رواية خيال الكحيلة الفصل الثامن 8 - بقلم nashwa_alsltani

مساء العافية ..❤️

#خيال #الكحيلة

#بقلمي_نشوى_السلطان🧚‍♂️
شكر خاص للمتابعه الجميلة ام صگر من تكريت
على تصميم غلاف القصة

كحلاء .. اني ادحك على زهراء ... اريدها بس تنطق منو اهجس روحي ماتت ورجليه انتهت... خفت لا صدك يكون الشيخ ويجيرووووني
.. ادحك حرمة عمي طبت تلطم وزهراء تنكز وتصيح انهزززززم يذياب انهزززم انهززززم

هناك وجان اسمع حس سلطان ....

وهو يصيح يووووول ذياب...تخسى يول
اطلع ولا تصير حرمة اطلع وواجهنيييييي ..

ذياب... هذا جة موو ...

كحلاء... سلطان .. اي سلطان ... حس سلطان هذا
اهجس روحي ردت الي.. دحكت على ذياب..
عيونه نار وشرار ...هذا موصاحي يمه
خاف يسوي شي السلطان...

صاحت جدتي... يول ارجع يول اني اطلع احاجي

زهراء.... سيارة بيضه طبكت عاليه ونزلو منها زلم
يمة الحكي ذياب ....

كحلاء... ركضت وره ذياب ... وصلت المطبخ ..
دحكت هو ديفتح بالباب..صد عليه كال وين موليه
وين تريدين...ارجعي لا اكسر رجليج

_ لا تتهور اذياب ارجع .. امانه ارجع ... وشتريد اسوي بس لا تسوي مصيبه... جده حاجييييي

_ خرب روح اهلج حشى بس عمي.. فوتي
لا اكسر رجلج طبييييييي  للغرفه ...

صاح بصوت عالي... سديت اذاني كتله والله افوت بس تعال...

صاح سلطان... يول انت هم حاسب نفسك زلمة
ومطلع مراجلك على حرمةةةة ... اطلع لشوف اطلع
شوفني طولك... وفك هالباب الساده عليييييك

ركضت عمتي صبيحة وكضبت من ذراعو صاحت ارجع ارجع يول لا اتجاتل وياه .. يول والله يحبسك
شجابك على ابن العليان ارجع ول مات عمرك شسويت بينا يذياب عوف البنيييية .. ماتريدك المايردك شلك بي يايابه

اني اعيط واصيح جده رجعي خاف يصير شي
اركض بالمطبخ واكمز فتح الباب وسحب ايده بقوة وصاح ... وخري يمه عجل سلطان يدوس الدار وتريدين ماطلع وخري خل اشوفه منهو ذياااااب   سحب الباب وماينفتح عرفت المفتاح ماكووو صاح يووووووول المفتاح وينه
بلجي هجمممممممم على روسكم

صبيحة.. ماتطلع المفتاح يمي...ارجع مانطيك المفتاح اذا ما حلفت ماتسوي طلبه

جيبيييييي يمه..  لا والله اكسر الباب  / كام يضرب بالباب المهجووووووم وين جيبي المفتاح ... يصرخ واني اديه على اذاني

صاحت زهراء...ولكم هذا زلمة وياه مسلح ..
عزززه يمه خاف يصوب ذياب رجعي خل يرجع
ولج يمة ابووووي عمامي وين...

من صاحت زهراء وكالت مسلحين... ادحك جدتي ترجع بي وعمتي تجر وعياط وصياح وسلطان بره  يصيح وينهم
الزلم شو بس نسمع بصيتهم وينك يذياب تعال حدر كبالي
ان جان انت زلمة تعال هين ولا تطلع مراجلك على حرمة
اني شلون الحلم وبس صوت الدنيا ضلمت بعيني صرت اتخايل
راح يتصوب واحد والدم صار كبالي ...

زهراء ... راح اخابر ابوي عمامي ... يمه ياستارررر من هاليوم

كتله ولج اركضي دكي عليهم شمنتظرررة احجايها وكوه احر النفس ...

