رواية خيال الكحيلة الفصل الثامن والعشرون 28 - بقلم nashwa_alsltani

مساء الياسمين ..❤️

#خيال #الكحيلة

#بقلمي_نشوى_السلطان🧚‍♂️

السابع والعشرون

السابع والعشرون

دحكت السيطره ملياااااانة ناس من تكريت ومن موصل ومن سامراء ومن الانبار ... حييييل شكد بشر

اركض ورايه سراب تركض ورايه وعباياتنه مفتوحة عبالك بات مان ...امشي وادحك عالشبابيك اريد اعرف ابويه

على ياشباك واكف كتله سراب امشي خل تلفوف من غادي ...

احاجيها شو هاي ماترد .. صديت بسرعه ... لين سلطان
بوجهي ... واكف عيني صارت بعينه ...اريد انطق ماكدر بعد

دحكت بعيونه تلمع وصافن بوجهي .. لحيتة عاليه ...
ضعفان ... كمت الملم بنفسي .. واعدل بالحجاب ... جان لابس
قميص اسود وبنطرون ... فتحلي اديه الاثنين ...

همس ... كحيلتي .....

دنجت راسي وعيوني مليانه دموع ... اريد احجي ماكدر ... ...ورديت رفعت راسي ...

مشيت خطوه ... جان يجرني عليه ... حضني بقوووة ...
همس يبعد عيوني ... شلونج ...يبعد الحيل ...

سحبت راسي ودحكت بعيونه وعيوني تدمع ... اديه محاوطتني كتلة
بصوت مخنوك الحمدلله ... انت شلونك

_ اني ... اني شلوني والله ماصرت زين الا هسه ... تعاي
يبعد الروح هاي شصاير بيج ... رجع حضني ...
اوف يبعد العمر يولي شسويتي بيه ....

مسحت دموعي .. كتله گول اني شصار بيه ...

لا تبجين حبيبي تعاي...

سحبت نفسي منه دحكت على روحي ملابسي كلها تراب .. على كولت الحجيه صدك جن جلاب متجاتلات فوكاهه ... شكلي مبهذل كتلو لا تعيب عليه مو زين بيه روح ...

ابتسملي وكال ... الحلو حلو لو شما يكون ... تعاي تعاي ...

جر ايدي ... مشيت خطوتين ،. لكيت سراب وضرغام واكفين
وكوه كاتمين الضحكة ...

كتلها يولي وين اختفيتي ...!

ضرغام ... شلونج خيتي الحمدلله عالسلامة ...

الله يسلمك الحمدلله انتو شلونكم .. حجيت وياه ورحت وكفت بسد سراب ... كالت الجناسي كحلاء

اووووو جيبيهن ...

سلطان تعاي اشربي ماي شي ..امشي ويايه ... جر ايدي ..

كتله دقيقه الجناسي ... مالاتنه ابويه اخذ القديمات...

_ انطينياهن... ضرغام ... اركض وديهن العمك ...

ضرغام ... ههههه شلون يريدون يورطونه .. بالجناسي المزوره
خل اتلاحكة ...

اخذ الجناسي ضرغام ... مشيت اني وسلطان وسراب ..
وداني للحمامات .. لكيتها كتل البشر .. كتله شلون متربنه ع الاقل بس وجهي اغسله ...

كال تعاي .. اخذني بساحة ورا البنايه ... شايل بديه بطل ماي ...

كلي اكعدي ..... نزلت روحي ... كام يصبلي ماي ...
واني اغسل .. الماي بارد ثلج .. اخلي على وجهي واشهك
وهو يضحك عليه ...اخذ مني البطل ... كام هو يغسلي بيده
واني ميته خجل بساعتها ولا اكدر ادحك بوجهه مبتسمه
وهو يصب بالماي...

سراب واكفه كبالي تسجل افلام كلت اليوم ماراح نخلص من اللسانها

كمت الحيلي الشمس بوجهي حواجبي طالعات وشواربي ..
جن واحد شاب .. توه خاطات شواربه .. امشي ومخليه اديه على وجهي واحاول ابعد نفسي عنه ...

شوي وجة ضرغام ...

_ سلطان امشن ورايه خل اوديكم للسياره وبعدين نكمل من السيطره

طلعو يمشون جدامنه ضرغام وسلطان ...

