تحميل رواية قيد من الم بقلم تقي محمد pdf

قيدٌ من ألم

للكاتبه تقى محمد

الجزء السادس

💎💎💎💎💎💎💎

مشيت ليهو قال لي إنتي قلتي لي نغريد شنو ؟ قلت ليهو ما قلت ليها حاجه قالت لي كزابه هي قالت لي إنو انا لو ما إحترمت نفسي هي ح تتطردني انا وولدي في الشارع وقالت لي إنو البيت دا حقها رائد قال لي قلتي ليها كدا ولا لأ قلت ليهو هي قالت ل... قاطعني قال لي اجابه وحده قلتي ليها الكلام دا ولا لأ؟ قلت ليهو اي قلتو قال لي تطرديها لي البيت دا حق ابوك؟! ما تخليني اوريك العين الحمراء قلت ليهو ما حق ابوي ولا حاجه وهي الغلطانه قال لي شوفي يا تقى الكلام الفارغ دا ما بنفع معاي احسن ليك ولحدي هنا انا سكت ليك كتير ما تخليني إتصرف معاك تصرف تاني البيت دا لا حقك لا حقها البيت دا حقي انا وانا البقرر منو بقعد فيهو ومنو بطلع فاهمه؟! قلت ليهو بس هي برضو غلطت علي قال لينا الاتنين تعتزروا هسي من بعض وتاني ما أسمع كلام فارغ زي دا وإلا ما بتشوفوا مني خير يلا اعتزروا تغريد قالت لي اسفه رائد قال لي يلا يا تقى إعتزري ليها قلت ليها اسفه انا برضو قال لينا احضنوا بعض انا وتغريد الاتنين في نفس الوقت قلنا مستحيل قام هرج فينا قال لينا ما اعيد كلامي تاني حضنا بعض قال لينا يلا كل وحده على غرفتا مشيت غرفتي دايره اطق من الزعل كيف إعتزر ليها وهي غلطانه وجن جاتني شايله لعبتا قالت لي امي عايني يد العروسه إتفكت قلت ليها ياوجن ياخ ما فاضيه ليك قالت لي امي صلحيها لي وبقت تتعبط قعدت اكورك فيها واثناء ما بكورك فيها رائد جاء داخل قال ليها في شنو يا وجن قالت ليهو وهي بتبكي ماما شاكلتني عشان قلت ليها صلحي لي يد العروسه شال منها العروسه وركب ليها يدها وقال ليها اها كدا ركبت امشي العبي طلعت وهو جاء فتح الدولاب طلع ملابس من الدولاب قال لي دا كلو عشان تغريد ح تقعد معانا كم يوم انا كلمتك يا تقى وقلت ليك إنو انا حاليا ما بي إستطاعتي أأجر ليها بيت ليه مصره تضغطي علي..

قلت ليهو انا مافي حاجه مضايقاني غيرك يا رائد دايما تغريد دي اي حاجه تقولها ليك بتصدقها وانا لأ ما حصل في يوم طلعتها غلطانه والدليل على دا قبيل لمن جات شكت ليك طوالي وقفت عند الكلمه القلتها ليها وكيييف اقول ليها كدا مع إنو هي برضو قالت لي كلام كعب وما إحترمتني وهي القاعده معاي ما انا قال لي هسي الموضوع دا ما قفلنا قلت ليهو لأ ما إتقفل يا رائد كل مره تغريد دي تسمعني كلام فارغ وإنت تقيف معاها ياخ لو مجبور علي قول قال لي إنتي ليه دايما شايفه نفسك مظلومه قلت ليهو ما انا فعلا مظلومه قال لي بالله عليك يا تقى اقفلي على الموضوع دا وما تكرهيني حياتي قفل الدولاب بي قوه وطلع مشيت ناديت وجن وشلت حسن نومتهم وقفلت باب الغرفه ورقدتا...

الصباح صحيت بي صوت عبد الرحمن طلعت لقيتو مع امو قال ليها يا أمي امبارح ما غسلتي لي هدوم قالت ليهو إنت شافع تاني تغسل براك قال ليها كويس كان تقولي لي الكلام دا امبارح هسي ح امشي المدرسه بي شنو قالت ليهو يا ولد اوعى ترفع صوتك فيني وأمشي من قدامي زاتو لو ما داير تمشي المدرسه دي ما تمشي مشى خلاها قلت ليها الولد دا ما ولدك ولا شنو على الاقل راعي ليهو حبه هو في مرحله محتاج تحتويهو ما تعامليهو كدا قالت لي يا سلام اخر الزمن إنتي تعلميني إتعامل مع ولدي كيف كدي قولي لي إسمك بتكتب كيف ؟! هه علمي نفسك اول..

