رواية قصص رومانسيه الفصل الخامس والأربعون 45 - بقلم الحساب مغلق

السلام عليكم اني نور من بغداد  الاحداث بلقصة كولهة حقيقية ماعدا الاسماء والاماكن بدلتهن اني  ..... تابعو ❤
اني بنية يعني شكلي مقبول حلوة ابوية متوفي من واني صغيرة وامي تزوجت وراه علمود متبقة يم بيت خالي لان متحبهم  متزوجة رجال وردة يعاملني احسن من ابوية عمرة محسسني بلنقص ودائما يسويلي الي اريدة حالتنة جانت زينة واني الوحيدة بلبيت يعني المدللة والدلوعة
جنت اكره المدرسة بس باقية بيهة على عناد كرايبنة لان يتفقدون اخباري اول باول 😂 ويكولون هي هاي مابراسهة حظ للاعدادية وتبطل
امي: نور كعدي راح تتاخرين
كعدت بدلت وصلني عمو محمد للدوام لان يومية هو يوصلني بسيارتة ويروح للدوام هو ةامي موضفين ثنينهم
تلكتني المدررسة اول درس نور مستواج الدراسي حيل تعبان واذا بقيتي هيج مدخلين بكلورييا السنة ) اني جنت سادس )
اني : ست ممكن احجي وياج على انفراد عندي اسبابي
المدرسة : بلفرصة تعالي لغرفتي
صارت الفرصة واني احضر جذباتي شفت كزيز بلساحة اذيت ادية شوية ورحتلهة
ممكن ادخل ست تفضلي نور
احجي شنو اسبابج الي تخليج بهلمستوة الضعيف
اني بدت دموعي تنزل ست اني ابوية متوفي وامي متزوجة ورجل امي ميقبل ادرس دائما يأذيني وكل ميشوفني ادرس يضربني علمود مادخل جامعة وتزيد عليه المصاريف وشوفي البارحة جنت ادرس باعي شلون ضربني
شافت ادية شلون مشككات شوية وتبجي زين امج تدري يي تدري بس متحجي لان تخاف يطلكهة وترجع يم خوالي خوالي اتعس منة
زين حبيبتي مسحي دموعج ورجعي الصفج اني حساعدج
اني : بس ست ممكن طلب
تفضلي
ست ممكن هلموضوع محد يدري بيه لان اضوج الناس تباوعلي بشفقة وهو يبقة رجل امي ماريد احد يحقد عليه او يحجي عليه حجي مو حلو 
المدرسة : صدك كبرتي بعيني نور ماشاء الله عقلج اكبر من عمرج رجعي للدرس واني حساعدج بلبكلوريا بس شدي حيلج بلامتحانات النهائية لان ماكدر اساعدج بشي
اني : شكرا ست وان شاء الله اشد حيلي من هسة واكون عند حسن ضنج

رجعت للبيت فرحانة هاهية حخلصهة اكل ونوم وداعا للدراسة جان المفروض اسوي هلطريقة من زمان
كعدنة ع الغدة اني وامي وعمو محمد
عمو محمد : نور شبيها اديج بابا هاي شوكت متأذية
اني : لا عمو ماكو شي من وحدها هيج
عمو : شنو من وحدها احجي ابوية شبيج اعرفج من تضوجين
اني : عمو اني مستواية مو زين بلدراسة والمدرسات دائما يرزلوني لان ارسب و..
عمو : يي كملي
اني : السادس صعب ويحتاجلة مدرسيين خصوصين لكل المواد بس اني مكدرت اكول ادري بيك ماعندك
عمو : اروحلج فدوة باباتي هيج ضامة السالفة بكلبج ومأذية روحج علمودي
اني : طبعا شعندي غيرك حبيبي انت
عمو : تروحلج فدوة كل فلوسي كليلي اي مدرس تردين واني ادفع
اني ردت المدرسيين علمود طبة وطلعة لا اكثر
بديت اروح واجي مدرسيين ومستواية بعدة نفسة والمدرسة ساعدتني علمود ادخل بكلوريا
ودخلت حمد لله واجة وقت امتحانات النهاية
المدرسة:  نور وفيت بوعدي ودخلتج بكلوريا اوفي بوعدج وشدي حيلج ونجحي
اني : ماشي ست ان شاء الله اجت الامتحانات شديت حيلي علي درجة نجاح يعني اريد ٥٠ ماريد اكثر 😂
وصلنا الامتحان الانكليزي ) اني جنت ادبي (
اني اطرش بلزفة بلنكليزي واصلا دخلت بكلوريا واني طالعة بلنكليزي يمكن جان عندي ٣٠ لو اقل 😂😂
متعبت روحي بلقراية بيوم الامتحان لان شكد ماقرة مراح انجح خلصتهة براشيم كل الاشياء المهمة برشمتهة .. ودخلت لقاعة الامتحان 😭

ياحضي الاسود اجاني بس سؤال من الي مبرشمتة وكتبتة بس مراح ينجحني ع القليل لازم سؤالين اجاوب جانت بنية شاطرة كدامي اسمها نهى
نهى نهى سؤال ثاني هي مغلسة
ولج سؤال الثاني مغلسة خرب راح ارسب 😭
كتبت اتمسلت كولة من كلبي مليت الدفتر ضميت البراشيم الي مااجني بقاعدة حذائي وشمرت البرشومة الي اجة سؤال منهة جوة رحلة نهى
سلمت الدفتر وطلعت وكفت يم الباب
ست ممكن اكولج شي
المدرسة : نعم تفضلي
اني : صحيح الفتنة اشد من القتل بس صديقتي اريد مصلحتها ونصحتها بس مفاد
المدرسة : شتحجين ماما ؟
ست البنية الي قبل الاخير صديقتي وجانت تبرشم روحي تأكدي
يتبع ...

