رواية لأجل من احببت سأكون قوية الفصل السادس 6 - بقلم امل

دخلت ام سما وسما لبيت الجد وكان ابو احمد يهلي ويرحب فيهم وكان طاير فيهم طير
وكان بدور وحنان كاعدين بالصاله وعيونهم بالنقال ومن دخلوا كانت علامات التعجب ع وجههم

بدور:يبه منو هذول
ابو احمد:هاي مرتي وهاي اختج..سلمي عليهم
بدور:هااا
وحنان لا تقل صدمه:نعم اي مرتك..شنو جنت مزوج بالسر من ورانه

ابو احمد:عدلي كلامج..مو انا الازوج بالسر..هاي مرتي كبل لا ازوج امج..وهاي اختج الجبيره

حنان:شنو(ناضرتها بقرف واشرت بصبعها من فوك لتحت عليها)هاي اختي انا.. اكيد تشاقه مو معقول ..شوف لبسها ويع..وافشلتي شلون اذا دروا صديقاتي عنها

سما:هيووو انتي ترى انا لهسة ساكته احتراما لامي..فلا تخليني افرك خشمج بالكاع

حنان:يااا شنو هالهمجيه شوف كلامها وحركاتها ويع او ماي كود
سما وهي ترفع كمامها:انتي مو مال تفاهم الا اجي اتلج من شعرج ياله تتعدلين

ورادت تضربها بس امها مسكتها
ام سما:استهدي بالله ييمه لخاطري لا تتعاركين من اول يوم

سما تحاول تتمالك نفسها:لا اله الا الله الصبر من عندك يارب.. لخاطرج يمه
حنان:بدور شوفي شوفي..ما اصدك انها بنت..شوفي لبسها وطريقه حجيها..رجال ومحطوط.. يرادلها دروس خصوصيه بالانوثه هههههههه

سما حز بخاطرها هالحجي بس ما بينت: والله عاجبني وضعي..واذا ما عاجبج فضربي راسي بالحايط

سمعوا تكسر صحن وكلهم التفتوا لجهه المصدر

ام احمد بصدمه:فاااطمه ؟ (بعصبيه بعد ما استوعبت الوضع ) سويتها يا محمد.. رجعتها ياله ارتحت.. وانتي يالعكربه ظليتي وراه وراه لمن طيحتي بشباكج

ابو احمد: احترمي نفسج يخلود.. هيه مالها علاقه انا دورت عليها ورجعتها..هيه مرتي مثلج وهاي بنتي مثل ما هذول بناتي.. فاهمه

ام احمد بعصبيه:لا ما فاهمه والحين تطلع من بيتي
سما بملل:افففف تكدرون تكملون جدالكم بعدين هسه دلونه وين غرفتنه نريد نرتاح

ام احمد:كاعده اكلكم طلعوا بره اي غرفه اي راحه انشالله تكعدون بجهنم عن قريب ( وتوجهت لهم تريد تضربهم وتطردهم بس ابو احمد مسكها واخذها لفوك يتفاهم وياها وهي تصيح)

ام احمد:والله لندمكم ع الساعه الي اجيتوا فيها..راح تشوفون شسوي

سما:اهووو هاي من بدايتها مشاكل فشلون بعدين..كتلج يمه لا نرجع

ام سما:انشالله تهدى ويصير كلشي بخير (الله يستر بس شكلها ما راح تعديها ع خير..يا رب سترك.. شلون راح اخلي بنتي بين ادينها لازم الكه حل)

ابو علي حاجه الخدامه وكللها توديهم لغرفهم بس سما اصرت تنام بنفس الغرفه وي امها..بس امها رفضت تنام وياها وكلتلها تنام بغرفه لوحدها ولهالسبب سما زعلت

سما:ليش ما ترديني انام يمج
ام سما:هيج ماريدج يمي..كافي صارلي سنين مكابلتج.. شبعت كله مكابلتج..اريد شوي حريه

سما بعصبيه خفيفه:اي كولي تردين اظلين لوحدج حتى تترومنسين وي رجلج.. اي من اجينه بعد صار هوة اهم مني

ام سما ضربتها خفيف:وجع انشالله قليله ادب..وبعدين هذا ابوج شنو رجلج.صيحيله يبه..وانامو علموده ما اريدج..بس هيج اريد اظل لوحدي بدون سبب

