تحميل رواية «قطبين مختلفين» PDF

_ أنت يا أستاذ انت!

: نعم

“شال الإير بودز و هو بيقولوا بضيق”

_ اتعتع حبة يا جدع الواحد مش عارف يقعد!

: نعم!! اتعتع؟!

_ اه تتعتع فيها ايه دي

: لا مفيهاش حاجه

_ اتعتع طيب

بضيق : يعني سيبتي الأماكن دي و حبكت على المكان اللي قاعد فيه علشان مقعدش براحتي

_ لا إله إلا الله و هو كان ميكروباص أبوك! ما تتعتع ياعم!!

: روحي يا آنسة اقعدي في أي مكان الواحد مش ناقص

_ انت برضوا اللي مش ناقص؟!!

: اه و حلي عن دماغي الواحد دماغه وجعاه

بصوت عالي

_ تصدق بالله انت بني آدم مش محترم

: طب ليه الغلط طيب

_ ايوه مش محترم و اهو المكان معرفش ايه اللي خلاني اتكلم مع واحد زيك أصلاّ

بعصبية

: خلي بالك أنا ماسك نفسي بالعافية

_ أنا قدامك اهو هتعمل ايه يعني

رد و هو بيحاول يقفل الموضوع

: كل خير هعمل كل خير

_ ايوه كدا متقدرش تعملي حاجه

: يخربيت الرغي اللي على الصبح يا آنسة هو أنا كنت ابن خالتك

_ هو انت تطول تكون ابن خالتي أصلا

: لا والله هو أنا هموت و اكون ابن خالتك يعني يا آنسة الله يخليك سيبيني في حالي

_ ما انت في حالك كنت ضربتك على ايدك و بعدين ايه آنسة آنسة دي أنا اسمي حسناء

: و أنا مالي حسناء ولا بتاع أنا مالي شكلي

“اتشنج وشي و كنت لسه هشتمه لحد ما سواق الميكروباص اتكلم بصوت عالي”

• يا اخونا اللي في الكنبة ورا انتوا بتتخانقوا هنا! صوتكم عالي

“سكتنا و بصينا لبعض بضيق و محدش فينا طايق التاني و حط الاير بودز ببرود و بعدين جه المكان اللي هنزل فيه و لقيته نازل و كان بيمشي ورايا”

بعصبية _ انت ماشي ورايا ليه

بتريقة : لا والله همشي أنا يعني ورا ملكة جمال مصر

_ والله على الأقل احسن من وشك اللي عامل شبه ضهر رجلك!

: وشي أنا عامل شبه ضهر رجلي؟ باينلك اتحولتي أو اتعميتي باين روحي اكشفي نظر

_ ولا انا مش طايقاك والله

: ولا أنا طايقك سيبيني علشان هتأخر على السيكشن

” افتكرت محاضرتي و بصيت في الساعة بسرعة و لقيتها تسعة”

_ ينهار منيل دا الساعة تسعة يختااااي

“سكت و هو بيبصلي بضيق فسألته”

_ أنا محاضرتي تمانية و نص و انت

: ملكيش دعوة

_ ليه طيب شكلك في صيدلة صح

“اتكا على الاير بودز و هو بيبص بقرف”

_ امم أنا كمان في صيدلة فرصة سعيدة دا تاني يوم ليا أصلي محولة علشان الكلية التانية كانت بعيدة عن بيتي و كنت بتعب خالص مقولكش بقا حاجه تتعب و ساعات سفر و تعب و فرهدة ولا حتى الأكل في المدينة الجامعية وحش

“اتكلم بعصبية واضحة و ضيق”

: ما تسكتي بقا زهقتيني هنا و في المشروع

_ ايه دا هو انت اسكندراني؟!

: انت مالك!

_ اجدع ناس

: عارف اسكتي بقا و امشي بسرعة لأن الدكتور صعب

_ تمام بس انت اسمك ايه

: مالكيش دعوة

_ تصدق انت عيل بارد و يارتني ما اتكلمت معاك أصلا

: كان أحسن اقسم بالله كان زمان دماغي موجعتنيش

“و وصلنا الدور و خدتها جري حرفيا و هو سبقني بكام خطوة و خبط على الباب ”

ـــــــــــــــــــــــ

~ تمام يا شباب دي اسماء الأدوية و شرحهم

‘ طق طق طق’

“ياسين خبط على الباب مستنانيش الندل و الدكتور فتح”

