رواية قوارير من فضة الفصل الخامس والثمانون بقلم الكاتبة شمس السعدي

صباح الورد عليكم احبتي ❤
بارت بالاحداث الجديدة لقواريرنا.
#قوارير_من_فضة
#شمس_السعدي

وقفت أمام ذلك الطريق وذلك الدرب الذي شهد تاريخ ماضيي المؤلم وذكرياتي ..
فلم أجد إلا أطلال زائله ومتهالكه وبقايا عمر رحلت نحو المجهول وذكريات باليه لن تعود وأحلام ضائعة بين الأيام والشهور ..

هناك من يسترجع ذكرياته ليرسم ابتسامة خفية وهو يتذكر ذلك الماضي الجميل ..

الا انا !!

فذكرياتي بدأت من ذلك اليوم الذي عرفتك به ..
فوجودك اصبح ماضي وحاضري ومستقبلي ..

شهر 11 من سنة 2019 ..
بغداد مو مثل عادتها .. طرق مسدودة .. والبلد كله مگلوب مضاهرات تختلف عن سابقاتها ..
شباب وصغار وكبار .. الكل طالع والسبب سوء الاوضاع بالبلد ..
تعب الشعب وهو يطالب بأبسط حقوقه ومايلگاها رغم احنة بلد الخيرات والدول عايشة بخيرنا ..

اكو مثل خالة دوم تحجيه .. ( من لحم ثوره وطعمه ..)

لكن الوضع صار مايطمن من بداية الثورة للان والشباب دتنصاب وتستشهد ..
بيداء خايفة على ولدها .. مهيمن من اول يوم هو وي اصدقائه ودور اخذ حمودي اخوه وياه. .
وتخبلت اكثر عليهم .. نسر مشجعهم لهذا بيداء ماتكدر تحجي بس هو مراقبهم وكل شوية يخابر يكلهم ابقوا بالتحرير ولاترحون الاي مكان ..
واي شغب ابتعدوا عنه .. حتى طبخ نطبخ ويجون ياخذوه ..

اليوم عيد ميلاد حدوري وكروري ..
سبحتهم وطلعتهم .. تلگتهم خالة تهوس وتصفگلهم
( عطايا الله عطايا كبار .. ردنا واحد نطنانا ثنان )

وهم يگمزون بوسط الهول ..
نزلن فروحة ودنو من فوگ .. ووراهن بيداء ..

تقربت دنو الاخوتها .. اخذت المشط مني تمشط شعرهم الاشقر ..
تالي سحبتهم وصارت تعضعض بيهم .. بالاول بدأت بحدوري ..
تعضعض بي وكروري يدفعها ..
" عوفيه لاتاكليه ختية "

تركت حدوري وسحبته " لعد اكلك انت .. امممم طيب"

وهذا يضحك ويكركر لان تدغدغه ..

سألت فروحة " خالة مو ع اساس تسويلهم حفلة مثل كل سنة توصين ع كيك "

رديت " متشوفين الوضع ياامي .. وينه ووين الحفله "
ردت خالة " يمة خطية ماتشوفيهم فرحانين وصارلهم شكد منتضريه .. سويلهم كيكتين وخليلهم شمعه يطفوها وهاهي "

باوعت البيداء .. مشغوله تتصل بمهيمن وهو كـ العادة مايرد بس على نسر .. لان يعرف امه تبقى تحجي وتگله ارجع ورجع اخوك ..

سألتها " شگلتي بيداء تسويلهم كيك انت لو ماتگدرين "

ردت " لا اني اسويلهم اذا مااسوي للحلوين المن اسوي وهم اشتت تفكيري شوية لان راح اتخبل من ورى ولدي فوگاها هذا حمودي يدزلي صور رسوماته ويخبلني اكثر"

رديت " وليش تتخبلين بالعكس شجعيه .. اصلا اله مستقبل يخبل ولاتوقعت هيج يرسم حلو شفتهم شلون مسوين الشوارع حلوة .. اصلا هالمضاهرات ثبتت عندنا مواهب تخبل لكن حرامات مدفونة ومالهم مستقبل بالعراق "

ردت بيداء " اي والله گلبي ديتگطع من اشوف هالشباب الحلوة هيج متبهذلة والحكومة ماتهتم "

سألت خالة " يمة هم خابرتي رجلج وين ماوين صارلة كم يوم ماكو "

هزيت راسي " اي خابرته گال بلكي احاول اجي .. تعرفين الوضع وانذار صعب يجي "

اتقربت دنو تراويني صور زينة .. " ماما دشوفي يخبلن واني مشترية من زمان الزينة خلينا نسويلهم ع الاقل بس علمود الصور "

ابتسمت " سوي الترديه ماما ع الاقل تغيرن جو شوية"

ردت فروحة "اي والله اختنگنا حتى دوام ماكو ولاتقبلون نروح وي صديقات دنيا كلهم ديرحون ويسعفون المصابين ليش متخلونا "

عاطت بيها بيداء " هي هاي البقت اخوانج اثنين وانت الثالثة وبيداء تكعد تلطم هنا .. لج هي ولد وخايفه عليهم "

رديت " احنة مو مانعيجن بس خالج يخاف عليجن الوضع تأزم اكثر ومانعرف وين تصفا من خوفنا عليجن مانخليجن ترحن "

ردت خالة " كافي سدن الموضوع وگومن زينن مدري شتسون .. "

گمنا اني وبيداء للمطبخ .. جهزنا الكيك .. اجت دنو وفروحة ساعدونا .. سوو خلية نحل وشكر لمة ..

والتوام يتعاركون ع ننعجانة بيها عجين كيك يحبوه لان بي كاكو ..

خابرت عذورة " هلو حب شلونج "
ردت عذورة " هلو شذورة الحمد لله بس تمار مريض شوية "
رديت " ياعيني شبي .. واني اگول اليوم شعجب ممداومة "
ردت " اي والله حسام اخذلي اجازة وهو اليوم خفر"

رديت " لعد تعالي يمنا اليوم عيد ميلاد التوأم واصلا احنة مانسويه بس هيج بيناتنا لان خابصيني والبنات ضايجات .. "

ردت " يروحي حبايب عمتو .. شلون نسيتهم اني ولو تمار ممخليني اشوف طريقي والله .. مرات اگول الله يساعد شذر شلون مسيطرة ع التوام "

ضحكت " لان عندج دوام هيج تحسين اني ماعندي شي ولاتنسين خالة متخليني احس بيهم "

ردت " اي ماما متعلقة بيهم حيل حتى صرت اغار تگلي من يجي ابنج يغارون ولد نسر خطية "

رديت " اي عيني نحنا الاصل .. ولو خاله متفرق تحبهم كلهم اصلا بيوم الماتجيبنهم تضوج "

ردت " اوك لعد نلتقي بس راح اخابر اسراء تجيني بسيارتها وهويتها ندخل .. "

رديت " زين لعد راح اخابرها قبلج اعزمها "

غلقته منها وخابرت اسراء .. گلتلها تجي وتجيب الاولاد ووصيتها تمر بعذراء هم تجيبها وياها ..

بعدها وصيت دنو ع اخوتها ودخلت للغرفة اريد ارتبها
فكرت اغير شوية تغيير وارجع الايام قبل ..

