رواية قوارير من فضة الفصل الثاني وثمانون 82 - بقلم الكاتبة شمس السعدي

مساء الورد ❤
///// البارت السادس والســـبعون /////
#قوارير_من_فضة ج2
#بقلمي_شمس_السعدي ..

طلع جدو واني التهيت بملابس زمن .. اريد اكملهم قبل زواجها ..

خابرت خاله ..
" هلو امي شلونج "
رديت " على الله انت شلونج الحسن شلونه "
ردت " زين ويگول اختي الجبيرة ماتسأل عليه "
رديت " حقج وحقه بس ماشاء الله جنها المصايب بس علينا تركض نريد شهر نرتاح ماكو "
ردت " استغفري ربج كل هذا اختبار .. اكثر من الصارلي والحمد لله بالاخير جبر خاطري بالحسن وابوه واخواته"

رديت " الحمد لله واني شوكت يجبر خاطري "
ردت " والله حلمت بيج حلم يخبل البارحة .. "
رديت " ياالله .. ماتجيبين البنات وتجين يمي "

ردت " مو اليوم خليها الباجر السيد يروح للبصرة واخليه يجيبني اني والبنات يمج "

ثاني اجت خاله من الصبح جابهم السيد وراح ..
سويت ريوگ وگعدنا كلنا ..
دنو فرحت من شافتهن… تحب بنات بعمرها ..
زينب متغيرة حيل مو ذيج الجانت ماتباوع حتى بوجهنا .. ماتخلي اخوها ينزل بالگاع ابد .. خاله تگول وياي بالبيت ابد ماتخليني لو الاخوها تشيله عني من اشتغل "

واخيرا خاله صبرت ونالت .. زوجها انسان صالح وصاروا عندها اثنين بنات وولد ..

سألتها على امي " ماكو خبر عن امي "
تنهدت " ذيج المرة اجونا بيت سعد .. ومن حجيت وياه غير الموضوع مايقبل يحجي "

رديت " زين ليش معقولة كاتلها ؟"
ردت " لا مااعتقد بس احس وراه شي .. والا لو منهزمة صدگ جان ماسكت لا هو ولا عامر "

سألتها " خاله لفت نظري شي ؟؟ خالو سعد نگول اخته ونزلت راسه وسبب موت ابوه منها وهيج يسوي . 
عمو عامر ليش يسوي هيج ؟"

اتنهدت " مو عمي جان رايدني العادل وسماح العامر "
سماح من يومها تكره عامر وتگول متسلط وعصبي لو يحلم مااتزوجه من هي وصغيرة تكرهة بس هو لا ..

لدرجة من صار الصار تأثر اكثر واحد بينا حتى اكثر مني وحلف يكتلهم اثنينهم… وعمي راد يجبر خاطرنا اثنينا ويزوجنا البعض بس لا اني قبلت ولا هو .. ورغم عمي زوجه الام هاجر وهم گرايبهم مو غريبه بس بقى حاقد عليهم "

رديت " واني اگول ليش هيج يكرهة .. ااااه ماما ااااه دمرت نفسها والحولها كلهم "

ردت " هي هاي الدنيا كلشي نشوف منها .. صح اني سامحتها وبريت الذمة الها واله بس ماانسى .. الطعنه من اقرب الناس الج صعبه حيل وتوجع .. وهذا الصار وي عامر "

بقت طول اليوم يمنا ..
بالليل سهرنا سوية .. وحجيتلها عن جدو هو راح يتصرف..
ايدتني بالموضوع " زين سويتي خلي يعرف عندج اهل صح هو طول سنين جان سند الج بس مو معناها يدوس عليج وشوكت يحجي وياه ماگالج ؟"

رديت " گال من يجي ارشد لان ملتهي براتب بابا ينقله للبنات والبيت هم .. صدگ معقولة ماما رجعت للبيت ؟"

ردت " مااعتقد ولو صدگ وعرف ارشد مايضم على عامر لان ارشد وعامر مثل الاصدقاء مايضم واحدهم ع الثاني شي "

مااعرف ليش غياب ماما شاغلني حيل .. حتى لو ماجانت زينة وياي وباعتني بس تبقى امي ..

ثاني يوم خاله رجعت البيتها ورجعت الوحدتي .. خابرت مثل عادتي وسألت على هذال .. ماكو اي خبر وعذورة گالوا احسن شوية ..