سراب .. كالت كحلاءء يولي...

ها شبيج ...

كحلاء ... دحكي علينا شطالعات خرب حضي

كتله اسكتي لحد يسمعج ... شوفي اني والحواجب الطالعه
جني خبله وافتر باعي العبي ..

\ سراب... كحلاء ... خرب كلها شافتني هييييج ... ولج شواربي ينحلف بيهن...ورجليه يطركن بالحذاء ...

\ نمشي ونحجي بصوت ناصي... ...

جان يصد عليه سلطان ... كال يمعوده والله حلوه شبيج
يحجي وميت ضحك ...

اني من حجة بعد مادري وين اودي وجهي من الفشله ...
سراب وكفت بعد ماتمشي من عرفت سمعونا ...

ضرغام صد علينا وهو يضحك كال .. حلوات عمي حلوات
الله يستر عليجن بس امشن ...

سراب ... من كال هيج .. عايزه تكعد وتبجي من الفشله

سلطان حبيبي ..!

صديت عليه ها واني اضحك علو سراب

- شبيج واكفه امشي على هاي غرفة التفتيش مال النساء واطلعي كبل السياره كبالها اصعدي هساع اجيب الباقين

..لا خليك يمي لاتروح الله عليك خليك قريب مني

صفن بوجهي ابتسم .. جة سحب ايدي لزمني وكادني يم شباك اخذني مشي  وصلنه الاقامه ازدحاااااااام اهلي واكفين واني ميته تعب وامي تلوب
عفت ايده وركضت على امي ،.
ها ماما دتوجعين مو ...

اي والله بنتي ماكدر اجر النفس ... الوجه اهينه ... مافارگني

داتحجي جة سلطان تقرب مني .. كال
بس خل ندخل اربيل بوجهنا للطبيب

..ياريت والله بس نريد نعرف شبيها

ان شاءالله سهلة .. لا تخافين .. ابقي هين هساع اجيج
هزيت راسي اي ... راح يمشي
..عبر عالشباك ماادري شنو حجه ويه اللي كاعد يسوي الاقامات ونطاه هويته وصاحني بسرعه رحت اخذلي صوره واخذ معلومات وورايه اهلي

نسيت الحجيه الدي دخلتها ويانه هي وبنتها تذكرت كتلو سلطااااان الحجيه

.. صفن بوجهي وكال هي
حجيه ؟؟

هاي خطية مره دخلتها ويانه من عبرنه دحك ذيج هي وبنتها ارملة يمكن والله نسيت شنو كالتلي وعدها طفلة عليك الله جيبها يسوولها الاقامه نشوف بعدين وين تروح

لا شنو وين تروح ناخذه ويانه وينها .... طلع يمشي عليها ...

كاللها حجيه تهيري حتى نختم ...

دحكت عليه وعليه  صفنت كتلع اي خاله كومي

.. ها اي يمه راح اكووم والله يا يمه تكسرت رجليه عجل امج خطيه مدري شبيها

..هساع خاله بس نفوت سلطان يودينه طبيب

.. هاا بنتي منهو سلطان ؟

..خطيبي خاله يلا تعاي انتي ولو ماعرفت شنو اسمها صديت عليها

اني اسمي فاطمة وبنتي اسمها وسن

..عااشت الاسامي يلا تعالو

دنمشي جان الحجيه تكف .. دحكت على سلطان ...
جت تمشي عليه صفنت بوجهه ..

هو ابتسم كال الها ها حجيه مشبهه عليه لازم ...

: يمه وين شايفتك ؟؟

فاطمة..يمه هذا الاستاذ سلطان عضو مجلس ماتعرفي  مو خيتي كحلاء

.. ابتسمت كتلها اي صح

..يايمه اكول وين شايفتك عجل هو انت زلمة كحلاء ؟؟

..اي حجيه اني حياج الله

...يااااايمه بعد روحي تستاهلها الله يحفظكم عجل خلي نروح

...ضحك كاللها اي خاله هساع

اخذتهم اني وسطان وسوينه الاقامات وخلصنه كلنه الاقامات كال يلا نتوكل وصاح على ابويه كلو اصعدو ويه ضرغام انت وعمتي والحجيه وبناتها وكحلاء وساره وليلى وسراب وياي

