

عقاب: ع شنو هالدموع بعد؟

اماني: يبقى ابوية عقاب..

عقاب: اعرف ولله، بس هو غلط ولازم يتحمل نتيجة غلطه!

اماني: اعرف.. و اني مدا ابجي عليه اساسًا

عقاب: ع شنو دتبجين لعد؟

اماني: ابجي على نفسي.. و على ماما وريما وريان.. عالحالة الوصلنا الها.. ودا ابجي من صدمتي بي، عمري ما تخيلت يكون ابوية هيج مجرم ويستهتر بارواح العالم، دا ابجي من خيبتي بي!

عقاب: دمسحي دموعج وكافي نكد، مترجعين ولا تغيرين شي بدموعج فـ وفريها

مسحت دموعي وحاولت اتدارك نفسي، رجعت ريما.

اماني: ها شو رجعتي؟

ريما: تريد تبقى وحدها فخليتها ع راحتها

اماني: هسة هم تكعد تبجي، شو خلي اكوم اشوفها واحجي وياها اني

كمت وهي جرتني كعدتني مرة لخ.

اماني: هاي شبيج!!

ريما: كعدي خلي نحجي، عدنه موضوع مهم

اماني: موضوع ايش هذا؟

ضرغام تدخل وكال بمرح..

ضرغام: كم موضوع عدنه يا عيني، سالفة امير لو متحبين تعرفيها؟

رد عليه شاهين ساخر.
شاهين: نست الاول والتالي من اجة عقاب، انت هم اعذرها

عقاب: انجب لكك!

سكتوا بس كوة لازمين ضحكتهم.

عقاب: اني موضوعي وياج طويل ميخلص وبعدين نحجي بي، بس هسة انتِ لازم تعرفين شصار وشلون وصلنا لهنا

بغرور اردفت.
ريما: اني رح ابدي بأعتبار الفضل اولا واخيرا الي.

ضحك وكللها.
عقاب: اي طبعًا .. تفضلي

ريما: باعي اماني البارحة ورا مراحوا عقاب وقسورة تتذكرين شكد جنت ضايجة من تصرفج وشلون طردتيهم؟!

خشيت بهدومي من الفشلة، ادور عقاب يباوعلي بنظرة معاتبة وترني كلش.

اماني: اي.

ريما: اي هاي وراها، خليتكم انتِ وماما تلتهون ورحت دورت بمكتب بابا، ميخلى من التلفونات وصدك لكيت صرصور مشمور هناك ومطفي، حطيته عالشحن شوية ادور دكيت رقم قسورة، وهيج حجيت لقسورة وعقاب كلشي صار ويانه وهم تكفلوا بالباقي، ومثل مدتشوفين خلصنا من الحقير امير بفضلهم

قسورة: شدعوة يابة واجبنا

عقاب: اندري محسستني امير فد مندلة

ريما: بالنسبة الكم هيج، بس بالنسبة النا جان كابوس

تنهدت بتعب واني اتذكر لحظاتي التعيسة وياه..

اماني: اي وبعدين؟

ريما: البعدين يمهم تلكيها، شمدريني اني

باوعتلهم، واحد يصفن بوجه اللاخ.

سجاد طفر من مكانه وكال.

سجاد: ترا اني البطل هالمرة، خلوني اني احجي رجاءًا !

ليث: ديلا الغي لتموت

سجاد: اييي اخيرًا، باعوا اول شي ومن زمان حيل، اني جنت اتعامل وية امير واوصله معلومات تخص الحجي وشغله حتى يثق بيه

كفخه ليث شال راسه.

سجاد: ايدك لتمدها

اجته كفخة ثانية من شاهين.

ليث: حيييل بيك خاين

سجاد: خاب ما تنجب!! عقاب صيح بيهم

ضحكت ع منظره يتذمر ويستنجد بعقاب الي ضحك وكله.

عقاب: طاح حظك، شلون امنت ودزيتك بهيج مهمة وانت لهالدرجة طفل مادري

سجاد: ادووور ما راضيي!!!

عقاب: لا استغفر الله، كمل منين ما وكفت

سجاد: يي خوش بس الزم ذولة

عقاب: خوش

سجاد: المهم كل المعلومات والسوالف الي جنت انقلها لامير، اني وعقاب متفقين عليهن وحدة وحدة

قسورة صرخ باستنتاجه..

قسورة: حتى سالفة بوكة مخزن الاسلحة؟!!!!

سجاد: طبعا لا، هاي مالنا علاقة بيها امير من وحده متصرف، ولو جان عندي علم جان كلت لعقاب وكدرنا نتدارك الوضع او ننقذ حياة الشباب الله يرحمهم

قسورة: اها.. زين

سجاد: اي وبهالاثناء بدت ثقة امير بيا تزيد، وكدرت اقنعه انو اني اكرهكم واريد انتقم منكم وانو ايدي بايده ومن هالخرط، وهو الغبي ما صدك سمع هيج رئسن وثق

ضرغام: اي يكلك فرصة، وهم هو يعرف بيك جديد بيننا فعباله صدك، ميدري احنه من سنين نتعامل وياك بس مجنت ويانه بالمكتب رسمي

سجاد: بالضبط

ليث: لكك يعني جنت تندله وين خاتل واحنه ندور ومتكللنا؟!!

سجاد: شندل، هو مكال غير انه باربيل وما حدد وين بالضبط، وانتوا اصلا تدرون بي هناك

عقاب: وشغلة ثانية، ترا امير حطه باختبار ونجح بي، من الغباء ان يكوللنا ع مكانه بسهولة

ليث: بس ع الاقل مجان دورنا عليه بخبال!!

عقاب: خو اني جنت ادري ومع ذلك خليتكم تدورون ودورت وياكم بنفسي، ليش برأيك؟

ضرغام: مسرحية حتى امير يصدك ان فعلا سجاد وياه ومكللنا هو باربيل، والدليل دندور بجهد!

فرقع عقاب بأيده وكال.

عقاب: بالضبط، هذا هو الصح!

سجاد: عقل يشتغل يااابة، صفكة حارة تلسع لابو العقاقيب

صفكوله وليث وشاهين كاموا يصفرون، وهو مبتسم برزانة.

سجاد: بعدها، طلاك عقاب والدكتورة.. اصابة عقاب ذني كلهن نقلتهن اله صوت وصورة واتوقع هن ذني سبب وثوقه التام بية، ادور من اجة لبغداد جنت اعرف ان هو حيجي لبيت عقاب لان خابرني واخذ الاوكي مني

عقاب اندار عليه ورد مستنكر وعلى وجهه تعابير متفاجئة

عقاب: يا ساقط اني هم نسيت هالسالفة، ولك ليش مكتلي بوكتها مو جنة كاعدين سوا؟!!!

سجاد: حتى تتفاجئ، ردت المسرحية تكون مثالية خياي

عقاب: ما اقتنعت بس رح امشيها

سجاد: اي وبعدها تعرفون شصار، من رحت وياه جان كلش مكيف بيه عبالك اني مخترع الفانيلة ام التعلاكة، المهم جنت بضغط وبين عدد كثيف من زلمه فما كدرت اتواصل وياك بيومها، ثاني يوم يلا هدئ الوضع واخذ زلمه وراح لابوه فاستغليت الفرصة وخابرتك

قسورة: انتو تدرون من شفته اجيت افرغ المسدس براسه!!!!

ليث: لك اني بمكانك ولله ما اوكف ولا انطي مجال يحجي، كبل طلقة بكصته

سجاد: خو ماكو شي؟

ليث: لعد شنو شعبالك، احنه خوتنة خوة كلشي ولا الخيانة نتخبل منها

ردوا بصوت واحد: صح

ظل سجاد يفر باذاناته بتوتر ممزوج بالتفاجؤ.

سجاد: يمعودين خطة جانت خطة مو صدك!!

ليث: اي وشمدرينه

سجاد: خوش حلك عليك ولله

ضرغام: اصلا تدرون، جان لازم نعرف هاي التمثيلية خطة من البداية

شاهين & ليث: شلوون؟

ضرغام: بكل بساطة لان عقاب مقبل ندناله او نسويله شي بيوم راح ويه امير

قسورة بملل: كل قوتك هاي؟ يجوز كال هيج وجان قاصد فعلا انه يريد سجاد حصته اله!

