الثالث والعشرون
مسائكم مسك وياسمين ..❤️
رمضان كريم عالجميع
#خيال #الكحيلة
#بقلمي_نشوى_السلطان
🧚♂️
اني داغسل عالسنك..الدنيا بدت تظلم..انفتح باب البره
طب سيف وحده..اريد اشوف زين ظلام
خالي ماكو وياه...اي عبالك ماكو
ركضت على باب المطبخ فتحت الباب وبيدي زاهي ادحگ هذا سيف وحده عجل وين خالي
...سيف وين خالي ؟؟
وجه سيف احممرررررر دم ويرجف وايدو ترجف مشه خطوتين جدامي وكعد بالكاع
...سيف سيف شبيك ؟ ليش ترجف
تقربت منو ما يحچي
..ول شبيك خالي وين ؟؟ وانت شبيك
يربي هذا شبي ما ينطق ركضت على ابويه وسارة صحت عليهم
...باباااااا هذا سيف مدري شصارلو وكع هين بره
-ياستار شكو
طلع ابويه وسراب وراه وسارة وكفت كبالي
-عجل ادهام وين ؟؟
..ماادري هو اني اسأل بسيف ومايرد امشي اشوف شبي
طلعت اني وسارة بره يمهم لين سيف يدگ على راسه وسراب تبچي
...شكوو ؟؟ شبيكم
—يولن خااااااااالي راح رااااااااح اخذووووو
..بسم الله منو اخذه شبيكم ردووو عاد
نطق سيف كال داعش اخذو من جدام بيت سلطان
هين سارة جمدت وجهها صار اصفر ووكعت لا ايد ولا رجل واني ما حركت ساكن بقيت صافنه على سيف وماعرف خرررسيت ماوعيت الا سراب تكط ماي على سارة التفتت
دنجت على سارة اضرب على وجهها وماتكعد
صاح ابويه اخذنها لجوه
سحبتها شلناها اني وسراب لجوه وسراب تبچي
..جيبي عطر سراب
بقت سراب واكفه
...ول روووووحي
كعدت افرك بأيديها اريدها بس تصحى ماكو انوب امي حست علينا صاحت علينا اشرت لسراب تروحلها بس ماتحجي لأن وضعها امي للأسوء بقيت اكوم واكعد يربي منين اتلگاهه ... بحزتها
كعدت سارة دحكت عليه وعيونها مليانه دموع
كالت كحلاء خالج ووووووينه صاحت بوحشة بصوت عالي مبحووووح ....
من كتلت هيج اني بعد اريد اسكت من البجي ماكدر
كامت تلطم ملخت وجهها وشعرها ركضت عليها كضبت اديها
يووولي والله يرجع بس كولي ياالله بعد مافهمنه شي
جريت راسها على صدري اريد اسيطر عليها ماكدر
اجت امي سمعتها تكابلن هي وياها يدكن ويلطمن اني وكفت باب الغرفه لا بية احجي ولا بيه بعد بجي ... شوداك يخالي
شوداك اووويلي عليك عريس بعدك ... شلون الفرحة
مو مكتوبة الك .....
ابويه وسيف طلعو مااعرف وين شويه ورجعو بس ابويه جان يبين عصبي نار ومقهور .. دحكت فات يمشي وكعد بسد الباب .. ملتثم باليشمغ ... وادي على راسه
كتلهم اصبرو جوي خل نفتهم ... كمت الحيلي
ركضت عليه ...
... وكفت بسده ادحك عليه يتنافح وانفاسه عاليه ..