..كال ابويه يلا بس خل نصل ناخذها طبيب

...عجل الحجيه وين نوصلها ؟؟؟

..راح سلطان يسألها كالتلو بنتها فاطمة بيت اخت الحجيه كاعدين بفندق كالو اسم المنطقه تيراوه مدرشنو .. هيج كالت هساع اخابرها نروح يمهم

...ماشي خيتي خل نصل سهلة ضرغام يوصلكم وين ماتريدون

ضرغام اي بطيراوه قصدها ... خل نمشي

صعدنه كلت لساره اصعدي جدام يم سلطان بس ماقبلت كالت لا انتي اصعدي

صعدت بالسياره وجريت نفس قوي وصعد سلطان

...ياااااااهلا بالغوالي لو تدرون شكثر جنت خايف عليكم ..

.....
ماردت ساره ابد دحكت لسلطان جر نفس قوي شغل السياره وفتح التبريد وطلعنه

الطريق كله ساره ساكته بعدين حطت راسها عالكشن ونامت

..ادحك عالطريق انتبهت سلطان كل شوي يدحك بوجهي

ابتسمت..شبيك حبيبي ؟

..يولي مشتاقلج ... فراگج علج گلبي علچ ..
دحك بالمرايه على سراب كاللها اخيتج
تكلي شبيك ... ها يابه ...

ماتدري غيابها اخذ من حيلي حيييل

سراب ..لا كلتلها اني كلتلها هذا مو حذاء هذا مصباح سحري

سلطان ... شنهو يولي..!

كحلاء ... عوفها شاخطه هاي ماتكدر الا تحشش ههههه
سلطان ... ولله وراجن سالفه مدري شتسولفن عالعموم بس انطيني العلاكه الجوه رجلج

..سراب ... اي صدك شنهي هاي العلاكة ..

سلطان ... انطيها الكحيله

سراب ... ليش لا كحيله ... هاج عيني هاج ...

..كحلاء واني مبتسمه على حجي سراب
..انداريت اخذت العلاكه خليتها بحضني استغربت كتلو شنهو هذا

يمعوده اكلي افتحيها

فكيت العلاكة ..  لين بيها نساتل وشوكولاته اللي احبهن وببسي وشوكولاته اسمها ( ميرسي ) فرنسيه اعشقها عشق دحكت عليه كتلو  هاي شنو يمعود شجايب

..اكلي حبيبي بين مانصل

..شكثر جايب شسوي بي هالكد

..اكلي بألف عافيه وناوشي سراب خل تاكل

..نطيت سراب وليلى بيسي وكيك ونساتل واني هم اكلت وسراب كل ما اكد راسي تأشرلي وتقلد هههههه

دحكت سيارة ضرغام صارت بصفنه من يم بابي نزل الشباك سلطان وضرغام كلو ام كحلاء تعبانه بوجهنه عالمستشفى

سد الجام سلطان واتصل بضرغام

...بس ندخل داخل اربيل اوكف بالطريق خليها بسيارتي اني اطلع بيها اني وعمي ابو كحلاء للمستشفى والباقين وديهم للبيت ودزلي ليث ياخذ ساره وليلى والبنات

..لا سلطان اني ابقى ويه ماما اشوف شبيها

..هز راسو اي اشرلي بيده 
شوي وسد الجهاز

... كال دحكن البيت اللي اخذتو چبير يطرد بي الخيل خليت الكم غرفتين
غرفه لعمي وعمتي وغرفة الج ولسراب

..ليش كم غرفة بي

..7

...حيييييييييل شدعوه

..اي مو طابقين ولازم جبير حتى يكفينا بين ما نشوف شلون بعدين

‏...‎عجل هذا ڤيلا مو بيت

..بالضبط ڤيلا بس اني اكول بيت

...وين راح نودي امي

...هساع بس نصل

.. ماشي ..