سما فرت وجهها ومشت عنها بزعل

ام سما حجت بحزن بس سما طلعت قبل لا تسمعها:سامحيني يمه..بس من يوم ورايح لازم اظل لوحدي.. حتى لا تلاحظين مرضي..لان يوم عن يوم..جاي اضعف زياده..وما اكدر امثل القوه مثل قبل

سما راحت لغرفتها ونامت

واجه الجد لغرفه ام سما

الجد:لعد وين سما
ام سما:راحت لغرفتها ما خليتها اظل يمي لان اخاف تشك بمرضي اذا ظلت وياي

الجد:زين سويتي.. "سكت شوي ومايدري شلون يحجي"
ام سما:عمي حاسه عندك كلامه كوله
الجد:اي والله عندي..انتي ما فكرتي شنو راح يصير بسما بعدج الله يطول بعمرج..بس محد ضامن حياته وخصوصا انتي مرضج خبيث يعني ما تدرين باي يوم راح..

ام سما قاطعته:فهمتك..بس انا لهلسبب رجعت عندكم حتى تضل برعايه ابوها اذا متت

الجد:اي بس ابوها مو دوم راح يكون متواجد مثل الام..اكيد راح يلها بشغله او تجيه سفريه بسبب الشغل وراح تكون تحت رحمه خلود..وانتي تعرفين منو خلود..اكيد مراح ترحمها

ام سما بخوف وتشتت:لعد شراح اسوي
الجد: انا عندي حل
ام سما بامل:شنو
الجد:شرايج نزوجها
ام سما:هااا بس سما ما تفكر بالزواج..كل ما احاول افاتحها بالموضوع اسده

الجد:هيه ما تريد تتزوج لانها تريد اظل يمج..لانها ما تعرف بمرضج..بس انتي لازم اتقنعينها بالزواج..انتي ما مشتهيه اشوفين عرسها قبل لا تفارقينها

ام سما بابتسامه صفره:امنيتي اشوفها معرسه ومرتاحه وي زوجها..حتى اموت مرتاحه ..بس ازوجها منو..انا ما اعرف احد زين وامن بنتي عنده

الجد:انا عندي..شرايج بجود..خوش رجال وهوة تربيتي واعرفه..وبالمجالس كلمته ما تنزل وكلمن يحسبله الف حساب..هيبه ورزه بعد شتردين

ام سما:اي انا شفته مبين عليه خوش رجال..بس هوة كلك يريد سما..ترى فشله اكله تعال اخطب بنتي..ترى هاي اهانه لبنتي.. وانا ما بايعه بنتي..والف واحد يتمناها

الجد:لا لاتخافين خلي الموضوع عليه..بس انتي قنعي بنتج سما وخلي كلشي عليه.. المهم تعاي هسة نزلي للصاله.. ترى عائله ابو جود كلها موجوده ويردون يشوفونج انتي وبنتج

ام سما:اوكي شوي وانزل
راحت ام سما لغرفه بنتها وكتها كانت نايمه غطتها وباست راسها وطفت الاضويه وطلعت ونزلت جوه للصاله

ام سما:السلام عليكم
الكل: وعليكم السلام
كامت ام جود وحضنت ام سما وسلموا البقيه عليها

ام جود:يا الله شكد اشتاقيتلج..يالظالمه ١٨ سنه حتى اتصال ما كلفتي ع نفسج واتصلتي..ما كلتي عندي صديقه اتصل فيها

ام سما:والله انا اكثر مشتاقتلج بس شسوي..خفت اتصل ويلكوني

حنان:لعد شعندج راجعه جان ظليتي شاردة..لو بس تردين تخربين بيتنه

ابو احمد:لو تنطمين لو تولين دارج
ام احمد:ليش تسكت عيوني..ما كالت غير الحق..اي يمه جايه حتى تخرب بيوت.. من يوم ورايح هالبيت ما راح يشوف الراحه

ابو احمد:خلود اكصري الشر وروحي فوك ولا تخليني اعصب
ام احمد بعصبيه: اي طلعت عينك يوم شفت حبيبه الكلب..بس انا لكم.. راح اعلمكم منو خلود انتي وبنتج بسيطه
وطلعت من الصاله هيه وبنتها

ابو احمد بابتسامه:لا تخافين منها ترى بس حجي ما راح اسوي شي

ام سما بنضره حزن:اتمنى هالشي

الجد:جود
جود:نعم يبه
الجد:تعاي بالمكتب
جود:انشالله

راح الجد للمكتب وتبعه جود
جود:امر حجي ردت شي
الجد:اذا طلبتك شنو تنطيني
جود:انطيك عيوني المركبه

