رواية كسرة قلب الفصل الثاني 2 - بقلم نور الشمس

لبست احلى لبس مثل كل مره وبكل مناسبه ينتظرني اطلع حته يشوفن شلابسه هالمره وشلون يطلع شكلي
بس هالمره فضولهن اكثر
نزلت وانه رافع راسي مبتسمه متعوده مااغيم بوجه ضيوفي الضيف اكرامه مو بس اكل اكرامه وجه يضحك وحجايه طيبه
نزلت وعيون الكل عليه
وانه اعكس صورة انكساري بشموخ

اليوم ومثل مامتعودين يشوفوني قويه واثقه بنفسي مبتسمه
بس مايدرون داخلي انكسار
ناس هواي رايدلها ضيافه وترحيب ولأن انه صاحبة المكان واجب عليه ارحب بضيوفي رغم بيهن يكرهني وبيهن يعطفن علي وبيهن مااهمهن وبيهن مكسورات ومبيين عليهن اكثر مني
اتحرك ابيتي بيت الشيخ وانه شيخه بنت شيوخ تربات دله وفنجان تربات طيب وكرم عزيزة نفس ماانذل ومااسمح الاي واحد يذلني مااريد ابيين مكسوره رغم گلبي مكسور ومايتصلح بعد
الكل يشوفني ومتعجبين بوجوهم هواي حچي بس محد منهم يتجرأ ويحجي
صاحني صگر بعيونه هواي حچي بعيونه دموع متجمعه باوعتله بنظره مااريدك هيج ماعلمتك على الضعف فهم نظراتي بادلهن بابتسامه

..يمه اوعديني تظلين هيچ

..بعدك ماتعرفني وتريد وعود مني ؟

..يمه گلبي واجعني عليچ بس مابيدي شي

..سلامة گلبك الغالي لاتهتم يمه امك گدها
روح اكشخ والبس حزامك والسلاح وسوي الواجب اوكف الأخوك وگفة اخوو
لاتظل طاب طالع تسأل علي امك كدها وانت زلمه جبير لحيتك خاطه سنتين ونزوجك ونفرح بيك

..يمه فهد بعد مالي غرض بي

..تنهدنت الشيخ ..گول الشيخ يمه اخوك بمقام ابوك لاتزعلني منك
روح اخذ اسلاحك وارمي وخلي البيدك تهلهل
طلع وعينه علي

تذكرت من صار صگر
چنت عروس صارلي اشهر وخالتي صار عدها طلوگ
جابولها الجده للبيت جابت بصعوبه وتعبت انطوني صگر بيدي حلوو ناعم من شفته ابتسمت گعدت يم خالتي وهوه بيدي وامي گعدت گبالي لازمه ايد خالتي تمرغ بيهن عيون خالتي غايرات تهمس بصوت ناصي
شهامه يمه هالولد امانتچ
باوعتلها مستغربه ماسامعه هذا اسمي من ايام المدرسه مااحبه غريب والبنات جانن يتعجبن من اسمي ابوي الشيخ نشمي الله يرحمه سماني شهامه لأن جان لقبه ابو شهم واجيته انه مااجاه الولد
دوم الوم امي على ه اسمي بس عمي ابو فهد هم مثلي ماعاجبه يشوفه ثكيل من انه زغيره ملقبني شيخه مشه علي بعربنه اسمي شيخه
شيخه بنت شيوخ وتربات شيوخ رغم ابوي اتوفه بحادث سير وانه طفله بس ماحسيت بيتم عمي دللني جنت مدللة خوالي وعمامي
تذكرت من خالتي وصتني صفنت عليها
امي گالتلها اسم الله وليدج يربه بحظنج حاله حال اخوانه وشيخه تعينج علي بنت اختج بنتج
حاجتني خالتي وصوتها تعبان امنتج امانه
ظلت روحها تغري تغيب وترجع الوعيها امي انخبصت واني عفت الجاهل من ايدي وظليت اطگ خدها اريدها تگعد
خاله خاله
وامي تصيحلها ام فهد خيه گعدي ام فهد
الجده كالت لحكوو عليها النزف مايوگف
اخذوها فهد وعمي
ومن رجعوو مارجعت وياهم مثل مامشت رجعت وياهم بتابوت الوجع البگلبي مثل وجع گلبي بيومها هيچ الحصره بيه بس بذاك اليوم جنت اكدر اطلع حصرتي أبجي بصياح بلطم
هسه لا بكلبي نفس الوجع بس العدنه فرح مو حزن
ولازم ابيين فرحانه مااحب نظرات العطف
فززني من صفناتي صوت الغنا
طلعت يمهن بالصاله شافني سكتن
اشرتلهن يكملن
صحت كحلاء عمه گومي انتي والبنات ضيفن خطارجن وزعن ماي وشرابت بيت الشيخ عامر لاتخلن مره تعطش ابيته
ردن علي حاظر عمه وعيونهن مني زعلانات علي ذني بنياتي احبهن بنات حماي وولد عمومتي

