رواية قمع المشاعر الفصل الثاني 2 - بقلم Rozaya1122

قمع المشاعر.... البارت الاول..
للكاتبة زهراء ( روزايه)

‏اي كبران متعرفوني حقگم
تجاعيدي ، و سماري ، و شيبي منكم
والله اثنينه نفس المواليد
قبل لا اشوفگم چنت بكُبركم !

....

شجن ... واكفه ع طولي كدام المرايه ولابسه الكعب العالي مال اختي الجبيره هدى المخطوبه قبل فتره ومسويه نفسي مقدمه اخبار..

ساعه افتح شعري وساعه ارفعه اخلي الكرسي واكعد اصير بمستوى الميز واكعد نفس كعدة مقدمين الاخبار وابدي القي النشره المسائيه ..

القي كل الاحداث الي مرت بهذا اليوم كل نشرة اخبارية اقدمهه عن بيت جدي والاحداث الي تصير بالدقيقه الوحده..

اسمع صوت ماما وهي تصيح وين ولت اختج خلي تجي تاكل ماتدري صبينه العشا ..

ما الحك اكوم بس علمود انزع الحذاء مال هدى الجديد الي اشترى خطيبهه اركض وشعري طاير وراي واجيب واضم بي جوه الجربايه ..

وانزع اكسسوارات هدى لان كل مره تنهيني منهن واني ما اتوب لازم يوميه اقدم هاي النشره واتخيل نفسي يجي يوم واكون مقدمه...

هو هذا حلمي من الصغر اكون اعلامية اومذيعه اي شي المهم اطلع بالتلفزيون..

جنت اقترح قصص من خيالي واتخيل نفسي للبعيد بيوم احقق كل احلامي واصير الاعلامية الوحيدة من عائله الحجي صالح..

نزلت اركض ع الدرج لكيت للكل كاعدين اجت عيني بعين هدى خزرتني تدري بيه شجنت اسوي شكد تكتلني بس ما اتوب..

كعدت بصف بابا وهو يلعب بشعري ويكول ها شجونه بعدج تريدين تصيرين مذيعه ويضحك هو وعمي عامر من اكلهم اي ..

واني بكل فخر اهز راسي ببرائه واكله اي مع العلم جانت ماكو قنوات اكعد اتابعهه بس مصرة احقق حلمي..

صوت ضحك عمي عامر وجدي وهم يحجون على فلان وابن فلان ومحد يكوم من السفره الا يكوم جدي الحجي صالح..

عائله بسيطه من عوائل بغداد القديمه صاحبة قيم واخلاق وتجيهم الناس تطلب المساعده من جدي الحجي مايوم رجع واحد ولا قبل بالباطل...

عندي عم واحد اسمه عامر متزوج يمنه بنفس البيت وعنده ٣ بنات ومرته بعد ماتخلف صار بيهه اكياس وشالو المبايض

وواحد مانعرفه وين رغم عمري بهذاك الوقت جنت ١٢ سنه بس جنت اسمع بيبي تصعد ع السطح وتنوح بكلمات ما افهمهه وبس اسمع يايمه يا رضا...

اني فضوليه حيل لذلك جنت اسأل هوايه سالت بابا شكد يكول مسافر ومره سالت جدي دمعت عينه وكال مسافر ماندري شوكت يجي..

عمي ماميت بس ماادري وين وليش من ينذكر اسمه كل العيون تحنكهه العبره وخاصه بيبي الي تغطي وجهه بالشيله مالتهه وتكوم تبجي...

عندي عمات اثنين بشرى وبسمه متزوجات اقرباء ودائما يجن لان قريبات ...

بابا عادل الي هو الجبير لهاي العائله موضف بالتجاره وجدي من خياطين قبل فكلهم اخذو المهنه من جدي وصاروا ورا الدوام يرحون لمحل الخياطه..

عندي اخوان اثنين بشار الجبير وبعده هدى حته ماما تسميهم روسييه من كدما يتناكرون وعمر وفاديه واني اخر وحده ...