كتلو ها بابا ماسمعت خبر عن خالي
...شسسسسسسمع ماخذي راح بعد
...من كال هيج حسيت خلص بعد ماراح اشوف خااي بيوم
بجيت ادموعي نارررر گتله بابا كلو منكم گلنالكم خلي نطلع الدواعش غدارين هاي شوفت عينكم لا كهرباء لا ناس ظلت بس جم بيت على عد الاصابع وشيخ حامد توسل بيكم وماقبلتو ليش هساع شنو مصير خالي شنوووو مصيرنه احنا عجل نموت هين ؟ خما راح تظل الانبار ساقطة ؟ لا راح تصير حروب وانتو ماقبلتو تطلعون عجل امي شنو ذنبها مريضه وماكو طبيب يعالجها ليششششش بدون شعور عليت صوتي بوجه ابويه من قهري .. واني احجي كام ابويه ...
ماحسيت بس الراشدي على خدي الا عيوني جدحت احسها
... زكح بيها بصوت عالي لسانج طولاااان قسم بالله اذبحج هين
حسج ماريدددد اسمعه .... لا انعل والديج
...صفنت بوجهو اول مره بابا يسويها ويضربني
وهيج ينعل ويسب بيه .... بقيت مثل المصدومة
بدون ماحجي عفته ومشيت احس الدنيا انتهت طبيت وكعدت ابچي عفتهم جوه يبچون واني هين وحدي ماكدر اشوف ساره ولا اكدر اشوف امي ... شوفتهم تكسر الگلب
دحكت على ميز تواليت مالتي يم العطور عطر مال سلطان الHUGO اخذتو منو من السيارة بحزتها ظل يدور عليه ماگتلو اني اخذتو
رشيت منو على ايدي اشتميت العطر تخبلت تخيلتو جدامي تخيلت حضنو عيونة هساع شنو راح يسوي من يعرف اني ماطلعت من الانبار شنو حالة
حضنت العطر وغمضت عيوني قوي وتخيلت سلطان يمي نمت ماحسيت على روحي ابد انهياري خلاني انااام نومة هم ...
هيج عيوني غمضت والدمعه بيها ...
كعدت على صوت التلفون يدددك بس جسسسسمي ثگيييييل ماكدرت اتحرك ابددد كوووة شلت راسي خليت العطر عالمخده نزلت رجليه من السرير وكمت عالتلفون عالميز تواليت...
دحكت الساعه 2 وثلث بالليل حيييييييل شكثر نايمة اني
انكطع التلفون شلته دحكت هذا سلطااان اي والله سلطان يااااربي توني فتحت الرمز ورجع اتصل بسررررعة رديت
...حبيبي الو ... داححي وجان اسمعه يصييييح بصوت عالي
...انعل اهلچ يولي لييييش ماطلعتييييييييييييييييييييي اني شكللللللت كحلاااااااااااء يولي تكسرين كلمتي يووووولي اجي بس يطر الفجر يولي اني لعبه عنددددددج ....
اريد احجي بعد ماكدر عصبي ويزكح كتلو : حبيبي والله ماكسرت كلمتك ابويه وخالي ادهام ماقبلو اني شنو بيدي عجل اني قابل مااريد اجي والله گلبي يوجعني
...اشششششششش ابوج وخالج شنوووو يولي انتي حرمتي بالشرع وبالقانون حرمتي زلمتچ كلج تعالي تجين ليش ماجيتي ويه حامد ؟؟؟ يولي هساع منين اجيبچ يولي انتي بالناااااار غادي واني هين اااااااخ كحلاء لو اكضبج بيدي
...يعني اني شبيدددددي فوك البية انوب انت تصيح عليه
اني كلتلهم وماقبلو اني شعلي بس فهمني شعلي تعال شوف حالي وانت هيج تحاچيني والله حرام عليك حراااام ومن هين وخالي ادهام لهساع مانعرف مصيرو قابل اني اللي ردت نبقة
... اكفي ...... يولي ادهام وين ؟
...اخذووووو سلطان داحجيله ماتحملت اختنگت بجيت
... يوووووولي بس فهميني منهم الي اخذو داعش ؟؟
...اييييييي داعش راح لبيتك واخذووووووو
امي مريضه هم والله گلبي يوجعني سلطان والله محتاجتلك منين اجيك هسه والله اريدك اهجس روحي بين نارين
...استغفرك ربيييييييييي هاي تاليها كلنالهم اسمعو الكلمه واطلعووو
...سلطان اذا صار شي وبعد ماشفتك لاا...