طلعت من الصاله توجهت للمطبخ كل اليشتغلن ذبن من ايدهن ووكفن
عرفتهن مستحيات الكل يحس بالذنب اتجاهي بس ياهوو المذنب
سلمت عليهن
..گواچن الله نجازيجن بافراحجن
وحده تعاين الوحده وردن علي گوه حيلج
اي انه هذا الأريده اريد حيلي يگوه

طلعت منهن وانه واگفه قريب للباب ارحب بالنسوان التجي الكل متعجبه مني هيج انه موقفي صعب زين لشوكت اكدر اتحمل وادوس على روحي واقوي اعصابي
بيتنه جبير جبير كلش بي بابين كل باب يطل على شارع من عربنه باب النسوان صار من جهة خوالي وبيوتهم
وباب الزلم من جهة بيوت عمامي وولدهم
الكل هنا اولاد عم
رحب بالنسوان
سمعت صوت المهاويل
صعدت الغرفتي اريد اشوفه اريد المحه عيونه تلمع فرحان ضميره مرتاح

رحت الغرفتي گعدت ع الجربايه مابيه حيل اوگف واعاين حيلي باد ادي ترعش
تذكرت سنين حبنه
من الصغر انه اله وهوه الي
كل مااشوفه اشوف مستقبلي بي
فهد اكبر مني بتسع سنين من صرت انه الفهد رغم انه مدلليني وادري لو رافضه محد يعارض ويجبرني
بس كبرت وصار الي كلشي من اشوفه اشوف وياه المستقبل
جنت وين مايروح انه افتر وراه من كبرت وعرفت روحي احبه صرت استحي منه واتختل منه حته لايكشفني
بس هوه يشوفني مثل مااشوفه حاول هواي وبيين حبه الي وصار حبنه اقوه من كلشي
انه ماكملت دراسه اخذت شهادة ثالث وگعدت
ماجنت احبها وواهسي مو يمها واهسي وبالي وي محبوبي
بوكتها جان مكمل دراسه ومتفرغ وي عمي للديوان
قرر عمي يزوجنه
تزوجت وانه طفله عمري ١٥بس مايوم تندمت على حبي اله وزواجي منه والهسه مامتندمه رغم الالم البيه
اجه ابالي من جنه نلتقي قبل الزواج
نروح نگعد يم النهر اروح بعلم امي تعرف وي فهد ماينخاف علي وانه مسمايه اله
چان يگلي هالنهر يشهد اعيشچ اميره
بنت عمي وبنت گلبي

..فهد تحبني مثل مااحبك

..احبچ اكثر

..شمدريك انت بحبي شكثر

..شگد ماتحبيني انه اكثر

گمت وگفت ع الشباك اريد اشوفه وين الأكثر بحبك
وگفت گبال الشباك اريد اتنفس احس روحي مخنوگه شي كاتم على صدري. اتمنى اصيح اخخخخخ ودي صوتي يوصل للسما

