رواية كسرة قلب الفصل التاسع عشر 19 - بقلم نور الشمس

..شفت دجله خطيه ماخذه امها للطبيبه تگول توني خلصت عده

صگر ..صباح الخير ام حسون شهالأخبار الحلوه التجي بجيتچ هاي شجابها دجله مدري فرات شفتيها انتي احنه شكوو تذكرينه بيها
اتنوع الأمي ضاجت حيل وگامت سوت روحها تگلب بالجدوره

وفاء..ياهلا بهالصباح فدوه الهالطول انت شيمك عود ومارضيت سالفه عاديه لو تخاف على ذولاك الناس من المغثه

..رباب كافي هسه انتي شچلبتي بالسالفه

وفاء..ولچ مو سألتها ليش اطلگتي شني السبب صفنت من درت ماندري گالت الشيخ واهله يعرفون انه مااگدر احچي
شيخه ماتگولين شنهي السبب

..علمي علمچ ماادري

صگر..كافي المره اطلگت الله يستر عليها سدوو سيرتها وسولفولي شحضر للعرس ..ردت اغيير السالفه الخاطر امي بس مافاد هنه يحچن وفرحانات بالعرس وهيه مو وياهن شويه وركضت للحمام

شيخه..

من سمعت جابت طاريها متعمده ضجت وخفت بنفس الوكت لاترجع علي ويلينن گلبه وضجت هم من طاريها اتذكرت ليلة العرس والليله الخذاها بيها
سويت روحي اشوف الجدوره ماردت ينتبهون الي
احس معدتي اذتني وروحي صارت تغيب
من فقدت القدره على السيطره ركضت للحمام
تقيأت وارتاحيت غسلت وطلعت ارجف
رباب وصگر بالممر قريب للحمام

..يمه شخيرج اخذچ للطبيب

..لا يمه مابيه شي يمكن ضغطي هابط 

رباب ..خيه ليش هيج اسويلج لبن مالح

..هسه اصير زينه لاتخافون
بس اريد.ارتاح بغرفتي اترخص منچن داده بس ارتاح اجيجن

..يمه لاتصعدين وحدج يضل بالي وانتي بهذا الحال نامي بهاي الغرفه وانه عيني على اخواني الزغار لاتهتمين ارتاحي
عفتها وطلعت وفاء گالت شبيها

..ضغطها هبط

..ههههههه سمعت بدجله وهبطت الله اليعلم شمسويه للشيخ خلته يطلگها

..انتي شبيج ماتملين شرايج افتح الموضوع يم الشيخ واخلي هوه يجاوبج

..لاماتسويها تحرج اختك الي تحبك

..وداعتچ اذا ماسكتي اسويها والله ..اكله وفاء محتاره ماتنام الليل ماتعرف السبب

..ياا وليش ماانام شعليه انه

..وربچ البيج مايخليچ لو تنامين چامنكدتي علينا من الصبح الله يساعد احمد عليچ

..يا فدوه الك واله شمسويه انه ..شحده يحاچيني احمد وفهد موجود

..جا ماتسكتين ليش تسوين مشاكل ابيته اذا تدرين هوه سندچ 

..صگر كافي والله اذا ضليت تحچي اطلع منا وبعد مااجي ومن يسألني فهد اكله صگر يهيني

..اكوم اروح احسن حته ريوك ويمج هم ماينوكل
طلعت وانه ادردم شلون يوم نبأ ومغثة وفاء والله قابليه عدهن النسوان يحطن ارواحهن بسالفه مو يمهن والغيره العدهن ماصايره بس مو كلهن صنف منهن وهذا الصنف اتخبل منه الله يبعدهن عني
وانه افكر اجت ابالي دعاء هاي ماخابرت شبيها يلله بعدهي زغيره وتدلل انه عصبت بدون داعي شوكت اشيل الشك من بالي بس هاي موشك غيره اي انه اغار عليها وگمت احبها والدليل جاي كل شويه اطلعلي عذر الها ابتسمت وبداخلي افكر خل اعودها على طبعي انوب هيه تتصرف يجوز صدگ بنات خالتها
اتصلت بيها
..ماگالت الوو بعدني ماحاچي جاوبت

