رواية قمع المشاعر الفصل السادس عشر 16 - بقلم Rozaya1122

قمع المشاعر.... البارت السابع عشر..
للكاتبة زهراء ( روزايه)....

قبس.. بسرعه كمت من مكاني وبشار كام وكف وهن طبن سلمن بس سلام من ورا الخشم وفاتن ليجوه وهو طلع برا واني ظليت اغسل مواعين بس شنو دكات كلبي متخربطه ما اعرف شبيه

كملت المواعين ورحت للغرفه لكيتهن كاعدات يم شجن يسولفن ملابسي تبللت فتحت الكنتور اخذت دشداشه ورحت للحمام بدلت طلعت لكيت ام بشار لازمه تليفون تخابر ع عمو عادل وتحجي وياي
ام بشار.. شفتي ياقبس الطباخ مايجي متوفي عمه ومامرجع خبر لعامر وهسه حايرين منين نجيب طباخ
قبس.. ماكو احد غيره دزي الولد يشوفون؟؟ جاوب عمو عادل
ام بشار.. هاا عادل اكلك ماتخابر ع طباخ هذا صاحب عامر عدهم حاله وفاة حاجته وسدته..

قبس.. خاله اذا مالكيتو احنه نطبخ اني هم اعرف واساعدكم
ام بشار.. ما طابخه كميه جبيره حته بالعيد نجيب الطباخ دخل نشوف عمج واذا مالكينه نطبخ احنه راح اخابر عماتج يجن ويانه..

قبس.. وظلو بساعه يدورون ع واحد ماكو كل الي يرحوله يطلع محجوز لومعزل لازم قبل يوم ياخذون موعد تالي اجن عماتي وهدى ومرت عامر وكالن احنه نطبخ وجدي مثل المراقب ع راسنه لاتفشلوني ولاتقصرون ولا ولا حته مانعرف نشتغل من عنده

بشرى.. يابه اكعد انت واحنه نشتغل هو عشا وبعد وقت هسه الساعه ب٢ نلحك
الحجي.. مو اني ماعازم هواي ناس اريد اوزعه
بشرى.. المن توزع لعد موكلت عزيمه؟؟
... عزمت بس اخوتي وعمامي والباقي اوزعه اكو منطقه تعبانه ووصيت عمر يجيب حافظات ويجي حته ياخذوهن بالكيه يوزعون لهاي المنطقه
بشرى.. لازم نستعجل بعيده لوقريبه المنطقه؟؟
.. لابويه يرادلهه ربع ساعه وغير الناس تتعشه بيهن خوما ورا العشه كون قبل المغرب يكمل..
بشرى.. لعد اذا هيج خلي يرحون يجيبون طباخات عيون كبار ونطبخ بالطرمه حته نلحك بين مايجون احنه مكملين الحلاوه والتبسي...

ام بشار.. وين عمر خلي يروح يجيب من راس الشارع وانتي يمه قبس عليج الحلاوه مو قبل جنتي اطبخين
قبس.. اي راح ابدي بيهه
ام بشار.. صاحت على فرح واختهه فاطمه كومن يمه بدلن وتعالن ويانه مانلحك ترى وهسه يجن بنات عامر وفاديه هم يساعدنه

قبس.. الكل انخبص وصدك مانلحك وكل واحد بيده شغله وعمر جاب طباخات من برا وگدور كبار وخلوهن بالطرمه وبدينه نطبخ جان دجاج اكثر شي ولحم طلي هن لزمنه النسوان الكبار..

واني واكفه اسوي بالحلاوه وفرح كاعده تسوي بمواد التبسي هي وهدى وفاطمه اسمعهن يسولفن ويضحكن بس ابد ما التفتت عليهن لان ماريد من اولهه يتعكر مزاجي بس الظاهر هن متقصداتني

فرح.. هدى تدرين ولا ابدي اجيكم بعد
هدى.. ليش؟؟
... ما اعرف لعبت نفسي من كولشي حته بشار يخابرني اكوله انت مر علينه اني ما اجي
هدى.. بشار يخابرج؟؟
... اي خطيه يكول افتقدتج شوماتجين لان متعود يشوفني هنا دائما
هدى.. ما ادري هاي جديده بشار مايخابر الا بالضروره عود اساله؟؟
... وليش تسالي؟ لو هم ماقابله انتي؟
هدى.. لا شعليه اني بس اكول لاتاخذي بغير قصد يله همي ايدج بسرعه بين ما اغسل البيدي..