اسمع صوت المهاويل اصواتهم حزينه حته بالفرح
صوتهم يمثلني الحزن الي بصوتهم بيه
دبجات الزلم احسهم يدبچون بگلبي ....وي كل دبجه ينداس گلبي وينكطع بي شريان

ظليت افرك بصدري اريده ينشرح
اليوم حنة حبيبي وصديقي

فززني صوت كرم

..يمه انتي هنا

..هلا يمه اي هنا حبيبي رايد شي

..لا بس ابوي كل شويه يسأل عليج وهسه وداني اشوفج

..ماكو كلام اكدر اجاوب بي سكتت وانه ماعرف ابقى على وضعي هذا لو اتغيير
الهي هديني مااريد افقد اعصابي واتأذه

..شيخه شيخه انتي هنا

..ها سعاد.هنا انه وين اروح شبيكم مخبوصين

..ابو كرم طالبچ

تجمد الدم بيه حراره صعدت الراسي وبروده صارت باطرافي
احس احساسي متضارب بيه بروده چني بقالب ثلج
وبيه حروره جني بموگد نار
سبقه عطره شفت يدت الباب انفتحت غمضت
يارب دخيلك قويني
مااريد اضعف طلع من گلبي مااهتم ليش اهتم فات هوه وكرم طلع
شفته بهيبته ونفس الجمال كل يوم بعيني عريس واليوم صدك عريس طوله حلوو طويل اجتافه عراض شماغه الأبيض واسوود وعگاله الي مگعده واميله شويه
بشت ابيض مطرز بخيط الذهب
ساعته وبروشه الذهبي دشداشته البيضه مثل بياض نيتي وياه گبل اليوم
اباوع لعيونه الحاده بيهن لمعه وبيهن فرح وحزن ابو عيون الكحيله معقوله من اليوم ماعدت الي
لحيته وتحديدها مسويها مثل مااحبها كل مره محدده من يم رگبته وحنچه

صوته الجهور بمسامعي مثل نسمة هوه بارده تلاعب غصن اخضر

..شيخه الغاليه بنت گلبي انتي الأصل بنت العز والكرم تربات ايدي

..مبارك شيخ منك المال ومنها العيال گلتهن وانه اتصنع القوه اخر كلمه طلعت مني العبره خانتني وخلت صوتي يرجف
تقرب عليه نزلت مني دمعه شارده من بين المدوع الي انحكم عليهن بالسجن
حته ابقه قويه .تقويت گدام الكل بس ضعفت يمه
بيين عليه انكساري قرب عليه مد ايده يمسح دمعتي وصلت ايده قريب الخدي وخرت عنه رجعت ومسحتها بأيدي

..دير بالك تمد ايدك علي من اليوم تنساني كلشي بينه انتهى

..تدرين بيه مااگدر

..تگدر ايام وتتعود

..شيخه انتي الغاليه حبي الأول والأخير ام كرم الغالي فرحتي بدنياي انتي شمعة ايامي المظلمات ليش تزيدين همي وتحمليني فوگ طاقتي تدريني مااگدر على زعلج

..تصنعت القوه وجاوبته تتعود وانه ماغشيتك گتلك تتزوج غيري تنساني

..تعرفين السبب وتدرين مااكدر انساچ

..ماكوسبب يشفعلك

..اتحبيني ماتسويها

..احب روحي اكثر

..چا ليش انتي اغلى من روحي

..هذا حچي

..مااحچي شي ماحاسه لأن ماخايف حته ابرر

..احساسك بعد اليوم مايفيدني

..ماتگدرين بدوني

..أگدر وراح تشوف

نفض عباته بقوه وعافني وراح

يتبع ...

شلونكم حبايب
Solen-20