رواية خيال الكحيلة الفصل الرابع وأربعون 44 - بقلم nashwa_alsltani

الثالث والاربعون

خيال #الكحيلة

#بقلمي_نشوى_السلطان🧚‍♂️

اخذني الواهس حلقه وره حلقه لل10 ونص اندك باب غرفتي كلت سلطان عبالو نايمه كلت

..فوووت

انفتح الباب لين محمد

اول مره محمد يدخل عليه

..هلا فوت

..خما ازعجتچ

..لا والله ابد

..اكول الله بالخير عليج عندي حجايه وياج

اي شكو خمو سلطان بي شي

لا يابه شبيج. مابي شي الحمدلله  بس مو راهمه هين نسولف
تعاي نطلع بره ...

يمه هبطت مو جهازه مغلق ... جايه جايه كمت الحيلي وهو مشة جدامي ...

محمد لا بس سالفتي .. سالفه  تعاي خل نكعد هين 
اني سألت شهد كالت كاعده بالغرفه وجيت

اي صحيح كاعده انتظر سلطان...

  نمشي ونحجي اني وياه طبيت للهول هدوء بس شهد بالمطبخ دتسوي اكل يمكن

كعدت  كتلو يا الله خيررر شكووو...

شوفي اخيتي انتي  والله مادري منين ابدي

كول اسمعك خير خمو اكو شي

لا لا بس السالفه ... اني رايد  بنيه  يعني احبها

هالله هالله اي كمل ... عدلت نفسي زين كعدت

هههه خل اكملج ... شوفي هاي البنيه عيوني ماتشوف غيرها
يعني ويا روحي تصعد وتنزل 

ياااااا عاشق محمد وماندري  اكول كبل تسمع الاغاني ومنطرب
وصفنه تجيبك وصفنه توديك

اااااخ شحجيلج .. والله معتلچ بنار عليها بس

اي بس شنو وينها هي منيه شو ماادري اني

ماتعرفيها اخيتي بس اني جيت هين رايدج فزعه وياي

عد عيناك والله ابشر بس شسوي يعني

رايدج تحاجين عمي تكوليلة  يقنع ابوي يخطبها لي 

ياااا يعني الشيخ مو راضي عليها  لوشنو

اي موراضي واني بقيت بين نارين لا بيه اعوفها ولا بيه اكسر حجاية الوالد

خطيه الله يعينك .. زين شنو اليمنع ليش مايقبل

يكول اخذ من بنواتنا .. عباله الشغله بس گبع واخذ
تره الگلب من يهوى مصيبة بعد لا بيدي ولا بيد احد
گلبي يهواهه وماهوى غيرها 

حقك والله صحيح ..انت كاعد تحجيلي اني كلهن جرن على اخيتك
بس محد يعرف شنو الانسان من يحب شخص ومابعد يحله بعينه غيرة... الله كريم اني بس يجي عمك راح احجي وياه

ماتقصرين والله ... انتظر منج خبر ...

تدلل اخويه والله شبيدي ماراح اقصر...

دانحجي وجان شهد تفوت ..... كالت هاااا خير شدتحجون

سمعت بطاري حب وفزعه

محمد ... يولي فارجيني لا ابتلي بيج ... شكو حاطه اذانج

حباب اخوي انت ... غير تححي الاخيتك تعاي كحلاء فهميني
شكو منو يحب منو يخطب ... اليوووووم لازم اعرف

محمد  اهوووو مگرود الينحط بالسانجن ... اروح اني ومثل ماكتلج
لا تقصرين بفزعة اخوج ...

تطمن والله ماراح اقصر

تسلمين الله يعزج اخيتي... يله من رخصتكم ....

كام محمد طب الغرفته ... وجت شهد

كابلتني .. هااااا احجي شكالج محمد المن يريد فهميني

وج شريددد مايريد...