الجد:لعد طلبتك تزوج جيهان(هيه نفسها سما بس بالطفوله اسمها غير ) بنت عمك ابو احمد
جود غمض عيونه بحزن:يبه انته تدري انوا هالموضوع حساس واني ما اريد اتزوج هيج عكب الي صار

الجد بعطف:الي صار صار من الماضي..وهسه فكر بنفسك..ما تريد تشوف عيالك ..اذا ما تريد انا اريد اشيل عيالك واشوفهم  حواليني قبل لا اموت..طلبتك تحققلي هالامنيه فلا تردني

جود كام وباس جده ع جبينه:ما عاش من يرفضلك طلب حجي..وانته دومك ع الراس وكلمتك ما اصير ثنتين عندي وراح اضل هيج دوم

الجد:الله يرضه عليك يا ولدي ..والله هم وانزاح عن كلبي..لان صارلي سنين احس بالذنب ع هالبنت.. وادري هسه اذا ازوجتك فاكيد راح تكون بامان وراح تعيش مرتاحه..لاني ما اثق بواحد غيرك..لان عمك وولده ما فيهم خير

جود:تطمن يبه..ما راح اخلي الماضي ياثر علي..وراح احميها واحافظ عليه..يله استاذنك حجي اروح انام

الجد:الله وياك يا ولدي وتصبح ع خير
جود:وانت من اهله

وراح كلمن لغرفته ينام
والجد خبر ام سما بموافقه جود وبقى الباقي عليها

جود بغرفته يفكر(يا ترى انا تسرعت بالي سويته.. معقوله اكدر انسى الماضي وما ياثر عليه.. والله خوفي اظلم بنت الناس وياي..لان انا ما اكدر ارجع مثل قبل.. اففففف يارب صبرني.. )
ولا اراديا راح تفكيره لابو علي (سما) (يا ترى هالمسترجله بخير.. لو احد تعرضلها.. انا خايف عليها لا يكون احد يكتشفها ويسويلها شي وهي مهما تكون بنت وما راح تكدر ادافع عن نفسها)
كام واتصل ع سلطان

جود:الووو اريدك من باجر تروح لمنطقه بيت فاطمه وادور ع ابو علي لان مبين عليه هناك منطقته..لان جم مره اشوفه هناك..ووو وراح اكولك شي

سلطان الي كعد ع رنه التلفون ومفهي:اي يصير خير
جود:ولك شيصير خير انته وياي لو بعدك نايم
سلطان غمض عيونه:اي بعدين بعدين
جود بصوت عالي:سليطين تصحصح معاي لو شلون
سلطان هز راسه وحاول يركز:اي شنو كلت؟
جود:كتلك دور ع ابو علي
سلطان:والله ودي اسالك ليش مهتم بيه بس اخاف اطير جبهتي وتكول معليك
جود:مدام تدري جوابي فلا تسال بس راح اكولك شي بس والله لو كلت لاحد ادفنك
سلطان: ياساتر يارب شكو
جود:انا لو ما هالشي ضروري علمود تلكاه جان ما كتلك ..هذا شسمه ابو علي تراه بنت

سلطان بفهاوه:هااا
جود بجديه:والله لو دريت انوا احد دره انها بنت راح اطير ركبتك.

سلطان بخوف مصطنع:لا يمعود بايع عمري ..بس شعدك ادرر بنيه ليكون غمزت السناره "حجاها بابتسامه خفيفه"
جود عقد حواجبه:شنو هالحجي..ثمن كلامك قبل لا تحجي اوكي..انا بس قلق عليها لانها بنت والشوارع ما راح ترحمها

سلطان: طول عمرك طيب حتى لو تحاول تكون قاسي.. كلبك اصله طيب وميلوكله البرود انا اكثر واحد عارفك

جود عقد حواجبه بانزعاج: شنو هالخرابيط لا طيب ولا هم يحزنون كل ما بالموضوع هاي انسانيه واي واحد بدالي جان سوه هيج..وعن الحجي الزايد ارد انام

ودعه وسد التلفون وحاول ينام

بهاللوقت كعدت سما بسبب كابوس وراحت لامها

سما:يمه خليني انام عندج عفيه بس هاليوم
ام سما:تعاي بنتي اريدج بموضوع

سما راحت وكعدت ع الجربايه يم امها:نعم يمه
ام سما:راح ادخل بالموضوع وما راح الف وادور عليج..انا اريدج تزوجين ابن عمج

