قمع المشاعر الفصل الثاني وثمانون 82 - بقلم Rozaya

قمع المشاعر ...ملخص الاحداث الجديده
للكاتبه روزايه..

( قراءه سورة الفاتحه على روح المرحومه الاء بنت اشواق )

...

قبس... مرات نبتعد عن اشياء وانعاد منحب انسويهه
بس يمكن هي بالاساس بيهه صالح النه
واحتمال الله دزهه حته تفتحلنه ابواب جديده

جنت رافضه طرح قصتي بصوره نهائيه
حته من بدت تنشر وعلمود شجن اقتنعت لان جانت
بحاجه للدعاء واني ممقتنعه بارت اقرا وبارت اعبره

لحدما كمت اتواصل ويه روزايه دخلتني بكروبهه
اشوف تفاعل البنات ويه القصه ماحبيت اقره المواجع
نفسهه لذلك جنت ادخل انطي تصويت واطلع
وبس المح اسمه اطلع من البارت لان اعرف نفسي شكد ضعيفه..

عشت القصه من جديد خاصه البارتات الاخيره
كمت اقره وابجي انعادت المأساة كدامي
اقره المنشورات وتعليقات البنات وهن يكولون
شلون تحملت وارجع ع نفسي اكول شكد صلبه
وبعدني واكفه ع رجليه..

انختمت القصه واحنه ع حالنه رغم حبي
وشوقي ولهفتي اله بس يمكن حبنه من النار
من يقترب ياخذ الاخضر واليابس
ومن يبتعد تظل النار مشتعله ع نفسهه
وبس رمادهه يبقه..

قريت كل المنشورات والتعليقات بالواتباد
وبالكروب حته بالبيج شفت نصائح هوايه
قبس ارجعي!!
عاقبتي هوايه !!
بشار ميستاهل هالجفاء منج !!

هوايه منشورات وتعليقات بحيث صارت
عاده عندي ٢٤ ساعه فاتحه الفيس والواتباد
واقره الشي الحلو اكو مختلف الاعمار

شفت نصيحه من مراهقه ونصيحه من بنت العشرين
شفت كلام طويل من وحده كالت اني بمثابه امج عمرهه
٥٠ سنه مختلف الفئات العمريه علقت والكل
يطالب برجوعي..

بس انتو عشتو ويايه من خلال السرد وشفتوا
شكد تأذيتوا وبجيتوا والقلق العشتوا شحال
اني !!؟

اضعف والين واكول هاهي قبس عيشي
ماتبقه من حياتج بجانب بشار وارجع من جديد
اتذكر للاسف ماكدرت انسه اي حدث مؤلم

امير دمرني صارت روحه بابو بشار بسبب
منصبه صار قليل يجي وقليل يتواجد بس
سفر يوميه بمحافظه ويوميه بدوله..

صار كل يومين يجي ربع ساعه حته ميفوت
ولا يحاول يشوفني مرات اطلعله امير للطرمه
مايساله وين امك خلي اشوفهه

حسيته عاش حياته مثل ماهي ماكو احد ابيت
عمو بس هو وعمو وخاله وجدو وبيبي انتقلوا
يم عامر ...

ماانكر ردت يبادر هوو يمكن لوجاي ومبادر
اكثر من مره ومنا حجيكم والتقنيع يجوز
ارجع بس هو جان راسه يابس الى درجه
كلت بعد ميحبني...

يوم من عدهن كعدت الصبح عندي الم
ببطني الزائده شايلتهه بس العب موطبيعي
خابرت ع عمو كال كعدي خالتج لان بايته يمي
وجايكم بالطريق

اخذني عمو للطبيب واني روحي رايحه
من الالم بعد فحوصات وسونار كالو عدهه المراره
ملتهبه ولازم تنشال ..

خفت من العمليه خفت ع ابني حيل خاف
اموت ويظل يتيم مثلي ويظل مكفخه للرايح
والجاي ..

كمت اتوسل ينطوني علاج والطبيب اخذني ع كد
عقلي كتبلي وصفه وكال ٣ ايام ورجعوهه
من اخذ العلاج يسكن الالم بس ينتهي المفعول
اموت اكوم اكطع بشعري..

كل هذا وتليفوني مادك ولا سال عني
ولاكرامتي تسمحلي اسأل خاله ليش ماخابر
علينه ...

