رواية لبوة على شفا الثار الفصل الثامن والخمسون 58 - بقلم Leo Alfatlawi

خالة عاشق بحضني وصافنة على أركان اللي يسوق ومندمج بالسوالف ويا غيث، وبالي كلام ناي من تقول: "آخذك ونعيش بيت بابا، وأخليك تكملين دراسة." معقول أقدر أروح وياها وأكمل باقي حياتي بهدوء؟ راح أقدر أنساك ويجي يوم ألتقي بيك بدون لا أباوع لك حالك حال الغريب؟ راح تمر علينا ليالي نتذكر شلون التقينا وشلون افترقنا، هم يجي يوم تسولف لجهالك عن حبنا لو راح تنساني نهائيًا؟ باوعت لعاشق يباوع لأبوه بغِل، ضحكت، دنكت بستُه وهمست:

"لا تباوع له هيج ترى يزعل." رد عاشق: "يطبهم مرض." قلت له: "ولك عاشق، رايحين لبيت جدك، ذوله عالم قذرين، إذا سمعوك تغلط يضربوك." رد: "أشعل أبوهم." قلت له: "شلون بيك حبيبي؟ بليل ماما تجيك تاخذك، ناي ما تتركك." رد: "خلي تجي هسه، أريد أرجع لجدتي." قلت له: "أني أرجعك بس توعدني تصير حباب حتى لا يقولون على أمك ما عرفت تربيك." رد: "بالقرآن أورهم ور." غيث: "خويَّه، لازم نشتري له ملابس، هذا جاي بملابس البيت." غيث:

"هينه، هسه نمر على محل أطفال." عاشق: "أني موش طفل، اكضُب لسانك." غيث: "عجل اللي يبكي ورا أمه شنو؟ رد عاشق: "أزلمة، هاي أمي مو مثلك جبان، طردت جدتي من البيت وخليتها تبكي بليل ما نامت." أباوع لغيث أخذ نفس، اتكتف ودار وجهه للجامَة، ما رد. أركان: "عاشق عمي، ما تذكر اسم جدتك غادي ترى تزعل، وأي أحد يسألك تقول له: عايش ويا أمي وجدتي، النهار سمعت." رد عاشق: "أحجي وأقول لهم غيث طردها." اندار غيث خازره، ضم رأسه بحضني، قلت له:

"صدق تحجي غيث؟ رد: "دحگ يول، إذا سمعتك جايب طاريها أحرمك منها بعد ما توصلها لو تنط." رد عاشق: "ما أخاف حتى لو طكني." رد غيث: "أكيد ما تخاف، عجل منين طالبها؟ عاشق بس تجيب طاريها أعلقك بالبنكة." رد عاشق: "ناي تقول بس يتهدد جبان كلشي ما يسوي." رد غيث: "استلم بالله، بعد شكالت لك؟ بدأ عاشق يشرح لغيث وأني بالقوة كامشة ضحكتي لأن ولا كلمة صدق،

غيث يتصنت ويأشر: "أي"، بس مسايرة لأن نسي بجيته ويشرح بذمة وضمير. أركان هلكد ما ضحك دمع. وصلنا يم محل، نزلوا، غيث فتح الباب أخذ عاشق شايله راحوا، أباوع لهم ما شاء الله رغم جمال غيث، عاشق أحلى منه، جامع شكو شي حلو من أبوه وأمه.

أركان يمشي بصف غيث ويتحارش بعاشق، يحب طريقة رده جنة لسان أمه يحجي بزود ما يخاف. نص ساعة وأني أنتظر، طلعوا من المحل، عاشق شكل ثاني، ملبسه أحدث موديل ومطبك أرداناته تقول جبير. ترك إيد أبوه وأجاني يركض، فتحت الباب صعد، قال: "حلو." قلت له: "اتجنن يبعد عمري، الله يحرسك من العين." رد: "جبت لعلي مثلي؟ قلت له: "يمه صدقة للي يفكر بأخوه، وهيا ما اشتريت لها؟ رد: "لا، هاي مفهية بس تتنعوص." صعدوا، قال أركان:

"المفهيات اختصاصي، أني شريت لها." عاشق: "لحن، بابا قال راح أشتري لك فون." غيث: "ابن ناي أصفيلك على لهجة." عاشق: "أنت مالك شغل، دا أحجي ويا لحن." اندار لي، كمل: "أي، هو راح يشتري لي وأني أنطي لناي، كل يوم نتصل بيج." اندار غيث جره مني، رفعه أخذه بحضنه باسه، قال له: "راح أشتري لك اثنين بس قلي شنو أدزلكم لحن وأنتو تتصلون؟ رد عاشق: "ماكو ولا شي أبد." غيث: "عجل أمك معتبرتك طفل موش أزلمة؟ رد: "لا، أني أزلمة." غيث:

"لو جنت مثل ما تقول، جان قالت لك شنو كلمة السر." عاشق: "ناي، لحكي عاشق راح يطلع ويعوفج، وناي تتصل بسرعة." ابتسم واندار لأركان، قال له: "شقلت لك؟ موش كلمة السر من الماضي." أركان: "بعدها عايشة بعالمها، ما ترضى تتقبل الواقع." غيث: "بس الله اليستر، ولا تعرف منهو همه، بالقرآن تضيع نفسها بدون عقل، خبلة." أركان: "ما تعرف، أمن وانتبه لابنك تراه شيطان مصغر ينقل كل الكلام بالحرف."

همه يحجون وأني اتذكرت الفايل بي أسماء خالي وجماعته، معقولة الهم إيد بالصار؟ بس لا، لو همه ما تخليهم لسه يشتمون هوا وهيج تباوع لهم بهدوء. وصلنا لبيتنا، دخل السيارة للكراج، نزلنا، اتلكتنا سماهر قالت: "صدق تحجي يخوي هيج فشلتنا قدام العالم؟ غيث: "عاشق بايت بالبتاوين وراد، كاضب البطل بيدي، بعدي أريد أفوت." سماهر: "العالم مناطرة من البارحة وعمي ضال يتكاون مكابل الطريج ما يعرف شيقول لهم من يسألوا." غيث:

"يم حرمته وعياله، ماكو أسهل منها." سماهر: "شبلاك يخوي؟ اتغيرت، وين السبع الجان يحسب حساب كلشي وكلمته ما تنزل الكاع؟ غيث: "كضبي لسانج وبعدي لغاد، الجاهل بيدي، لا تخليني أهينج قدامه." دفعها ودخل وحنا وراه، لقينا البيت مليان نسوان، هنه شافَنّا والهلاهل والجكليت نهَلن عليه. كمش إيدي أركان، دنك همس يم أذني: "أبوس إيدك لبسي شي مستور." قلت له: "أركان بس نسوان." رد: "مقتنعة بربك ذني حريم؟

دحكي يولي، بالقرآن جنّهن جدي بليلة عرسه." قلت له: "صدق أركان ذني ضخمات؟ رد: "عجل من رحت لبغداد ساحل روحي شبالك؟ زمال غير من دحكت مصيبة جدي ولده اتزنحت بوجهي للكرادة." قلت له: "وشسويت بت بغداد من جبتها؟ أخذ حسرة باوع لي: "شأعمل وترضين عني؟ قلت له: "تعرف شريد." رد: "تمام من عيوني، اعتبريها تمت." قلت له: "لا تجذب." رد: "يولي، مجذب عليج قبل؟ قلت له: "أي وعدتني ورجعت بوعدك." رد: "ما رجعت ولا راح أرجع، يولي شنو اتخبلت؟

أحلف بغلاتج وأرد لخاطر جاهل." قلت له: "يعني شنو ضحكت علي من جبتني؟ رد: "يولي، جبت عمري أتضحك عليج، وصلت لهاي اعترضتي؟ روحي يبه، كملي زعلج بغرفة جدتي، طلعة من هينا مالج غير للكَبر، انجعل يومي قبل يومج تا أضمج وأغمض براحة." خلى إيده ورا ظهري دفعني قدامه، شي بداخلي ما أعرف أوصفه بس أحس طايرة مو أمشي من الفرح. دخل غيث لغرفة بيبي وحنا وراه، دنك باسها لبيبي، ونزل عاشق قدامها، قال له: "دنك على إيد جدتك حبها." رد عاشق:

"غير إيد ناي ما أدَنك عليها." غيث: "بابا هاي جدتك واجب واحترام، تدنك تبوس إيدها." رد عاشق: "ناي قالت بس العبد يدنك، إذا تريد تحترم أحد بوس رأسه لو متنه." بيبي: "صح لسانها يا جده، تعال قرب لأحبك أني." جرته تبوس بخدوده وسماهر تضحك فرحانة، شاله غيث خلاه بحضنه يريد يأكله مو يبوس بي، ما توقعت هيج غيث يحب الجهال، ما أعرف لأن ابن ناي ويشبهها هيج لو هو حنين.

صعدت فوق دخلت لغرفتي قفلت الباب، طلعت فستان وربطة صغيرة، غيرت، همزين شعري مسرح ما غسلته. وكفت قدام المراية خليت مكياج، لفيت ربطتي كالمعتاد من الخلف، أحسها تلوك لي. باوعت لوجهي دا أشوف سهيلة اللي مصدكة روحها شراح تسوي. فتحت الجرارة طلعت ذهبي، لبست بتوت وحجل، ردت ألبس مدالية شفتها ضمت صدري رجعتها، رشيت عطر، باوعت شكلي فرد نوب، خفت من ردة فعل أركان.

اتذكرت وكفة ناي، رغم حرگة غيث وتهديده ما خافت، لعد أني شبيه ليش هيج جبانة؟ فتحت الباب طلعت، صارت بوجهي سهيلة، قالت: "رديتي، عجل وين كرامتج؟ قلت لها: "بجيب أركان، ضامها يخاف توكع وتنسحك مثل العالم الباقية." سهيلة: "هههه ضحكتيني، هاي أني الحبسني وراح يتختل بس حتى يوصل للهاويها كلبه." قلت لها: "لو جان صدق هاويها كلبه، جان لمسها صدق مو ضل يتصفن رغم هيه عارضة عليه نفسها وتتوسل بي." سهيلة: "ماكو هيج شي، منهو قال لك؟

قلت لها: "العرافة." سهيلة: "عجل ما قالت لك العرافة راح أصير أم جهاله والعاكر راح تنزت بره؟ قلت لها: "خليه يتقرب لك وبعدين احجي بزود، ولج وروح أخوي شرط رجوعي هو يتزوج، ضحك علي وافق، خلاني أرد لهنا بدل عليه." سهيلة: "جذابة، موتي بغيرتك، طول ما جنتي مطمور بغرفة جدتي ينام بحضني، صح جان يكلي لا توصليها خبر حتى لا تروح وهيه ما عندها أحد، بس شكلج ما عندج كرامة، كلشي تسحكين وتكعدين." سهيلة:

"خليج مثبتة على كلامج، واليوم بليل نقرر حتى تحجين براحة صدر وأكثر ثقة." نزلت دخلت لغرفة بيبي، الكل كاعد. شال رأسه أركان عكد حاجبه، درت وجهي رحت قريب من بيبي كعدت، أجه عاشق يركض كمش إيدي همس: "لحن، أريد أكل جوعان." قلت له: "هسه عمو يجيب لك نساتل." سماهر: "يخسى الجوع يبعد عمتك، قومي أسماء سوي له ريوك." قلت لها: "لا، ما ياكل، لا تروحين، غيث فدوة جيب له شي يأكله." سماهر: "وعاشق ما ياكل شنو؟

ما عاجبك أكلنا لو موش كد المقام؟ غيث: "لا، ما واثقة بيكم، يا بت أبوي، ولحد يصل يمها ويحجي وياها نص كلمة." سماهر: "عش يخوي هيج تحجي؟ غيث: "كلشي بوقته حلو بس خلي تفض الهوسة ونعرف نكسر يا جهامة تا نعيد ترباته." قام أركان أجه يمي دنك أخذه وحجه من بين أسنونه: "صدرج يا غضب رب العبادة." عضيت شفتي. كز على سنونه همس: "قومي قدامي، لا وروح أخوي أسحلج من نصهم." دفعه عاشق وصاح: "والمسيح الحي إذا وصلت يمها أورك ور." أركان:

"أها، ولك تطك عمك؟ عاشق: "والسلف بكبره اللي يوصل قرب لحن أدفنه." أركان: "يول، هاي حرمتي، شو تعال تا أشوف شلون تطكني لخاطر خالتك." شاله وطلع وهو يحرك بصدره وذاك يضحك بصوت عالي. قامت أسماء كعدت يم غيث، باسته، دنك شال جكليته شمرها عليه أشر: "ما شفتي شي." ضحكت، قام طلع. رنو: "عجل أختك وين؟ عاشق ما جت؟ قلت لها: "ما فارغة والله، عندها شغل بالمحكمة، وتعرفين ناي ما تحب تلتقي ويا عالم أقل منها، يا من مستواها يا أرقى." رنو:

"شقصدك لج؟ قلت لها: "ولج لاجَة رنو، كمشي لسانج لا والمسيح الحي أخليها تسويج سوابق وتشمرج مكان خالج." رنو: "لا والله وطلع لج لسان." قلت لها: "ليش اكو واحد قال لك أني خرسة؟ وهاا كلمة زايدة أخلي أركان يسحك راسج." أم أركان: "يع، البنت انجلبت، ولج بس لناي دقت لك صدر وخلتك تستسبعين، بالقرآن أخلي يردج لأهلك." قلت لها: "لو تقدرين جان سويتيها من زمان." أم أركان: "ياع يمه، ولك أركاان تعال ليه وينك."

طلعت متخبلة، ضحكت بيبي وانتجت، أشرت: "تعالي يمي." قمت رحت كعدت يمها، كمشت إيدها قالت: "فضت يا جده لو بعدها؟ قلت لها: "شنو بيبي؟ بيبي: "اتصالحتوا لو لا؟ قلت لها: "فكرت بكلامج ولكيته صدق، طلبت منه يحسب يتزوج بالمقابل أرجع له." بيبي: "يا جده أنتن طينة نظيفة بس الوكت ما أجه وياجن عدل، ولهيج ربجن زتجن بحضن أسباع يحموجن، هسه تشوفين شلون ربي ينصرج ويترس حضنج ما طولج ما تظلمين أحد." قلت لها:

"ما رايدة شي بس أريد قلبي يبرد، خايفة صدق ما يصير عندي طفل ويضطر يتزوج." بيبي: "يا جده، عاشقج ومتسودن بيج، لا تخافين ما يرف قلبه لغيرج ولا يدحك بعينه غير وجهج، شلونها الهترة؟ قلت لها: "بخير، بليل تجي." بيبي: "إذا خشت البيت تعلقها وتخليها مذابح، خليها بعيدة بين ما نريد جيتها لبين ما يرد كلشي لمكانه." دخل عاشق يركض بيده نساتل وجباسه، قال: "دحكي شنو جبت لك." قلت له: "يمه صدقة للي يذكر خالته." سماهر: "عجل وانه موش عمتك؟

عاشق: "أنطيك سم." بيبي: "عيب جده، هاي عمتك وأبوك يحبها ما يرضى." عاشق: "غيث ما يحب غير ناي وهيا." سماهر: "ومنهو هاي هيا وشعرفك بيها؟ عاشق: "أكو زمال ما يعرف أخته؟ سماهر: "ياع، عندك أختك من شوكت؟ ولج لحن غيث عنده جهال غير شبل وما تقولين؟ عاشق: "أني اسمي عاشق موش شبل، وهييي لا تصرخين بوجهي." سماهر: "لا اسمك شبل وناي باقتك، والظاهر أنت تربات شوارع راد لك طك وغسل مخ تا تتأدب."

بعدها تحجي وما نشوف غير عاشق نزع حذائه ولطمها بوجهها. ما أعرف أضحك لو أحمي، أجت شالته من أذنه صرخ، دفعتها حيل وكعت وعاشق دفرها وطلع يركض، قامت ركضت وراه. طلعت خايفة لا ينضرب، بس صفنت وأني أباوع له شلون يركض بالبيت يفلش وكل حاجة يشيلها يشمرها عليهن، يردون يكمشوه محد يكدر. مو طفل، زيبق عنده خفة مو طبيعية، يطفر ويلفت من بين أيديهم. على صوت الصراخ والهوسة دخل أركان صاح: "صوتكم يبه." ركض له فحطان، دنك شاله حضنه، قال له:

"شبيك بويه؟ عاشق: "عمي طكوني وشلعوا أذاني." أركان: "يبعد عمك منهو طكك؟ عاشق: "هاي أخت غيث." أركان: "عاشق، يخوي تطك أختي؟ سماهر: "ياع يخوي والله غلط وشمرني بحذائه." عاشق: "جذب عمو، هيه طكتني، دحك أذاني شلعته، رجعني لناي راح يذبحوني." يحجي ويتنفت فحطان من البجي. مسح وجهه كله: "محد يوصلك يبعد عمك، كافي لا يوكف قلبك." صدق تحكي ولك، تربية شوارع هذا، لا تعطي مجال.

-عمو، تقول لي أمك من الشارع حرامية وأنت مو ابنها وراح نضربك كل يوم. -تهذي وحدها، خبلة، لا تسمع منها، أبوك يذبحهم. -ضربتني وتريد تحبسني تأتأدب، يا عمي صلختني، قلبي يوجعني، راح أموت. باوع لسماهر هز إيده وطلع يسكت بيه. كمشتني الضحكة فرها بيهم خلت سماهر صافنة ما تعرف شترد. رجعت لغرفة بيبي قعدت، دخلت أسماء وسماهر تضرب إيد بإيد، قالت: -الجاهل بعد ما ينقضب، ضاع، ربيته على السم. أسماء:

-سجلوا باسمي وأنا أربي من جديد، بس شرطي تعرفوه يطلق ناي بالأول. سهيلة: -كون اثنتينهن سوى تانرتاح فرد مرة من وجوههن النحس، واحدة عاقر والثانية جابت عاق. سماهر: -شبل ناخذه، وهاي نجعلها بحسرة الجهال طول عمرها. أم أركان: -بس أريد أعرف إيش مشرباتهم وهيج مسودناتهم. سماهر: -سحورهن يصحي الميت، ما تفيده لا بطلة ولا دعاء سيد، بدل وابنك يا عمة ما ياخذ له كف يعدل جبهتها، لأن ما مستورة، راح نمنع فوتت الزلام للبيت.