بعد كم يوم ..
اندگت الباب قوي ..
استغربت .
فتحتها نسر وجان وجهة مايتفسر ..
سحبني ودخل بيه لجوة ..

همست " نسر شبيك منا دنو .."
صاح دنو بابا ابقي بغرفتج لتطلعين ..

رديت " شبيك نسر "
رد " اني شذر اني تشكيلي الجدج وتخليني طرف ثالث بينا "

رديت " بس انت الدخلت اطراف هواي بينا انت الصاير مدري شبيك بينما السالفه مايحتاجلها تفكير "

رد " كلتلج اصبرلي "
رديت " شصبر هاي صارلنا شهر من اجت شسويت انت"
رد " عبالج سكتت .. رحت ابوها مريض وعمامها يگولون رجعها على ذمتج وعسا ما تحبسها بغرفه مالنا علاقه هيج بنت مانريدها .
گلتلهم يابة بنتكم طعنت بشرف مرتي ورادت تموتني وتسوي حيل من وراي .. يگلولي هي وحدة من الاثنين لو تكتلها انت لو احنه "

رديت بعصبيه " وهسا شنو شنو فهمني .. يعني تبقى هيج تخسرني علمودها مو هذا قرارك "

رد " شلون اخسرج علمودها اصلا هي والعدم بالنسبة الي .. وحتى جدج حجيتله وكال ماتريد بنتنا طلكها وبيت جدها مفتوحلها وتعيش براتب ابوها وورثه "

اتنهدت ..
باوعلي " يعني قابلة تعوفيني .. اموت وحق الله اموت مااتحمل لحظة دونج .. افتر وادور على هذال وتفكيري يمج "

گعدت " اني التعبت نسر اني .. انت الحل يمك اختار واني احترم قرارك ياتختارني ياتختارها "

رد " انت طبعا بدون نقاش .. بس اسمعيني… صح غلطت بحقي بس اهلها وعمامها يگولون اكتلها مانريدها وجنت مقرر لو اخذوها اخلي ملاك تروح وياها واسبوع يمها واسبوع يمي .. بس بعد الصار مااگدر امن على بنتي هم مريضه وهم تتعلعل "

رديت " يعني تبقيها "
رد " لا طبعا.. شوفي واسمعيني .. واني گلت هالحجي الجدج وخله الخيار الج وارشد شاهد وحتى گلتله اكتب تعهد او اي شي تريدة شذر انه هديل ماترجع الذمتي "

سألت " وشنو هالحجي الشهدت عليه "
رد " بيت بيداء يبقى الها مؤقتا بين ماابوها يصير زين .. وبيداء تنتقل يمنا هي وولدها بالطابق الفوگ واني ادفع ايجار ذاك البيت .. واطلكها محكمة وانطيهاحقوقها ونفقه ملاك حتى بعد ماتطالبني بشي
واني وياج نعيش هنا بعيد عن الناس كلها ..
ملاك من اريد اشوفها ادز اي احد يجيبها البيت اهلي وحتى دكتورها اخذها اني وامي لو اني وبيداء .. وهديل مااشوف خلقتها ولاتشوفني .. "

رديت " وشنو اليضمن ماكم يوم وتگلك رجعني الذمتك لو اهلها يگولون ليش مبقيها يمك بدون عقد "

رد " هذا ذنبهم هم الشمروا وبنتهم واني سبق وكلتلهم مال ارجعها على ذمتي من سابع المستحيلات .. بالنسبة الي هي ام بنتي وبس "

اتنهدت ومااعرف شحجي " هديل لعبتها صح وعبالها يتنازل ويرجعلها .. بس مستحيل انطيها هيج فرصه حتى لو بقت يم ملوكة بس يم نسر مااخليها توصل "

خليته يخابر جدي وارشد وعمه حتى يكون الحجي گدام الكل ..

وگدامهم عاهدني ماترجع وارشد راح يكتبه تعهد ماقبلت لان ماردت ورقة تربط بينا ردت العهد البينا يكون حبنا وگلوبنا وبس ..

ارشد سهله معاملة الطلاگ ..
طلگها وانطاها غايبها وگالها نفقة ملاك ومصاريفها كلهن عليه انت هنا تربين وبس ..

