رواية قصص رومانسيه الفصل الثالث والعشرون 23 - بقلم الحساب مغلق

صفاء: عود هذا عمك كل عقله يحكي؟ يعني شلون أسويها طلابة وياه وأكسر راسه؟ رشا: طلعت روحي وأنا أقنع بمرته تحكي وياه وهي الغمة ولا يمهه، ولو هو أصلاً ما يسمع كلمتها، بس قلت بلكي تسوي شغل وتقنعه. شسوي؟ وبعدين على كيفك عيني رامبو، يا طلابة؟ هو منا دماغه كزمة أديمه، أنوب طلابة تسوي؟ صفاء: دلصمي عاد! فوقاها تدافعين له؟ لج احنا نفس العشيرة، ولد عم احنا. حتى ما خلى خاطر ولا حساب لأحد، وأبوك إيش بيه ما عنده شخصية؟

ويه أخوه ما يحكي شيء وياه؟ أي مو طلعتوا روحي! رشا: لا تحكي على أبويه افتهمت! وبعدين يقول حقه ما انطونه مرة، ما ننطيهم مرة. صفاء: أي وهسه شنو المطلوب مني؟ أطلق بنت عمي من زوجها وأزوجها لعمك؟ خرب بهيج عقول، وأنا إيش علي بابا؟ رشا: أشوف استلمتني حاصل فاصل، قابل أنا الما قابلة؟ شنو بيدي؟ أشوف حالي حالك، خرب حظي وين ما أروح يلطشون بيه. والله أنا خطية. صفاء: يله يا عمري آسف، يا روح الروح أنتي والنفس تزعلين مني غير أنتحر.

رشا: يمه اسم الله عليك حبيبي. صفاء: وعيونك أوقف على الدرج وأكمز من أول باية، أجيت والله ومحد يلحق يلزمني، كل شيء ولا زعلك. رشا: عبالي صدق تنتحر علمودي، خرب. يله أنا هم من فوق الجرباية أذب نفسي وأنتحر علمودك. صفاء: فدوة للمطنكر بنية عمي الحلوة. هسة لو عنده ابن جبير هالأثول أقول حاجزها إله، بس ابنه يلبس حفاضة بعده. رشا: لا تحكي على ابن عمي افتهمت. صفاء: قولي والله. رشا: يله حباب راح أغلق الخط، سامي يصيحني، باي.

صفاء: خرب طبقتها بوجهي العوبة. شفتوا صفاء شكد ينحب. أعرفكم بنفسي أنا رشا، مواليد 1995، عندي 4 إخوان و5 خوات، عايشين بناحية تابعة لقضاء... عايشين ببيت بسيط 100 متر وبه حديقة متر بمترين. حديقة بيتنا أعشقها، كل شيء زرعت بيها. نوبة بامية، نوبة باذنجان، حتى كرفس زرعت، أي ما زرعت ورد لأن أزرع وما يعيش، قلت أزرع مخضر أستفاد منه.

أبويه مهندس زراعي بس ما متعين، ويشتغل كاسب والعيشة على قد الحال، هو يعلمني على الزراعة وهاي الأمور. أمي ربة بيت علمتنا على كل شغل البيت والطبخ، هي ست بيت شاطرة. عندي 4 إخوان: رعد مواليد 1988 خريج إدارة واقتصاد البكر، متزوج وزوجته شاهيناز حبابة، البنت يعني ما عندها شيء ويانا ولا احنا عندنا شيء وياهم. من البداية عزلنا له فوق بغرفته، هي ترتاح واحنا نرتاح، وعدهم طفل. والبقية مراحل متفاوتة، اللي

مبطل واللي يدرس مسائي: سامي وعادل وسيف. خواتي 5: هبة وهديل الكبار متزوجات ومستقرات وعدهن أطفال. هبة 4 أطفال. وهديل 2 أطفال. ريم مخطوبة لابن عمة أمي. نبراس ونيران طالبات. وأنا حديقة، وصلت لصف ثالث ورسبت بمادتين، حاولت دور ثاني لكن فشلت، تركت الدراسة من يومها لأن واهسي خرب. كان واهسي بالمسلسلات المدبلجة، عشق عشق. كنت أتمنى أعيش قصة حب مثل المسلسلات وأتزوج حبيبي. بس انلطمت بالواقع، خرب خل أفهمكم لحظة.

عندي عمي إسماعيل هذا، خليه هو يحكي لكم قصته. إسماعيل: إيش بيه ولج؟ أحسن زلمة بالعشيرة أنا، منو يقبلها؟ ما ينطونه مرة ويريدون ياخذون من عندنا مرة؟ شنو ما عندنا كرامة ننطيج إياهم؟ رشا: ما يحكي لكم ليش رفضوا، أنا أحكي لكم. عمي قبل سقوط بغداد كان يشرب شرب أبو ليلى المهلهل ما يلحقه، أنوب صار السقوط، عبالكم تاب؟ لا شيتوبه! صار الشرب بلاش بالشارع، أصلاً عايف أهله علمود الشرب.

المهم كان يريد بنت عم صفاء، وأهل صفاء ما انطوه، ما قبلوا بيه لأنه يشرب. وهسه هو واقف بطريقنا أنا وصفاء، يقول ما انطيتونه مرة ما ننطيكم مرة. وأنا الواقعة بيها، بلا إيش لي ذنب؟ حياتي اليومية: ماما: رشاوي يله ماما صارت بـ 9 كعدي. رشا: ها ماما خليني نايمة شوي. ماما: لج قومي نامت عليك طابوقة، قومي نظفي. رشا: ابتليت وكعدت بالمهجوم، إيش بيهم الهوانم ليش ما يشتغلن؟ ماما: احنا يومية بهالقوانين؟

قومي نظفي، ومن يرجعن الباقي عليهن، هنه يسونه، لا خلفت عليك. رشا: أنظف؟ ليش هو إيش بقى بعد علمود يسوونه؟ شوكت أخلص؟ بس تريدون الصدق، كنت بس البيت أنظفه بالنهار، والباقي على خواتي تنظيف العصر والمطبخ وهوسته، بس بشر طماع. نجي على بيت أبو صفاء: صفاء: أنا مواليد 1987، كاسب أشتغل بسوق البالة والربح حلو وشغله ماشي. أبو صفاء: مقعد بس همين يشتغل، عنده محل من البيت يبيع جبس ونساتل وهالأمور. أمي: ربة بيت.

عندي 3 إخوة و3 خوات، أنا كبيرهم. إخوتي: صباح وصادق وصهيب. خواتي: إشراق وأسماء وأطياف. خواتي متزوجات كلهن، بس احنا الولد بعدنا. صفاء: يابه فدوة شوكت تروح تطلب لي رشا مرة ثانية؟ أبو صفاء: هم رجعت لهالموضوع؟ لك بابا ما عندك كرامة يا مرة ثانية هاي؟ 3 مرات نخطبها وما انطوا، بإيش ماكلة عقلك هالبنت؟ لك كافي اللي خلقها خلق 1000 وحدة أحسن منها، يكفي عمها عراك وعقله طاير ومشهور بالمنطقة سكير وساقط.

صفاء: ما يخصني بعمها الأغبر هذا، زعطوط يريد يفرض نفسه، أنا أريدها يابه، رشا ما لها ذنب. أبو صفاء: ما أخطبها لك بعد وانتهى الموضوع، شنو هالساقط أخليه يرفضني مرة 4؟ وأبوها ما عنده كلمة، أغم مدقلي لمن تناسب، يول ناسب رجال مو خرنكعية مثل ذول. صفاء: بقيت أحكي ويه أبويه بلكي يحن عليَّ، بس هو قفل وغلق الموضوع تمامًا، وهو هم حقه، 3 مرات ننرفض، عبالك دنطلب ميريام فارس؟ لا بس صدق صعبة بحقنا.

أنا ورشا نحب بعض من فترة طويلة، من كان عمرها 14 سنة وأنا عمري 21 سنة، ههههه أي كنت أحبها من ذاك الوكت، هي صح جكمة بس تنحب. ملامحها عراقية أصيلة، طول معتدل ومربربة وشعرها كستنائي بس كسرة متوسط الطول مو طويل. وجهها مدور خمرية، (لون خمري لا سمار ولا بياض مثل بدر تام وأشرق على الرياض) ده أغني لعيونها. يا عيونها، عيونها دكم مو كبيرة ولا هم يحزنون، وخشمهها شوي مفروش. بس أشوفها تخبل بعيني ما أدري ليش.

رشا: حبيت صفاء من كان عمري 14 سنة، هو أقاربنا من بعيد، شفته بمناسبة بالعائلة وتعرفت عليه. بيتهم مو بعيد عن بيتنا، كان دائمًا يمر من يم شارعنا رغم طريقه من غير شارع، بس يجي خطية يتعنى علمود بلكي يشوفني بالحديقة أو فوق السطح. صفاء شكله عادي يعني مو مواصفات الرجل التركي، طول وعرض وبياض وشعر أخضر وعيون بنفسجي ولونه وردي.