قمت خليتهن ينبحن، طلعت للمطبخ، صدق الباب ساد، الخبل ماكو حتى الزعاطيط مطلعها. دخلت للمطبخ لقيت أخوات أركان، سلمت عليهن وقعدت أساعدهن بس بالخفايف، ما أعرف مثلهن، لليل وإحنا فد وقفة، مهما يكون تعب أهون من سم ذنيج، أقلها هنا مخلصتها تصنيف وضحك. فضت الزلم وخلص العشاء، دخلوا عمامي لغرفة بيبي، وراهم غيث شايل عاشق على متونه. رحت وراهم دخلت، كلهم قاعدين، قلت له غيث: -ما اتصلت ناي؟ -لا ليش تسألين؟

-إيشو ما اجت ورا عاشق ولا اتصلت، مو من عاداتها هيج. -ما عندها جهاز لأن أخذته منها، وعندها شغل اليوم يمكن ما لحقت. -حتى لو عندها شغل ما تخلي عاشق كل هالوقت. -هاج خويه هذا اتصلي. أخذته دقيت رقمها، اتصلت مغلق، ورقم عمتها ما أعرفه، ظل قلبي يمها. رجعت الفون وقعدت، قال عمي أبو غيث: -وين علي ليش ما جبتوه وياكم؟ -هسه رايح أجيبهم. بيبي: -لا يا جده خليها اليوم، عندي شغلة وياك أنفضها ويه طلوع الفجر، روح لعيالك. أركان:

-حتى البيت بعده ما كامل تنظيف، باكر بحيل الله يكمل، بس الليلة ما يبطون إن شاء الله. غيث: -هاي هي الصبح أروح. سماهر: -يبه عجل ما بشرك غير عنده بنت وخابيها عنه. باوع لي عمي عاقد حاجبه، قال: -إيش هو، إيش وقت جابتها؟ -ورا ما دخل للسجن بهواي. -إيشلون حبلت؟ -إيش عرفني، اسأل غيث إيشلون حبلها. أركان ضرب قصته وغيث ضم وجهه. غيث: -خويه أركان اقضب حرمتك قبل لا تدخل بالغميج. أبو غيث:

-وع ليش ما حجيتوا، غيث باكر تروح تجيبهم وتسجلهم اثنينهم باسم أسماء. سماهر: -لا يبه، اتفاقنا وياها بس الولد النا، وإذا رضت تأخذ فلوس مكان البنت إحنا حاضرين تانسجلهم اثنتينهن فرد مرة ونخلص منها. أسماء: -عمي خلي يطلقها أول. -اللي طلبتي، اللي تنهزم وتوطي راس زلمتها مالها فوتة للبيت، آخ لو من عشيرتنا جان دفناها بس حرمات نوسخ إيدينا بيها، طلقها وزتها بالشارع.

صارت عيني بعاشق اللي يباوع لهم بطرف عينه، نظراته كلها غل، فاتح أذاناته يجمع معلومات حتى ينفجر بيهم. أشرت لغيث ينزله من متنه، خلاه بحضنه باسها وهمس بإذنه، هز راسه إي بس شكله ما قانع. نزل من حضنه طلع يلعب ويه الجهال بره، وهم مستمرين واحد يرفع بناي والثاني يشمرها. غيث مجتف إيديه ومنتجي رافع حاجب ويستمع بكل أذان صاغية لمن حجت سهيلة: -يبه ما طولكم انجمعتوا، كلهم اللي طلبتوا منك. أبو أركان:

-خيرك يبه، إيش هو، اكو واحد مزعلك؟ أبو غيث: -خويه من اجيت وطلبت البنت مني وأنا عطيتك بدون حتى لا أخذ مهر، لأنها واحدة من بناتك، وراح المرحوم ورجعت قلت ما تطلع تظل لابني الثاني إيش قلت لك؟ -قلت تظل يمكن بس راعوا الله بيها وبجهالها. -وإيش عملتوا؟ -ماكو أحد قرب لها وخاليها فوق روسنا. -بس البنت انظلمت يمكم، ضيعت عمرها وهي صابرة ومناطرة تعيش حالها حال الحريم الباقية بظل زلمة يصونها ويعتبرها حرمته حالها حال الحريم.

-أركان زلمة وعمره ما قصر ولا تجاوز عليها، صاينها وخالها بنص عينه وجهالها جهالنا. -البنت تشكي وتقول مركونة والرايح والجاي يعايرني، ضالة عالة عليهم وتريد ترد وياي. -سهيلة بنتي ما تطلع من هنا، وأحفادي ما يربون غير بيت أبوهم. -عجل خليه يعدل بين حريمه ويكفي ظلم، وهاي قدام الكل، بنتي مو قليلة عندي، ما رايدها ما نجبره، هسه يرمي اليمين وآخذها وياي، بيت أبوها أولى بيها. أبو شاهين:

-البنت وجهالها ما تطلع من هنا، إذا على أركان راح يعدل بينهن هو هم من حقه جاهل وحرمته عاقر، لإيش وقت نظل ساكتين؟ أم أركان: -قدامك يا خوي إحكي ورد لي ورا، هاي دحق ابن غيث إيش كبره وعلي ابن شاهين، بس هو ضال نسله مقطوع، لخاطر المفهية ما راضية. -وع ليش ما راضية؟ ومن إيش وقت ناخذ رأي حريمنا؟ وبعدين نريد نقسم الورث، حفيدي راح أرده وأبو غيث حفيده يورث، ظل هو لمن نعطي ورثه؟ أركان: -وأنا متنازل ما رايد ورثي. -ومنين تعيش يبه؟

-إيش هو مكسح قدامك هذا رزق رب العباد، إيش قد أحير باللقمة، وأنا إيش عندي هو راسي وراس حرمتي، عشرة باليوم يكفينا. أم أركان: -بس أنا رايدة حفيد من دون خلق الله، نسلي مقطوع، عمة راضية أنت باللي سمعتيه مني؟ بيبي: -أنا ما أغصب أحد، عنده عقل ويعرف يتصرف، يريد ورثه يعرف إيش هو الشرط من البداية، يريد راحته يختار حرمته ويطلع بطلقة سلاحه. أم أركان:

-غير أقتل روحي هيج أصفى، لا ابن ولا حفيد، بالقرآن يا أركان أغضب عليك ليوم الدين، ولك حق تعبي وتربياتي بدل ما أفرح بجهال يترسون البيت يطلع آخر نفس لي. أركان: -ما أتركج، ضال هنا. أبو غيث: -إذا تظل هنا آخذ بنتي وجهالها لبيتها حتى ابنها تعرسوه عادي. أبو أركان: -بويه لحن بإيدك كل هالمكاون، ترضين زلمتك يتبهذل ويظل بحسرة الجاهل لو تظلون هنا يمي وأخليك فوق راسي؟ سكتت، ظليت أباوع محتارة، شنو أقول لهم؟ منو يصدق باللي يصير؟

أقول لهم ينتظروني كم شهر أخاف يزيدن الجرعة وتالي يزيدن الأعشاب يقلعون حتى رحمي، أقول لهم لا ما يستاهل أركان أحرمه من تعبه وفلوسه. -ها يبه إيش قلتي؟ أركان: -بدون لا تقول، بنتكم أطلقها وآخذ حرمتي وأطلع، ما آخذ غير سلاحي وسيارتي. سماهر: -السيارة النا يا بعد أختك. غيث: -ألحق أفلت قبل لا تطلع حتى لحن من ضمن الورث. أبو أركان: -ها يا بوي تخليت عني، عجل منو يسندني إذا وقعت؟ -ما أبعد كثير، آخذ بيت قريب.