بيومها صالحني نسر ..
ورجع البيتنا .. ذاك البيت بقى الامه واخواته لان بيداء قررت تبيع بيتها وتفتح مشروع الابنها والباقي تشتري بي مشتمل او شقه لان هو اصلا مو غالي وماجاب سعر ..
نظفنا الطابق الفوگ ورتبناه البيداء وولدها ..
وغرفه هديل رجعت العذورة واسراء مثل قبل ..

رجع نسر الحضني وهالمرة ملكي الوحدي… ماردت اضغط عليه اكثر .. لان اعرف وگلبي حاس انه جانت متأملة بي لان مامطلگها محكمة .. لكن بعد الطلاگ مااعتقد راح تبقى .. وهالشي مو بس اني حتى البنات تراهنوا عليه ..

جدو وصاه عليه وگاله اذا بيوم زعلت لو نزلت دمعتها اخذها منك وبعد متشوفها ..
وفعلا وعدني انه مستحيل يخلي دمعه بعد اليوم تنزل مني ..

هذال طولت شغلته ومانعرف اذا عايش او ميت…
نسر يكول هالشغلة مو مال خطف عادي او عصابه هالشغله جبيرة وبيها شخصيات كبار ..
يعني لو فعلا رادوا يتخلصون منه جان كتلوه بباب بيته لو فجروا سيارته ..

هالشي زرع الامل بداخلنا كلنا والاكثر هنا .. الصارت تتمنى يكون غايب ويرجعلها بيوم ..
ولا يرجعلها مقتول ..

هنا :
كل يوم واني عيني ع الباب كل شوية اگول راح يجيني خبر عنه لو يدخلي بطوله الحلو ..
والشيب التارس راس مثل خيوط الفجر ..

لليل واني نايمة حلمت بي ..
وكانه نجمع ساطع بالسماء اختفى تدريجيا بحلول الصباح .. شعرت بأنه حزين ..
تمنيت أن أكون معه لأواسيه و لكنه بعيد جدا ..
سمعت الخوف في نبرات صوته و اختلاجات قوله ...
قال لي وداعا ثو إختفى ..

هالحلم خلاني اكتئب بس لاخلص بعد مااشوفه او يمكن شامريه بمكان وماندري صارله هواي حتى لو ميت احتمال الدود اكل جسمه واختفى شلون يعرفوه

اتهسرت وصرت اعيط وابجي..  اجن اخواتي يتراكضن عبالهم بيه شي ..
سألتني امي " شبيج شكو من خابرج"
رديت " حلمت بي يوم ماادري شبي احس بي شي يمة"

بقن يواسن بيه للصبح .
اجه نسر هو وشذر… جانت وجهوهم رغم ضايجين عليه بس موردة ..
بالضبط مثلنا اني وهذال قبل ..
نظراتهم همساتهم كلها حب .. مستحيل يفترقون اذا فترقوا مايعيشون ..
ربي مايحرمهم من الانحرمت منه ..

حتى دوام صرت بالگوة ادوام مرات يتساهلون وياي ومايخلوني اشتغل لو اسيل تاخذهن مني ..
كلهن راعت وضعي ..

اخوات هذال ماتركني ابد ..
بين كم يوم يجن يشوفني .. الى ان اجه خبر النسر انه يبطل يدور عليه ..
هالتبليغ اكد شكوك نسر وريحنا نوعا ما بمعنى انه عايش ماميت .. ويخافون نلگيه ..

شذر :
رجع نسري الي وهنا اصريت ارجع اكمل علاجي ..
اثنينا محتاجين نبدي من جديد..  ولازم نكون عائلة التزمت بصلاة الليل بنية الطفل ..
اتمنيت طفل واحد ع الاقل يعوضنا عن كل الشفناه
نسر كلما يجي استراحة .. يجيب ملوكة يمنا ..
حتى تعودت علينا ..
دنو تكمل دراستها بسرعه علمود تلعب وياها ..
صح ماتمشي وعندها خلل بعينها والسانها ثگيل بس تفتهم حيل وتعرفنا ..
بحيث من تشوف دنو تخبصنا بالعياط بمعنى تعاي العبي وياي .