لا هو أسمر، ككواية، طوله معتدل بالنسبة للزلم، شعره سيم مواعين، لا لا جذب سرح كلش أصلاً وعيونه كحيلة، عكس حظي، وخشمه عدل عبالك مسطرة، مو حلو بس أحبه إيش أسوي؟ مو يقولون الحب أعمى وأحول هم. رشا: بقينا على هالحال واحد يحب الثاني فترة طويلة، اتقدم صفاء بسنة 2010 وأهلي رفضوا بضغط من عمي إسماعيل، واستمر خطية يتقدم ويرفضوا. أختي ريم هي صندوق أسراري وأنا هم بير أسرارها، أحسها توأمي مو بس أختي، هي أكبر مني بأقل من سنة.

كنت كل شيء أحكي لها وهي كل شيء تحكي لي، وعلاقتها كلش قوية بصفاء حتى هو يحبها، بس ريم واقعية جدًا ما عندها خيال مثلنا، لذلك آراءها قاسية أحيانًا. ريم: لا تظلين كل شوي متصلة عليه لو هو متصل عليك. رشا: ليش عود؟ ريم: آخر علاقتكم شنو؟ رشا: زواج. ريم: شوفي حبيبتي لا تعيشين بوهم. أبوك ميكسر كلمة عمّك؛ لأن يخاف منه، وإخوتك لا محل لهم من الإعراب، يعني أذية ع البلاش هالسوالف. رشا: آآآهوووو 😡 لا تنكّين أنتِ وطلعي منها رجاءً.

ريم: لج ثولة كلبي عليكِ دتجيكِ قسمة زينة ليش ما تقبلين؟ ترى الأيام تمشي ويجي يوم صفاء يمل من هالوضع. رشا: يمل شنو؟ 😳 قابل أني قميص ويمل مني؟ وبعدين أنتِ أكثر وحدة تعرفين صفاء من بعدي ما عنده هالسوالف، بابا اللي بيني وبينه أكبررررر، يله يله ما عليكِ التهّي بخطيبج، ما عليكِ بينا 😒. ريم: طبك مرض 😒. رشا: 😕. وبيوم من الأيام... رعد: ها يمه شلونج؟ تعالي عندي موضوع وياج. ماما: ها يمه خير؟

رعد: شوفي يمه صديقي ماهر يريد يتقدم لوحدة من خواتي، هي ماكو غير رشا، لأن الباقيات صغار، وريم مخطوبة، قلت أقول لكِ وأخذي رأيها. ماما: إذا خوش ولد ليش لا؟ رعد: أي هو خوش ولد، جادود شَغُول، بس عنده سوالف بنات طايح حظها شوي. ماما: أي طالما يشتغل ما يعيبه شيء، وبعدين كل الولد يعرفون بنات وتبقى هي وشطارتها. رعد: ما يخالف أخذي رأيها، هذا زواج مو لعب. أمي: هسة أحكي وياها، رشاا رشاااا رشااااااا.

رشا: 😳 أي أي أي يووم اجيت لحظةة 🏃🏃 هاا شكو شصايررر هيج صحتِ لي؟ أمي: ماكو شيء يمه 😊 تعالي اكو واحد معدل يريد يخطبج. رشا: معدل شنو؟ 😐 ما أريد. أمي: أوووجع، عرفتِ هو منو، شنو اسمه، شنو يشتغل، رأساً ما أريد، أم حلك الأعوج 😡. رشا: شنو منو شسمه شيشتغل؟ رعد: اسمه ماهر ويشتغل وياي بالسوق، هو جادود وشَغُول، عنده إخوان قبله متزوجين وعنده خوات ما أدري شكد... بس رشا ترى هو أبو بنات.

شاهيناز: هلاهلاهلا راح تعرس حماتي الرابعة يله دفعة مردي 😁. رشا: وجع 😒 قاعدة على قلبج لو نايمة بغرفتج؟ شاهيناز: لا حمضتي 😛. رشا: 😈😈 لج تسكتين لو أدفرج؟ أنتِ أكبر مني وتزوجتي يعني جنتِ عانس مثلاً 😒. شاهيناز: طمّة اللي تاخذج مو مال شقة 😕. رشا: أقول لك عيني 😒😒، هو أني أصلاً ما قابلة، وطلع أنوب أبو بنات وسوالف مكسرة، شسوي بيه ما أريده. أمي: انجبي كبرتي بالعمر وأنتِ كل شيء ماكو، لا شهادة ولا زواج، وإذا يعرف بنات شنو يعني؟

أنتِ بشطارتج تخليه يجوز. رشا: كبرت 😱 عمري 17 سنة ترى مو 71 سنة، وبعدين شطارة شنو؟ أبو طبع ما يغير طبعه غير الجفن 😒. أمي: أي وشنو يعني؟ شنو فايدة قعدتج بالبيت؟ انستري واتزوجي وفضيها، الوكت أغبر. رشا: ما أريده 😡. رعد: أوك راح أنطيكِ أسبوع فكري، ما خسرانة شيء، لا نستعجل بالرد. رشا: 😧. أخوي رعد أهدأ إخوتي وأرزنهم، ما ينفعل بسرعة، والحلو بيه يفكر قبل لا يحكي 😍.

صفاء: طخت بعقلي رشا، صار لي من الصبح لهسة ما متصل عليها، من أكون بالشغل ما أقدر أتصل عليها، كلهم شباب يمي ما ترهّم. 📲📲📲📲📲. صفاء: رشاوي عمري، اشتاقيت لكِ فد بوسة رحمة لأهلكِ 😗. رشا: 😭😭 صفاء مو وقت هالحكي، رعد اليوم قال لي صديقه يريد يخطبني وأمي مصممة توافق. صفاء: من اشتعلوا أهلكِ لاابوجهي تحكيها! جفت هيج 😦. رشا: دقولي كبرتي وما بيكِ نفع لا شهادة ولا صخام 😢. صفاء: شسوي لها لأمكِ 😡😡 بله...

خل أشوف الحجية أمي بلكي تخابرها وتحكي وياها. رشا: شراح تقول لها؟ لا تزوجين بنتكِ بين ما الله يهدي عمها السكير لو ياخذه 😧. صفاء: 😡😡😡😡 أي والله بس كون ألكفه لهالسكير لا اطلع القضة والمضة. رجعت للبيت وأني أغلي وأفور، قلت أحكي ويا أمي، هنّ نسوان بلكي تقنعها. صفاء: حجية حجية وينكِ يوووم. أم صفاء: تعال أني هنا دأصلي يمه. صفاء: حجية لحقيني رحمة لأهلكِ. أم صفاء: شبيك ولك؟

صفاء: اكو واحد متقدم لرشا وأمها تقول لها اقبلي، وأخاف هاي تقنع أبوها ويجبروها تتزوج. أم صفاء: خل تتزوج دنفتك منها 😑. صفاء: بله ردتك عون طلعتي فرعون، شهالقهرر اشو كلكم ضدي، البنية أريدهاااااا، افهموووو أريدها. أم صفاء: إذا أهلها ما يريدون ينطون شنسوي يمه شبيدنا؟ اشو طلبناها 3 مرات وما قبلوا، لك عيب بعد نطلبها؟ شنو ما عندنا كرامة لو خلصت البنات وهي آخر وحدة؟ صفاء: توقفين وياي لو لا؟ أم صفاء: شنو المطلوب مني؟

صفاء: خابري أمها واحكي وياها بلكي تقنع. أم صفاء: 😒 لخاطرك هالمرة حسويها، وإلا هي ترى كبيرة بحقنا. صفاء: 😙😙😙😙. وخابرت أم صفاء على أمي وصار بينهن حكي، نوبة مصايح ونوبة حكي عادي. 📲📲📲📲📲📲📲. أم صفاء: شلونج أم رعد؟ شخباركم عساكم بخير؟ أمي: يا هلا بيكِ أم صفاء، الحمد لله كلنا بخير، أنتم شلونكم؟ أم صفاء: مو بخير أم رعد، ليش هيج دتسّوون ويا ابني؟ ليش هاي جزاته رايد بنتكِ بالحلال هيج تسوون ويانا؟

أمي: أم صفاء، شنو بيدي وما سويته؟ تعرفون سبب الطلابة عمها إسماعيل وهذا شراني والكل يعرفه، وأبو رعد فقير مو كدّه لذلك ما يكسر كلمة أخوه. أم صفاء: وهذا العريس اللي متقدم هسة وتريدين بنتكِ تقبل بيه، أي ما تقولين لي شمسّتعجلين عليها؟ اصبروا بلكي الله يهدي عمها إسماعيل ويقبل بصفاء. أمي: البنت دتكبر وهي قعدة بالبيت، شنو قعدتها؟ لا تحظى برجّلها ولا تحظى بسيد علي...