ذياب ...اني اعلمك شلون تحدر بديارنا... سهلة يبن العليان
جايني مسلح وتصيح اني ازلمة ... خل اشوفك منهو الزلمة
كطي المفتاح عليه لا وحك الله اهجموووو هجام هالباب

كام يضرب بالباب ويعر بي بكل قوته ... صاح المفتااااح وين انعل ابوكم لابو المفتاح ....ولجن المفتاااااااااح وين

شفته فقد اعصابه ركضت على ذياب ... وكفت كبالة كتله ماتطلع وكفت واني ابجي ودموعي تصب دحك عليه وهو عاقج حوابه

شتريدين كبالي واكفه تخافين عليه تخافين على الحبيب يولي

بلعت ريكي وكتله  بصوت يرجف لا تسويلنا بلوووه بروح كلمن عزيز عليك .. ارجع عوفه لاتطلع...

كضب اديه بقووووة وكال .. العزاز غدرو بيه لا تحلفيني بيهم
لا وحك الله مابقت اعزاز... صد على عمتي جر المفتاح وفتح الباب اني بحزتها انتهيت كمت رجليه احس ماتن ..
فتح الباب دفعني وطلع ...

وعمتي ادك وتلطم واتصيح... راح يذبحه الابني عمتي الحكييييي ذياب راح يذبحه ابن العليان مسلحححححح

اني ماكدر كعدت بالكاع وسده اذاني بديه الاثنين ..

بس طلع جان اسمع زهراء تصيح .. اي جوي عمامي هذا  ابوووي جة ولج يمه جوي... كمت الحيلي.. باوعت من الجام..
لين كبالي عمامي وخالي ادهام وسلطان ...

وناس ترجع بذياب وكاضبي وناس تحاجي سلطان ...
اني امسح بدموعي وصيح يارب يالله عديها على خير
جسمي كله يرجف

ذياب... خل يطلع مالو مكان هين .. خل يطلع من كبالي
شيريد جاي هاااا تريدها ماكو حرمة عدنا .. توكل يلةةةةة
البنيه محجوزه واليوم مهرها

سلطان... لا تصيح يوووول لا تصيح وصير رجال واكف كبالي
الجاي تحجي عنها بنت عمك.... وانت المفروض تكون الها
ظهر وسند ... مو تطلع مراجلك علييها تعال واجهني وكافي صياح ان جانت البنيه رايدتك هسه بيدي اكطعلك مهرها...

ذياب.... لااااا ويناقشتي بكل عين برعه .. عوفوووووني
وخر عمي عجيل ... وخر خل اشوفه شلون يريدني اواجهه
لا تكضبنييييي

ادهام... هيييييييي شسالفه جهال احنا جدامك ... حاجيني
جهال... شلون تجي تاخذ البنيه وتطلع ... وينها خل تطلع
عييييييب عليك تجي وتاخذ البنيه بدون علم اهلهاال

ذياب... خويه ادهام بنت عمي واني مسؤول عنها ... ارجوك خليك بعيد... البنيه ماتطلع...

زهراء... سدن الباب يمعودات هسه يطب ذياب يكتلنااا شبيكم
لا تباوعن من الباب

كحلاء... ادحك عليهم عمي  عجيل وعمي وطبان واكفين بسد
ذياب ويشالطووون ويحجون ...

وعمي ابو ذياب وخالي ادهام واكفين بسد سلطان ولينها صايره
احزاب والسبب اني .. يربي خاف بصير شي  افتر بالمطبخ
واصيح على جدتي جده الله يخليج اطلعي حاحيهم

ادحك مرت عمي تنوح وتصيح راح يتذابحووون وزهراء تلطم على وجهه كمت اكل بروحي اكل ياربي شسويت اني
صخام الناس شراح يكولون عليه....