كملت ملابس زمن واجت تاخذهن ..
عزمتني على زواجها تعذرت لان الوضع مايسمح ولسا لابسه اسود على هاجر ..
ودعتها بالتلفون وطلبت منها ماتگطع بيه .. جانت خايفه وتكلي ادعيلي ..
بس طمنتها وكلتلها لاتفكرين بس بسعادتج وحياتج انت بريئة ومالج ذنب ومستحيل تتعاقبين ع ذنب مو ذنبج
وعدتني تخابرني بعد الزواج ..

لكن مر اسبوع واثنين وثلاثة وماكو خبر حتى اهلها ماكو .. وكأنه زمن كانت بحياتي طيف جميل ملاك بفستان ابيض غاب عني وترك اثر جميل بحياتي ..

حزنت واختفائها اثر عليه اكثر من اختفاء امي الماعرف هي وين ..

ليالي واني احلم بيها ..
ليش اني وهي وغيرنا مظلومات لان بنات لان كنا اطفال ومانگدر ندافع عن نفسنا ..
مانگدر نحجي وقلوبنا تتألم من نهش اجسادنا بوحشية .. ومن اقرب الناس النا ..

من حجيت النسر ..
جان رده " حاولي تتعودين على وضعنا بهذا البلد..  اليروح بعد مايرجع "
وفعلا كان هذا رأي لأخر لحظة.. وخاصه بعدما فقدنا الامـل برجوع هذال ..

بس هنا مافقدت الامل كل يوم تگول باجر يرجع ..
بيداء باعت بيتها ..
وسوت كوفي المهيمن .. وخله اصدقائه يساعدوه لان اغلب اليتخرجون ماكو تعيين ..

كلنا شجعناها حتى امه اشتغلتله معجنات للكوفي وي الجاي او القهوة او اي نوع من المشروبات يقدموها ..

الولد الخطب اسراء صاروا اهله يرحون ويرجعون عليها
ونسر متوقف بسبب غياب هذال ..
بس هنا گالت ..
" نسر خلي العالم تجي ليش مأخرهم صار شهرين "
رد " شلون تصير خطبة وعرس وهذال مانعرف شي عنه وانت هذا حالج "

ردت " لاتخاف عليه اني زينة .. وهذال يرجع اليوم باجر عسا ما بعد اشهر گلبي بارد واعرف راح يرجع "

نسر " راح اگلهم بس خطبة بين مانشوف الوضع "

رجعوا خبر الهم ..
اجن اخواته وامه .. حددن الخطبة .. قرروا يسووها بقاعه لان قاضي واله معارف هواي ..
حجتلهم خالة عن وضعنا فأمه ردت :
" لعد نخليها للزواج مايصير انتو بهيج حالة واحنة نسوي حفله كبيرة "

اسراء هم ماقبلت هوسة وحفله ..
راحت وياها سما المركز تجميل .. ماعزمنا احد بس احنة وعمها وخالها وحسام وقصي من الزلم ..

عذورة جانت مريضة ماطلعت بقت وي هنا بالغرفه ..
اجه الولد جان مبين عليه الوقار وشخصية هو اكبر منها بس مبين مميز لهذا اسراء وافقت عليه ..

من اجت من الصالون .. شفناها تعجبنا ابد ماكنا نتوقع بيوم نشوفها بهيج صورة .. طالعه حلوة كلش ونازكة ..

عقدوا وكملوا لبسها واخذوا صور ..
تالي طلب من نسر ياخذها ويتعشون برة لان عازم اهلة كلهم بمطعم يحتفلون عائليا ..
وافق نسر لان ماراد يخرب فرحتها وخاصه احنة حفلتنا كانت هادية مابيها ركص او اغاني ..

راحت بدلت لبست فستان محجابات اوڤ وايت ورتبتها سما طلعت حلوة حيل ..

خاله طول ماتباوعلها تقرأ ايات وتتمنالها حياة حلوة مو مثل اخواتها ..

نسر رغم اجاه انذار انه يبطل يدور عليه بس مابطل وجان بالسر مكلف ناس يعرفون وين وليش اخذوه ..