رن الموبايل .. باوعت هاي سمر. .
ابتسمت اعرفها حاسبتلهم ما تنسى عيد ميلاهم ابد ..
رديت
" الووو كل عام وحبايب خالتهم بالف خير "
ابتسمت " فديت الخالة التذكرهم واني اكول شعجب اتأخرت اليوم "

ردت " اليوم بقيت يم بيبي مالها خلگ كلش "

سألتها " خير شبيها "

ردت " سكرها مرتفع وتعرفيها من تتمرض تصير روحها بيه وبجدي "

ابتسمت " الله يحفظها النا ماكو بحنيتها "

ردت " اي والله ابد صارتلي ام وابو .. امي ماتسأل عني وتسأل ع سحر بس "

اتنهدت " هم تعرفين اخبارها ؟"

ردت " اي مرات احجي وياها من موبايل سحر تعرفين ماتخابر بس عليها .. بس هالمرة صوتها مو زين ماعجبني يمكن مريضه "

اتنهدت " شنو علاقتها بعمو عامر معقولة نست بابا ؟"

ردت سمر " لا اني اكلج اصلا مجبورة عليه .. لان سحر دوم تدعي عليه وتكول ظالمها واريد اطلع ببيت وحدي علمود اخذها يمي واخلي جدو يطلگها منه "

رديت " ليش سحر تريد تطلع ببيت ؟"

ردت " اي هالفترة مشاكل هي وارشد على هاي السالفه حتى ابنها عند مرت عمو علاء ماتدري بي. وهي حابسة نفسها فوگ تنزل تاكل وتصعد .. ودور مرت عمو شادة وياها تريد طفل الارشد ثاني لان تشوف هنودة ورونق كل واحدة صار عندها اثنين وثلاثة وسحر ماكو لسا "

رديت " خاف هم مثلي .. شنو هالوراثة يربي معقولة كلنا نطلع نفس ماما "

ردت " ماادري بس مرت عمو كالتلها روحي الدكتورة وسحر عاطت بيها تكلها هاي حياتنا اني وارشد لتتدخلون بينا "

اتنهدت " اوووف سحر اعرفها رعنه ماتتحمل زين مرت عمو عامر مادرت ؟"

ردت " لا مااعتقد لو درت تگلب الدنيا هي اخذله فترة مايجي عمو عامر للبيت تخبلت وزعلت گالت اكيد عنده وحدة يروحلها لمن جدو قنعها انه هو دزه بشغل "

سألتها " ليش هو مايبات يم ماما "
ردت " لا مايبات بس مرات "
استغربت "شلون يأمن يتركها وحدها "
ردت " ماادري شذر اصلا اني مثل الاطرش بالزفه واصلا عازلة نفسي اجي من الدوام انام واكعد اخلصها يم بيبي اشوف احتياجاتها هي وجدو وقمر هم ادرسها خطية ماتريد غيري "

رديت " هاي الطفله قاهرتني حيل .. لا ابو ولاام "

ردت " مرت عمو علاء وعمو علاء مامقصرين عنها واني هم متعلقه بيها كلش وابوها هم يموت عليها بس مشغول ومايفرغ لهذا مو هواي تشوفه "

رديت " لاتبررين اصلا ارشد متغير حيل مو مثل ماعرفته ومن ضم علينا مكان ماما ضجت منه كلش جان يكول اني اروضها وتالي هي روضته "

سكتت سمر لان اعرفها ماتحب تجيب سيرته .. سكتت هم ماردت اضوجها ..

حاولت اغير الموضوع وكلتلها " تجين للعيد ميلاد مال كروري وحدوري "

ردت " شنو حتسووه مو كلتوا مانسويه "

رديت " اي ع اساس مااسويه لان الوضع دتشوفيه ونسر انذار بس خاله طلبت بيناتنا نفرحهم لان خطية منتضريه يوم يوم "

ردت " يروحي بوسيلياهم بس اني مااگدر اجي منو يجيبني وبيبي هم مااگدر اتركها غير مرة اجيهم واجيب هداياهم "

سديت التلفون منها .. صارت عيني ع صورته ..
ابتسمت ..
ولاعبالك غايب كم يوم كأنه سنه بالنسبة الي ..

دزيتله رساله " حبيبي فارغ ؟"

اتصل بسرعة " حتى لو مافارغ .. اترك كلشي علمود اسمع صوتك ياحلو "

ضحكت بصوت لااراديا ..
" اويلي ياب .. لاتخبليني عاد .. منتظر ع نار شيجيب الليل واجي اشوف العيون الحلوة "

ضحكت " كبرنا عيب "

رد " ليش هو الحب يعرف عمر .. اصلا حلات الحب بالاربعين .. "

ضحكت " فديت الاربعيني مالتي يعني اكيد تجي الليله "

رد " ايون الليلة يمج اين المفر "

ضحكت " كافي سوالفك ترى استحي "

رد " تدرين شذرتي شگد يعجبني خجلج رغم سنين طويلة صارلنا سوة وانت من اغازلج احس بعد ذيج البراءة بعدهي بيج .. وهالشي يخليني احبج اكثر .."

رديت " الظاهر صدك طلعت مشتاق گمت تتغزل وتمدح بس تريد الصدك اني حموت من الاشتياق .. "

سأل " شلونهم ولدي خو ممتعبيج "

رديت " يگمزون من الصبح يردون عيد ميلاد "

رد " لا شذر فشلة ووينه ووين العيد ميلاد "

رديت " لاتخاف مو مثل كل سنه عزيمة وديجي وهالسوالف هي كيكتين وكم شمعة "

رد " اي حبيبتي عفية .. بس شلون سالفه هاي اني مواعدهم بسيارات كبار ع الرمونت اجيبلهم هسا وين الگي "

رديت " لا تزاغل انت مواعدهم من زمان شوف اي بيجي يبيع ويدزولك توصيل "

رد " الله كريم اشوف "

كملت المكالمة .. رتبت الغرفه وغيرت الديكور .. احب التغيير احس نفسيتي ترتاح ..

ساعدوني البنات ..
فرشت فرشة حلوة تركية اخذتها من تركيا من رحنا ذيج السنة ..
خليت شموع وعطرتها وطلعت ..

كملنا غدا اجو البنات عذورة واسراء وغيداء ..
عذراء بعد ماضعفت صارت تخبل ..
اسراء جانت ضايجة مااعرف شبيها ..اخذت خاله ودخلن للغرفة ..

خلت عذراء راسها بالگدر .. ليش مگلوتلي مسوين برياني جان ماتغديت حسام حارمني من هيج اكل كون كله صحي .. مايقتنع خلص طبت " ..

ضحكت " غير يخاف عليج واصلا احنة سوينا هواي عبالنا تجن ع الغدا "

ردت " لا مو اسراء كالت بعد الدوام امرلج .. شوكت تسون العيد ميلاد هسا ؟؟"

رديت " لا لليل وصيت لفات شاورما وكباب ونسويه سويه وي العشا علمود نسر يجي "

كحت " عيني عيني اليوم حبيب الگلب راح يجي اگول مبدلة ومعدلة "

رديت " يااا هو شلابسة قابل فستان هي گلبية "

ردت " عمي هي گلبيه لو قفطان .. ندري بعد ماتخيطين واعتزلتي بس مو تخيطين النفسج بس وتحنصينا "

ضحكت " لج گلتي اريد ومااخيطلج .. هاي اخيط من وراه مايخليني علمود عيوني .. بس الصراحة ماكو دشاديش حلوة .. اضطر اشتري قماش واخيط بيدي صدگ مو جبتلجن قماشات من تركيا يخبلن وينهن "

ردت " ذيج تسمع حسج غير اليكرم يخيطها وينطيها قابل احنة خياطات "

ضحكت ع سوالفها ولاتبطل ..