-أنت انكتّم قريب، ما أسمع لك الشور بيد لحن، راح أسألها وجوابها يمشي على قص رقبتك تاماتهتر بعد، يبه لحن وإذا قلت لك لخاطري وطلبتك راح ترديني؟ أبو غيث: -صدق يا خوي تحكي، غصبًا عنها منو هي وتترجاها؟ -لا بنيتي هاي، مثل ما نرضى على بناتنا هاي هم ما أرضى أكسر خاطرها، إذا ما تقول إي ومن قلبها ما أخلي أركان يدخل على حرمته، وحق دين محمد لو ما رايدين جاهل يقبض اسمه ما أنطقها لو الموت يكون حدر رجليه.

-هيج قمت تفضل بنت الغريب على بنت أخوك؟ -عطيتها كلمة ما تنزل دمعتها ولا تنظلم ما طولني عايش. باوعت لأركان لقيته مدنق، رفعت راسي صارت عيني بعين هناء، أشرت: وافقي. عرفتها خايفة أكثر مني لا تنكشف السالفة. صح أموت إذا قلت إي، بس الموت الأسوأ وهم ياذوني ويحرموني من الأمومة نهائيًا. -ها يا بوي إيش قلتي؟ هناء:

-عمي هي موافقة، هم تحب زلمتها وما تريد يظل بحسرة الجاهل، بس انطوها مجال تتعود إيشوية مو هيج تصدموها بيوم وليلة وتريدون جواب سريع. -لها كل الوقت بس أريد أسمع جوابها. باوعت له والحسرة تأكل بقلبي، أشر: إحكي. -مثل ما قالت بيبي، هو يعرف إيش يريد ويقدر كل شيء يسوي، محد راح يوقف بوجهه. -إذا راد يتزوج ما راح تعترضين؟ -إذا مفكر بيها وناويها لا ما راح اعترض، خليه براحته يسوي اللي يريده.

قلتها ونزلت دمعتي، هللت أم أركان، شال رأسه أركان عيونه حمر يباوع لي بغضب، لأن ما خليت له عذر يوقف بسده. ما نسمع غير صرخة الجهال وهناء صاحت: -لحقوا ابن غيث قتل الجهال! طلع يركض قمنا وراه، لقيناه نايم على ابن أخت أركان وعاضه من أذنه، يريد غيث يهده ما يقدر، نتله حيل، ركض أركان أخذه منه أركان وهو قوم الولد: -كله ليش بابا اضربوا؟ -يقول لي ابن الحية. -عجل كذب هو، ولك أمك عبرت مرحلة الزواحف السامة من قرن.

-لا تحكييي على نااااي يلا رجعونييي. سماهر: -ماكو أمك تنساها أمك أسماء؟ -اتخسى، ناي أمي! هاي الخبيثة مثلك، تفو عليك. -غيث صدق تحكي؟ طقوا على فجوه، تايتربى هالتربية الشوارع. -ولك غييييث، قوم رجعني. أبو غيث: من أكل لكم الجاهل مغسول حظه ما تصدقون، اتركوا لي أني أعيد تربيته. هو سمع وهو بده يرفس ويصرخ، قام غيث أخذه يبوس به، طلع للمزرعة. ردت أرجع، صارت قدامي سهيلة متخصرة تضحك. عفتها وصعدت فوق.

دخلت، سديت الباب، شمرت حجابي، رحت لفراشي اتمددت، خليت راسي بالمخدة. انفتحت الباب، دخل أركان. قلت له: اطلع. ما رد، سد الباب، شمر سلاحه وأجا يمي. قمت ردت أنزل من الجرباية، كمشني قال: خلينا نحكي. -ماكو حكي بيننا بعد، هاي هي راح تتزوج، لو سهيلة تصير مرتك حالها حالي. -ما راح يصير هالشي. -راح يحرموك من الورث، كافي محروم من الجهال. -أنعل أبو الورث لأبو الجهال، لحن كافي فاض صبري. شهقت. أخذ راسي لحضنه، دنَّق،

همس: مشتاق لك ورب العباد. أخذ نفس طويل، خفت يتقرب لي، رغم لهفتي له، بس خفت يضيع كل شي وهم يرجع رحمي يتعب. وبدأ يوزع بوسات خفيفة على خدودي، نزل على رقبتي يشم بها، وإيده ورا ظهري يحركها على الكيف، بديت أستسلم حسيت بخدر وأني بين أيديه. همس: مشتاق لك بقد ما خلق الله من لهفة، ومستعد أصبر فوق العمر عمر. -أركان والله ما أقدر، فدوة أروح لك لا تقرب لي. -عيش هيج تعذبيني؟

بالقرآن ما أستاهل منك هيج تعامليني، غلطت وقدمت قدامك أسف الدنيا بكبرها، شنو اللي عملته بعد؟ -دأقول لك والله ما أقدر. -ما أريد جهال. -لا تريد ودا أشوفهم بعيونك، ولخاطر هالشي لازم أبتعد عنك. -والخلق الكون ما أريد، ولج إذا ما أخليك على صدري ما أقدر أنام، شتهترين أنتي؟ -وأني ما أظل عايشة وياك بالخوف، وأظل بكل وقت أتخيلك رايح لها بسكوت، لو كل ما أشوفها تباوع لي وتضحك أتخيل دتنخوني. -ليشششش بس لأن رحت لها مرة؟