: معلش يا دكتور أصل المشروع أتأخر شوية

~ دكتور ياسين انت كل مره بتقول بسبب المشروع

: آسف يا دكتور اخر مره

~ و مين الأستاذة اللي متأخرة هي كمان

بنهج _ اسفة يا دكتور اني اتأخرت أنا اسمي حسناء محمود

~ اللي لسه ناقلة جديد

_ نعم

~ طيب يا دكتور ياسين أنا من أول يوم دخلت قولت ايه

: احم حضرتك قولت لازم التزام و لو حد اتأخر مطرود

~ و أنت سامحتك كتير المره دي لأ و حضرتك يا دكتورة معاه علشان متتأخروش تاني

“و قفل الباب فوشنا”

_ دا انت دكتور غتت و بارد صح

بصلها ياسين بضيق : انتي اللي أخرتينا بسبب رغيك منك لله

_ مش علشان الميكروباص اتأخر!

“مردش و حط الاير بودز تاني و راح الكافيتريا و قعد في مكان يعتبر معزول شويو و سيبته احم يخربيت الكدب”

بضيق : دا ايه دا ان شاء الله

_ ايه؟!! في حاجه!

: هو انا سمحتلك انك تقعدي أصلا !

_ لأ و أنا هستنى انك تسمحلي ليه إصلا هو المكان مكتوب بإسمك

ببرود: اه بإسمي

_ دا انت غتت

: اتفضلي بقا قومي و استأذني

_ و لو قومت و استأذنت هتعمل ايه برضوا

: هقولك لأ

ببرود _ خلاص و لازمتها ايه القومة

“سكت و هو بيبصلي بضيق و باين انه مش طايقني يعني واضحة”

_ بص من الآخر أنا لسه معرفش حاجه هنا و مصاحبتش حد فأنت…

: أنا مالي!! صاحبتي مصاحبتيش مش هبقى صاحبك يعني

_ قال يعني انت تطول دا انت حياتك أسود في أسود حتى

: أنا حياتي سودة! من قالك الكلام دا اعترفي!!

_ انت لابس أسود في أسود ، بنطلون أسود تيشيرت أسود كاب أسود و الكوتشي اسود في أبيض الحمدلله أن في أبيض أصلا

: و دا يبين يعني أن حياتي سودة أنا حياتي بيرفكتو على فكره

_ اممم على فكرا ماتشي ماتشي بس انا لابسة طرحة بيضه الحمدلله

” مردش عليا كالعادة و سكت ”

_ صح انت مرضتش تقولي أن اسمك ياسين ليه

ببرود : مزاجي

_ يا بارد!!

: إلا قولي يا ياسين

_ مش عايز

: مش عايز ايه

_ مش عايزك تقولي و مش عايز رغي سيبيني في حالي دا ايه الهم دا

: اعمل نفسي مسمعتش حاجه هو الدكتور الغلس البارد دا عنده عيال

“وشه اتشنج معرفش ليه اول ما قولت كدا هو ماله دا”

بضيق : عنده عيال

_ طب ما يتقي ربنا فينا و يعاملنا زي عياله

: يخربيت الرغي يا بنتي انتي مبتزهقيش!!

_ أنا زهقانة فبتكلم و كمان متكونش قفوش كدا يا كابتن

: لا والله ما قفوش ولا نيلة سيبي أم شكلي في حالي

_ و هو أنا مسكاك من ايدك إنما حاجه غريبة يا جدع!! قال يعني انت وسيم الجامعة اللي البنات بتتلفت علشان تاخد نظرة منك

: للأسف والله حظك وقع مع وسيم الجامعة شخصيا

_ يعم غور

: انت عبيطة!

_ انت اللي عبيط يابا!!

: تمام اوي سيبيني في حالي مش عارف ايه الهم دا على الصبح والله

_ قولتهالك مليون مره هو أنا مسكاك من ايدك

بضيق : يا صبر أيوب يا بنتي هو انت عبيطة؟!!

: مش عبيطة و متشتمش دي شخصيتي عجبك عجبك مش عاجبك اخبط دماغك في الحيط

: مش عاجبني و مش هخبط دماغي في الحيطة

_ انت حر عموما و كمان انت بتكلمني من مناخيرك ليه دا ايه الهم دا

“مردش عليا طبعا و شغل الاير بودز و غمض عيونه و أنا قعدت أشوف ميمز و أضحك و بصيت في الساعة لقيت المحاضرة هتبدأ ”

_ انت يا أستاذ انت!

