رواية قلبان يجمعهما السحر الفصل الثامن والعشرون 28 - بقلم جـُكـلـيـتـة 🖤🇮🇶

#قلبان يجمعهما السحر

#البارت الرابع والعشرون

بقلمي #نور الشمري

Noor336

#امي .. انتِ الجنه التي خلقها الله لنا في الارض .. امي انتِ نبع الحنان الذي لم اشبع منه .. انتِ الامان الذي اراهو في جميع الامهات الا انتِ .. امي مهما فعلتي لي ومهما تركتني وحيده فأنا احبك كثيراً .. لهذا لا تتركيني لا تذهبي .. لماذا كل من حولي يذهبون حتى انتِ رغم كل شي فعلتهي انتِ  سابقى احبك امي ..

انصاف : ششنوووو شتحجي انت عمار امي بيها شي احجي ماماااا رانيا شلون صار هيج احجيي فقدت الوعي برغم من كل الي دايصير بيه هسه من وراهن بس يبقن امي واختي ماكدر اكرهن ولا اكدر احبهن بس ماتحمل فراقهن وخاصه الموت

صرت اصيح واحجي ويه عمار وهو يهدي بيه

- ولج شبيج اهدي خابرني خالي وكال السياره مكلوبه وطاك البانزين ومفجوره ناقذين نص منها ونص مكدرو ينقذوهم امشي نروح انشوف وسمي برحمان واتعوذي من الشيطان

والكاتبه الله يصير مشيت وراه  و اني الف حجابي بهمال وطلعنا للمستشفى الي كال عنها خالي والطريق كله ادعي مابيهن شي صح اذني بس كلبي مايطيني اشوفهن هيج

ولازم لازم ع الاقل يعترفن بغلطهن ويتوبن الى الله عز وجل عسى يسامحهن ويخفف عن ذنوبهن يجوز الله عاقبني ببعدي عن ابني لان كذبت وصرت شريكه بهذه اللعبه الوصخه

لان ضميت عنهم هذا الشي والساكت عن الحق شيطان اخرس واني هيج سكتت وماطلعت الحقيقه لحد مالله فضحني وعاقبني ببعدي عن ابني بس مو قصدي مو قصدي اشاركهن

انت اعلم يالله الي بداخلي وعقابك اتحمله لان غلطانه واعرف نفسي بس عقابك صعب وتعرف ابني نقطة ضعفي

جنت صافنه وحسيت السياره وكفت نزلت وعمار يمشي بصفي حسيت بايده كامشه ايدي وهو يطمني باوعت ع عيونه هو هم حزين تبقا امنا واختنا الي جوه

وشكد ما جان عمار قاسي وياهن ميكدر يشوفهن يموتن وميسوي شي اعرفه كلش زين دخلنا وعمار راح يسئل الستعلامات مشينا ع الطابق الثاني واني احس كلبي

راح يطلع من مكانه استقبلنا خالي وهو يبجي وينوح من شفت بجيه ومنظره كمشت ايد عمار حيل مااستحمل صدمه ثانيه بعد كافي والله كافي قلبي شيتحمل بعد

ركضت عليه واني اسئله واريد منه جواب يريحني
- خالوو ماما بيها شي احجي حباب احجي
يبجي ويهز براسي ومايقبل يحجي عمار صاح بي

- ماتحجي خالي شبيك ساااكت امي ورانيااا وين

- امك اطتك عمرها متحملت وماتت راسا

حجه كلماته وبجه وكعت بلكاع واني اباوع عليه لااااا ماما لاااا وين رايحه واني ماشابعه من حنانج وين رايحه واني ماشابعه من حظنج وين رايحه واني ماشابعه من حجيج رجعي رجعي رزلي وضربي وشتردين اسوين سوي بس رجعي رجعي ياماما مسامحتج والله مسامحتج

بس ارجعي كعدت ع الكراسي ودموعي تنزل واسمع عمار يسئل خالي ع رانيا جاوبه خالي وهو يهز بيده

- كله من وراهااا الماتسمه خلت اختي تطلع بذيج الصبحيه مابيها شي عايششششه شفت عار مات من قبل لا تخااف عليها بسبع ارواح

- خالللليييي كافيي شنو هلحجي ترا رانيا مهما سوت تبقى اختي ومااسمحلك تحجي عليهااااا

كعد بصفي عمار واخذني بحظنه يهدي بيه واني بس دموع تنزل طلع الدكتور من غرفة رانيا ركض عمار عليه يسئله

- منكدر انكلك اي شي لان فاقد الوعي من تكعد نتاكد من صحتها عدها ضربات قويه بمناطق من جسمهاا وعده ضربه براسها خايفين لا يصير عدها نزيف داخلي ادعو يكون ماكو ومن تكعد نتاكد تكوملكم بسلامه

غمضت عيوني واني اهز برجلي امي ورانيا ثنيجن اااف يالله ليش هيج يصير ليش

خالي راح وعمار كال راح اشوف الاجرائات مال امي واكمل الاجرائات انتي خليج يم رانيا وراح ادز عمتي الج

صدك راح شويه واجت عمتي وعمي ضلو يمي وخالي راح ويه عمار مرت الساعات ورانيا نايمه وعمار اخذ كرايبنا كلهم وراحو يدفنونها  بجيت عليها وتمنيتها ترجع

لان الام مهما صار تبقه ام وتبقه هي كلشي بلحياه وامي مهما سوت الي ابقه احبها صح اتاذيت بموتتها بس مو بكد موتت بابا الله يرحمه العصر رجعو من الدفنه وعرفت من عمتي نصبو جادر للفاتحه واني لازم اروح اساعد عمار

خليت عمتي يم رانيا ورجعني ابن عمي للبيت ولكيت النسوان شكثرها كامت تجي الجوارين اتعزي بيه واني فقط الدموع تنزل صح جنت قويه بس مكدر اسيطر ع دموعي

وبوسط دموعي وحزني حسيت وحده وكفت كدامي رفعت راسي كوثر وبناتها مصدكت شفتها جنت محتاجتها حيييل

