رواية كسرة قلب الفصل الحادي والعشرون 21 - بقلم نور الشمس

..فهد شني السالفه احچي صگر شبي صگر لو كرم نسيت كلشي وصرت ارجف عيني بعينه حمره دم مركز ع الطريق وباله مو وياي ولا وي الطريق باله بعيد
كررت سؤالي

..فهد ياهو صگر لو كرم شبيهم حاچيني فدوه

..كرم السايق مالته مسوي حادث وكرم وياه راجعين من الدوام 

..لطمت وجهي يمه ابني اصخام الصخمني يمه كرم بيه ولابيك ريت الوجع بيه بس كونك سالم بعد امك

..شيخه على اعصابي جاي اسوق اسكتي ولاتخردليني

..شسكت شسكت شلون اسكت

..سكتي الدنيا مكلوبه بالمستشفى كلها رايحه گبلي انطب انه وياچ صوتچ مااريد اسمعه ولاتبچين اتشائم من البجي بس اسكتي خل افهم
رجع خابر محمد گله لاتخاف عايش والله وجاي يحاجي الطبيب ويكله شني اليوجعه
من سمعته جريت نفس وضليت ادعي ربي
وفهد يردد الف الحمدلله الف الحمدلله المهم عايش كلشي سهل
وصلنه المستشفى نزل فهد يمشي بسرعته مشيت وراه هوه طلع يم الزلم الدنيا مگلوبه بحديقة المستشفى وانه تلگني سعاد ورباب من شفتهن گعدت گعده وشبعت بچي حته وفاء اجت من بعيد الظاهر متلگيه فهد تحاچي
كلهن بچن وياي يبوسني حته اهدأ كالن زين زين هسه يدخلوو عمليات
لطمت وجهي عمليات يمه ابني ليش

سعاد..خيه گولي الحمدلله عايش شايفه سيارتهم شصايره مدري شلون طلعوو منها

بجيت واحس راسي يريد ينفجر
گمت مااشوف بعيني عيوني افتحها بثگل

..سألتني رباب انتم وين جنتوو احمد رجل وفاء راحلكم للبيت يگلكم لگه بس خالتي وماگال الها وصينه محد يگلها
اشرتلها مااگدر احچي گامت روحي تلعب گمت شويه عنهن اكو سطل زبل تقيأت بي
سعاد گالت بعدچ انتي شبيچ هيج ماكدرت اگلهن حامل مو وكتها وحته عيب وهم مالي خلگ كلشي ياحمل ياروحي لو اني ولا كرم سوده عليه خامس علمي وامتحانات مهمه عنده يريد يطلع اعفاء
بچيت بصوت عالي يمه كرم اروحلك فدوه العاقل الثگيل مايوم عليت حسك علي ولا يوم گابلت ابوك وعاندت يمه فرحة  ابوك انت صگر يمه وينك تعال شوف حالي يصبرن عليه ويبجن وياي
ساعات مااتمناها الأي بشر من احس روحي تفرفح ابني بين الحيا والموت وحته شوف مااگدر اشوفه
سمعت فهد صاح على خواته گلهن طببنها جوه حجزنه ع الخاص بنفس المستشفى بي قسم حكومي وقسم خاص
گاللي گومي افتح عيوني بثگل گمت حسيت الدنيا افترت بيه والمكان اظلم اسمع اصواتهم بعيده ماوعيت الا وانه ع السرير مشكليلي مغذي فتحت عيوني بثگل شفت سعاد واگفه يم رجليني وفهد واگف يم راسي خله ايده على راسي يمكن يشوف حرارتي
.لحظات واتذكرت انه وين وليش دموعي بدت تنزل وشهگات مكتومه بصدري علت سألتهم فدوه شلونه كرم شلونه
حاجاني فهد عيونه ذبلانه يدعي القوه بس مبيين خايف
..شيخه صيري سباعيه كرم ماعليه لاتخافين بعده بالعمليات ضغطچ هواي نزل خواتي وديتهن يم امي لاتتخربط محد يمها وخاف تسمع وانتي بس تصيرين زينه اطلعي للبيت ارتاحي وريحي بالي عليچ شدهتيني ماادري المن اصير لااگدر اعوفه ولااگدر اعوفچ