شلون ياربي جده ليش واكفه يمنه اطلعي عليهم

_ شطلع يايمه كله منج ذياب شبي ماتريدي لو لان شفتي
ابن العليان بمنصب ومليااااان فلوس هاي الردتيها دحكي شصار
الدنيا انكلبت والسبب انتي ان صار شي الواحد من عمامج
والله اخليهم يخلصون عليج كافي عاد نصبح ونمسي كحلاء وكحلاء ماكاااافي عرامة وگوايه

كتله جدددده اني بيا حال شتحجين والله ماريد اتزوج
لا عليان ولا غيره شبيكم انتوووو حتى كرهتوني بالزواج
داحجي وياهه ومخنوكة و
چان اسمع عمي ابو ذياب يصيح على ذياب يكله اسسسسسكت
لا اجي اكسر العوجيه عليك
وذياب كاضبي عمامي يريد يهد على سلطان

انتبها عمي ابو ذياب دار وجهه لخالي ولسلطان وگلهم خلي نگعد بالربعه ونحچي ورجع

على ذياب وعمامي وگلولهم عيب عليكم شيكولون علينه العالم امشو فوتو للربعه نتفاهم راد يحچي ذياب چان يصيح بي عمي ذياااااب گتلك فوووووت كااااااافي
دحكت جة خالي ادهام خله ايده وره ظهر سلطان ومشو ودخلو للربعه... سلطان يمشي وعينو على ذياب خازرو

كتله ولج خل نطلع نشوف شكووو...

صاحت جدتي اكفن وين موليات الزلم هين اثكلن تره رجلجن خفت

صديت عليها كتله جددده فدوه اروحلج اهلي ابويه هسه باله يمي
ومنا طلابه عوفيني خل الكي لروحي حل.. فتحت الباب وطلعت

وجدتي طلعت ورايه تصيح ارجعي يمه ... دحكت اازلم كلهم راحو لييت جدي .. فتحوا الربعه يمشي عمي وكاضب بيدو ذياب

ويصحيح عليه امشي بين بيت عمي وجدي ماكو سياج وبيت واحد جبير .. طلعو للربعه فتحو الباب وفاتو وسلطان وياهم

طلعت انتبهت  عزه عليك وين حجابي ...
رجعت اركض للبيت .. جان تتلكاني زهراء شايله بيدها الشال

كتله جيبي يممعودة هم زين جبتي .. جربته من ايدها وطلعت اركض وجت ورايه حرمة عمي وزهراء .. دحكنا جدتي واكفه
اباب الربعه تريد تفوت ... كتله اكفن خاف يشوفونا

_ زهراء تعالن من وره البيت ... كتله يله اركضي
طلنا وره الربعه ... كتله عزه عليج لا يطلعون ويشوفونا

احاجيها ورجليه ترجف لا نعال برجلي ولا حذاء
والتربان جوايه .. كوه امشي حتى حيل مابقالي .. صديت ورايه سياره سلطان العالية ...

زهراء... ولج وين صافنه دنجي واكعدي لا يشوفونا ...

_ اوووف ربي شلون بيه اني.... راح اموت والله خاف يصير شي ...

زهراء... كولي يالله واسكتي خل نفتهم ...

_ كحلاء... اسمعي هذا حس عمي يكوله ..

ابو ذياب انت غلطان شلون تروح لبنت عمك وتچذب عليها وتجيبها هنا ياابني الزواج مو جبر وحتى ما يصير وحرام اذا

بالاكراه والبنت  ما تريدك شكو تخطفها شتگول عليناااا الناااس ما فكرت بسمعة بنت عمك ما استحيييت بس العتب مو عليك العتب

على اخوي عود الچبير وعليه الاعتماد الي رايح وياك وما گلك عيب بنت عمك هاي عرضك وسفه والله...

زهراء... هلوووو علگت والله كلشي ولا ابويه يصير عصبي
لو يخرب لو يعمر...