وبعدين أنتِ بناتكِ أصغر منها ومشّيتيهن، وتعرفين يا أم صفاء هالوقت أغبر. أم صفاء: وهذا اللي عندي شلون أسكته؟ يحبها لبنتكِ وخابس نفسه، والله لو علي اليوم بالليل أزوّجه، اشو شاب جادود يحلفون براسه والكل يتمناه وكل شيء جاهز بس المرة، بس شسوي له ما يريد إلا بنتكِ 😒. أمي: أي الله يهني 😒 خل نزوج رشا وهو ينسى ويتزوج، قابل كل من حب اتزوج؟ وين صايرة هاي؟ أم صفاء: أي براحتكم مع السلامة 🚫. أمي: مع السلامة.....

والله يا الله وفوقاها ما عاجبها. رشا: منو منو يمه؟ أمي: انجبي لا تغشمين نفسكِ عود ما تدرين هاي أم صفاء. رشا: 😐. أمي: عمكِ خبل وما ديقبل شنسوي تبقين عانس؟ رشا: أي أبقى عانس. أمي: دوخري وخري منا أروح أكمل شغل. صفاء: ها حجية بشريني حجيتي ويا أم رعد؟ أم صفاء: أي حجيت وما قبلت وقالت ماكو قسمة بينهم. صفاء: 😡😡😡😡😡😡😡 من عصبيتي طلعت للسوق أفتر.

وصدفةةة أشوووف السكير بالسوق قبالي، بالقوة يمشي وريحته ما تنجرع، ما صدقت شفته، لك تعاااال الله جاااابك. صفاء: لك منو أنت وتوّكف بطريقنا وتمنعني آخذها؟ لك فد نعال أنت خلك سكيررر 👊👊👊... 💥💥. إسماعيل: أنعل أبوك لابو أهلك، طالما أني عايش ما تصير قسمتك.... وصارت عركة جبيرة وصفاء آذاه لعمي كلش، وهو أصلاً عمي سكران ما يدري شنو بالدنيا، والناس التمت، أنوب حتى إخوتي قلبوا على صفاء 😣😣😣. واتأزمت الأمور أكثر وأكثررر.

سيف: رشااااا رشاااااا. رشا: ها سيف هاها شنو شبيك؟ أجه سيف ولزمني من شعري 🙆. سيف: لج بعدكِ تشوفين هالحيوان الساقط صفاء ✋👋؟ رشا: ها 😨 لا والله سيف وين أشوفه؟ أني بالبيت مو تدري ما أطلع 😭. سيف: دوالغ البنات أعرفهن، طلعتِ بالحديقة.. واقفل لكِ يم السياج.. صاعد فوق السطح.. يرسل أخته مدري منو وياها مراسيل ويجوز يتصل ع تلفونكِ همين. رشا: هاي شبيك سيف شنو هالحكي؟ إذا أخوي وهيج تحكي لا عتب ع الغريب.

سيف: اسمعي لج، إذا أعرف عندكِ اتصال ويا هالحيوان صفاء ليكون أدّفنكِ بهالحديقة، سوالنا فضيحة بالسوق، لزم عمّنا وضربه بين هالناس علمودج، شيقووولون هالعالم علينا شيحجون؟ حيقولون شمشوّفته أختهم وهيج ديسوي... بس هو هم أخذ المقسوم من إيدنا 😡😡. رشا: أي أي أي طبعاً أكيد وين أشوفه؟ أصلاً كرهته والله كرهته 😭😭😭. طلع وعافني بعد ما أخذت راشدي معدل وشعري تشلّع من مكانه وتنتّف. شفت ماكو أحد اتصلت رأساً بصفاء. 📲📲📲📲📲📲📲📲📲. صفاء:

رشا: ألو شبيك ساكت صفاء؟ صفاء: عبالي إخوتكِ ماخذين تلفونكِ. رشا: أي زين تعرف أني وقعت بالنص، لك شسووويت ما تقول لي شسويت؟ هاي عملة منك بله أني بالقوة أركعها من باب أنت تجي وتخربطها وتفتح له 1000 باب. صفاء: أي طلعت روحي شسوي؟ شفته سكران ويمشي ما تحملت، هذا يخربط حياتي، إذا أهلكِ ما بيهم خير سكير وخايفين منه، ولج 4 شحوووط اسمهم إخوة ما يعرفون يوقفو عند حده، لا والشفية أبوكِ وياهم.

رشا: أقول لك عصبي فهمناها، تغلط على إخوتي وأبويا ليش؟ ترى ما أسمح لكِ، هاي آخر مرة تغلط، وبعدين خابسني بنت عمي وبنت عمي هيج تهيني. صفاء: هو أبوكِ بقى حق للقرابة للعشيرة؟ وأني عليمن قاتل نفسي ومتعارك ومسوي لي طلابة غير علمودكِ؟ لج تالي هيج تحكين 😡. رشا: شسوي والله راسي انفجر، هسة سيف أجه وركعني راشدي وطيّح حظي، قال لي هالشخص تشيليه من راسكِ، شسوي شسوووي؟ لا أقدر أعوفك ولا أقدر أكسر كلمة أهلي 😭😭😭.

صفاء: شوفي ماكو غيرها نتزوج. رشا: شلون نتزوج؟ 😳😳. صفاء: هسة شكد صار عمركِ؟ رشا: 17 ☺. صفاء: بعدكِ صغيرة 😧. رشا: زغيرة شنو 😒؟ أنت تقول زغيرة وأمي تقول لي عنستي، لمن أصدق بله 😂. صفاء: أي بالنسبة لأمكِ اللي بكدكِ عندها 5 جهال، بس أنتِ بعدكِ قاصر. رشا: لا تايت أحسن 😂. لا صدك شيدور براسك؟ نولي يم شيخ سيد يعقدنه ونتزوج، يعني شيدور براسي مثلًا؟ لا عيني شلون عازة لوحدنه؟ لا ناخذ عمج ويانه شاهد، أي لعد لو ويه أهلج ليش هالوسة؟

لا عفية صفاء شلون هيج الكه غير حل.. أولًا اني ما ناهبج راح اخذج لشيخ يعقدلنه. وثانيًا اني أقاربكم يعني من نهزم نرجع للبيت وبيدي عقد شيريدون يسوون يسوون. وثالثًا أحنه نفس العشيرة لا يكدرون يكاوموني ولا يفاصلوني وغصبًا عنهم تصيرين الي. ورابعًا وهذا الأهم اني أحبج يعني مو دة العب عليج. ها هيج رأيك؟ ليش اكو غير حل؟ لا والله ماكو بس بلكي الله تفض بدون هالامر واخلص من هالكابوس.

إن شاء الله حبيبتي تفض وتصير سوالف ما تبقى هيج. و ورة تقريبًا 5 أيام رد سألني رعد. ها رشا شكَلتي عن ماهر؟ لا ماريده رعد عفية لا تجبروني. لا منو يجبرج بس عبالي غيرتي رأيج يلة طالما هيج ارجعله خبر ماكو نصيب. وتدخل أمي بالنص. تعال تعال شترجع خبر راح نزوجهة للولد عجبهة ما عجبهة اطخ راسهة بالحايط. ليش؟ شهالحجي ماريده كوووة شنو غصبًا عليه؟ الزواج مو غصب أم رعد ع كيفج وياها. بهالآثناء اجو سيف وسامي وعادل اخوتي.

وحجو على رعد لأن واكف بجانبي. كل عقلك ترجعله خبر لماهر رافضي لا مارافضي خل يجي وياخذها شنو ما وكفت بعينك الفضيحة الي سواها صفاء بالسوك النه؟ صفاء بحث آخر بس مو معناها نجبرها ع شخص ما تريده. اني كاعدة واسمع اخوتي يقررون مصيري. شسوي يارب والله تعبت رعد كال ما راح أرد خبر اليوم نخليها للجمعة. من طلعو اخوتي اتصلت على صفاء ولو هو بشغله ما يحب اتصل عليه بس اختنكت. ها عمري؟ صفاء الحكلي اخوتي خبلوني...

وحجيتله الي صار اليوم وموقف اخوتي من هالولد ماهر... صفاء الجمعة يردون خبر يعني بعد 4 أيام. اني بالشغل وما مستوعب وهالهوسة قرفتني... فد نص ساعة واتصل عليج أوك. أوك. _كافي حبي رشا لا تبجين يجوز الله يسعدج ويه هالولد. ريم لا تحجين هيج هاي عود أنتي أكثر وحدة تعرفيني وتعرفين صفاء. صدك حبي ولو مو وقتها بس سما الأربعاء هذا مهرها. أي خطية وأخيرًا صلوات الله يسعدها همين هواي انتظرت. أي تجين وياي مو؟ مالي واهس...

