سنة ١٩٩٧
بتعيط كريمة و بتقول بقهر _حرام عليكي ياما، عاوزة تفرجي بيني و بينه ليه؟ انتي اكتر واحده كنتي شاهدة على حبنا و خابرة زين اننا مخلوجين علشان نكون لبعض.
بترد عليها “كوثر” بلامبالاة _انا مليش يد في حاچه يا كريمه، الامر في يد ابوكي، روحي خبريه الحديت الماسخ ده انتي حُرة، بس حطي في دماغك ان الي هيوحصل ساعتها مش هيعچبك.
بتقعد كريمة قدام كوثر و بتقول برجاء _ابوس يدك ياما، اتحدتي معاه، حسن ملهوش دخل باللي حوصل زمان.
بتبعدها كوثر عنها و بتقوم و هى بتقول بضيق _خبرتك اني مليش يد في الموضوع ده، متوچعيش دماغي.
بتسيبها و بتمشي و بتقعد كريمة تعيط مكانها بحرقة على حبها الوحيد الي راح.
سنة ٢٠٢٤
كانت “ورد” على سطح البيت
الهوا بيضرب وشها برقة و بيحرك طرحتها
كانت بتتأمل السما الي بتنورها النجوم و هى بتقول _سبحان الخالق، يا ترى انا هبقى نجمة بعيده و فوق اكده؟ و لا هفضل ورد الممرضة و بس؟
بتبتسم بهدوء و هى بتشاور على نجمة _تفتكري حد هيحبني و نعيش قصة حب كيف امي و ابوي؟ البلد كلاتها تتحاكى عليها؟
بيقاطعها صوت امها و هى بتناديها ف بتقوم بسرعه و بتقول _چاية ياما چاية.
بتنزل تحت و بتلاقي كريمه في المطبخ ف بتقول _ايه الي حوصل؟
بترد عليها كريمه _روحي ودي الحاچات دي للحچة ام سعد، و متعوقيش هناك تعالي على طول.
بتقول ورد بضيق _مخلتيش هديل توديهم ليه ياما، ماهي جاعدة هناك اهي.
بترفع كريمه حاجبها باستنكار و هى بتديها اكياس كتير _نفسي تجفلي خشمك شوية انا لسه باعتة هديل تودي حاچات تانيه.
_نفسي اعرف بتعملي اكده ليه ياما.
_علشان دول ناس كابيرة في السن يا ورد و الي بعمله دلوجت هيتردلي ان شاء الله لما اكبر كيفهم و مجدرش اخدم نفسي.
بتبتسم ورد و هى بتفتح الباب _ربنا يديكي الصحة.
♡♡♡
على ناحية تانية
دخل آسر البيت و هو بيجري بسرعه
نادى بصوت عالي _ماما! ياما!
مش بيجيله رد، مجرد صمت طويل
دخل الاوضة ف لقى نعيمة امه واقعة على الارض
بيهزها بخفة لكنها مش بتفوق ف بياخدها في عربيته بسرعه
في نفس الوقت الي بتوصل ورد فيه لبيت قديم على اطراف القرية
بتفتحلها ست كبيرة في السن بعد ما بتخبط ورد على الباب
بتبتسم بمجرد ما بتشوفها و بتقول _ازيك يا ام سعد، اخبارك ايه؟
بتبتسم ام سعد _الحمدلله يا بتي بخير، ادخلي ادخلي.
بتدخل ورد و بتحط الاكياس على جنب و بتقول _امي باعتالك دول.
_ليه كلفت نفسها اكده؟ امك عنيده جوي يا ورد، خبرتها كاتير انها متچبش و لا تبعت حاچة كل شهر.
بتقعد ورد و بتقول _مانتي لسه جايلة يا حچة انها عنيدة، ادعيلها دعوة حلوة و خلاص.
_ربنا يريح قلبها و يچبلها كل الخير.
بتأمن ورد على الدعاء و بتقوم _انا همشي انا يا ام سعد و لو احتاچتي حاچه كلميني و انا اچيلك طوالي.
