خذ بيدي ولا تسألني الفصل الخامس والعشرون 25 - بقلم نهى

خُذ بيدي ولاتسألني
بقلم الكاتبة nuha-d-h

كنت گاعدة جسمي كلة يرجف من فوك ليجوة
منتظرة رحمة الله
دخيلك يارب هاي وين جانتلي
ربي الطف بحالي
يمة هسة وين انطي وجهي منو راح يوصل خبر لسهير او لعيالي المصيبة حتى نقال ماجوة ايدي
شراح يگولون علية ومنو راح يصدكني

ظليت اباوع على البنات حولي استغفر الله شكولهن تخوف
شفت وحدة طلعت جيكارة
وتحجي وية وحدة گاعدة بصفها
-هاج اخذيلج نفس وبردي اعصابج ترة الله وكيلج مراح يكدرون يسون شي
ميطلع بيدهم شي ميكدرون علينا
هسة اشارة وحدة مني شوفي شلون مركز الشرطة راح يحترك على روسهم
رونق
يمة كلما اتذكر
بيوم دخل علية هذا الرجال السكران يترنح وراد يهجم ويعتدي علية والله جسمي كلة يقشعر
بلحضتها ايست من رحمة الله وحسيت بروحي ضعت
واسودت الدنيا بوجهي
شنو ومنو وشديصير
شفتة اقترب مني كانت نيتة واضحة شنو يريد يسوي بية
صرخت بصوت عالي خايفة
شفتة لزم زندي واني دفعتة قوي وردت اركض
سحبني من شالي من الخلف حيل حسيت بروحي انشنقت وخنكني
جنت ارجف اريد بس اخلص روحي نزعت الشال وانسحب بيدة وطلعت اركض مفرعة واول ما فتحت الباب
شفت ضابط ومجموعة وياه مفرزة
الضابط -هاك استلم اخذ هذولي الثنين وية البقية وياك للمركز
سمعت الضابط يفر بيدة ويگول والله عمي خوش
بيت دعارة يلفي شكول حلوة
لطمت على وجهي بخوف
-لا عزة شنو بيت دعارة
لاعفية اني جاية عالخياطة عندنا خياط يمهة
عفية حبوبي اذا متصدگ اسأل المرية الجبيرة هي راح تكلك
زمخ بوجهي بصوت عالي
- دمشي لج امشي كدامي شلون فلم مسويتلها
عودك هناك من تشرفينا بالمركز
اسألج المرية الجبيرة
دار وجه على الضابط الي وياه
وهو يفر بيدة
-والله يالله تريدني اصدك فلمها
زين اذا خياطة شجنتي تسوين بالغرفة لوحدكم انتي وهذا المطي
وزمخ بوجهي بصوت عالي مرة لخ
وسحبوني وية البنات البقية واخذني للمركز
سمعت
وحدة من البنات صغيرة يطلع عمرها ١٨سنة تكول
-اگول باجي اشو جماعتج اليوم منطوج خبر
راح يسون علينا كبسة
درت وجهي على الباجي وشفت نفسها المرية الي حجت وياهة سهير
جاوبت البنية
-اهوووو هاني سدة لحلكك كافي بلا اسئلة غبية مثلك

اني شهگت درت وجهي اريد اشوف وينة هاني التفتت
مشفت ولد ويانة بالسجن كلها بنات
-اوف باجي هسة اني شحجيت مكلت شي بس ردت اعرف
-اگلك تگوم من يمي لا انطيك دفرة اگطع نفسك بيها
يالله كوم منا
لاحلت بركة بيك

