رواية قسور والمهره شامه الفصل الحادي والعشرون 21 - بقلم أسيل

#شامه

رجعت لبغداد عشت كأبه مو طبيعيه بقيت اسبوع بغرفتي اكل واشرب وكلشي اسوي بغرفتي لأول مره بحياتي افكر انتحر حاولت الصراحه هل شي بس ابويه لحك عليه زعل مني بقه يبجي من كعدت ضربني راشدي اول ما فتحت عيني واذكر هل كلمات منه من كال الي (لا تحركين قلبي) بجيت هواي يومها هاي مو اني اسوي هيج براء صديقتي عرفت يومها واجتي تبجي وخنكتني اما غيداء من لحكت الي وسوت الي غسيل معده من فاتت وشافتني ابجي وحاضنه بابا بعدتني وضربتني راشدي هي الثانيه جانت منهاره وتبجي ورجعت حضنتني واستني وبقت تبوس بيه اعرف غلط الي سويته عرفت اجه قسور من جنت غايبه عن الوعي وراح تمنيت اشوفه.. رجعت للبيت وره ما تحسنت وحلفت لبابا وغيداء ما ارجع اسوي هل شي كعدت فتحت اللابتوب مالتي بقيت كاعده اكلب هامله ايملي صار سنه فقررت اصفي الحساب مالتي وبديت اكلب حسيت بنعس وكمت امسح عشوائي استغربت هذا إيميل جايتني رساله منه من زمان من قبل 9 اشهر فتحتها وبديت اقره الساعه جانت ب2 بالليل مكتوب بيها

"شامه اكيد راح تستغربين منو الي يراسلج على حسابج الشخصي.. اني كوثر اعرف صرتي الضحيه بسببي وبسبب خوفي من حجي الناس ما كدرت احجي شي ولا كدرت ابقيج يمه ما اعرف شنو الي اسوي صدكيني الوجع الي بيه ما أكدر اوصفه.. واعرف راح تلومين حسام.. بس ما كدرت اخلي احد يعرف مستحيه من كل الناس وآني ما الي ذنب.. انا حرمتج من أكثر إنسان حبيتيه شون راح تكدرين تبقين ويه شخص غيره بسببي.. اسفه لان صرتي ضحيه انانيتي بس انا الي طلبت من حسام وقسور ما يحجون لاحد حته الج انا حلفتهم بيوم ليصير شي وآحد يعرف راح انتحر ما أكدر اتحمل هل عار شامه اعتدو عليه كبال امي ما تكدر تتحرك ولا شي بس تبجي و مجنت أكدر اشوف وجهة يصور بيه و عدي يعتدي علي وكال نفضحج بس يطلع صوت الج... و وره وفاة امي وانتحار عدي دز الي واحد اسمه مودي رساله يكلي يريد ينام وياي لا يفضحني ودزلي مقطع الفديو الي بيه انا وعدي ما كدرت اتحمل لهذا جان قراري اروح من هل دنيا وارتاح احسن ما اجلب العار لهلي والناس التحبني انتي وقسور وحسام خاله صبيحه كلكم جنتو اهلي انتي جنتي مثل اختي لا تنسيني وادعي الله يسامحني بس هل دنيا ما تناسبني بعد و قسور وحسام وكفو الي وماقصرو بشي بس انا ما أكدر قسور راد يكتله لعدي بس انا ما رضيت يصير بيج شي وما اسامح نفسي ما شفت منج بس الخير ما أكدر اخلي الناس تجيب سيرتج وكال الي يومها من عرف راح يخلي عدي يطلكج ما تبقين يمه وبيوم الي راح يحررج من عدي سمعت بيه انتحر وتحررتي منه شامه قسور يعبد التراب الي تمشين بيه وبعدها امي ماتت وانا ما الي احد بهل دنية امنتج امانه يم قسور ما يتركج وانا الي حلفت حسام ما يحجي لأحد حته لا اصير علج بحلك الوادم وهم ما يرحمون ابريني الذمه لان عيشتج بكل هل حزن وما صرتي لقسور اول شي وهسه راح ارتاح وما تبقه بس الذكره الحلوة عني سلميلي على البنات "