رحنا للاستقبال دنيا وفرح مسوياته يخبل ..
بنتي طالعه ع عمتها هنا بالديكور والترتيب محد يلحگها ..

ع طاري هنا اتصلت .. ضحكت عذورة ..
" بنت الحلال بذكرها "

اتصلت فيديو .. فتحته .. سلمت علينا كلنا ..
" شلونكم ياااي كل سنة تتجمعون هيج وتحنصوني "

رديت " لا مو مثل كل سنه هالمرة بيناتنا .. سما والاء مااجو هم والوضع "

ردت " اي الله يساعدكم نسمع اخباركم ونضوج وكل يوم هذال يثبتلي قراره صح انه طلعنا للخارج "

ردت عذورة " وج صايرة حلوة هيج هولندا تحلي وين طالعين "

ردت هنا " مو بحلاتج عيني صايرة تخبلين وين تمار شوفينيا والتوأم وينهم "

درت الكاميرا عليهم فرحانين ويگمزون .. شافوا عمتهم اجو يحجون وياها ويبوسون بالكاميرا .. دايما تخابر فيعرفوها ..
والعام التقينا بتركيا كانت ايام حلوة ..اخذنا خالة ويانا وصاروا يبجون اثنينهم .. صح كل يوم تخابرنا فيديو بس اللقاء شي مختلف ..

ماطولت هواي بالمكالمة گالت من تسوون العيد ميلاد خابروني .. لان ديطلعون ..

اجت خالة واسراء ..
گعدنا كلنا سوالف وضحك ..
راحت دنيا تبدل .. اجت صرت اباوعلها بفخر .. تذكرت اول مااجيت الهذا البيت شلون كانت ..

صغيرة بلا ام ولا اب .. شفت نفسي بيها اثنينا كنا محتاجين بعض .. ربيتها هي عوضتني واني عوضتها احسها شريكتي بالقدر ..

الطفله الي ربيتها بنتي وبكري اعتبرها .. اليوم هي شابة ودكتورة .. كم سنه واشوفها واگفة بصيدليتها ..
عيوني غرغرت بالدموع واني اتذكر ذيج الايام ..

باوعتلي ابتسمتلي .. حست بيه وفهمتني من عيوني ..
اتقربت مني وحضنتني ..
" ماما احبج "

حضنتها " يا روح امج انت "

گامت تبوس بأخوتها ..وخالة تخاف عليهم تكلها مو هيج لاتضوجيهم ..

ابتسمت .. خالة نفسها الجانت ماتريدني .. دخلت انسانة بحياتي حطمتني ورادت تفرق بيني وبين نسري نفسها هسا الي تگلي انت بنتي .. بناتي مايراعني بكثرج ونفسها هسا الي طايرة ع ولدي وتموت عليهم وتفداهم بروحها .

لو اسراء .. ضحكت ..لسا اتذكر يوم الي خنگني نسر جوة الدرج .. جان متوحش وعصبي .. وهي عبالها بينا شي ..
من يومها كرهتني ونصبت عداوة وياي ..
هسا نفسها من تريد شي من نسر تخابرني اني احجي وياه.
لان دايما مشاكل وي زوجها وممتصافين ..

ع سالفه نسر يگول . " اكبر غلط واحد يتزوج من نفس مهنته .. هو قاضي وهي قاضية شي طبيعي مايتراهمون "

اتنهدت .. ااااا يالسنين بالعجل مريتي علينا .. بس الحلو انه هالسنين غيرتنا للاحسن . صرنا عائلة كبيرة وحلوة ونسر كل اجازة يجي بيها يجمعنا كلنا سوة ويخابر اخواته حتى هنا نفتح فيديو وتعيش الاجواء ويانا ..

خالة والسيد هم يمنا دائما .. نسر يحب السيد كلش ويحترمه وخالة هي وخاله ام نسر متراهمات بالفترة الاخيرة .
حتى بيداء وخاله صديقات حيل ويمكن تخابرها اكثر مما تخابرني ..

اذن اذان المغرب صاحت خالة ..
" يلة گومن صلن واذكرن ربجن "

گمنا للمطبخ اندگت الباب اجة ابو التوصيل جايب العشا الوصيناه عليه ..

طلعت بيداء حاسبته .. اخذوه فرح ودنو يرتبوه خالة گالت لايبرد خلوه من يجي نسر ..

صلينا وكملنا ..
دخلت خليت مكياج ورتبت نفسي شعلت الشموع وطلعت..

صار گبالي نسري وعشقي وفرحتي ..
هستوه داخل رايح جايب مهيمن وحمودي وياه ولد بيداء.

من شفته شهگت .. جان شايل التوأم ويبوس بيهم ..
باوعلي ابتسم .. وعيونه تغازلني وكأنه يريد يلتهمني بنظراته ..

بعده نفس وسامته .. والشيب البشعره زايده وسامة ..
سلمت عليه وبسته عادي استحيت من اخواته ..

سلم ع خالة وباس راسها ودنيا حاضنته مثل الطفله
سلمت ع مهيمن وحمودي ..

بس عيوني تركض وراه مثل الطفلة المشتاقة الابوها
اي هو حبيبي وابوية وكلشي الي بالدنيا ..

صاحت خالة " يلة جهزن العشا بين ما اخوجن يسبح ويبدل "

كح هو وباوعلي " ام دنو عيني جهزي الحمام وملابسي واشرلي اروح للغرفه "

ابتسمت اعرف سوالفه ..
دخل للغرفة وصيت البنات يحضرن الكيك واللفات . والببسي ..
دفعتني عذورة " دروحي احنة نكمل ماتشوفيه يغمز ويرامز عباله مانشوفه "

ضحكت ع حجيها ..
رحت وراه للغرفه لگيته دينزع ملابسه ..
باوعلي ابتسم وسحبني الحضنه ..
" هاي شنو الغرفه تخبل .. هيج مشتاقتلي "

ابتسمت واني اتلمس بوجهة .. " مشتاقة الكلشي بيك "

قرب انفاسه الاذني غمضت . همس " الكلشي الكلشي "

دفعته حيل " نسر صاير كلش مو گلتلك استحي لاتحجي هيج "

رد " شتستحين ماتگليلي اشو محضرتلي الملعب ومجهزته وترديني بس اشوت بي "

عفته ورحت للكنتور اطلعله ملابس سحبني من ظهري وسحب شعري وهمس ..
مشتاق حيل ماتخلينا هنا مانطلع ..

ضحكت " والتوأم يخلوك غير يكسرون الباب هم مامصدگين اجيت "

رد " يلة الليل طويل ملحوگه "

طلعتله ملابس " ديلة اسبح كلها منتظرة "

اخذ تصبيرة وراح يسبح ..
رحت للاستقبال لكيتهن مجهزات كلشي ..