..مو الليل كله نسولف للفجر خلوني انام مامليتوو

..ياهم ذول الماملوو منچ وتسولفين وياهم للصبح وانه شني مخليتني

.فتحت عيني من سمعت الصوت ركزت يبوو هذا صقر عبالي زعلان مو هسه يتصل جاوبته

..بنات خالتي غير منوو يعني بعدين اني زعلانه ليش متصل

..دعاء انه جاييچ ساعه وانه يمچ

..شكوو ليش جاي

..ارد اشوفچ ليش بيها ازعاج الچ

..لاحبيبي تعال هسه اعتبر نفسي راضيه

..اهم شي رضاج اجيچ وافهمچ طبعي واريدچ تتصرفين ع هالأساس

..نشوف طبعك واكيد ارضيك مدام انت راضيني

سديت الخط ورجعت اشوف امي لگيتها نايمه
اول تالي امي تنام هيچ وكت كله من وفاء خرب بليسها ماتمل من المغثه
والله لو يدري فهد بيها مريضه من وره وفاء الا يأدبها
گلت مااروح هسه لمن اتاكد من امي خاف تحتاج طبيب بقيت ساعه وامي نايمه
اجت سعاد اختي متأخره لأن تكمل شغل عيالها يلله تجي ماخذه ابن عمي وتطبخ العمي وعمتي يلله تطلع
من سمعت بأمي مريضه طبت تشوفها حست عليها وكعدت كالت صرت زينه طلعت وشفتها زينه رحت حته بالغده ماحظرت وياهم
خابرتها وانه قريب الهم

..الوو

..هلا حبي هاي وينك الهسه ماكوو

..حبيبه حگچ علي صارت شغله عندي اخرتني قريب انه يمكم بس ادگ الجرس طلعي

وصلت دگيت الجرس فتحت الباب امها تفاجأت
..هلا صقر جاي علينه
..هلا بيچ عمه اي والله اذا ماتصير زحمه يعني اعرف مو حلوه اكثر جياتي بس باچر اداوم وردت اشوفها خابرتها من زمان گتلها جاي

..هلا بيك بكل وقت البيت بيتك فوت هسه اصيحها

..فتت جوه بعد ماگاعد اجت

..السلام عليكم گلتها وثگلت وجهي سويت روحي زعلانه

..وعليكم السلام
على كيفك ياحلوو ويانه شفتي غلاج زاد گمتي تلعبين بأعصابي ولچ ليش تعوفيني اتصل وماتردين
واجي اعاتبج وازعل تكيفين ليش ماخابرتيني

..بس احاجيك.بوكتها تعصب اكثر ردتك تبرد وتجيني وانت مبتسم مثل ماصار هسه

..لووتيه للفجر گاعده موو

..هههههه وي البنات احچي

..عوفچ من البنات  وتعاي بحظني لاتخليني اشعل اهلهن لو انه اجيج احسن

..ضحكت خليك بمكانك لاتجي ماما تشوفنه

..وتجي حلالي وبكيفي جريتها من ايدها
تعاي احچي وياچ ماسوي شي لاتخافين
بستها ورفعت جهه من شعرها وبست برگبتها
همست يم اذنها
واني ابوسها على كيف
..مخابره بعد العشره بالليل الغيري ممنوع حته ابوچ ماتخابرينه بهذا الوكت
چانت متشنجه رجعت ابوسها بهدوء وكملت كلامي
خاف عندچ ولد ابن خال ابن عم ممنوع بينكم تواصل بالتليفون
خلي ابالچ هسه جاي افهمچ بعد وره هاي ماكو تفاهم اكوو تصرف اتصرف بغير طريقه
گعدت وگعدتها على رجليني
بست راسها
ولچ صرت احبچ لاتخليني اندم الگتلچ عليه يتنفذ

