خذ بيدي ولا تسألني الفصل العاشر 10 - بقلم نهى

خُذ بيدي ولاتسألني
للكاتبة nuha-d-h

رضوان عقدت على رونق وسمعت صوتها من ورة الباب بس صوتها عجيب بي بحة تجنن تجذب
هسة انة شلطشت بصوتها
طلبت من هاجرخ ان تبقى لان هي الوحيدة المسالمة وتكدر تدخل وتحجي وية رونق حلو اسمها بس ملايك عليها

رحت حملت الجنط وصعدتهن بالسيارة وكانت اغلب الاشياء لكرار لازم اشتريلة سرير لان هو جاي يكبر وهاي الحمالة صغيرة عليه راح اسويلة غرفة مال اطفال بس خلي تستقر هناك
والبارحة من نهيت الانصال من رونق طلعت گبل اشتريت غرفة تركية الهة ما اريدها تحتاج شي

صحت على هاجر حتى تنطي خبر لرونق علمود تصعد بالسيارة شفتها لابسة العباية وتبجي عبالك ميتلها واحد هسة الي يسمعها ميت عليها والله على هاي الحسبة تحلم اقترب منها
وشفتها حضنت هاي البنية الصغيرة اللباسة اسود الي كانت البارحة وياهة
اجت هاجر علية وبيدها كرار واني التهيت بهاجر وسمعت صوت باب السيارة الخلفي انفتح وركبت ومحجت اي شي
يالله بعد احسن انة هم ماعندي شي احجي
بس هاجر تلاعب بكرار وتسولف وياه عبالك عندها لعابة
وصلنا على بيت اهلي ودخلت السيارة عالگراج
نزلت والتهيت بالجنط انزل بيهم وهاجر اخذت رونق وكرار ودخلتهم على البيت واليوم اني مسوي عزيمة وجامع اخواني واولادهم وزوجاتهم واختي ورجلها واولادها حتى اعرفهم على رونق وكرار
المهم دخلت لكيت الكل متجمع

فشفت هاجر ورنق صاعدات فوك واني طلبت من ضياء يصعد وياي الجنط

رونق
بعد ما ودعت البنات وخالة ام مروة وبجيت اني وياهم
ام مروة وهي تبجي -حبيبتي رونق مو تنسينا هم خلينا نشوفج انتي وكرار راح نشتاق الكم
-ان شاء الله خالة
اخذنا رضوان لبيتهم هو واختة وابد محجة شي وياي
اول ما وصلنا لبيتهم ما شاء الله تبارك الرحمان كلش حلو ومرتب يمة اشوفها امة شايفة حالها ومتكبرة علية طبعاً شي اكيد تشوفني مو من مستواها

دخلنا جوة واخذتني هاجر بوجهي فوك گالت حتى تبدلين وترتاحين
دخلتني على سويت كلش حلو ومؤثث ومرتب بي غرفتين وصالة صغيرة وحمام داخل الغرفة الرئيسية
هاجر-هذا السويت مالتج انتي ورضوان
رونق اني ما اعرف ليش نغزني گلبي من حجت هيج
دخلتني لغرفة النوم وجابت لي جنطت كرار ونزعت الجبة مالتي وبقيت بس بالدشداشة السودة والشال الاسود
هاجر -نزعي شالج محد راح يدخل عليج اخذي راحتج
اني هم ماكلت باطل گبل نزعتة لان خنگني وخلصت تبديل كرار دخلت ع الحمام وغسلت وجهي
وطلعت شفت هاجر تلعب كرار على السرير وشافتني بدون حجاب بس جنت مسوية شعري كباية
هاجر-رونق بالله فتحي شعرج خل اشوفة والله اخذني الفضول اريد اشوفة
رونق ابتسمت لهاجر
-ترة مو حلو كلش لان هاملتة
وكعدت افتحة ونزلتة والله من كد ما الدنيا شاغلتني عن حالي ابد ممنتبه عليه طولان
هاجر-ما شاء الله انتي بالحجاب حلوة
ومن تنزعين الشال تجننين يعني ابد مو انتي وشعرج كلش حلو
اقتربت مني وصارت وراي وكعدت تلعب بي. وتنثر بي
طبعا هاجر طفلة بجسم مرة كلش بريئة