مره من المرات كلهم اجتمعو ويحجون بوضع بغداد جانت سنه ٢٠٠٤ وجدي ماقبل واحد يطلع من بغداد وكال مايمنه شي بس مالكم علاقه بالسوالف ولاتحجون على فلان حزبي وعلى فلان ...

نسمع صوت القصف بس جنه اطراف بغداد منطقتنه شبه امنه بس ماكو طلعه اعتمدو على المحل وع الرواتب الي جانت بهذاك الوقت تفاليس...

جانو بيت خالي فاضل الله يرحمه جيرانه بيناتنه بيت عنده بس ٢ ولد الجبير وائل متزوج وعندي ٢ اطفال واتزوج من هو وصغير وضابط بالجيش والاصغر من عنده غيث وبنيه وحده متزوجه ..

علاقتنه حيل قويه بيهم يطبون ويطلعون علينه نفس البيت محسوبين وجدي يحبهم يكول عليهم صدك زلم عليهم العتب..

مره جنت بالحديقه ارش ويه بابا واندك الباب ركضت قبل بابا فتحته جان وائل ابن خالي متعودين علي ونحبه ..

مسويه ضفيره هنديه مد ايده على راسي وخربط شعري من فوك وكال موكايلج لاتفتحين الباب كبرتي!!

ما اهتميت لكلامه كل الامور بهذاك الوكت ماخذيهه بفطره وماكو واحد نيته موخوش لو المقابل يفكر بالموزين...

رجعت ارش بالحديقه واسمعه يحجي ويه بابا بصوت خافت ..

وائل.. عمي اني ماردت اجي للحجي كلت خاف ماتقبلون هاي اجيت كتلك بلاول..

عادل.. والله يا ابني فاجاتني شلون احجي لابوي وشكله وانت تدري من يوم طلعته وامي وابوي ماارتاحو..

وائل.. هو جاي يرضيكم ويكول صارت عندي جهال وما اكدر اظل وحيد يم نسابتي محتاج اخوتي ..

هذا الكلام دازه بيد عمي واني اجيت اكلكم حته يجيكم لان تدرون طريق وطويل وخاف تفشلو والوضع مو امان..

عادل.. هاهي ابني رحمه الله والديك راح اكعد ويه ابوي واخوتي ونتفاهم الدنيا راحت بحالهه وهاي سنين طويله مفارگي..

شجن.. طلع وائل وبابا واكف ويا بالباب ويحجون الي عرفته يحجون عن عمي رضا ..

ورا الغده وبعد ما شربو الجاي والكل كاعد فتح الموضوع بابا بكل هدوء
عادل.. يابه اليوم اجاني وائل وابن عمه صديق رضا ودازه يريد يجي يشوفنه .

الكل انتفض من عمامي لبيبي لجدي حته الاحفاد كلهه تصيح وين جان رضا وين هسه اتذكر عنده اهل..

عادل.. موهيج الحجي يابه احجيلك كلمه ترى صار سنين طويله وغلط وصارو عنده جهال والله اعلم شكبرهم زحمه يتربون عند الغربه..

الحجي.. ياولدي ماكو انسان كامل وان النفس لاماره بالسوء الا مارحم ربي .. واخوكم غلط جان شاب وطايش واني عاقبته بمافيه الكفايه وانطرد صار سنين من سنه ٨٨ وهاي احنه ب٢٠٠٤ انحرم من خوتكم ومن ولد عمه ومن بغداد كلهه..

مانعرف شوكت الله ياخذ امانته ولازم الانسان مبري ذمته اني ابوكم الله يحاسبني وما اخفي عليكم ضميري مايهدأ طول هاي المده اعرف السويته غلط..

عامر.. يابه شتحجي شنو الغلط السويته راح رضا للعدو مالته وخله ايده بيده واتزوج بنته ودنك روسنه كدام الناس..

احنه ناس معروفين والكل يحمد بينه تذكر شكالو علينه الناس وتذكر شنو من بيئه الي اتزوجهه وهسه دكول غلط السويته..