..ضحكت هسه صرت تحبني وقبل

..قبل مو مثل هسه هسه رايدچ اكثر واحبچ اكثر
ماردت اگلها چنت ماناوي اتزوج ماردت اكسر گلبها
سمعنه حركه قريبه ع الباب طفرت من حظني وانه اضحك
امها دخلت قدمت كيك وعصير
تشكرتها وطلعت
حاچيتها

..دعاء اريدچ تفهميني من اتصل عليچ جاوبي لاتخليني معلگ ومثل مافهمتچ اتصال وي ولد اي ولد من اقاربچ ممنوع
مااقبل فهمتي

..فهمت وتدلل الي تريده يصير

..گمت يلله حبيبه اترخص انه اجيت بس حته افهمج واشبع شوف من هالعيون الحلوه
ماردت افهمچ بالتليفون وتاخذينها بغير قصد
اتمنى فهمتيني بس

..فهمت لايضل بالك

طلعت من بيتهم توجهت البيتنه لگيت فهد بالبيت
مبيين توه جاي جان طالع بطلابه
خواتي يمه سلمت وگعدت سألت سعاد
..ام مهدي امي شلونها هسه

..داخت وبغرفتها هسه نامت يمكن
دارت على فهد
..ابو كرم اسويلك  غده

..لا حبيبه مااشتهي تعبان اريد ارتاح شبيها شيخه

..ينزل ضغطها كل شويه

..الصبح چنها ورد شبيها گمت الحيلي اشوفها
نزل ضرغام وسبع يركضون

..الله الله شبيكم بويه على كيفكم لااطيحون
شبكتهم بست ضرغام وشلت سبع وصعدت
لگيت شيخه نايمه
حاجيت سبع اشش خلي امك ترتاح تعال نام بحظني
ماراد ينام فتحتله الباب نزل يم اخوانه يلعب
قفلت الباب
تعبان اريد انام طالع من الفجر بطلابه ثالت روسنه يلله انحلت
تمددت جريت راسها خليته بحظني ونمت

صگر ..
من رجعت ظلينه نضحك ونسولف انه وخواتي چنت اشوفهن صوري بالكليه شفت بنيه خطفت ورجعت ع السريع لمحه سريعه درت وجهي اريد اشوف منوو صاحت وفاء يا ولج مريوم تعاي وين شردتي شبيها هاي
ضحكت هاي مستحيه مني خليها هيچ احسن كرم و واعرفه رايدها صدگ ماحچيت بس هيه اغلس عنها مااحاجيها ماابيين الها رضاي خاف تتماده ولا ابيين ماراضي خاف تنحرج وتخاف مني اسوي روحي ماادري احسن
اجتني رساله من نبأ

..تداوم الاحد

..من باجر رايح اداوم ليش

..حته اداوم اني مالي نفس للدوام بدونك

..وانه شني افتح نفسچ للدوام 

..اي بدونك ماينطاق

..نبأ شتردين مني

..اريدك كلك

..مااصير الچ ابد ومن هاليوم انسيني رحمه الأهلج طلعي من راسي ماناقص مشاكل انه

..ومااعوفك وشتسوي سوي

..ليش مصره

..احبك

..ههههههههه منو تحبني انتي

..قابل امي

..ذكرتيني سلمي على الوالده لميعه گليلها صگر اخو الشيخ فهد ابن الشيخ زامل يسلم عليچ