رضوان دخلت على السويت وشفت هاجر طلعت وسدت باب الغرفة وراهة
-هَـا هجورة لكيتيلج صديقة جديدة
-اي والله واحلى صديقة اشكد حبابة

رحت عالغرفة جفتت حتى اگللها تحضر نفسها حتى تنزل وياي علمود اعرفها على اهلي
لكن اني دخلت واني هنااااااا انصدمت صدمة حياتي
شفت بنية عليها حسن يبهر النظر وشفتها ملتهية نايمة على السرير وشعرها بصفها منثور وشايلة ابنها رافعتة للاعلى وتلعب بي
رضوان مصدوم معقولة هي هاي رونق لعد ذيج منو
اهو هاي شنو تاهت علية يعني هاي نفسها البنية الصغيرة اخ الله
كلة منج يمة الله يسامح بربج هاي ينگال عليها عجيز
استغفر الله
شفت كرار وهو يناغي وهي تضحكلة وتسولف وياه
وانة گلبي راح وگع ومحد سمة عليه
رضوان-احم احم
انتبهت عليها شلون شهگت وگامت بسرعة نزلت كرار على السرير وبسرعة جرت شالها وخلتة فوك راسها وبقت اطراف شعرها طالعة
رونق بارتباك -اة اة رضوان منتبهت عليك ليش مدگيت الباب قبل لتدخل
رضوان هلة هلة راح تشتغل علية بهذا صوتها والله رحت بيها
بالله هاي شلون راح اكدر اتجاوزها واصير وياهة رجل شهم وما اقترب عليها
ولا انة البطران ما اريد حقوقي يا حقوقي
وانت بس وكعت عينك عليها فهيت
رضوان وهو منزل عينة من عليها ممصدگ ان هاي هي نفسها الي جانت وية المرة الجبيرة استغفر الله يارب
رضوان -وليش ادك الباب شنو تردين مني استأذن حتى ادخل على زوجتي لغرفتها هاي وين گاعدين
رونق وصار وجها احمر من الخجل
-اة اة لا مو قصدي بس انت گلت تاخذون راحتكم لوحدكم بس اهم شي احنا نصير قريبين عليك
وهذا هو الي ردتة انت صار
ارجو ان تظل ملتزم بكلمتك وياريت متتمادة وياي

رضوان -اگول ترة انة الي اقرر ان اتخذج الي زوجة لو اتركج براحتج مو انتي الي تفرضين علية
هاي وحدة ثاني شي مو انتي تعليمني استأذن
وثالث شي ترة انة مميت عليج وجبتج هنا الله وكيلج ترة كل الموضوع وما فية كرار امانة
وانة حتى وان قررت ما المسج او اقترب منج واخذ حقوقي منج مو لان انتي گلتي
لا اني حبيت انطيج مجال حتى تتعودين علية وتتعرفين على اطباعي
ترة مو لهدرجة كاتل نفسي عالزواج فلا تگعدين كل ساعة تشمرين بالحجي
وبعد خلي ببالج ما احب المرة التتجاوز وتتطاول بالكلام وية رجلها سواء كنا لوحدنا او وية اهلي

رونق والدمعة تلعب بعينهة هي تعرف شلون
تحترم الرجال وتقدرة وابد متطلع سر بيتها ولايوم صارت مشكلة وية قصي واتجاوزت عليه او اطاولت عليه بالكلام بس كل ما هنالك هو غريب علية وبعدني ما اعرفة
رونق -اني اعرف بالاصول واعرف شلون المرية تعامل رجلها لكن اني كل ما هنالك ما اعرفك غريب علية فلا تضغط علية وانطيني مجال اتعرف عليك بيها بس والله صعبة علية بعدني مناسية ريحة قصي فلتخليني بهيج موقف صعب كل الي اطلبة منك الصبر علية بس