اجاه تلفون واحنة ع العشا ..
غير ملامح وجها كلها .. بحيث فز من مكانه للاستقبال بسرعه ..
امه واخواته كلهن يسألن " شكو شبيك "

رحت وراه للاستقبال سد التلفون وباوعلي .. عيونه تلمع من الدموع حاصرهن بالگوة ..
همست " هذال ؟"
رد " مو اكيدة بس لاتحجين اي شي الهن الى ان اتأكد"

بسرعه طلع وخلاني بين شكوكهن واسألتهن ..
باوعتلي هنا " اجاه خبر عن هذال لو شنو ؟"
رديت " مااعرف ماگالي ؟"

صارت حسبة تاخذنا وحسبة تجيبنا .. بقيت حاصرة خوفي بداخلي وساكته ..
اتاخر نسر والقلق زاد ..
خابرت عذورة حسام حجتله كالها هسا اخابر نسر واشوف ..

رجع خابرها.. گالها مايرد ..
زاد الخوف والقلق اكثر عندنا..
هنا تباوعلنا ببرود " شبيجن خايفات هذال مابي شي اذا يرجع يرجعلي يمشي على رجليه "

ردت خاله " ان شاء الله..  ربي يسمع منج "

هنا رغم هي بوسطنا وكلنا يمها وممخليها تحس بشي بس احساس الغربه باين عليها ..
وكأنه غربتها تكمن بغياب هذال عنها ..

‏من بعدك
أحس بالوحدة
ومعي كل الناس ..
وينتابني إحساس
الغربة ويا مره من
إحساس ..!

اجه نسر تطافرنا كلنا .. فتحنا الباب .
باوعتله بتساؤل رد " شبيجن شغله بالشغل خبصتني كل شوية مخابرات "

من شفت وجهة وراحته .. ارتاحيت معناها مو هذال بخير ..

همسلي " الوكت فات بعد ماتسوة نرجع البيتنا خلينا نبات هنا "

هزيت راسي ورحت فرشت بالاستقبال ونمنا ..
تمدد ع الفراش وتنهد ..
" ااااه شذر اااااه لو شايفه من خابروني وگالولي لكوا واحد مكتول ونفس المواصفات التدور عليها .. شصار بيه ..
احس رجلي ماتشيلني اسوق واحس الطريق شطوله الساني مابطل دعاء ..

تالي من رحت طلع الرجال ماعنده اي مستمسكات بايگين كل غراضه وفلوسه وبايگين سيارتة وكاتليه وشامريه ..

من شفته ردت الروح بيه وگلت الحمد لله والشكر..
سألته " وانت ليش خفت مو گلت ماخذته جهة معينه يعني معقولة يكتلوه ويشمروه ؟"

رد " وليش الهم امان ذوله .. لاتنسين هذال عنده ملفات ضدهم واكيد مايتركوه بسهوله الا اذا اتأكدوا من سلامه وضعهم .. واذا حسو بخطر مايخلوه "

شهگت " تحجي صدگ نسر ليش احنة وين عايشين شنو ماكو دوله ماكو قانون "

رد " احنة عايشين بالعراق العظيم حبيبتي يعني كلشي بي مباح وجائز .. "

خفت من كلام نسر كلش .. لحد مانمت واني افكر..  مااعتقد هنا تعيش لو صار بيها شي ..

ثاني يوم رجعت البيتنا .. الصراحة مااتحمل اشوف وضع هنا وحالتها الشبه ميته تمشي بجسد بلا روح
لو عذورة الحالتها تعبانه من العلاج واحسها تقاوم وتتحدى الخاطر حبها الحسام ..

حسام الكان مثل الرحمة نزلت عليها .. لو ماهو كان مااتحملت ولا صبرت لحد الان ..
بكل مرة حسام يفتح موضوع الزواج وهي ماتقبل تخاف انه تموت ويتعذب من بعدها ماتريد تظلمه برأيها
بس احسها ترفض بسبب حالتها وشكلها..

اخواتي هالفترة ناسيتهم..
خابرت سمر سألت عليها فرحانه لان رجعت للمدرسة ارشد مسويلهم نقل ..

تذكرت ارشد هو التكفل براتب بابا والبيت ..
گلتلها اذا اجه ارشد خلي يخابرني من جهازج واحجي وياه ..

سمر ..
بعد مابدينا نستلم راتب بابا .. اشتريت موبايل علمود اخابر شذر بي ..
رجعت للمدرسة وصار طموحي اكمل واوصل ..
كعدت البيت والتفكير بأرشد خلتني اتأذى ..

بعد فترة من المشاحنات بين وبين ارشد .. قررت سحر تعلن استسلامها.. 
بحيث صارت هادية اكثر من قبل .. خلال اشهر قليله تغيرت ..
بس مرات اشوفها تحجي وي ارشد .. لو يگعدون بالحديقه يسولفون..  ومن اجي يمهم تسكت ..

