رواية خيال الكحيلة الفصل الاول 1 - بقلم nashwa_alsltani

مساء الخير عليكم ...

شلونكم يارب اتكونون بخير ..

رجعت وياكم بقصة جديده  ان شاءالله تناال إعجابكم
القصه باللهجة الغربية الانبارية والمفردات اذا تحسوها صعبة
عليكم راح اكتب بين قوسسين معناهه لحتى تفهموها ..
وهيج راح تكون اللهجة مفهومه .. القصه عاطفية
وبيها جثير احداث حلوه ..متأكده راح تعجبكم

(كحلاء ) ...(سلطان العليان )

القصة حقيقية ..!!! ....

#الحلقه الاولى ..

#بقلمي #نشوى #السلطان ...
......................................
حين تكونين باحضاني لا تخافي من هم لحبنا مغاظون

أُريدك حباً واحتواءً ومنزلاً

استوطني في قلبي الذي تاه من نظرات عيناك

#خيال_الكحيلة
.................................................
كحلاء مواليد ... 93 ..من محافظة الانبار.. احنا بس اثنين اني واختي .. الأصغر مني ..
ولددت ببغداد. وعشت ببغداد كبرت وجنت اسمع عن الانبار

جان والدي يحجيلي .. عن عمامي عماتي اجدادي لكن اني مااعرف احد بيهم .. جنت  اشوفهم بس بالصور لمن جانت امي اتطلع

اللبومات الصور تكلي هاي عمتج هذا عمج .. لحد ما اجة اليوم الي الي بي سقطت بغداد وساء الوضع وبدت الطائفية انجبرنا نرجع

للانبار .. تركت بغداد و عيوني مليانه دموع .. جنت متعلقه بصديقتي حنين وجان دلعها حنونه

جانت هي احلى شي بالدنيا .. نومتنه وكعدتنه كلها سوه  جنت ماتخيل حياتي بدونها لكن فرقتنا الاقدار حيل .. انقهرت

على بيتنا الي عشت بي طفولتي على منطقتي   بوقتها كعدت من نومي لكيت امي وخالتي لامات كل الغراض ويفرغون بكنتوري

كمت الحيلي ماعرف شبيه كمت اشيل وياهم ساعدتهم بالغراض واني بصدمة والدمعه بطارف عيني لملمنا الغراض  سلمنه على

الجيران على خوالي وطلعنا .. اخذتنه  السياره ومشيت وعيني على عمو فلاح ابو الدكان الي جنت يوميه ارجع من دوامي لازم امر

عليه واشتري من عنده الي وال اختي ..
مشينا بالسياره ولعباتي بيدي حاضنتها وابجي ..كل شويه اندار على امي ... اكللها
ماما ماما .. خل نرررجع الله يخليج .. بيتنا شلون تعوفي... حنونة و مرجوحتي بقت بالحديقه...
زين الحديقه شلون راح نسگيه الورد الاشجار كلها راح تذبل

راح تمووووت حبابه ماما رجعيني...
وجانت هي عيونها مليانه دموع .. ادحگ عليها تندار ودحك من

الجام عااشارع.. تحاول تخفي حزنها .. تكولي لا ماما  مابقت النه عيشة بغداد .. طلعنا للانبار وصلنا الدنيا ليل احس جسمي مكسر

من الطريق والهوسة والبجي.. اتلكتنه جدتي الي هي الوحيده
جانت قريبة من عدنا .. جانو عمامي بعيدين حيل من عدنا

جانو مايحبون امي .. لان والدي ترك بنت عمه واتزوج غريبة
من ذاك اليوم عمامي واجدادي كلهم سحبوا نفسهم من عدنا ..