ضرغام: عقاب ميسويها

قسورة: وشمعرفككك انتت!!!!

ضرغام بثقة: ها عقاب شتكول؟

ابتسم واردف.

عقاب: انت صح

قسورة عوج حلكه بعدم رضى وعقاب وضرغام ضربوا كف بعض.

اماني: وتالي امير وين؟

ادنى لكدام، حط ايديه ع رجليه وشابك اصابعه وكال بفحيح..
عقاب:امير خلص صار بحححح !!

قشعر جسمي من وضعه، باوعت لريما حالتها متختلف عني هواي.

قسورة: تفنن عقاب بتعذيبه!

بلعت ريكي وسألت بتردد.

اماني: شلون يعني تفنن؟

ريما: كصيتوا لحمه وتعشيتوا بي مثل الافلام؟

ضحكوا علينا.

قسورة: اييي وجبنالكم ويانه كيلو الكم هم

ريما: لا عليككك الللله؟؟؟!!!!!

ضحك ضحكة جبيرة عيونه اختفت.

ريما: شبيك تضحح شكد سخيف عابتلك

قسورة: اني لو انتِ؟

ريما: يعني اني سخيفة؟

عقاب: ثنينكم سخيفين، بلا بربج ناكل لحم بشر شنو شايفتنه مستذئبين لو مصاصين دماء مثلا؟!

خلست ريما من الفشلة واني لزمتني ضحكة كوة كتمتها.

ريما: اندري شو انتو خوفتوني، تكولون تفننت بتعذيبه

عقاب: اي الفنون انواع، وكل نوع اله وسائل خاصة بي

اماني: ليش انت شسويت عقاب؟

ضيق نظراته بحدة وكال.

عقاب: عاقبتـه وبس..

اماني: اي شلون شسويتله؟

عقاب: خلي يكمل سجاد، واني وراه حتى لتتخربط عليجن الاحداث

كالها بمرح، يمه ولا عبالك سالفة قتل، كلش عادي عنده ويحشش!

سجاد: اي فبالليل، وقت التنفيذ توجهت سياراتنا لهناك واني جنت ع راس الزلم التابعين لامير باعتباري ايده اليمين.

سجاد: يلا شباب كلمن يلزم مكانه، توزعوا ماريد اي اخطاء

-صار

توزعوا داير مداير البيت، امير طب واني وراه.

جان توفيق ورياض كاعدين، رياض وجهه مطعون مبين ذاك وينه مغصوب ع هالكعدة.

جابوا الضحايا حتى يخدروهم، كام رياض وراح يتجهز حتى يسوي العملية.

امير: سجاد تعال شوية

جان كاعد هو وابوه مدري شيحجون بصوت ناصي.

رحت يمه.

امير: انت تعرف انو كلشي بالحياة اله بداية واله نهاية، مو؟

سجاد: اكيد سيد

امير: عفية.. يعني تعرف انو شغلك هذا وياي اله نقطة نهاية؟

عكدت حواجبي مستغرب.

امير: شوف خلي افهمكياهه زين، يكولون ليخون مرة يخون عشرين مرة، الخاين والغدار ما يتأمن خاصة من يعض الايد الي انمدت اله، واني بصراحة ما اكدر ائمن بيك بعد، لهنا وانتهت خبزتك وياي

رفع سلاحه باتجاهي، جفلت بصدمة هاي شون طلابة هسة!!

سجاد: بس سيد اني اخلاصي الك وحدك، مستحيل اغدرك

امير: قبلي هم كلتها للحجي ولعقاب، وتاليها شنو؟ واكف كدامي دتعيدها بكل صلافة!! وتريدني اصدكك؟

سجاد: بس هذيج المرة تختلف، اني من الاساس جنت داخل حتى انتقم منهم وانت تعرف!!!

امير: اششششش بدووووون لغوووة!!!!! تشاهد ع روحك يلااا

كلت ما منها مهرب، خلص اجت ساعتي، غمضت عيوني وفرقت شفايفي رايد اتشاهد وما احسلك الا ع صوت عقاب يصدح بالجو وهو يكول..

عقاب: انصحك انت هم تتشاهد ع روحك، عزرائيلك اجة!

فتحت عيوني بسعادة وباوعت، الحرس كلهم مكتلين، امير وابوه توفيق يطكطكون بخوف.

عقاب قسورة ضرغام شاهين ووياهم زلمنا محاوطين المكان وعلى وجههم ملامح النصر.

ضحكت مستبشر بجيتهم، باوعت لعقاب ابتسملي وهز راسه كايل.

عقاب: شلونك سبعـي؟ خو ما تأخرت عليك؟

سجاد: اجيت بالوقت المناسب تمامًا!

عقاب: يلا حتى تصير السالفة بعد احلى

هزيت راسي بابتسامة.

جرني امير وخلى المسدس براسي، كوسيلة اخيرة اله للنجاة.

توفيق: طلعتتتت كللب لعبت عليناااا

سجاد: ضحكت عليكم بالاصح

حجيتها مستهزء، امير خنكني بلزمته وكال.

امير: تخليني اطلع منا لو بطلقة وحدة اخليه يسلمها

عقاب: بيك خير سويها وشوف!

امير: وخر عن طريقيييييي، خليني اطلع عقاب!!!!

توفيق: لعد واني، اني هم خلوني اطلععع!!!!

عقاب: ثنينكم مالكم طلعة منا، وسجاد هده احسن ما نسويك منخل انت والسيد الوالد

امير: شتسوي سويييي، اني كلت لعندي

اشرت لعقاب بأي، اومئلي بنظراته، اشر للولد نزلوا اسلحتهم.

عقاب: شاهين وخر عن الطريق خلي يعبر هو وابوه

شاهين: عقاااب شدتحجييييي!!!!!

نتر بي.

عقاب: كتلك وخخخخخرررر!!!!

ابتعد وواضح عليه الانزعاج، جرني امير حاطيني بالبداية يتحامون بيه حتى يشردون.

طلعوا مناك وشمروني بالكاع وهم يركضون بساع حتى يشردون بين البيوت.

اجوا الولد، شاهين اتطمن عليه هو وضرغام وانطاني سلاح.

اما عقاب وقسورة وقسم من الشباب ركضوا ورة امير وتوفيق، والقسم الثاني ظلوا يم رياض والضحايا.

ليث: كافي اسكت هسة صار دوري، اني اكمل

سجاد: خوش حبيب كمل

تحمحم ليث ورجع يكمل منين ما وكف سجاد.

ليث: بهاي الاثناء، اني وثنين من زلمنا جنة خاتلين منتظرين امير وتوفيق، لان عقاب انطاني هيج مهمة، ولو بالبداية مقبلت بيها، بس بعدين حبيتها حسيت بيها اكشن.

ليث: وين صارو ترة بديت امل، اصلا صوجي صدكت بعقاب لا بيها اكشن السالفة ولا ابد، جني بزونة خاتل

-اصبر هسة نشوف، هستوهم طبوا ترا

ليث: اخخ لك شصبر، الحماس كله ديروح عليه

وصدك، اجة امير يتراكض هو وابوه وروحه طافرة من الخوف.

وكفت رفعت سلاحي اني والولد، هم انرعصوا ممتخيلين يشوفونا.

ليث: يا هلا ولله، شنو هالصدفة الحلوة هاي، عاش من شافكم وين هالغيبة يابة؟!!

امير: وخر عن طريقي

رفع مسدسه عليه، ضحكت بصوت.

ليث: سلاح واحد شيسوي؟ عندي جيش ترا متكدرلنه

امير: انطيك كلشي تريده، فلوس املاك اي شي تريده ايييي شييي بس خليني اروح

ليث: اممممم اي شي اي شي؟!

هز راسه بتاكيد.

امير: اي شي تريده، مهما كان

باوعتله بنظرات حالمية وكلت بابتسامة.

ليث: روحك، انت وهالعار ابوك!!

حاصروهم عقاب والولد مناك واني وجماعتي منا.

عقاب: شوف شلون حتى الحياة متقبل نتفارك، مصرة تخلينا قدر بعض، ومصرة تخلي موتك على ايدي!