..لا فدوه ابقه هنا لمن اشوفه يلله

..سهله سهله خل يطلع وتشوفينه والله بس بعدها ترحين ولدچ بحاجتچ وانتي تعبانه هم

..هزيت راسي
ماادري شگد طولت يلله صحيت ولاادري العمليه شگد صارلها معقوله اكثر من تلث ساعات
شويه واجت سعاد مبارك خيه نجحت عمليته
گمت الحيلي فدوه اروحلك ربي
طلعت بالممر الدنيا مگلوبه زلم بيهم اعرفهم وبيهم ماشايفتهم
اجاني فهد من بعيد ووراه محمد

.شيخه روحي للبيت مايخلون احد يشوفه

..لا مااگدر فدوه فهد فدوه اروحلك بس اشوفه حته لو من بعيد
تنهد وگال تعاي امشي بصعوبه سوه طريق خله ايده وره ظهري وايد الثانيه ياشر بيها للزلم يميلهم عنه الكل دنگت روسها وادنت
حاجه الطبيب المسؤول كله مو زين على ابنك احنه شنو غايتنه غير حمايته كله والده تعرف الوالده ماتكدر ترتاح وماترضا تطلع الا تشوفه
گال بس هيه تدخل من بعيد ماتگربله

دخلت امشي بصعوبه احس رجلي جبل ماينشال
عيني عليه وجهه مابي شي ابد فدوه اروح المعانييك مامتغير منهن شي يمه الحمدلله مامتشوه الف الحمدالله
عيني صارت على جسمه من الحزام وجوه مكسر وملفوف ورجليه كلهن حديد براغي وشيش ومتنه هم ملفوف
احس روحي شاغت
گعدت الحيلي بدون مااطلع صوت اريد اگوم مااگدر
بجيت بصوت عالي فتح الباب الممرض اشر الفهد يطلعني
نهضني من متوني همس بأذني ام كرم مثل ماانتي اريدچ گويه الحمدلله عايش كلشي سهل
گمت وانه اكتم شهگاتي طلعت وحماي فيصل وسعاد وصلوني للبيت لكيت امي تنوح وتبجي
وصلت الها وطحت يم رجلينها شبعت بچي
نسوو روحتي للطبيب وانه هم نسيت كلشي
گتلهم شفته شفت رجلينه كلهن شياش
كالت رباب اي گال فيصل مكسر بدون ماينزف من رجلينه ماكو جرح بس تكسير النزف من متونه مجرحات من الجام وكايلهم بسيط بس الحمدلله رجلينه مامجرحه لو مجرحه مايسووله العمليه كبل لازم يعالجون جرحه يلله هسه صارت اسهل
مر اليوم لااكل ولا شرب وماادري شلون خلصناه
حته ماادري شلون نمت
گعدت لگيت ولدي داير مادايري سبع نايم بحظني وماحاسه عليه ابد  وعلي رايح الاخوه يمي كرار  وضرغام  كاعدين من شافوني گعدت اجو باسوني باوعت الروحي شوكت نمت ياهو مغطيني ياهوو مخلي مخده جوه راسي
كرار گال يمه ليش هنا نمتي لكيت عماتي رايحات لبيوتهن ..تذكرت هنه الفجر راحن ولدهن مدارس وامتحانات عدهم جنت كاعده ترخصن وطلعن كمل حجيه گال لكيتچ نايمه لاغطه ولامخده وامي الحجيه هم يمه اثنينجن مريضات كرم زين اليوم صحى من البنج ومحاجي ابوي

كتله انطيني التليفون خابرت فهد

..الوو

..بجيت فهد فدوه شلونه

..زين كرم سبع ابن ابوه ماينخاف عليه ديري بالج على روحچ لاتموتين كافي صيري سباعيه
اشرت الكرم تحاجيها
اشرلي اي وگوه يكتم وجعه حاجاها بصوت تعبان حسيتها ارتاحت
خابرت سعاد وصيتها عليها وكتلها روحي يمها ماگدرت احجي مو وكتها واخاف صوتي يعله وناس هواي يمي مو راهمه
وديت السعاد رساله
..ام مهدي ديري بالج عليها تره هيه حامل واصلا هيه تعبانه خاف تتخربط خابريني وعلاجها اودي بيد علي الها راح يرجع وي اعمامه خل تشربه مو اتركه