لحد ما خلصن ال٣ ايام استسلمت لان كمت افرفح
مثل الطير صوتي حته الحمايه البرا دكوا الباب
عبالهم صار شي..

سحلتني سحل خاله وعمو لمستشفى اهلي
وحجزوا ع العمليه وعيني ع امير التبهذل
يركض ورا جده بملابس البيت ويمسح
بخشمه ويكله كول لماما لتموت...

ماردت ادخل عمليه بس جبر اخذوني
كلساع الهي الممرضات واركض اطلع من الصاله
ويلزموني كل همي ابني بعد مااشوفه..

ماحسيت ع نفسي وجان بشار براسي
شلون مااجه عمه بشرى سولفتلي
المغامره السويتهه..

اول مافتحت عيني اصيح ابني امير
وعمه تضحك واسمع صوت خاله من الضحك
غاصه ودكلهم عوفوهه تغرد..

افتح عيني بثقل اشوف وجوهم مكبره
كدامي بس كلهه تضحك عمو وخاله وبشرى
بس بشار مموجود ماادري بنفسي
وبعد تحت تأثير البنج

صحت هذا الكوا........ مااجه مووو
سليمه اطمه هو والميناء مالته وعيب بحلكي
الثقيل من البنج

بشرى.. بضحكه عاليه ولج لايسمعج اجه بس
راح يدفع فلوس العمليه

قبس.. واني خايفه منه واذا اجه عود
خلي يكتلني ع ط.....

بشرى.. سدت حلكي وتصيح هذا عمج هنا
فشله استحي وتضرب راشديات بيه

قبس.. وينه عمو تخوفيني بي
هسه اكوم اكص........

ام بشار... بضحك بصوت عالي انزول عليج
قبس من تكصي وين اروح اني ولج بشرى
كعديهه راح تفضحنه ...

بشرى.. استحي يمعزايه منيلج هذا اللسان
وتفشرين عمج استحه وطلع

قبس.. موبوعي ابد حته مااتذكر شحجيت
كله نقلا من عمه بشرى جنت فاقده وحاقده
ع بشار..

قبس.. كلكم عارااات وكواو..... وانتن كح......
رحتن خطبتله وماكتلي وخليتن النسوان تضحك عليه
بس جنت اجر بيهن جر ..

انعل ابوكم لا ابو صالح وياكم خلي كوا...
يجي يمي اله امرده برجلي..

اسمع صوته وهو يكول عوفنهه السانهه
متبري منهه صحت بصوت واكح والم
هااا كوووووا..... اجيت ابو سرور ام الاحمر..

للأسف ماشفت ردة فعله ووجهه بس
دكول عمه فتح عينه ع وسعهه ولو ماهستوج
طالعه من العمليه اله يوكع اسنونج بحلكج..

بشار.. دضربيهه راشدي صحيهه هي من صاحيه
السانهه رشاش انوب تحت البنج ..

بشرى.. تعال انت اضربهه خدهه رقيق
تروح تسوي عليه خد الملكه ديانا ..

قبس.. احس راشديات قويه واشوفه كدامي لزمته من
قميصه كتله هااا اجيت ابو النسوان ماتشبع
شجاك ماشايف موراح تعطل!!

بشار.. لا وين اشبع فلوس وعندي ونسوان ومكومه
شتردين مني خليني اتونس!!

قبس.. اكرهك
بشار.. ميخالف اني احبج..

قبس.. طلكني
بشار.. مطلكج
قبس.. جذاب يوميه تجي تحضني
بشار.. شوكت ؟!
قبس.. بليل قميصك جوه المخده اشمه وانام

بشار.. انتي موتكرهيني
قبس.. لاجذب احبك
بشار... يله تلكين القميص راحت ريحته من اطلعين
انزعلج هذااا...

قبس.. بوسني!!
بشار.. وين!؟!
قبس.. اشرتله ع حلكي وسويت حركه بشفايفي
هنااا..

بشار.. خلي تطلع بشرى وابوسج
قبس.. بشرى اطلعي خلي يبوسني
يله بسرعه حلكي يابس

بشرى... يمعزايه ولج اصحي صدك جذب وانت مكيف
حرام عليك وخر عنهه خاف صدك تريد تبوسهه؟!

بشار.. ميخالف عود ادفع كفاره دوخرين بشرى
مدامهه موبوعيهه

بشرى.. ولك يالمدير تحجي صدك البنيه
مو بوعيهه وخر عنهه ودفعته بشرى عنهه
وظلت تهز بيه وشلعت خدي بالراشديات
يله انتبهت...