كحلاء... اكضبي السانج ولج بس خل اسمع ذياب ديحجي

ذياب:يابه عجل اخلي الغريب ياخذها اني اولى ببنت عمي وغصب عنها تقبل سدو السالفع يابه بنت عمي الي

عجيل :خويه ابو ذياب م....خل اسولفلك

ابو ذيابب اشششششش  بس ولا كلمه انتم غلطانين والغلط الاكبر منك شلون تماشيه وتقبله على هاي عملته شأگول لاخوي ابو

هسه اذا عرف الزلمة  بنته مخطوفه چان راح بيها شمدري ابني صاير ازلمة على بنت عمو ورايح جايبها ...تخسى على هالشوارب

كحلاء... اي والله ابويه سوده عليه جان انتهى ...
هذا منو الجة للربعه اسمع الباب انفتح ولج

زهراء... اش نصي حسسسسج هسه ذياب يدفنا هين والله
هاي جدتي فاتت عالزلم اكيد لو احد جة ..

ذياب... يابه شسالفتك تره هي خطيبتي وكلكم تدروووم

ابو ذياب اش ماكتلك لا تسووووورلف خلني اكمل يول لا تقاطعني
وانت يا خويه سلطان ترى مايصير الي سويته البنت بنته وانت تعتبر شخص غريب واحنه عمام شيكولون الناس والديره علينا

_ وطبان .. اي وانت الصادگ هاي دوسة رجل وعليها گعده
ماينسكت عليها ان جان عدنا مشكله بيناتنا نحلها ...

سلطان:حگك عليه عمي ويمكم اني تسرعت   بس الي سواه ذياب  يخلي الواحد يطلع عن طوره
يعني يروح للكليه ويوهمها ابوها مريض ويخطفها ولبنيه ما تريده هي جبر خو مو جبر....

ذياب ... لا اله الا الله شعليك بنت عمييييييي واني حر انت شدخلك بينا .. طلعت عمي من السجن خلف الله عليك
بس عوفنا كافي لا تدخل بحياتنااااا

سلطان... سولف عدل يول انت كاعد جدامك زلم مو خرگ
تره اعرف اكوم واردك لمو لخاطر هالوجوه الطيبة جان عرفت
شأسوي

ادهام ... ذيااااااب كافي عاد صدك جذب تره عيب والله
الضاهر انت ماينكعد وياك

ذياب... لا ينكعد بس مادشوف تصرف راهم افهم من كلامك
انت بمنصب ودتهدد بيه مثلا...

سلطان... انت ليش ماتعرف تسولف اهدد شنو منصب شنو
الجدامك ازلمة ومايهمني حتى المنصب اعرف شلون اتحجي

ابو ذياب...  ذياب والتالي وياك انت ليش ماتعرف تكضب السانك

سلطان ... عمي خل احجيها الك من الاخير اني البنيه رايدها وجاي من الباب مثل مايكولون

ورايد الگرب منكم .. وان انطيتوني مره وان مانطيتوني
انتم اهلي وعالعين والراس ماكو شي بالغصب وتقدمت الها
وطلبتها من خالها وهسه داطلبها منكم ..

ياابني انتشرف بيك حياك الله انت واهلك وعمامك ..
بس مثل ماتشوف ذياب ينهي عليها ...

ادهام - دقيقه :ابو ذياب  الشيخ سلطان خطب كحلاء مني واهلها ماعدهم مانع وانتظرنا كحلاء تجي من الكليه ونسألها موافقه لو لا

وحسب السمعته البنت  ما تريد ذياب  وهذا شي راجع الها مو انتقاص بذياب لا والله ذياب رجال والنعم منه بس الزواج مو غصب

ذياب... والله ماتصيرو مره واني طيببببب انتو شتحجووون
اكوم هسه اهجم البيت على عمامي وماخليها تطلع ...

_كحلاء ... عزززززه اسمعييييي ذياب كومي خل نفوت خاف يطلع خرب ولج اركضي

زهراء... على كيفج يولي لا تنجرحين ...

_ مشينا خطوتين وجان اسمع حس خالي ادهام ... كتله اكفي
مدري شديحجون...