تقريباً نص ساعه هيج صرنه داخل اربيل اتصل سلطان بضرغام كلو اطبك على صفحه

طبكنه على صفحه ونزل سلطان كال انزلي اصعدي وره
نزلت وكعدت ساره كالت عجل اروح وياكم اتطمن على امج

...لا حياتي مايحتاج انتي حامل لازم ترتاحين

..سمعت سلطان كال مني الحامل ؟؟؟

..واني احجي عستني ساره عرفت ماتريدني احجي
كتلو لا ماكو شي
.. صفن عليه حس اني ماحبيت احجي سكت وكال

..يلا اصعدي انتي وليلى وسراب ويه ضرغام يوصلجن للبيت

..رحت اني ساعدت امي وركبت ليورا وبابا صعد جدام واني وامي ليورا

...طلع ضرغام جدامنه واحنه سلطان راح بغير طريق
اتصل بشخص يمكن صديقو كلو احجز غرفة بمستشفى زينه وردلي خبر يا مستشفى بسرعه لووو شوف مستشفى الرسول او المستشفى التركي وحده منهن

وصلنه تقاطع مال مرور نزل سلطان التلفون وفتح السبيكر
اسمع ذاك الولد كلو التركي غالي اكو مستشفى (بار) هم زينه بس نار غاليه

...مو مهم بس احجز بين ما اصل

..ماشي صار

دخلنه بشارع مزدحم كلو محلات ومطاعم وسيارات والترفكلايت كل شوي واحد ونوگف

...اتصل صدق سلطان ماادري شنو كله

كله ابويه...‎ابني حتى لو طوارئ

...على بختك عمي طوارئ شنو هاي المستشفيات ما الله كثر غير الاهليه باربيل

..والله ياابني غاليه

...ابشر عمي عاين بالله خير

...راح سلطان بفرع ثاني مشينه مسافه ووكفنه كبال مستشفى مكتوب ( مستشفى بار) دحكت زلمه اجه يتقدم علينه ووياه ممرضين 3 وسديه

الظاهر المستشفى جديده لأن بنائها حديث

نزل بابا واني نزلت والممرضين نزلو امي وخلوها بالسدية دخلوها جوه

وبابا راح وياها وسلطان اشرلي افوت وياهم

...دخلنا لين مايقبلون يدخلون امي للطوارئ الا ندفع تأمينات بالحسابات

..وكف بابا كتب المعلومات وسأل ابو الحسابات شكثر الفلوس ؟؟

..500 الف حجي

..صخاااام هو شسوو بعد حتى ياخذ 500
كتله اكلك هسه دشوفها شبيها خل يجي دكتور نعرف شنو المرض

وماسمعت بس صوت سلطان

...كحلاااااااء
اندرت دحكت عليه خزرني واشرلي اسكتي هزيت راسي اي وخرت من يم ابو الحسابات
وسلطان طلع فلوس حسب 500 دولار نطاه وكلو اريد دكتور فوراً واذا تطلب الامر تبات مستشفى مو مشكلة

...اجانه واحد ثاني اخذ امي فوتها للطوارئ مال مستشفى وتلكانه دكتور

خلاها بغرفه وحدهم وياه ممرضات2 طبو جوه

اني من اخذو امي عبالك اخذو روحي .. اريد ارگد بمكاني ماكدر بقيت ادعي يارب مايطلع بيها شي

دقيقه طولو وطلع الدكتور والممرضه بيدها سرنجات ساحبه منها دم للتحليل

..الدكتور كال تنام هين واشك هاي المرارة بس هساع تطلع الفحوصات وسوو السونار هذا والتحليل بس يطلع جيبو عليه

..اخذ سلطان الاوراق هو وبابا فتحتزالباب وطبيت اركض يم امي لكيتها تفتح وتغمض بعيونها كضبت راسها بديه

واديع ترجف .. يمه كلشي ولا امي كتله ... ماما شبيج شتحسين هساع ....

...شوي راح الوجع ضربتني ابره وبديت انعس

اااي احسن عجل نامي ارتاحي  كمت فتحت الباب وكفت بالممر ماكو احد ..

بقيت انتظر سلطان وابويه دحكت امي نامت
طلعت عليهم سلطان يحجي ويه صاحبو وممرضين اجوي سحبو سدية ماما ودوها بالمصعد ركضت عليهم ...