شبكتها وصرت ابجي وهي تهدي بيه خلصت ايام الفاتحه 3 وهي ماتركتنيي وحته همسه بتها خطيه جانت شايله مسؤليته الجاي والتنضيف رانيا ماكعدت

عمار ماشفته ابد ويه الزلم بره مادري شنو حالته هسه جانت المله من تقرا ابجي ع بابا اكثر من بجي ع امي لان اذكر بابا بنعيها

خالتي ام جوري اجت خطيه اخر يوم وبقت تتعذر لان مكدرت تجي وتعوف جوري سئلتها ع حالتها كالت زينه احسن وبس شويه ترتاح اجيبها الج واجي

- ماكو داعي خاله اني اجيها بس خل اشوف حالة رانيا واجيها كوثر جانت يمي وماتركتني من خلصت الفاتحه والكل راح البيته كعدت بصفها وسئلتها

- شجابج وشلون عرفتي

- عرفت من سند مخابره نصر وكايله وكال اني رايح تجين كتله اي ماعوف انصاف وحده واجيتج

- حبيبتي ماتقصرين ادري بيج بس نصر شعرفه

- والله ماعرف الله واعلم حته اني استغربت هذا الشي

سكتت لان ماريد اسمع باسمه اكثر عمار حالته جانت اسوء من حالتي لان امي جانت وياه مثال الام الحنونه الي اتحب اطفالها بس بمرور الايام اتعود ورجع مثل ماجان

بعد ما رجعو كوثر وسند فرغ البيت وبقيت وحيده ماكو احد بي والي عرفته عن رانيا لحد لان ماكاعده  اجه عمار تعبان من المستشفى صار من الشغل للمستشفى ومايشوف الراحه ومن سئلته شكو وشبي خالي يحجي ع رانيا ذاكليوم

- يمعوده لاعبه لعب حقه خالي من يحجي عليها والله شايفه عرس مثنى ناشري ع الفيس وهو مثنى ناشره ع صفحته طالعه عدها وهاي متخبله

هسه اروح البغداد واخرب الزواج هسه تاخذوني يمعوده اهدئي خل يصبح الصبح يمعوده ستري علينا وهي ماكو اصيح وتغلط وحارت شسوت وكوه امي قانعتها باجر الصبح يطلعن البغداد وصدك

ثاني يوم طالعات كعد خالي كال اني اوصلجن هي دك رجل لا انت ماتاخدني لبغداد اعرفك تاخذني الواسط ماريد نروح عبريه يمعوده كولي غيرها ماكو معانده

وهذا قدره ربج رايحات عبريه صاير بنجر مدري شنو والسايق يمشي سريع مكلوبه السياره وطاك مال البانزين مفجوره وكوه مطلعين الناس البيها

- بقيت صافنه يعني رانيا شتريد اسوي  بعد ازوج وخلص شتريد اسوي يعني هم اطكه بسحر وترجعه تريد والله مااستبعد هذا الشي لان اختي واعرفها زين

مرت الايام وكعدت رانيا ورحنا اني وعمار الها بس الصدمه جانت من فتحت عيونها وهي تضحك و تحجي ويه عمار

- هييي عمو عمو اطيني ربع اشتري نستله راسي يوجعني حيل بلكت يطيب ادا اكلت

صفنت عليه هاي شنو تحجي صدك  لو تضحك علينا صاحو للدكتور وبعد فحوصات وتحاليل بنيت رانيا بسبب الضربه صار عدها خلل بدماخ وفقدت عقله وهسه هي

كل عقله طفله صغيره وواصيح لعمار عمو ومن اشوفي تضحك وتكول اني بعد 5 سنوات اصير مثلج ههههههههه

جانت صدمه رانيا اكبر من صدمت موت امي لان رانيا يرادلها علاج هواي وتعب طلعنا من المستشفى واني صافنه شلون بيها هاي

مرت الايام وكمت كل جمعه ابراهيم يجي يم كوثر وياخذني عمار اشوفه ورانيا تبقى يم جوارينا بتواسيل ياله تقنع ومن يطيها عمار فلوس ياله تقبل تبقه يمها

وهيج مر شهر ع الحادثه واني كل جمعه ببغداد اشوف ابراهيم وهو ولا نساني حبيبي ويبقه ينتضرني يوم يوم

جوري رحتلها وجانت احسن اعتذرت مني لان طردتني من اجت وحالتها جانت تعبانه اللاسف الناس ماسكتت لحد لان وهم بطاريها وين مايكعدون يحجون بيها

برغم من فحوصات الدكتوره كالت بعدها بنيه ومابيه اي شي بس الناس ماترضه تسكت ولا تقنع

مر هذا الشهر واني بين رانيا والبيت وعمار والجمعه ابراهيم ههه اشوف ابني بلختلات وبدون مايعرف ابوه لان المحكمه كالت اله بشهر مره اشوفه هههه شنو من محكمه ماعرف وخلص هذا الشهر وهو ما جابه واجه

واني سكتت خفت وقنعت بهذا اليوم الي بلاسبوع اشوفه عد كوثر وهذاهو طلع اربعين امي ورحنا للمقبره زرناها هي وبابا

من شفت قبر بابا بجيت لحد ماكلت بس وشكيت لحد ما كلت بس وعدت روحي واني يم قبره اكون انسانه ثانيه من اليوم انصاف من يوم

الي طردها نصر من بيته وبدون مايسمع منها كلمه اتغيرت انصاف من يوم الي اخذو ابنها بلغش وحرموها من عده وصارت اشوفه بلختلات ببيت حماها من يومها واني كرهت نصر

وكرهة حبي اله كل يوم جنت اسئل عمار ماخابرك حته يطلكني سيد ترا مو حاله اني اريد اعيش وهو يجاوب بــ لا

ماعرف شنو الي جان يدور بباله العمار من يوم وفاة امي وهو تغير فدور او بلاحرى من يوم خطف جوري وهو انسان ثاني مدااعرفه زين