يومها بجيت بحركه بحيث مكدرت احجي ولا اطلع صوت و كتها بقيت اسبوع بالفراش ما أكدر ولا أريد اكوم حاولت اتصل اكثر من من مره بقسور أريده يمي بس كالت الي غيداء يومها طردته من اجه الي للمستشفى ما اريد ارجع واسود عيشته اني شسويت بنفسي وبالكل حاولت ارجع علاقتي ويه بابا بالبدايه وراها بديت ويه حسام من يجي نسولف وجايب الي مصروف من قسور اخذ الفلوس واضمهم ما اطخ فلس ابيض منهم ما أكدر ارجعهم اعرف راح يجبرني ويجبر اهلي ضميت الفلوس كلها بصندوك بديت اشتغل بمكتبه من الساعه ٢ الضهر لحد ال ٧ براتب شويه زين بس شايله مصرفي من بابا وهو ما مقصر بس اني بعد ما أكدر اذب حملي عليه مرات اروح اشوف غيداء و الوليد مسميته فنجس تتخبل بس اصيح اله فنجس اما قسور متابعته جنت على حسابه يوميه ساعه ٩ ينشر جاي على المكتب مالته ب الغرفه مالتنه وهاي يختم يومه بيها واني يوميه بنفس الوكت بالفراش ساعه ٩ انشر صوره كوب حليب واختم بيها يومي مرت سنتين مثل جهنم حياتي صارت مرتين اجه قسور يريد يحجي ويايه ما قبلت طلعت من البيت لحد ما يرجع لبيتهم يله ارجع أخاف اواجهة عنادي الي خله الي ابطني يموت جنت احس بوجع وعاندت ما اروح طبيب وما انتبه على اكلي لو محافظه عليه جان عمره هسه سنتين خفت عيني تصير بعين قسور واشوف بيها نضرات عتاب لان موتت الطفل اني بس يومها والله جنت ناويه ابدي من جديد ما اذكر الي صار كلشي مخربط ما اذكر بس اني بالكاع شون وكعت وعثرت ما اعرف عايشه بس بالأسم حته محد كام يجيب سيرته كبالي يخافون اسوي شي...
بديت ادرس ماجستير وره ما تخرجت الكل يعرف بيه متزوجه لهذا محد يتقرب مني مخلصتها شغل مرات ارسم لو اقره جانت السنتين الي راحت مابيها شي ينذكر لان جانت مرة كلش مره...
صارت عندي امتحانات وشويه هواااي ضغوط شغل من ازعاج الطلاب ومتطلبات الاساتذه وكذلك مرضي... اي مرضي صار عندي سكر يومها من عرف ابويه توجه للقبله مال صلاه وكال

بابا:اللهم إني أعوذ بك من جهد البلاء ودرك الشقاء وسوء القضاء وشماتة الأعداء، اللهم إني أعوذ بك من زوال نعمتك وتحول عافيتك، وفجأة نقمتك وجميع سخطتك، لا إله إلا أنت سبحانك إني كنت من الظالمين

هذاء الدعاء بس بالمصائب بابا يدعيه وكعد على السجاده وكال وهو يبجي

بابا :أريدك تاخذ عمري إذا يصير شي بوحده من بناتي اخذ عافيتي وديرها بعافيتها

يومها بجيت بجي اتصلت بقسور أريده يمي اريد اسمع صوته بس سمعت صوتها وسديته للتليفون اتصلت بحسام وكتله يجي كامت الدنيا والبيت يخنكني وكتها اجه اخذني كعدنه بحديقة للفجر كاعده لا احجي ولا شي بس ابجي ما أكدر احجي والله ثكلن كلها عليه لا أكدر احجي واكله كوثر هيج حجت ودزت الي ولا أكدر اكله احتاج قسور الي هواي ضوجته وهنته بقه ساكت لحد ما فرغت الي بقلبي بالبجي وهاي كل مره افوت مستشفى لان يا هامله الاكل يا مساعد السكر واني بهل عمر صار بيه سكر وحته احتمال بعد احلم يصير عندي جهال افكر بكل هل مواقف بسبب الضغوطات الي امر بيها وباجر عندي امتحانات حسيت بخنكه مو طبيعيه طلعت بره الجو ثلج جان صورت ونشرت الصوره ستوري جان القمر وغيوم وطرف شجرتنه ما اعرف بس احس السمه تريح قلبي وكتبت بيها