قبس.. واكفه بصف السنك واجت هدى تغسل تقربت عليه شاورتني اتجنبيهه لاتختلطين بيهه ترى كل كلامهه جذب
هزيت راسي وكملت البيدي ورجعت هدى ع شغلهه وكلما تحجي فرح واختهه تسكتهه هدى لحدما كملت الحلاوه وصبيتهه بقسمين الي يوزعو بسفري والي للخطار بمواعين  غسلت شكو ماعون وخاشوكه وطلعت ليبرا اساعدهن..

محد اكو بس النسوان خالتي طابخه اللحم وعمتي بسمه الدجاج وباقي التمن يخافن من عنده خاف يصير عجين كتلهن اني اطبخه لان طابخته هواي اطلع للبيوت واطبخ مال عزايم بس ماردت امدح واسوي نفسي اعرف كلشي واحتمال يذموني لذلك سكتت بلاول بس من شفتهم حايرين حجيت

وصدك بديت بي اسوي بزل انتظرت المي يفور وساعدتني مرت  عامر لحدما صار ولازم ابزله والمي حار والگدر جبير شلون انشيله
بشرى.. يمعودات لاتحتركن بالمي الفاير خلي يجي عمر يشيله وياجن
ام نرجس.. اي والله مانكدر وحدنه والمصافي زغار ماينبزل مره وحده
بشرى.. دوكفن خلي اروح اشوفهم بالاستقبال اي واحد موجود اصيحه حتلو امجد ابن بسمه ..
قبس.. راحت عمه بشرى واحنه واكفين ننتظر التفتت لباب المطبخ واكفه فرح تباوعلنه درت وجهي عنهه ولا اريد اشوف هالوجه اجت عمه بشرى كالت هذا عمر نايم وبس بشار راح يجي وياجن كتله خاف يحتركن لان ثگيل بس سمعت عمه بشرى كالت بشرى اجت تركض ووكفت بصفنه وتحاجي بمرت عامر اني اساعدجن شكد لوگيه ياربي وهي صار ساعه تصيح اظافيري تكسرن من الشغل ...

واكفه اني ومخليه ايدي ع خصري ومنطيتهه ظهري واجه بشار جكارته بحلكه ولابس تراك نيلي حاجته مرت عامر تعال ويانه مانكدرله والتفتت عليه اني وبشار راح نشيله وانتي خلي المصافي بس لا تحتركين ديربالج ..

شال الگدر الجبير هو وياهه وبزلو التمن بكل مصفى وادعي بكلبي كون ما اتفشل ويصير عجين اخذته من ايده غسلته بالصونده ورجعته ع النار حته ابدي اهدر بي
بشار.. منو طبخه؟؟
قبس.. اني
بشار.. تعرفين اطبخين هالكميه؟؟
.. اي موكتلك جنت اشتغل بالطبخ واعرف طابخه هلكد اكثر من مره
.. هااا زين لعظ انتبهي لا تنجوين وراح للاستقبال وفرح بس تتأفأف وتنافخ جنهه حيه وفوكاهه اختهه اضرب منهه نفس الماركه وبعد اقوى بلواكه شكد عمتي حبابه بس هذني عليمن طالعات...

ارتاحيت من كملت التمن وماظل شي عدنه وكل الي انخلصه ناخذه للممر وانظف مكانه قبل لايجي الخطار  بنات عامر وفاديه اجن من الدوام واستلمن الجوه تنظيف والي تسوي زلاطه واني اشتغل ساكته ابد ماحجيت اي كلمه بس من يسالوني اجاوب..

تقريبا راح يصير المغرب وجدي وكف ع راسنه والخطار اجه وهو يصيح صبو يله لازم نوديهن للناس حته يلحكون يتعشون بيهن كلهه شاركت وصارن هواي كل علاكه خلو بيهه من كلشي واشوف جدي يحجي ويه بشار اخذهن انت وهو يكله سيارتي ماتفوت بهذيج المنطقه الا سياره جبيره وخطيه جدي يتوسل بي كاله يله راح اروح ..