لزمو نهى بلجرم وعلسنهة وهي خطية باقية تبجي وتحلف
هو الي يغش يعيد السنة
بس هي اشو خلنهة تمسح السؤال الي مكتوب بلبرشومة وتسلم الدفتر يمكن نقهرن عليهة الحاصل اني طلعت ناجحة كولهن ٥٠  اعلا درجة عندي ٥٦ 😂😂 بس بلنكليزي مصخمة جايبة بلطعش
رحت امتحن دور ثاني لاكيت  نهى هناك
صاحتني نور نور الله ليوفقج ليش سويتي هيج
اني : حبيبتي لو كولنا ننجح سوة لو كولنة نرسب سوة
نهى : تدرين لو ما عملتج جان اني جبت  مية الاجوبة كولهة جنت اعرفهاا
اني : ومن جنتي تعرفين الاجوبة ليش منطيتيني وياج عيني انتي وحدة لئيمة والله دزلج وحدة الئم منج تكسر خشمج
بعدين شبيه الدور الثاني وناسة
طبيت متحنت اريد انجح بيه شلون مجان حتى اذا قرار 😭
وفعلا طلعت النتائج ونجحت بقرار واحتفلنة اني وعمو وامي فرينة بغداد كولهة وكولساع واحد جايبلي شي هاية للجامعة وهاية للكلية 😂
جنت اريد ادخل كلية اهلية بس جان الاقصاد مالتهة عالية كولش وحاجيت امي وعمو ومقبلو گالو معدنة هلكد ننطي
بس اني من يدخل شي بعقلي  اسوي يعني اسوي كيدي عظيم مو بيدي
شفت عمو كاعد يتفرج تلفزيون
رحت كعدت يمة اني : عمو فدوة اخر طلب ادفعلي القسط حتى اذا بس هاي السنة والباقيات اني ادبرهن
عمو : شلون تدبريهن
اني : اشتغل وادبرهن
عمو : بابا نور اني وامج نشتغل ومكادرين نلمهن هلكد شلون انتي وحدج تكدرين بعدين حتى اذا نطيتج مال سنة الي وراهة منكدر ننطي وحرامات هيج تروح الفلوس
اني : عمو هسة شعليك انتة العليك تنطيني بس هلسنة
عمو : كتلج ماكو شكو تلحين ( بعياط) 😭
اني: اوك عمو مراح الح عليك بس لتتندم بعدين
اني مستسلمت بس جنت اخطط شلون اقنعة بطريقة ثانية 
امي : شبيه محمد جان يصيح
اني : مابيه شي اني وحدة حقيرة وطايحة حظ
امي : ليش شكو شسويتي ولج
اني : كتلة اريد ادخل الجامعة الي كتلكم عليهة وكام يصيح علية كال متعيدين هلموضوع مرة ثانية ترا اطيح حظج احس عمو محمد متغير علية صار فترة
امي : لا يحبج بس تعبان هلفترة