لاااا اني سمعتو. اعرف والله يحب وحده تعلميني بي من زمان منتبه عليه

اي واشلوون انتبهتي ...

اني اعرفه والله المهم مني هاي....

دانحجي .. وجان يصير لايت عالشباك كتلها جة عمج

اهووو كحلاء دسولفيلي...

ماكو شي بعدين بعدين ... كمت الحيلي ... طلعت من باب الهول

دحكت ضرغام يسوق وسلطان كاعد بسده ... نزلو من السياره

نزلت سلطان يمشي ... وشايل بيدو اوراق ...

وصل ليمي  ابتسمت كتلو الحمدلله عالسلامة

الله يسلمج شلونج ...

زينه الحمدلله شكد اتصلت بيك مغلق خليت بالي

اي جنت بالمطار وخلص شحن تلفوني الخاص والثاني مغلق

تعاي فوتي ... كادني وطبينا نمشي ... للهول

ضرغام وراه فات ...

كعدنا راحت شهد جابت ماي الهم ..

سلطان وين فهد .. جابو محمد مو

اي نايم فهد ...

وين نايم ...

بالغرفه يم الحجيه ...

خمو يدور على امه ...

لا ولا سأل ابد

شهد شيدور هي ليل ونهار تكتل بي اصلا يلعب وفرحان ولا رايد شوفتها

سلطان اعلمها بعد منا وهيج شلون تكتله هين هين سهلة

ضرغام ... اكول مدام كاعدين واخيتي صارت زينه ...

ماراح تكطعولنا مهررر مو ذبحتوني ...

ضحكت كتلو حكك والله ...

سلطان ... يول ساعه 3 وربع وانت تسولف بالمهر...
خل تصبح الدنيا

هااا شوكت كل مااكول اتأجلوهااا ... اريد اخطب عاد مو
مابقى صبر وعيونك ...اريدددددددهاااااا شلون يعني اصيح اكعد اهل البيت

يووول شجاك هاليومين نروح بس لا اتخبل علينا

كحلاء ... ضحكت لمن صاح اريدهاااا كلت والله وسراب
طلعت جايبة الزلمة وليل نهار تعيب على فرده حذائي بسيطه خل اشوفج ست سراب ...

سلطان كومي خل انام تره مكسررر تكسررر ...

ضرغام هالله هالله بيني مو تنسانه يمعود ....

سهلة سهلة تبشر هاليومين ...

كحلاء كام سلطان صعد جدامي بمشي واني وراه..  كلت اليوم يوم الحب والخطوبات منا  محمد وهسة ضرغام  ...

طب سلطان وطبيت وراه سديت الباب...

كعدت عالسرير وهو كام يبدل... دنجت راسي شلت التلفون
للان احس نفسي اخجل منه ...

اشلونج اليوم ...

الحمدلله زينه 

اوديج باجر للدكتوره تشوف المكان

لا ماحجة الحمدلله طاب كل الحرق بس بقت اثار... 

وانتي شبيج مدنجة راسج...

لا بس داكلب بالجهاز ...

راح افوت اسبح عالسريع واطلع مااكدر انام ...

ماشي ...

طلع اخذ البرنص وياه ... كمت الحيلي كلت خل ابدل صارلي كم يوم هامله نفسي ... فتحت الكنتور طلعت ملابس  لبست  دشداشه قصيره
لون وردي ... فتحت شعري وتعطرت ... 

ورجعت تمددت بفراشي...

شوي وفات سلطان ... سابح ومكمل...  طبك الباب وراه وقفله 

كحيلة ملابسي وين ...

بمكانهن يمك ...

كومي انطينياهن كولي رجلي جة تعبان اساعدو

ابتسمت كتلو حقك ... كمت الحيلي فتحت الكنتور طلعت الملابس
انداريت هو واكف ورايه ... رفعت راسي واني خجلانه
جان لاف نفسه بالبرنص ..

كتلو هاي الملابس ...