سما:نعم نعم..يا ابن عم هذا..يمه انا هستوني جايه ولا اعرفهم ولا يعرفوني..تردين ازوجيني ابنهم.. وبعدين انا مستحيل ازوج واتركج

ام سما:يمه فدوه فكري بيها عدل..ترى اذا ازوجتيه فراح تكونين قريبه عليه وكل يوم راح اشوفج لان بيتهم يم بيتنه وما يفصل بينه الا باب.. ترى انتي اول وتالي راح تزوجين فهاي خوش فرصه حتى تكونين قريبه عليه فدوه

سما:ما ادري يمه..احنه شعرفنه بيهم..يجوز يطلع مو زين.. وتعاي انتي ليش تلحين بالزواج اكيد تردين تختلين برجلج 😒

ام سما:انجبي مو هيج وعن قله الادب وانتي كل كلمه والثانيه لزكتي ابوج بالنص..هوه ماله دخل .. كل الموضوع يمه انا ما دايمتلج واحس روحي عن قريب راح افارقج فاريد اموت وانا مرتاحه(كالتها وهي صافنه وبدون وعي)

سما ترقرقرت عيونها بالدموع وحضنت امها:يمه انتي بيج شي..ليش اذكرين الموت لعل يومي قبل يومج..كوليلي شكالولج بالمستشفى..

ام سما وهي تمسح ع شعر بنتها بحنان: لا يمه ما بيه شي..بس هيج مجرد احساس

سما ناضرت بعيون امها بخوف:يمه اترجاج لا تخوفيني عليج..انتي تدرين مالي غيرج وما اجيت هنيا الا علمودج.. والله لو صار بيج شي يمكن اموت وراج

ام سما:اسم الله عليج بنتي..لا تكولين هالحجي..المهم طلعي ابي انام ( كانت تحس بالام فضيعه بس متحمله علشان بنتها ما تحس)

سما بابتسامه: يمه عفيه بس هالمره الله يخليج..متعوده جنت ابيتنه كله انام بحضنج فما اكدر انام بدونج

ام سما بعصبيه خفيفه:كتلج طلعي بره ولا تحنين

سما طلعت وهي زعلانه:(شبيها عليه امي..احسها متغيره عليه من يوم جينه هنا وما تريدني ابقى وياها ،لا وهنوب تريد تزوجني حتى تفتك مني..هلكثر انا كاعده ع كلبها..وحتى نومه ما تخليني انام وياها وهي تدري انوا تجيلي كوابيس اذا نمت لوحدي بالغرفه😔)

عند ام سما

اول ما طلعت منها راحت ركض للحمام وضلت تتقيء وطلع وي التقيأ دم وظلت منهاره بالحمام وتحس عظامها متكسره وما تكدرت تكوم (يااارب ساعدني مالي طاقه بعد ع التحمل..يارب انطيني القوه لو بس كبال بنتي)
وحاولت تكوم واستندت ع المغسله وكامت وغسلت وجهها وتسنددت ع الحايط ووصلت للجربايه وانهارت يمه ولملمت روحها ع السرير وهي تصارع الالم وتحاول تنام..لعل النوم يخفف وجعها

اما سما عطشت وراحت تدور عالمطبخ وهي ما تدل شي لان اول ما اجت صعدت لغرفتها وما شافت شي من البيت..وظلت تفتح باب واسد باب..الى ان وصلت باب وحسته دخلها ابيت ثاني

سما(هاي شنو انا وين دخلت..سترك يارب..هسه شدعوه هلكبر بيتهم..شنو مخترعين عندهم بيت.. لحظه مو كاني مريت يم هاي القنفه قبل شوي..شنو هاي بيت لو متاهه وهنوب ظلمه كلشي ما اشوف.. شكل الكل نايمه..اوووف تعبت وانا ادور بالطابق الجوه خل اصعد للطابق الثاني واشوف شبيه..بلكي بيه مطبخ )

وصعدت للطابق الثاني وكان اظلم اكثر وحست برعب بسبب الهدوء والظلمه..وفجاءه خبطت بطاوله وطاحت المزهريه وانكسرت

سما وهي حاطه ايدها ع حلكها(ياويلي شسويت..بس لا تطلع غاليه واترزل.. شهالغباء اكيد غاليه ما تشوفين بيتهم كله كشخه بكشخه 😒)

وظلت تمشي ع كيف وما حست الا احد حط يدها ع حلكها وسحبها و.......
.
.
.
.
اعطوني ارائكم حتى لو سلبيه