بيششش أحلف لك ما قربت لهااا. -وأني ما أقدر أخليك تتقرب لي هسه لأن مريضة. -شبلاك يبه؟ أحجز لك يم دكتورة؟ -لا بس أبتعد عني. -ترى ذليتيني كافييي، أنعل أبو اللي يعشق لأبو اللي يدق قلبه، راح أروح لها وراح أقسم عدل، وأنعل أبوي لأبو اللي يرد يتوسل بك بعد. قام أخذ سلاحه، طلع ركع الباب. خليت أيدي على قلبي، غمضت، قطعت حتى النفس، خفت يفتح باب غرفتها. سمعته نزل، أخذت نفس. دخلت هناء، شهقت، قالت: شصاير ولج؟

-ما راح أقدر، دا أجذب على روحي. -ميخالف صبري، بس تخلصين الشهر، أحسن شي سويتيه من وافقتي. -راح يروح لها. -حتى لو راح، خلي أهم شي ما ينتبهون أنتي عرفتي، اتعالجي قبل لا يسوون الأسوأ. -راد يتقرب لي. -ديري بالك، رحمك تعبان هسه ورأساً تحملين، لا تخليه قبل لا يخلص الشهر. -بعد ما جنت كارهته لأن راح لها، هسه وديته بيدي. -كافي لا تبكين، وزين سويتِ، قدام عينك أحسن ما يروح بالختلات، وتحلى الشغلة أنوب يحبها وجاهل فوقها.

-ليش مانعتني ما أقول له؟ ترى هو يصدقني إذا حجيت. -وهين المصيبة إذا سمع ما راح يسكت، راح يسحل سهيلة وأمها وتصير مكاون، وبعدها يطلقها، أول شغلة يسووها يحرموه من ورثه، ويتسجل باسم ابنها، تعب رجلك كله يصير بختها، بس إذا أنتي صبرتِ وسايرتيهم راح تحملين وتقلبين الموازين بهن. -وأشلون أعرف روحي صرت زينة؟

-اشربي ماي إيش قد ما تقدرين، واستمري على وضعك بالأكل، حتى لو متي من الجوع لا توصلين أكلهم، وهو زعل هسه ياخذ له كم أسبوع ما يحكي، بلكي لنك رادة لعافيتك. -هاي فكرة أم أركان خلت سهيلة هيج تسوي مو؟ -آااخ ما جنت حاسبة هيج حساب، بس هالحية أم عامر هي اللي خبرت أم أركان، والله لو على سهيلة ما تطلع من البيت لو تظل عمرها كله تخدم جوه رجلين أركان. -قلبي يم ناي، ليش ما سألت عن ابنها لسه؟

-راد يروح غيث بس ما أعرف شصاير، جدتي ندهته، دخلوا للغرفة وسدوا الباب، الله أعلم شمحضرة بدعة من مصيبة. -وين عاشق بس لا ظل جوه؟ -ههه مستلم الكبار قبل الجهال بالطراقات، والكلمة يردها بعشرة، وابن أبو اللي يقرب صوبه، بالأخص سماهر جاي متحامي عليها، يدحق بطرف عينه مناطر الزلة تا يقبضها ويشهرها بين الأهل. -تربية أمه الحمد لله ما طلع عليه.

-حتى أمه مو هيج، الجاهل ملتوح، نظرته كلها شر وشيطنة، وأنوب غيث يأيده وأركان واقف له يدحق من بعيد يخاف واحد يطقه. -هذا اللي كانت خايفة منه ناي، يفرعنوه أكثر. -وأشلون هو طفل كله براءة؟ منين يطلبها جدته بدعة وأبو غيث يا خوفك يقبضون به وما يردوه لناي، لأن نظرة بدعة له وراها كثير حكي، اتركك منه خلينا بسالفتنا.

تعدى الوقت، هي تحكي وتنصح، وأني قلبي باب غرفة سهيلة، خايفة يدخل لها، وبنفس الوقت تفكيري يم ناي ليش ما اتصلت تطمن على ابنها. اتمددت نامت، قمت شلت حجابي وطلعت، البيت هادئ ماكو أحد. نزلت جوه وأسمع الصريخة بالمزرعة، طلعت أركض لقيت غيث خال عاشق على قلبه يفتر به وهو يصرخ. سماهر تقول له: جيبه أني أنيمه، وأسماء واقفة على صفحة. أركان كاعد خال راسه بين أيديه. رحت يم غيث قلت له: جيبه. -يرفسك، متخبل. -ميخالف، تعال عاشق حبيبي.

-رجعيني لناااي، لحن حباب، قولي له خلي يرجعني. -يا قلبي ليل وحظر تجول، ممنوع يطلع بابا. -ماااا أريد نااااي، رجعوونيييي نعسسااان. -دتعال إذا ما نمت بحضني أردك. -ما أنام ما أنام، رجعوونيي. أخذته وصدق يرفس. رحت كعدت على الدجة، خليته بحضني. قام أركان لفه بفروته، أسولف وياه وأدقدق على ظهره وهو يلوج تقول مدمن يحك براسه، ما أعرف شبيه. نص ساعة وقلبه تعب، قام ينفت.

كعدته بحضني، مسحت وجهه. أجا غيث راد يشيله دفعه، وطفر دخل للبيت يركض، راح وراه غيث وأسمع الصياح والتكسير. دخلت وأشوفه يركض ويفلش يصرخ: ولج ناااي تعالي. شاله غيث خلاه على صدره، قال له: هسه أردك يا بعد أبوك، راح يوقف قلبك كافي. -كذاااب كذاب. -وعمة السادة أردك بس اهدأ، أركان خوي شغل السيارة. سماهر: يمه ولكم شيوصلكم بهالليل والطريق خطرة. -عجل أخليه للصبح يموت. -ما عليه هسه يتعب ويسكت. عاشق: لا غيث حباب نعست أريد أنام.

-بالقرآن أوديك بس اسكت. -لحن تعاااالي أخذينيي هذا كذاااب. رحت يمه أخذته خليته على متني، باوعت لغيث. -ناي هم اتصلت؟ -لا. -ليش ما سألت على ابنها؟ -ما أعرف، وأني انشغلت ويه جدتي، استوني فرغت هسه رايح لها. -ناي ما تظل كل هالوقت بدون ابنها، صاير لها شي؟ -شنو مثلا شصاير؟ -ما أدري قلبي يوجعني أحسها مخنوكة. سماهر: عار ما عليها، غيث خوي عطيني ابنك أني أعرف أشلون أسكته. عاشق: لحن لاا لا تخليها تاخذني هاي خبيثة.