اخذهن من ايدي  شمرهن عالجربايه اريد امشي خله ايده كبالي .. صارت جدام وجهي ..اريد اعبر ماكدرت ...  رفعت راسي عليه

واني ساكته بس بفس الوقت مستحيه كلش..

خلة ايده على حنجي ورفع راسي... 

اني هين كمت ابلع بزيگي مدري ليش تذكرت ليلة عرسنه

قرب نفسة وباسني من شفتي ...

رجع سحبني من خصري ... همس مشتاگ

بخجل وارتباك كتلو واني هم ... وخرر ايدة اريد اعبر
جرني علية ....

شبيج اتراجفين ومستحيه شبيج ابويه

لا لا عادي بس اريد انام

جهزي نفسج تره بعد مابيها ....

عرفت شنو يقصد بس ثولتها ... مشيت كعدت عالجربايه

اسمعه ايكول هين وين تروحين مني ... مارديت

جة يمشي وكف عالمرايه مشط شعره ...
دحك عليه بالمرايه  وكال .. شوكت يناسبج نخطب سراب الضرغام
مو هذا شيب اهلي ...

ههههه بكيفك

اي كلها راح تعرس الا اني ....

ليش شبيك انت عايزه تريد الثالثة

ليش هو اني شمفتهم من الثانيه ...

مممممم .. سكتت ...  شفته ديريد يبدل صديت وصرت اكلب بالتلفون ....

حسيته ورايه راح مشه طلع ملابس  بدل لابس بجامه وفانيله وجة يمي كعد...

كتلو اطفي الاناره ....

لا خليج ... كام   راح طفاهه وخله بس الكلوب  الهادء...

جة يمشي سحب الفراش وتمدد ... اني بسده بس كاعده

خليت التلفون عالميز ..

همس ها والتالي ...

صديت عليه كتلو شنو ...

سحب  ايدي  عليه

تعاي تعاي... سحبني عليه نومني على ذراعة

ماحنيتي يولي ما نكسر گلبج عليه ...

ابتسمت كتلو على شنو ...

هااا يعني ماتدرين على شنو...

ولج منو داعي عليه صار شكد معرس مامفتهم شي

سكتت ... واني ايديه على صدره ... سحبها وباسها

همس كحيلتي مدام صرتي زينه ...

كتلوواااااي .... اتذكرت من الدكتورا كالت تدخل جراحي هين
صدك خفت ... حجيت واني مرعوبه  اييييي وشنو يعني

هاااا هوب هوب لا تاكلينا يمعوده ...

اي كمل شتريد

يكولون صحت وتمحت وماظل للضيف حجة موو يابه

اييي يعني

يعني بعد مابيه اصبر تره صبرت جثيررر

سلطان حبيبي

هااا بعد حيلو

دحگ الشمس طلعت

لا بشرفج .. خاف اتشاقين عبالي عدها خبر 

سلطان خل انام ... مابقى وكت وانت تعبان

هاااااااااا ملعونه عليمن تلعبين يولي

سحبت اللحاف واني اضحك غطيت راسي

جرني علية وصار يبوس بيه

كتلو موووو اليوم حباب...

خلص مو اليووم يجرالج .... بس لا تنرعبين مني مستحيل اسوي شي انت خايفه منه ... ولج اني اخاف عليج اكثر من روحي

عجل بعدين حباب

خلص بعدين  ولو جدي شفتو بعيني بس هم يجرالج

سلطان 

ها يبعد الروح

... اسمعني  اميره اليوم جانت هين وجت تصيح وتهدد

اي اني مو كتلكم لا تخلوها تفوت شجابها

سلطان اذا اميره بيوم حاولت ترجع او فكرت ترجعها
والله العظيم لو الدنيا كلها تكف بوجهي اعوفك ..
مستحيل اكون زوجة واكو امراه اخرى تشاركني بيك

هههههه هسه انتي اخذتيني حاصل فاصل ام المشاركة
منو الكال راح ارجعها بيوم ولج خبله انتي ...