_ مش هترد عليا يعني انت حر أنا ماشية

_ يا عم! انت ميت ولا ايه أنا ماشية والله

” قولت كدا و ببص في الساعة لقيتها جت و اخدتها جري حرفيا أصل أنا لسه هصحيه يغور المحاضرة اهم ”

ــــــــــــــــــــــــــ

” فتحت عيني بالصدفة و ملاقتهاش قدامي استغربت بعدين ببص في الساعة لقيتها عدت 12 ”

_ ينهار منيل دا أنا هتنفخ لما أروح منك لله يا شيخة منك لله أروح لابويا اقوله ايه دلوقتي نيمت و أنا حاطط الاير بودز اللي منها لله هي كمان ..!!

…

“روحت البيت و رميت الجملة دي بسرعة و أنا داخل على أوضتي جري”

_ السلام عليكم ازيك يا دكتور قصدي بابا

وقفني صوته

~ استنى يا ياسين

_ احم نعم يا بابا

~انت اول محاضرة حضرتك قولت معلش والله المشروع اتأخر..!

مع اني قولتلك تعالى معايا بالعربية بس انت ركبت مواصلات و المحاضرتين التانيين مروحتش ليه بقا المشروع برضوا عايز اعرف ليه لو سمحت؟!!

_ يا بابا والله اللي حصل أن حطيت السماعة و نيمت لاني مطبق امبارح كنت بذاكر و نيمت صحيت لقيت الساعة معدية 12 والله

~ اول و آخر مره يا ياسين تضيع محاضرة لأنها مهمة اوي علشان متتزنقش في الامتحانات و تقول معلش ذاكرلي

ضحكت : حاضر يا بابا

بابتسامة : و بعدين متبقاش تسهر كتير هتتعب و كمان سمعت باب التلاجة اتفتح كذا مره حطيت الفاكهة و الأكل اللي بتحبه عشان لو جعت بليل

_ ربنا يخليك ليا يا حج

: و يخليك ليا يا ياس

ـــــــــــــــــــــــــــــــ

“كنت قاعدة في أوضتي بليل بذاكر و بفكر في ياسين لا مش تفكير رومانسية لا دا معفن أنا حاسه أنه هينفخني و قطع تفكيري صوت أمي”

~ بت يا حسناء روحي يا بت السوبر ماركت اللي في آخر الشارع علشان طلبات الكيكة

_ كيكة ايه دي يا حجة

~ بتاعت بنت عمك

_ و مين هيعملها انتي صح

~ لأ أمها قالت انتي اللي تعملها بتقول انك بتعمليها حلو و بنت عمك صغننة و عاملة عيد ميلاد و كدا بقا و زوقك حلو

_ طب أنا بذاكر دلوقتي و كمان كيكة ايه دلوقتي

~ بت يا حسناء انتي لسه بدأه الكلية مخدتيش حاجات كتير و انتي نفسك حلو في الكيك

_ بس يا ماما

~ بلا بس بلا مش بس

_ احم كنت هقولك بس لو مكنتيش تحلفي يا ماما

“لبست الإسدال و لبست الطرحة باستعجال و جيبت الطلبات ”

“و أنا بعمل الكيكة كنت بفكر لو شافني بكره هيحصل ايه بس بقول برضوا أنا مالي مش هو اللي مكنش طايقني و كمان أنا مش أمه أصحيه و في وسط تفكيري الكيكة اتحرقت أول مره مني..!”

_ ست الكل احم ما تخلي يوسف يجيب طلبات تاني

: ليه

_ الكيكة اتحرقت

: اطلعي ياختي من المطبخ اطلعي أنا هعملها و انت زوقيها مبتعرفيش تعملي حاجه خالص في المطبخ و حتى الكيكة حرقتيها يارب صبرني!!

: اهدي بس يا ماما دي كيكة

” قولتها ببساطة فمسكت المقشة و هي بتجري ورايا لحد ما دخلت اوضتي و أنا بضحك من عصبيتها”