تذكر عمامي شحجو عليكم وشلون شيخنه سمعك كلام موحلو بحقك وانت حجي وطول عمرك متقي الله وكافي شرك عن الناس..

اني موكدامك مو حبيت وردت اخطب وما قبلو ينطوني تذكر شكالك ابوهه..

كالك ياحجي صالح انت علم وهاي ادنك على ايدك وابوسهه بس بنتي ما انطيهه تعذرني موقصور بيكم بس ابنكم رضا السوا كلهه تحجي بي واني ما اكدر انطي بنتي ومرت حماهه جانت تركص بالكروه..

الحجي.. كافي ياعامر بعدك تذكر هاي بنتك بطولك واتزوج احسن وحده وبت خير وعز وهسه جاي تفتح دفاتر قديمه شما تسوون رضا يبقه اخوكم..

جان الزغير والمدلل وحب شفتوني حاولت امنعه بكل الطرق وماكدرت البيدي شنو اكتله وهناك يم رب العباد اكله من ورا حجي الناس..

عامر.. لا موتكتله بس مثل ماتبريت منه كدام العشيره وكلت ماعندي ولد اسمه رضا هاهي انسد واعتبرنا مات ..

السوا مو شويه يابويه بعت العندك والماعندك ورحت فصلت ابوهه تذكر اندك شغل ليل نهار وهاي ادينه ازرفت من الابر والخياطه حته انسد فصل ابوهه ..

ابنك اعتدى على بتهم وسواهه مره براسنه وبت بيت ولهاي اللحظه من ينجاب طاري رضا ادنك من العار وهسه تريده يؤجع شنكول للناس مرت اخونه الله يسلمهه جانت تركص هي وعائلتهه ويطلعون حفلات لو دكول ابوهه نسيبي طبال وي......على عائلته..

الحجي.. ماتريدون اخوكم لاتريدو البيت بيت ابوكم يجي رضا ويكعد وتتبارون ويا الذمه ..

عمت عيوني على فراكه وهاي امكم كدامكم باليوم ماتنشف دمعتهه علي ويجوز محتاجنه وواكع بمشكله..

عامر.. اني ماعندي اخ واذا اجه رضا اني اطلع من البيت واذا انشر الخبر بالمنطقه رضا رجع والله يا حجي ماتشوفني لا اني ولا عائلتي ...

عادل.. كافي عامر ندري كلبك محروك ع الماضي بس لاتنسه الكدامك ابوي الحجي صالح نسيت روحك وتشمر بحجيك..

الحجي.. كافي سدو الموضوع واني امر ع وائل احجي ويا وانت عامر اذا تحبني وتعز امك لا تكدر خواطرنه

عمي عامر طلع وهو عصبي وبابا ساكت لان جنت اسمعه يكول لماما مشتاق لرضا كبر هسه شيب لوبعده؟

جدي ظل ساكت وبيبي ماعدهه سلاح غير الدموع وتصيح يايمه رضا...

بشار اخويه الجبير جدي من صغره معلمه على شغل الخياطه وهو خلا مسوؤل عن المحلات بشار جان مرحله اولى كلية هندسه نفط بس عمره ٢٠ لان تاخر سنه يله تسجل علمود هدى اختي حته يرحون سوه وعاد السادس سنه ..

دائما يرجع متأخر ورا العشه هو يكول لاتنتظروني اتعشه برا ومرات ماما تنتظره دكول خطيه ماياكل من اكل البيت من يجي ويلكانه متعشين مايصيرله واهس..

بس طب للبيت تلكته بنت عمي عامر الصغيره عمرهه ٦ سنوات كالتله بشار بابا وجدو تعاركو..

جان واكف يشرب مي والتفت على هدى الي تغسل مواعين كالهه شكو خير ان شاء الله؟؟

هدى.. عمي عامر طلع عصبي لان عمي رضا داز خبر يريد يجي يرضي جدي وصارت الهوسه

بشار.. عمج رضا شذكره؟؟ وابوي شكال؟؟ حجاهه بتعجب
هدى.. بابا ساكت مبين موافق بس عمي عامر ماقبل واتذكر الماضي الي ما نسى ابد..