مرت ٣ ايام رحت كعدت يم عمو محمد
اني : هلو عمو شلونك صار هواي ممسولفين سوية
عمو: تعالي حبيبتي اني همين مشتاقلج شلونج
اني : مو زينة
عمو : ليش منو مضوچج
اني : انتة متقبل تنطيني الاقساط
عمو : نور حبيبتي اني من شوكت مخلي شي بنفسج بس هاي ماعندي كل سنة انطي هلكد فلوس
اني : بس اني كتلك بس هلسنة نطيني الباقيات اني ادبرهن
عمو : واني كتلج ماكو لتلحين عافني وطلع من البيت
هلحجي الصبح وامي بلدوام
شفت انو ماكو امل ينطوني بلعيني والاغاتي خلي اجيهم بلعين الحمرة
اجت امي من الدوام
نور وينج نور اني جنت ابجي واعيط
امي : شكو شبيج شصاير احجي
اني : عمو محمد ضربني لان عدت موضوع الجامعة
امي : شنو ضربج مو من عوايدة يضربج خاف تجذبين ولج
اني : هو عمو يكرهني وانتي متصدكين بية راح اروح لخوالي احسن وخري خلي الم غراضي
امي : شترحين لبيت خالج ولج ترديهن يجون يكتلوني اني وعمج هسة ( بيت خوالي يحبون المشاكل ويدورون العركات دوارة امي تعرفهم زين وتخاف منهم كلش )
اني : لعد اخليكم انتو تكتلوني النوب حتى جامعة متقبلون ادخل راح تحبسوني بلبيت وخري عني خلي اروحلهم
امي : ولج كعدي يجي محمد واني اتصرف وياه لاتسوين مشاكل
اني : بس اني ماريد تحاجيه اريد اروح لبيت خالي هناك اريحلي
امي : زين كعدي وادفعلج الاقساط السنة
اني : لتكذبين ماعندج فلوس
امي : ادبرهن كعدي
اني : اذا تكذبين علية اروح لبيت خالي
اجة عمو وحاجتة امي وتعاركو بس عمو منكر گال ي ضربتهة لان يدري اذا نكر اروح لبيت خالي وبيت خالي يكيفون وبجون يتعاركون وعدهم استعداد يحطو ويكتلو وهو رجال فقير مو مال مشاكل
فكال اني متندم وحنطيهة نص الفلوس وامي نص بس معليهم بلسنوات الباقية اني لو ادبرهة لو ابطل
دخلت الكلية الي اريدهة وشتريت احلا ملابس واغلا ملابس واني حلوة طلعت فد شي يعني يومية اكعد ٣ ساعات ابدل وامكيج وارتب 😂
عمو ضل ممرتاح بلبيت كال لامي راح يسافر فترة يم اخوانة بتركيا قبل ميسافر بيوم
رحت كعدت يمة
اني : عمو تدري اني شكد احبك والله اكثر من امي بس تدري انتة من اخلي شي براسي لازم اسوي وانتة وامي مقبلتو مبقت بس هلطريقة وسويتعة اسفة واتمنى منك تسامنحني
سودة علية عمو جان ذبلان لان جان واثق بية ويحبني واني مثل الي طعنتة يمكن متصدكون بس اني احبة اكثر من امي وابوية الله يرحمة اكثر من روحي حتى
مرد علية بس بجملة لحد هسة براسي كلي اني مسامحج بس راح يجي يوم انتي تردين تسامحين نفسج بس متكدرين وطلع من البيت
والله دائما جنت ادعيلة انو يرجعلنا اخاف يبقة هناك ميرجع حياتي بيهة نقص بدونة عمو حبيبي 💔

جانت عندي صديقة وحدة تعرفت عليهة من الكلية بنية حبابة اسمها فرح وردة فد يوم جنة كاعدين بلكافتريا دنشرب عصير دخل ولد جمال باناقة بكشخة بترتيب  عارض ازياء مو طالب ضليت صافنة عليه بعدين درت وجهي سويت روحي ممنتبهة عود ثكيلة وكذاا
فرح : نور باعي المصيبة
نور : ياستار من المصيبة شكو
فرح : لج باعي الولد الي كدامنة
نور : يي شفتة شبيه ؟
فرح : لج شنو شبيه يجنن
نور : ممم ع روحة شأسويلة
فرح : دنجبي عوفي الثكل ع جهة اني همين جنت ثكيلة لحد ما شفتة وزحفت
نور : ههه بس اني مختلفة عنج اني الناس تزحفلي مازحف لاحد حياتي
فرح : الله يقوي ايمانج 😂
ضليت دائما اراقب بيه وجمعت معلومات كافية عنة اسمة كرار عمرة ٢٤ مرحلة ثالثة ولد زنكين سيارتة اخر موديل ملابسة احلا ملابس  ويجنن سمار ع طول ع ضخامة ع العيون سود يجنن والشعر اسود وسرح شحجي مينوصف ابد دائما جان يمشي وي ولد زاحف اسمة ايهاب يذبلي حجي دائما كول ماشوفة ابتسلمة من اشوفة وحدة گاعد اسلم عليه وافوت هو عبالة اني معجبة بيه بس لا جان هو الوسيلة الي حيقربني من كرار
_____
امي : شلونة الدوام
اني : زين الحمد لله
امي : من لحيتي الة تدخلين هلسنة جامعة
بعدين شلون ادفعين السنوات الجاية وانتي حتى شغل ماكو كاعدة وساكتة
اني : والله لحيتو هواي هسة الله كريم منا للسنة الجاية 
فد يوم واني بلدوام شفت ايهاب گاعد و وبنية من قاعتي گاعدة قريبة منة ع المسطبة  فسلمت عليهة كتلهة خاف احتاج محاضرات اريد رقمج نطتنياه وكتلهة خلي اردلج رقمي حتى خاف تحتاجين شي راسليني رديتلهة رقمي بس مو هي المقصودة بلرقم ايهاب يعني رقمتة بطريقة غير مباشرة عرفت هو سجل الرقم قبل متسجلة هي كتلهة يلا باي اروح اشوف صديقتي  كمت من يمها رحت لفرح مثل كل يوم نكعد ناكل ونحش بلناس بعدين رجعت للبيت شفت ماكو اي رسالة من ايهاب كلت يجوز مسجل الرقم بالة مجان يمنة سديت الفون ونمت