رضوان هي تحجي واني اتابع كل حرف يطلع من بين شفايفها وهاي نبرت الصوت المبحوح غير تموتني اريد اعرف هاي من الله هيج صوتها لو هي متعمدة تلحن بالكلمة زين الصوت افتهمنا زين والشفايف خو هذني قصة لوحدهن

جريت حسرة واتقدمت منها لا اراديا والله ماحسيت على نفسي من اتقدمت منها وسحبت شالها على كيف
وبعدين دنگت راسي وقربتة من وجها انتبهت عليها شلون غمضت عيونها والشفايف شلون ضلن يرجفن مثل شفايف الطفلة من تريد تبجي

ربي هاي شنو حلها بالله شحطلها وتطيب كمت بستها من راسها وشميت عطرها هي محاطة عطر بس هذا عطر خاص بجسمها اله نكهة اوف يابة
يالله رضوان اتحرك وارجع لمكانك عيب ترة ستوها البنية تگلك احتاج مساحة حتى تاخذ راحتها وياك
بس من الله كل ممنوع مرغوب
رجعت بستها من راسها مرة لخ طبعا هذا الحجي انة ملازم جسمها يعني بس بستها من راسها
ابد ملزمتها گوة سيطرت على روحي خاف اتهور
رضوان-شوفي يبنت الناس اول شي الحجاب مينلبس وانة موجود بس كدام اهلي تلبسينة
والتردينة يصير انطيج فرصة حتى تبدين تتعرفين علية وتتقبليني لكن اريدج تصبرين على كلام امي واي واحد يحجي وياج او يسمعج كلمة
تعاي احجيلي وانة اخذلج حقج
وبالي وياج اشوفج تراددين باهلي
وخلي ببالج زواجنا طبيعي امام اهلي والكل
ومنا ورايح شتحتاجين انتي وكرار تجين تطلبي مني
لان اني هسة بعد زوجج ميحتاج تستحين

-وهسة اريدج تنزلين ماعندج غير هاي الدشداشة السودة
رونق-ليش شبيهة
رضوان -انة ما احب الاسود اختنك منة

هو ياماتحب الاسود بس غير الاسود عليها بلاء صاير عليها فتنة تجذب النظر
رونق وهي تحجي بأختناق
-يعني قصدك انزع الاسود هسة اليوم
رضوان
عودك انة ليش تفكيري وصخ صاير يعني البنية مكالت شي گالت (انزع الاسود )
يعني ليش عقلي حللها الى كلمات خلاعية يعني عبالك تكلي راح اتصلخ كدامك
اعوذ بالله انة اكيد انضربت بعقلي
رضوان-اي اريد تنزعين الاسود ترة هذا اول زواج الي
رونق -بس والله صعبة علية اذب الاسود
- يعني متشوفيها واكفة من يجون الناس ويشوفون العروسة لابسة اسود وانة رجال معروف والناس كلها راح تجي وتريد تعرف ووتشوف مرتي
وحضري نفسج راح يجون اقاربنا حتى من المحافظات يباركولي على زواجي و راح نسوي عزيمة جبيرة علمود عرسي لان مسويت عرس ابوي گال نسوي عزيمة ونعزم بيها الناس بدل العرس
فانتي اريد تحضرين نفسج وترتبيها
رونق-ترة اني مرتبة بس اةةة
رضوان-بدون بس اذا ماعندج ملابس ملونة اني اشوف يوم واخذج بيدي واشتريلج ملابس انتي وكروري
مد رضوان ايدة لرونق
نظرت لايدة الممدودة ورجعت رفعت راسها لرضوان
وخلت ايدها بتردد بيد رضوان وكامت
رضوان -لمي شعرج ولبسي حجابج وتعاي وياي حتى اعرفج على اهلي واخواني