ردتلي صار

رجعت عيني على كرم بده الوجع يزيد عنده ضل يلوب ويوون بصوت عالي اخر شي گام يصييح

..اخخخ يمه وينچ عني
بويه الحگلي راح اموت

من سمعته نزلت دموعي واحس روحي مچتف اصعب شعور من تشوف جزء منك يتوجع كدامك وماتكدر تسويله شي ماكو بس امنيات امنيه تزيل منه الوجع وامنيه تتمنى البي بيك وتخلصه من هالعذاب واكول انه اكدر اتحمل
خاصتا بعد ماخبرني الطبيب رحلة الوجع طويله وعلاجه هواي يطوول
لزمت ايده ضغط على ايدي بقوه
صحت الطبيب اجاه شافه وكلهم ضربوو ابر مسكن ضربوه بين مااخذ مفعوله احس باد حيلي
مر اسبوع واحنه بالمستشفى ويوميه نفس العذاب واكثر بهذا اليوم قررله الطبيب يطلع بيوم الحادث خبرتهم ممنوع احد يخبر صگر عنده امتحانات وماباقيله هواي ويجي لحد يشغله من يخابرهم الكل يجاوبونه وانه هم بس كل شويه يسألني وياكد عليه ادير بالي على امه تعبانه وكوه تحجي
محد حسسه بشي خاصتا يدري بكرم عنده امتحانات ومن يمتحن يقفل تليفونه وينعزل عن كلشي يندمج وي كتابه وبس
هذا الشي ساعدنه نكتم الموضوع
بس هاي الفتره التهيت عنه وماادري بهاي نبأ فكت منه لو لا
طلع كرم بيوم الطلع الذبايح عمامه مجهزيها يم الباب والدنيا مكلوبه تتحمد على سلامته جيران واحباب وگرايب
طلع كرم بس طلع على كرسي متحرك احسه حزين رغم هوه يدعي العكس چنه مامهتم ويضحك
الجكليت والفرحه بس كرم وشيخه الي يشوف عيونهم يشوف عكس الفرحه وانه احس باحساسهم بس اريد اصير قوي گدامهم
اول يومين طلعنه كرم مانلحگ ع العالم بس هوه يتاذه خليناه بغرفته جوه ونكعده على كرسي ونروح يمه احنه
ماقبلت اجل عرس صگر هذا هوو يتزوج احسن
كرم ست اشهر يلله يقررون البلاتين ينشال لو لا يعني هوه باقي على كرسي
باقي الموعد العرس اسبوعين
واسبوع ويجي صكر لازم ابلغه گبل لايجي
كرم صح يتأذه بس من ايشوف امه يكتم وجعه وهيه گابلته وگعدت ماتسوي اي شي تگعد تشوف طلباته وبس
تذكرت بيوم الي وصيت سعاد عليها خابرتني سعاد ترجف گالت سعاد من وصيتني عليها وحاجيتها ادير بالها على روحها وع الي ابطنها هاي اتخبلت گامت تتصرف بدون وعي واطگ روحه وبطنها بقوه تكول خل يروح فدوه الكرم
طلعت من المستشفى وانه نار ولكيتها على وضعها الحچتلياه سعاد
صحت عليها