اني ظليت فاتحة حلكي هاي شنو تحجي وية البنية
بصيغة الولد
سمعت البنية الي فتحتلي الباب اليوم
-اكلك انتة ليش ما اخذوك وية الزلم لو مصدك نفسك مرة
شفت هاي الي اسمها هاني
يمة عزة هذا ولد
يمة دخيلك يارب والله معرفتة ولد الا من هو مدري هي
حجة بنفسه دخيلك يالله هاي الدنيا راح تنگلب بينا من ورة هالسوالف
اووووف هسة اني بيا حال وكاعدة دايخة بهذولي
يارب شنو حلها سالفتي
سمعت واحد نادة باسمي واسم كم بنية والمرية وصاحولنا بالمركز
دخلت لغرفة المحقق
واول مدخلنا اني والبنات
كعد يستجوب البنات
واتخبلت ان هذا بيت دعارة
رونق شهكت بخوف وگعدت تترجة الضابط
-خوية داخلة على عرضك والله اني مو وياهم ولا اعرفهم اني اجيت حتى اخذ الخياط من الخياطة الي موجودة عايشة عندهم
هياتة هاي اسألهة
التفتت على المرية
الضابط شكلة يعرف المرة ومو اول مرة تشرفهم بالمركز
-اي فوزية الحبابة احجيلنا صرتي تشتغلين خياطة
-لا باشا هاي جذابة هي دائما تجينا للبيت
هاي مو اول مرة جايتني لتسوي روحها بريئة
الفتت علية الضابط وسألني

رونق - اني صحيح داخلة لبيتها مرتين
لكن بصفتها خياطة ودخلت وية بنت عمي
دز عليها وتأكد
الضابط هز ايدة وكأنه ممصدكني
اني جمد دمي بعروگي وهذا الحجي ادموعي عشرة عشرة حسيت اكو مغص ببطني صار

والمصيبة مو هنا الميصبة الي وگعت على راسي من
المرية شهدت ضدي
وين انطي وجهي عزة العزاني شلون اذا عرفوا عيالي
بمصيبتي والله اتطلگ
شلون ياربي

رجعوني اني والبنات للحبس
واني ميتة خوف وما اعرف شنو مصيري
يمة سودة علية هسة كرار شيسوي يمكن مفرفح من البجي
شلون اذا درة رضوان بالموضوع
گعدت ظليت اتسمع لكلام البنات بينهم
وگف شعر راسي من حجيهن
كعد دماغي يحلل اني شلون وصلت لهذا المكان
يعني معقولة سهير تعرف بيهم بيت مو زين ودزتني الة
لا مستحيل مهما كان
اني ابقى بنت عمها

ورة اربع ساعات
صاحو اسامي المرية والحبربشية مالتها وطلعوهم
اتخبلت من سمعت افراج
هاي شلون واني
كمت من مكاني وركض عالباب
وحجيت وية آمر السجن
-خوية عفية اشو هذني طلعن واني بقيت
-بعدة محد اجة عليج يدفع كفالتج
رجعت لمكاني
وكعدت بالزوية والخوف اخذ مني كل طاقتي
حسيت ظلمت الدنيا بوجهي

والله ورة ساعة صاحو اسمي كمت ركض عالباب اريد اعرف مصيري حتى لو اموت ميخالف ولا ابقى بتحطيم الاعصاب والترقب
التفكير راح يجنني

اول ما دخلت صار بوجهي لؤي وعمتي
اني شفتهم والافكار السودة والظنون هجمت فرد هجمة على راسي
لا لا يالله مستحيل معقولة هذا الحيوان نفذ تهديدة وياي
بعدين اتذكرت ان لؤي ضابط

ام رضوان -هَـا ولج يالعايقة شمصخمة
ولج هي هاي تاليتج
يلزموج ببيت دعارة
-عمة والله مظلومة وداعت كرار ابني
رحت لهذا البيت علمود اجيب الخياط لسهير بنت عمي
-واني شمدريني انتي تحجين الصدك
والشرطة
تكول القو القبض عليج ببيت مال دعارة
ولزموج انتي وواحد بفرد غرفة
رونق وهي تبجي مثل الطير المذبوح
-عمة ابوس ايدج صدگيني مظلومة اذا متصدكيني
روحي سئلي سهير بنت عمي
-ومنو يگول ما انتي وبنت عمج متفقات
على العموم اني اجيت ادفع كفالتج
الله ينطي لؤي الي وصل النا الخبر واني طلبت منة ميحجي
التفتت على لؤي باوعلي بنظرات كلها مكر
والله انعقد الساني وعقلي انشده
كنت مصدومة
سمعت بي يحجي وية عمتي گال راح اكفلها واخذيها وطلعي
مكدرت بوكتها احجي اي شي بس متأكدة ان لؤي ورة الموضوع بس شلون كدر يوصل لبنت عمي هاي الي
عقلي مكدر يربطها
مابيها مجال اني لازم احجي لعمتي عنهم لان
اذا درة رضوان والله يطلگني
ماكو واحد يقبل على مرتة يلقون عليها القبض ببيت دعارة