وفاة امي كدرت اجاوزها بسهوله واتعود ع غيابها لان ماشفت منها شي يخليني اتاثر وانقهر صح انقهرت اول ايام بس كدرت اجاوزها

لان عمري مشفت حنيه  الي او حب ام الابتها بعيونها ولا شفت شي تسوي الي دوم جانت اتفضل رانيا وعمار عليه وماعرفت السبب لحد لان

رجعت من النجف واني انسانه ثانيه ووعدت نفسي اكون انسانه قويه ابني نفسي بنفسي وطلبت من عمار ارجع ادرس وهو فرح حيل وهاي اول خطوه اخطيها

وهي رجوعي للدراسه حته ابني ذاتي من جديد وابني انصاف جديده مو اني الي يكسرني رجل اناني

وهي كدرت ارجع ادرس وبايام العطل الجمعه والسب الجمعه اشوف ابراهيم يم كوثر الي ماتركتني ابددد وصارتلي اخت وام والسبت اروح الجوري اشوفها الي كورت ع نفسها بغرفتها وماتطلع منها

والناس تسكت تسكت وترجع تحجي من يشوفون واحد من عدهم حسن لو ابوها لو امها وانقهر عليهم شنو ذنبهم

رانيا اووو ياررانيا كلها بجفه ورانيا بجفه وحده ماعرف اذا اشمت بيها لو انقهر عليها بس كلبي ميطيني اشفه واشمت لان اختي والشماته مو من طينتي وتربايتي

جانت 24 ساعه تلعب بلعاباتها والي يقهر عدها لعبتين ولد وبنيه اشتراهن عمار الها تكعد تلعب بيهن ومسميتهن رانيا ومثنى من اسئلها اتكلي اي هاي اني وزوجي من اكبر

من سئلتها ع اسم مثنى جاوبت احب هذا الاسم احسه حلوو بجبت من كل كلبي عليها من سمعت هيج صارت انسانه ثانيه سبحانك يالله

وين راح جبروجتن وتباهيجن وفلوسجن انتي وامي وين راحن انانيتجن وتكشخجن اشو وحده راحت جوه التراب وكلشي ما استفادت ووحده صارت مجنونه وكلشي ما ربحت رحمتك ربي رحمتك

بيوم من الايام رجعت من المعهد بعد ما سجلني عمار بمعهد من الثالث وكال نجحي ودرجات عاليه جيبي حته تتحولين كليه

عمار خطيه يشتغل منا ويطي فلوس منا لامريه جوارينا فقيره علمود ادير بالها ع رانيا بغيابنا كل هذا وما حطيناها بمستشفى لان لا اني اطاني كلبي اسوي هيج ولا عمار

بيوم الخميس رجعت ميته تعب راحت المر الي حاطيها يم رانيا واستلم اني البيت طبخ وتنضيف وحسيت الدوخه رجعتلي بعد ما تركتني شهر ونص

كوه سيطرت ع روحي وكعدت غديت رانيا واكلت اني ونمت لان تعبانه حيل كعدت عمار ماكو  شفت اماعينه جاي ومتغدي ورايح

كعدت احاجي كوثر واسئلها ع ابراهيم ونحجي كالت تدرين مثنى مرته حامل

- يستاهل مثنى ماشاف راحه ويه اختي كوثر خلي يرتاح بحياته

- اي والله خطيه ممصدك طاير بيها وخطيه هي هم حبابه واشوفيها حاطه البنات بعيونها والله اكثر من مره سويتلها كبسه علمود اتاكد منها طلعت حبابه

- يستاهل كل خير اختي ماعرفت اتكسبه والله يهديها والله كلبي مامطيني اعوفهن هن وابراهيم بس بني ادام جبروته اقوى

- اي والله الله كريم  تدرين من يشوفني يسئلني عليج وعليها يكول بعمري ماحبيتها بس تبقه ام بناتي

- شلون يعني مايحبها كوثر اذا تعرفين شي كولي حبابه مو زواجهم ع حب

- شوفي ذاك اليوم سند حجالي وكال لا تكولين بس ماكدر اسكت لازم اسولفلج شوفي من جانت رانيا اداوم ومثنى وياها

يكول انعجبت بيها وهي جانت تنضرني بنضرات هم وتبتسم واني شاب حالي حال كل الشباب انعجبت بيها بشكلها جمالها جسمه بس ماحبيتها اعجاب فقط كلشي بيها

جان يجذبني بيوم جان اكو احتفال بجامعه والكل يحتفل حسيت بشخص وراي من التفت شفتها رانيا اتعرفت عليها وصار بيني وبينها علاقه بتفلون وسوالف وضحك وغزل

لحد ما مره هي عرضت عليه زواج بسر صفنت وكلت ليش لا واني شاب وبلحلال وشوكت ماريد اطلكها ازوجتها بسر وشهر شهر وبدت رانيا تبتعد عني  وتبجي من اخابرها

سئلتها هواي وصدمتني من كالت حامل هنا وكفت الدنيا بعيني وصار لازم اخطبها خصباً ماعليه وازوجها كدام الكل وكل هذا واني ماحبيتها صح عشت وياها سنين بس مكدرت احبها  وهسه حبيت وازوجت الي احبها

 - انصدمت من كلام كوثر وبقيت صافنه معقوله معقووله اختي هيج مسويه بقيت صافنه سديته من كوثر واني مصدومه ثاني يوم رحت لبغداد

مثل كل جمعه شفت برهومي حبيبي كبران وسنونه داتطلع كل جمعه اكتشف بي شي يتغير اسبوع اسبوع انتظر الجمعه كمت بقيته بحظني اوكل بي واندكت الباب  كامت همسه فتحت الباب وسمعت صوتها اصيح

- عمو هذا انت شجابك مو قبل شويه ذبيت برهومي

- شبيج اصيحين ولج اذني انطرشتتت بت الحلووو امشي صيحي امج خل تجي وياي وانتي خليج يم برهومي