..طلعت تعرف امي

..اي كلش زين اعرفها انصحچ تبتعدين عن طريقي

..واذا ماابتعدت شنو تسوي

..كلشي اسوي

..لعد ندخل تحدي

..حذرتچ انه تركيني ورقمچ حظرته من هالساعه
وصلت الرساله وحظرت الرقم

..شويه واجه كرم التها وي عماته ضحك وسوالف
صعدت الغرفتي اخابر دعاء
ماادري ليش صرت هيچ ملهوف عليها يمكن لأن صارت حلالي ويمكن حبيتها ويمكن اصلا چنت احبها بس عاندت فهد جي جبرني وقنعت روحي بعناد فهد انه مارايد
افكاري ماتخلص واترك التفكير متعمد اتصل بيها حته اثبت حبها بگلبي واروح وياها الغير دنيا دنيا راسمها ابالي حبيب وحبيبه وجهال وعائله واستقرار وحنان وطيب كلهن ذني رايدهن

..شيخه

نمت لان دخت كلش غطيت بنومتي حسيت راسي انشال وانحط على ذارع فهد تنفست عطره مله انفاسي
قربت عليه اكثر حظنته حس علي

..حبيبه گعدتي خيرچ گالوو مالچ خلگ

..شويه دخت شوكت اجيت

..گبل شويه ضليت يم البنات شويه وصعدت ارتاح

..ارتاح انه انزل يمهن عيب

..اذا دايخه تعاي شويه وانزلي

..راسي يوجعني وجسمي كله وروحي تلعب

..تعاي ارتاحي العصر اذا ماصرتي زينه اخذج طبيب

..لا مايحتاج هسه وانه يمك اطيب

..بعد الروح انتي

بيومها ودي اضل نايمه احس جسمي مكسر
بس عيب من البنات گوه گمت وجاملتهن وضحكت وسولفت مااريد يحسن بثگل وهنه جايات بيت اخوهن
وحضرت الصگر كيك وكليچه بس عجنته واجت حوراء شوتهن اتحرك ومبيين عليه التعب
كرم هاي الفتره ذاب حيله ع القرايه والباقين بيهم يقرون وبيهم يلعبون
صگر بغرفته كل مااروحله يخابر مرته فرحت وارتاحيت علي فدوه اروحلك ربي دعائي جاب نتيجه
صدگ ماطلگت بي ولاحبلت بس ربيت والربا اله حگ يمك ودعيتك ردت حگ رباي تهدي وتخلصه من المصايب مرات احسه هوه چبيري وبچري وفرحتي كلها
خلصت شغلي بالليل كعدت يم فهد توه جاي من الديوان وياه محمد وفيصل گعدوو شويه وراحوو
بدت حوراء تشوي شميت ريحة الشوي تعبت ورجعلي لعبان الروح
فهد شافني

..شيخه شبيچ يوجعج شي مو مرتاحه ولاانه مرتاح من اشوفچ هيچ اخذچ طبيب مادام بعد وكت

..لا مابيه شي تلعب روحي هسه اغسل وارتاح

..رحت اغسل ووصيت حوراء تخلصهن وتخليهن بالحافظات وتضمهن حته ياخذهن صگر
صعدت الغرفتي
تمددت اجه فهد وراي
خله ضهر ايده على راسي

..مامصخنه زينه حرارتچ چا ليش هيچ مالچ خلگ

..ماادري جرثومه يمكن بمعدتي لو التهاب شو تلعب روحي واذب اكلي وحته لو مااكلت تلعب روحي

..ارتاحي نامي باچر اخذچ العصر للطبيب

نامت وانه افرّچ اديها غطت بنومها بست راسها ونزلت بالي يم الولد
يوميه تنومهم هيه وترتاح عليهم يلله تنام
نزلت لمن نامو وقفلت البيبان وصعدت
اريد انام مااگدر
وره ساعه سمعت حركه الباب البره انفتح
اخذت اسلاحي ونزلت

يتبع ...

حبايب التأخير اني مو سبب بي
التأخير من الوات مينزل اعتقد النت ضعيف
هذا بارت البارحه بارت اليوم بالليل اكمله اذا النت قوي انزله من وكت