رونق
اول منزلنا شفت اهله كلهم موجودين اخوانة ونسوانهم واولادهم وبناتهم واختة فاتن ام احمد ولاولادها وبناتها وابوه وامة ما شاء الله عائلة جبيرة وعندة جدتة هم گاعدة وياهم مرة كلش جبيرة رحت سلمت على ابوه وامة وبستهم من راسهم بس امة مبين عليها حيل صعبة
اما البقية كلهم زينين اجو البنات زوجات اخوانه سلمو علية وخطية هاجر اجت گعدت بصفي وكعدت تعرفني على واحد واحد بيهم لكن وصلت لولد شاب تقريباً يصير اكبر مني بكم سنة مو هواي
اسمة ضياء اشو هذا اكلني اكل بعيونة ما ارتاحيت
ضياء وهو عينة على رونق-اگول يوووم وين العجيز الي گلتي عليها اشو ما داشوف عجوز
ام رضوان-دنجب واكل تبن يالله روح اكعد يم اخوانك شعندك كارص هنا يم البنات
ضياء وهو يمد ايدة يسلم على رونق
-اني ضياء بزر الگعدة واخر العنقود
رونق شنو هذا اشو مد ايدة لايكون يريدني اصافحة
التفتت على رضوان كان يراقبني ويراقب تصرفات اخوه
-هلة بيك اخوية اتشرفت بمعرفتك
بس ممديت ايدي للسلام اشوفها واكفة معجبني احس بي يستغل الموقف حتى يقترب مني
شفت رضوان ابتسم على شكل ضياء الي انقصف وظلت ايدة ممدودة بالهوى
نزل ايدة وخزرني
يمة هذا شبي مخبل بكل عقلة
اجو بنات اخو رضوان واخذو مني كرار يلعبونة

اسمع الاولاد شي يصيح لرضوان عمو وشي يصيحلة خالو بس الظاهر حيل يحبون رضوان
وانتبهت على رضوان شلون يسولف وية خوانة منطلق
وعرفت شغلة جديدة عن رضوان ان الكل يحترمة ويسمع كلمتة وكأنه هو الجبير
گعدت اراقب رضوان وتصرفاته ردت اعرف كل صغيرة وكل جبيرة عنة حتى افتهمة
لان لازم اتقبل الوضع الي انجبرت عليه
على الاقل احاول لخاطر كرار ابني يستحق حياة طبيعية
شفتهم فرشو السفرة وبدو يصبون غدا ردت اكوم اساعدهم شفت رضوان اشرلي ب لا يعني ما اروح اساعدهم وانتبهت على رضوان گام من مكانه واخذ كرار من ايد ابن اخوه كان شايلة ويلعبة وضل رضوان يلعب بكرار الي من شاف رضوان بدة يناغي والجهال متجمعين عليه لان كان كرار كلش حلو ودبدوب وشعرة سرح وابيض مثلي وخدودة حمرات صارو من البوس
ام رضوان-ايه هاي تاليتك ييمة تباري لاولاد الغرب لعد شبقيت لبزرك
رضوان
اشتغلت رحمة الله
-يمة هذا وليدي الي اول مطلع عالدنيا شلتة بيدي وسميتة واذنت باذنة ترة ماكو فرق عن بزري فلا تحطين ببالج هذا ابني الجبير ومن هسة راح اسجل قطعة ارض باسمة وهاي كدام الكل منا ررايح تصيحوني بابو كرار
فاهمين
اخو رضوان الجبير وهو يضحك
-صار ابو كرار تتدلل
رونق من سمعت حجي رضوان حسيت بفرحة ما اعرف ليش
وكأنه كرار صدك ابنة احمدك واشكرك يا رب على الاقل ابني يستقبلونة ويحسسونة ان هو ابنهم خطية كروري ربي يحنن گلوبهم عليه
كام رضوان وانطاني كرار
رضوان وبصوت هامس
-كومي اتغدي وتعاي كعدي بصفي عالسفرة
رونق ما اعرف ليش كلامة وياي كلة اوامر وكانما عندة جندي التفتت شفت امة تخزر بية درت وجهي عنها صارت عيني بعين ضياء الي رفع تك حاجب ونصف ابتسامة
رحت كعدت بصف رضوان ادور الحماية
و بالغلط طخت رجلي برجلة لان كان هو متربع واني طويت سيقاني جواي بس ما اعرف شحسيت من گعدت بصفة حسيت بالانتماء لهذا الرجل بحد ذاته حماية

يتبع