"يا الله انت العليم بما في القلب من وجع.. إلهي انت الرحيم بضعف لست اقواه"

جانت الساعه ب ٤ ونص وعندي امتحان ما كدرت حته اقره للأمتحان  نشرت الصوره وره عشر ثواني صار عندي فضول منو شافها اول شي وجان قسور اول واحد شاف الستوري مالتي نصدمت الصراحه كاعد بهل وقت وره اقل من دقيقه نزل صوره كاعد مبين بيت المزرعه والجكاره بيده وكاتب

" لم أعد اعلم كيف لي أن أحميكِ.. لكنني استودعك الله بكل حين وثانيه"

"نامي بنيتي "

بجيت ومكدرت حتى انام كلشي بيه وجعني مشتاقه اله اكو بغصه بقلبي ما اعرف شنو بسبب غصه قلبي من الي كتبه لو تعليق زينب الي طيحت بيه حظها ومسحته كاتبه الي وكتها ها وين رجلج بهل صوره كولي هم مسافر تره ما نحسد الشيخ

كرهت نفسي الساعه صارت ب السبعه الصبح كمت لبست جينز و سويتر ابيض و وياه حجاب سمائي اني اشمر الحجاب على راسي ما كدرت بعد انزعه من تعودت عليه حته اذا شعري مبين هاي بعد صار على راسي وتعودت عليه وبوتين ابيض وجنطه سمائيه عدلت وجهي شون مكان شربت كهوة بابا جان بعده نايم حظرت الريوك اله وطلعت من البيت اجرت تكسي ونزلت اباب الكليه سلمت على كروبي امتحنت وسلمت البحوث وكعدنه ب الحديقه مال جامعه بالكاع يسولفون وكبالي براء صديقتي المقربه كلش حبابه يتيمه عايشه ويه خالتها الي احبها واموت عليها براء محجبه وطويله وحجابها كلش مرتب وحلو بيضه عيون صفر ومكياجها نازك كلش فكالت زينب

زينب :شبيج ما تتحملين شقه

_كتلج عيب هل اسلوب

عبدالله :تره كل الي طلبناه نشوف رجلج كولي مطلقه وانتهى الموضوع

براء:تره شوفتكم الصور شهل ملحه كومي ورانه مشروع وشغلج هم

احمد:ديله هسه عاد الشيخ الخفي راح يقبل مرته تشتغل الهمجي كتلج انا متوفر واموت على المطلقات

_اكولك ليش ما تحترم نفسك لا ادوسك بالقندره على هذا حجيك ثاني مره اذا جبت سيره رجلي امسح الكليه بيك هو انت اوصل لذره من رجولته يله تحجي و لا تنسه اني رجلي يسواك ويسوه عشره منك

فور قلبي كمت بسرعه الدموع ترست عيني التفت بسرعه نضربت بواحد ونسحبت لحضنه العطر و والصدر العريض دفو ايده ايدي وجسمي كله رجف رفعت راسي هذا.. هذا قسو.. ر.... وكلت بفهاوة

_ق.. قسور

قسور: ها حبيبي ليش معصبه

باس كصتي وحضني لصدره مصدومه بشوفته طوله ولحيته شعره المرتب لبسه الكاجول اناقته مكدرت ابقه على حيلي واكفه ارتخيت بحضنه بس شالني غمضت عيني وما حسيت بشي بعدها

🖤🖤🖤🖤🖤🖤🖤🖤🖤🖤🖤🖤🖤🖤🖤🖤🖤

هلا هلا شلونكم اكيد ما مشتاقين الي 😂

وهذا البارت عيديه الكم

حاولت قدر الامكان اسوي لطيف لان عيد وهل سوالف 😂😂😂

ويله شوفوني همتكم ب التصويت 😌 حته اكمل الكم 💕