: يا ساتر يارب كل دا علشان كيكة دا الأمهات دول حاجه غريبة

بضيق و صوت عال

_سمعتك على فكرة

: كنت بقول ربنا يخليك ليا يا أمي

_ انت حسناء محمود المحوَّلة

بتردد : ايوه أنا فيه حاجه؟

_ لا مفيش مالك اتخضيتي كدا ليه أنا اسمي ايات ، عادي لو نتصاحب

: اه طبعاّ

_ نسيت اقولك هو انت دخلتي جروب المحولين بتوع الكلية

: الحقيقة لأ تبقي تخدي رقمي و دخليني

_ تمام

: هو انت منين بقا يا آيات

_ من البحيرة

: اجدع ناس والله

_ صح هو انتي تعرفي ياسين التهامي منين

: مين ياسين التهامي دا

_ اللي كان معاكي امبارح دا على الباب بتاع المحاضرة لما اطردتوا

: اه دا احنا كنا بنتخانق أصلا دي عيل غتت و بارد

_ هو الحقيقة بارد اوي معرفش البنات بتحبه على ايه الحقيقة يلا دول فاضيين دا احنا عندنا بلاوي

: بلاوي ايه

_ بيقولوا انهم اسبوعين شهر حاجه زي كدا و هيلسعونا امتحان على قفانا

: بجد

_ اه والله بيقولوا و حتى الدكتور لمح امبارح

: ربنا يستر

_ بت بت أهو ياسين

” بصيت جنبي و لقيته ماشي بمنتهى الكاريزما تقولتش ابن وزير الداخلية بلبس الأسود اللي بيلبسه أربعة و عشرين ساعة دا ”

” روحت أكلمه بمنتهى العشم”

_ يا دكتور ياسين أنا جيت أصح..

“بصلي بطرف عينه و ببرود و هو ماشي دا سقعلي ابن الإيه ”

آيات بضحك

_ ينهار أبيض همووووت دا سقعلك ياه على كسفتك يا حازم

بضيق: يلا يلا بينا على المحاضرة

ــــــــــــــــــــــــــ

استغفر الله

ــــــــــــــــــــــــــــــ

” كان الدكتور بيشرح و أنا ببص على ياسين بضيق و قالبة وشي و لو بإيدي كان زماني لاطشاه قلم يعرفه مقامه لحد ما الدكتور اتكلم”

بزعيق

~الدكتورة اللي هناك اللي لابسة أخضر

“بصيت حواليا ملقيتش حد لابس زيي قومت و أنا بقول بتردد و بشاور بصباعي على نفسي”

_ أء.ءأنا

~ أومال أنا! مفيش غيرك لابس اخضر

_ دا زيتي يا دكتور

~ زيتي يا دكتور بتقاوحي كمان

_ و أنا عملت ايه يا دكتور بس

~ الهانم سرحانة و أنا بشرح ايه اجيبلك عصير

_ احم مكنتش سرحانة يا دكتور

~ طيب ممكن تقولي كنت بقول ايه دلوقتي

” سكت لإني فعلا مكنتش مركزة بعدين بصيت على الشاشة و فهمت لإني كنت مذاكراه قبل كدا و جاوبت ”

_ تمام ، و بعد كدا يا شباب اللي يقعد في محاضرتي ميسرحش والا الباب اهو يفوت جمل ، اقعدي

“قعدت بعدين آيات كانت بتشد طرف البلوزة”

_ ايه؟

• وطي صوتك بس طلعتي شاطرة يابت

_ طبعاً أنا طول عمري شاطرة

• بس ايه الدكتور دا صعب موت

_ اه دا غتت

• طيب نسكت بقا علشان ميشوفناش

” سكتنا بعدين الوقت عدى و طلعنا من المحاضرة و روحت الموقف أركب”

_ طوالي يا اسطا

“قولتها بصوت عالي و أنا بسأل السوق و قالي اه و فتحت الباب ركبت ورا ياسين محبتش اتكلم معاه و كنت متعصبة منه بعدين فوني رن”

_ ألو

~ ايوه يا حسناء هتيجي امتى

_ ركبت يا ماما و جاية على طول ليه في حاجه

~ لا بطمن عليكي عملتي ايه في الكلية

_ كويس بس في دكتور غتت بارد اوي كدا مضايقني مش نازلي من زور

~ إن شاء الله خير يا حبيبتي خلي بالك من نفسك

_ حاضر سلام

~ سلام

“قفلت المكالمة و ببص قدامي لقيته باصللي بضيق اتخضيت شوية بعدين اتكلمت بضيق”

_ نعم! في حاجه يابا!!

: انت عارفه انت بتشتمي مين

_ اه عارفه ايش دخلك انت و كمان بتتصنت ليه عليا و أنا بتكلم

بتريقة: أتصنت؟!!

_ اه تتصنت

: شكلك مش ملاحظة اصلا ان الميكروباص كله سامعك

_ كداب

“بعدين بصيت حواليا لقيت الكل عمال يبصلي حمحمت بإحراج ”

بصلي بضيق و حدة وهو بيقول

: أنا بقولك اهو متشتميش الدكتور دا تاني!