كبررت واني اسمع. بيهم بس ماشوفهم .. بعد مارجعنا للانبار
جنت بالبدايه حيل صعبة علية بس بعد فتره تعودت ورجعت اداوم

ومرت السنين وكبرت ودخلت الكلية .. وجنت حيل فرحانه بدراستي
رغم جانو عمامي محاربيني حرب حتى ادرك دراستي وجان دوم

يكلولي ماعنده حرمة تدخل كليه .. لكن اني اصراري وتشجبع امي
اليه دخلت الكليه وبيوم من الايام كعدت الصبح

طلعت من بيتنا واني امشي سريع .. دحگت السايق مو جاي جان بيتنه قريب على بيوت عمامي جانت المنطقه كلها اقرباء رغم هذا

اني جنت بعيده كل البعد عن اهل ابويه لان جانت عاداتهم تختلف جانو يحاسبوني على كلشي ... فطلعت.. مشيت حتى اطلع

عالشارع...كلت استغل الوقت .. اتأخرت على دوامي... واني اركض والجو جان حيل حلو ... نفتح قيطان الحذاء دنجت داشده

وجان اسمع صوت سيارات واني بعدني بالفرع .. رفعت راسي
شفت سيارات عسكريه طبت الشارعنا .. استغربت عليمن جايين

من الصبح .. كمت الحيلي طلعت عالشارع امشي واتلفت ورايه بقيت بالي يم السيارات العسكريه وين جايين وعليمن وصلت الشارع

العام .. انتظرت دقيقتين
وجان يوصل سائق الخط.. صعدت وطلعت للكليه ..تلكتني صديقتي

مريم ..كالت وينج تأخرتي ...كتله المنبه مادگ اليوم شمدريني
كالت امشي هسه الاستاذ ينتظرنا.....طبيت للقاعه..
لكيت استاذ.. محمد موجود...

سلمت .. صباح الخير... جان يندار...

_ صباح النور... اليوم كحلاء متأخره الي اعرفه كحلاء ماتتأخر عن دوامها...

_ ابتسمت ودنجت راسي كتلو..والله المنبه مادك ومدري شلون كعدت ...

ضحك وكال... عادي ماصار شي تفضلي ...

شكرته وكعدت اني ومريم... جان يشرح واني احس منعسه ماعرف خمول .. شبيه اليوم موطبيعيه.. يمكن لان تأخرت بالليل مانمت وماشبعانه نوم.. كملت المحاضره طلعت التلفون من جنطتي.. اريد اشوف امي متصله لو لا . جان اسمع صوت الاستاذ وهي يكول كحلاء!! .. رفعت راسي ...دحكت القاعه فارغه .. وكفت الحيلي ..
همست نعم استاذ...

كال... خير... كحلاء اكو شي ... اليوم ماكو الضحكة على وجهج مامتعود اشوفج هيج..!

دنكت وبتمست كتلو والله ماكو شي بس اني بالليل ماشبعانه نوم يمكن
لان نعسانه..

_ شال الكتاب والقلم.. وكال كسووولة .. من ترجعين نامي واشبعي نوم.. ابتسم وطلع...

..ضحكت من كال هيج .. شلت كتابي وطلعت.. وراه  للحديقه لكيت مريم كاعده هي والبنات.. دحكت على ايدي

صارت الساعه 11 الصبح .. وبالعاده جانت امي تتصل لو اختي تطمن عليه استغربت مااكو اليوم اتصال منهم .. ماعرف ليش

جنت حاسه بخوووف .. رصيد ماجان عندي... حتى اتصل بيهم
ماصدكت يخلص الدوام حتى ارجع......

مر الوقت اجاني سايق الخط... ورجعت للبيت... نزلني قريب من الباب.. دحگت واني دانزل سيارة عمي والبيكم واگفه وليغاد سيارة

خالي .. بحزتها نشف دمي... طبكت باب السياره.. مشيت خطوة ..
وجان اسمع صوت ابن عمي.. ذياب...كال..شرفت الاخت.. يحجي بستهزاء ..