..انتي تخبلتي كافي مو گتلچ لاتتعافين الله مايرضا شبيچ انتي

ماردت وزادت طگها البطنها بدون وعي طگيتها راجدي ردتها تصحى
كافي انتي ابد مو عاقله والله مو عاقله احير بيچ انه احير بروحي ولج ابنچ زغير واتحمل مصيبته ويكتم وجعه حته لايحسسني هوه تعبان ابنچ احسن منچ يداري اليحبهم بس انتي تتخبلين شوفي ولدچ شلون وجوهم صفر كافي
انتبهت عليها صعدت فوگ ومن هذا اليوم انه وياها مامتحاچين رغم محتاجها بس هيه زعلانه ويمكن اعصابها تلفانه اخليها على راحتها تستقر والله كريم
ضليت ابات  يم كرم بعدها علي وكرار گالو احنه نتناوب عليه انت ارتاح
فرحت لأن اهمهم وولدي كبروو وصارو يعرفون علي عمره صار ١٦ باقيله شهرين ويقبطها حلوو احساسي من اشوفه شاب يسندني وسند اخوو
شجعتهم وعفتهم يمه مو بس لأن اريد ارتاح لا اريد احسسهم انه معتمد عليهم ومقدر وگفتهم وي اخوهم ووياي

اليوم من بعد  ١٤يوم رجعت الغرفتي
لگيتها نايمه
ترددت بين احاجيها واريح بالي عنها وبين اشوف غلاي  عدها وحست بغلطها لو لا اعرف مو بوعيها بس غلط تدري السوته حرام وخفت الله يعاقبها بكرم
ومايكمل علاجه والطبيب انطاني توقعات مايعقلها البال ومااتمناها ابد
تمددت على طرف الجربايه

شيخه ..
الي صار وياي صدمه من صدمة الحمل والحاله الانه بيها كرم مصاب بحادث وحالته خطره
ايام مثل الغيبوبه ماادري بروحي شلون امشي وشسوي اشوف اليمي هواي محد تركني وماادري عن كلشي صار وكتي بجي ونوم اسمع اصوات هواي يمي بس احس روحي وحيده فهد مو يمي ويريد مني اصبر واصير قويه
اجت سعاد وكالتلي فهد هيج موصيها تخبلت حسيته خايف ع الحمل وانه مو بحاله انه اريد ابني اذا ربي يريد يختبرني ياخذ حملي فدوه اله فدوه الكرم بس يمشي على طوله
تخبلت يمكن تهسترت ماادري شسويت وشحجيت وماوعيت الا على راجدي من فهد حچه حجي هواي وطلع رجع الكرم  ماسمعته ولااتذكره جنت فاقده ومااشعر بكلشي
لمن شافتني امي هيچ مامتأثره وولااعرف شبيه اتذكرها ودت ع العلويه وگالتها بحالة صدمه صايره بيها خوفه انطتها غسل الي وحجاب وقرت عليه هواي
احس روحي ارتاحيت اخذت الغسل غسلت ولبست لحجاب گلبي برد وصرت اخابر كرم من اخوانه اسمع صوته بس فهد ماحاجيته حسيت روحي فشلانه منه ماادري شلون صاربيه كل هذا
وسمعت من البنات مايرضا يأجل العرس
من طلعو ضل اسبوع يم كرم جوه وانه هم من ابوه يرتاح اروح انه يمه
بس ماحاچيت فهد ولاهوه حاچاني محد منتبه النه ابالهم ضايجين على حال كرم
واحنه هم محد اله واهس حته فرحة العرس راحت
باجر جاي صگر
خابرته كبل لا انام مبيين فرحان
الهسه مايدري فهد گال الاخوانه من يجي نگله احسن هذا اذا گناله هسه يتسرع وخاف ينگلب سكتت من سالني بالتليفون عن الولد وعن كرم سؤال خاص مابينتله شي وضحكت وسولفت وياه بس مبينه مو مرتاحه
نمت تعبانه نفسيا حسيت بفهد اجه فتح الكنتور اخذ هدومه وراح عرفته راح يسبح
وره فتره اجه تمدد
احس روحي الوب اريده طگني صح بس هوه راد يوعيني
كوه قنعت روحي رغم بيه شي مامقتنع بس غلست ورحت حشكت روحي بحظنه مادام مقتنعه اخاف تجيني افكاري السوده واگلب
حسيته اتنفس بقوه جر نفس مثل المخنوگ وجرله هوه
لزم وجهي بدينه اثنينهن باس راسي وباس عيوني الي غركت بدموعها مسحهن بابهامه وگال اششش كافي بجي نامي خليني مرتاح فدوه الوجهج هسه يلله ارتاحيت خلي العتب يولي وغير وكت عاتبيني
سكتت وانه اصلا مابنيتي اعاتب