بضيق _ هتعملي ايه يعني و كمان أنا حرة انت هتتحكم فيا يعني

“بصلي ببرود و بعدين و هو قدامي كان رافع الفون حبه و شوفت بالصدفة انه فتح لصورة كان باين انها أم و جنبها ابنها قعد يبص كتير بعدين مسحها ”

ــــــــــــــــــــــــــــــــ

لا إله إلا الله

ـــــــــــــــــــــــــــــــــــــــ

[ياسين ]

” طلعت من الميكروباص و و وصلت للبيت لقيتها واقفة بمنتهى الهدوء و البرود وقفت من صدمتي كانت واقفة ساندة على العربية و جاتلي و هي حاطة ايدها على بطنها”

ببرود معتاد_ عامل ايه يا ياسين

بحدة : كويس طول ما انت بعيدة عني

ببرود _ أنا جيت بس علشان اعرفك انه هيبقى عندك اخت

: بجد؟ ألف مبروك

“قولتها بتريقة فقالت ببرودها المعتاد”

_ الله يبارك فيك و كنت عايزة اقولك ان عمو محمد كان عازمك بس انا قولت انك مش هتقدر تيجي لانك مشغول

بتريقة و برود

: والله انتي جيتي بس علشان تقوليلي دا؟ يا شيخة بجد مش عارف اقولك ايه

_ أنا مش عارفة ليه حساك مش عايز تتمنالي الخير في حياتي ليه؟!

: و ايه كمان قولي اللي في قلبك

_ و حبيت اقولك برضوا انك برضوا اللى خسران علشان اخترت أبوك عليا شوف هو معيش فين

: لأ أنا كسبان و كسبان اوي على فكرة و ماله المكان اللي عايش فيه يعني و كمان ياريت ياريت بجد من قلبي بلاش تيجي هنا تاني

و هي بتبص على ضوافرها

ببرود _ هتندم بعدين

بزعيق : أنا ندمان أصلا اني ابنك!

“دخلت بيتي بسرعة و أنا بتصل على أبويا”

_ ألو يا بابا

: ايوه يا يس

بخنقة _ ممكن أروح اسكندرية اغير جو شوية

: ليه في ايه

_ مفيش يا حاج والله ممكن

: تمام روح و متتأخرش و متروحش بالعربية

: حاضر

“جهزت نفسي و ركبت و روحت اسكندرية و أنا في دماغي دوشة حرفيا بفكر في مليون حاجه”

“جيبت قهوة و قعدت قدام البحر كان شكله حلو اوي كان وقت الغروب و الهوا بيضرب فيا بهدوء و أفتكرت ذكرياتنا لما كنا مبسوطين و بنيجي على الشط دا كانت الدموع متحجرة في عيني و حاسس بخنقة و تعب ”

“مسكت الفون احاول اهرب من الذكريات و بالصدفة شوفت بودكاست ديني لشيخ و اندمجت اوي”

كان بيقول:

البر بالوالدين مش شرط انها تكون مثالية البر هو اختبار قلب الابن و نضجه و الكلمة الطيبة وقت الزعل أو الخناق و الوجع، بتكون أعظم عند الله و بدأ يقول الآية بصوت جميل و هادي

{وَقَضَىٰ رَبُّكَ أَلَّا تَعْبُدُوا إِلَّا إِيَّاهُ وَبِالْوَالِدَيْنِ إِحْسَانًا ۚ إِمَّا يَبْلُغَنَّ عِندَكَ الْكِبَرَ أَحَدُهُمَا أَوْ كِلَاهُمَا فَلَا تَقُل لَّهُمَا أُفٍّ وَلَا تَنْهَرْهُمَا وَقُل لَّهُمَا قَوْلًا كَرِيمًا * وَاخْفِضْ لَهُمَا جَنَاحَ الذُّلِّ مِنَ الرَّحْمَةِ وَقُل رَّبِّ ارْحَمْهُمَا كَمَا رَبَّيَانِي صَغِيرًا}

فتخيل بقا ربنا وصاك يا بني آدم إنك تبر والديك و تقول لهم قول طيب فتروح تعمل غير كدا

” قفلت الفيديو و أنا حسيت بشعور غريب و شغلت قرآن شوية و أنا ببص على البحر و هدوئه و بدأت اتكلم معاه و احكي له مشاكلي و بعدين اتصلت”

_ ألو…