زهراء... انتي ناويه على منيتنا اليوم يولي خل انتجفة الشر

ادهام...ياخوية هالحجي موراااهم ابد عمامك تهجم عليهم البيت
يابو ذياب اني اشوف يجي ابوها ...

سلطان.. اي نعم لازم ابو كحلاء يجي هين ويصير الحجي جدامه

زهراء... هو هذا نفسة الي يريدج موو..!

اي اي هو هذا سلطان تدرين ولا ادري متقدم وطالبني من اهلي
خل نروح نشوف امج شصار بحالها ..

دحگي جدتي بالباب واكفه شماشوف راح تفوت وتهد بعصاتها

سلطان... اني اترخص كوم يضرغام...

ابو ذياب... وين بعد وكت ...كوم وطبان جيبو اكهوى جاي
اكعد ابن عمي موراهمة طلعتك

سلطان... لا مشكور عمي اني ماقبل البنت اتأذه بسببي اني جايب
عمامي وجاي خاف تحسبوها دوسة رجل اني حاضر

_ ذياب لا دوسة رجل ولا مدري شنو كعده مابينا السالفه سدها
وتوكل ماعنده نسوان....

سلطان_ دحك يوووول لا تاخذنااااا بصياحك الجدامك مو گليل بس مااريد احجي واني بدياركم عيب عليه وعمي واكف بعيني ماريد احجي اكثر ... اني اتوكل ... يله يضرغام..

ادهام ...كافي يذياااااب جدامك زلم لو جهال شهالحجي هذا
خويه سلطان احسبها عليه ...

_ ذياب.... اكف وين رايد.... من هسة اكولك جدام الكل
كعده وياكم ماعدنااااا

سلطان.... صديت عليه ... واني امشي.. كتلووو والله لمو لخاطر هالوجوه الطيبة .. جان بس الله يله يشفعلك كافي تحجي وتهيلم
جدامي... تره اتحملتك جثيرررر ..

ضرغام... يول انت تسكت لو ادفنك هييييينة...
كافي تحملنالك جثيررر ول ياب تصيح بوجه ابن عمي كبالي
وتريدني اسكت.... وخر عني خل اشوفه الزلم شتسوي

سلطان... اكف ضرغااااااام ..، يمعود لا هيج اكف يووول
اكضبه يدهام اكضبة....

كحلاء... سمعت حسهم صار عالي وذياب يهزب وسلطان  يصيح حسيت صارت اطلابه كمت ارجف حيل مابقالي كتله اركضي

يولي شلت التنوره بيده وركضت رجليه انتهت كوه اجر نفسي
اركض واتلفت ورايه وصياحهم يجيب التايه ... رجعنا اني

وزهراء نركض لكينه حرمة عمي ماتكدر تمشي كاعده عالدجة ... كالت ها يولن ... شصار وين اذياب
بعدهم متجاتلين شنو هالصياح عزه عالماتلجن

_ اي عمة مااااادري ذياب مايسكت شوفي شصارررر
تجاتلووو من جديددددد.. صخام عليه ولج اركضي جيبي حذائي
خل اصيح الابوية ... يمة ربي شجابني شدلاني ربي عديها

_ هاي الردتيها انتي راح يذبحون ابني .. احنا وين والعشك وين
جان استحيتي  على نفسج العالم شراح نكووووول الهم
بنت عمو عشگت غريب... يافضيحة الفضيحة

عشكيش عمة صدك تحجين احنا وين وانتي وين
ولج زهراااااء تعاي وين صرتي كمت افتر بالطرمة
اروح واجي واصفگ بدية .. وعيني عالربعه ..
اسمع حس عمي عجيل وطبان.. يمةةةة شلون راح اموووت ... ادحك على حرمة عمي بالكاع كاعده وتضرب على رجليها وتصيح راح ابني راح يذبحو لو يسجنو ولد العليان... كمت احير وين انطي وجهي
بهالحجي صار الصوت عالي دحگت طلعو بره
يمة هذا خالي... كتله عمة طلعووو.. جدتي جت تمشي علينا... ركضت اني وكفت بسد الحايط...
دحكت عليهم بالوسط كلهم مجموعين وعمي كاضب ذياب ...وذياب يزكح ويصيح عليهم .. اريد اركز زين ماكدر الشجر كله كبالي...
جت تركض زهراء .. كطت الحذاء بالكاع.. كتله ولج
تعاركوووو يولي... ولج مبايلي وين... كمت اكمز

واني بمكاني ادحك ضرغام لازمي اثنينهم ..ركض سلطان على ضرغام جر السلاح من الجراب صاح كافي ضرغام  كافي يووووولو ...