واني نايمة دگ تلفوني گعدت لكيتة رقم غريب
عرفت بيه ايهاب مرديت عليه سديتة ونمت
رجع دگ همين مردين جنت اريدة يدز رسالة المكالمة متفيد الحاصل دك شكم مكالمات مرديت شوية وجتني رسالة : هلو يبنية شلونج اني ايهاب الولد الي جان كاعد اليوم يمج انتي وصديقتج اخذت الرقم من جنتي تردينة الصديقتج لج فدوة اروحلج ع هلجمال والنزاكة ردي ع المكالمات فدوة العينج
رجع دز دك مرديت ورجع دز رسالة : لج الو ليش متردين ياعيني مو حتخبليني عليج بس اريد اسمع صوتج اعرف. اسمج معجب واريد اتعرف مرديت سويتة صامت ونمت
ثاني يوم داومت شفتة ديمشي هو وكرار اني عيني ع كرار وهو الاثول مبتسم عبالة صافنة عليه  فجنت بلمحاضرة اني وفرح وناسية اسوي تلفوني صامت جان تجيني رسالة : الو يبنية ممكن اليوم اشوفج بلكافتريا ونطاني الوقت
رزلني الاستاذ گدام الطلاب صدگ فشلت ودمعتي بعيني خلصت المحاضرة طلعت اني وفرح كالتلي خوما ضايجة كتلهة يي شوية خلي نتمشة حتى تروح الضوجة فرينة الكلية كلهة
فرح : لج نور مراحت الضوجة تعبت كولش
اني : لج بعد شوية خلي نتمشة تدرين اني احب اتمشة وياج يتعدل مزاجي اني جنت ادور ع كرار بلكي اشوفة واخيرا 😍
شفتة واكف وحدة وملزمة بيدة كتلهة فرح روحي حتبدي المحاضرة
فرح : لعد وانتي
اني ماريد ادخل محاضرة مالي واهس
فرح : لعد ابقة وياج
لا لا روحي حبيبتي اريد اكعد وحدي شوية والحكج
فرح : اوك لتتأخرين
راحت فرح رحت مشيت عليه كتلة اريد احجي وياك  ؟ هو عبالة حكولة معجبة بيك وخلي نكبل  لان متعود ع هلمواضيع  البنات دائما يعترفنلة
كرار :  : لا اسف اختي عندي محاضرة ورايح هسة حتأخر
اني : بس اني كتلك اريد احجي مكتلك ممكن احجي  ؟
هو : واني كتلج ماعندي وقت
اني : اسمع اخوية مجاية احجي وياك لان عاجبني احاجيك او لان معجبة بلحجي وياك
اشوف ولد دائما يمشي وياك
هو : ايهاب شبيه
اني : يي هو هذا رجاءا كول الصديقك ليزعجني ترا ديسويلي مشاكل بلبيت وبلدوام يعني ب ١ بليل يتصل علية ويدزلي كلام مدري شلونة واليوم بلمحاضرة دزلي رسالة وترزلت من وراه
هو : شدتحجين عيني انتي يمكن غلطانة
اني هاك شوف بعينك وتأكد من الرقم
هو تأكد من الرقم اسف اختي راح احاجيه وان شاء الله ميسويلج ازعاجات مرة ثانية
اني : تسويلي معروف اذا حاجيتة لان اني مو من هلنوع الي متوقعة هو اني بنية بنت ناس وجاية هنا للدراسة مو هلسوالف
هو : اعتذر مرة ثانية ميكرر

ثاني يوم داومت جنت منتضرة فرح لان الي تجي اول هي تنتضر الثانية فشفت كرار جاي علية يمشي 😍 اني سويت روحي ممنتبهة
كرار : صباح الخير
اني : صباح النور نعم تفضل ؟
كرار : حاجيت ايهاب البارحة وكتلة ميكرر الموضوع مرة ثانية وميسببلج ازعاج
اني : شكرا تعبتك اخي
كرار : لا ماكو تعب واذا تكرر الموضوع كليلي واني الي تصرف ثاني وياه
اني : اوك
شفت فرح جتي
كتلة يلة باي جتي صديقتي
هو : الله وياج
دخلنة محاضرات اني وفرح كتلهة امشي نشرب عصير
فرح : اي على حسابج
اني : ههه اوك امشي
دخلنا اني وفرح الكافتريا فشفتة هو كاعد هو وايهاب وبعد بنات ثنين ومجموعة ولد مجتمعين ياكلون
كعدنا اني وفرح اجة علينا كلي تعالو كعدو انتي وصديقتج يمنة معزومين على حسابي
كتلة ليش ناكل وياكم ؟
كرار : عزيمة اعتذار عن الي صار
اني : بس انت اعتذرت بيومهة واني قبلت اعتذارك ماكو داعي شكرا
فرح : امشي نور عليج الله جوعانة اني
نور : روحي اذا تردين
فرح : لعد وانتي
نور : اني حشتري عصير واروح للمحاضرة خلصي اكل وتعالي
فرح : اوكي
رحت اشتري عصير اني اموت ع عصير العنب اذا ماشربة يومية اتمرض
شتريت اريد انطي الفلوس جان يكولي لاا على حسابي
اني : اوف ياحسابك ترا مو انت الوحيد الي عندك فلوس وتكدر تعزم على حسابك
اني همين عندي فلوس واكدر اشتري ع حسابي واعزم ع حسابي
كرار : صدك مجنت اعرف زين فد يوم عزميني ع حسابج مدام عندج فلوس وتكدرين تعزمين على حسابج 
عفتة ومشيت فدوة سوالفة شلون تجنن 😂
شايفين المثل الي يكول خالف تنعرف  اني جنت اطبقة عليه لان جانن البنات كولهن ذابحات روحهن عليه فشي غريب عندة وحدة متتطيه مجال  بس بهلطريقة حيعرفني
جتي علية فرح شصاير نور ع شنو الاعتذار
اني : سوء فهم صغير لتدوخين روحج ها شبعتي ام بطن ؟
فرح : لا ماكلت شي ضليت صافنة ع كرار وهو ياكل
ثاني يوم جنت همين منتضرة فرح جان يجي علية كرار
كرار : شكد حلو وهسة وحدة عدهة فلوس وتعزمني على حسابهة
اني غلست بعدين كوتلة اوكي اعزمك بس بشرط
كرار : شنوكولي