- من سمعت صوته كمت بسرعه لغرفة همسه وقفلت الباب عليه اني وابراهيم وحاضنته حيل خايفه لا يشوفني ويحرمني من عده ماعرف شنو صار بيه بس احس روحي اكرهه وحته صوته صار عادي بانسبه جنت من اسمعه

احس كلبي يطلع من مكانه ودكاته ازيت احس روحي طير بس هسه اليوم وبعد شهرين او اكثر من اخر مره شفته بيها ما هز شعره مني وكانما صوت واحد غريب

شكد قويه لعد اني اخذ كوثر وراح وماعرف ع شنو ضليت اني وهمسه باقي البنات بلمدرسه اله هي سادس ومعطله

بقيت ويه براهيم العب وياه واعلمه ع اشياء اوكله يوم احير شنو اسوي وماريد اضيع ثانيه وحده بدونه مرت 3 ساعه واجت كوثر ومبين ع شكله ضايجه

- كوثر شبيج خوفتيني شكلج يخوف

- هااا ائئئ انصاف هيج هيج

- احجي كوثر لا اضمين شي عليه جنت واكفه بباب الصاله وشايله برهومي العب بي واحجي وياها عرفت السالفه اتخص نصر بس ماهتميت اله

- شوفي ماريدج اضوجين بس هاي الحياة وانتي هم عيشي حياتج

- شنو قصدج كوثر مفهمت

- نصر اليوم رحنا خطبناله

حسيت بدوخه والدنيا سودت بعيني نزلت ابراهيم بلكاع وسندت روحي ع الباب وكوه سانده نفسي ماافقد الوعي كمت اغمض وافتح عيوني حته اوعى وكوثر فوك راسي

ماعرف ليش دخت وشنو السبب بس الاعرفه مو لان انقهرت  لااا اني  كرهته وطلعته من كلبي وعقلي وصفحه وانطوت من حياتي بس الدوخه موتتني صالها اشهر ماترضه تعوفني

كو وازنت وكفتي واني ابتسم بوجهه اي الف مبروك خلي يشوف حياته مايهمني بس كوليله خل يكمل الطلاك ويحررني من عده احسن ما استخدم طريقتي ويشوف مني شي مايعجبني

- شلووون شلووون مفهمت انتم مو اطلكتوو

- اي اطلكنا قانونياااا بس شرعاا اني لحد لان مرته ومايقبل يطلك عمار هواي حجه وياه وهو يكوله مرتي واني بكيفي يجوز ارجعهااا

هذا حماج مو صاحي ابددددد

- شنوو هاي شوكت وليش اني ماعرف تعاي كعدي سولفيلي لا اكلب البيت عليج

- هههههه يمعوده هاي ذاكليوم خابره عمار لنصر وكله تعال طلك اختي سيد هم حماج الشفيه شكايل الاخويه

- والله اني حر وشوكت ما اريد اجي اطلكه بس حاليا ماعدي هذه الفكره لان يجوز ارجعها بس اذا استقريت وارتاحيت عود افكر احررها واطلكها سيد

كلمه من عمار وكلمه من نصر كبت العيطه بينهم وصياح عمار واصل لسابع جار وبطلاع الروح ياله هدئته وسد التلفون ومن يومها محد خابر بعد

-  صدك تحجين انصاف واحنه كلنا نعرف انتم مطلكين وحته سند سئله كله طلكتها قبل لا تطلع من البيت

- يضحك عليكم يريد يذلني ويخليني اتوسله بس هيهات مو انصاف تتوسل بي وغصبا ما عليه يطلكني

- والله ماعرف شكول هذا مخبل طلع الله يستر من عده شنو يدور بباله

- هههه هستوج عرفتي شوفي كوثر اتوصليله كلامي اذا ماطلكني اروح لخطيبته وافضحه واكلها اني لسه مرته واذا يريد اجذب هم مو هو جذب بلمحكه اني اجذب كدام خطيبته اسوي شويه درامااا
وغمزتلها

هي من شافتني هيج حجيت شهكت وكالت عزا بعينج انصاف صايره تخوفين ولج داهيييه

- ههههه لعد شعبالج نصر علمني اكون هيج حجيتها وابتسمت الفضل يرجع اله

- والله تستاهلين واحد احسن منه  وعسى الله يلين كلبه ويرجعج

-  ومنو كال اني ارجع كوثر اني مرتاحه والحمدالله عمار ممقصر وياي بشي ورجعت ادرس بمعهد اذا اريد كلبه يحن يحن ويرجعلي ابني الي اخذه بلغششش مني

- ان شاءالله  الله يضهر الحق امج ماتت واخذت وياها الحقيقه واختج اتخبلت وهم انطمت وياها الحقيقه والعلم عد ربج

- اووو ضعيتي من وقتي روحي طبخي شكو مكابلتني خل اشبع من ابني وصرت اعضعض ببراهيم وهو يكركر من الضحك وابن كوثر فوك راسي هم يشاقى ويانا ويلعب

عشت احلا لحظات بحياتي صح اكو غصه بداخلي وماعرف شنو هي بس ماهتميت بلكت اذا ازوج يخليني اخذ ابني

اجه عمار عليه ورجعنا بليل لواسط ورجعت للشغل لرانيا والبيت وعمار الاحد بدلت وطلعت للدوام

وصلني عمار وطلع لشغله دخلت وصارت حنان بنيه اتعرفت عليه قبل اسبوع وياي بقاعتي حبابه كلش

مشينا اني وياها للقاعه ونحجي ع المواد لحد ما سمعنا واحد صاح لو سمحتن

وكفت اني وحنان وكفت باوعتله وكالت نعم شتريد هو باوع لحنان وضحك

- اعصابج لا يروح يطك عدج وريد يمعوده واتورط تعال ادفع فصل ههههههه

اشاقه بس ردت اسئل ع غرفة العميد مصطفى اني طالب جديد اجيت نقل وكلشي ما اندل

باوعت ع حنان وهي باوعتلي اتخوصرت وكالت

- شايف هاي الجامعه شكبرها مالكيت غير بس حنان وانصاف تسئلهن لو هذاا زحف جديد

-احترميييي واحجي عدل كلت طالب جديد وماعرف الجامعه وانتن صرتن كبالي اعتذر اذا اسئتي الفهم بس هذا عقلج وصخ اتفهم غلط نصيحه مني نضفي عقلج مو اذا حاجاج ولد يعني زحف عليج