جنت واكفه بالممر وهو فات من يمي ووكف كال تروحين وياي؟؟ ما استوعبت كلامه اني اروح يطلب مني اطلع ويا بسرعه كتله اااي
بشار.. يله روحي لبسي ع السريع بين ما ابدل
قبس.. مثل الطلقه ركضت لشجن واكمز يمهه اريد البس شي فوك ملابسي وهي تكلي شبيج ؟؟
شجن.. البسي العبايه الاسلاميه مالتج فوك هذني قابل راح تنزلين من السياره
قبس.. لا ما انزل بسرعه لبست العبايه وعدلت شالي وطلعت الحذاء وكفتله يم الدرج نزل شافني كال يله بس جانت الصاله متروسه كرايبهم وبوقتهه ولا انتبهت فرح واكفه لولا؟؟

مشه كدامي واني ورا تلكتني امه سالتني كتلهه اروح ويا ابتسمت وكالت روحي هم ماطالعه صارلج اشهر واكف باب المطبخ واشرلي اطلع من الممر طلعت مناك لكيته واكف كال وين تليفونج؟؟
.. عفته بالغرفه.
.. لا تعوفي لوتاخذي لو تضمي بكنتورج
.. اوكف خلي اجيبه بس موتروح وتعوفني
.. لا ما اروح استعجلي..
قبس.. رجعت للغرفه اخذت تليفوني لكيت فرح بالغرفه ماباوعتلهه بياحال اني ماصدكت اطلع اريد اشتم هوه اختنكت طلعت لكيت عمر مصعدهن كلهن كعدت بالصدر وحرك السياره

جان الجو حيل حلو بدايه شهر الثاني وبي بروده ودنيا المغرب هيج اخذ نفس احسه يملي صدري شكد صار ماطالعه وشايفه الاضويه والمحلات حته عيوني تفتر اشوف هذا الراجع من شغله وهذا الي يعبر الشارع وهذنيج واكفات متعاركات مدري عليمن احس نفسي حوليت لحدمادخلنه بهاي المنطقه

جانت منطقه قليل بحقهه نكول تعبانه بيوت من طين والي  بس غرفه وحده يعني حياة تعيسه يعيشوهه هذوله مانكول غير الله يساعدهم وكل هذا بشار من طلعنه لحدما وصلنه المنطقه وهو ماحجه اي كلمه ..

قبس.. انت راح توزعلهم لهاي البيوت كلهه لو شلون؟؟
.. لا الحجي كال يتلكاك واحد دلاني بي وانطي اله هو كل مره يتكفل بيهن بس هسه السياره ادك بالكاع لان حفر بالشارع ..

قبس .. ع كيفك امشي لاتعطل علينه
.. موكتله ترى تطفي بس اطخ الكاع تطفي بس جيب الي يقنعه
قبس.. جان يحجي وياي ويحاول يطلع من الحفر ومنتبه ع الشارع وفوكاهه مجاري طالعه للشارع والجهال كلساع يكمز واحد كدامنه ويدوس ابريك لايسحكلهه واحد..

لحدماطلعنه هذا الفرع لكينه الرجال واكف هو من اهل المنطقه ويعرفه بشار نزل سلم علي ونزل الاكل اخذهن بستوته والجهال تصفك ورا من فرحتهم ورجعنه بنفس الدرب وهم ع كيفه بس هالمره ماكدر يعبر لان تلكتنه سياره وطخت السياره بالكاع وطفت..

نزل يشوفهه ماكو وكفت فد وكفه حاول بيهه شكد راد من عدهه ماكو طلعو الجيران وكالو ندفعهه وشكم رجال يدفعون بيهه وهي صفنت فدصفنه مدري شيسمو بهاي السيارات الحديثه من يطخ الكاع تطفي واني كاعده بالسياره اباوع لساعه راح تصير ب٧ واحنه قبل ٥ طلعنه لان شتاء وياذن من وقت ...

اجه رجال يعرفلهه ومدري شسوالهه واشتغلت بهاي الحاله اني خاتمه القران  واتعجب ع هدوءه لاتعصب ولاشي بس من صعد كال مو كلت ترى تطفي ماكو غير بشار وشغلهه وطلعنه ويه تاشير الواكفين ارجع ليورا روح يمنه روح يسرى طلعنه من الفرع يله اخذنه نفس..

نمشي بشارع عام الجو حيل حلو التفت عليه كال طلعت من خشمج هاي الطلعه؟؟
... ههه لا ع الاقل اشتميت هوه صار هواي ماطالعه
... خلي نفتر ع الجسر حته تشوفين بغداد زين
... ااي مااندل بيهه ولاشايفتهه زين بس منطقتنه والشركه

قبس.. سكت ماحجه بس كلشي ما اندل صح احنه رايحين للبيت يس فوتني بطرق وجسور تخبل يعني باختصار موطريق البيت لزمنه غير طريق ...