عاطت عذورة " عيني مو جعنا لاحگين ع الغزل "

اشرتلها ع دنو وفرح مااحب يسمعن هيج حجي ..
ضحكت " وج وين خطية تعبان راح يسبح "

اولاده واگفيله بالباب كل شوية يكلوله " يله بابا بساع بساع كمل "

طلع من الحمام مشط وتعطر واجانه..
ابتسمت من شاف الاستقبال .. مهيمن ضاج ..
بطرانات انتن احنة وين وانتن محتفلات.

عاطت بي امه " شفتنا راگصين داگين . هو العراق من ضيم الضيم جبناها حروب وموت ودم من ذاك الوكت الهذا الوكت حقك ماوعيت .. شلون ندفن روحنا فوگ غضب الحكومة علينا "

اشرلها نسر .. مايقبل تعامله هيج دائما يحسسه انه هو رب البيت من بعده وهالشي انطاه ثقة كبيرة ..

رد نسر " عوفونا من سوالفكم خلوا اسودي يطفون الشموع "

شعلنا الشموع والتوأم يگمزون .. مارتاحوا الى ان طفوا الشموع.

وخاله تگلهم گولي يارب ارزق ماما بأخو النا قبل لتطفون الشموع .

هاي كل سنه خالة تتمنى هيج امنية .. اضوج وانقهر لان مو بيدي ..

نسر يباوعلي ويبتسم ويغمزلي .. يدري بيه اضوج ومايحسسني ..
مرات يردها ويگلها " يمة شسوي بيهم عندي دنو واخوتها كافيين الحمد لله والشكر "

احس بي يريد بعد بس مو بيدي يمكن هم ذولي وبعد خلص ماكو غيرهم ..

التهينا بالكيك والاكل والهدايا .. غيداء نطتهم فلوس لان مالحگت تجيبلهم شي .. بس هم شمروهن عليها ماقبلوا ياخذون .
ممعودتهم ع فلوس شيردون نجيبلهم ..

كل الهدايا عندهم بجهة والهدية المنتظرة بجهة ثانية ..

صاروا يسألون عن السيارات ونسر ضاج خطية لان موصي عليهن ومااجن ..
وعدهم باجر ياخذهم يختارون بنفسهم يله اقتنعوا ..

كملنا ونظفنا الاستقبال والمطبخ .. البنات بيومها باتوا يمنا ..
كل اللفات والكيك الزاد خليته المهيمن بحافظات واخذهن الاصدقائه گلوله سهرانين وجعنا ..

طبعا راح بدون علم بيداء بس گال الخاله وراح لو تدري ماخلته .. محمد ما راح وياه بقى نايم ..

قفلت البيبان ودخلت للغرفه نسر يم خالة واسراء يسولفون الظاهر عندها مشكله وي زوجها..

بدلت ورتبت نفسي ..
بقيت گاعدة منتظرة التوأم بالليل ينامون يم خاله بس لان خالة بالاستقبال .. كل شوية جايين يمي ..

دخل نسر باوعلي ابتسم ..
" يلة بابا يله روحي يم بيبي خلوني اشبع من امكم "

طلعهم وسد الباب .. اتقرب مني وهمس ..

محبوبتي ..
دعيني أذوبُ في خمرِ الشّفاهِ والعنق
ولاتجعليني أستفق من سكرتي حتى الغسق

باوعتله وضحكت لان يغازلني بالفصحى .. هو بطبعه يحب يكتب خواطر فصيحة ..

بعدها طلع شوقه الي .. صارلنا هواي مامفترقين هيج
تعودت عليه بالليل ما انام الا وهو يمي ..

صحيت الصبح لگيته يريد يبدل ..
" صباح الخير "

" هلو حبيبتي "

سألته " شنو راح تلتحق ؟"

رد " لا بس اولادج من الصبح كسروا الباب علينا ماسمعتيهم "

رديت " لا ماسمعت "

ضحك " حقج ياب "

شمرته بالمخدة " بطل سوالفك ترى .. "

قاطعني لاعمي كلشي ولاتهدديني مو كافي اطلبج كم سنة حارمتني بيهن "

ضحكت " صارلك سنين ومانسيت "

رد " شتدرين بيه اضيع حقي .. لا طبعا. اخذه مربع منج "

خليته يبدل وكمت سبحت وبدلت .. لكيت التوام منتضرين ..
ريكتهم وي ابوهم وطلعوا ..
سويت ريوگ للبنات .. گعدنا تريگنا كلنا ..

وبعدها راحوا لبيوتهم ..

داسوي غدا والبنات ينظفن ..
خابرني نسر ..
" اكلج شذر دزيتلج الولد بيد قصي .. "

رديت " ليش انت وين ؟"

رد " اني رايح اشوف مهيمن سمعت متصوب "

شهكت " يمة اسم الله "

رد " لاتبينين البيداء ابد لمن اشوف شنو السالفه "

مااعرف شصار بيه .. لااگدر احجي ادري بيها تتخبل .. ولا اگدر ابين ماكو شي وجهي اصفر وايدي ترجف گامت ..

جانت بيداء تخبز برة شلون راح اطلع گدامها اذا اجه قصي وجاب الاولاد ..

دخلت الخالة دتنوم ابن عذورة .. رفعت راسها حست بيه. .

سألت " خير شكو ؟"

سديت الباب وتقربت منها " خالة نسر خابرني احتمال مهيمن متصوب "

ضربت ع وجهة " يايمة وج مات لو متصوب "

رديت " ماادري ماادري بس بيداء شلون .. نسر گال لتگلولها لمن اتأكد وهسا قصي راح يجي يجيب الولد دزهم نسر بيده وخاف يحجي گدامها .. "

صارت تدعي كون مابي شي .. همست ..
" تعاي نيمي الولد انتي .. واني اطلعله " ..

بقيت يم ابن عذورة انوم بي وبالي يمهم شفته نام غطيته وگمت ..

فرح ودنيا فوگ ينظفن بالطابق الفوگ..

اندگت الباب گلبي صار يدك سريع .. بقيت واكفه بالباب اباوع .. لبست خاله حجابها وطلعت ..

بيداء بالممر تخبز .. دگت عليه شباك المطبخ ..

اجيتها .. سألت " هذا قصي شعنده ؟"

رديت " هااا ماادري خاف نسر عنده شغل ودز الولد بيده "

ماطولت وياها خاف تشك بيه لان جسمي كله يرجف ..

اجو كروري وحدوري يسحلون بالسيارات مالاتهم فرحانين ..
تلگيتهم ساعدتهم لان كبار مايگدرون يسحبوها ..
وهم اسمع قصي شنو يگول الخالة ..
لان بقت تحجي وياه بالباب ..

كالها " والله عمة ماادري بس كالوا صار رمي رصاص حي ع المتضاهرين ومايعرفون منو يضرب من غير القناصين يضربون عليهم "

وگف گلبي من سمعت .. " سترك ربي استرنا .. احفظه ورجعه بالسلامة ماناقصنا قهر وحزن ماصدگت حياتنا مستقرة والحمد لله "

دخلت ولدي ودا ادخل صارت عيني بعينها ..
"لعد ماما ليش واگفه ميدخلون جوة "

رديت " مستعجل بس هي دتسأله ع بنته وزوجته حامل بطفل ثاني مادريتي ؟"

ردت " ياصلوات .. اي يمكن ماما گالتلي .. خطية رغد ع الاقل لو يصير عندها "

ماعرفت شأكلها اخترعت سالفه من وحدي ..
دخلتهم اصروا افتحهن .. فتحتهن صعدوا بيهن يسوقون .. نزلن دنيا وفرح يمهم ..