بتطبطب ام سعد عليها بابتسامة _ماشي يا حبيبتي.
♡♡♡
بمجرد ما بتخرج بتشوف بنت صغيره “فرحة” بتجري ناحيتها
بتتكلم بفزع _الحجي يا ورد، في ست كابيرة وصلت المستوصف و مش بتفوج.
بتتوتر ورد و بتقول _في دكاترة هناك كاتير انا مش هجدر اساعدها يا فرحة.
بتهز فرحة راسها بالنفي _مفيش و لا دكتور هناك، كلهم راحوا مستشفى تانيه علشان كان في حادثة حوصلت كابيرة جوي.
بتتوسع عيون ورد من الصدمة _انا هعمل ايه؟
بتزقها فرحة بخفة _هتروحي المستوصف تشوفي ايه الي حوصلها و تحاولي تعالچيها.
♡♡♡
في البيت
بتكون كريمة قاعدة قلقانة و باصة على الساعه
بتقول لهديل بتوتر _خيتك مرچعتش ليه لحد دلوجت؟
بترد عليها هديل بلامبالاة _ورد بتتحدت كاتير تلاجيها لساتها عند الحچة ام سعد بتحكيلها على حاچه.
بتحاول تطمن قلبها لكنها بتهز راسها بالنفي _انا هروح لأم سعد اشوفها بتعمل ايه كل ده.
_ياما بلاش تكوني خايفه اكده طول الوجت.
بتحط كريمة الخمار على راسها و بتقول _متنزليش و لا تروحي في مكان غير لما نرچع.
بتتنهد هديل و بترد _هروح فين يعني ياما اديني جاعدة.
♡♡♡
بتنزل كريمه الشارع و بتروح لبيت ام سعد
بتفضل تخبط لحد ما بتفتح ام سعد بفزع _ايه الي حوصل يا كريمه؟
بتبص كريمه جوا البيت و بتقول بخوف _البت ورد راحت فين يا ام سعد؟ انا كنت باعتاها توصلك شوية حاچات و مرچعتش لحد دلوجت!
بتقول ام سعد بقلق _ورد مشيت يا بتي من حوالي ساعه و لا اكتر.
بتشهق كريمه و بتقول _كيف يعني! ورد مچتش البيت يا ام سعد.
_مش خابرة يا كريمه و الله.
بتقعد كريمه قدام البيت و هى حاسه بانهيار لحد ما بتشوف فرحة و هى بتقولها _بتعملي ايه هِنه يا ست كريمه؟
_تعالي يا فرحة، انتي خابرة فين ورد؟
بتهز فرحة راسها بالإيجاب _انا الي خبرتها عشان تروح المستوصف.
♡♡♡
بتدخل كريمه المستوصف و هى بتنهج و بتسأل واحده كانت موجودة _فين ورد؟ الممرضة ورد فين؟
بتشاورلها البنت على مكان ف بتدخل كريمه لحد ما بتشوف ورد بتعلق المحاليل لواحدة
جريت كريمه عليها و حضنتها و هى بتعيط ف بتطبطب عليها ورد بقلق _ايه الي حوصل ياما؟ بتعيطي اكده ليه!
بتبصلها كريمه و بتضربها بخفة على دراعها _مخبرتنيش ليه انك رايحه المستوصف!
بترد عليها ورد بتوتر _الموضوع چه فاچأة و ملحجتش اخبرك، امسحي دموعك و متخافيش عليا ياما بتك كبرت.
بتمسح كريمه دموعها _يلا روحي معايا.
_مش هينفع ياما، لازم اخلي بالي من الست نعيمة لحد ما يچي دكتور.
بتبتسم نعيمة بتعب و هى بتبص على كريمه ف بيقاطعهم دخول آسر
بيستغرب من المشهد لكنه بيدي لورد كيس و بيقول _دي المحاليل الي مكنتش موجودة هنا.
بتثبت كريمه و هى بتبص على آسر بصدمة _حسن؟