اذا سئلتك فرح ع شنو اعتذرت مني جاوبت اي شي لتكوللهة ع السالفة الي صارت وي ايهاب
كرار : ليش
اني : لان هي معجبة بايهاب واخاف من تسمع الي صار تزعل مني واني معندي غيرهاا هنانة
كرار : هاهية ادللي يلا عزميني
اني : لا هسة عندي محاضرة ومنتضرة فرح عود اني اكولك بعدين تجي اعزمك
كرار : شلون تكليلي
اني : عود من اشوفك اكولك
كرار : زين واذا مشفتيني شلون
اني : هاهية تروح عليك العزيمة
كرار : زين انطيج رق..
اني : يلا جتي فرح باي اشوفك بعدين 
دخلنة اني وفرح محاضرات خلصت المحاضرة جينة نطلع جان اشوفة كاعد كدام قاعتي 😍😂 يعني عود صدفة كاعد ممتقصد مسوي نفسة ممنتبه اني همين غلست وسويت روحي ممنتبهة جان يصيحني ام العزيمة ام العزيمة
نور : ترا فضحتني كولهة درت حزمك اسمي نور
كرار : هههه اوك
نور : يلاا خلي اعزمك قبل متفضحني اكثر
فرح : احم شو صايرة عزايم وكذا شكو 😅
اني : ههههه لا ماكو شي بس البارحة انتي ماكلة هواي على حسابة فراح اردهة الة
فرح : يلا لعد امشو خلي ناكل ع حساب نور
دخلنة للكافتريا كتلهم انتضرو هنا هسة اجيبلكم غراض العزيمة واجي
جبتلهم عصير عنب وجيت
كرار : وين العزيمة
اني : هاي شنو مو قوطية عصير
فرح : ترا هاي عبالهة الناس كلهة تحب عصير العنب مثلهة هي يومية تشتري كومة منهة وتضل تشرب النهار كولة
كرار : ههههه يلا عادي اني همين احبة
خلصنة العزيمة مال فكرية وطلعنة 😂
جان يكولي عود اردها الج واشوفج العزايم الزينة
كتلة لا اني مااكل هنا علمود ماشبع ويفوتني طبخي بلبيت
كرار : تعرفين تطبخين
نور : ييي كولشي
فرح : اشو مكايلتلي تطبخين ؟
نور : هههه مو كتلج بس متذكرين يمكن ) فضحتني 😭)
ضلينة واكفين شوية دقيقة صمت
جان فرح تكول يلا امشي نور خلي نروك
كتلهة يلا امشي باي كرار
كرار : انتضري
نور : نعم
فرح : نور اني حروح قبلج تعاي وراي بس استعجلي راحت فرح
جان يكولي نور نطيني رقمج
نور : اذا عزمتك وحجينة شوي المفروض تاخذ رقمي
كرار : لا بس خاف تحتاجين شي
نور : اذا حتاجيت مو بعيد عود اجي اكولك يلا باي
ضل يومية يسلم عليه ويسولف وياية فد يوم جانت نجاية فرح وافتر لوحدي جان يجي يمي  ..