تركتهم ورحت .. دخلت خالة ضايجة..
شافت بيداء كبالها گالتلها " يلة يمة شعندج صارلج ساعه هن خبزات "

ردت " ماادري يمة شو عبالك العجين بي بركه اخبز وبعد "

دخلت خالة للمطبخ.. همستلها " ها خالة بشري "

ردت " ماادري هم قصي مايعرف شي وشلون اتطمن وهاي الغبرة تموت وراه لو صارله شي "

رديت " لا ان شاء الله ماكو شي .. راح ادخل اخابر نسر واشوفه "

دخلت للغرفة اخابر ..
جاوبني بسرعه " ها عيني .. شوفي لاتخوفن بيداء مهيمن مابي شي بس صاحبه متوفي بحضنه ومتخبل وضغطه مرتفع وهسا احنة بالمستشفى "

رديت بخوف " منو من جماعته "

رد " رزاق شريكه بالكوفي .. مضروب بدخانية براسة وساحبه مهيمن الحضنه وهذا باقي يرافس بحضنه لمن مات "

نسر يحجيلي ودموعي تنزل لا اراديا . اوووي عيني الله يساعد امه .. الله يساعد مهيمن هذا مو بس صديق بالنسبة اله اخو يعتبره .. من الجامعه لسا هم سوه ماتفارقوا .. "

سديت الموبايل .. بقيت ابجي ع الشباب الحلوة الراحت .. بيداء تراويني مرات بالفيس شلون ينضربون ويموتون . مااتحمل شحال اهلهم هسا.

دخلت خالة شافتني ابجي .. تخبلت وعاطت ..
عبالها مهيمن شو شصار بي ..

بيداء ستوها مكملة وداخلة للمطبخ سمعتها تصرخ ..
اجت .. اريد اسكتها مااگدر ..
گابلت بيداء وتلطم.. ابنج راح ابنج راح يغبرة ..

بيداء هي سمعت وگعت من طولها ..
ركضت عليها ..
" شبيج خالة خبلتيها مهيمن مابي شي شويه ويجيبه نسر ويجي ليش هيج سويتي وخبلتيها لو مجلوطة لو ميتة ؟؟"

جابن البنات ماي غسلت وجهها وشربتها صحت وگامت تبجي ..

رديت عليها بسرعه " مابي شي والله مابي شي هسا راح يجيبه نسر وتشوفيه "

ردت " لاتكذبين عليه شذر ابني بي شي ؟"

نزل محمد يركض جان نايم ..

" شكو شصاير ؟"

رديت " خابرني خالك .. رزاق صديق مهيمن مستشهد "

ضرب ع گصته " لا بربج .. مايستاهل والله .. انعل ابو هيج حكومة لا بو هيج حياة .. ليش شمسوين شمسوين وننقتل هيج ..اكيد مهيمن متخبل راح ابدل واروحلهم "

صحت بي " خالك مايقبل ..اصلا هو بالمستشفى وي مهيمن واهل رزاق يكملون ويجون "

رد " يامستشفى اروحلهـم "

عاطت بيداء " بعلي لو طلعت الا اكتل روحي .. كافي راح تموتوني ناقصة عمر .. كافي هبطة اخوك بيه "

بقينا منتضرين للظهر يلة رجعوا .. مهيمن عيونه وارمة من البجي .. وكانولة بيده وشحاله ..

تلگته بيداء تبجي حضنته وهو حضنها ويبجي ..
" لج يوم الضربة الي مو اله .. هي جاية عليه بس هو اجه يركض صار گدامي اجت براسة.. لو ماصاير گبالي جان بيه وگعت "

ردت خالة " هذا حد يومه امي .. يبست ورقته بعد "

اشر نسر " خلوه يرتاح وينام ضغطه مفول بي بخت مامجلوط "

ردت بيداء " مو هينة عليه يعتبر اخوه "

رد مهيمن " هو اخوي اخوي وراح مني .. مات جوعان يمة .. يكلي كون هسا صينية مفطح وتجيني الا اكلها كلها من الجوع مامتريگ جان .. تالي راح راح لسا مامصدگ والله "

رد نسر " كافي مو زين عليك ..يخالي شفنا الضيم .. اعزاز هواي راحت گبالنا .. هذا العراق المفروض نتعود عليه ولاتصدگ ينصلح .. من گلتلك خالي التسووه مابي فايدة .. مادام هيج حكومة بي مايتغير شي ماسمعتني وگلتلي ..

" خالي انتعشت جيلك .. خلونا نعيش جيلنا ونغير الماگدرتوا تغيروه "

وتالي ياخالي راحت ضحية هالتغيير شباب مثل الورد ولك والله ابجي دم عليكم بس شبيدنا احنة مامتكاتفين قسمونا المايخافون الله "

ردت خالة " كافي سدوا الموضوع .. وانتي فرح افرشي الاخوج بالاستقبال خلي يرتاح "

ردت بيداء " خلي يتغدا بالاول "

رد مهيمن" مااريد غدا .. رزاق مات جوعان واني اكل مستحيل "

مهيمن انتكس بعد هالحادثة .. حتى اكله قليل ..
رغم مريض بس بعد مادفنوا رزاق ورجعوا .. رجع المكانه ..
ماسمع لا الخاله ولا الامه ..

كالهم لازم ابقى .. اذا جنت وحدي فهالمرة الي والرزاق اتضاهر .. هاي امانته الي ..

تغيرت الاوضاع ودخلت ناس غير ناس بينهم وكم مرة حاولوا يخربون التضاهرات ويقمعوها الخوف زاد على ولدنا والشهداء كثروا ..
ولاحياة لمن تنادي .. خلصت السنة ودخلنا بسنة 2020
هالسنة الي اخذت منا هواي ناس واعزاز واولهم بيبيتي

اطيب شخص عرفته من اهلي بعد خالة سماهر ..
ببداية هالسنة ظهر وباء لعين ..
اسمه كورونا .. بالاول ظهر بالصين ..
وكانت الاصابات قليلة جدا .. بحيث الاغلبية ماانطوه اهمية..

رجعت المدارس ودرسوا وامتحنوا نصف السنة وكملوا ..
لكن بأواخر الامتحانات عطلت المدارس لان ظهرت اصابات بالعراق ..
هنا خفنا .. وخاصة ع اولادي لان مخليتهم بروضه
نسر وصاني ماادزهم بعد ..

لاخر لحظة ماصدگت بهذا الوباء بس حسام اكدلنا انه فعلا اكو اصابات ..
ولان يخاف على عذراء .. طلب منها انه تاخذ اجازة بدون راتب وتگعد بالبيت ..