الله كريم منا للأربعاء. رشاوي حبي احجيلي بهدوء خلي افتهم. مثل ما كلتلك يريدون يزوجوني كوة لماهر واخوتي واكفين بيها والجمعة يرجعون خبر اله. خلص هالايام نتزوج. خايفة. ماكو داعي تخافين حاولي تطلعين من البيت هالايام فد ساعتين ما عدنه غير حل. أوف هو الأربعاء عدنا مهر صديقتي. حلووووو موعدنه الأربعاء حبي. ها أي إن شاء الله. جنت خايفة ما مرتاحة بس كلبي طغى على عقلي أحبه وما أريد أخسره وواثقة بي بس اكو خوف بداخلي.

_بقيت متضايق افكر شلون اعقد عليها وهي قاصر وما عندي وقت بس هاليومين فكرة تجيبني و10 ترجعني بس ماكو رجعة لازم اتزوجها. ها صفاء شبيك اشو شارد مو ويانه؟ ما بيه شي هموم شغل. أجه وكعد يمي صباح وسألني احجي صفاء شنو صاير؟ رشا يريدون يزوجوها... وحجيتله كلشي وبشنو فكرنه ونوينه نسوي. درست هالموضوع ترى هالخطوة جبيرة أحنه ولد عم نفس العشيرة.

قابل ناهبها اني اخذها اعقد عليها ونتزوج وشيريد يصير خل يصير بس الي موكفني هي قاصر ومكان ما عندي. تزوجها بينكم والشاهد الله وإذا على مكان صديقي مطلك مرته صارله شهرين وبيته فارغ اكدر احجي وياه. أي والله هم صدك شلون فاتتني هالسالفة نتزوج بيناتنه... بس شتحجي ويه صديقك بلا اخذ نظرة علينا وعباله أحنه؟ هو هذا الموجود الي اكدر اساعدك بي. ما عندي غير حل أتوكل بالله وكوله.

_اني بيومها فهمت ريم راح نعقد يم السيد ونخلي أهلي أمام الأمر الواقع بوقتها ريم عارضت كلش بس اني كدرت أقنعها شوي. لج هاي خطوة مرعبة شتحجين انتي عبالج شي سهل. لا مو سهل وخايفة وكلبي يرجف بس شسوي ماكو غير حل وبعدين أحنه راح نتزوج بالحلال قابل راح نسوي شي غلط. اني واثقة من صفاء بس كلبي ما مرتاح. يلة خلي نطلع لا نتأخر أريد أغمض أفتح ألكه كلشي منتهي. ألو حبي لا تتأخرين هي حسبة ساعة ونرجع بس اعقد عليج أوك...

ولا تنسين هويتج. لا عمري ما أتأخر وهاي الهوية وياي... طلعنه اني وريم بالطريق هسة شوي ونوصل. ريم تعرف مو؟ أي تعرف حجيتلها كلشي بس ما قابلة دكول كلبي ما مرتاح. هو هاي النسوان دومها خايفة وكلبها ما مرتاح تتفاولون بالشر دومكم... هي حسبة ساعة ونرجع. وصلنه بيت صديقتنه بس اني نزلت بداية الشارع ما ردت صديقتي تشوفني وقنعت ريم تبقى ويه صديقتي علمود اخاف أمي تتصل علينا تسمع صوت حفلة ودكولها رشا دتركص ويه البنات وملتهية..

طبعًا بمجرد شفت صفاء راسًا اغلقت التليفون... تعالي صعدي حبي. شنو هاي السيارة؟ مالت منو؟ مالت صديقي علمود اكدر اتنقل بيها خو مو نكضيها تكاسي والناس تباوع. الطريق كله صفاء يتغزل بيه نسيت كلشي نسيت الخوف ونسيت أهلي ونسيت الناس الي جنت خايفة منهم يشوفوني ويه صفاء بهذا الوقت نسيت كلشششي شي واحد بس أفكر هو حبيبي يمي وراح أكون حلاله. وأحلى شي مشغل أغنية عاصي ويغني وياها (كيد عذالك حبيبي كيدهم وأنت معاي... يقصد عمي إسماعيل.

أخذتها لسيد شوي بعيد عن منطقتنه علمود ما يعرفنه ودخلنه يمه من شاف هوية رشا رفض يزوجها إلا بوجود ولي أمر الها شرحت اله الموقف الي جبرنه هيج نسوي همين رفض. مستحيل ما يجوز زواجكم إلا بوجود ولي أمرها لأنها أولًا... عذراء لو كانت ثيب كان بحث آخر لكن عذراء ما يجوز... وثانيًا قاصر مستحيل أزوجكم اني أو أي شيخ هاي مسؤولية جبيرة ما اكدر اتحملها وأصلًا لا يجوز شرعًا إلا بوجود ولي أمرها وموافقته.

من سمعت السيد هيج حجه حسيت الدنيا ضاقت عليه وانتهى كل شي وكل أحلامنه اتبخرت وتلاشت ماكو عقد ماكو زواج ما راح تكون حلالي وأكون حلالك بشنو أواجه أهلي لو غصبوني ع ماهر... جنت افكر بصوت عالي وشارد ذهني وحسبة تاخذني و10 ترجعني. من دخلنه للسيد جنت متوقع هالاجابة لأن اعرف هالامور بس علمود رشا ما ردت دكول عني كذاب أو خلفت برأيي... رشا اني مال أرجعج للبيت بدون ما تكونين زوجتي هاي حجاية شيليها من بالج. شلون؟

نتزوج بيناتنه والشاهد الله. يعني شلون؟ اعقد عليج بيناتنه أكلج زوجيني نفسج على هالكد مهر وتوافقين هي كليشة كاتبها اني بورقة وحاطها بجيبي. ما بيها عقد ورقة شي؟ أي بيها بس ورقة أحنه نكتبها بيناتنه. إذا أحنه نكتبها للورقة أهلي ما راح يهتمون مو مثل عقد السيد. أي صح لذلك لازم اتزوجج عندي بيت.. عندددك بيييت شنوووو.... خليني أكممممل شفتهمتي ونطييييتي بالحجي كم مرة كلتلج بطليييي هالأسلوووب. احجي.

عندي صديقي مطلك زوجته صارله كم شهر وبيته فارغ أخذت مفاتيح بيته نتزوج ونرجع. لاااا صفاء صدك تحجي لا ما أروح جان ابالي نعقد ونرجع بس مو هيج لا صفاء مو هيج. رشا لو السيد عاقدنه وحق ربج ما ألمسج مستحيل بس ما بيدنه عقد شرعي ماكو غير هالحل نتزوج والشاهد الله واخذج علمود يعرفون أهلج وينجبرون يزوجج الي لأن ما يكدرون يفضحون نفسهم فهمتيني. ها أي ما ادري عقلي وكف. اكو يوم خلفت بوعدي؟ لا.

وصلنه لبيت صديقه بيت صغير ومرتب بس مليان تراب دخلنه وقفل الباب علينا. راح اكول كلام وانتي عيدي وراي أوك حبي. أوك. نسيت كلشي بهاي اللحظة صفاء يمي دة أردد كلام وراه يخليني زوجته شرعًا. جنت مستعجل نحجي هاللكلمتين أريد أتقربلها حسيت نفسي راح أطك... تدرين مشتاقلج بكد رحمة الله أحبج رشاوي مشتاق لهاي اللحظة صارلي سنين...

بكد ما جنت خايفة بكد ما هسة اني راغبته بهاي اللحظات الإنسان ينسى كلشي بالدنيا مجرد لمسة وحدة من صفاء خلتني أغيب وأروح لغير عالم لذلك ما منعته من شي. بعدما أخذني صفاء وصرت زوجته وقضينا أجمل لحظات كنا ننتظرها ونتمنّاها قضينا ليالي وأيام نبجي عليها. فجأة اتغيرت وانقهرت ما أدري شصار بيه حسيت على نفسي اني شسويت هذا الأمر صح لو راح تصير وراه مصايب يمكن جان تأنيب الضمير الي جنت أحس بي...

بكد فرحتي ولهفتي اني أكون زوجته بكد خوفي وندمي من الأمر الي ارتكبناه مشاعر مضطربة اتمنيتها تكون كابوس وأصحى منه.... لج شنو انتي عسل ولج تخبلين هسة شيصير لو نبقى نهار كامل هنا فدوة لهلعيون الدكم أموت عليج مرتي. يلة صفاء اتأخرنه خلي نروح. شبيج رشاوي شنو اتأذيتي حبي والله ما قصدت أذيج. أي شوي أتأذيت بس مو مهم خلي نروح. اشو قالبة خلقتج حبيبتي معقولة خايفة مني؟ مو خايفة منك بس حسيت الي سويناه خطأ... خطأ!!

