رواية كسرة قلب الفصل الرابع والعشرون 24 - بقلم نور الشمس

..انتي شني سالفتچ احچي

..اخخ عوفني شبيك اذيتني ..مااريدك اي مااريدك ارتاحيت

..طگيتها على حلگها وصاحت بصوت عالي لمت البيت من صاحت عصبتني اكثر جريتها من شعرها حيل وحاجيتها
..والله يادعاء لو ماانتي حامل بالقرءان اكسر ظهرچ كسر وخلي ابالچ انه هم ماميت عليچ سهله الأيام بينه
..انت تهددني گوه هيه مااريدك وهذا الطفل مااريده وراح انزله وكل واحد منه بطريق
..عصرت وجهه حيل عيدي هذا حچيچ حته موتچ على ايدي تصير.. ايد جريت شعرها بي وايد ضغطت على فچها حسيته راح يطگ بيدي وهيه گلبت البيت صياح وانه اعلي صوتي حته تسمعني
ماحسيت على روحي الا من جرني فهد
ودفعني حيل طلعني بره الغرفه نزلني واسمعها تصيح ردت ارجعلها وفهد ماخلاني
شويه ونزلت مبدله وجنطتها بيدها گالت

..شيخ خلي احد يوصلني الأهلي

..فهد..بنيتي مو هيچ انتي وزلمتچ اهدوو وسولفوو وحلو مشاكلكم عوفي اهلج لاتدخلينهم وان عايل عليج انه ابوج واكسر ظهره

..انه اباوعله واحس نار تطلع من عيوني فتحت اول دگمه بقميصي احس روحي اختنگت فهد انت سبب بالي يصيرلي من البدايه مامرتاح انه وگتلهم مامرتاح محد اخذ حچايتي وحاولت اسوي اليطلع بيدي حته افرح وافرح روحي بعائله وزوجه وحبيبه وماصارت اسمعه حاچاها وهيه ردتله

..ماابقه اني هنا

صگر..خليها تروح وانه احچي كلشي الأبوها اريد اشوفه يرضي الحچي

فهد..اسكت انت ..بويه دعاء الخاطري ارتاحي هسه ومايكون خاطرج الا طيب

..اني ابقه بس ابد مايجي يمي ولا اله علاقه بيه

صگر..شيخ سكتها لو خل تولي وتطلع الخاطرك انه لازم روحي لا افقد اعصابي واسوي شي محد مسوي والله

..شيخه اخذيها يمچ ..وانت گول يالله شبيك تخبلت تعقل انت لو من تكبر ترجع ليوره شبيك رزق الله هذا ليش ماراضي اليتزوج شني اباله يعني اكيد يصير عنده اطفال الناس تتحسر على ريحتهم وانت ماراضي

..نعله عليها وع الساعه الشفتها بيها كرهتني بروحي هيه خلتني افرح بعدين انه ليش اعترض وياهو الگالك ماراضي ع الحمل سالفتي اكبر من هاي عوفوني بحالي ولحد يسألني تريد تضل تضل تريد تولي خلها تولي الولد يصير من حظنها الي وهاي اعلي صوتي وهيه تسمع وروح امي وتراب گبرها مااقسم بيها اذا ماسويت الي ابالي اذا الحمل سوتله شي اهججها هيه واهلها والله والله خاف عبالها واحد يوگف بعيني اذا نفذت الگالته وحاولت تسقط حمل انهيها سمعتي انهيج والله

فهد..ادري شبيك انت تصييح ماتحشم احد بعدين ياهي التريد تسقط وليش احد منكم يفهمني احچي مو  وياك انه

..شيخ لا تسألني انه هم مااعرف شي ولا عندي جواب

فهد..كافي ارتاح مشاكل تصير بين المتزوجين وهيه هاي اختبارات الزواج تبيين علاقتكم ونسبة التفاهم بينكم ..ليش انت هيج اعصاب شوف ايدك ترجف صدگ جذب وين صگر المايهتم وماكو شي يهمه

..شيخ خليني خاف احچي وازعلك بدون مااقصد خلي الحچي بگلبي

..براحتك ارتاح وانه وياك نسولف بعدين
رحت للغرفه احاچي شيخه دعاءيمها ردت تفتهم منها وصلت قريب الباب وهنه يحچن سمعتها ترادد شيخه

شيخه ..