اول اصابة عندنا صارت هي السيد رجل خالة ..
من سمعنا تخبلنا ..
خابرتني خالة تبجي ..
" وج شذر السيد مصاب "

شهكت " اسم الله منين اجاه "

ردت " ماادري بس يمكن من شريكه جان بإيران واجه ماحجر نفسه وماكال مصاب لمن صاب السيد وياه "

سألتها " وهسا وينه ؟"

ردت " اجت الاسعاف اخذتة وعفروا البيت وطلبوا نحجر نفسنا بالبيت .. بس اني خايفه ع الجهال خاف هم نصابوا"

رديت " منين اجتنا هالمصيبة خالة .. ان شاء الله ماكو شي لاتخافين انت مؤمنه والسيد مؤمن اكيد الله يبعدها عنكم "

سديته ورحت الخالة ابجي " خاله السيد رجل خالة مصاب "

شهكت " بس لاننصاب احنة هم منين اجاهم "

رديت " شنو السالفه خاله منين ننصاب من الموبايل
اشو صارلنا شهر ماشايفيهم من المضاهرات الكورونا بعد وين ننصاب "

صارت تدعيله خاله . نسر من عرف هم ضاج .. وصيته مايختلط بأحد ويلبس كمامة وتعقيم دايما يعقم ..

صارت بيه حاله نفسية بذيج الفترة ..
ليل ونهار اعقم البيت .. حتى المسواك اعقمة يله ادخله للبيت ..

ومن يجي واحد من برة اعقمة من فوگ لجوة ..
اليوم صار بالنسبة النا بسنه .. حظر واخبار سيئة ..

من يكولون اكو اصابات جديدة تصير بينا حالة نفسية ونخاف اكثر ..
بيتنا انقسم نصين .. نص يخاف وماخذ احتياطه
ونص ثاني مثل مهيمن والبنات يكولون هو وين اكو كورونا .. هاي سووها علمود يقمعون المضاهرات ..

وخاله تعيط بيهم من تشوفهم متهاونين بالمرض ..
انقطعنا عن العالم ..
نسر صار مايجي بسبب الحظر..
بيت جدو ماشايفتهم باقيين ع الاتصالات واحد يطمأن ع الثاني..

البشرى الحلوة .. هو لمن خالة خابرت وبشرتني انهم سوو تحليل وكلهم طلع سلبي .. والسيد هم بسبب مناعته القوية تشافئ ..

هنا ارتاحيت وايقنت انه الينصاب ممكن يتشافى ..
گمت اكثرلهم عصير ليمون وبرتقال خبلتهم بي وفيتامينات انطيهم علمود المناعة ..

مااعرف شلون مرت هالايام .. ويوم بعد يوم بعد اسبوع واشهر ..
صارت الناس تتعايش وي المرض ..
واكو مايخافون ويطلعون عادي ..واحنة لا اعياد ولا مناسبات نطلع بعدني خايفه ع ولدي وعائلتي ..

من يطلع نسر اتعارك وياه ..
وخاصة حسام وعذورة يداومون بالمستشفى فأخاف لاينصابون ..

بسبب الحظر ..
زادت مشاكل اسراء وي زوجها .. واخر شي تركته واجتنا ..

نسر ماقبل ع تصرفها .
" بلة ماتستحين عندج اثنين اطفال منه وتتركيه "

ردت " ماياخذ كلامي كم شكوى تجيني ع شغله والصراحة صرت استحي ابررله "

رد " وانت شعليج هو شغله واعرف بي تقبلين واحد يتدخل بقضاياج "

ردت " اني مو مثله مااغلط "

عاط بيها " شنو ماتغلطين نبي انتي .. لاتخلين داء العظمة يسيطر عليج وتخسرين رجال يحترمج ويقدرج ولاتنسين هو الشجعج وخلاج تصيرين قاضيه تالي تتكبرين عليه "

ردت " صرت بتعبي وشهادتي مو هو السواني "

عاط بيها " انتي تعبتيني وماتاخذين حجي . بس يجي رجلج ترجعين وياه وتبطلين تتدخلين بشغله هو قاضي قبلج ويعرف مو انتي التعلميه من زمان يكلي حاجيها لاتتدخل بشغلي "

ردت " يعني يشكيلك عني مووو بسيطة "

ضاج نسر وگام " لا الصراحة انت ماتنحملين وزين منه حملج كل هاي السنين وخلف منج طفلين "

ردت " انتو مجتمع ذكوري لان رجال تدافعله "

صفگ ايده وهز راسه " لاحول ولاقوة الا بالله .. اروح ارتاح احسن . يلة شذر امشينا "

گمت وراه للغرفه ..
" لاتتعصب هي هاي اسراء قابل جديدة عليك "

رد " لا شذر مو هيج ماكو رجال يقبل مرته تتدخل بشغله وتريد تسيطر عليه "

رديت " يعني هو قاضي وهي قاضيه شتتوقع يتراهمون "

هز راسه " اعرفهم مايتراهمون ومايستمرون اذا بقت اختي بهيج عقلية "

رديت " الضحية اولادهم .. اكبر غلط سوت واحد بعد الثاني .. اتذكرها ماجانت رايدة احمد بس هو اصر تجيبه وهم تعاركوا وبعدها اتفقوا بس هالطفل .. ااااه اكو ناس تتمنى هالنعمه "

حضني " الحمد لله الله ناطينا اثنين طيور وزهرة بينهم بعد شنريد ؟"

رديت " الحمد لله ناطينا وزايد هم "

اخذني الحضنه واكيد مايبطل سوالفه .. حضنه بالنسبة الي ملاذ امن ارمي بي كل همومي وافكاري وانام بسلام ..

بعز نومتنا وفزيت ..
" نسر انت اليوم عقمت لو لا من رجعت من برة "

ضحك " انت صار بيج وهواس مال تعقيم ..والله دخلت للحمام وعقمت بعد شتردين "

ابتسمت " غير علمودك وعلمود ولدنا وخاله هم ماعندها مناعه "

رد " طبعا حبيبتي اذا مااخاف ع نفسي اخاف عليكم وخاصه انت سكر ومناعتج قليلة .."

بقت اسراء عندنا كم .. وبعدها اجه زوجها يحجي وي نسر يرجعها ..
وصار واحد يرفع وواحد يكبس وعبالك گاعدين بمحكمة ..
اخر شي گالتله .." بعد مالي عيشة وياك طلگني "

هو تعصب وگالها " اني هم مليت صار سنين متحمل مشاكلج واكول لا مركزي ولاسمعتي تسمحلي افضح نفس واطلگ .. بس مادام انت رايدة خلص نتطلگ بس الجهال عندي ."

ردت " تحلم ولدي عندي ومستحيل تاخذهم مني "

عاط بيهم نسر " انتو شنو ماتحترمون ناس بينكم واكفه وين انتو بمحكمة .. طلكتوا وحكمتوا بالحضانه بكيفكم . هاي انتو الدارسين والفاهمين هيج تفكرون ..لاعتب ع الجهلة .. انت روح وخليها فترة هنا وفكروا زين باولادكم قبل نفسكم .. ولاتاخذون قرار تندمون عليه "

زوجها طلع وهي بعد مارزلها نسر سكتت ..بس ماقبلت ترجع وبقت يمنا فترة طويله ..

بهالفترة سحر وارشد هم متعاركين وبينهم مشاكل وع اساس متجاوزة ع مرت عمو علاء .. ومرت عمو مخيرتهم لو هي لو سحر بالبيت ..