مادري خاف احد يضغط عليك ويكولك ام ابنك وخطيه تره ماكدر اتقبل هالشي ابدددد وان جان على فهد اني اربي والله اشيله بعيوني الاثنين

لا ابوي انتي ماتجي ولا تلفي ولا اريد اشوفها هاي انسانه مريضه
هسه اني ويييين جنت وين اخذتيني عگرتي ابو المزاج

مو خايفه من هالسالفه مدري ليش ...

لا تخافين ماكو حرمة بعد بالدنيا تجي وتصير بظهر جنسيتي غير
كحيلتي ...

تعاي وكافي سوالف ... سحبني لحضنة ونومني... مثل الطفل
جنت تعبانه  نمت نوم من زمان مانايامة هيج ...

حسيت الصبح  على سلطان وهو كاعد ... مرتجي عالمخده وصافن بوجهي واديه متغلغلة بخصلات شعري....

فتحت عيوني لين هو بوجهي...

صباح الخير حبيبي

ابتسمت كتلو صباح النور ..

قرب نفسه وباسني من رگبتي...

همس شحلو وانت نايمه.... جن غزال ونايم گبالي وجه هذا لو لوحة ... سبحان الي خلق ...

ابتسمت كتلو عيونك هي الحلوه ...

اكول هساع احنا شنو يالله

شنو ..!

لا احنا المخطوبين ولا احنا المعرسين ... ادري والتالي
مو حركتي اهلي يولي

كتلو هااااااا ردينا اصلا اني كتلك مستحيل بعد اخليك تتقرب الي

لا بربج عجل وحجي البارحة حباب مو هسه وين راح

هاي جنت حلمانه لو نايمه عالنص

يولي اشوف لو تكملين حلمج ونفضها مو احسن

شنووو هو

ولج اريد اعرس من صدك تره راح اطلع الم العرب عليج

عزززززه

اي شعبالج مخبل تره ماصايره هاي

لا عليك الله صدك

اهووو جاهل وكلشي تصدكين ... حسسسسسسيي يولي
تره اني رجاااااال وانتي بسدي نايمه ادري شلون يعني
احد گلج الي نايم بسدج حجاره...

لا بس ... كمت ...  الحيلي انهزمت

ويييين رايحة

كووووووم نتريك اليوم كالو راح نجيب گيمر عرب واشكال

لا خاف بعدج حلمانه ولج هي كيمر عجل والكيمر العندي هذا شنو

دتعااااي

مااااااااااا

شلون راح اكوم اذبحها 

سلطان اندارررررر

ليش ..!

بس اندار عليك الله وغمض..

هااا تريدين تبدلين مو ..

اي هههههه

ابقي بهذا خبالج ... ليش وين رايح عنج اني منهو الي يداويج يوميه

كام الحيله سحب الدشداشه من الزاويه لبسها وصل للباب صد عليه
وكال غيري طبعج هذا تره اني بشررر  فتح الباب وطلع

حسيته ضاج مني ... طلع هو بدلت وطبيت للحمام غسلت وجهي
وحدرت ... لكيت الكل ملمومين عالريوك ...

سلطان ماكو ...

الحجيه صاحت عليه كالت تعاي حدري يمه

وكفت يم شهد كتلها وين سلطان

طلع للحديقه شايل الصونده ويرش ...

شنو ماتريدگ ..

لا صحنه عليه يكول ماريد ....
كالتلو تعال اكل كيمر عرب تتدري بي يحبه

شو كال الها شطيح حضي غير كيمر العرب ...

بقينا ساكتين ماندري شيقصد

الحجيه لااااا يمه يأذي القالون عندو اعرفه مايريد يكله
سووله اي شي الثلاجة مليانه

همه يحجون واني اضحك بداخلي عرفت هو شنو جان قصده

كتلهم هسه اجي.... طلعت وراه ... لكيته شايل الصونده ويخابر
من بعيد اشرتله

خزرني بعينه واندار....