كرار : ها نور اليوم وحدج
نور : ييي فرح غايبة
كرار : وانتي علمود هيج ضايجة
نور : ييي اشعر بلوحدة
كرار : زين اعتبريني فرح اني بدالهة اليوم
نور : ههههه لاا محد يكمل يومي مثلهة
كرار :انشوف
رحنا للكافريا  ضلينة نسولف كال امة بيت خالتة صارلهة اسبوع ومخلصهة ع اكل المطاعم خطية حار شجابلي لان ضايجة ع فرح وكل ساع ويجيبلي عصير عنب كرهني بريحتة 😂😂
جان كلي خلي نطلع من تخلصين محاضرات
كتلة لا مااگدر
كرار : بمكان عام نفتر
نور : نكدر نفتر هنا
كرار : انتي ليش تعارضين ع كلشي
نور : هاي شخصيتي ماحب الناس تاخذ عني نضرة غلط واذا زاعجتك شخصيتي تكدر تروح لان مو ممكن اغير اطباعي علمود اعجب احد
كرار : لا اسف مو قصدي بلعكس شخصيتج حلوة انتي بريئة وطيوبة ومبين عليج متحبين تأذين احد وشخصيتج قوية واني ذني الصفات احبيهن كولهن
نور : ييي شكرا من ذوقك
كرار : زين واني شرأيج بشخصيتي
نور : انتة تحب تفيك بفلوسك هواي واني ماحب الولد الي يفيك وتحجي وي البنات هواي واني احب الولد رزن ميحجي وي هاي وذيج وبعدين
كرار  : هاا اوك
يلا حروح للمحاضرة باي كرار : خلي اوصلج
طلعت من المحاضرة لكيتة منتضرني
نور : شنو انتة متدخل محاضرات
كرار : لا هسة طلعت
ضلينة النهار كولة نفتر سوية
رجعت للبيت امي امي
ماما ها نور شكو
نور : يوم باجر عدنة عزيمة سويلي جدر دولمة
ماما : متسوين انتي شكبرج بعد تصيرين
نور : هو اني الطباخ ماعرف اشعلة
ثاني يوم كلت لفرح عندي شغلة
رحت شفتة من بعيد
نور : هلاو كرار شلونك
كرار : هلو حمد لله وانتي
نور : البارحة تعبتك وياي كولش
كرار : لا نور تعبج راحة بلعكس تونست البارحة
نور : هاي هدية الك.

رجعت للبيت سئلت امي يوم شنو عمو محمد ميرجع بعد شو تأخر بجيتة
امي : اليوم خابرتة عمج مريض وراح يبقة بعد فترة هناك
اني ضجت كولش رحت خابرت عليه
اني : هلو عمو محمد شلونك يكولون مريض عمو محمد : مابية شي بس تعبان شوية
اني : عمو تعال هنا واني اهتم بيك لتبقة هناك محد يمك عمو خوما بعدك شايل بكلبك علية ترا اكتل روحي
عمو : لا مزعلان يلا باي
اني احب عمو وهو زعلان مني صدك شي يأذي ثاني يوم داومت ضايجة
كرار : هلا نور شلونج
نور : نعم
كرار : شبيج ضايجة شكو
نور : مبية شي عوفني بحالي ولتلح هواي وتمشي وراي من مكان لمكان
عفتة ورحت
خلص الدوام رجعت للبيت دگ علية رقم غريب مرديت جتني رسالة : هلو نور اني كرار ردي علية رجع دگ رديت عليه نعم كرار شرايد
كرار : بقة بالي يمج شبيج اليوم
كتلك مبية شي
كرار : نور اني احبج انتي خوش بنية وثكيلة وماعتقد راح الكة وحدة مثلج بهلبرائة والاخلاق
نسيت ضوجتي وفرحت بس مبينت فرحانة
نور : كرار انت همين ولد حباب ومتتعوض بس اني تعبانة هلفترة مو وقتهة
كرار : ع راحتج يا روحي انتي واني اعرف شلون اروح الضوجة منج
نور : شنو همين حتجيبلي عصير عنب 😂
كرار : والنبي اجيبلج ١٠٠ صندوك عصير عنب مو واحد
نور : يي هيج يتعدل مزاجي
كرار : دللي بس حجيلي شبيج اليوم
نور : عمو محمد رجل ماما مسافر ومريض وضايجة عليه
كرار : هو وامج منفصلين  ... لاا .. لعد ليش عايفكم ومسافر .. هاا لان اخوه دز عليه هناك مريض يريد يموت
كرار : لعد يجوز تعبان علمود اخوه يلا ان شاء الله يرجعلكم بلسلامة
ضلينة نحجي شوية بعدين نمت وهو سدة
ثاني يوم دزلي صورة مال عصير كومة كلي شتريتة الج وين انطيني مكان بيتكم اوديه
اني مقبلت كوتلة شكول لامي مقبلت
كال ماشي ماجيبة بس بشرط تقبلين لهدية الثانية كوتلة اوك