وهالفرصة سحر تتمناها من زمان .. انه تعزل ببيت وحدها ..
طلب ارشد مهلة من اهلة بين مايرتب اموره ويطلعون
وخابرت اني سحر رغم اعرف ردها بارد وياي ووصيتها تعقل بس اعرفها متاخذ بنصيحتي حجتها انه مرت عمو تتعارك وياها وتعيرها بالخلفة ..

بيداء قررت تخطب المهيمن .. بس مهيمن قافل وماقبل يتزوج .. رغم جنت متمنيه تكون سمر من نصيبه ..

بس من سمعته مرة يكول الامه يريد دنيا .. استغربت
دنيا اصغر منه بهواي .. واصلا تعتبره مثل اخوها حتى حجاب ما تلبس منه ..

شلون وشوكت هيج مهيمن انعجب بيها .. صح احبه واحترمه مثل اخوي بس دنيا تختلف . دنيا اريدها تختار بقناعتها وبرضاها ..

الغريب انه بيداء ماحجت ابد بالموضوع ولافتحته ..
اني هم سكتت ..
صارت گبالي .. دنو حاولت اعرف رأيها ..

خليتها گبالي وحجيت ..
" ماما دنو شنو رأيج بمهيمن "

ردت " شبي ماما من ناحية شنو ؟"

رديت بتوتر مااريد افتح عينها .. " يعني مثلا اذا واحد خطبج بعمر مهيمن تقبلين "

ابتسمت " ماما شبيج متوترة وتستحين تحجين .. اني عمري حيصير 21 سنة .. يعني افهم شنو قصدج مو صغيرة اني كبرت .. بس من كبرت شلت وياي تربيتي الربتيها الي لحد هاليوم .. من اتصرف اي تصرف يصير كلامج گبالي .. علمتيني اكون صديقه الج قبل لا تكونين ام الي .. "

استغربت وفرحت بنفس الوقت " هاي شوكت كبرتي "

ضحكت " اووووه من زمان بس انت عبالج بعدني ذيج دنو التعرفيها "

اخذتها الحضني وبوستها .. همستلي " ماما مهيمن دز فرح الي "

باوعتلها بأستغراب .. " شگالتلج ؟"

ردت " يريد يخطبني منكم "

اخذت نفس وباوعتلها بتساؤل . جاوبتني من غير مااسأل ..
" شوفي ماما .. من صغري واني اعتبر مهيمن اخوي. الجبير . وحمودي وفرح نفس الشي .. ابد مايوم اعتبرتهم غير شي .. لدرجة من گالتلي فرح صرت اضحك واكلها دا يتشاقه . لان مستحيل اشوفه غير اخو الي .. ماما اني حاليا دراستي اهم من الزواج بس بيوم الي اكبر واحس نفسي مستعدة الهيج خطوة اكيد مو مهيمن الاختاره "

حضنتها واني مفتخرة بكلامها .. بودي اعيط " هاي بنتي .. اني كبرتها وربيتها "

اعتراضي ع مهيمن مو فقط ع العمر مااني نسر اكبر مني بهواي .. ولا ع الشهادة لان هي دكتورة .. بس بنتي واعرفها .. دايما تتمنى تاخذ شخص مثل ابوها يحبها ويدللها .. ولان هم متربين سوة مستحيل راح تنظرله او ينظرلها بنفس نظراتنا اني ونسر ..

مهيمن بعد مااخذ جوابه من فرح بخصوص دنيا ..
ما دخل احد بينا ولا امه حجت .. رغم عرفت هي ماقابله من البداية وگايلتله اريد بنت كبيرة وواعيه الك يمكن كلنا مانريد نصدگ انه دنو وفرح خلص كبروا ..

بعد اشهر ..
خابرت سمر تبجي .." شذر بيبي وجدو انصابوا .. واعتبرونا كلنا ملامسين واخذوهم للحجر "

صرت الطم وابجي " بيبي وين وشلون انصابت "

ردت " من جدو "

هنا گلبي انقبض وحسيت راح نخسر واحد منهم ..
جدو رغم عمرة كبير بس قوي مو مثل بيبي بنيتها ضعيفة واي مرض يهدها ..
بشهر التاسع من نفس السنة بيبي توفت ..

بيومها الخبر مثل الفاجعة كان النا ..
ابد ماطالعه من كورونا لسا .. ورغم محجورين وعندهم اصابات بس مااتحملت گلتله النسر لازم اروح ..

خالة عارضت " يمة بيبيتج ماتت بكورونا وين رايحة فكري بولدج "

نسر هم ماقبل اروح وكال هم اصلا ما يسوون فاتحة ..
انتظرت اسبوعين وبعد مااتحملت رحت الهم ..

شفت البيت كله حزين ..
مكانها فارغ ..
وين ذيج الجانت تهلهل وتمرحب بية من تشوفني ادخل للبيت ..
جانت زهرة البيت هي وهسا البيت ذبلان بغيابها ..
جدو ينبجي ع حاله .. مكابل صورتها ويبجي مثل الطفل المفارگ امه ..

خلصوا عمرهم سوه ابد ماافترقوا . مثل عصافير الحب
دخلتله اخذت من خاطره مايقبل واحد يتقربله يخاف علينا ..

باوعلي بجة " راح بيبيتج شذرة اني اموت ماابقى بعدها اموت .. لو ميت اني وهي عايشة "

مااتحملت رحت حضنته .. خلي شيصير يصير .. انعل ابو الوكت الي خلانا مانحضن احبابنا بسبب وباء ..

اني ابجي وهو يبجي واجت سمر هم حضنتنا ونبجي سوة ..

دخل خالو علاء .. " قنعنه خل ياكل مايقبل ياكل وهو هستوة طايب ولازم يتقوة "

جبت الاكل واكلته بيدي ..
ضعفان حيل ومتغير .. من رجعت النسر بس ابجي اگله نسر يبجي عليها ويتمنى الموت ..
هم تبجي عليه اذا متت هيج ..

حضني " لاتكولين هيج عمري قبل عمرج ليش نسر شنو بدون شذر .. لج عمري بدأ من يوم الدخلتي الحياتي "

رديت " اني العمري بدأ من يوم الشفتك بالكراج شلون تخوف انت وشواربك وتشرب جاي وتباوعلي بطرف عينك "

راد يضحكني " بيومها گلت خرب اهلج هيج جمال يكتل وطالعه بالفجر وبالكراج "

دفعته .. " اصلا جذاب جنت تكرهني "

رد " مستحيل .. قدرنا نكتب بهاليوم وبذرة حبنه انزرعت بهاليوم شلون اكرهج .. بس گولي جنت مااثق رغم ماهان عليه اشوفج بوسط الزلم واعوفج وحدج "

بقينا نسترجع ايامنا قبل .. لحظات نضحك بيها ولحظات نحزن بيها .. ولحظات من نذكر عمة. وسوالفها نبجي وندعيلها بالرحمة مااتذكر يوم نسيتها اصلا حتى اتذكرها.. جانت اكثر انسانه تركت اثر طيب بداخلي هي

طبعا خالة خافت لان رحت البيت جدو ماخلتني اتقرب للاولاد تخاف عليهم وصتني احجر نفسي ..