...وين ماخذيها سلطان

.. جرني من ايدي شبيييج لغرفتها فوك بالطابق الثاني امشي

... ركضت وراهم رحنه صعدنه بالمصعد الثاني للطابق الثاني وحطو امي بغرفة رقم 8

..طبيت الغرفة كلشي بيها دحكت ابويه بالباب كاعد  اديه على راسه... مهموووم ... جيت كعدت يمه .. كتلو بابا ماما مابيه شي
وهسه تكوم الحيلها ..

ادري بنيتي ادري ... ليش هي بس امج ... الهموم كثرت ..
حرت شجبر ششد شدهت جثيرات وعليه
صعب عدهن ... خالج كاسرظهري

هو ديححي حسيتو اختمك .. كام يم امي وغطاها زين وهي نايمه

الغرفة باااااردة بس اني احس بداخلي نااار واني صافنه طب

سلطان كال تعاي كحيله .. دحكت ابويه مكابل  امي كمت فتحت الباب وطلعت وراه

.. مشيت وراه طلعنه بالممر واني امشي فتح ايدي  كال

..الزمي خلي ذني الفلوس يمج

شنو ذني شسوووي بيهن..!
اهوو شبيج اخذيهن واسكتي ...

هزيت راسي اي واني صافنه ...
..كال خل اشوف الدكتور شنو يقرر بعد شوي بس يطلعن التحاليل

ان شاءالله ماييها شي يارب

ان شاءالله بس غطي هذا شعرج زين يولي اظل اعلم بيج

...ابتسمت كتلو والله تعبانه ماانتبهت

..يخسه التعب تعاي اكعدي هين

كعدنه بالممر عالكراسي سحب ايدي دحك ماكو حلقة بيدي

...حلقتج وين ؟؟ يولي

مو نطيتها لبابا ويه ذهبي

فدوه الكم اخذلج بدالها بس ارتاحوا هسه

...كلشي مااريد والله بس خليك يمي والله ردت اموت بدونك

...اشششش الموت لاتذكري وهو يحجي سحبتي خلاني جوه ايدو وايدو الثانيه لازم بيها وجهي بنيتي انتي

...ابتسمتله ومادرب ليش خجلت

...قاطعنه الممرض وجان اكوم الحيلي عدت شالي

كال الدكتور يريد احد منكم

...كام سلطان كال تجين ؟؟

..اي طبعا ...

رحنه نزلنه للدكتور دكينه الباب وفتنه

...بلي دكتور

...عيوني المريضه عدها مراره ومفتوحه لازم تنشاا فوراً

...كله سلطان عجل توكل دكتور

...تمام راح اسوي الاجراء اللازم بس كملو الحسابات واسعار العمليه

.. خوش عجل ... كلشي موجود بس المريه ياريت تسعجلون بيها

سلطان يحجاي الدكتور واني صافنه فتحت الباب وطلعت
وگلبي ناااار
جة ورايه سلطان كال اكفي .. وين محدره ..!

... صديت عليه كتلو يعني شنو ماما راح تسوي عمليه ؟؟؟

...بسيطة حبيبتي بس خلي ترتاح

...لا والله اخاف شلون

...شبيج حبيبي كولي يا الله ما سمعتي المراره لازم تنشال

مادري بس خاف ماتتحمل العمليه ..

لا لازسهله شبيج .. طلع تلفونو واتصل شويه وكال

..ليث جيب مبلغ من ابوك كلو عمي سلطان دزني ماشايل بالسياره

... كتله لااا دقيقه خلي اكول لبابا يجي يدفع واني احجي اشرلي اسكتي ..

... سكتت شوي وسد التلفون وكال  كل مره اكلج احنا فلوس ماكر بيناااا امشي هساع .. خل نكمل ..

رحنه لابو الحسابات نطاه سلطان ورقة الدكتور وماادري شنو كتب بالحاسبه ونطانه وصل بي سعر العمليه

...تمام كاكا هذا جزء من المبلغ وبعد ساعه المبلغ كامل يندفع وهاي هويتي خليها يمك علما يجي المبلغ

...اوكي

...تاكلين شي ؟؟

..لا مااشتهي

..مو بكيفج امشي بس خلي ابلغ ابوج بالعمليه

دحكت للمصعد كتلو هيان ابويه جة ابويه يمشي علينا
كال ... ها بشرو شبيها امج كحلاء

..عمي المرارة لازم تنشال بسرعه

...والله شكيت بيها لا حول ولا قوة الا بالله هساع شنو الاجراء

...كملت كلشي عمي

...شكملت والحساب ؟؟

..اندفع عمي توكل بالله

..ول ابني مايصير هيج

..عمي لاتنسه انتو اهلي واحنه بوقت وازمه ياعمي ماكو فوق بينا هي هم امي

...رحم الله والديك ابني رحم الله والديك ماجذب ادهام من كال عنك ذهب

... اخ ادهام .... الله يردو سالم ان شاء الله

..عجل اني صاعد يم الحجيه

...ماشي بابا اجي وياك .. 