اخذتها ورحت الغرفتي ردتها تبرد خليتها بچيت وشكت وغلطت بدت تدعي دعاوي احس گلبي انغز گتلها لا ادعين صگر مايستاهل مدللج ويحبچ وانه اعرف كلشي اعرف من انتي وكتچ كله تضحكين وتسزلفين وتليفونج مايطيح من ايدچ تهابرين بنات خالتج مدري عمتج ومن يجي صگر تبوزين وگوه تغثينه يلله ترتاحين
انتي شني سالفتچ وياه اهلچ جابرينچ علي

..لا منو يجبرني اهلي مدلليني

..اي جا شبيچ وياه ليش هيچ تشلعين گلبه انه ادري مو ع الحمل وادري يطير ال الله من يدري جايه طفل

..انتي تحققين وياي تواسيني لو تشمتين بيه لاتسوين روحچ خايفه علي تره هوه حماچ مو ابنچ وانتي مصدگه بعدين انه تورطت ورطت روحي بي عبالي احبه اكتشفت نفسي ماحابته يمكن معجبه بي بس عيشتكم ماتلائمني

..اريد احچي واردها صوت فهد گمزني دخيلك يارب مابيه حيل مشاكل

فهد..عفيه عمي حياچ الله تربيتچ حلوه ومتربيه هواي رادت تحچي خزرتها وأشرتلها بأيدي اششش انه مو صگر ولا شيخه صوتچ مايعله يمي
من خطبتچ الصگر غصبا عنه اي جبرته عليچ لأن عرفت بينكم تواصل وانتي بت صاحبي اعرفه رجال طييب وابن عائله الناس تحلف بأخلاقهم واعرف امچ مره حره السانچ هذا وطولته مايلوگ لا الچ وانتي چنتنه ولا الأبوج وامج وتربيتهم گومي حبي راس عمتچ شيخه وروحي الغرفتچ واعقلي وصيري خيره اليمشي عوج ماله يمي گعده فهمتي

دعاء..

من شفت عيون الشيخ فهد واسلوبه الحاچاني بي احس گلبي وگف من الخوف چان يحاچيني بهدوء بس عيونه تاكلني اكل حجه وياي وانصدمت من گال جبرته عليچ ليش جبره واصلا مامبيين مجبور
اخذت جنطتي وعباتي وصعدت الغرفتي وانه حايره
انسه كلشي وابدي حياة جديده لو مااگدر ابن خالتي بأخر ايام الخطوبه اكتشفت روحي احبه لمن اعترفلي هوه وحاول يقنعني افسخ خطوبه بس صگر ومكانته بالمجتمع وحالتهم وحته شكله بكلشي احسن من حسام گلت اتزوج وانساه المشكله من تزوجت صار تواصلنه اكثر وزاد حبي اله اضعاف صرت كارهه روحي من اشوف صگر يدللني اصده حته مااستغله اريده يعاملني بالمثل چنت ناويه اطلگ وره السنه والصدمني الحمل رغم ماخذه احتياطاتي
المشكله الصارت اليوم مو بس بسبب الكذبه الي كذبتها على صگر لا المشكله حسيتها متراكمه دائما يگلي احسچ مو وياي ومرات اجبر نفسي لو امثل انه مشتاقتله مثل ماهوه مشتاق
اني طبيعتي مدللة كلش واهلي ميرفضولي طلب وشنو الأريده يصير والاضواء كلها مسلطه عليه هنا لا كلها شيخه شيخه حته خواتهم يحبنها اكثر.
وهيه هم هواي تهتم الهم احسها متملقه ماكو وحده هيچ تفضل حمه على اولادها تگول لأن ربيته واذا ربته ماجاي اقتنع بيها وكارهتها من الخطوبه صارع راسي بيها صگر
اليوم حته هيه انفجرت عليها بس شالفايده الشيخ رزلني وماگدرت انطق بحرف
گعدت بغرفتي واني افكر شني تاليتي اطلگ احسن بس شلون اطلگ وادري بيهم ماعدهم طلاگ وولد يطلگ
ماادري شلون مر الوكت باوعت بثنعش بالليل وصگر الهسه ماكوو وانه شعليه عساه مايجي للدوم
لفيت راسي ونمت

صگر..
بعد ماحاچاني فهد انه روحي طالعه واحس هوه وره كلشي صار وياي ماگدرت ابقه ردت اطلع من البيت كله خاف احچي حچي اندم عليه طلعت البيت محمد وگلت المريم بلغي اخوانج وامج لو الشيخ سأل عليه ورادني لحد يگله صگر يمنه گلت هسه يجبرني اصالحها
شويه ودگ تليفوني مالي خلگ كلشي قريت الاسم كرم