بشار.. اني راح اروح اسبح واشوف جدي لاتصبيلي عشه ماريد متعشي..

شجن.. جان بشار اخويه يمشي واني امشي ورا لحدما وصلته لباب الحمام وصاح بيه مادري شريد بس اريد اعرف قصه عمي...

هدى الجبيره وتذكر الاحداث وسامعه من عماتي وجنه لازمين رجليهه اني وبنات عمي عامر اثنين الكبار ونتوسلهه تحجيلنه كالت خلي اكمل شغلي واجي..

رحنه كعدنه متحضرين نسمع وشوكت تجي هدى وبالي ثاني يوم اكعد كدام المرايه والقي نشرة الاخبار والاحداث الصارت..

شفنه بشار راح لغرفه جدي واحنه ورا بس سدو الباب وماسمعنه شي..

مرات عمي عمي عامر يكول لجدي انت معتمد بكلشي ع بشار ومعتبره ابنك الجبير حته بمكان عادل وجدي يكله اشو بينت كمت تغار من بشار ماعندي حفيد غير بس هذوله الثنين بشار وعمر ...

وعمي عامر دائما يتشاقه ويه بشار واسمعه يكول والله بشار مو ابن اخوي لا هذا صديقي وعضيدي الله يحبنه وعوضنه بمكان رضا ...
...

احنه البنات كلنه انام بغرفه فرشنه وننتظر هدى تحن علينه بعدماتكمل اتصال خطيبهه ع الارضي..

اجت لكتنه كاعدين منتظريهه كلنه نفس العمر والفضول كاتلنه انريد نعرف قصه عمي رضا..

كعدنه داير مدايرهه وهي بدت تحجيلنه عن عمي ومرته الي يكولون جميله بشكل..

هدى.. بسنه ١٩٨٨ جان عمري ٣ سنوات ما اتذكر الاحداث ولا عشتهه بس بمرور السنين من كبرت كمت افتهم واسال عمتي بشرى مامتزوجه جانت وهي تحجيلي بحكم جنت البنيه الوحيده عدهم ...

اتذكر بيبي شكد بجت وعمتي بشرى دكلهه لاتبجين علي من ورا هاي ظلينه بدون زواج بعدماجانت الكل تتمنى قربنه بس من ورا ابنج شوفي حالنه شلونه...

بيبي.. الله اكبر غلط بشر هو مامعصوم غلط عاقبتو هيج ياظلام وين ترحون من الله اني ام اني والده ما اسامح كل واحد اله ايد باذيه ابني ودماره..

بشرى.. بعدج ادافعيله وادري بيج مامصدكه وبكلبج دكولين لا رضا مايسويهه لج يوم شوفي حالنه شلونه شوفي اخوتي الشغل هلكهم من ورا فصل هذيج ال.....

هذاك عامر كدامج شفتي شلون متعذب ويلوب انحرم من حبيبته بسبب طيش رضا دمره ودمرنه كلنه..

هدى.. هاي يوميه عركه بيبي وعمه وتجي ماما اطلع عمتي من الغرفه دكلهه راح تموت الحجيه كلبهه محروك لحد يلومهه..

عمتي بشرى معلمه وقبل هوايه ناس خاطبيهه بس جانت منغره بشبابهه وجمالهه وجدي يريدلهه الزين لحدما صارت سالفه عمي محد خطبهه بعد وتالي اتزوجت ابن خالهه الي مادارس...

كعدت يمه عمه وبدت تحجيلي عمي رضا اصغر واحد بيهم المدلل وعزيز ابو طايش ومحد يكله على عينك حاجب وجان يدور مشاكل واسمه جدي يركع ورا...

اكو وحده بالمنطقه دكول حلوه حيل الكل يحلف بجمال سميه بس شنو فائدته الجمال واخلاق ماكو ..