وكع ع ركبه يتوسل.

امير: الله يخليك لتكتلني، اسوي اي شي تريده بس لتكتلني

توفيق: عقاب اني مستعد انطيك كلشي املكه، اخذه كله الك بس عوفني اعيش الله يخليك

نزل يم رجل عقاب ديبوسها، دفره وكال باشمئزاز.

عقاب: وخر لتلزمني!!

امير: الله يخليك لتكتلني

عقاب: لك ليش تجيب اسم الله ع لسانك الزفر!!!!؟؟؟ انتوا تعرفون الله انتووو؟!!! الله بريئ منكم يا سفلللللة

كاموا يتباجون ويتوسلون، عقاب يتخبل من هيج.

توفيق: اني كتلك مستعد اسوي اي شي تريده، بس خليني عايش

امير: ايي ولله بعد ما ادنالك ولا الي علاقة بيك، وكلشي تكوله انفذه بلا اعتراض.

عقاب ادنة عليهم، وكال بنبرة مشمئزة.

عقاب: تعرفون شنو اكثر شي اكرهه بالحياة؟

هزو راسهم بلا، ووجوههم مرتعبة.

عقاب: اكره الموت هوووواي.. بس مو على نفسي! لا اكرهه للناس الاحبهم، لان اخذ مني هواي ناس احبهم على غفلة وخلاني وحيد، بحياتي ما توقعت يجي يوم واحس من داخلي انو اني فرحان.. لحد ما اجت الدكتورة ورجعت الوان الفرح والسعادة للوحة حياتي.. وانت وبكل حقارة اجيت فرقتني عنها واستخدمت ابشع الاساليب الممكنة لحتى تخليني اخضغلك!

امير: بس اني جنت احبها قبلك، انت اجيت واخذتها عالحاضر!!!!

عقاب: مو مهم منو اجة اول شي، المهم منو الي دخل كلبها وحبته وصار يسوة الكل عندها

امير: انت ضحكت عليها واخذتها مني، لو ما انت جان هسة احنه متزوجيننن!!!!!

دفره ع حلكه بعصبية.

عقاب: تاكد الدكتورة مراح تكون الك ابدًا لو مو اني، اكيد الله سبحانه ميقبل تنظلم وياك، وحتى لو مكنت اني موجود، حيكون اكو شخص ثاني غيري يحبها ويحتويها وياخذها منك، لان انت متستاهلها!!!!

امير: عوفني من هالحجي، اني بطلت ماريدها بعد بس خليني اروح بحال سبيلي وانت تهنى بيها

ضحك مستهزء..
عقاب: هه لا ولله؟!! شكرا ع هالكرم السخي منك..

تحولت ملامحه للجدية المختلطة بالحدية والعصبية.
عقاب: لك اني اتخبل من الموت ومن الي يتوسلون علمود الحياة!! لك هي الدنيا شتسوة وتكعد تتوسل حتى لتفاركهاااا؟؟؟!!! شو لا احد يحبك لا احد يريدك لا احد مهتم لوجودك عشت ولا متت محد فارق عنده شي!! وجودك بالحياة انت وهال*** ابوك عبارة عن استنزاف للاوكسجين بس!!!!

اشرلي اخذهم، جريناهم اني والولد.

امشي وراهم وخال مسدسين بايدي واحجي.

ليث: يلا كوم *** كبر لهالوجه، بلا مو حريمة الناس الزينة لافتها المكابر وهالشكولات الخايسة عايشة!!!!؟؟؟؟

طببنا توفيق للبيت الي حاطين بي الضحايا، وامير تلفنا بوحدة من سياراتنا لان هذا حصتنا بعد.

عقاب: هوووب، لهنا اني اكمل بعد

ليث: تفضل حبيب

ضحكت عالطريقة الي ديتناوبون بيها بسرد الاحداث الي اني واختي، رغم الخوف والشعور الغريب الي دا احس بي من يحجون عن السووه وكأنه شي كلش عادي.

عقاب: جنت مخابر لعقيد زيد صاحبي، اجة شالهم بالجرم المشهود، بما فيهم ابوج وتوفيق والي يساعدوهم، واخذ الناس الابرياء كال اني اتكفل بأرجاعهم لاهاليهم سالمين.

زيد: مشكور عقاب ما انسالك هالمعروف

عقاب: لا يابة تدلل، هذا واجبنا

زيد: لك انت ساعدتني الزم اكبر عصابة اتجار بالبشر!! يعني لو شما اسوي ما اوفيك

عقاب: لا تسوي شي، البلد بلدنا والناس ناسنا، اي واحد بمكاني جان رح يسوي نفس الشي اذا شاف الابرياء هيج ينظلمون ويموتون

زيد: صحيح كلامك، بس مو كلها بشجاعتك انت والولد، شكرًا من كل كلبي وان شاء الله اذا حصلت ترقية انت اول واحد اعزمك!

عقاب: هههه ان شاااء الله

تصافحنا وراح.

طلعنا بسيارتي اني وقسورة وشاهين وضرغام ورة ليث وسجاد، الي اخذوا امير وطلعوا كدامنا للمكان المتفقين عليه.

حجة قسورة بضوجة.
قسورة: خو سلمت توفيق للشرطة؟!

عقاب: ضاملك هدية غيرها، ليهمك

قسورة: اني كتلك اريد توووفييق!!!! ليش تسلمه للشرطة لييييش!!!

عقاب: قسورة وحق الله الشغلة مو بيدي، لزموا ملفاته هو ورياض سوا ماكدر اخذه علمودك وكأن مكان موجود!

قسورة: لو امير جان كدرت تسويله شي!!

خزرته بضوجة.

عقاب: رح اسوي نفسي ما سمعتك شحجيت، وارجع واكلك اكو شي ثاني منتظرك

دار وجهه ومحجة شي بعد، وصلنا لهناك.

جانوا رابطين امير الي فاقد الوعي على كرسي وشادين ايديه لورا ظهره ورجليه كذلك.

وبصفه وعلى بعد مسافة المتر ونص، شادين ثنين توأم بنفس الحالة.

طبيت مبتسم، رفعت ارداناتي وسلمت.

عقاب: الله حيهم للشباب

ليث: يا هلا يا هلا

سجاد: الله يحييك حبيب

عقاب: شلونهم الكتاكيت شضيفتوهم، قمتوا بالواجب لا؟

سجاد: مع كامل الاسف عليك، احنه منقدم الواجب؟!
باوع لسجاد الي ضحك وكمل.

ليث: اندري، محسسني احنه منفتهم بهاي السوالف، لتخاف عيني ادينا الواجب وزايد، الدور والباقي عليكم انت وقسورة

قسورة جان مفاهم شكو.

قسورة: منو ذولة ادور؟

عقاب: واحد منهم خطف ريما والثاني راد يعتدي عليها، وانت ومروتك.

هو اني كتله هيج وهو ركض دفرهم وهم نايمين انكلبوا بالكاع.

عيونه تجدح نار، وجهه صار احمر ودماراته بارزة.

باوعلي بنظرة متأسفة، كأن ديعتذرلي ع كلامه السابق.

ابتسمتله بخفة ورفعت حاجبي بشك سائله.

عقاب: كول اخوي مو كدها؟

قسورة: كدها وكدود خياي

استلمناهم دك بوكسات لحد ما تعبنـا، وهاي جانت مقبلات طبعا لبينما كعدوا.

كعد امير دايخ بفعل المخدر.

عقاب: صحصحت ****!؟ ليلتنا طويلة ترا اكعد هم يالا نكمل

رد ببرود.

امير: سوي لتريد تسوي ميهمني

ضحكت بصدمة.
عقاب: اخ هيج صارت! منو قبل شوية جان يتوسل لعد؟

امير: مو مهم.. اعترف انو انت فزت بس مو بذكائك، اني دفعت ثمن غلطتي لما وثقت بسجاد، وهالشي معناته اني قدمتلك الفوز على طبق من ذهب!