..هلا كروم

..هلا بيك صگر وينك يخوي

..خاف ابوك موصيك تعرف انه وين

..ههههه لا والله مايدري بيه مخابرك اصلا ابوي طلع للديوان وانت شني شارد

..مالي خلگك ضايج وروحي طالعه

..خايب انه اريدك اليوم النتائج وره الضهر تطلع وبيني وبينك متوتر كلش خاف الدرجات نازله

..لاتتوتر ولاشي شيطاع الحمدلله اهم شي ناجح كلش كافي

..لا مو كافي اريد تفوق مااريد رجليني يأثرن علي

..خايب انت بطران انه منك ماامتحن اصلا

..خوش تشجيع عاشت ايدك

..هههه ضحكت وانه روحي طالعه كروم بهذا الوكت ماافيدك مشحون طاقه سلبيه الله يوفقك وتطلع درجات عاليه مع السلامه

..اوگف ماگتلي انت وين

..ابيت محمد وين اولي يعني

..بروح ابوك انت هناك يمهم

..ههههه خايب اي يمهم شبيك صوتك رجف ولك انت مو صاحي بالله العظيم

..راح اجيك بحجة اشوفك

..اركد بمكانك ولك ماتستحي انت مره مرتين عديتها الك كافي بعد شايفهن يلمعن فوگ راسي

..اووو راح يسويها ضلمه علي بس اشوفها والله حته مااحاجيها صار يومين ماجايتنه واريد اشوفها وبس

..والنبي توازيني اگل الفهد عليك انت وسوالفك هاي
تعال يلله خل كرار يجيبك انه طالعلك بالباب من وراك هسه فهد يدري انه وين

..ولو دره مطلوب دم انت هههه

..مالي خلگ يخوي وفهد يرادله خلگ ساعه يهديني وساعه يرزلني يخليني ماادري شحچي

..صدگ مبروك سمعت راح تصير ابو

..اي راح اصير مصخم كافي تعال
سديته من صگر خابرتني نبأ

..الوو

..هلا نبأ

..هلا بيك ياروح نبأ وگلبها تروحلك فدوه ايامها الراحت والتجي

..مالي خلگ ولله گولي شعندچ

..مشتاقه الك

..اي

..ورايده شوفتك وبس

..خايبه شجابج الي وعليمن خابصه روحج علي انتي تحبيني صدگ لو بعده الي براسچ ناويه عليه وربج ماتحصلين مني لاحگ ولاباطل

..بعدك مامصدگ بحبي الك ولك انام واخر صوره بجفني صورتك واكعد وانت اول من يجي ابالي

..هاي الولك لاتعيدينها وانه مافيدج والله ولا بيوم احبج ليش تضلين معلگه بيه نبأ جاي اكره روحي والله خليج بعيده عني لايلوحچ مني عذاب البيه كافيني

..اسم الله عليك شبيك انت منين ضايج

..من كلشي

..هم ابقه احبك لو ادري الدنيا كلها تصير ضدي مااتنازل عن حبك

..خلي اكون صريح وياچ حته لو حبيتچ وحته لو مامتزوج وحته لو انفصلت انه وانتي مستحيل نتلاگه بيوم ادروبنه ماتتلاگه انه ابن الشيخ زامل وانتي تعرفين اهلچ مستحيل يصير بينه زواج شوفي غيري ولاتربطين روحچ بيه

..انت ناوي تنفصل الله عليك

..منين طلعتي هالسالفه مثل جاي اضرب مثل

..لا مبيين انت مامرتاح بزواجك

..مبيين شلون يعني

..گبل لاتزوج چنت ماتقبل تحاجيني بس هسه اشوفك تفرح بمكالمتي وتروح العالم وياي مرات تشكيلي همك بدون ماتحس

..هذا ياهوو انه شاكيلچ شوكت هاي

..اكثر من مره

..يعني ابالچ شني حبيتچ

..تقريبا

..لوطلعت النجوم بعز الضهر گولي صگر حبني

..مااريد حبك يكفيني انت متقبلني ويجي يوم تحبني واذكرك بهاي حچايتك

..انتي شلون ترتاحين من تحاچين رجال متزوج ومنتظر جاهل هم

..خليت ايدي على گلبي سچينه وانغرست بي صوتي تكسرت بي العبره
مرتك حامل

..اي

..مبرووك

..الله يبارك بيچ الوو الوو سدت الخط معقوله ضاجت ومعقوله هاي تحبني صدگ اجاني كرم وگعدنه تونسنه وضحك وشقه وهوه غيونه فاضحاته
رجعت للبيت من وكت بس ضليت جوه حچيت وي اكي وشكيت الها طولة السانها ووكاحتها ماگتلها ماتريدني وترفضني احسها صعبه ولااگدر اگل الفهد خليت همي بگلبي وسكتت
بثنعش ونص بالليل طلع فهد يصلي صلاة الليل
من شافني گال شعندك هنا روح الغرفتك بعدكم بالبدايه لاتعودها انت تطلع من غرفتك