-ما أتركك لمن أسلمك بيد أمك، اسكت يا روحي. -راح تنام جدتي وتتركني؟ -ما تنام، منتظرتك ترد وتنميك يالله تغمض. غيث: يلا بابا تعالي نروح. -لاااا لا لحن لا تخليييي ياخذني. -غيث أخذني وياكم، هم أطمئن على ناي وهم هذا بلكي يسكت راح يموت قلبه تعب. -قولي يا الله خوي ما بيها شي تلقيها نايمة. -ناي اللي ما تركتني هلكد بدون لا تسأل عني مو ابنها، وعاشق هذا من دون إخوته معزته تختلف. -تراك قلقتيني، يلا مشي راح يطر الفجر.

طلعنا وسماهر تدعي ورانا، لقينا أركان مشغل السيارة. فتحت الباب صعدت، قال: خير؟ غيث: ناخذها ويانا، عاشق ما يرضى بي. سكت ما رد بس طفى ضوء السيارة، عدلت حجابي. صعد غيث، سد الباب. لفت عاشق بالفروة، اتحركت السيارة. همست: نام ارتاح أول ما نوصل أقعدك. -راسي يحكني فركي. -هيج؟ -موش هيج حيييل. غيث: دخلي أصابعك بالمقدمة شعره وحركي على الكيف.

سويت مثل ما قال، ويه مشي السيارة والدفو غفى. دنقت بسته، يا ربي أمك ما بيها شي، ساعات ما قدرت بدونها. على طول الطريق وهو ينشق لمن وصلنا، دخلنا بالشارع لقينا مرة تفتر بالشارع تروح وتجي، شافت السيارة أجت تركض صارت قدامها صاحت: أمروتكم. نزل غيث راد يحكي وسكت، أجته تركض قالت له: ولك راحت بنيتي. -شنوو ياهو منهن أحجيي. -ناي ما ردت من طلعتها الصبح لسه ماكو، راحت بنيتي. -هسه جاية تقولين؟ وين جنتي؟ عيش ما اتصلتي؟ -بمن أتصل؟

وين أروح وأترك الجهال وراي؟ ما عندي غير رقم أبو كاظم وما يرد. أريد أنزل عاشق على الكشن ما أعرف وأني أسمعها أشلون تبكي وتلطم. خليته ونزلت ركض رحت يمها، كامشة أيدين غيث تقول له: لا ترد إذا ما تجيبها. أركان: عمة بس اهدي. -أقول لك البت ماكووو يقول لي اهدي! كله من هذا أخذ جهازها، أنعل أبوك لأبو اللي جابك عليه، ولك جهازها تاخذه؟ عيش ابن الفكر، وين أندلها هسه؟ -خاف بايتة يم صديقاتها لو بالمكتب عندها شغل.

-لا ما تبات بره البيت، ما تترك بزرتها، تعرفهم ما ينامون بدونها، ولك غيث راحت أم جهالك، ولك راحت أم القلب الطيب. غيث: -المن أسأل وين أدوّرها؟ -غسق رفيجتها، اتصل شوفها وين، سرّها يمها. طلع فونه، إيده ترجف، باوعلي كال رقمها. رديته، اتصل، خلّه إيده على راسه، غمّض، راح يمشي ويهمس: ردي ردي لمن كالها غسق اني غيث. أحس الدنيا افترت، كعدت بمكاني، جسمي يرجف، كلبه حس أمه بيها شي، جان يبجي بقهر.

رفعت راسي للسما: ربي رحمتك لخاطر أطفالها. اجه غيث يركض صاح: أركااان، الجهااال جيبهممم! -خيرك يخوي؟ -هاي عارفين مجانها وماخذيها، هسه يريدون لجهالها. أم غيث: منهو ولك ذوله؟ -يمه الجهااال بسرعة! -ولك بالبيت ماكدر أتحرك، روح جيبهم. راحوا هو وأركان يركضون للبيت، اتذكرت أسماء خالي وبو صلاح، لطمت، ماكو غيرهم. اجو شايليهم، دخلوهم للسيارة، راح أركان يم أم غيث كالها: امشي وياي يمه. -لا، اني أظل هينا، بس ردولي ناي، أبوس أيديكم.

-المجان موش أمان، وإذا على أهلنا انتي بحمانه. -ما أرد ولا أوصل صوبهم، خليني مثل ما اني ميتة بنظركم، لا تقربولي بس ردولي بنتي. -تركج من غيث، روحي وياي يمه. -المحنة إذا ما اجت من بزر الكلب مالها لازمة، كلبه شايل جثير بعد هالسنين، بدل ما يتزنّح لحضني يدير وجهه من يدحگني جدامه. -موش وكت هالحجي.

-ولا راح يجي وكتو، روحوا يمه مودعين بالله، وانت غيث يمه، ردلي ناي، طلبتك لا تردني، وبعدها عهد ما راح تسمع عني ولا تدحگ ظلي جدامك. هز راسه وصعد بالسيارة، ظل أركان يتوسل، ما رضت، ردت تبجي للبيت، صعد أركان شغل سيارته وشحطها. حتى لساني انعقد، أحس روحي داخل حلم، أباوع لغيث عاصر جف إيده، ما أعرف شيفكر لمن ضغط على أسنونه حيل وضرب الدشبول بكل قوته، كمش راسه. -بس اهدأ، نحصلها ما تروح.

-كلتلها بطلييي، بطلييي يولي، ركدددي، موش كدهم، اااخ كون أكضّبج. -شيعرفك همّه؟ -آخر مجان راحتلو الهم، ماكو غيرهم، ذوله مراقبيها الهتره من زمان، وما انتبه من كثر ثولها، نزلني يمك عالشارع واخذ الجهال يمك، لحن خويه عينج بيهم لا تغفلين. أركان: وين تروح؟ خليني أوصلها وأجي وياك. -ياااخي نزلنييي، بلكي ألحگ وعطيني سلاحك، إذا تأخرت لحد يلحكني، أركان خويه الجهال بأمانتكم. -غيييث، ما أخلّيك تروح وحدك، بس أوصلها وأخبر الشباب.

-أمي دزّلها الشباب تحميها، وإذا قدر الله وما رديت رجّعلها الجهال، ولا تدلّي أحد مجانهم، يلّا خويه نزلنيي. -غيث بس اسمع! فتح باب السيارة هي وتمشي شحطها أركان وكف، نزل منها، دنگ مدّ إيده انطاه السلاح، كله: ما تعتاز وصية. -أموّدع بأمانة الله يخوي.