دكول عمه جانت هاي العائله موخوش سمعه والكل يحجي عليهم وعمتهه وامهه اصلا كاوليات هذني الي يركصن بالمناسبات ولصدام حسين

وجمالهن وصوتهن يسمونه قبل غجر دائما من تنذكر يمدحون بجمالهه انت سميه شابه صغيره جميله وعمي رضا يركض وراهه واكثر من مره جدي ناهي عنهه بس مايفيد

جدي جان حته مايستقبل ابوهه ولا يقبل يكعد يمه بالمحل يكول لابارك الله بي يدري بعائلته هيج وهو يطبل الهن..

سميه بعمر ١٨ عليهه صوت حلو وكايمه تطلع ويه امهه وعمتهه وتغني لحزبيه صدام وهذوله الله اعلم شجان ينطوهه مقابل وشتنطيهم...

لحدما بيوم منهن جاي عمي رضا مفاتح جدي بالموضوع كايله جدي لو اعرف اتبرى منك ما الطخ سمعه عائلتي واجدادي بهيج نسب ...

بيومهه حته ضاربه وطارده من البيت وعمي رايح لابوهه كايله اني اريدهه وهم عائله نص ردن قابلين..

ومايحسون غير عمام سميه وابوهه واخوتهه اجو هادين على بيت جدي ويصيحون رضا نهب بتنه..

ظالين يدورون عليهم فوك الشهر ومحد لاكيهم وجدي دنك راسه كدام اهله وعشيرته والكل صار يلوم بي وشلون جبتلنه هيج عار واحنه الي نكعد بمضيفك انحل مشاكلنه لان نعرفك رجال حق..

مامخلين مكان يعتب عليهم مامدوري وتالي لكوهم بالطارميه منطقه ع اطراف بغداد كوم ابوهه سوي كعده وكال لازم يتزوجهه رضا بنتي انفضحت ولازم تفصلون..

جدي بايع كل املاكه واملاك اخوته يله سادين الفصل ومتبري من عمي كدام العشيره وراح ومحد يعرف شي عنه..

بعد مرور سنتين جايه وحده من كرايب سميه وكايله لبيبي ترى ابو سميه هو شرد رضا وكاله انطيك سميه وانكول نهبهه حته ياخذ فصل ..

من هذا اليوم انمحى رضا من اخوته وعمي عامر اول ضحيه ورا عملته جان يحب وحده وحته طالبهه من اهلهه وقابلين بعد سواية رضا ماقبلو اهلهه ..

دكول عمتي ظل عامر ينوح مثل المره ويدك ع راسه بيوم الزفوهه كدامه ويصيح الله لاينطيك رضا وظل ٤ سنين مايرضى يتزوج وكوه خطبوله ابتهال هسه مرته تصير بنت خاله ..

اخذوا البريء بجرم المذنب وظلت هاي القصه تداور بين العوائل ومضرب مثل سوايه رضا ابن حجي صالح...

وهسه عمي رضا سمعت من بابا عنده ٣ اثنين ولد وبنيه وجاي يطلب السماح من جدي..

هاي قصة عمنه الي لحد الان الناس تذكرهه شلون اخذ رقاصه وتغني لرجال صدام وشلون باع مبادئه واخلاقه وقبل يرتبط بهيج وحده بحجه الحب...

شجن.. جنت اسمع القصه من هدى واني اتخيل ولد عمي شكبرهم وبنت عمي شلونهه يجوز حلوه مثل امهه لان يكولون حيل حلوه...

غفيت واني اتخيل اشكالهم وصرت اتمنى التقي بيهم واشوف عمي رضا الي سوه هيج ...

ثاني يوم كعدت والبيت مخبوص وعمي عامر اخذ مرته وبناته وداهم لاهلهه وكال ما منا لمن يروح رضا يله اجي...

جانن عماتي اثنين بشرى وبسمه موجودات ونسو الزعل بس ينتظرون شوكت يجي عمي ويشوفو...

احنه فرحانين على فرح اهلي اني وفاديه اختي اصغر من عندي كلساع نركض للباب انشوف شوكت يجي ونرجع لبيبي نكلهه بعدهم...