...اششش اسكتي تجين واجيج واخذج واطلعج من نصهم بس اصبري عليه هاي الساعات سديي التلفون
او اكلج ..... انطيني ابوج
..مسحت دموعي وكتله اي اي هسه
...و
يولي نار بيه من وصلو حامد والاهل وانتي مو وياهم نار اشتعلت بيه يولي ماصدكت اخذج تاليها هيج
...يارب ارجع اشوفك ....
..روحي على ابوج تره نبرة صوتج هاي ذبحتني
نزلت على ابوية طبيت للهول ماكو رحت دكيت باب غرفتهم ماكو فتحته ماكو
..سلطان اكف بس اشوف وينو وياي بعدك الووو
... اي اسمعج يبعد سلطان ... يولي اليوم الشبكة زينه يمكم
..اي تروح وترجع ... داحجي وامشي
رحت للربعة لكيتو يقره قرآن
...بابا سلطان يريدك عالخط
..صدق الله العظيم جيبي ...
نطيتو التلفون ورحت على امي لكيتها تصلي قيام ليل هي متعوده تصلي بالليل عفتها ورحت على غرفة خالي ادهام دكيت الباب سمعت صوت سارة لينها عالسجادة تبچي من شفتها نعصر گلبي عصر وينه خالي ادهام عنها خل يجي ويشوف حالها .. ماتحملت بچيت وياها كعدت يمها ... كتله ساره
سلطان عالتلفون
...رفعت راسها وعيونها مليانه دموع بشهگة حجت كالت وينه !؟
..
يحجي ويه بابا
كامت الحيلها وطلعت بره الغرفه عرفتها راحت على ابويه تركض ومفرفحة روحها ... ركضت ورااهه
ا وكفنه جدام ابويه
انتبهت ابويه يكول لسطان عسى ولعل يقبلون مادام يطلعون بفلوس
...اشرلي ابويه سلم على سلطان ونطاني التلفون انطيتو لسارة
بس كالت الو بچت بچييييي ماصاير تريد تحچي ماتكدر حركت گلبي حرگ صوتها بداني وهي تبجي ... اووف ربي
..............:::
وخرت التلفون من اذنها وفتحت سبيكر اشرتلي ماكدر بعد احجي
انتبهت عليها خانكتها العبره ...
سلطان اسمعه .. ،..يتنافخ
فتحي سبيكر ؟؟
...اي خويه فتحت
..يمج كحلاء؟
..
اي يمي
..دحگن..بالقران لو على گص راسي اطلعجن و لو اعرف اسلم نفسي وادهام يطلع لا تنقهرين يبعد اخوج تهون
كحلاء ... لا ان شاءالله ماكو شي ربي يحميكم .. ادحك الساره
تمسح بدموعها وكوه وتحجي ... كال ..
بعدهم داعش بأولهم يحبون الفلوس اني ادبرها لاتخافين بس ادعيله خليج قويه مثل ماعرفتچ بعد اخوچ كحيلتي وينج تسمعيني
...اسمعك اي ... وياك
..اياااج تفكرين لحظة ابعد عنچ والله ماياخذني منچ بس الموت تطلعون هالمره انتي وساره اني ادبرها بس وحق رب الكعبة اللي تكسر كلمتي وماتطلع والله ثم والله احسبها ماتت بعد
..صار بدون ماتكول اني بعد مابقى بس نشوف خالي ادهام اول
...يولي كتلج لو اعرف ارجع اسلمهم نفسي ماخلي دهام يروح بيها
اسمعي اكحيلة الفلوس اللي خليتهن يمج تنطيهن لابوج اني راح اشوف صيرفه تستلم فلوس بالانبار ...