خالي ادهام وعمي بالوسط واكفين... سلطان جر ضرغام
صاح عليه امششششي جدامي...

اسمع عمي وطبان يكلة مايصير بنص ديارنا ويمد ايده على ذياب
اليوم انسويهااااا دم للرجاب...

ومناك ضرغام يصيح الي يندك بسلطان احسب الله ماخلقووو
ولا جابتو  امووو يولو تحملت الكم جثيررر...  ادحك عليه
كاضب ايده جن مجروح او توجعه مافهمت الي صار

سلطان يجر بيه اخذه وطلع هو وخالي لسياره...

زهراء... ايييييي هم زين راح يروحون صخام جان تذابحووو
يولي منهو هذا ضرغام شو يجاتل ويضرب...

_ صديت عليه كتله راح يروحون واني شلوووون راح يطيح حضي صديت ادور عالحذاء.. داللبسه.. اريد الحك بخالي دهام

جان اسمع سلطان يصيح على خالي يكله اخذ البنيه الاهلها ماطلع
اذا ماتجي البنية... وينها جيبها لا يسويلها شي...

زهراء... اسمعي ست كحلاء اسمعي يخاف عليح يوووولي
وجماله يكولها جدام ذياب ...

كتله اكفي .. اسمعي دنجت ودحكت من جوه الشجره ..
شفت خالي دهام بالباب يكله توكل اخويه وسدك امين اني ماطلع اذا ماخذها ويايه.. بس اخذ ضرغام مو ناقصين مشاكل ولي يسلمك

كتله اي راح ياخذني خالي لبست التك الثاني وطلعت .. كمت اعدل بشالي.. اريد اركض انهزم على خالي... ماحسيت الا وذياب كبالي

وكف.. ادحك عليه حاجبه ينزف والدكم مال الدشداشه مشلعه وصدرة طالع... انخرشت واني بمكاني.. رجعت ليوره .. واني

ساكته ...كضب ايده بقوووة وكال ها وين رايده تريدين تروحين
ارجعي لا اكسر راسج.. كتله وخررر ايدك.. سحبت نفسي ماكدرت

صرت ارجع ليوره.. وهو لازمني من ذراعي... بقوة .. سحبني
وكام يجر بيه ويصيح امشي جدامييييي امشي .. اني اجر وهو يجر

ايدي انتهت .. جدتي تصح عليه عوفها يول.. ولكل جو يركضون عليه هو ماهتم للكل سحبني وطببني للغرفة... دفعني وقفل الباب

وبيده يسوي بالدكم يدحك عليه وهو خازرني بعينة ركضت وكفت يم الحايط كتله شتريددد مكافي الفضايح الي سويتها الله يخليك

عوفني كافي عااااااد... احاجي وهو مايرد عليه جة يمشي قريب
فتح الجراره وطلع المكص .... كام يفدتح ويسد بي...

اني بحزتها انتهييييت ... عطت خاااااااااالي ادهااااام جده
عمي الحكوووووووولي... جة عليه وكضبني سحب الشال من

راسي وكطه غااادي.... االباب بحزتها انهجم كله تصيح
فك الباب يول وهو ولا يمه ....

وتستمر الحكاية

لا يسعني سوا انني اقدم احر التعازي والمواساة للمتابعة والصديقة .. زهراء
بوفاة والدها وعمها اسأل الله العظيم ان يرحمهم ويجعل مثواهم الجنة ويلهمكم الصبر والسلوان