عقاب: تؤ تؤ.. الفوز يبقى فوز مهما كانت الظروف ومنو ما كان الخصم، سواء فزت عليك وانت ذكي او وانت غبي، ابقى اني الربحان بالنهاية! وبالنسبة لسالفة غبائك فهاي منتهين منها، لذلك لعبت هيج لعبة وجنت مراهن ع غبائك حتى انجح ونجحت!

امير: اللعب على نقاط ضعف الخصم ميخليك الاكفئ للفوز!

عقاب: بالعكس!!! هذا هو الذكاء بعينه، من تتلاعب بخصمك باستخدام نقاط ضعفه ساعتها بس تبين كفائتك وحنكتك كخصم لا يستهان بي!

رد بخبث.

امير: مثلما تلاعبت بيك انت والدكتورة وعيشتكم برعب وانتوا سوة؟

كمت خبزته بوكس افتر وجهه كله.

باوعلي واردف ضاحك.

امير: معناها ضربت النقطة باحتراف!

خبزته بوكس ثاني طفيت عينه.

رجعت كعدت وبصفي سجاد يباوعله باشمئزاز.

امير: انت جان لازم اصفيك من الاول، بس كلت خلي انتظر شوية

سجاد: لا حرامات، بس يلا شنسوي الله ما كتب

امير: اني ما نفذت، مو الله ما كتب!!

سجاد: اوخخ ويكفر هم!

باوع علينا وكالها، ادور فرك ايديه ببعض وهو مدنك راسه ويحجي.

سجاد: كتلي ليخون مرة يخون عشرين مرة مووو؟ اممم نظرية صحيحة واني رح انفذها هسة واخونك و***** وانعل الساعة لشفت وجهك النكس بيها يا ****

استلمه دك بوكسات ع رفس خلاه خريطة، وبالسرة خليت الولد يفترون عليه كلهم باعتبارهم كلهم تعبوا وهم يدورون عليه.

اما قسورة، تفنن بتعذيب التوأم.

وما قبل احد يدنة من عدنه، وجان مُصّر يعذبهم بطريقة تكطع نسلهم.

قسورة: اذا ما خليتكم تحرمون تدنون لمرة اني مو قسورة!!! لك بيا ايد كمشتها بهااي؟؟؟؟؟؟!!!!!

ضربه طلقة بايده، رجع عالثانية كمشها وصاح.

قسورة: لو بهاااااااييييي؟؟؟!!!!!! وانتتتتت يا كلب

عاف ذاك يتصارخ ويتباچى ورجع عالخطفها.

قسورة: بهاي ايديك كمشتها وخطفتها مو؟؟؟ لك ولللللهههههه الا اخليك تتحسر تلزملك شغلة بعدددد!!!

جاب مسدسه وضرب ع اديه من فوك بكل ايد طلقتين.

انتهوا فد مرة وظل مفور ما برد.

ضرغام: كافي قسورة اخذ نفس مو زين عليك هيج!!

قسورة: لك راح اتخخخبببل!!! ذوله النكسين اذوها كلما اتخيلهم كامشيها وبذاك المنظر وهي تبجي وتصرخ احس روحي تطلع!!!!!

حط ايده ع جتفه.

ضرغام: حقك حبيب، بس انت ع كيفك ليروح يصير بيك شي من كثر العصبية! الحمدلله ريمتك مبيها شي وذولي بايدك، بعد شكو اهدئ اهدئ..

تنفس بعمق، ساندت ضرغام.

عقاب: الي ديكوله ضرغام صحيح، ع هالمعدل انت تتخربط وتروح بيها مو هم!

عافنا وطلع برا، اشرت لضرغام يلحكه حتى يهديه شوية.

نفذ، اجاني ليث.

ليث: شو معاجبني ادائك، شبيك تعبان؟ اشتغل بمكانك اذا تحب

امير قهقه ساخر، بس شنو كوة يطلع حسه.

عقاب: لا مع الاسف عليك، وهذا الزلمة منو لشوهه لعد؟

ليث: كيفك ردت افيدك

عقاب: همممم

همهمت بتفكير، خطرت ببالي شغلة.

عقاب: الزم راسه ليث

ليث: صار حبيب

لزمه لان راسه كام يهدل من الالم وكثر الدك، كمت وكفت كدامه وكلت بسخرية.
عقاب: شوف اني كتلك هواي من قبل وحذرتك وردت.. بس انت ماكو ظليت راكب راسك وما سمعتلي، مو بلا يابة؟

باوعت للولد، هزوا راسهم بأي.

ليث& شاهين: صح يابة صح

سجاد: انشهد خياي، هو جابها لروحه

رجعت باوعتله وحجيت ببراءة.
عقاب: شفت؟ خو اني معليه انت السبب، بس تدري انت ولله محظوظ، لوما ظهري جان سويتك جنازة بس يلا البيك كافيك

رفعت سلاحي، سحبت قسام وخليته بحلكه.

عقاب: هاي حتى تتوب تهدد وتحجي بأماني بعد!

ضيق عيونه باكي وهو يتمتم بتوسل بكلمات ممفهومة.

بمنتهى البرود، ضربته طلقة سكت بمكانه، رجعت سلاحي بجيبي وكعدت.

سجاد وليث وشاهين وكفوا داير مدايري.

شاهين مرغ اكتافي وسجاد انحنى لمستواي وكال.

سجاد: خلصنة منه اخيرا

باوعتله بتعب.

عقاب: اخذ مني هواي وقت يلا خلصت منه، تعبني ال****

طبطب ع رجلي.

سجاد: اهم شي ولى وخلصنا منه

عقاب: اي اي..

كمت ورا قسورة، شفته واكف يدخن وضرغام يمه.

اشرت لضرغام يروح، كعدت كباله واخذت منه جكارة ورثتها.

نفثت دخانها وحجيت.

عقاب: ما صدكت يمته يجي اليوم الي انهي حياته بي واخلص من شره، كتلته وبعدني ممصدك.. اذاني بأعز مخلوق ع كلبي وروحي.. حرت شسوي وابرد ناري منه بس الي حسيت بي من شوية.. جان احساس غريب قسورة.

اندارلي بنظرة متساؤلة على وجهه.

عقاب: حسيت ان الغضب الي بداخلي مراح يضر شخص غيري، هو اول وتالي يموت ويولي، الا اني! ما اكدر اظل اكبر بغضبي واحمله بعد فوك ما هو محمل.. ضربته غلطت عليه كسرت هيبته اتصور هيج كلش كافي ومتكدر تأذي بعد اكثر من هيج.

قسورة: بس عقاب اني دا احترك! تعرف شنو يعني رادوا يعتدون ع حبيبتك؟؟ احس اكو نار بصدري مدا ترضى تبرد، شكد ما ضربتهم احس ما وفيت نص الي بداخلي، تدري ديجي ببالي افكار شيطانية ولله العظيم وكل شوية اتعوذ من الشيطان وتردلي

عقاب: افكار ايش بلا؟

قسورة: اريد اخصيهم

عقاب: ليش يعني؟ انت اول وتالي رح تخلص عليهم!

قسورة: مادري، اكو نار بداخلي احسها تطفة اذا سويت هيج

عقاب: لعد سويها وريّح نفسك

قسورة: يعني عادي؟

ضحكت وجريته حضنته و ربتت ع ظهره.

عقاب: كلش عادي وداعتك

وخرت عنه، واضفت.
عقاب: اصلا اني اؤيد بشكل قوي فكرة اخصاء المغتصب حتى يكون عبرة لغيره من الحيوانات الي تفكر بنفس طريقته

قسورة: اخخ اي وعلي بس سلموني التنفيذ ومعليكم بالباقي

ضحكت ولعبت بشعره الطويل..

عقاب: ديلا لم كفشتك وطب خلص شغلك، اني متانيك هنا

قسورة: لعد وامير؟

اخذت نفس من الجكارة وزفرته.

عقاب: بحححح مثل هالدخان تمامًا، طار بالجو ههههههه

ضحك واردف.

قسورة: اني هم اروح اطيرهم لعد

عقاب: اي اي استعجل، هم يلا نشمرهم بفد مزبلة ونطلع لبغداد، طريقنا طويلة ترا

قسورة: تمام خياي

راح، ظليت صافن وادخن، ورة ربع ساعة تقريبًا اجة هو والولد يكركرون من الضحك.