هسه ع حورج وازحف عليج جنج ابو مهدي الخباز
حجه كلماته وراح وهو يضكك ويهز بلسبحه مالته واني صافنه عليه واضحك باوعت ع حنان هي هم صافنه مثلي ضحكت ومشيت وهي ادردم لان هي متعوده

دوم اتفشل الطلاب وهاي لازم تسجل بتاريخ واحد فشل حنان ههههههه خلصت المحاضره وطلعت من المعهد ومشيت بجهه الكليه مال الهندسه علمود الكافترا لان الكافتريا مالتنا اليوم ماكو

وميته جوع  دخلت للكافتريا اخذت اكل الي والحنان وطلعت سمعت واحد صاح لو سمحتي

رت عليه نفسه الي شفته الصبح وفشل حنان باوعتله بنص عين وهو اتقدم

اعتذر لان طوخت بحجيي واعتذريلي من صديقتج الخبله مو من اسلوبي اغلط وماعتذر بس هي استفزتني

- عادي ماصار شي واعتذارك مقبول

ردت امشي صاح

- انتي هندسه

جاوبته واني مطيته ضهري لااا معهد مو كليه

عفته ومشيت شكد يحجي يالله اطيت الاكل الحنان وسولفتلها لو تخبلت شكو تكليله مقبول اعتذراك ولج لو اني موجوده والله امسح الكاع بي وانضف الكليه

هذا ابو عرف صار براسي بي خير زاحوف

- هاي شنو ولج جديده

- اي شبيج مشفتي شلون موكف شعره عبالك عرف ديج مدري مكناست فريال هاي الي بباب الحاره شطولها والله يالله

- ههههههههه خرب بيومج حنان ولج اسكتي فضحتينا هسه الي يشوفني اضحك هيج شيكول

- شيكول يعني مخبله كولششششش عادي حبيبتي ريلاااااااااااكسسس

- ههههههه دنكت اكل وهي شهكت رفعت راسي شكو شبيججج

- لج شوفي ذاك خطيه اصلع مو مثل مكناست فريال الي صبحت بوجهه

ابتسمت من شفته واجه طيف نصر ع بالي هزيت راسي واني اطرده من بالي ماريد افكر بي ماريد

ولج انتي وين شايفه مكانست فريال وكاعده تقلدين عليه

- اوي شبيج ماشايفه باب الحاره المكناسه مالتهم شطولها بطولج هههههههه

- حنااان اني اعلمج والله اوكفي هل اخلص اكلي

خلصت و لميت كتبي وكمت صار ولد كدامي اعرفه  بقسمي بس غير قاعه

- مككن احجي وياج

- اتفضل خويه

- احم شوفي صالي يومين اراقبج وعجبتيني

رفعت حاجبي اسمعه هلوووو هذا اول  معترف استلمي انصاف بلشنا غمضت عيوني ع ماخلص كلام باوعتله وهمست

- خلصت اعتذر منك اخي بس اني حاجين بيه ومقريه فاتحتي يعني تكدر تكول مخطوبه

حجيت كلماتي ومشيت ماعدي غير هذه الجذبه حته اخلص وعمار كال لا تكول منفصله لان المجتمع ما يرحم وراح تطلع سمعه عليج بلمعهد

رحت القسمي وخلص الدوام اجه عمار عليه وطول الطريق هو ضايج

- عمار حبيبي شبيك ضايج

- من نوصل اريد اكلج شي

- اوك خفت وعبالي الموضوع يخص نصر او رانيا سكتت ورجعنا للبيت حميت الاكل وكعدنا ناكل وهو ساكت عفته براحته

لحد ما حجه هو

- انصاف احم اريد منج طلب شوفي  تدرين امي ماصاللها شهرين ونص من اتوفت بس ماعدي غير حل ومضطر اسوي هيج

صفنت عليه وهمست احجي خوفتني شنو

- احم اريدج اتخطبيلي جوري

احس مثل الصدمه نزلت عليه وكفت مصدومه شنووو عمار تحجي صدك انتي جوري جوري صديقتييي ليش وانت خاطب

شتكول لخطيبتك شتكول الاهلها وجوري تتصور تقبل وهي تعرف انت خاطب عمار دوختني

- اكعدي اكعدي خل افهمج وحده وحده شبيج

شوفي صح خاطب انه وانه ماكو مثله ولا بطيبت كلبها واعرف راح اجرحهاا واكسر كلبها بس راح تتفهم هذا الشي  واهلها عشائر وكل واحد منهم مزوج 3 و 4 يعني عليهم حلال وعليه حرام

راح ازوج جوري وانه وماقصر وياهن واخليهن اثنينهن بعيوني وحده عيني اليسره ووحده عيني اليمنى وماقصر بينهن

- عمار انت صدمتني بس ليش وشمعنى هسه

- انصاف اني احب جوري من جانت طفله بس الضروف بعدتني عنها وهسه ماتحمل اسمع الناس تحجي عليها واضل ساكت

- هههه تدري شكد جنت اتمنه تزوج جوري
وتبقه وياي بلبيت صدمتني وفرحتني ان شاءالله السبت بس اروح احاجيها

- لا لا تحاجيها حاجي ام حسن

- ممم ماشي احاجي خاله ام حسن واشوف

ومشت الايام عاديه ورحت السبت اشوف جوري وهم احاجي خاله ع موضوعها هي وعمار

دخلت ومثل كل مره استقبلتني خالتي ومثل كل مره جوري بغرفتها شكد حاول حسن يعرف منها شلون نخطفت وليش بس ما جانت تحجي