خليتج زوجتي كدام ربنا خطأ؟ شلون دتفكرين.. وكلش زين تعرفين ما لنا غير هذا الحل. رشا: افهمني حبي، مو قصة خايفة منك بس.. صفاء: اشششش، لا تقلبين هالساعة غم عليَّ، خليني عايش هاللحظات، وأتذكرها ثانية بثانية.. اليوم أرجع أقول لأهلي، وباچر أو بعد باچر نجي عليكم، لأن أكيد أمي وأبويه راح يسووا لي زفة وتصير طلابة بالبيت. رشا: طلابة؟ أنت مو قلت أهلي ما يعارضوني بشيء؟

صفاء: إي حبي، أكيد ما يعارضوني، بس لأن ما بيدي عقد شرعي شوي الوضع صار أصعب واختلف، لا تخافين أنا أدبرها هاليومين... وأريد أشوف شلون يزوجوج أهلچ لهالحيوان. رشا: فتحت التلفون بالطريق لقيت ريم داكة عليَّ أكثر من 15 مرة. صفاء شوي امشي سريع، ريم متصلة وخاف صاير شيء. صفاء: لا تخافين حبي، شبيچ مخترعة؟

أصلاً كبرتي بعيني، أثبتيلي حبچ إلي يا ضوة العيون. وأنتِ هسة أمام الله مرتي، وربي شاهد، لا دَ ألعب ولا ناوي نية مو زينة، لا تظلين مرتبكة وقلبة وجهچ، خفة هالخشم شكبره. رشا: شبي خشمي عيني ما عاجبك؟ شوف خشمك جنّه منقار. صفاء: أصلاً أضيع بخشمچ أنا، فديته. رشا: دمشي سريع حباب، اتأخرنا. صفاء: لا تخافين هسة نوصل. وصلنا يم شارع بيت صديقتي، اتصلت على ريم. ريم: ولچ بومة ثولة، وين وليتي؟

بقى بالي يمچ، دمي نشف، ما أقدر حتى أفكر شنو؟ شسويتوا؟ عقدتوا يم السيد مو؟ رشا: ها إي، نقالي خلص شحنه وانغلق. ريم: لعد شلون اشتغل هسة؟ رشا: أنا واقفة براس الشارع، اطلعي عاد دنروح. ريم: اها أوك يله طالعة أنا، ولو صوتچ ما عاجبني. انتظري بس أسلم على سما وأمها وأطلع ما أتأخر. اجتي ريم وشافتني أنا وصفاء بالسيارة، صعدت وراسًا سألتنا. ريم: ها بشروني شسويتوا؟ وين العقد؟

صفاء: بالبيت احچوا بهالسالفة، هسة راح أنزلكم يم المدرسة وكملوا طريقكم علمود لا أحد يشوفنا. ريم: شفتهم ما عجبني الوضع، أشوف صفاء ما مهتم، ورشا عيونها تحچي أشكال، تحاول تبتسم بس ما تضبط وياها، عاد راسًا قلت له لصفاء. ريم: العقد يمك لو يمها؟ رشا: يمي. ريم: أوك. وصلنا للبيت، قلت لها رشا انطيني العقد وينه. رشا: خل أحچيلچ اصبري. دخلنا غرفتنا وكل شيء حچيت إلها وأنا أبچي، اتخبلت عليَّ ريم، ضربتني وغلطت عليَّ وجرتني من شعري.

ريم: لچ عاااار شسووويتي؟ لچ هاي الورقة أي زعطوط ما يأخذ بيها، أنتِ مو قلتي عقد سيد؟ لچ تكذبين عليَّ؟ أنا أختچ تكذبين عليهاااا؟ ولچ شجاني وما رحت وياااچ؟ رشا: والله ما كذبت، هو چان هيچ الاتفاق، بس السيد ما قبل لأن قاصر وعذراء. ريم: لچ كلبة إذا ما رهمت غير تتركين كلشي وتجين ترجعين. سمعت أمي بعركتنا واجتي تركض. أمي: شنو شصاير؟ شبيچن ليش تتعاركن؟ ريم: ماكو شيء يمه، هيچ عركة بيناتنا. أمي: عركة بيناتكم شنو؟ شصاير أحچوا؟

ريم: هالسخيفة تتمرقص بنص العالم و.. و.. وناس غربة و. أمي: شافت أمي علينا نظرة استغراب... من يمته رشا تتصرف هيچ؟ هي صح لسانها طويل وزفر بس مو خفيفية، بنتي وأعرفها. رشا: 😢😢😭😭😭 أمي: أحچن شصاير ولچن؟ وكعتن قلبي. ريم: ماااكوو شيء، شنو شبيچ؟ ما تريدين تصدقين؟ لا تصدقين كيفچ، قابل أتبلى على أختي. أمي ما چانت مقتنعة بحچينا بس سكتت وطلعت وقالت الله يهديچن وتباوعلنا صفح. ريم: شفتي يالحيوانة شسويتي؟

خليتي أمي تنتبه من ورة صياحنا. رشا: إي حقچ ريم تحچين عليَّ وتسويين كلشي، بس بوقتها ما فكرت بشيء، والله بلحظتها نسيت الخوف ونسيت أهلي، ما خطر شيء أبالي أبد، والله واعتبرت هالزواج حلال... بس هو حلال؟ هو هيچ قلي.. ريم: اش اش انلصمي. اتصلت ريم على صفاء. ريم: أنت صدق طلعت حقير! لك شلون تسوي هيچ برشا؟ لك منو يقول هالزواج حلال؟ كسرت ركبتها، الله لا ينطيك، شنحچي شنسوي؟

ولك سوي چارة صفاء، الله يخليك لا تترك رشا هيچ، أنت هم عندك خوات. صفاء: لا تخافين ريم، أنا ما أغدر برشا، والله العظيم اليوم أحچي ويه أهلي وأفهمهم وأخذها يمي أخذها، أعرف اللي سويته خطأ، بس أهلچ ما خلوا خط رجعة إلنا. ريم غلقت النقال وبقت صافنة عليَّ وسألتني: زين وين بياض وجهچ؟ رشا: 😐😐😐 ريم: الله يطيح حظچ، الله يأخذچ، الله ينسف عمرچ على هالعملة، لچ هسة إذا يقول مو أنا ويتهمچ ويه غيره شنسوي؟ شنحچي شنقول؟

لچ معقولة أنتِ بهذا العقل؟ لا إله إلا الله، لچ هاي تاليتها عمرچ 17 مو 7 سنين يالحقيرة. _صفاء: رجعت للبيت قلت أحچي ويه أبويه راسًا، واللي يريد يصير يصير، وما أشوف إلا أمة محمد مكلوبة ببيتنا، أخويه الصغير صهيب متعارك ويه نسيبنا زوج إشراق داخلين شراكة بشغل وصاير خلاف قوي بينهم. صار الليل والطلابة ما فضت، لأن نسيبنا رجع أختنا علينا وهاي چبيرة بحقنا، وعمامنا ادخلوا بالموضوع. اتصلت عليَّ رشا. رشا: بشرني صفاء شسويت؟

صفاء: رشا حبي، والله خبصة... وشرحت لها الوضع على السريع... لا تخافين حبي، اطمئني، خلي تفض هالسالفة وأخلص سالفتنا، أحبچ يله باي. رشا: بقيت مصدومة، نهى المكالمة صفاء على السريع وياي! حسيت بنفسي شكد رخيصة وضايعة وتايهة وانتهى أمري. بعد ما چان هو يركض ورايَ صرت أنا أركض وراه، چنت أنا أم الراهي صار هو أبو الراهي، وألف حسبة أبالي أحسبها. بقيت لا قدرت أنام ولا قدرت آكل بس أبچي، أمي انتبهت عليَّ.

أمي: شبيچ ولچ بس تعوين، ما تقوليلي شضامات أنتِ وأختچ عليَّ؟ رشا: ما بيَّ شيء، بس مقهورة، كل صديقاتي اللي بعمري اتزوجن واستقرن وأنا بعدني. أمي: ومنو لازمچ؟ مو هذا ماهر رايدچ؟ شبي يسوى عدالة من الشباب، أهم شيء يشتغل بيده شغلة يعيشچ منها مو يخليچ كاتلچ الجوع. رشا: ليش وصفاء شنو سايق مخدة مثلاً؟ عاطل؟ شبي؟ أشوفه يكرب النهار كله، وبعدين غير صفاء ما أتزوج، افهمي ماااا أتزوج. أمي: يطبچ مرض لعد، ابقي هيچ ولا تظلين تعوين.