نور : شنو الهدية الثانية
كرار : الهدية الثانية انتي
نور : شنو جايبلي اني مفهمت هههه
كرار : هههه يي هدية تشبهج
نور : شوفني 😍
الهدية كلادة بنية عدها جناحات
حلوة بس شلون تشبهني
كرار : هاي ملاك مثلج انتي ملاك
اني ضحكت هههه شكرا حبيتها كولش
جتي فرح صاحتني ورحنا سوية مو وقتها ابد 😭 جانت دائما تجيني بلاوقات الي اعيش بيها اللحضة
بعدين قررت احاجيهة نور ؛ فرح انتي صديقتي واحبج كولش تدرين صح
فرح : ي ادري حبي بس شنو مناسبة هلحجي
نور : اني ماكدر كول وقت امشي وياج انتي ماعندج احد غيري ولازكة بية طول النهار طريقي مداشوفة من وراج 
فرح : ي هاهية فهمت حقج اني لزكة هاي اخر مرة اجيج واحجي وياج شوفي طريقج
عافتني وراحت اتصلت ع كرار ابجي كرار : شكو شبيج حبي ليش تبجين منو مضوجج نور : تعال لهلمكان واني احجيلك اجة كرار خايف شكو احجي نور : فرح عافتني كالت هاي اخر مرة احاجيج وانت تدري بية شكد احبها .كرار : ليش شصاير خاف ضوجتيها
نور : لا مو صح اني مااكدر اضوج احد بس هي قرت الرسائل الي دازها ايهاب القديمة وزعلت كالت انتي مو تدرين اني معجب. بيه ليش مشوفتيهن الي
كرار : معليج لتبجين اني احاجيها
نور : لاا لتحاجيها تضوج لان حجيتلك اذا حاجيتهة ازعل عليك
كرار ؛ كافي لتبجين ترا هسة احرك الجامعة سكتي
نور : ماكدر مو بيدي اصلا اني محد يحبني كولهة تعوفني دائما ابوية عافني عمو محمد عافني وفرح همين وحتى انتة يجي يوم وتعوفني مثلكم
كرار : لتحجين هذا الحجي شعندي غيرج حبيبتي انتي لتنقهرين واني مستحيل اعوفج يا ملاكي
ضل يواسي بية طول اليوم ويلهيني ويجيبلي عصير 😂😁😁😁 كرهني بهلعصير
ورة فترة من هلسوالف رجع عمو محمد فدوة لعينة شكد فرحت بجيتة خابرت كرار وبشرتة وفرح وياية .

كرار خابر علية هلو حبي شلونج
نور : مشتاقتلك كولش
كرار : هههه فدوة حبيبي مو اليوم جنة سوية
نور : يي بس هاي اخر ايام سوية يعني لازم اشبع منك
كرار : شنو اخر ايام ؟
نور : كرار اني السنة دفعولي اقساط اهلي لان لحيت عليهم بس الي وراحة معدهم ينطوني يعني لازم ابطل
كرار : اني ادفعلج الاقساط انتي بس لتحطين هذا الحجي مرة ثانية
نور : وبصفتك منو تدفعلي ترا احنا مو بتركيا علمود حبيبي يدفعلي الاقساط وعادي احنا مبيناتنا شي رسمي
كرار : زين واذا خطبتج ذاك الوكت يصير
نور : ذاك الوكت الله كريم
كرار : نور تدرين احبج ومامستعد ابتعد عنج ثانية انتي بس كولي تعال واني هسة اجيب اهلي واجي
نور : تعال
كرار : تحضري اكول لاهلي ونجي
نور : هههه لا عوفها ع باجر هسة تأخر الوكت 😍😁
اجة ثاني يوم وصدك اجو بس نضرات امة مرتاحيتلهة تباوعلي بلعين الصغيرة لان عود زناكين وهي تريدلة بنت خالة وجتي بس تشوفني واذا معجبتهة تكنسل الموضوع  جتي هي واخت كرار الجبيرة
جان تكول كرار حلو وحباب وعندة خير من الله والف وحدة تتمناه اذا مو علمود جمالة فعلمود فلوسة واني رايدتلة بنت اختي لان الشين الي تعرفة احسن من الزين الي متعرفة
واني جاية بس علمود ارضي الولد لان هو رادني اجي امي ضاجت وطردتها
وهي تطلع كتلهة اخذة برضاتج احسن مااخذة غصبا عليج واكسر خشمج هي تخبلت خلت وطلعت
بعدها خابرني كرار كال شحاجية لامي جتي متخبلة وبس تحجي عليج وتكول صلفة ؟
نور : اني حاجية زين ليش مسئلتهة هي شحجت امي رزلتني وكالت ممنوع اشوفك بعد وهو الاحسن اول شي لان امك متريدني ثاني شي انت معندك ثقة بية صدكت امك وجيت تعيط علية اذا تزوجنة شتسوون بية بعدين ؟ باي الله وياك ان شاء الله تاخذ بنت خالك الي تريدها امك وتتهنون سوة
ورة ساعتين تقريبا خابر كرار مرديت ضل يتصل واني مارد لحد موصلت ١٤ مكالمة رديت : نعم تفضل شنو بعد جاي ترزلني احجي 
كرار : اسف حياتي والله ثقتي بيج عالية بس امي متخبلة وجيت اريد اعرف شبيهة ضايجة سئلت اختي شحاجية وكالت محجت شي امي الي لعبت بلناس طوبة اسف ياروحي والله اخذج اخذج حتى اذا بدون رضاتهم
نور : كرار رجاءا ماريد تصيرلك مشاكل بسببي سد الموضوع امك اهم مني
كرار ؛ انتي اهم من روحي لو تصيرين الي لو احرك البيت هو واهلي واتزوجج
نور : بعدين وين نعيش من تحركة
كرار : بسيارتي نعيش ماحركهة .... كرار رجال كد كلمتة اسبوع ورجعو اهلة مذلولين  وبس اختة تحجي امة ساكتة واني اباوعلها بنضرة متشمتة بيها
ورة فترة قرو الفاتحة واتفقو ع النيشان كرار جان يكولي اريد نيشانج وزنج ذهب 😂 بعدين اتفقو على حاضر  25 وغايب  50
سويت اشتريت ذهب كوومة