غير بس اني بريئه وطاهره والله 
ماعرف اذا انسدت قضيتها او لا بس الاعرفه عمو ابو حسن سكت بقيت اسوالف ويه جوري  وبعدين كمت اساعد خاله ام حسن وفاتحتها بلموضوع

- خاله جايه واريدج بطلب

- يمه عيوني الج كولي وتامرين امر

-مايؤمر عليج ضالم حبيبتي خالتي شوفي اجيت هلمره خصيصه علمود افاتحج بموضوع اجيت اخطب جوري اختي وصديقتي الاخوي عمار

- شنوو يمه اخوج مو خاطب

- اي خاله عادي الشرع محلل 4 وما يقصر وياها والله من جانت صغيره يتمناها بس الضروف حكمت لا توكفين بقسمتها خاله

- خاله ماعرف شحاجيج والله لو ما حسن جان كبعتها واطيتها الج بس يايمه

- شكو خاله شبي حسن

- يمه صديقه هذا الولد الي ساعدنا ولكاها الي اجه من بغداد هو ورجلج

- قصدج يامن

- اي حبيبتي يامن اجه قبل يومين ورجع خطب جوري مرة الثاني وحسن فاتحنا واحنه موافقين بس بقت جوري هو اجه وخطبها قبل لا تنخطف بس تدرين بجوري انتي

وهسه رجع خطبها وحسن مايكدر يفشل كدامه واحنه ما ننسه وكفته لو لا جان لسه مالكينها يس اذا جوري تريد عمار والله اله اكبعها واجيبها بيدي واجيج

- صفنت واني مو مستوعبه يااااااااامن ههه يامن خاطب جوري بس هذا نسونجي الي اعرفه عنه كل يوم ويه بنيه معقوله يضحك عليها لالا اكيد مو هيج ولو هو الي يهددها مره
اكيد مااستبعد هذا الشي عنه يجوز يضحك عليها دخت يالله

- خاله اتمنه ماتجبرون جوري ع شي والي تختاره هي اعرف بمصلحتها مهمها كان اختيارها تبقه اختي وصديقتي وانتم هم لا اجبروها

وخلوها براحتها تختار الي تحس نفسها مرتاحه اله

خلصت كلام وطلعت واني متاكد راح توافق ع عمار لان صديقتي واعرفها مستحيل تقبل بيامن وهو اذاها هواي

جوري :  بعد ما فقدت الوعي ومحسيت ع روحي غير اني بغرفه ضلمه ريحة الرطوبه موتتني ماعرف شنو  دايصير بس الريحه مو طبيعيه ابد ولا البروده بارده كلشش حته الكاع احسها ثلج

اديه مجتفه وعيوني كذالك ماعرف شدايصير خااايفه بس اعرف نفسي ممسوي شي ماعرف ليش اجه ع بالي يامن معقوله هو يسويهاا اي ماكو غيره يخطفني منو اله مصلحه لهذا الشي

يالله اهلي اهلي شنو حالتهم هسه بابا حسن ماما يالله دخيلك بقيت ادعي وماخليت ايه حافظتها ماقريتها واني ادعي الله ما يعوفني

حسيت بباب انفتحت وصوت اقدام وكرسي واجاني صوت شخص وهو يضحك

- اليوم منوره المكان الحلوه

- من سمعت صوته صفنت اول مره اسمعه ماسامعه صوته من قبل منو هذاااا جنت متصوره يامن بس هذا مو صوت يامن ولا لهجته لان هذا مبين منا مو من بغداد

همست واني خايفه وحته صوتي يرجف

- منووو منو انت شتريد مني

- ههههههه الله يعني انطب بلموضوع راسا تمام عاشت ايدج حماااده تعال افتح عيونها

- تدلل حبيبي هموم

بقيت صافنه اسمع اصواتهم خايفه منو هذول شيردون مني حسيت باحد يفتح الربطه الي ع عيوني ماشوف مجرد غواشش غمضتهن لدقائق ورجعت فتحتهن وضحت الروئيه عدي

انتبهت الي كاعد ع كرسي شايفته بس وين وين لحظظظه انتفضت واني اوكف  مستحيييل انت شتريد منيي نفسه نفسه الي يوكف بباب المدرسه واكثر من مره جان

يسويلي حركات بوجهه واكثر من مره حاول يحجي واني اترككه

ضحك وكال

- لا تخافين ما ناكل بشر ولا نوصلج بس اريد اعقد اتفاقيه وياج اخوج يعرف هذا الي اسمه يامن مووو

حجاها ورفع حاجبه صفنت منو انتم وشتردون من حسن ومنو هذا يامن

- لاه لاه مو عليه ماتعرفين يامن لا تخليني استخدم غير طريقه احجي شتعرفين عنه

- ماعرف عنه شي والله واني شكو وتخطفوني هذاك هو وروحو خطفو كتلو عسى ما يموت اني شكووووو

- يعني من كلامج تكرهي حلووو لعد شفته اكثر من مره وهو يحجي وياج واكثر من مره يدخل بيتكم ياحلوه وهذا عدوي

- عدوك انت مو انيييي بنسبه الي مااكره احدد ومستحيل اشترك وياكم انتم مخابيل

- انجبيييييي كله من وراج اخوي انسجن وكله من وره يامن افندي الي جان يراقبه 24 ساعه وكدر يلكي من بيت صديقه ويسجنه

- يااااا بيت  ويا اخو لا ادوخونيييي

- هههه الحلوه ماتعرفني اي حقج ماشايفتني تدرين انييي اخو الرضوان اليي انسجن من وراااج ومن وره يامن افندي وصديقه نصر الدين الي ماتركه ساعه وحده

- بلعت ريكي واني احاول اهدي روحي شوفي الي عليج بسس اجيبلي هذا يامن وصديقه نصر لا اخذ انتقامي منج ومن اخوج فاااهمه

- وشلون اجيبه الكممممم اني شكووو شعليه شعليييه

- لان انسجن من ورااااج وتعارك من وراجج تعارك ويه عمار من وراج انتيييي لان واكفه وياه بنص الشارع