ومن اسالها تجاوبني " ماكو شي مجرد نحجي عن اهلي وحياتنا قبل "

رغم احس ارشد مامهتم ودايما يذكر هاجر ويروح يزورها وحتى غرفته وصورهم مثل ماهي بس سحر دخلت الشك بداخلي ..

بمرة جاي ادرس وهي تلعب لعبه بموبايلها ..
سالتها ..
" سحر انت شغير نضرتج عن ارشد "
ضحكت " يانضرة .. هااا اذا تشوفينا نحجي فهو يطلب يحجي وياي وعود ينصحني وكذا وسوالف المحامين مثله .. بالمختصر يتفلسف زايد "

مااعرف ليش ماصدكتها ..
رغم حجيها وي ارشد خلاها حتى وياي كلامها زين وماتتعارك بعد .. وتگعد يمنا عادي..

وهاي خلصت السنة ودخلنا بسنة 2013 ..
هواي اشياء تغيرت بحياتنا خلال سنتين .. وفاة بابا انتقالنا لهنا ..
موت هاجر .. واخرها اختفاء ماما ولحد الان مااعرف شي عنها بس برود سحر ماطمني رغم جانت دوم تذكرها وتگول وين اخذوها بطلت تسأل عنها ..

حجيت وي شذر وگالت احجي وي ارشد هو علاقته قوية بعمو عامر واكيد مايخبي عليه شي ..

اجة ارشد من الدوام ..
سلم وصعد يبدل ونزل .. سويتله غدا وكعد بالهول ياكل وقمر وياها تلعب بالخاشوگة وهو يأكل بيها ماتقبل الا هي تخلط وتاكل وتطشر ..

حجيت وياها ..
" ارشد شذر رادت تحجي وياك "
رد " وينها هي هنا ؟"
رديت " لا گلتلي خابريني واحجي وياه "
هز راسه " خابريها وانطيها الي "
رحت جبت موبايلي وخابرت ..

صار يحجي وياها وسلم ..
مااعرف شنو سالته تغيرت ملامحه ورد عليها :
" لا مااعرف والله هسا سمعت منج .. البيت ماينياع لان تعرفين الامج حصة بي .. البيت طلع مو ملك ايجار توقعنا البيت ملك "

استغربت ..
من غلقه سألته " يابيت تقصد ؟"
رد " بيت اهلج "
رديت " بس الاعرفه هو بيتنا ماگال بابا لو ماما هذا ايجار .."

رد " لا متوهمة يمكن ماگالولجن حتى خاف تضوجن او تتحسسن "

معقوله اهلي يكذبون علينا .. اتذكر ماما من تحجيلنا شلون باعت ذهب عندها وبابا يشتغل ورواتبه يجمعهن واشترى بيت صغير بالاول كلش ..
وبعدها باعوه من انهزمت شذر .. واشتروا بيت ثاني وجانوا مطلوبين عليه وخلصوا عمرهم يشتغلون علمود يسددون .. ماما جانت موظفة وبطلت لان رواتب قليله وبعد مابطلت سقط النظام وصعدت الرواتب وتندمت تالي رجعت بعد كم سنه وصارت تساعد بابا ..

احس نفسي عايشة بكذبه ومااعرف كلامها صح او لا بس دايما تحجيلنا شلون تعبوا ووصلو اثنينهم ..

شذر :
بسنة 2013 رجعلنا الامل من جديد ..
نايمين واجت مكالمة النسر ..
رد عليها واني جنت بين نايمة وبين صاحية ..
سمعته يگله " هذال هذا انت .. وين جنت يمعود ماخلينا مكان مادورنا بي عليك "

طفرت بسرعه ومامصدگة جان الصبح هستوه طالع ..
كمل مكالمته الماطولت الا دقيقه يمكن او دقيقتين ..