رفعت راسي.. بقيت ساكته مارديت.. لكيته بصف الباب واكف وبيده السبحة يفر بيها... هففف هذا شجابه اليوم متعود كل مايشوفني يغثني... مشت جان يكول

_ اكفي مو دتشوفيني داحجي وين رايده..

وكفت دحكت عليه .. كتله نعم شرايد..!

\ احجي عدل لا اكسر راسج يولي... شبيج جن مو عاجبج

\ تره كلت نعم شرايد ماكلت شي... ممكن افوت

_ اني مو كتلج غطي شعرج زين.. شكتلج اني مو كتلج هاللبس مايمشي عدنا انتي ليش عينج گويه...

-هسه انت شتريد مني ابويه وراضي انت ليش ادخل نفسك

_ ادخل نفسي ونص بنت عمي انتي .. يعني تهميني.. والماتسمع الكلمة ينكسر راسها...

_ رجاءا كافي .. بنت عمك اي بس مالك حق تدخل.. حجيته بعصبيه ... عبرت وجان يكضب ايدي..  بقوه كال يولي ..

اسمعي الكلمة تره احرم عليج تطلعين الباب.. وانعل ابو الكليه
اتفرفرين بنص الزلم .. يول انتي ماكو زلمة يردعج...

سحبت ايدي بقوة... خنزت بوجهه كتله ايااااااك تكضب ايدي نوبه الخ .. اطب اطلع ماااااعليك بيه
عفته وطبيت... حسيته مشه ورايه ماهتميت.. فتحت الباب لكيت

جدتي يمنه وخالي .. ومي كاعده بالزويه وتبجي .. وجدتي مرتجية
عل حايط والفوطه على وجهه.. اختي كاعده بصف خالي...

اريد اكف على حيييلي ماكدر... صحت شكوووو شبيكم ..
امي شبيها...

_ ذياب... ماكو شي بس عمي اخذوه..

انداريت عليه... كتله شنوووو منو اخذه...

صاح خالي تعاي اكعدي كحلاء... كومي سراب جيبيلها ماي...

كتلهم ... ابويه وييييييين... اتذكرت السيارات العسكريه الي اتلكتني
عطت يعني سجنووو ابويه ليييييش...
حجت امي بصوت مخنوك كالت ماله حظ ابوج .. تعاي اكعدي
والنا الله بلكي يطلع ادعوووله ..

ذبيت البيدي .. كعدت يم خاالي كتله خالو ابويه مريض شلون يطب للسجن تدري بي سكر وضغط شلوون نعوفه كومو شو ساكتيييين
كمت الحيلي صحت وين اروح وين مسجووون دلوني..

صاحت جدتي تعاي يمة وين تريدين الزلم هي تروح اركحي يايمه
فوگ قهرنه تزيديها علينه دكعدي...

_ جده ابويه تعباااااان تعرفين شنو تعباااان انتو ماتدرون عنه وابويه من يصعد السكر ينتهي.. هسه من القهر ويعرف احنه وحدنه
شراح يصيرر بيه يمة احجي ليش تبجين تره البجي مايسوي شي

_ ذياااب.. ماكو وحدكم اني موجود .. واحنا نروح للسجن ونحل سالفتو.. ماكو نسوان تطلع... اكعدي واسكتي... وين تريدين

_ كتله هسه صرت موجود انت مو عفتونا مو جنتو حتى متبرين من عدنا.. من شوكت هالحجي.. اني ماسكت راح امشي بنفسي وادور على ابويه بالسجوون واعرف سالفتوا...

_ خاطرادفنج  وانتي عدلة  .. دطلعي الباب وشوفي شيصير بيج
ول انتي شنو من بنت ماتسكتين ... ماتكعدين ... مطلعه شعرج جدام الزلم .. وهذا لبسج... اكول عمتي .. ماتشوفين بنتكم شتلبس ها
يعني عاجبتكم وضعيتها .. اني راح اكضبلها الباب دشوف بعد
منا وهيج شلون تلبسين هيج لبيس...