-اخووك هو الي وكفني بنص الشارع وجاب المصيبه اله وكتل بشرررر

- اهااااا خوش لعد هيج صار الحجي
ماحس غير براشدي وكعت بلكاع واحس خاصرتي اتاذت حيل

عافني وطلع بقيت ابجي واني ماعرف مصيرلي شنو شيريد مني مافهمت حرف من الي يكوله مشت الساعات وصار اليل واني بس ابجي ماعرف شنو اسوي جابولي اكل ومااكلت

خلص اليوم وهم مااجو بعد وصبح يوم ثاني جنت اخاف انام لا يعتدون عليه جنت اخاف اغمض عينه واتخيل واحد يدخل ويعتدي عليه

بقيت بخوف والصبح طب ووياه اكل

- هااج اكلي ماريدج تموتين تدرين ماكو داعي اخابر لان الفريستين طاحو بلفخ واثنينهن اجوو الواسط بس الي اريده هسه منج

من اخابر يامن لو نصر اريدج اصيحن بصوتج الرقيق  ساعدوني لاااا لااا عفيه وخرووو عني ساعدوني

اوك بس هاي

- انت شتحجي يعني لااا انت مخبلللللل

- انجبييييييي

ماحس غير برفسه ببطني احس الدم طلع من خشمي وحلكي بجيت واني خايفه

عافني وطلع بقيت كاعده جوعانه بس اخاف اكل من عدهم وماعدي جاره اخاف افقد الوعي واني يعتدون عليه

بليل طب وشايل موبايل

- مثل ماتفقنا اذا صار الي اريده اطلعج اوك

هزيت راسي خايفه من عده دك واني اباوعله رد وهو فتح سبيكر حته صوتي من اصيح يطلع هذا صوت يامن ايي اعرفه كلش زين هذا صوته

- الوووو منو وياي الوووو ليش ماتحجون

- اذا تريد اخت صديقك عايشه اسلم نفسك انت وصاحبك نصر الدين الي وانتم الممنونين

- لا يااااا كلب يابن الكلب ياااا ساقط يااا عار منو انتتتتت وشتريد منهااا عوفها اذا حسابك ويانااا صير زلمه وتعال حاسبنا وجهه بوجهه ياا *****

- لا تغلط فااااهممممم

خزرني حته احجي خفت ماحس غير بدفره ببطني صحت بصوت عالي من كد اللم ااااااااخ

- لكك نعااال **** شداسووي عوووفها عووفها لا والله يصير شي مايعجبك شتريد

- اي هيج صير يا حباب هيج ههههه باجر ادزلك عنوان اجيب رضوان ال.........  واطيك الحلوه العدي

- ماشي ماشي مثل متريددد اجيبه بس ما تمس شعره منهاااا

سده واجه يدفر ببطني كلللبه ليش ماحجيتي نعاله بس يلا صار الي اريد والله لو ماا صار الي اريده جان شوفتج غير شي

عافني وراح وخلص اليوم الثاني واني هنا اجس احشائي كلهه مكطعه من كد الدفر الي دفره اني شعليه تورطت وكفت وياه بنص الشارع تورطت ياربي ساعدني

ثاني يوم هدوء ومحد اجه ولا جاب اكل وجنت جوعانه لان البارحه انجبرت اكل شويه مرت الساعات وجان اكو شباك صغير كلش اشوف الدنيا منها جانت باااارده ثلج

شفت الدنيا غوربت وهم ماكو ماحس غير انفتح الباب وهجم عليه  ادفر و راشديات وماحس غير كام يشكك بهدومي صرت اصرخ وادفع بي بس ماكو جان يسب ويغلط

جذببووووو عليناااا جايبين الشرطه النعل حقراء جان يضرب ويشكك بهدومي ويصيح واني ابجي وادفع واصيح عسى ولعل واحد ينقذني جان يريد يعتدي عليه حسيت واحد طب

دفعه عنيي

- انت تخبلتتتت تعرف مانريد نتورط بعشيرتهاا ونروح نخسرر استر ع روحنااا وخل نشوف غير حل

عافني وطلع واني صرت الملم بملابسي المشككه وابجي لو لا هذا الشخص جان ماعرفت شنو صار بيه جان راح اغلى شي عدي عدن يومين محد يوصلي فقط يفتحون الباب يشمرون الاكل ويقفلو

واني ارجف خايفه لا يرجعون يعتدون عليه النوم ماشايفته ولا حته كمت اكل خفت وماعرفت شكو بس الي فهمته يامن جايب الشرطه وياه وكادرين يشردون

بقيت ابجي وماعرف مصيري شنو وحال اهلي هسه شنو 5 ايام اني هنا ماعرف شدايصير مايصير

لحد ما نفتح الباب واجه هذا الي نقذني ووخر المخبل عني شمر عبايه عليه وكال ستري روحج وكوومي يلا

خفت بس ماعدي غير حل لبست العبايه ووكفت وياه احس كل جسمي يوجعني امشي وارجف ركبوني بسياره جان اكو واحد بعد كعد وره بصفي بس ع بعد عني

انتبهت المكان  ماعرف بحر مدري وين مشت السياره مسافه طووويل كلشش

وماحس غير اليي بصفي فتح الباب الي يمي وضربي ع راسي بمسدسه وشمرني من السياره

وبعدها مادري شصار بس حسيت بروحي واني ادعبل وبعدها فقدت الوعي وما فتحت عيوني غير اني بمستشفى و الدكتوره فوك راسي تقيس بلضغط

وتحجي ويه حسن هذا حسن بجيت من شفته وهو من شافني فتحت عيوني اخذني بحضنه ااااخ احس ضهري مزلخ كله شبكته وصرت ابجي ماعرف شبيه احس هاي الـ 5 ايام

نفسيتي زفتتت والخوف عتم عليه والجوع والعطش كلشي خلاني اخاف وماريد اشوف احد غير حسن حسن اخوي الجبير وماعدي غيره كلش قريب عليه