الشمس حاره جانت ... رجعت للبيت ....

لكيتهم فاتحين سالفه ضرغام وسراب.... وديحددون المشيه

ضرغام .... خيتي  بلغي اهلج راح نجي .... تره وريتونا ور

الحجيه اسال سلطان شوف شيكول

دايحجىون وجان سلطان يكول

هاي هي اليرده ضرغام يجرالو ....

ضرغام ... هلا ببو فهد هلا حيهممممم هلا بالمعدل

جة فهد يركض على سلطان ... شاله كالو حبيبي تريكت

شهد اي سويتله ريوك تريك

فهد ... بابا انلوح بالسياره 

وين تروح حبيبي....

نلوح بعيدددد اشتري باسكل ...

صار اليوم اجيبلك ... وينو ليث محمد خل ياخذو يشتروله باسكل ...

الحجيه جوه محمد كاعد ...

سلطان .. اخذ فهد كال لا اني راح اطلع اشتريله

كام ضرغام غسل وطلع وراه ....

الحجيه يمه عجل اذا هيج كولي الاهلج الجمعه احنا يمهم

ان شاءالله خاله اليوم اخابرهم

مر يومين ... والحمدلله اني تحسنت وصرت احسن
الحروق كلها طابت على المراهم .. مابقى غير فقط الاثر
بدت تتحسن نفسيتي ... جانت الحجيه يوميه المغرب تجيبلي المرة
تقرالي وتروح وسووالي حجاب.. بديت اتحسن الحمدلله

بيومها اخذني ضرغام وشهد للدكتوره ...كالت الحمدلله بعد اتركي كل العلاجات واذا تريرين تروحين الاثر الافضل تطلعين للخارج
بجلسات كلها تروح وارجع مثل قبل ..

طلعنا من الدكتور للسوك اني وشهد ... اخذنا ملابس النا والسراب
ورجعنا ذبنا يم اهلي كال شويه وارجعلكم

نزلنا حتى سراب تقيس الفستان ... لان جانت امي مريضه ماكدرت تطلع ويانه ...

طبيت البيت اهلي لكيت خالي وساره توهم يريدون يطلعون للدكتورا

سلمنا عليهم همه طلعو واحنا دخلنا

طبت شهد جدامي كالت وينها سروبه...

امي مدده بالهول كالت توها فاتت جوه ...

خليت العلاليك يم امي بوستها وطبيت واني متحملة

صحت سررررررراب ... وينج

لكيتها حاطه المرايه تلقط بحواجبها ومخليه قناع بوجهه طالعه تموت ضحك ...

شهد عستني كالت فوت ضرغام ماكو احد

جان اجط سراب من فوك الكرسي...

كالت  لااااا بربج وينه ... خلت ايدها على وجهه ...

شهد شكو بيها عليش مستحية فوت ضرغام ماكو غير عروستك

سراب دخيييييييييل ربج خل يروح وج كحلااااااااااء اطلعي عليه

شهد ههههههههههههه جذب جذب راح بس عيني اخذلج فستان وعطور واشكال كال خل تقيسه اذا ماعجبها اجيبلها غيره

طيييييييح الله حضجن على هالسالفه
شسوي بط عندي اشتريت فستان

كحلاء اكوووووووول عيني ست سروبه

تذكرين شيسويتي بيه مووو

شكووو وجع شبيجن

تذكرين شكد حششتي على الحذاء كلته حب من اول فرده

شهد هههههههههههههههههههههه

سراب اي وهسه شنو يعني قابل جاذبه اني

لاااااااااا حشاج بس انتي حب من اول شاااااااارب

صخام الوجه هي شارب

تذكرين مووو تذكرين مو لاكينه ضرغام بسيطرن اربيل

من كلتي شورابي توهن خاطات وتخبلتي

وجاوبج هو وكالج لا عمي حلوااااات

اي وويعتي شنو هسة

يعني سحلتي المحززززززم  سامعه واحد من يكول اخذها
من هالشارب ...