ليث: لك انت وعلي مو صاحي

ضرغام: اني من زمان غاسل ايدي منه، ابد ما فاجئني

شاهين: هههه انت تدري ذني شكد يسون؟ لك الوحدة ب8 الاف دولاااار!!!!! وهذا شمرهن اربعتهن هيج لك اخخخخ وعلي بيهن خوش فلوس

قسورة: هيج فلوس خايسة متنراد

عقاب: ها بشر؟

ضحك بتعب وسوالي علامة اوكي بايده.

عقاب: عاشت ايدك، يلا خ نشمرهم ونطلع بعد

ليث: انت دريت بي شسوووة هالمخبل!!!!!!؟؟؟؟

حجة بصدمة وهو يضحك بصوت عالي، رديت بهدوء.

عقاب: ادري من الاول.

فك عيونه عليه هو والبقية، وحجيهم ع خبال قسورة صرت اني جزء منه.

شاهين: اوووي كمت اخاف اني

ليث: اني همم، بعد ما اتعارك وياكم وحتى شقة منتشاقة، يمه دولاراتي يمةةةة

ضحكت وكتله.

عقاب: كلمن يدير باله ع روحه لعد

مشينا واني ذاب حيلي ع قسورة لان ظهري اذاني.

صعدو الجثث، شمرناهن بوحدة من المزابل.

عقاب: وادور اجيناكم سوينا هاي الفعالية الحماسية الي شفتنها من شوية وبس ولله

ظلينا اني وريما مصفصفات، مندري نخاف نفرح نستغرب!

ريما: هسه اني لازم شسوي وشنو اكللكم؟

قسورة: مو لازم تكولين شي

عقاب باوعله وأيده وهو يهزلي راسه، باوعت لاختي وبلعت ريكي بقلة حيلة، شديصير؟!

اكو تساؤل ظل يراودني بظل هاي الهوسة.

اماني: زين والملفات والتسجيلات الي صوروهن الي واني اشتغل بالاعضاء؟

عقاب: بححححح! تلفتهن كلهن لان وبمساعدة سجاد وصلت للخزنة الي بيها كل خياسهم، اخذت ليفيدني والباقي تلفته.

فرحة ع شعور بزوال القلق.. حسيت هم جبير انزاح عن كلبي!

ابتسمتله بأمتنان، ضيق نظراته وبادلني الابتسامة بهدوء.

………

اماني

بعد مـرور شهــر ~

ريان تحسن وجابه عقاب لبغداد، وضعه صار اشوى من قبل، يكدر يتحرك بس رايح منتهي وضعفان فد مرة.

عقدنا سيد سوة اني وياه، وريما وقسورة بنفس اليوم وسوينة حفلة بسيطة عزمنا بيها بس الاصدقاء المقربين.

اكلنا وركصنا وتونسنا حيـل..

بغرفة وحدنا، جنة اني وعقاب كاعدين.

عقاب: شنو هالجمـال شطالعة امنيتي..

ابتسمت بتوتر ممزوج بالخجل.
اماني: انت هم حـلو طالع

باس ايدي مررها ع خده ..

عقاب: تعبـت حيل ع ما اجت هاللحظة، تعبت هواي بفراكج وحياتي ردت للظلمة بدونج يـضوة روحي..

اماني: اسفة لان تعبتك وياي.. ولان صار وياك كل هذا، اني السبب

حط ايده ع شفايفي، سكتت وحسيت بحرارة استوطنت جسمي وامتدت لكلبي بحيث كام ينبض برعونية.

عقاب: اليتعب عـ اليحبها معناها يحبها حيل، بعدين كل التعب الشفته بذيج الفترة يهون لاجل هيج لحظة..

حطيت ايدية ع وجهه وسندت راسي ع راسه..

اماني: احبك هواي حضرة الدكتاتور..

ضحك وجرني باسني حييل كطع نفسي.

ضربته ع صدره يلا وخر.

اماني: اختنكت شبيك هو هيج!

عقاب: حلاتها هيج، بعدين شلون تريدين الدكتاتور يبوس؟ لازم هيج

يضحك ويحجي، باوعت عالمراية لكدامي، حمرتي ماكو!

اماني: حمرتي ماهية!!!

عقاب: اكلتها

اماني: شكد صاير منحرف، هسة شلون اطلع بلا مو عيب شيكولون عليه؟

عقاب: جانت تبوس عقاب، خنكته خنك خطيه شحاله هسة

ضربته بقبضتي ع صدره، لزمه وجعد ملامحه بألم وصاح اخخخ.

خفت عليه، حطيت ايدي ع مكان اليوجعه عبالي هو نفسه مكان جرحه القديم.

اماني: عورتك؟ اني اسفة مو قصدي

ما حجة شي، ادنيت يمه مرغتها ع كيف عود دا اصلح غلطي، شو ما احس الا جرني عليه ومدني جواه، صار فوكي وعلى وجهه ابتسامة نصر خبيثة.

ضجت وظليت ادفر بي وادك ع صدره.

اماني: عقاب ولله زاعلتك ليش هيج تسوي خوفتني!!

عقاب: خاب ما تنجبين مو احسن؟ تزعل ام حلك، وج متكولين خطية رجال عايش حالة قحط وجد جده مسموط

صرخت بي بانفعال
اماني: اني هم جدي مسموط بس انت لعدددد؟؟!!

سكت متفاجئ، شوية شوية بدت تنرسم الابتسامة ع وجهه، وعرفت هاي الابتسامة شنو وراها، تمتمت بتهديد.

اماني: لا حباب مو قصدي، ترا ازعل وياك!

عقاب: اني معليه، غيرتي متسمحلي اشوف حبيبتي مسموط جدها وما اساعدها، شسوي مو بيدي وعلى كولة ليث آي كانت دو ذس!!!

اماني: لك لا حبااب عقاااب!!

ما سمعلي، غركني بوسات حسسني بمدى حبه واشتياقه.

اماني: لا انت صاير كلش وكح، متنكدر لازم ما استعجل واتزوجك

جرني من خصري حصرني عالحايط..

نظراته متمركزة ع شفايفي ويحجي.

عقاب: عيدي بلا شكلتي؟

اماني: ما كلت

باسني ظليت مصدومة، وخر ورجع سأل.

عقاب: عيدي شكلتي دا اكول؟

اماني: مكلت ولله مكلتتتت!!!

هم باسني.

اماني: شدسويي!!

عقاب: ع كل جذبة اخذ بوسة

اماني: لا بلا؟!!

رد بثقة.
عقاب: وداعة الله..

ضحكت ودرت وجهي، مد ايده رفع حنكي تلاكت نظراتنا..

عقاب: بعدها رمشة عيونج تاخذ روحي بجمالها وفتنتها.. لو اندارلها سبع فدوات هم قليلة.

معرفت شحجي، حسيت رجلية بعد متشيلني من الفرحة والتوتر والخجل..

عقاب: غمضي

اماني: ليش؟

عقاب: رايد انطي هالحلوات حصتهن
اشر ع عيوني وكال، ابتسمت بعدم تصديق..

اماني: تخبلت انت؟

عقاب: غمضي لا اراويچ الخبال ع اصوله
كالها بخبث وغمز، بلعت ريكي وتمتمت بضوجة.

اماني: ردينا وية الدكتاتور، شيفضچ يطلابة

عقاب: ديلا لج، صاحلچ علساس هيج دكتاتور

غمضت ضامة ضحكتي بالف كوة.

باسهن بخفة دغدغ كلبي، والطريقة الي لحيته تدچچ بيها بشرتي خلتني ابتسم وبمعدتي اكو فراشات..

ابتعد شافني مغمضة وعلى وجهي مرسومة الابتسامة.

حط ايده ع خدي، فتحت عيوني.

عقاب: شبيج تضحكين؟

اماني: كلبي ديطير، كلش فرحانة

ابتسم وحضنني حيل لصدره.

عقاب: رحت فدوة لفرحتج، اماني انتِ الله دزج الي رحمة سبحانه ..

اماني: انت هم، اصلا تدري مرات اصفن افكر، اكول صدك رب العالمين دزنه بشكل رحمة لبعض.

عقاب: ع هذا الحجي الحلو لازم نبوس!