حسيت باحد دك الباب لبسني حسن حجابي وصاح ادخل من دخل شفته يامن راسا صرخنت اطلععععععع بررره من شفته ماعرف شصار بيه

استهترت لان كله منه الي صار بيه كل من وراه خطفوني هو هم راسا طلع بقيت ابجي واشهك وحسن يهدي بيه

مرت كم ساعه وطلعوني جنت خايفه حيل رجعت للبيت ودخلوني للغرفه ماريد اشوف احد وجههي مليان كدمات وضهري من وره الوكع الوكعتها من السياره الله لا يطيهم

وفوك كل هذا بطني احس احشائي كلها توجعني اتلفلفت وبقيت ابجي وحدي وكل الي يدخل اصرخ بي خايفه لا احجي ويجي يعتدي عليه اعرف خلصت من عده

بس الموقف ماانساه ابد انتبهت ملابسي مبدله منو بدلي ماعرف من جنت بلمسشفى بقيت ايام اني بس ابجي وحالي حال

وحته عيوني كامت توجعني حابسه روحي بلغرفه واي شخص اشوفه اتخيله هذاك الشخص الي راد يعتدي عليه حسن ماتركني وهو الوحيد الي اخلي يدخل لغرفتي

شويه شويه اتحسنت حالتي بس بعدني خايفه هواي حاولو يعرفون مني شي بس جنت خايفه ماريد اورط اهلي وياهم اهل رضوان خطرين وبهاي العمله

اثبتولي هذا الشي بقيت ايام اني ابجي واخاف حته من خيالي بس انصاف ماتركتني ولا امي جنت اخاف اطلع من الغرفه واسمع كلام الناس عني

واني اعرف شكد الناس قاسيه بكلامها والله يساعد كلب اهلي عليهم مرت الايام ومرت شهرين وكدرت اجاوز هذا الشي بس بقيت حابسه نفسي بلغرفه ومااطلع خاصه اذا اجو احد وخاصه عمتي

لحد ما بيوم سمعت امي تحجي الابويه الجوارين شتحجي عليه انهضمت واني اسمع كلامهم ليش ليش هيج مجتمعنا بمجرد ما تنخطف البنيه خلص اعتدو عليها وكامو يحللون من وحدهم حته الدراسه تركتها من خوفي كلام الناس مايخص دائما يحجون واقل شي وكالو

وراح شرفها ليش هيج البشر قاسي وما يحسب للكلمه الي يكولها حساب ويحس ان الشخص الكباله ممكن راح ينجرح منها

مرت الايام وعرفت يامن خطبني من حسن مرة الثانيه مطيت اي رد فعل وصرت اخاف من اسمع طاري رجال ماعرف هاي هم ماعتدو عليه وهيج لو لا سامح الله

معتدين شنو جان صار بيه بجيت من كل كلبي وبقيت ساكته ماطيت جواب بس الصدمني بعد جيت انصاف النا اجتني امي بعد ما طلعت

وكالت انصاف خطبتج الاخوها عمار وهنا جانت الصدمه مالتي عمار خطبنييي شكد جنت احلم بهذا اليوم وشكد جنت اخطط اله واحلم بي

بس اليوم ماحس باي فرح اعرفه سوه هيج علمود كلام الناس عمار واعرفه مااطاه كلبه يتركني يجوز لو ما خاطب جان وافقت بس مستحيل انه صديقتي مستحيل اسوي هيج

صح عمار حلم بنسبه الي واليوم تحقق وصح هو حب الطفوله بس ماكدر اكسر كلب صديقتي واني اعرفها شكد كلبها طيب

مرت يومين ع هذا الموقف واني حايره اذا رفضت يامن راح يجبروني ازوج عمار واني ماريد اخرب حياة انه ومتاكده

اذا انسحبت من حياتهم اكيد عمار راح يحبها لان انه ماكو مثلها واذا رفضت عمار لازم اقبل بيامن ماكو خيار ثاني لازم ازوج واكسر حجي الناس

هههه هذا مجتمعناا هيج قاسي مسحت دموعي واني اطلع من الغرفه اروح لغرفه ماما واطيها جوابي واني فكرت بي اكثر من مره وخلص هذه حياتي واني اعرف شلون اديرها

ماما كاعده

- ها حبيبتي تعاي يمه تعاي

- ماما اني قررت و موافقه ع يامن اعتذريلي من انصاف بس اني ماكدر اهدم حياة اثنين واصير انانيه

شبكتني امي وهي تبوس براسي تربايتي واعرفج زين وهذا  الجنت واثقه منه يمه يامن زين وان شاءالله يسعدج وينسيج كل الي مريتي بي ابتسمت الها وبست راسها و رجعت لغرفتي واني متاكده من قراري الي اخذته مستحيل اكسر قلب انه …… يتبع

،،،،،وللحكايه بقيه ،،،،،

قرائه ممتعه احبتي

اريد احجي وياكم شي اول شغله شكرا الكل من سئل عليه وتحمدلي بسلامه وشكرا اللي ماقصر وتهجم وكالو مقصره وماتنشرين بشنو مقصره وياكم يعني بارت البارحه اني كوه كتبته وانتم تتهجون بلخاص وحته بلعام اطلبون بارت مفاجئ يعني اني بارت البارحه مكدر اكتبه وبطلاع الروح كتبته وفوك كل هذا تتهجوم تردون بعد بارت اعرف حقكم ومن تشويقكم للقصه بس راعو تعبي يعني والله لو اكدر جان ما رديتكم خاصه اللي دخلو خاص يحجون بس هم مازعل منكم كلبي رجيج 😍

والشغله الثانيه اليوم جانت استراحتي وبرغم مريضه بس اطيت وعد لمتابعين الفيس وبلاخص متابعين بيج ست روعه انشر اليوم وهذا البارت برعايتهم هههههه ويدللون من عدي صح مكدرت انزل البارحه بس هذا بارت بداله احبكم

توقعاتكم وتصويتاتكم وتعليقاتكم

#نور الشمري

#نوشه