..ماشي موجودات بعدهن يعني كلهن انطيهن
..اي كلهن وتنطي ذهبج كلوووو سامعتني ؟؟ كلللل ذهبچ
وانتي ساره ذهبج وشكو فلوس جوه ايدج تنطي لكحلاء وكحلاء انطي لأبوج هاي في حال اذا ماوصلتج فلوس مني ..
...لا عوف الفلوس وعوف كلشي اني راح اسلمهن الابويه هسه
داححي ساره كامت تنزع ببتوتها اشرتلها بيدي اكفي
... الووو حبيبي هسه انتو وين كاعدين ...داحجي
انقطع الاتصال متت قهر راحت الشبكة رديت اتصل وماكو ماحصلت يفصل الاتصال
دحگت لسارة بس دموعصها تصب رحت حضنتها وبقينا نبچي سوه وسراب واكفه اباب الربعة هم تبچي كالت:
ما سألتوه اذا كلهم بخير ؟ يعني شيخ حامد وليث وضرغام وخاله ام ضرغام وصلو اربيل!!
...كلهم زينين واصلين بسلامه
..هاا اي الحمدلله
...كضبت ساره كتلها امشي نسوي اللي كال عليه سلطان
..
هزرت راسها ومسحت دموعها بالحجاب ومشت
رحت اني صعدت لغرفتي فتحت الكنتور طلعت الفلوس حسبتها طلعت بيها بال27 ورقة وطلعت ذهبي اخذته ورحت على غرفة خالي دكيت الباب
...فوتي كحلاء
... فتحت اللباب ليلى نايمه وساره مكابلتها وكاعده
حالها يبجي الصخر كتله هذا ذهبي
...كامت الحيلها فتحت الكنتور وكالت وهذا ذهبي امشي
خلته كبالي ... كامت تنزع بالبتوت والمحابس خلتهن فوك
الذهب الي طلعته ... شلناهن ومشينه
رحنا على غرفة بابا دكيت الباب وامي كالت فوتو
فكيت الباب امي ادخك علينا مستغربه شنو شايلين الذهب بدينه
وكفت بسد ابويه كتله بابا هذا سلطان مااعرف فهمني اني وساره كال ننطيك الذهب وهاي الفلوس يمي
...تنفس قوي وكال حطوها بالربعة هساع اجي
كالت امي..شكو ... مادري شحاجاهه ابويه
عفتهم ورحت للربعة
جة ورانه كمت نطيتو علب الذهب والفلوس وسارة هم
...هاي نطلع بيهن ادهام اشوف منو يوصلني للي اخذوه وسلطان يحاول يدبر احد يدخل لهين يجيب بعد فلوس
...فدوه بابا فدوه لخالي انطيهم بلكي يقبلون بس بابا احلفك ب الله اذا خالي طلع بخير خلي نطلع من هين بابا الله يخليك
صفن بوجهي وعيونه حمررر جرني لصدرو وباسني
ان شاء الله بابا
سيارتي هم راح اخليها ويه الذهب والفلوس المهم اعرفو وين هساع
...دحگتلو گتلو بابا اعرض عليهم بيت سلطان هم خاف نيتهم البيت
دحكتلي سارة صفنت شوي وكالت اي بلي خلي ياخذن بيت سلطان المهم يطلع متأكدة سلطان ما يغلي البيت على ادهام واني على مسؤوليتي
...لا سارة اني اتحمل المسؤولية وسلطان من يخابر اني انطي خبر
صار الاتفاق انه بابا الصبح يروح جدام بيت سلطان ويشوف اذا بي احد من الدواعش ويطلب منهم يقابل المسؤول عنهم بخزتها جانت
مجاززفة چثييييييير چبيرة بس ماعدنا خيار والدواعش بهاي الفتره بالبداية چانو اللي يعلن التوبه يمهم وينطيهم فلوس يعفون عنو ومايذبحوه وهذا اللي شجعنا
:/اني مانمت وسارة مانامت وسراب تلوووب وامي خطية عبالك متخدرة بس تتوجع وتنام
بال8 ونص صارت وكال بابا راح اروح
گلبي انقبض صار يدگ سريع خفت چثير بس شسوي خالي هم غالي
ومايستاهل الي صار وياه
اندك الباب انرعبت كلت هاي الدواعش ركضت وكفت وره الباب
ورجليه يرجفن ادحك من الفتحة ماشوف ... بس انفتح اندفع الباب لين سيف وخالتي
دخلت خالتي تلطم ركضت عليه كضبتها سيف واكف والجكاره بيده
مكسور شكله يكسر الخاطر ... كتله
.خاله الله يخليج امي تعبانه فدوه اروحلج اسكتي
... طلع ابويه يمشي واليشمغ كال يلا اني اتوكل اللهم لا اسألك رد القضاء ولكني اسألك اللطف فيه
صاح سيف وين رايح عمي ؟؟
... تنهد ابويه وكال بلكي ربك يحلها اعرف ادهام وين ..