ضحكت دافعته.

اماني: لا عفية كافي

عقاب: وحدة اخيرة لصيرين نحسة

اماني: بس بشرط متخنكني!

عقاب: صار

وية مكالها هجم علية ببوسة عميقة اخذت جوارحي كلها لغير زمن.

...

قسورة

مختلين لوحدنا اني وريما بعد العقد.

هي خجلانة، اول مرة اشوفها خجلانة صدمتني عبالي متعرف تخجل مثل باقي البنات.

قسورة: اخيرًا ربي رحم بيه وصرتي مالتي..

ريما: مبروك حبيبي

قسورة: مبروك علينا يروح حبيبچ..

نظراتها تشرح حالة التوتر وتختصر حكاية خجلها ..

لزمت ايدها، باوعتلي ابتسمت وكلت.

قسورة: وعد زلم عليه، بحيل الله وما طول بيه نفس رح اخليج سعيدة ومرتاحة، رح ابذل كل قوتي وجهدي لحتى احميج واخليج بأمان، مستعد اقدم روحي الج اذا احتاجيتي.. ما اوعدج بحياة خالية من المشاكل، بس الي اكدر اوعدج بي، حياة مليانة حب وتفاهم، رح نحل كل المشاكل ونتخطاها سوة، مالنا غير حضن بعض وكلشي يطلع يعكر صفو حياتنا رح نتخطاه ونكمل، لان حبنا اقوى من اي شي ومن كلشي

نزلت دمعتها بتأثر، مديت ايدي مسحتها برقة وبستها.

قسورة: منريد بجي، طلعتي ام دميعة ولج، شنو هاي انغشيت بيج ماريدج بطلت..

حجيت بجدية مصطنعة حتى اطلعها من المود الي هي بي، شو هاي انكلبت كلاب وردت بعصبية.

ريما: لا عينيييي لا، البضاعة المباعة لا ترد ولا تستبدددل، وانت خلص تورررررطت!!

ضحكت ورديت.

قسورة: احلى ورطة بيج يدنيـا.

سكتت، جريتها عليه.

قسورة: هسة تعاي نشوف هاي البضاعة نجربها اصلية لا

ضحكت ومكالت لا، بستها بمنتهى الهدوء عكس مشاعري الجامحة الي دتطمح لشي اكبر..

استشعرت قربها بالحلال.. شكد ما اكول هالشعور حلو ما اوفي حقه.

...

اماني

بابا انسحب ترشيحه للانتخابات و تحاكم هو وتوفيق واخذوا جزاءهم العادل، بالبداية امي تعبت حيل بسبب الخبر، بس بعدين وبمساعدتنا اني وريما ووكفتنا وياها استعادت حياتها وكدرت تتعايش وية الموضوع.

واليوم، وبعد محاولات طاحنة اني وعقاب اخيرًا اقتنع ازور ابوية.

رحتله للسجن، جابوه لغرفة الزيارة والي جان يفصلني عنه باب وبس عيونه مبينة من وراها..

من شافني عيونه غوركت بدموع..

كسر خاطري حيل، بچيت وكتله بعتب..

اماني: ليش هيج بابا؟ عاجبك هالوضع مرتاح هيج من دمرت نفسك ودمرتنا علمود الفلوس!!!؟؟؟؟ ليش يا بابا بشنو اغروك وبعت مبادئك؟ يستاهلن الفلوس توصل لهالمواصيل علمودهن؟؟ تعرف شكبرها خيبتي بيك؟..

تمتم من بين دموعه.
رياض: اسف بنتي، اني متندم هواي..

نترت بي بحدة.
اماني: بس الندم ميفيد بعد، مو من تتعاقب وتنحبس تتوب وتتذكر تتندم، ما تندمت قبلها؟ ما بطلت لو الفلوس حلوة عمتلك عيونك؟! لو عبالك متنلزم وهاهيه تسوي لتريده بدون حساب؟

جنت احجي بلهجة متسارعة وكلبي يدك بقوة من القهر، اول تالي احاجي ابوية بهيج طريقة اني؟!……

هدأت من روعي وحجيت بنفس الطريقة.
اماني: بابا انت بعملتك هاي ما ضيعت نفسك بس، ضيعتنا كلنا وياك وخليتنا نستحي نشيل راسنا .. ابوية وبطلي وقدوتي وفارس احلام طفولتي طلع مو مثل ما عبالي.. باباتي طلع انسان بلا رحمة وقاتل.. دتحس بكمية خيبة الالم والاحباط الي دنعاني منها؟ صوتي ديوصلك شكد اني مقهورة منك؟ ليش هيج ليش..

دنكت راسي وضميت وجهي بايدي باجية بصوت..

رياض: ما حسيت بالندم والعجز بأي مرة فاتت، بكد ما دا احس هسة.. واني واكف هيج وعاجز اطبطب عليج.. اخذج لحضني وامسح دموعج، واكلج شبيها بنيتي الحلوة شمزعلها ..

نبرة صوته المكسورة، خلتني ارفع راسي باتجاهه.. شفت بي انسان فعلا عاجز ونادم.. بس هيهات بعديش ..!

اماني: انت لمزعلني بابا..انت!

رياض: سامحيني باباتي، وخلي اخوتج وامج يسامحوني هم..

اماني: والناس الظلمتهم؟ والعوائل اليتمتها وفجعتها؟ ذولة شلون بيهم بابا متريدهم يسامحوك؟

محجة شي.. نظراته الضايعة والمتأسفة هاي دتقهرني وتزيد عصبيتي عليه.

دنكت العب باصابعي بتوتر، اللهي دخيلك امتحانك صعب..

شفت الحلقة بايدي، لميت شفايفي وبلعت غصتي.

رفعت راسي وكتله بصوت مهزوز بتأثير الدموع.
اماني: بابا اني انخطبت لعقاب، وريما هم انخطبت لقسورة، وريان بالطريق هم مظل شي ويخطب..

رد بحسرة واضحة.
رياض: الف مبروك بابا الله يهنيكم..

اماني: بس انت مراح تكون موجود تحضر اعراسنة وتفرحلنا.. منو يطب وياي يلزم ايدي ويسلمني لزوجي؟ اعرف ريان موجود بس اني اريد ابوية!

محجة شي بس دموعه كامت تتسابق، كلت لهنا وكافي العتب ميفيد ولا يغير شي.

مسحت دموعي.
اماني: اني رايحة، مع السلامة بابا دير بالك ع نفسك

رياض: محروسة بالله بنيتي، الله وياج

طلعت من عنده ضايجة وكارهة روحي، لكيت عقاب واكفلي برا.

صعدت بالسيارة هو رئسن عرفني مقهورة.

شغل السيارة ومد ايده لزم ايدي.

عقاب: اني ليش مردتج تجين لعد، من هيج حالة!

اماني: مو بيدي ولله ابوية هذا.. شكد حاولت اكرهه ماكدر ..

عقاب: الله يسامحه، هاج مسحي دموعج ترا شكلج صاير يخوف، شكد باچية؟!

باوعت ع المراية مال السيارة عزا صدك شكلي يخوف.

مسحت عيوني بس وجهي بعده شاحب ومبينة ذيج ويني باجية.

اماني: مباچية اصلا وكلشي ما بي وجهي ليش هالجذب

باوعلي بتك عين.
عقاب: همزين هستوچ مسحتي!

غلست ودرت وجهي عالجامة اباوع للشارع.

عقاب: حجزت القاعة الكتلج عليها

انداريت عليه متفاجئة.
اماني: بس هاي ملكية و كلش غالية!!!

عقاب: متغلى عليج، بعدين هاي هم يالا تكفينا، لتنسين احنه وقسورة وريما عرسنا سوة

اماني: ميخالف قابل شراح يفرق، الي من طرفي اني واختي قليلين وانت وقسورة نفس الشي، عليمن هالصرف بعد خو نحجز وحدة صغيرة!

عقاب: الواحد كم مرة يتزوج، خلي نصير ملوك لنهار واحد شبيج!

اماني: بس احنه متزوجين قبل، ليش محسسني هستونة تعرفنة؟!