جنت اباوع من الجامه واكو احساس حلو بداخلي مرتاحه  اجت كلمات كاظم الساهر باذاني التفتت علي اشوفه مشغل اغنيه لكاظم بس ما عرفت يقصدني لوشنو؟؟

اول مره اسمع هاي الاغنيه اسمهه سألتها..
سألتهاااا ليه البحر ساكن عيونك؟؟
جاوبتني للغرق!!
ليه السواد ليه في عيونك
جاوبتني من الارق!!
سألتها هي رقتك مثل النسايم والورود؟؟
كالتلي لا يمكن ارق!!
سألتها يا اغلى الانام
كيف الغرام؟؟
كالتلي انك ماتنام واواهام!!

عجيب هاي الاغنيه اسمعهه واباوع لنفسي شيقصد؟؟ صح الجوه عيوني سود لا هاي يتخيلي مجرد اغنيه عاديه شكو اخذهه ع نفسي ظليت اسمع بيهه لحدما انتهت انداريت علي اجت عيني بعينه بس اني بسرعه درت وجهي ع الجامه..

توترت حيل وارتبكت ودكات كلبي فضحتني بس اريد اوصل للبيت رغم ماحجه وياي ولا شي بس اني شجاني كمت اتخيل بكيفي وصلنه للبيت لكينه الخطار رايح بس باقيات عماتي وعامر جنت واكفه بالمطبخ واحجي لام بشار شلون السياره عطلت وفرح واكفه بس الوجوه اسود مكلوب عبالك واحد ضاربهه .

اجت فاديه كالت شوتاخرتو ؟؟
قبس.. عطلت السياره وكوه يله اشتغلت
فاديه.. بس انتي وبشار ماتعيشتو حته المواعين غسلناهه اليوم كلهه نادره راح اصبلكم عادي تاكلين وياا
قبس.. لا اني اروح ابدل واصلي واجي اصب خلي يتعشه هو..ورحت للغرفه لكيت شجن ونرجس اسولفلهن ع بغداد شكد حلوه!!

نرجس.. ياحبيبتي شسويتي من رحتو لسه فرح طلعلهه گرون اثنين وبس تنطح بينه كلساع تتعارك حته ويه امهه وعينهه ع الباب!!

.. ليش احنه شعلينه هوكال تروحين وياي لان جنت عده وماطالعه
نرجس.. هي هاي الكاتلهه بشار ماله علاقه باي بنيه حته احنه تربينه وياهم وتواسيل يله يطلعنه وعود ينقهر علينه هو وعمر لان ماعدنه اخ يطلعنه ..

شجن.. مالج علاقه بيهه هي هاي فرح مايعجبهه العجب روحي تعشي ولاتهتمين الهه
قبس.. تعشيتي انتي!!
شجن.. اي اني ونرجس تعشينه وروحي تعشي وتعالي عدنه خبر الج
قبس.. دكولو شنو بعدين اتعشه!!
شجن.. يمكن راح يخطبون لعمر لان سمعنه ماما تحجي ويه عمه بشرى يرحون لهاي البنيه الي يحبهه
قبس.. صدك؟؟ يارب تصير ظليت اسولف وياهن شويه ورحت صليت ورحت للمطبخ اريد صبيت ماعون اكلت ورجعت للغرفه لكيتهه كلهه كاعده تسولف 

فرح ميته ومبين الحقد عليهه بس جنت مرتاحه حيل حته ماريد اعكر مزاجي بيهه لحدماراحو واني تعبانه بسرعه نمت ..

هيج مشت حياتي هادئه ونادرا ما اشوف بشار واذا تصادفنه حد السلام بس وشجن ع وضعهه وغيث اصلا مايجي وهي بس تلوب تريد تشوفه حتلو من بعيد بس حته ع عمر ما يجي..

ورا العزيمه بشكم يوم كالت ام بشار راح نروح اني وبشرى ع اهل البنيه الي يريدهه عمر انشوفهه ونحجي سالنه عليهه خوش بنيه بس المشكله طالبه وخاف اهلهه مايوافقون!!