طلعت وية عمتي ام رضوان من المركز للبيت
وتركنا لؤي يكمل الاجراءات
ويجي ورانة

-عمة رضوان عرف بالسالفة ؟؟
-بعدين خل اوصل ويصير خير واجاوبج هسة منا السايق ما اكدر احجي شي
وصلنا ودخلت للبيت ورحت ركض على كرار
ابني وحضنتة وشميت صدره وهو سودة علية شلون ظل مجلب بية وميقبل يهدني حبيبي الظاهر جان خايف
ام رضوان -شوفي ولج رضوان سمع بالخبر
وگال اذا اجي واشوفها بالبيت ارتكب بيها جريمة
رونق وهي تلطم على خدها
-يعني شنو يعني رضوان عرف بالسالفة وصدك ان اني اسوي هيج شي
-اي ونصيحتي الج اخذي ابنج وشردي ولتوصلين لهذا البيت لان اعرف ابني مخبل يسويهة
ويذبحج واني ممستعدة اخلي ابني يدخل للسجن من وراج
اني ماعندي العشرة وافرط بي
فاحسنلج هسة تلمين غراضج وتطلعين
رونق
-اوكفي عمة قبل اي شي
راح احجيلج عن كلشي والله الشاهد على صحة كلامي
قبل فترة كان لؤي ابن اخوج بهددني ان اترك رضوان
واذا متركتة. راح يأذيني واني مكدرت احجيلج او احجي لرضوان لان الظروف الي مرت علينا بهذا البيت مسمحتلي احجيلكم عن تهديد لؤي
لان خفت عليج انتي مريضة
ورضوان انشغل بالدوام
وضياء انتي وياه مشاكل فما صارت الي فرصة احجيلكم
واني متأكدة ان ورة سالفة بيت الدعارة لؤي
-امشي ولج سااااق.....
تتبلين على ابن اخوي
حتى تنفذين بجلدج
الله ياخذج ويريحني منج
هي هاي تاليتها فوك ما الولد
عمل باصلة وسوة فضل وطلعج
تگومين تشمرين بلاج عليه
-شوفي ولج ترة رضوان جاي بالطريق والله اذا شافج
يذبحج ويذبج للجلاب ومحد يسأل عنج

من سمعت كلام ام رضوان ايست اذن هي مراح تصدگني
وكلماتها الاخيرة كانت ترن باذني
يمة رضوان يذبحني
هاي تاليتي انقتل مظلومة
كمت على حيلي وصعدت لغرفتي
وطار كل تفكير من راسي
وصرت ما افكر بَـــاي شي غير شلون اخلص نفسي قبل لايوصل رضوان عالبيت
رحت ركض لميت غراضي وغراض كرار واخذت المستمسكات
واخذت جنطتي وطلعت بس قبل لا اطلع واني بباب الشارع شفت هاجر تبجي وتصيح على امها
اني هم منتظرت اعرف شنو جاي يصير جان كل همي
اشرد بروحي العزيزة قبل ليوصل رضوان ويشوفني ويذبحني
لان ادري بحظي مراح يصدگني

طلعت ميتة قهر من رضوان حتى مكلف نفسة يسألني گبل اعلن ان اني الغلط وصدگ ان اني يطلع مني هيج شي
فتحت باب البيت الخارجي
وبسرعة وطلعت
وبعدني مماشية خطوتين
طبگت يمي سيارة
التفتت شفت نزل منها ضياء وجهة مخطوف لونه
-رونق بسرعة صعدي بالسيارة ماكو وكت
-شنو شصاير ليش اصعد وياك شتريد تسوي بية
-رونق رحمة على والديج بلا اسئلة ماكو وكت صعدي وبعدين افهمج
والله لاول مرة اسلم نفسي بيد واحد ما اثق بي
بس قبل لا اصعد سلمت امري لله
احس بروحي متشتتة وضايعة
ما اعرف منو وياي ومنو ضدي