عقاب: واذا شكو بيها، متريدين تلبسين بدلة بيضاء وتركصين وتفرحين انتِ وصديقاتج واهلج؟

اماني: لا ماريد

عقاب: لتريدين، اني اريد البس قاط وافرح

اماني: قابل ملابس قاط بحياتك وهيج كاتل روحك؟!

عقاب: بكيفي حلوة هاي، الخميس اليجي عرسنا حضري روحج على هالاساس، عجيب ولله.. اول مرة اشوف بنية مستغنية عن اهم يوم بحياتها!!!

اماني: منو كلك هذا اهم يوم؟

رفع حاجبه بنظرة عنوانها معاجبه الحجيته.

عقاب: خير ان شاء الله؟

لزمت كلبي شلون جفصة هاي.

حجيت بلواكة حتى اداري جفصتي.
اماني: قصدي اهم يوم بحياتي هو يوم لقائنا

رد ببرود.

عقاب: مو حلو هاليوم لتذكريه

اماني: بس اني احبه

عقاب: انتِ تتذكرين اصلا وين التقينا اول مرة؟

اماني: بيوم عملية اختك غير؟

عقاب: تؤ.. قبلها بهواي

اماني: شلون شو ما اتذكر!

عقاب: جنت جاي لبيتكم وية الحجي وصدفة من طلعنا شفتج، بس هيج نظرات خاطفة

عكدت حواجبي واطلقت العنان لمخي حتى اتذكر ..

وفعلا كدرت اوصل لهاليوم!

اماني: ياااا ايييي وللللله!

ضحك ع رد فعلي ورجع يسوق.

وصدك حجايته وحدة، جهزني جهاز عروس كامل بس ركض ركض، ونص الغراض يجيبهن ع ذوقه خاصة اللبس.

لان ذوقه حلو وتقريبا هو يعرف اني شنو ستايل لبسي فكلش مرتاحة ع هالنسق.

ريما رجليها وكعت يا رايحة يا رادة تشتري وتجهز وقسورة مبتلي ليل نهار يودي ويجيب، بس الصراحة هو مكيف وعلى كلبه احلى من العسل ع كولة ريما هههه.

اجة يوم الخميس اخيرًا..

بالقاعة كلنا موجودين، اني واختي لبسنا بدلات نازكة وسوينا تسريحات متشابهة وحتى المكياج وحدنا.

امي بالبداية مقبلت بس قنعناها وسوينا الي براسنا، طلعنا عبالك توأم رغم الشبه بيننا مو هلكد، بس المكياج واللبس لعبن دور.

من اجوا العرسان..

عقاب وكف كدامي مبتسم وعيونه ما رمشت، اما قسورة ظل يتصفن بيني وبين اختي.

قسورة: خياي ياهية الي ياهية الك؟

ضحك عقاب واجة كعد بصفي وجاوبه.

عقاب: هنا عروك كلبي اني..

ابتسمت بخجل، اما ريما ظلت تخزر بقسورة وتكرص بي.

ريما: ما عرفتني مو؟ لعد شلون عقاب عرف اماني؟ يعني انت متحبني اذا من اولها هيج خل نبطل احسن

قسورة: ولج خبلة جنت اشاقة، غير بوصلة كلبي اشرت عليج شلون ماعرفج ولج روحي انتِ!!

فشت شوية، باس ايدها ابتسمت بخجل، باوع بعيونها..

قسورة: يمة اخيرا طلعت الشمس مالتي!! رحت فدووة احبج ولج

اني وعقاب مادين راسنا نباوعلهم ونضحك.

عقاب: عيب يلا ديري وجهج عوفيهم

اماني: انت هم عيب مو بس اني!

عقاب: حالي من حالج، اكول

اماني: كول حبيبي

عقاب: مو چنچ مكثرة حلا اليوم؟ خاف يصعد عندي السكر واتخربط عليج، وين تطين وجهج بعدين؟

ضحكت فهمت قصده، اردفت بدلع.
اماني: الجرعة نفسها، بس انت مدري شبيك صاير فد مرة..

عقاب: انطي صبر، حسابنا مو هنا

اماني: ومن اكلك صاير متنكدر متصدكني!!

عقاب: غير انتِ دوهنتيني.. طالعة فلگة كمر دخيل السواج شنو هالحِسن هذا كله بيمن ابدي ومنين احجي بس كليلي؟!

اماني: يووه عقاب استحي حباب كافي، ادور العالم عيونها علينا

عقاب: طز شسويلهم، واحد بيوم عرسه هم ممنوع ياخذ راحته ويغازل مرته طركاعة لفتهم كون

ضحكت بصوت عالي لان نبرته اختلطت بالجدية.

عقاب: اشش ولج

لزمت بطني كمت اكركر، هو ماكو شي يضحك بس اني چلبت بيه الضحكة لدرجة كمت ما اسيطر وكلما يكلي بس ازيد، اخير شي استسلم وظل صافن عليه شلون اضحك..

لهناك كمنه ركصنا سوة.. ادور ركصنا اني وريما سوة وصديقاتنا داير مدايرنا.

وراها سوينة فقرة شمر باقة الورد، والي لزمتها اميمة!

باوعنالها بخبث، ضحكت وفلتت يم امها، ليث جان يتمضحك والولد يدفعون بي.

ركصوا الولد چوبي، شوفتهم سوة بهيج فرحة ووجوههم تضحك شي كلش جبير عندي!

كلهم تعبوا بحياتهم هواي، واتمنى من الله يجازيهم ع تعبهم بشخص يملي عليهم حياتهم فرح وسعادة..

ادور عقاب وقسورة وكفوا واحد كدام اللاخ وتحاضنوا ع اغنية اخوية، دمعت ع منظرهم..

الي ميعرفهم يكول ذوله اخوة، لان ماكو هيج حب ووفاء ابد!

شوية واجو ليث وسجاد وشاهين وضرغام اقتحموا المشهد ودحسوا روحهم.

بالبداية عقاب كفخهم ادور تحاضنوا كلهم سوة..

6 اخوة مختلفين بس هلكد متشابهين وقريبين لبعضهم!
صفكت واني اباوع على هاللوحة الاخوية الحلوة.

ياريت لو كل الصداقات تكون هيج، والا متسوة تصادق اساسًا.

....

ليث

استغليت الفرصة من ام اميمة طلعت وية ام جنات يجيبن شغلة وركضتلها.

ليث: شلونها الحلوة؟

باوعتلي ودارت وجهها تباوع عالعالم، جانت وياها بنية ثانية العرفته من جنات صديقتها.

اميمة: ليث مو وكتك روح حباب

ليث: امج راحت وية ام جنات

اميمة: شيسون شو ما كلتلي؟

ليث: الا تاخذ اذن منج يعني؟

اميمة: لاا بس..

قاطعتها لما سألت..
ليث: انتِ ظهرج ما يوجعج؟

ردت بعدم فهم.
اميمة: لا ليش؟

ليث: شلون شايل كل هالجمال ميتعب؟

باوعتلي بصدمة ممزوجة بالخجل وعجزت ترد، بينما صديقتها طكتها ضحكة، ندستها وخزرتها يلا سكتت.

ليث: لا ولله صدك شدعوة هلكد حلوة انتِ؟

اميمة: امر الله شنسوي بعد؟

ليث: فدوة لالله لعد..

اميمة: روح يلا، النسوان يباوعن

ليث: ويباوعن شسويلهن

اميمة: شنو شسويلهن هسة شيكولن عليه!

ليث: شيكولن خلي يكولن، اني باجر اجيب الحجية واجي اخطبج

اميمة: لا صدككك؟؟!

ليث: ايي، ما فرحتي؟

جانت ملامحها غريبة، لا فرحانة ولا ضايجة.. مدري شنو، خاصة احنه بالفترة الاخيرة قوت علاقتنا حيل وهي انطتني فرصة.

اميمة: مادري..

باوعت ع صديقتها وسالتها.
ليث: شسمج انتِ؟

حنين: اسمي حنين

ليث: حنين من رخصتج، فد دقيقتين

حنين: تمام

دتروح جرتها.

اميمة: تممو راسج وين رايحه ما صدكت

حنين: يا شبيج غير الولد طلب مني!