... سلطان كرصني من ايدي .. صديت كال اششش

جرني كال تعاي

..طلعنه بره المستشفى يمها مطعم مال مستشفى

طبينه وكعدنه على طاولة حط سلطان تلفوناته والوصل مال الحسابات كال شتاكلين

...والله ماكدر اكل ...

...مو بكيفج .. هساع اجي ..

..راح يوصي واني صار عندي فضول اعرف سعر العمليه والمستشفى اخذت الوصل فتحتو

بسرعه ورجعت الورقه ...

شوي واجه سلطان

.. كال ها شبيج صافنه ..

كتلو .. هاي شنو !؟؟
..
شكو شبيج حبيبي..!

..سعر العمليه مبالغ بي كلش

..دحكي انتي بمستشفى بار مستشفى راقي وخدمتها راقية واطبائها بعد احسن

..وليش مارحنه غيرها

...اسكتي هساع احجيلي شلون ادهام راح

...جريت نفس وحجيتلو كلشي وهو صافن عليه اخير شي كلي وانتي ؟؟

..اني شنو

..انتي لو صاير بيج شي ورايحه مني جان شنو حالي هساع ؟؟

..دحكت يحجي وهو مقهورررر ... حسيته اختنك
ارتبكت ماعرفت شسوي
...لزمت ايدو
..جرني لحضنو وكال الله يخليج هيج على طول بحضني
عجل گولي تخبلت اذا بيوم عفتج وحدج ...

وهو يحجي

..دك تلفونو

كال هذا ليث

جاوبو كلو بمستشفى بار بالمطعم مالتها تعال علينا

..جابو الاكل ومشاوي وببسي ومقبلات وكللللشي طالب

..اني بس صافنه عالاكل ولا كدرت اخلي شي بحلكي ..

واني صافنه .. قاطعني صوت ليث ..
...سلاااااام عليكم

..وعليكم السلام

...يااااااهلا بكحلاء ياهلا واخيراً جيتي يمعوده العاشق ذبحنا عليج يوميه يريد يحدر غادي...

...انچب يول

..عليش انچب قابل مچذب اني احجي لووو اسكت ..
...
يول اكضب السانك يول اتخسيت شتريد تححي يعني

.. ضحكت كتلو سولف ليث بعد

...جيب الفلوس وفارجني يلا

...لا صدك امج شلونها

...راح يسوون عملية مرارة

...لااااا ماتستاهل والله يارب الشفاء العاجل

،...عجل خيتي كومي ارجعي للبيت ارتاحي

...مستحيل لازم ابقى هين يم امي

...ماشي براحتج اني اروح وانطيهم خبر هناك بلجي يجي احد من البنات هين

راح ليث وكمنه وسلطان راح دفع الفلوس كالو المغرب تدخل عمليات

...ردنا نصعد عليها للغرفة ودك تلفون سلطان دحكت مكتوب ( ام فهد ) انطاهه رفض ... رجعت اتصلت .. اني مادري شبيه من شفت اسمها گلبي كام يدك سريع ... ادحك عليه بطارف عيني

... رجعت اتصلت نوبه الخ

كال استغفر الله ..جان يفتح خط بهالاثناء

... سراب اتصلت بيه رديت عليها بسرعه
احجي وعيني على سلطان شراح تحاجي وشتريد منه ..

..ها سراب

..اكلج كحلاء اريد اكلج شي بس لاتعصبين

..شنو كولي

يتبع...

البارحة هذا البارت كتبته وكملته جيت انشر بالسحور انطيته حذف بدون ماادري .. وراح كل التعب وهذا هسه كملته

اوقات ممتعه ..