گعدت من الصبح لگيته مو يمي باوعت الساعه بالسته الصبح نزلت جوه لگيته يم كرم
التهيت اسويلهم ريوك واحضر شي للغده طلعت اللحم والدجاج اليوم صگر جاي مااريد التهي عنه هوه حاله من حال كرم والحمدلله ربي فرحني بسلامته حته صار ينام ساعات اطول والوجع يهدأ بالعلاج مو مثل اول مره ماادري هوه تعوود ومايريد يبيين النه
حضرت كلشي ورحت يمهم انطيتهم ريوگهم وكعدت يم كرم الهسه مايدري بحملي واصلا انه نسيته باليوم اصعد درج وانزل اكثر من عشر مرات
ولهسه اكول لو نزل مااضوج وبعد احسن
احس كلش واكفه حملي وخاصتا بهيج ظروف
گلي يمه شو متغيره هاي كلها عليه

..بعد امك انت چاشلون مااتغيير غير انت الغالي

فهد گله راح يجيك منافس يگولون الچبير والزغير عند الام معزتهم غير
ضكك كرم وهوه يكتم اوجاعه كله سبع من زمان منافسني

..لاغير سبع امك حامل

..هاا

شيخه ..اريد اندل دربي واكوم حسيت تاه طريقي گمت وعوزي شويه وابجي من الفشله فهد ضحك وراي وكرم صاح يمه تعاي مبروك صدگ يعني مو يشاقه ابوي

..ولك مشاقيك گبل بهالسوالف

..لا بس مامتوقع ولامصدگ يجيني اخو بيني وبينه ١٧سنه

فهد..شويه وسمعنه صوت صگر طلعتله گبل لا يدخل ويشوف كرم امدد
جبرناه يبقه بالصاله حس اكو شي ضل يسأل
اخر شي گتله بس بطريقه ماتصدمه گام الحيله ضل يفتر وهسه اروحله

..گتله روح متانيك

..رحتله بسرعه من شفته وشفت الحديد الي برجليه دمعت عيوني حظنته وبوست راسه وادينه ووجهه
كرم الحمدلله على سلامتك ليش تضمون عني كرم مو ابن اخوي وبس كرم اخوي ربينه وكبرت واكبر بعد وبعد وانه حاسبه اخو
شلون اخوو المايوكف الاخوو بهيج ظرف
گعد وسأل هواي عن كرم صعد يرتاح ويبدل
اول مانزل نزل راح يم كرم
چنت گاعده يمهم اضحك من اشوف ابني شجاع  مامتأثر رغم حالته للي بعكره تاذي وجعها قوي ونفسيا هم صعب يتقبل يگعد على كرسي فرحتي بيهم جبيره
واشوف صگر كل ماله يكبر ويحله
وفهد گاعد بنصهم شفت كرم اشر الصگر دنك عليه يسمعه
شاوره
صكر گال بربك والله تحچي صدگ
ضحك بصوت عالي
دار على فهد

..حي الله ابو كروم والله
ردت اكوم صار عندي احساس الموضوع يخص لحمل ادبسزيه ولايستحون الا يفشلوني فهد ضحك عرفهم وانه كمت
..وين شيخة البنات شفتها مشت بسرعتها ضحكت عاد جيبيلنه بنيه تكسر خشم سبع الي منافسنه كلنه اريد وحده تكسر خشمه حته مو ولد كون كسارت خشمك بنيه يامشيطن يحاجي سبع ويضحك 

..لاتفرحون محد ياخذ مكانه دنيته بحظني ودرتلهم لاتسمعونه يعرف كلشي لاتخلونه يغار من هسه
ضلوو يضحكون صگر گال فهد خل ناجل العرس

..لا مايتاجل كلشي جاهز وكرم مايمانع مو صحيح

..لاليش امانع توكل بالله واتزوج وانه افرحلك

يتبع ..

بارت مفاجأ اكثر من الفين ومية كلمه 😘