استحيت منه وصعدت شفتها نايمه جريت المخده وفراش ونمت بالكاع وماطول گالتها بوجهي بعد صدك انه وهيه لهنا وبس
ثاني يوم گعدنه على هلاهل امي نزلت فرحان عرفت نتيجة كرم طالعه وچان طالع الاول على شعبته وهوه بهذا حاله صدمه النه كلنه فرحانين بس متفاجأين واكثر واحد فرحان فهد كل شويه يبوسه براسه
خلص الاسبوع وانه ودعاء مانتلاكه بس مصرف اخليلها رحت للدوام وماودعتها
هناك اول مادخلت شفت نبأ ولاعبالك هيه مغيره  لبسها ومكياج شبه ماكو شي قليل كلش وحته البنات الي تمشي وياهن عايفتهن وگاعده وحدها من شفتها رحت سلمت عليها وانه اريد اسألها سبب التغيير بس سكتت ماردت اطوول وياها
مر اسبوع انه بالدوام ماجربت اتصل على دعاء
ونبأ ماحرجتني واتقربتلي من بعيد تراقبني واراقبها بس رسائلها ماوگفت
وره اسبوع من دوامي وبعد تفكير طويل گلت ع الأقل اخابرها اسأل شلون وضعها وي الحمل وشتريد ماتريد حته اوصي امي تجيبلها
خابرتها بالليل
طلعلي مشغول بالنص ساعه مشغول چانت ساعه اثنعش بالليل اعصابي تلفت وانه اربط الأحداث اكيد عدها شي ليش وليش وليش ضليت اعيد المواقف طلعت من القسم گلت للحرس حاله طارئه ومستعل قبلو لأن يعرفوني اخذت سيارتي وطلعت ماادري شلون جنت مركز بالطريق الشك دمرني اصعب شعور واصعب احساس واصعب مرض هوه الشك اكل روحي اكل بساعات قليله حسيت گلبي يريد يوگف
وصلت قريب للفجر واعرف بهذا الوكت فهد وامي يفتحون الباب وهاي عادت امي گبل الله يرحمها وامي شيخه اخذتها منها گبل صلاة الفجر تفتح اقفالة البيبان وترش مي للبركه
وصلت وطبگت السياره صدگ شفت الباب مفتوح والماي توه مرشوش
بس دفعته وفتت باب المطبخ مطبوك هم فتحته وفتت على كيف وانه اسمع صوت فهد يكبر
لزمت تليفوني ادگ عليها حته اشوف الخلل خاف بالتليفون
صعدت على كيف وانه اخابر وهيه تليفونها مشغول
وصلت قريب الباب وانه اسمع صوتها
تحچي ويامن الهالساعه تحچي
فتحت اليده على كيف مقفول الباب بقيت اسمع حچيها
وهيه تضحك تگله ولايهمك فتره وكلشي ينتهي
فتحت يدة الباب بقوه صاحت منوو
..منوو انت منوو

..فتحي الباب انه صگر افتحي لااكسره هسه

..احس گلبي وگف من الخوف واخذتني الرجفه حته بطني لوتني واحس شي يتگطع بيها

..دعاااء فتحي الباب نسيت روحي وصحت سمعت فهد يصيح شكوو ياهوو هذا يصيح

..انه صگر ماكو احد لاتخافون ..رجعت دكيت الباب بقوه فتحي لاانعل ابوج لا ابو اهلچ ياچلبه فتحي

..انت شبيك تخبلت شارب شي انت

..فهد انت لاتدخل محد خرب حياتي غيرك ..ماادري شلون حاچيته بهالطريقه بس ماچنت واعي الروحي الشك ماكلني وشكي طلع بمحله

يتبع ..

البارت بدون مراجعه

رمضان كريم حبايب ينعاد علينا وعليكم بالخير والبركه ويارب الأمن والامان الوطنا والكل بلدان العرب

الاختيار راجع الكم تحبون اكمل الكم القصه بين يوم ويوم بارت طويل لو اكملها جزء ثاني وره الشهر الكريم انتو اختاروو اليعجبكم