جابولي امير خله راسي ع صدري وابوس
بشعره وبشار كاعد كدامي يباوعلنه بس
شايله بكلبي علي شلون صارله ٥ ايام ماسائل علينه..

طلعوني للبيت واي حديث مايجمعنه غير الحمدلله
ع سلامتج وشلونج؟!

امير تعبني حيل روحه بابو بيوم اليجي
ويروح يظل يبجي ساعات وبس اتقربله يضربني

استعاديت صحتي واحس نفسي مااقاوم
بعد تعبت من امير وحده يخابر ابو يحجي
ويا كاميرا ومن اجي يطردني يكلي عندي
شغله ويه بابا

للاسف ماعرفت اربي طلع ابني
جاسوس عليه ...

سالت خاله ليش بشار اجه وراي للعمليه
٥ ايام ميدري بينه!!
ام بشار.. يابنتي جان مسافر سفراته مفاجئه
وخابرنه بس ماكناله خطيه لان كال باجر اجي
اخاف ع صحته

موهاي اجاج يركض لوتشوفي شلون
صار من سمع بيج كافي يابنتي عاقبتي هوايه
علمود ابنكم خطيه ..

قبس.. ماعندي جواب عفتهه وكمت
طبيت للغرفه لكيت امير مدد ع جربايه
والايباد بيده ويخابر كاميرا من شافني
حرك التليفون عليه !!

صحت ولك امييير اجي املص اذاناتك
وخر الكاميرا !!

امير.. بابا كال اذا كتلتك ماما املص اذانهه
هو يملصهن روحي خليني اسولفله الشغله

قبس.. صرت عصبيه بسرعه سحبت الايباد
منه وحاجيت بشار جان الحجاب ع راسي
كتله شلون دكله هيج خوش تعلوم!!

بشار.. لتصيحين ليش تضربي ؟!
قبس.. اني امه ووكح اسمع السانه طوله متر
بشار.. واني ابوو!! وبعدين منين يطلب طولة
اللسان امه منو؟!

قبس.. بشااار مو بعيد وعايش حياتك وهم مدخل
بتربيته تعال اكعد يمه وربي ميصير هيج السانه
مالحك علي حته من خليته بالروضه المعلمه تشكي
دكول ينطيهه بالكصه شنو هالدلال الزايد

بشار.. اعصابج ياحلوه عيونج راح ينفجرن
اياااج تحاجي وتضربي مدام ممسوي غلط
واذا سوه غلط احجيلي اني ابو اعاقبه
مو بالكتل..

قبس.. اخذت نفس شحجيلك يوميه
يكول عندي شغله ويطردني!!

بشار.. رفع حاجبه !! يحجيلي عليج
يكول بابا انت تجي تبات يمنه ومااشوفك
اشوف بس قميصك ع الجربايه..

قبس.. بسرعه سديت الكاميرا وضربت كصتي
وعضيت اصبعي اني الك اليوم املص اذاناتك

اسمع ضحكه بشار عاليه شمرت الايباد واخذه
امير يضحك عنده السن الامامي صاير اسود
من الحلويات ومنكدر نشلعه

يضحك عليه ويحط ايده ع حاجبه الايمن
ويرفع الايسر عود مثل ابو...

طلعت مدخنه بعد اكو فشله ماصارت خلي
يتاكد اني بعدني اريده ركضت للحمام سبحت
وطلعت

حطيته احجي ويا ماما ميصير تسولف
عليه واني وبابا متفاهمين وهو يگرط
جبس من كملت يكلي شكد تسولفين بابا
يكول امك شاطره بس بالحجي!!

كمت من يمه لان راح يطلعلي گرون
من الخبال ..

عدت الايام وانختمت القصه والكروب
يصيح قبس ارجعي وماقررت ارجع
لان هو ممبادر ..

لحد اليوم الكعدت بي الصبح بعدني
بفراشي واتصفح بتليفوني واشوف الكروب
ينعى وفاه الكاتبه الاء ام غايب..

انجنيت اني متابعه قصة الارهابي
واقره كل تعليقاتهه وتوقعاتهه ع قصتي
قبل عبالك اعرفهه كمت ادك ع وجهي وعبالك
اختي ماتت

ركضت برا لكيت خاله بالمطبخ ابجي واكلهه
الاء توفت وهي دكلي الله يرحمهه يا الاء

متت بيومهه حسيت الدنيا شكد تافهه
شلون اخذهه الموت بين يوم وليله
وعافت رجلهه الماخذته عن حب وعافت
امهه المنهاره وراهه ..