... عجل وياك اروح
...كتلو وييييين انت الثاني اكعد يمعود مابينا حيل هبطات
...اي جيبيلي ربطة البسها واكعد وياچن وخرررري عاط بية
ومشة جدام ابويه
طلع ابويه واني وسارة وسراب اباب الربعة الخارجي ندعي يارب الطف يارب يا الله مايسوله شي وخالي ادهام عايش ياااارب يارب
كامت خالتي طبت يم امي ...
صفنت اتذكرت زين هو ابويه ليش راح مو كال سلطان راح يدبر احد يدخل هين يجيب فلوس ؟؟؟
اوووو يربي شلون تنحل ربي حلها يارب
سارة لازمة القران تقرأ وتبجي
...بهاي الفترة خلااااص ماطلعنه برة البيت ولا اعرف شنو صاير برة واذا احتاجينا شي ابويه يجيبه بالرغم الاكل بده يخلص بالسوك والدواعش استحلو كلشي حتى اللي عندو حلال واغنام اخذوها والبيوت الكبيرة اخذوها والسيارات كللللشي اخذوه
بقينه لل2 الظهر ننتظر ابويه وماكو هين بديت اخاف كلت اخذوه ماكو بعد تخبلت مااعرف شسوي
كمت الوب وروحي مفرفحة افتر بالبيت مثل طير مذبوح عالنص
...يعني شلووووون شنو هالحال ربي دخيلك ساعدنه
الدنيا حاره والكهرباء ماكو تجي ساعة بالليل فقط والمولد يشتغل من ال11 لل2 بالليل بسسس
بقينا ننتظر لل7 المغرب واحنه طلعت رواحنه ننتظر ايسنه كلنه اخذوهم هو وسيف بعد اريد افوت اشوف امي ماكدر
بال7 وعشره انفتح باب البيت سمعتو
كتلهم ياااالله
طلعت اركض لين ابويه وسيف صيحت على سارة تعاااالي رجع ابويه
... ركضت عليه حضنتو ادحكلو تعبان ومدنج راسه ..
ها بابا بشر
...جيبيلي ماي .....
دحكت لسراب جيبي ماي اركضي ...
كعد بالحديقة
...شصار بابا احجي والله راح اموت احجي
يتبع ....
اعتذر عن التأخير والتقصير لكن بعد انتم عرفتو
جنت بوضع صعب وان شاءالله ارجع مثل اول
ماراح انقطع منكم راح انزل القصة حتى اكملها
بس شوي شوي هالأكدر عليه حتى اختم القصه
وماخليكم تنتظرون ... اشكركم جميعا على الدعاء
وعلو وكفتكم ويايه .. ربي لا يشوفكم الي شفته
الحمدلله على كل حال... تحياتي الكم جميعا
#نشوى
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!