راحت هي وعمه بشرى نص ساعه واجن جان عمر بالدوام بس من اجن طاير عقلهن بيهه يكولن صح حلوه بس ماتعيش ويانه وكحه حيل
فاديه.. ترى محد فقير شعرفتن منهه ودكولن وكحه
بشرى.. ولج هستونه حجينه بيهه وامهه كالت بنتي طالبه وانريد تكمل وخلي يجي ابوهه ونفكر ونرجعلكم جواب شو هاي قاطعت امهه ودكول هاهي ماما اني موافقه
عمري ماشايفه هيج بنيه شلون قاطعت امهه وحجت عمي بناتنه يستحن من خيالهن

فاديه.. منو تستحي فرح؟؟
بشرى.. ولج شبيهه فرح بنت عمتج ليش تحجين عليهه
ام بشار.. كومي فاديه لا اكوملج
فاديه.. راح اكوم بس لاتحجن ع البنيه يجوز من فرحتهه بلاول شوفن النموذج العدنه الي ساحله نفسهه عود احجت ع بنت الناس وكامت

فاديه.. طبيت للغرفه والله يالله مسويات فرح ام الاخلاق الحميده
شجن.. كلنه نعرف فرح اخلاقهه زينه بس حبت اخوج وتركض ورا بس مومعناتهه ماعدهه اخلاق اذا تسمعج عمه بسمه تزعل

فاديه.. عشتو واذا زعلت ماكلت غير الحق انتي شفتي بعينج شصار بيهه وشكد حجت ع قبس بيوم الراحت ويه بشار وطبيت للغرفه لكيتهه تريد تفتح كنتور قبس وسوت نفسهه تباوع بالمرايه مالته هاي حيه هي واختهه بس انتي وهدى ماتشوفن الحقاره مالتهه

شجن.. تحب بشار وتحسه راح يضيع من عدهه لاتلوميهه
فاديه... وليش هو يحبهه مواعدهه بشي خلي تولي ماعدهه كرامه من صغرهه لسه تركض ورا لو اني بمكانهه ما اذل نفسي هيج لوتصير روحي بي وياريت منطيهه امل

شجن.. فاديه لاتحجين كدام عمه بشرى هيج ماتقبل ع بنت اختهه الحجي بيناتنه بس مومعناتهه تحجين عليهه كدام الكل
فاديه.. والله احجي عليهه كلما اسمعهه تذم بقبس احجي عليهه واكول تريد بشار وهو مامعترف بيهه من اجت قبس لسه شوفي الحقد والغيره الي عدهه..

شجن.. تتوقعين بشار معجب بقبس
فاديه.. ما ادري صح حلوه هي بس ما اعتقد يحبهه اخوج صعب وشكاك وعبالج يكدر يتجاوز سمعتهه حتلو هي بريئه تذكرين من انهزمت شكالو عليهه وبعدين هي مطلقه من واحد سكير ما اعتقد يسمح لنفسه يحبهه ولو اني اريده يحبهه احسن من مايجيب وحده ثانيه ..

شجن.. والله ما ادري بعد باخوج
فاديه.. راح اروح اسبح
شجن.. ماشي روحي وسدي الباب وراج راحت فاديه واني جنت اقره بكتاب بين كل سطر اقرا يتخيلي صوره غيث شكد مشتاقتله راح يصير شهر ع وكفتنه بالممر وبعد ماشفته كلش محتاجته ومشتاقه لسوالفه الدافيه..

ظليت اقره بالكتاب وعمه بشرى تتعشه يمنه وقبس تسوي عشه وهاي فاديه ع اساس راحت للحمام واسمع صوتهه شعلوه برا جذابه ..

جنت مندمجه اقره جان افز ع صوت العياط وصوت عمه بشرى كوه كمت واخذت العكازات وطلعت واشوفهن مخبوصات ويلبسن ويصيحن يايمه يابسمه اتصخمتي ويبجن..

اجتني قبس كتلهه شكو شصاير؟؟
قبس.. تعالي فوتي ليجوه وهن طلعن يركضن ويصيحن..
شجن.. قبس شكو احجي ؟؟

قبس.. زوج عمتج بسمه ابو فرح مسوي حادث ومتوفي وهسه خابرهن بشار ....
شجن.. لا اله الا الله خطيه حباب حيل ياعيني ياعمه الله يصبرج..