كحلاء... دحگتله بنظرة .. كتله احنا ويييين وانت وين .... بعد ابويه مانسجن وتريد تتحكم بينه.....كااااااااافي.. احنا بيا حال...

جان يگوم خالي ...ادهام.. كالو كافي مو وكت هالحجي اذا ابوهم ماموجود ف اني مسؤل عنهم لحد يدخل نفسه..

راد يحجي هو تخوصر وكف بوجهه خالي جان تكوم جدتي مدري شاورته وسكت.. طلع جكارتو وطلع وكف بالطرمة..

بقينه يومين ماكو  خبر عن ابويه ... واني عفت دوامي وهملت كلشي ... ليل نهار حابسه نفسي بغرفتي.. القهر كتلني ..

ادحگ على امي تكسر الگلب لا عدنا اخ سند النه اختي اصغر مني
واني الجبيره شلون ياربي  اذا ابويه صار بي شي يمكن اموت اريد

اكل ماكدر من اتذكر هو بالسجن اموت الف موته
كمت توضيت وصليت ودعيت ربي

يردلي ابويه سالم ويحفظ امي ويخليهم خيمه على راسنه...
شلت السجاده خليته على صفحة.. وجان اسمع امي تكول اي يالله

ربي يبشرك بالخير.. من كالت هيج اهجس روحي طارت...
طلعت اركض.. دحكت من الدرج واكف خالي ادهام وذياب..

بدون شعور حدرت اركض...  واني لابسه حجاب الصلاة تلكتني سراب .. كالت لكو ابويه ولج لكوووو ابويه

بدون شعور من كالت لكووو حضنتها واثنينه بجينه.. دحكت الخالي
كتله خالو وينه ابويه شلونه شفته...

_ ذياب... هم زين من لبست حجاب .. وتسترتي.. عاد والله ينراد الها حظ وبخت...

_عفته يحجي مارديت.. كتله خالو حاجيني ابويه شلونه

_ ادهام .. سألت عنه كالو الحمدلله زين لا تخافين..

_ عجل خل نروح نزوره زين شكالولك شوكت يطلع...

_ ذياب وين تولين وين ولج انتي ليش ماتثكلين...

_ انداريت عليه  وتخرصرت كتله والتالي... مكافي عاد ابويه واريد اشوفه ليش تحاول تمنعني....

_ ماعنده بنوات تروح للسحن اكعدي لا اكسر رجلج اهينه واخليج تحلمين تشوفين الباب...

_ انت الحجي وياك مايفيد خل اسكت.... داحجي وياه وجان يلوي ايدي جدام امي وخالي كال.. اركحي تره وربج احرمج تشوفين

الدرب... جان خالي يصيح بي وسحب ايدي من عنده..
امي حانت حيل تخاف... كامت تسكت بيه ... سكتت وكفت على

صفحة وهو شال التلفون وطلع يخابر... كعدنه كلنه كتلهم خل نفتهم شنو الي راح نسوي...

_ دهام... والله الشغلة مو هينه ابوج متهوم بشغلة جبيره ..
تاهمي ويا داعش... ولازم محامي شاطر

_ من كال هيج اني كمت اضرب على وجهي هين حسيت انتهت حياتي.. احس الدنيا خلصت كتله خالوووو شتحجي ابويه انسان مسالم شنو داعش شبيهم...

_ ادهام .. ادري مسالم بس ناس ماتخاف الله خلو اسمه .. خل نشوف شلون نحلها...

-طب يمشي ذياب كال راح اروح اني عندي شغل خابروني
اذا صار شي جديد خابروني.. شال السويج ومشة وكف يم عتبت

الباب وصد عليه.. كال طلعه من البيت ماكووو افتهمتي...
كال هيج وطلع...

ياربي شلون يطلعني من طوري هذا...  باوعت على امي اشرتلي بيدها كالت عوفي...

ثاني يوم صبح طلع خالي يشوف محامي...