ثاني يوم الصبح اتصل عليَّ صفاء. صفاء: صباح الخير عروستي. رشا: شسويت صفاء؟ قلت لأهلك؟ صفاء: إي أخويه الصبح قلت له ويعرف، قلتلچ امبارح هوسة بالبيت، اليوم أرجع من الشغل وأحچي ويه الحچي والحچية، وغلاتچ يا عيوني أنتِ إلي مو لغيري. رشا: ردت الروح بيَّ، حسيت نفسي شوي انتعشت وضحكت، قلت له أتانيچ يا عمري فدوة لعمرك، شصار بيَّ من امبارح لليوم راسي راح ينفجر. صفاء: اسم الله عليچ يا نظر عيني... يله رشاوي طالع للشغل، تريدين شيء؟

رشا: سلامتك حبي. تحسنت شوي وأكلت لقمة واطمئنيت، وصارت ساعة 10 ونص الصبح ويصير انفجار، بس الانفجار مو قوي يعني مو بسوقنا، شوي أبعد ما اهتميت، بس أمي انخبصت. ماما: ولچ اتصل على سيف وعادل ماكو ما يردون، يا يمه ولدي وين راحوا ولدي، يمه دخيلك ربي ردهم سالمين. رشا: سيف وعادل؟ عزة بعيني صفاء وياهم بالسوق، لا لا ما معقولة، أكيد ما سمعوا هسة، أتصل أنا، اتصلت على سيف وعادل ماكو، اتصلت على صفاء ماكو ما يردون، عزة بعيني شسوي؟

معقولة الانفجار يمهم؟ لا لا هاي ما چانت ع البال، وبقيت أتصل مرة ثانية وثالثة ماكو فائدة. بقينا نتصل تقريباً 10 دقايق ما عرفنا شنسوي، نوبة أصبر أمي ونوبة أنهار من البچي، عزة معقولة ربي تسويها ويايَ وتاخذ صفاء مني؟ لا لا ربي فدوة، ربي روحي متعلقة بي، ربي أخذ من عمري وانطي، ربي هاي شلون شدة. رعد اتصل على أمي وگال لها الانفجار يم محلات الولد، بدأ اللطم والمعايط، أخذت النقال من أمي بدون وعي، قلت له رعد صفاء وين؟

قلي ندوره. رشا: أدوروه؟ شأحچيلكم شلون أوصفلكم حالي، حسيت الدنيا افترت بيَّ وراسي ثقل، وجبل من الهموم تربع على صدري... طيب أبچي على إخوتي لو أبچي على الأحبه وأتمنيته لو أبچي على حالي وصخام وجهي. صفاء استشهد وسيف استشهد وعادل انقطعت رجليه الاثنين. فواتحنا صارت بالشارع سوة، چادر بصف چادر، هواية اتضرروا مو بس إحنا. أختي ريم تدق وتلطم نوبة على إخوتي ونوبة على صخام وجهي اللي سويته، وأنا أدق وألطم على صفاء وعلى نفسي.

قالوا الانتحاري چان يم محل صفاء وجثته متفحمة. رشا: ما أقدر أحچي بس أحمس بروحي وأحچي بقلبي... لك يابه شسويت بنفسي؟ أوووف ربي ليش ما أخذتني وياه؟ ليش امبارح ما صار الانفجار وإحنا بالسيارة؟ ليش اليوم؟ ليش مو امبارح من چنت وياه؟ ليش ليش؟ ريم: انهارت رشا وبقت 3 أيام ما تحچي ولا كلمة، بس عيون تدمع، لا تقبل تاكل ولا تقبل تشرب، إلا أن شافت عمي إسماعيل.

رشا: المفرووووض أنتتتت اللي اتموووت، موووو إخووووتي وصفاااء ياااعار الززلمممم، لك أنتت لازم تموت موو هالشباببب؟ ريم: شفناها هيچ صارت مخبلة من شافت عمي، قلنا هسة يذبحها لأن هو شراني نذل وعقل ما براسه، ردنا نسكتها ماكو فائدة. بس هو سكت عنها وگال إلنا دخلوها جوة لا تصير جنازتها هنا ويه إخوتها. رشا: مرت الأيام سودة، ما قمت أعرف ليلي من نهاري، صارت حياتي بس تفكير بتفكير وألوم بنفسي على اللي سويته.

أبويه تعب كلش بعد استشهاد أخويه سيف واللي صار بعادل، خصوصاً عادل يحتاج مصاريف وعلاج خطية. سامي صار معيلنا الأساسي للعائلة، ورعد خطية هاللي يطلع من إيده لأن همين عنده عائلته. أمي فقدت بعد اللي صار بإخوتي، ليلها ونهارها تنحب وتبچي، وخصوصاً من تشوف عادل يتألم من وضعه... توقفت حياتنا تقريباً.

مرت الأيام وعرفت ماهر خطب واتزوج لأن أمه مريضة وتريد تزوجه، ما تقدر على مسؤولية البيت وارتاحيت، چان هم كابس على قلبي همزين اتزوج وخلصت. بعد اللي صار ويانا على الأقل ورة سنتين يله أمي تفكر تزوجني، بوقتها أكون دبرت نفسي. بعد مرور أكثر من 8 أشهر وصار عمري 18 سنة. ريم: رشا شوفي ماكو غير حل، صباح يعقد عليچ عقد سيد ولو يومين ويطلقچ بس علمود الورقة، هسة أنتِ فوق السن القانوني. رشا: عزة شتحچين؟ لا لا صباح! مستحيل هذا أخويه!

ريم: الصمي لا تتعيقلين، خاف نسيتي سوايتج؟ ولج هاي بيها كسر ركاب. شرايدين منه أحنا؟ بس يعقد عليج كلشي متسوون، بس عقد كدام العالم. عندج شي يثبت جنتي متزوجة؟ رشا: بس أني ما عندي حجاية ويه صباح، يعني شلون أحجي وياه؟ شلون يا ربي؟ وينك صفاء 😭😭 ريم: الله يرحمه، جان المفروض تحسبون لهيج يوم، أنتو بالعراق عايشين. ولو هو الموت ما يعرف جبير وصغير. هسه على العموم احجي ويه صباح. رشا: عزة، أحجي أني وياه بهيج موضوع؟ صعبة 😨

ريم: ما عندج غير حل افتهمي! رشا: إي صح 😦 فد شوي أتصل. ريم: هسه اتصلي طالما ماكو أحد. 📲📲📲📲📲📲📲📲 صباح: شفت رقم غريب اتصل عليه ورديت عليه. الو. رشا: الو شلونك صباح. صباح: (بنية؟ ياهلا والله بخير. رشا: أضاهر ما عرفتني. صباح: 🤔🤔 لا والله ولا صغرى بيج. رشا: أني رشا. صباح: 😒 ياهلا رشا خير محتاجة شي؟ رشا: ها لا ما محتاجة شي... (بهالـ الأثناء يمي ريم خابصة روحها وتأشر احجي احجي) صباح: الله لا يحوجج لأحد.

(حجيت وياها ومستغرب من اتصالها حسيت وراها شي وتريد تحجي) رشا: صباح أنت مو جنت تعرف اللي بيني وبين صفاء؟ صباح: إي خبرني الله يرحمه. رشا: 😢 صباح أني بورطة الله يخليك خلصني منها. صباح: 😒 شلون؟ شتريدين يعني؟ رشا: بس يعني بس... (بهالـ الأثناء أخذت النقال مني ريم) ريم: الو صباح، أني ريم أخت رشا. صباح أنت أخو صفاء وأكيد شايل شهامته وغيرته وهمين عندك خوات وتخاف عليهن مو صحيح؟ صباح:

(هاي جرت النقال ولا سلام ولا كلام، شنو هالثقة الزايدة؟ إي. ريم: اعقد على رشا يم أي سيد، بس مجرد عقد مو أكثر حتى لو ورا يوم واحد أطلگها. هي أرملة أخوك وأكيد ضميرك ما يگبلها تبقى أختي هيج لازم اكو إثبات بيدها. صباح: ههههه الله بالخير يابه. ريم: (استغربت من استهزائه وضحكته الباهتة) رديت عليه: الله بالخير. صباح: شوفي عيني: أولًا

وقبل كلشي: أني مرتبط وأحب وحدة وإذا سمعت بهالأمر تتخربط حياتي وأني ما مستعد أخربط حياتي لخاطر أختج. ثانيًا: هي طلعت ويه أخويه وسلمت نفسها بدون أي إثبات بينهم، شنو اللي يضمنلي ما جانت تطلع قبله وبعده ويخلالها الجو؟ وثالثًا: ما مستعد أورط روحي ويه أهلج وعمج. ريم: بقيت صافنة ومحتقرة نفسي ومحتقرة أختي على السوته، كلامه سجين يذبح بگلبي ويگطعه، بس العتب مو عليه العتب على أختي اللي ما دارت سمعتها وسمعة أهلها.....