قبس.. تعالي وحدنه بالبيت حته بيبي راحت خلي اسد الببيبان ونكعد وينج فاديه تعالي يمنه
فاديه.. شكو تخافين يمعوده منطقتنه امان ومايعوفونه وحدنه هسه يجون لوعمر لوبشار...
قبس.. اسكتي اني اخاف اكعدي هنا لاتكومين

ظلينه كاعدين لحدما اذن وصلينه ومحد اجه جنت واكفه الم بالسجاده وطفت الكهرباء يبست بدمي اخاف من الظلمه حيل شغلنه الشمعه الشحن بالغرفه ...

واريد اروح اجيب الشمعه الثانيه الي بالمطبخ وفاديه تصلي وشجن ماتكدر تكوم عود صرت سباعيه ورحت وحدي امشي ع ضوه الغرفه ...

ادور بالمطبخ مدرس وين مخلينهه وما احس غير الباب ينفتح مال المطبخ بسرعه كمزت وخليت ايدي ع صدري وصحت يمه!!

اجاني صوته هاي اني لاتخافين!!
قبس. يمه وكف كلبي اخاف من الظلمه واجيت ادور ع شمعه ابو المولد ماشغل..
بشار.. اي يكول عاطله وخابرتني شجن واجيت
... ليش هم قريبين
.. هي ورانه بفرع
... خطيه الله يساعدهم

قبس.. جنت احجي وادور بعدني بس المطبخ اظلم ولاهو فتح الفلاش مال تليفونه واني هم ثوله ماجبت تليفوني ..

صوت انفاسه وعطره مالي المكان اشوف رجلي قريبه عليه وجان يصير البيت اظلم فدمره طفت الشمعه الي بالغرفه بسرعه صحت وفاديه تصيح قبس...

وهو ما ادري بي وينه مديت ايدي اتلمس واحجي بشار وينك دفتح تليفونك والله اخاف ...

ويه ايدي وحركتهه ما احس غير ايدي على صدره لان حسيت بدكات كلبه بسرعه كمزت ورجعت ليورا

نقذتني فاديه جابت الضوه وهو ولاحرف حجه تعدانه وكال بدلن خلي اخذجن يمهم محد يظل يمجن ...

كلبي المصخم يركض عبالك بسباق لبسنه اسود وحته شجن خطيه مارضت تروح بس اضطرينه لان كهرباء ماكو وطلعنه ع ضوه التليفون ...

قريبين حيل بسرعه وصلنه ناس هوايه يمهم ودنيا ليل وبعده ماجايبي من المستسفى بس طبينه جانن كاعدات بالصاله ما اندل امشي ورا فاديه وين ماتسلم اسلم وياهه لحدما وصلنه لعمه بسمه...

هستوني دنكت اريد اسلم واخذ من خاطرهه جان تجيني دفعه كومتني بالكاع بنص النسوان

وصوتهه عالي وتصيح اطلعي برا حقيره جاي تشمتين طلعوهه براا وتملخ بشعرهه

بس من فشلتي ما اكدر اكوم من دفعتني حته رجليه طلعن ووكعت بنص الصاله المتروسه نسوان ويتفرجن منو هاي ؟؟

ايد ام بشار كومتني وكالت كومي بنتي وطلعتني من بين الهوسه للمطبخ ودموعي بدت تجري اني شمسويتلهه حته ماسلمت بعدني ؟؟
ام بشار.. اسكتي لاتحجين يطلعوج انتي المذنبه امشي وياي خلي اشوف عمر يرجعج للبيت لان هاي عرمه توقعي هسه تلحكج وتفشلج بعد..

طلعتني للطرمه وشافت جاهل كالتله روح صيح اي واحد من ولدي دقايق واجه بشار جنت واكفه امسح بدموعي

بشار.. هاا يمه شكو؟؟
... اخذ قبس للبيت فرح دفعتهه بنص النسوان وفشلتهه
بشار.. ليش كاتله ابوهه؟؟
.. شمدريني هسه اكعد اتعارك وياهه وهي فضحتنه اخذ بنت عمك للبيت واخذ شجن وياهه
بشار.. ماكو كهرباء منو يظل يمهن عمر ويه امجد واني فشله اعوفهم ..
.. لعد شلون هاي اعرفهه فرح ماتسكت
بشار.. امشي وياي راح اشغل المولد الهن واطلع جيبي شجن

قبس.. طلعت ويا للسياره واني لازمتني الشهكه من البجي من الفشله اني شمسويه وهيج عادتني

التفت عليه واني امسح بدمعتي واشهك جان يكول كلشي ولاتبجي هاي العيون  !!!!

يتبببببع... متابعه شيقه