صارت الساعه ب١١ ونسمع صوت سياره بالباب اول وحده ركضت اني فتحت الباب واشوف عمي نسخه الاصل من بابا يشبهه حيل بس شعره ابيض وعبالك اكبر من عمره..

واثنين ولد نزلو ويا بعمر يطلع عمرهم ١٥ سنه وامهم سميه رغم ماهي جبيره بس جميله بشكل جمال ريفي ما اعرف شنسمي...

سلمت على عمي ومايعرفني منو سالني منو انتي؟؟
.. اني شجن بنت عادل.. جانت الدموع متجمعه بعينه ومرته محجبه ولابسه محتشم وتمشي ورا وولده نفس جمال امهم..

طب عمي بنص الطرمه والكل طلع يستقبلهم بس شاف جدي ركض علي مثل الطفل وركع بالكاع جوه رجلين جدي ويصيح سامحني يابه ويبجي بصوت عالي..

كلهه تبجي علي بجيه حته اني هاجت عندي المشاعر وبجيت على بجي ماما انتقل من جدي لبيبي وهو ينحب مثل الفاكده ابنهه...

ماكو حجي بس صوت البجي وعيون تتعاتب حاضن بابا واخواته وهو يكلهم سامحوني اذيتكم ابروني الذمه..

تقدمت مرته وسلمت عليهم بس محد عبرهه جان كل شوكهم لابنهم كعدو بالصاله وهو كلساع يبوس ايدي جدي لو راس بيبي ...

سالو عن حياته وشلون ووين كاعد كالهم كاعد بالطارميه وعندي هذوله الولد ٢ وبنيه قبس ظلت يم خالتهه لان عدهه سفره من الطريق..

لحد العصر وراحو كالو ماعدنه سياره اجينه ويه جيرانه ويرجع المغرب كاله جدي احنه نوصلك كال موقبس عفناهه هناك ولازم ارجع ..

طلع فرحان وجدي يكله كدامك اسبوع رضا جيب غراضك وتعال محضرلك بيت بس تعال..

جانت هاي كلمات جدي يحجيهه بتوسل وعمي يبوس بيد جدي ويكله اي اجي بويه اجي واوكع ع عامر يسامحني لازم يسامحني ...

ركضت للغرفه القي نشره الاخبار وهالمره نرجس بنت عمي لازمه الفايل ومسويته ميكرفون وتسالني واني احجيلهه بصفتي مراسله...

لحدماسمعت صوت بشار جوه ونزلت اركض اشوفه شجايب النه وماما تحجيله عن عمي وهو ساكت..

هو بطبعه هادىء بس اذا طكن عنده يكوم يخبط واحد ع واحد من العصبيه حته مره تعارك هو وعمي عامر وتلازمو من الركبه والا شويه يضرب عمي بس جدي ادخل ...

لثاني يوم الصبح جنت نايمه وافز على صوت الصريخ والعياط اول مره بحياتي اسمع هيج صوت ..

صوت عماتي جان يرج البيت رج وصوت رياجيل بره كمت اريد اشوف شكو من الهبطه ما اكدر كوه وصلت للباب الغرفه واشوف عماتي يشلعن بشعرهن بنص الصاله ....

يتبببع ... متابعه ممتعه..

غيرت اسم القصه والغلاف  لان هذاك حسيته مومناسب ومثل مامتوعدين على ابداعات عبير الف شكر الج الاسم وتصميم الغلاف وبعد انتم وشطارتكم والغاز عبير AbeerAL_Hussnawy

والجميله سارونه اغلب الاسماء من عدهه لان بهيج شغلات عقلي يوكف وهاا لادكولين غششتيهه ترى بس اقترحولي شي مختصر خاف تهدون عليهه شكرا قلبيHamzayhoocom1996

ما اجيتكم وايدي فارغه جبتلكم البارت الاول وبعد ما ادري راح التزم بالنشر لولا؟؟ ادعولي التزم😆

صوره الغلاف👎