بيومهه خلصته بجي حته اكل مااكلت
وثاني يوم التفكير هلكني خاصه من سمعت بيهه
مريضه بشار هم مريض خاف يطلع صبح وماالكاه

ركضت ع التليفون بدون وعي اتصلت بي
جاوبني ماكدرت احجي بس ابجي
يسال شبيج امير بي شي؟!
مااكدر اجاوبه..

سده وربع ساعه واجه سولفتله خالتي
كالتله صديقتهه لان ماتعرفهه اجه يمي
وهاي اول مره من طلاقنه لليوم يلزم ايدي
ويهدي بيه..

قررت ارجعله خاف يصير بي شي
ومااسامح نفسي بس شلون ارجعله
وهو مايبادر..

كمت خابرت سناء احجيلهه
وايدتني بالقرار جنت مندمجه احجي ومااحس
غير الارنوب خاتل ورا البرده وبس رجلي طالعات

رفعت البرده واشوفه مخلي ايده ع حلكه ويضحك
هسه هذا شسويله اول ماجريت اذانه
وبعدين بوسته وهو يكول ماسمعت اي شي

ثاني يوم بليل اجه عمو وبشار وجدو تفاجات بلمتهم
قدمتلهم العصير وكعدت وحجه جدو يابه كافي
الولد كبر وبحاجه ابو ميصير هيج وهاي جايين
نبوس راسج حته تقبلين ترجعين

عرفت امير موصل الحجي لابو
لان جان كاعد ع رجل بشار بس باوعتله
ضم راسه بصدر ابو..

سكتت وكتله الله كريم عرفوا
اني قابله وثاني يوم جابو الشيخ عقدلنه اول يوم العيد..

حاليا اني وبشار مثل لهفة قبل واكثر ومحروم
صار سنين كلساع اكله هسه تنجلط وابتلي...

اشكركم من القلب بسببكم وبسبب نصائحكم
رجعت لبيتي وزوجي لان جنت وحيده وماعندي
احد ينصحني ويعلمني

بس شفت بيكم الاخت والام والخاله
ماقصرتوا كلكم الله يوفقكم وين ماكنتوا...
....

حبايبي وعدتكم انزل الكم اخر الاخبار والحمدلله
القصه ماظلت مفتوحه وهاي قبس رجعت لزوجهه بفضل
نصائحكم ودعواكم..

يؤسفني اسردلكم هذا الخبر المؤسف بس تعودت عليكم
انتم عائلتي ومايهون عليه ادير ظهري عنكم بدون توضيح..

قمع المشاعر كانت اخر عمل الي من اليوم انتهت مسيرتي
الكتابيه وهذا القرار نهائي بعد تفكير مده ست اشهر
يله كدرت انزلكم الخبر الاكيد

اعتذر منكم واتمنى تبروني الذمه خاف بيوم
كنت ثقيله بالكلام اوجرحت احد بدون سبب
اوقصرت وياكم اتمنى الكل يسامحني من المتابعين
ومن زميلاتي الكاتبات ..

حاولت قدر المستطاع اظل مستمره بهوايتي
بس للاسف الحياة كانت اقوى من عندي
ومكدرت وجنت متردده انزل الخبر خاف بيوم ارجع
بس القرار صارم ونهائي لارجعة فيه..

احبكم هوايه اتمنى كنت خفيفة ظل عليكم
اعتذر على كل وحده دزتلي قصتهه جنت اتمنى استمر
واكتب بس موكلشي نتنماه نكدر نحصله ..

حبايبي تدرون بيه امون عليكم اريد طلب اخير منكم
وهو متابعه لحساب الكاتبه نازك الحمراني وقصتهه
رجال بين ثنايا القلب لاتفشلوني فوتو ع حسابهه وتابعوا القصه nazak123
حاليا متابعتهه كلش حلوه تحجي عن شبابنه الابطال..

ساره صديقتي المقربه واختي العزيزه راح اشتاقلج هوااايه
واشتاق لتعليقاتكم Hamzayhoocom1996
كلكم احبكم ..

.
.
احبكم هوووايه .... وداعآ💔 كونوا بخير...