ضحكت " عايش موو هذال عايش "
ضحك وحضني " جنت اعرف وگالولي عايش بس خايف لايدگون الناقصه بي "

اتنهدت " الحمد لله .. يمكن هنا تطير من الفرح لو سمعت خطية صارلها اشهر متعذبه "

رد " بدلي بسرعه خلي اروح ابشرها .. بس لازم هالشي يبقى بينا لمن يطلع "

رحنا الهم من الصبح استغربوا ..
جانت اسراء وهنا مبدلات يردن يرحن للدوام ..
اتقربت هنا " شكو من الصبح خبر عن هذال مووو"

من شافت ابتسامتي ضحكت " لكيتوه موووو نسر احجي گلبي راح يوگف "

ضحك نسر " اي عايش وان شاء الله راجع "
گعدت بالگاع وتبجي .. بعدها سجدت وشكرت الله ..
" الحمد لله ربي مافشلتني ابد .. ليل ونهار ادعي ومافشلتني .. گولي شلون ووين "

گعد نسر يحجيلنا .. الجهة الهذال لازم عليها ملفات ماخذيه وحاجزيه لان اكو محاكمة ضدهم وتحويلهم للجنه النزاهة .. اختفاء هذال ساعدهم حتى تثبت برائتهم وماكو اي مستمسك عليهم .. لان الظاهر بيوم الطلع هذال طالبيه للتحقيق وبيده الادلة ..
فخطفوه حتى يضمنون سلامة موقفهم ..

ردت هنا " الله يلعنهم فاسدين يخطفون بشر علمود مصالحهم ..
رد نسر " زين ماكتلوه مو بس خطفوه واتعجبت اصلا شلون تركوه وهو يعرف الاي حزب ينتمون .."

بعد يومين رجعلنا هذال ..
راحت هنا البيتها نظفته ورتبته علمود خاف يجي بأي وقت ..

هنا :
من سمعت حسيت رجعتلي روحي ..
رحت البيتي رتبته ونظفته وسويت اشكال .. اكل ..
كل يوم ابدل وانتظر ..
الى ان بيوم رف گلبي وي دكة الباب ..
فتحتها جان هو .. بس ضعفان وحالته حاله ..
شفته نزلن دموعي وحضنته. ..
حضني حيل ويتنهد " تعبان هنا "

نزلن دموعي لااراديا من الفرح .. تلكوه الولد اخذهم الحضنه يبوس بيهم ويشمهم ..
ردت اخابر اهلي واخواته ..
گال اريد اسبح وانام تعبان لاتخابرين احد ..
سبح واكل شويه ونام ..
اشرلي تعاي بحضني اريد اشبع منج خفت مااشوفج ولاانام بحضنج بعد ..

دزيت رساله النسر وخبرته بس طلبت مايكول الاحد للعصر ..

فتح اديه نمت بحضنه صرت اشتم بي وابوس .. اباوع الملامحة وفرحانة مامصدگة رجعلي وبحضني هسا ..

للعصر اجو اهلي كلهم .. وخابرت اخواته اجن فرحانات صارت كلها تعتب عليه لان ماحجيت ..
كلراليسألوه رفض يحجي شي او يصرح عن مكانه ..

بس جملة وحدة گالها " بعد مالي عيشة بهيج بلد"

وفعلا بعد ماارتاح قدم تقاعد .. عندة معارف گالولة احنة نساعدك ..
طلب من اخوه الي بالخارج يساعده باللجوء ..
طبعا من سمعت استغربت ..
" هذال شتقصد يعني نطلع للخارج واترك اهلي وحياتي هنا "
رد " اني هنا مالي عيشة بعد هنا البلد المااخذلي حقي لان نزيه وصار ضدي وي الفاسد مااريده… مستعدة تخسريني انت ؟؟"

رديت " لا طبعا اصلا بلياك جنت ميته بس صعبة اترك اهلي صعبة وولدي منو يگول عمي يخليني اخذهم .. مااريد اصير بين خيارين افهمني "

رد " طاوعيني هنا .. لان اذا بقيت هنا مااسكت وابقى ادور وراهم ونهايتي معروفه معناها انقتل  .. بدل ماياخذولي حقي حولوني للتحقيق لان غايب مع انه نسر قدم دعوة والدنيا مگلوبه عليه..  شفتي وين احنة عايشين ؟؟"
وهسا شگلتي هنا ؟؟ تسافرين وياي لو لا ؟؟
#بقلمي_شمس_السعدي
يتبع… ..

حبايب اعذروني حاولت اختم اليوم وماگدرت لهذا جزأتلكم البارت..
انتظروا النهايه بالليل .. احبكم..
لاتنسون تنطون متابعة الحسابي بالواتباد ..