اميمة: واذا طلب، شيطلب تنفذين بلا كلج شمري روحج من السطح تشمرين روحج؟

حنين: عابت

عافتها وراحت، ضاجت.

اميمة: كله من وراك، تعاركنا

ليث: اني شكو انتِ نزلتي عالمكرودة دوسة ونص

اميمة: بسببك غيررر!!!

ليث: رجال فقير اني

اميمة: اي واضح

سكتنا، همستلها بهيام..

ليث: اميمـة..

همهمت بصوت ناصي فجاوبتها بصوت مليان هدوء ومشاعر.

ليث: اللحظة الشفتج بيها جانت دافية حييل، جنهة شيلة امي..

باوعت بعيوني شوية متأثرة بكلامي، ادور كالت..
اميمة: ليث اني احبك..

حسيت الهوسة الي بذيج اللحظة جانت شعلوها تحولت لصمت رهيب.. كلبي دك بقوة والابتسامة لكت طريقها لوجهي بشكل لا ارادي..

ليث: ولج اني ميـت بحبچ!

رجعت وين مجنت واكف، لكيت سجاد عيونه تفتر ع صديقة اميمة حنين.

ليث: ها شو عيونك تشتغل خير شعندك؟

سجاد: خياي الحك، اني هم تصاوبت

ضحكت وهزيت راسي.
ليث: بكلبك غير؟

هز راسه بضعف مثل المتورط، ابتسمت وكتله.

ليث: اهلا وسهلا بيك بفريقنا

....

اماني

بعد مـرور ثلاث سنوات~

كاعدين بحديقة بيت قسورة لان چبيرة ومغلقة.

اماني: حبيبي ديربالك ع أنور لينچوي

عقاب: لتوصين حريص، روحي حبيبي كملي شغلج ولتخافين عليه هياته بحضني

انور هو ابننا اني وعقاب، عمره سنتين.

اماني: تمام، انور حبيبي مو تتعب بابا!

بسته وكمت لجوة يم البنات.

الولد جانوا يشوون واحنه بالمطبخ نسوي زلايط وحلويات، واميمة كالعادة تشتغل بالدولمة وتوجه بينة.

اجة ليث وجهه يبجي كللها.

ليث: جوعان حبيبتي ما استوة يمكم شي؟

اميمة: يخسي الجوع حبيبي، هسة اجيبلك كباية من حنين دتكلي

ليث: سويهن ثنين يحلوة

ضحكت وكلتله.
اميمة: تدلل

راحت ورجعت لافتهن بخبزة، دتنطيهيا اجة قسورة طاير لكفها منهم.

ليث: جييييب لك ميت من الجووووع

قسورة: دوكف خ اشوفها لفة ايش

فتحها شافها كبة، رجعها لليث متذمر.

قسورة: اني ما اخلص من التمن المعجن هذا، وين ماروح تطلعلي من خرب حظيييي

ليث: خلي مرتك تسويلك غير شي، وبعدين هاي اخر مرة اسمحلك تحجي بيها عالكبة، اسمها كبببة كببببة مو تمن معجن تسمع لو لا؟؟؟

قسورة: خااب دنجب، وينها مرتييي

جانت ريما بصفي دتثرم خس للزلاطة.

ريما: ها حبيبي

اجة بصفها.

قسورة: جعت كلش

ريما: تريد زلاطة؟

قسورة: بربج وين اخليها هاي، جوعان جوعاان

ريما: لعد شعندي، انتظر هسة يستوي الاكل وناكل لتروح تنسد نفسك وبعد متشتهي

قسورة: اممم هم صح، يلا رح اكلي تفاحة بينما يجهز الاكل

ريما: براحتك حبيبي

راح، سئلتني.

ريما: ريان ما خابرج؟ شوكت يجي ترا تأخروا

اماني: خابرته قبل شوية كال شمس تعبانة والحمل مالتها مزعج فيجوز ميكدرون يجون

ريما: خطية الله يكومها بالسلامة

اماني: امين

كملنا وصبينا الغدا، التمينا ع سفرة طويلة وبين السوالف والشقة لمتنا الاسبوعية هاي صارت من احلى اللحظات بحياتنا..

ضرغام: اسبوع اليجي لمتنا ببيتي، شتكولين نعيمـي؟

جنات: اكيد موافقة!

ميقات: مو جان السرة النا، شاهين احجي!!

شاهين: عود احنه وراهم مو فد مشكلة حبيبي

ميقات: ما ما معليه

ضحكنا، ميقات حتى من تزوجت بعدها تغار من اختها جنات.

شاهين: يابة تقبلون تنطونة دوركم؟

ضحكت جنات وباوعت لضرغام الي اومئلها بموافق وكالت..
جنات: تمام اخذوه

سجاد: شو انتو بكيفكم توزعون وتتقاسمون؟ اني وحنينتي حاجزين قبلكم، مو بلا حبيبي؟

حنين: صحيح بس ميخالف، اول وتالي يجينة السرة حبيبي

شاهين: هيج احسلك؟

سجاد: هي ما ترتاح الا تكبسني

حنين: شحجيت قابل

سجاد: لا سلامتج، كملي اكلج

ظلينا نضحك ع المناكر، كل شوية واحد من الكبلات يستلم النكرة.

وهيج خلص اليـوم وكلمن راح لبيتـه..

بالليل، نيمـت انور بسريره وفتحت شعري اريد امشطه..

اجة عقاب، اخذ المشط مني وبلش يمشطلي بهدوء.

كمل وباس شعري وشم عطره..

عقاب: يابة شكد احبه..

اماني: بس هو؟ لعد واني متحبني؟

عقاب: ولج اني لو ما احبج ما اقدس تفاصيلج هيج!

اماني: هنيـالي بيك دكتاتوري..

عقاب: تتحارشين بيه كوة!!

ضحكت بدلع ورجعت شعري للجانب..
اماني: شمسويه قابل، ميصير اكول دكتاتور يعني حرام لو ممنوع لو شنو؟

ضيق نظراته بنشـوة، وجرني عليه طوقني بحضنه.

عقاب: انتِ تعرفين انو هاي الكلمة مفتاح سري لذيج الشغلة، ومع ذلك تكوليها وتمثلين البراءة.. هسة منو الوكح؟

اماني: مادري

رفعت اكتافي ورديت ببراءة..

عقاب: هسة اني اخليج تدرين

باسنـي بقوة ومن بعدها وشـمني بختمه الخاص..

نايمة ع صدره، يعلو ويهبط بوتيـرة منتظمة.

اماني: حاستك مو ع بعضك، خير صاير شي؟

عقاب: لا حبيبتي ماكو شي بس تعرفين بعد الوزارة ومسؤولياتها

اماني: كتلك لتدخل بيها من الاول، الوزارة والدولة شي مو سهل انت ما سمعتلي

عقاب: لعد تريديني اخلي الحجي وحده؟ مستحيل هذا ابوية ماعوفه ابد

اماني: براحتـك لعد

سكتنـا شوية ادور كال..

عِـقاب: لو رجع بيج الزمن مرة ثانية، ولو جان عندج فرصة الاختيار وتغيير كلشي، هم ترجعين حتعيشين كلشي مثل ما صار لو لا؟ او بالأصح، هم جنتِ حـ تحبيني؟!

اماني: شنو هالسؤال!! اكيد رح احبببك! عقاب لو رجع بيه الزمن الف مرة، ولو جان عندي قلبين بدال الواحد، هم راح ابقى اختارك واحبك بكل قوتـي ورغم كل الظروف..

عقاب: الله يخليج الي، احبج يـضوة روحي ..

اماني: اني هم احبك عقابي!

.....

انتهى!

لهنا انتهت رواية خطأ طبي "عقاب الاماني"
اتمنى تكونون حبيتوها وتعلمتوا منها ومن تجارب الابطال بيها..
شكرًا لكل شخص قرئها وشجعني، شكرًا لوجودكم ولدعمكم، ممتنة فعلًا 🦋🖤.

رح ابدي برواية ثانية جديدة وحقيقية، فكرتها قوية ومميزة، اذا تحبون ضيفوها لمكتبتكم حتى يوصللكم اشعار فور نزول البارت الاول منها، هذي رح تلكوها بحسابي:

#الكاتبة نورمين