ومشت خلتني جاء عبد الرحمن قال لي اصلا دا طبعها م ح تتغير قلت ليهو جيب ملابسك بغسلهم ليك وبالنشافه ح ينشفو سريع إبتسم لي ومشى جابهم لي غسلتهم ليهو وختيتهم في النشافه طلعتهم كانو مرطبات جبت المكوه كويتهم ليهو بقوا زي المغسلات ليهم فتره ختيتهم ليهو هو مشى إستحمى وجاء لقاهم جهزن قال لي شكرا ليك والله قلت ليهو اجي إنت زي ولدي شيلهم سريع بدل ملابسك عشان تلحق مشى غير وطلع قبل يمشي جا قال لي اها يا خالتي انا طالع قلت ليهو بالتوفيق إن شاء الله ب طلع جات تغريد قالت لي الليله انا م ح افطر في البيت طالعه مشوار اعملي الفطور لي راجلك بي سخريه كدا وطلعت رتبت البيت وعملت الفطور جهزت وجن لي الروضه شلت حسن ومشيت وصلتها باب الرضه وجايه راجعه لاقتني خالتو عاليه قالت لي يا بتي كيفك قلت ليها والله تمااام الحمد لله كيفك إنتي ورهام وولدا كيف قالت لي تماام الحمد لله كويسين كنت جاياك امس بس إتزكرت العارض دي معاكم والله يا بتي تغريد دي ما مرت ولدي لكن والله نفسيا كدا ما قاعده اريدا وبحس بيها كدا ما تمام قلت ليها هسي هي مافي ارح معاي البيت قالت لي مشت وين كمان قلت ليها طلعت قالت فاطره بره قالت لي احسن

مشينا انا وخالتو عاليه قعدت تتونس معاي ومسكت لي حسن وانا عملتا الفطور لمن إنتهيت وجن جات قلت ليها يلا امشي غسلي يدك عشان ح اخت الفطور جرت غسلت يديها وختينا الفطور فطرنا رفعت العده وختيت الشاي رائد جاء ختيت ليهو فطوروا غسلت العده وكبيت الشاي رائد قال لي تغريد وين قلت ليهو طلعت قالت فاطره بره خالتو عاليه قالت ليهو هي ما كلمتك قال ليها لالا ما قالت لي إنها طالعه خالتو عاليه قالت ليهو اخر الزمن المهم خالتو عاليه قعدت معاي لحدي قريب العصر وطلعت عبد الرحمن جا عملت ليهو غدا إتغدا وطلعت غرفتو رتبت البيت لحدي الوقت دا تغريد ما جات داخله رائد جا نازل قال لي تغريد لسه ما جات قلت ليهو لأ إتصل عليها قال ليها وين...سريع تعالي منتظرك

قفل منها بعد نص ساعه كدا جات رائد قال ليها كنتي وين قالت ليهو مشيت لي شيرين قال ليها لمن طلعتي كلمتيني قالت ليهو يا رائد من متين لمن اكون طالعه لي شيرين بكلمك قال ليها دا لمن كنتي ساكنه جمبها هسي إنتي وين وهي وين قالت ليهو سمح تاني بكلمك دخلت ورائد طلع عاينت لي مسافه وقالت لي اكيد حرضتيهو علي صح لكن انا بعرف أادبك كيف اصبري لي قلت ليها ادبي نفسك اول بعد داك تعالي إتكلمي في الناس قالت لي قصدك شنو انا ما مؤدبه يعني قلت ليها القصدتي إنتي قالت لي الحمد لله انا عندي ام واب يربوني من دون ما أشعر اديتا كف بي اقوى ما عندي قلت ليها إياك ثم إياك تجيبي سيرة امي وابوي في خشمك دا فاهمه انا الادب العندي إنتي ما عندك ولا بتشرف إتقارن بيك زاتو فاهمه

إنفعلت شديد وقالت لي إنتي تمدي يدك علي يا جاهله يا مقطعه والله ما اخليك قلت ليها سمح نشوف وطلعتا خليتا...

الكاتبه تحكي...

تغريد إتوعدت لي تقى وكانت مسبقا مخطط لي حاجه..

تغريد: والله ما يبقى إسمي تغريد كان خليتك قاعده في البيت دا انا تمدي يدك القزره دي وتضربيني اصبري لي بس

إتصلت تلفون

تغريد: اي يا شيرين عايزه منك تنفزي لي طلب...لالا كلو بي حقو يا حبيبتي عايزه **** ما ح اقدر اجيك تعالي لي إنتي او اقول ليك رسلي لي مع عبد الرحمن لمن يجي من المدرسه...