اضحك ع سوالفها وهي من صدك تحجي .. وحجرتنا اني ونسر بالغرفه .. رغم كلشي مابينا بس نسر فرح ولكاها فرصه ..
اخذ اجازة وگابلني .. رغم حزني ع بيبيتي بس وجوده يمي خفف عني وطبعا خلانا نسترجع ايامنا قبل ..

كل يوم اخابر سمر واسأل عن جدو .. طمنتني عليه احسن شوية ..
بس جيت ماما الهم ازمت وضعه بعد ماگالت المرت عمو عامر انه هي متزوجة زوجها ..
مرت عمو عامر تخبلت ورادت تحرگ نفسها من سمعت
سنين وهالسر ماطلع .. شلون امن عمو عامر وخله ماما تطلع ماندري ..

سمر تگلي ماما حيل ضعفانه وكبرانه ومو نفس شكلها قبل ..
بعدها جدو قرر انه عمو عامر يطلكها الماما وتعيش وي ارشد وسحر ببيتهم الجديد ..
وفعلا كانت هاي خطة سحر هي وماما من البداية ..
كنت حاسة ماما مجبورة لان اعرفها رغم كل مساوئها الا انه هي تحب بابا حيل ومستحيل تحب عمو عامر وتستقر وياه .. رغم معذبها هواي وياه ومعتبرها سجينه عنده ..

استقر بيت جدو ورجعت مرت عمو عامر . بس بقت متخوفة من ماما .. وصارت تضايق سمر . سمر البقت وحيدة بينهم .. جانت بيبي تدافعلها وبيبي راحت ..

كم مرة حجيت وياها تجي يمي او يم خاله بس ماقبلت الاجل جدو تكول خطية يبقئ وحده ..

دايما ادعيلها يجيها نصيب زين يطلعها من القوقعة الحبست نفسها داخلها ..
حجيت وياها وقنعتها بس تخلص ازمة كورونا اطلعها للخارج واسويلها عملية الوجهها وشبه اقتنعت ..

اسراء تطلكت بعد زعل اشهر ابد ماتراهموا ولا ارتاحوا
ويمكن هالحل انسب الهم رغم كلنا نتمنى انه بيوم يراجعون حساباتهم ويرجعون الاجل اولادهم بعدهم صغار ..

اني شهرين مريضه مااعرف شبيه .. بين فترة وفترة يهبط السكر .. وعندي خربطة بالهرمونات ..
هالسنة وبشهر 11 عيد ميلاد التوأم .. ذيج السنة صادفت مضاهرات وسويناه بينا ..

هالمرة كورونا ونخاف .. هم سويناها بينا داخل البيت
لليل بعد ماكملت الهوسة والتنظيف ..

حسيت بدوخة وتعب .. باوعتلي عذورة وسألت
" اشو وجهج اصفر ومتغيرة خاف سكرج "

رديت " لا مابي شي بس هالفترة تلعب نفسي حيل ومدري شبيه يمكن من العلاج "

ردت " خاف حامل "

صفنت بوجهها وضحكت .. لا يمعودة گولي غيرها هو اني هيج دائما بسبب خربطة الهرمونات .. والعلاج قوي مااتحمل "

سكتت ومااهتميت ..
بس بعدين لاحظت نفسي فعلا حالتي مو طبيعية
طلعت التقويم بالموبايل ودااحسب ..
دخل نسر للغرفه شافني. .

شتحسبين ..
رديت " لا هيج شغله شاكه بيها "

سأل " شنو ؟"

رديت " لمن اتأكد يلة اگلك ؟"

رد " وشلون انام اذا مااعرف لاتقلقيني "

بعد الحاحه .. عدلت كعدت كباله وعيونه بعيوني يريد يعرف مااتحملت ضحكت.

" لاتباوعلي هيج مااكدر احجي "

حسيته ضاج " احجي ليش هيج تسوين بيه قلقتيني "

رديت " مو مااريد انطيك امل وتالي ماكو شي ونتفشل"

رد " حامل "

ابتسمت " يمكن "

صفن بوجهي " شنو يمكن "

رديت " يعني اعراض حمل ونفسها الحسيتها بكروري وحدوري .. بس خايفه ماكو شي يطلع "

رد" وشلون نتأكد "

رديت " هسا لو اكو صيدلية قريبة جان جبنا تحليل منزلي .. "

بعدني ماكملت ركض بدل وطلع .. طلعت وراه ماسمعني ..

طلعت خاله " شكو ؟"

رديت " هااا ماكو شي طلع نسر يجيب جكاير ماعندة "

هزت ايديها " بله طالع بنص الليل علمود جكاير "

بقيت منتضرة برة .. لمن اجه ..
صرت احجي لان طلع .. لزم ايدي خله بيها التحليل
" يله حبيبتي سويه بسرعه واني منتظرج ."

كمت اضحك عليه وبداخلي خايفه وادعي كون مااتفشل صح يكول مااريد .. بس الفرحة واللهفة الشفتها بعيونه خلتني اخاف يخيب امله ..

اخذته ودخلت للحمام كملت وطلعت ..
صار يباوعله وياي .. صار خطين باوعلي واني مصدومة وصافنة.. خطين واضحات حيل ..
باوعلي .. " يعني شنو ؟"

رديت بصدمة " يعني حامل"

حضني وعيونه تدمع ..
ركض الامه بشرها. بدقايق البيت كله عرف ..
كلها تبجي من الفرحة .. ودنو تكول هالمرة معليه اريد بنية .. ونسميها ملاك ..

ابتسمت .. ان شاء الله وهيج نتذكر ملوكة .. لسا مانسيناها ونذكرها بدعائنا وثوابنا رغم هي طير من الجنه ..

كل هذا واني ماصدگت لمن سويت تحليل وسونار ..
والسونار .. گالي الج شهرين استغربت . شهرين واني ماادري جنت شاكه بس اخاف اصدگ ..
واخذ علاجات وماادري بنفسي .. بس ان شاء الله مثل مانطانياه يحفظلياه ..

بيومها نسر سوة عشا الوجه الله وجمع اهلة وبيت عمه واجت خالة والسيد .. طبعا ليث عرفنا بي خاطب . وقصي حيجيه طفل ثاني من زوجته الثانية ورغد هي المربيه بنت ضرتها وعلاقتهن زينة ..

بيومها سوينا فيديو وي هنا وفرحتلنا من سمعت والاولاد حجوا وي بيت جدهم ..

كلها فرحانة الا فرحة نسر كانت مختلفه .. الناس كلها تحجي وتضحك وهو يباوعلي بحب نظرات يسترجع بيها كل ذكرياتنا مع بعض واحلامنا ومستقبلنا ..
احس كلما يكبر يكبر حبنا ويانا ..

كان هذا الخبر هو اجمل خبر الي بسنة 2020 .. هالسنة اخذت مني ناس اعزاز ونطتني روح ثانية ببطني ..
اتمنئ انه تولد بنتي بالسلامة . لاتستغربون حاستها بنية وان شاء الله تطلع بنية ادعولي تجي بتمام الصحة والعافية ..
وشكرا الكم لان رافقتونا بجميع محطات حياتنا بفرحها وحزنها .. في امان الله وربي يبعد هالغمة عن هالامة ان شاء الله..
النهاية ..
#شمس السعدي..

https://www.youtube.com/watch?v=CCl-ktI7fPA