استجمعت قوتي وجاوبته: معقولة أنت أخو صفاء؟ اتصورت عندك شهامة ونخوة وغيرة تنقذ بنت كل ذنبها حبت أخوك. صباح: إي أني هم عندي بنت أحبها وتحبني بس ما تسمحلي حتى أبوسها 😏 مو عاد... ريم: كافي كافي كافي! حرامات اتعشمنه بيك خير وفوگاها ابن عم وهيج تحجي.

صباح: لا تستشرفين براسي يا ويل 😒 جانت أختج لافّة راس أخويه بس المرحوم جان فطير وعلى نياته يا شريفة اللي تقبل تطلع ويه واحد بس لأن تحبه ولا فوگاها تفكر تتزوج بدون علم أهلها، لج لا تقنعيني انتن شريفات. هاي سوالف الساقطات هيج يسوون لأن ما يخافن من شي بايعات ومخلصات افتهمتي؟ ومرة ثانية لا تحجين بهاللهجة ويايه لأن روحكم بيدي أفضحكم بالمنطقة وأخلي سيرتكم على كل لسان افتهمتي يا شريفة 😏.

ريم: 😨😨😨 من هيج حجه ويايه اتبسمرت بمكاني رغم حقارة وقساوة كلامه بس هذا الواقع أغلب الشباب هيج يفكرون بالبنت إذا مو كلهم... راسًا غلقت النقال 🚫. رشا: 😦😨 وجهج ما يبشر بخير وما يتفسر. ريم: ✋👋💦💦 وين الله ياخذ عمرج ويخلصنه منج ومن عارج، لج هذا هيج يحجي.

وحجتلي ريم كل اللي گاله صباح، فعلًا صدمة هالكلام بس هذا الواقع هيج شبابنه يفكرون بالبنت إنو هي طلعت ويه شخص غريب بغض النظر عن صفته حبيب أو صديق أو غيرها طالما مو زوجها الشرعي راح يعتبروها ❌❌❌❌. مرت الأيام أسود من الليل، نايمة صاحية أفكر باللي راح يصير إليه، أحاول أتناسى بس ما أكدر. أحنا عائلة محافظة ومعروفين. بعد ما طلعت السنة مالت أخويه سيف...

خطيب ريم اجه على أهلي واستسمح منهم يتمم العرس گال كلشي كملت وأهلي ما عارضوا وفعلًا بعد السنة بشهرين أخذوا ريم. حسيت بضياع مو طبيعي من بعدها. جنت لا أحف ولا اعتني بنفسي ومتقصدة هالـ أمر، ردت أبقى أطول فترة بدون زواج، أتمنيت العمر يركض بيه وأعدي الأربعين وأوصل سن اليأس علمود محد يفكر يطلبني وأوگع بورطة.

حالتنه المادية من سيء إلى أسوأ جدًا، ضاقت الدنيا علينه، شغل ماكو، رزق قليل ومعيل واحد وبقينه 3 بنات وأخ معوق وأب صحته على گده وأمي. أحنا كلنه براس أخويه سامي. مرت السنين ما اتقدملي أحد، جنت أشكر الله ألف مليون مرة لأن ماكو خطبة، جنت مرعوبة من فكرة الزواج. وبيوم من الأيام اجتي زوجة جيرانة أم إيناس. أمي: ياهلا ياهلا بأم إيناس تفضلي حبيبة البيت بيتج.

أم إيناس: شلونج أم رعد عيوني شخبارج، عذريني ما أمرلج دوم تعرفين الحياة ومشاغلها. أمي: معذورة حبيبة كلنه ملتهين بمصايب الدنيا نطلع من وحدة ننطب باثنين. أم إيناس: الله لا يشوفكم مصايب أم رعد. أمي: رحم الله والديج حبيبة. رشا: دخلت سلمت على خالة أم إيناس وقدمت إلها جاي وبسكت هالموجود عدنه. أم إيناس: يا عيني خالة هاي شصاير بيج؟ ضعفانة وين جنتي؟ شلون متفحة؟ سودة عليه كسرة الأخوان كسرة يمه الله يعينج.

رشا: إي خالة أخوتي كسروا ظهري بمصابهم. أم إيناس: شوفي حبيبة أم رعد، جاية وأريد أطلب منج طلب يكون ما ترديني. أمي: عيوني الج أم إيناس إذا أكدر عليه أسوي ليش لا. أم إيناس: عندي خالتي أم جلال أدور لابنها على مرة معتبرة تلم ابنها، هو زين خوش وليد. أمي: إي حبيبة. أم إيناس: ما لگيت گدامي مرة معتبرة غير رشا. رشا: 😱😱😱😨😨 أمي: حبيبة نتشرف بيكم ليش لا، بس نشوف أبوها وإخوتها شيكولون. رشا: بس خالة أ أ أني... أمي: 😒

(خزرتني بنظرة أمي رادتني أسكت) رشا: خالة أني ما أريد أتزوج، أخويه عادل يحتاجني خطية منو إله لا يگدر يگوم ولا يگدر يتحرك وأمي وأبويه صحتهم على گدهم وخواتي الصغار بالمدرسة وإخوتي البقية النهار كله بالشغل، خالة ما أريد 😦 شوفيليه غيري. أم إيناس: أصيلة يمه تفكر بأهلها قبل نفسها، وين اكو هيج بنات بهالوكت؟ أني لعد ليش فكرت بيج معتبرة أنتي معدلة. رشا: خرب حظي هاي مجلبة 😦 أمي: يعني تبقين بليه زواج 😒

رشا: خالة وبعدين أنتي جيرانة مو تعرفين جنت أريد صفاء وصفاء يريدني، أني ما أفكر بالزواج أبد مستحيل. أم إيناس: إي يمه ندري بس الولد راح لدار حقه، وخو أنتي مو أرملته جان رايدج وما صارت القسمة، وهواي بنات مثل حالج رادوهن العالم بس اللي استشهدوا واللي تركوهن وما صارت قسمة قابل يبقن بلايه زواج؟ رشا: خرب حظي المصخم 😖 هاي مين اجتني مين طلعتلي شلون أدعبّلها يالله دخيلك.

أمي: حبيبة نگول لأبوها وإخوتها ويصير خير وما يكون خاطرج إلا طيب، بس هو شسمه أم إيناس؟ أم إيناس: الولد اسمه جلال حبيبة، أنتظر منج جواب أم رعد ورقمي يمج دگّي عليه وأنطيني خبر مع السلامة. أمي: مع السلامة حبيبة زارتنه البركة مية هلا. وتندار عليه أمي وتلزمني من شعري 💇👊. أمي: لج طايحة الحظ من وفاة أخوج لليوم محد دگ بابج صار كم سنة شنووو ليش ما تريدين تتزوجين؟ تريدين تعنسين مكابلتني وگاعدة؟ رشا: ما أتزوج ما أريد كوة.

أمي: والله يا يمه الأرملة ما تسوي هيج على رجلها من يتوفى، شنو أنتي دتسوين هيج؟ صفاء راااح استشهدد مات خلصص! يعني شلون تبقين يمي؟ دتشوفين عيشتنه صبعة قشرة كوة دابرة اللگمة وخواتج بالمدرسة ويحتاجن مصاريف وعلاج أخوج كووومة فلوس يرادله وأبوج يوم يشتغل وأسبوع گاعد لا عنده صحة مثل الأول ولا عدنه شي نعيش منه شلون تفكرين أنتي؟ رشا: قابل گعدتي بالبيت شمخسرتكم مدگوليلي؟

هي على اللگمة اللي أتزقنبها ما أريد أگضيها صيام والملابس صارلي كم سنة ما مشترية ملابس، كلشي ما أريدد بس عوفيني. أمي: غصبًا عليج، إذا هالولد بي خير تاخذي وقندرتج فوگ راسج أريد أشوف شلون تعانديني. 📲📲📲📲📲📲📲📲📲 رشا: ريم لج تعالي هاي أمي ناوية نية كشرة... (وحجيتلها بالتفصيل اللي صار) ريم: أصبري يجوز باجر أجي أني هم عندي حجي وياج. رشا: تعالي بسرعة لا تتأخرين فدوة يا ريت لو اليوم تجين.