ولج شاربج طلع بي بلا

اهووووووووو دسكتي

هااااااا صارت اهووو والله الا ابهذل احوالج خل يجي ضرغام الا اشهرج جدامه

عادي كوليله اني هم اكول السلطان جانت كحلاء تعدل روحها وتتعطر يله تخابرك عبالك راح تشوفها صوره وصوت

عزززززززه جذابه اني الج

شهد ههههههههههه يمه راح اموت بطني لكم انتو تحشيش

طبت سراب للحمام وقفلت عليها الباب انهزمت

رحت كعدت يم امي وبطني توجعني من الضحك

قاست الفستان سراب طلعت كلش حلوه بي وقياسها مضبوط

خابرنا ضرغام  وجانه دياخذنه طلعنا دنمشي

وجان امي تكول ... يولن هلهلن ساره مصوره بيها وليد

شهد واني وسراب بالممر دنمشي كلبناهه هلاهل... وهوسات
يمه تمنيت اشوف فرحة خالي شكال هسه

طلعنا للباب وسراب وصلتنا ... ضرغام جان كاشخ

نزل من السياره

سراب لابده بس. الباب ... جانت مغسله ومبدله

ضرغام شكو الهلاهل شو من هسة ...

شهد لا مو ساره طلع بيها وليد (ولد)

هاااا بيها الخير ... اكول شو عروستي مستحيه وينها دتعاي سلمي كولي

سراب شلونك

كحلاء كلووووش ... تقربت عليها كتلها من هالشارب

سراب خرب ولج فضحتينا

ضرغام مبتسم مايدري شدنحجي

كال الها لبستي الفستان

اي حلو شكرا ليش كلفت نفسك

هو مرتجي عالسياره يحجي وياهه وهي ماده راسها من الباب
واني وشهد متفرجات ...

لا مايغلا عليج شي ...

اشكرك

كتلهم اكول يله يله عيب بعدكم مو كاطعين مهر خل نروح

ضرغام ها خيتي يابه ماراح ناكلها على كيفج

عيب عيييييب امشو يله شهوده فتحت باب السياره واني اضحك
كل شوي اتذكر شارب سراب

ضرغام صعد بالسياره ونزل الجام كاللها فوتي وسدي الباب وراج

شهد عستني كالت شاهدي الغيره يولي 

ههههههه اي عيني ست سروبه يحبها ليش لا والله الل اخبلها

ههههههه لا خطيه عوفيهم شكد حلوين

رجعنا للبيت ضحك وسوالف على سراب والفستان والصالون
وصلنا الباب

جان يكول ضرغام ياالله خير ..

كتلها شكو

شهد هاي سياره خالي طابكة

ابو اميره يعني....

اي همه ...

من كالت اي انقبضت روحي

نزلنا وبيدنا العلاليك ... تمشي شهد جدامي واني وراهه

سمعت صياح رجال يحجي بعصبيه

طبيت للمطبخ ... اريد افتهم شكووو...

جت تمشي ام محمد  سحبت الكرسي اني وكعدت

شهد يمه ذوله شجابهم شكووو

ام محمد جوي يحطون شروط

شروط شنو ...

همه يحجون واني كلبي مدري ليش اهجسه يريد يطلع من مكانو

ام محمد يريدون يرجعون اميره على ذمه سلطان يكولون
خل يكطع الها مهر وتبقى مرته بس عالورق
لان الوليد مايصير يبقو هيج .... وصار ساعه صياح ومعارك

يتبع ادري اكو سحك بي غلسو امانة💜😁
ولا تنسون التصويت وباجر ان شاءالله بس يصير بيدي مجال انزل التكمله ... تحياتي