جان اجة يوم النيشان لبست بدلة ذهبي وسرحت شعري وهو طويل طلعت فد شي هو تخبل  فدوة هي الناس صافنة عليه وهو يكولي خايف عليج ياروحي راح تنحسدين لك حياتي يحسدوني عليك مو علمود خلقتي
خلص النيشان وداومنة جامعة كولهة تباركلنة والبنات متحسداتني وحتى جتي فرح باركتلي وايهاب همين كولهة
جانت احلا خطوبة بلعالم خطوبتي طلعات وهدايا يعني عبالك بغير عالم 😍 صارت يوم الحنة والعرس بلعطلة ورحنا شهر عسل تركيا لان احبها اني ختاريتها
بعد ٣ اشهر من زواجنة بدة كرار يشتغل وي ابوه يطلع الصبح ويجي الضهر وامة  بهلفترة تضل تضوجني تكرهني بشكل وحقهة بيتهم جبير كولش وكول يوم تكولي نضفي اني جنت اكوللهة اوك واروح اكنك وانام ومن يقرب جية كرار للبيت اني اكوم اشتغل وهو يومية يشوفني اشتغل ويكولي سودة عليه حبيبي لتشتغلين ماريدج تتعبين ويجيبلي الغدة لعندي للغرفة وكلساع يسئلني تردين شي حبيبي والعصر يطلعني بليل نرجع للبيت
فد يوم همين كلتلي كومي نضفي كتلهة نضفت غرفتي معلية بلباقي كتلهة لتلحين وياية ترا اخذ رجلي ونطلع
امة : ولج انتي جلبة عبالي نعدلتي ورة الزواج بس ماكو امل بيج
اني : لزمت تلفوني ودگيت ع كرار
كرار : شكو حبيبي شبيج
نور : كرار تعال للبيت امك حتذبحني لان مريضة ماكدر انضف اروح لاهلي للبيت لو تجي تحل الموضوع
كرار اجة وتعارك وية اهلة وكللهم راح نكعد ابيتنة الي مأجريه اطلع الناس ونكعد بيه وداني لاهلي لحد مطلعو الناس من البيت واخذني للبيت مأثثة ومسويه يجنن..يتبع

البيت يجنن وجان كرار الذهب ميخليني اشيلة من الكاع وتجي مرية تنضف بين فترة وفترة
ورة ٦ اشهر من زواجنة طلعت حامل يبووو شكد فرح كرار بس خبلني الدوام كام ميروحلة وباقي يمي يوكلني يشربني ينومني الكلية يبقة وياية ميعوفني ابد  يكولي هي نور وحدة وجنت اخاف عليهة تتحرك النوب نور وملاك شسويلهن اضمهن بكلبي جان يريد نسميها ملاك 😍 مرت فترة ع الحمل رحنا نسوي سونار
وطلعت المفاجئة اويلي توأم بنات
كرار : نور نسميهن ملاك الكبيرة وملاك الصغيرة
نور : شنو قابل بس هلاسم بلعالم
كرار : مو اريدهن يطلعن يشبهنج مثلج ملاك
نور : زين ملاك واميرة مثلي اني اميرة نازلة من السمة
جبت بناتي حبيباتي وفرحنة كولش  بيهن  اني عفت الدوام بلكليا وضليت يمهن كرار حبيبي ممقصر علية بشي وحبة يزيد الي يوم عن يوم  ام كرار زعلانة لهسة مني ومتقبل تدخل لبيتنة كرار دائما ياخذ البنات الهة للبيت تحبهن كولش  فرح بعدها ممتزوجة ودتكمل دراسة
اني كل مبديت اكبر واوعة اتندم ع الي سويتة واتذكر شكد اذيت ناس واكول يجي يوم ورب العالمين يردها الي  كمت اتحلم كوابيس تخوف واصلي وادعي دائما الله يسامحني ع كذبي حتى شخصيتي صارت منعزلة عن الناس  انام قليل اكل قليل اسولف قليل  نصيحة من اختجن لتسون الي سويتة وتصنعن وتبلن الناس ترا احلا شي بلحياة الشخص يكون صادق وعلى طبيعتة لتغلطن غلطتي وبعدين تتندمن الله يسامحني .. اني صحيح غلطت هواي بس الله نطاني فرصة ببناتي اصحح غلطي راح ابني شخصيتهن عكس شخصيتي واعلمهن شلون يساعدن الناس بدل ميضرنهم
قصتي اختصرتها علمود ماطول عليكم والا هي بعد بيهة احداث اكثر الاحداث كولهة حقيقية مزيدت حرف مني
شكرا للمتابعة  وان شاء الله عجبتكم القصه انتظروني بقصه جديده