واني مكابله الباب كل مايندك اكول ابويه واطلع اركض
سراب تروح وتجي للدوام واني بقيت يم امي لا رحت ولا شفت

كليتي من يوم الي نحبس ابويه .. احس حتى دماغي وكف..
طبيت للمطبخ .. لكيت امي كاعده تسوي بالغده..

سحبت الكرسي وكعدت يمها... كتله يمه خل خالي يودي الدوه الابويه بلكي يقبلون يفوتو اذا بقى هيج شلون.. داحجي وياهه وجان

الباب يندك كتلها .. هاي جة خالي يمكن .. طلعت اركض 
للطرمة.. فتحت الباب.. جنت لابسه دشداشه حمره ربع ردن ورافعه شعري عالي... لين كبالي صار ذياب وبيده علاكات ... فتحت الباب وهو بقى صافن بوجهي..

كتله عبالي خالي تفضل.. احجي وياه وهو بس صافن..

كتله شنو هاي البيدك.. شجايب..

كال يولي ليش ماترحميني....

_ كحلاء... نعم...

ذياب.. فوتي فوتي... عمتي وين..

مشيت جدامه كتله امي جوه... وصلت باب الربعه..

وجان اسمع صوت مريم.. صاحت كحلاء.. انداريت كتله مريووومة تعالي.. طلعت ركض عليه سلمت.. وذياب بس صافن.. علينا

كال مريووووومة... وكام يفر بيدة مدري شيدردم طب جدامنه

كالت ابن عمج هذا مو..

كتله اي تعاي .. عوفي ابن عمي سألتي اخوووج لو لا..

_ مريم .. ااااي سألته ويايه اخبار حلوه ان شاءالله ...

_ كحلاء... بررررربج .. تعاي تعاي.. سحبتها وكعدنه عالمرجوحة.. كتله اححي كولي ولج شمنتظره..

_ اسمعي.. اخويه يداوم بحماية سلطان العليان وحامد العليان ..

_ صفنت عليه.. ومنو ذولة .. ياعليان يمعوده..

_ ولج شبيج سلطان العليان واخو ..ذولة معروفين وشيوخ يداوم بالبرلمان....

_ اي ومعقول راح نكدر نوصلله ويساعدنه .. وهو منو اصلا بحالنه يمعوده....

_ لا ماعليج اخويه كال خلي يجي احد منهم واني احصل الهم موعد وياه ... شبيج لا تبقين ساكته ابوج هيج حاله  وانتي الاستاذ كم مره. سأل عليج وماكتله والدها مسجون كتله ابوها مريض ..

_ ولج منو هو الساكت .. خل بس يجي خالي اروح اني وياه...

_ ذياب... وووووووين تريدين هااااا..؟

_صديت لين جدامي ذياب.. كتله مو شغلك ...

_ احاجيج ردي وين تريدين كتلج رجلج تنكسر ان عبرتي الباب

_ وكفت الحيلي .. كتلوووو والله اروح وادافع عن ابويه بنفسي
والله ماشفت زلم تجي وادور عليه حتى اكعد واسكت...

_ مريم ... شبيييج ولج على كيفج...

- ذياب.. ليش مو اني داركض ليل نهار هو منو الكاعد .. ولج اكضبي اللسانج لا تخليني اهينج...

كحلاء... اي بس انته اما عمامي محد جة ولا احد سأل شنو هالحقد الي عدهم .. صارلهم سنين حاقدين علينه والله شنو لان ابويه ماتزوج بنت عمه. كاااافي عاد

_ اسمعي عليه دفاتر عتگ لا ادورين كتلج اني موجود واني ادور
لو يكون مسجون اخر الدنيا ادور عليه بس انتي ماتطلعين

_ اني اريد اروح ويا اخوها وخالي ويايه ....

_ اي باله وين ...!

- البييت العليان....!!!!

وتستمر الحكايه.... ❤️

نشوى🧚‍♂️