ريم: يلّه أوك خل أشوف زوجي من يجي وأتفاهم وياه. رشا: أوك حبي أنتظرج باي 🚫. ورا يوم اجتي النه ريم وباتت ليلة يمنه. ريم: يا ويل رشا هذاك اليوم مرت حمايه أم شهد من صارت عدها ولادة ورحنه للجدة (القابلة) وبقيت وياها دتجيب خطية... سمعت اكو شي اسمه غشاء بكارة صيني شوي رخيص على أساس. رشا: شنو هذا؟؟

ريم: بقيت استفسر منه، وأجر بلسان بنته، هي همين جبيرة. كعدت يمي وسولفت وياها. دكول اكو ترقيع، بس هذا غالي شوي، وكالت اكو غشاء صيني ميبين ع البنية من تاخذة، ودياخذن منه البنات. رشا: ها؟ ريم: شنو ها؟ مالج غير حل. مين ما أفكر بيها مليوصة، وديكولون زين على أساس جاب نتيجة، بلكي صدك ويجيب نتيجة، لأن حتى لو نكدر ندبر فلوس الترقيع، شلون أخذج الهن؟ بلا طلع أحد عرف هناك شنسوي؟ بأيش نركعها؟ رشا: خايفة.

ريم: بسوايتج الشينة حطيتي نفسج بهيج موقف، خلاج تنذلين للي يسوى واللي ما يسوى. _مرت الأيام وأمي ردت خبر لأم إيناس: إحنه موافقين، بس أنطونه العنوان نسأل عنهم. ردت أم إيناس: همّه ساكنين بالمدينة، شوي بعيدين عنّه، حسبة نص ساعة. أنطت العنوان لأمي، وراحوا سامي ورعد يسألون عنّه. 🌷🌷🌷🌷🌷 رعد: والله حجي، من سألت عنه كلهم كالوا الولد خوش ولد، ما بيه شي. ياهو اللي أسأله من منطقتهم يكلي خوش ناس وخوش ولد.

أبويه: خلص لعد، إن شاء الله خير، أول وتالي مصيرها تتزوج. مرت الأيام وخطبوني لجلال. شفته 4 مرات بس ما أباوع لوجهه، بس من جوه لجو. فعلاً الأيام كفيلة تنسي الشخص. تمنيت أكون عذراء وأبدي حياتي وياه، بس الهم كاتلني والعبرة خانكتني. هو الولد حچاي ويسولف واله شخصية حلوة. كم مرة حچى ويايه، بس اني أرده بكلمتين أو 3 مو أكثر.

جلال: اني مواليد 1985، خريج فنون جميلة. ما جنت حاط الزواج أبالي، حياتي فري أحسن، بس الوالدة الله يحفظها تريد تلمني. مدري منو كلها اني مطشر. كالتلي اني أختارلك بنية بنت بنوت تتحملك، لأن اني مزاجي وعصبي. لكتلي بنية اسمها رشا، تداري أخوها المتصوب وشايلة أهلها وواصلة للثالث، وأصغر مني بـ 10 سنين. يعني مواصفات مبدئية جيدة. أهم شي ما تطب وما تطلع مثل الباقيات.

لأن عندي نظرة ع الموظفات والي يداومن جامعة والي تطب وتطلع، كلهن ❌❌. هذا رأيي وكل رجل حر برأيه. صارت القسمة وشفتهة، وعادي حالها حال أي بنت ما عندها فد جمال مميز. وافقت طالما أمي اختارتها، يعني هالبنت توب ✅✅✅✅. رشا: مرت الأيام وصار يوم العرس، وجابتلي ريم هالغشاء الصيني.

ريم: لا تخافين، سمعت من الطبيبات والجدة يكولون اكو بنات غشائهم ما ينفتح من أول مرة بشكل كامل. بلكي انتي مثلهن، وهاي تحطيها وتكمل الحسبة، وما يبين شي ونخلص، وانتي صارلج فترة طويلة يعني أكيد هسة التئم. رشا: صدك؟ لج مرعوبة أخاف اني مو مثلهن وتلاص. ريم: أوف ربي فدوة دخيلك، والله كلنه نرجع مطلقات إذا تبين فضيحتج. يا رب سترك دخيلك ربي. صارت الزفة وخلص العرس. ومن اتقربلي. جلال: لج بنت الكلب احجي ويامن مصخمة. رشا: شنو شبيهك؟

هذا مو دم كدامك، ليش هيج تحجي؟ جلال: لج عبالج اني غشيم بنت النعال؟ لج ماكو غشاء، فضـاء! عبالج ما أعرف؟ رشا: ما مسوية شي والله. أم جلال: سمعت صوت صياح من غرفة جلال فوق. صفنت، معقولة ديتسامرون هيج؟ خلي أتركهم يجوز اني متوهمة. اشو بعدين انقلبت عياط وصراخ، وجلال صوته يرج البيت رج. صعدت ركض. أم جلال: لك يمه افتح الباب، شبيهك؟ جلال: هاي الساقطة ليلتها الأولى مو ويايه. أم جلال: لك شنو هالحجي؟

رشا: عمة هذا نيشاني، هذا بياض وجهي. جلال: لا تكذبين، ماكو غشاء يمه ماكو شي بس فضـاء خالي افتهميني. أم جلال: وانت شمدريك يكون هيج الغشاء؟ ولك هذا دم منها طلع، يعني خلص يجوز انت ما حسيت. جلال: مطي كدامج وما حس... للطبيبة ناخذها هسـة. أم جلال: ولك يا طبيبة شتحجي؟ رشا: سمعت طبيبة، حسيت بنفسي خلص انتهى أمري. أم جلال: احجي يمه احجي رشا، انتي مسوية شي؟ رشا: لا. جلال: كلت للطبيبة وما أثني كلمتي.

أم جلال: رحنه لمستشفى أهلية ودخلنه للطبيبة، ودخل جلال وكالها ما لحكت أسوي شي جيكيها، وعرفت الطبيبة انو هي مو عذراء. جلال: استذكرت بهاللحظات حياتي بالجامعة كلها، وشلون ضحكت ع بنت الناس الي جانت تحبني، وثقت بيه وسلمتني نفسها وأخذت الأريده وما شفتها وجهي، حتى ما أعرف شصار بيها. بس أتذكر كلش زين من اتقربت الها يختلف تماماً عن هالساقطة رشا. لا والله مو ساقطة اني الساقط، تركت الي حبتني وما عرفت غيري ودمرتها بيدي.

وخليت أمي تختارلي حسبالي راح آخذ بزونة مغمضة... بقت أفكار أبالي تروح وتجي، نوبة أفكر بهذيج البنت الي كوة تذكرت اسمها، كسرت بنت شريفة وتركتها وضحكت عليها. والله جازاني بوحدة ملعوب بيها، الله يعلم ويا كم واحد. أوف الزمن يدور.... بس كلشي حسبت إلا هالامر ما حسبت اله... بس رجولتي ما سمحتلي أبقيها أو أستر عليها. رشا: رجعني لأهلي من الفجر، سحلني سحل من رأس شارعنه إلى بيت أبويه. كعدوا أخوتي وأبويه متخبلين من الفضيحة...

ريم: انقلت أختي رشا. أبويه قتلها وغسل عارها وانسجن كم شهر قتل شرف. أختي هبة الجبيرة اتطلقت وأخذوا أولادها منها، لأن زوجها متشدد بهيج مواضيع ويكول العرك دساس. هديل واني بقينا يم أزواجنه بس عيشة الذل والمنية. اني هم مشتركة بجريمة أختي بس ما لي وجه أكول الحقيقية. محد خسر غير البنت وأهلها بهالحسبة. _رؤية الكاتبة: الي كانت تروي القصة هي أختها ريم واني تحكمت بالسرد...

مو كل مرة تسلم الجرة يا بنات، وماكو غشاء يلتئم ويا الوقت. اكو عدة أغشية للبنت، اكو الخفيف الرقيق واكو المطاطي واكو الثخين، وكل غشاء اله طبيعة معينة. ادخلوا يوتيوب وشوفوهن، وإذا اكو بنات ضبطت وياهن احتمال انتي ما تضبط وياج. لا تجازفين بنفسج، محد يستاهل تخسرين دنيتج وآخرتج وسمعتج علموده. إذا مو برضاة الأهل يكون زواجج، لا تجازفين ترة الخسران الوحيد انتي.

وانت يا رجل كما تدين تدان، حتى لو ما عندك أخت أو أم أو بنت، الله بالمرصاد إلك. اني أعرف هالقصة قليل الي راح يتفاعلون وياها، لأن أغلب البنات والأولاد يريدون قصص حب وغرام... لكن هذا واقع العراق ولازم نوعي الناس وخصوصاً البنات. الرجل يلعب ع ألف بنت محد يعيبه ومحد ينطي بيه، بدليل جلال من سألوا عليه الكل مدحه.

يا بنات لا تسمحون للرجال يتلاعبون بيكم، لأن خطأ واحد من البنت يشمروها ورا الشمس، والحليم تكفيه الإشارة. أتمنى تكون عبرة لكل الأهالي وخصوصاً البنات، والله لا يشوفكم شر..... بقلم الكاتبة فينوس آرام الناقلة: MemeAlsamarrai