ركبت وياه وشخط سيارتة وطلع بينا
وهو يسب ويغلط
عزة هذا بس لا درة بسالفتي
رونق بخوف-ضياء وين ماخذني
ضياء وهو يتلفت ويباوع على مراية السيارة
والتفت علية بعد ربع ساعة من السياقة
-ماعندج واحد اوديج الة غير بنت عمج سهير
-لا ماعندي غير سهير بس ليش تسألني هذا السؤال
وليش انت تريد توديني
عفية شنو انت سمعت بالسالفة
ضياء وهو يرجع شعرة للخلف بارتباك
- لج رونق والله صعبة علية احجيلج ما ادري بيا وجه احجي بالي عرفتة
بس لتخافين ترة اني اعرف كلشي عن الموضوع الي تورطتي بي بس احتاج اامن عليج قبل لا اتصل على رضوان
وعلى ما يجي لازم اامن عليج
انتظرة يوصل واحجيلة
لان السالفة متنحجي بالنقال
-ضياء عفية دبرني والله مظلومة
بس گلي انت شتعرف عني
-رونق لتخافين اني اعرف كلشي عن الموضوع وراح افهم رضوان عن كل الي سمعتة
بس بالاول خل اوصلج لبر الامان
رونق- ضياء شنو شصاير كلامك كلة بالالغاز
وليش تريد توديني مكان امن ليش شنو علية
قصدك خاف رضوان يلگاني ويذبحني
-لا رونق السالفة مو هيج بس اصبري علية
واوعدج احجيلج كلشي

- هذا هو انتظر منك تفهمني
راح ادليك على بيت صديقتي مروة همة الناس الوحيدين الي اامن على نفسي عندهم
ووصفتلة المكان

ضياء وهو يغير اتجاه السيارة ويروح على بيت صديقة رونق
-ضياء بس سؤال قبل لتوديني لبيت صديقتي
انت ليش متقبل اروح لبنت عمي سهير
-رونق صدگيني راح اشرحلج كلشي بس انطيني فرصة

بس خل اوصلج لبيت صديقتج وانتي انتظري هناك
وصلني لبيت صديقتي ودك الباب واني التهيت انزل بالغراض ومروة فتحت الباب لضياء وسلمت عليه بستغراب لان متعرفة وانتبهت علية واكفة ورة ضياء ورحت اتقدمت عليها وحضنتها واني ابجي
مروة بنظرات متفاجئة صاحت لامها
-يمة هاي رونق
خية شنو شبيج ولج شصاير
وطلعت ام مروة وسملت ودخلت رونق ومروة جوة والتفتت على ضياء
-تعال يمة اتفضل فهمنا شصاير
-خالة ماكو شي ان شاء الله بس كل الي اتمناه ان
تبقون رونق عندكم كم يوم منا لحد ما يهديء الوضع واني اجي اخذها منكم
وانهى كلامه وركب سيارتة واجرة اتصال كلش
مهم صار لازم واحد بينا يخلي حد لامي

دخلتني مروة للبيت واني منتهية من البجي يارب
ما اعرف شتصرف وعقلي من الحيرة راح يطك

ام مروة ظلت تواسي بية بعد محجيتلهم على الي صار بية وشلون عمتي خلصتني
-
ام مروة -عزة اصخام هاي شنو يعني بدون زعل خالة رونق اني من زمان محذرتج من هاي سهير
مو كلت هاي سم ليش كمتي تطلعين وياها
-خالة يعني شنو قصدج سهير متعمدة ودتني لهذا البيت
لا خالة مستحيل ممعقولة توصل بيها تسوي. ببنت عمها هيج شي زين شوصلها للؤي شلون عرفتة
-بكيفج يمة بس والله من خلال كلامج اني اشم ريحة مكيدة
زين اني مو كم مرة نبهتج متطلعين وية سهير ولا تتقربين منها كتلج هاي عگرب
-والله مطلعت وياهة غير للدكتورة الله وكيلج
شفتها كسرت خاطري مريضة
-والله يمة حتى لو تزعلين يكسر خاطري الجلب
وماينكسر خاطري على هاي بنت عمج

خالة اني كلش خايفة
عمتي گالت اذا رضوان عرف باسالفتي احتمال يذبحني

يتبع