وكف سد الباب ودكدك عالسيارة، غمض أركان وداس، رجعنه للبيت، الطريق كله صافنة، لا أعرف أندعي ولا أعرف أسأل، أباوع للجهال ورد أباوع لأركان الي يسوق بخبال ويخابر بالشباب يطلعون قبله. وصلنه للبيت لكينا عمامي كلها بالباب واكفة، اجت سماهر تركض فتحت الباب كالت: راح أخيي! أركان: نفس ما أسمعلج سماهر، والخلق الكون أخلي جيلة براسج وأسكتج بالمجان. -ولك استوى طلع من الموت! -ويروح فدوة لخاطر أم جهاله، بعدددددي! -يمه أخوي راح لحگيني!

-أنعل أبو أخوج لأبو عشيرتج، لج سماهرررر بعدي عن طريجي. نزلت شايلة هيا، وأركان عاشق، اجت هناء أخذت علي، دخلنه جوه لغرفة بيبي، دخلت كالت: ها يجدّه؟ شهكت. -ترد يجدّه ما عليها، أختج سباعية. -راحت ناي بيبي، راحت هالمرة. -ما تروح، زلمتها يردها، جيبي الجهال دفيهم. دخلت سهيلة فرشتلهم، خليت هيا، نزل أركان عاشق وعلي بصفهم، ركض لكنتور بيبي فتحهه، يطلع بالأسلحة ويخلي على جهة. بيبي: خبرتوا الأزلام؟

-أي جدّه، طلعوا جدامي بس كون نلحك ما جاتلين البت. -ما يجتلوها راح ينكشفون، وهي هتره تعرف تحمي حالها. -هيّنه المصيبة، يعرفوها مصگوعة ما راح تسكت، وظلتها تردهم وره الشمس. -عجل وين جنتوا كل هالوكت ما عرفتوا تحموها؟ -جدّه جنّها شيطان ما تنكظب ولا واحد يعرف شتفكر، الخبر دفناه وضيعنه أثره، أشلون عرفت ما ندري.

-البت لچعة، فرّت عقولكم ووهمتكم، دمها حامي ما تسكت عن حق أخوها، ولا راح تركد إذا ما تأخذو بيدها ونسلها يطلعون مثلها سباع، ما يهابون الموت يجدّه، ردوها ليه. -وأهلها موش گليلين، أسوأ ما خلق الله من بشر، الغدر وقلة المروءة تحدر بدمهم. -اتزنّح وره أخيك، لا تردون إذا موش بيدكم، عطوا اليطلبو منكم وزت أرواحكم وراها، هاي أم حفادنه تستاهل. أشر أي، شال الأسلحة وراح يركض.

كعدت بصفهم للصبح، الهوسة ناس داخلة وناس طالعة، واني دموعي ما نشفت، عيني بالباب بلكي يجي واحد يكول ردت. انفتحت الباب دخلت هناء كالت: جدّه وحدة طالبتج، كلتلها جدتي مشغولة تعالي غير وقت، تگول ما أطول بس چلمة. -اليطلبنا لو بنص عزانا ما نرده. -آسفة جدّه بس لبالي مالج خلگ. -اتزنّحي يجدّه ولا تعيديها، عيب وانتي تربات مضايف، لحگي عليها لا تروح. -لا ما راحت، مناطرة مبينة عدها مصيبة وجاية. -هلابيها خلها تفوت.

فتحت الباب على وسعها، دخلت مرة جبيرة ركضت دنكت على إيد بيبي كالتها: طلبتج لا ترديني، ما عندي غير الله وانتي. -مگضية يمه كولي. -بنتي سعاد تعرفيها الأرملة. -الله يستر على بنواتنا وعليها، شبيها؟ -جايها واحد سكط ابن حرام وهدد وحنه موش كده، وأبوها يگول راح أعطيها ماگدرلو، دخيلج حاجي أزلامكم يردوا عنه ويترك البت، والله تعرفيها صغيرة وفقيرة راح يظلمها.

-ردي بوجهج لأبوها كليلو الحجة بدعة طالبة بتك سعاد لجبير السلف أبو أركان حرمه... ***ناي. اتسندت كعدت اسمع مثل صوت ونه شخص مخنوك وراي. انداريت عصرت نفسي من المنظر، رجال مجتف ودمه على كد جسمه. رجعت ليورا اباوع المكان مثل غرفه قديمه، رطبه من طين او مطبخ، اثر طباخ وفوكه تهويه عطلانه. شبابيج مصبوغه ومفطره، اكو باب ومن الجهه الثانيه حديد، ويمه طبله نايلون مكلوبه على وجها.

كمت للباب سحبته حيل مقفول. ركضت للشبابيج جريتهن ردت افتح النوافذ ما كدرت ملحومات. دنكت اباوع من الفطور مامبين بس حايط مسافه. صرخت: ياعاااااااالم لحكونننه. دكيت عالجام حيل ماكو نفس. ضليت ادك واصرخ بعلو صوتي لمن تعبت ما حصلت شي حسيت حنجرتي انجرحت. رجعت للباب ادفر بيها اجر باليده خربانه ماتفتح. انداريت ادور حديده لو شي افتح بي ماكو، الغرفه فارغه. رد الرجال يون. رحت يمه دنكت كلتله: وين احنه؟ فتح نص عيونه ون وغمض.

-احجي فدوه، زين ليش انت هنا؟ -اااه. -ليش هيج كاتليك ومنو همه شرايدين منه؟ بس احجي فدوه بلكي اكدر اساعدك راح اتموت. -مم. هزيت متنه اتكول جثه بس نفس ضال. حركته حيل اريده يصحي اتقيأ دم. رجعته على وجهه. دنكت اريد افتح اديه، غمضت بخوف واني اشوف الواير داخل باللحم مال اديه من كد ما رفيع. فتحت عيوني خليت اصبعي ردت بس اطلعه، صرخ بطلت. -احجي ما طولك كعدت، ليش هنا؟ شنو ذوله سلابه؟ -ممم. -كم واحد واشوكت يجون؟ -ممم.

-يمعود رد رحمه لدينك خلي افتهم اشلون اخلصك واخلص روحي. ما رد بس يعصر بنفسه متألم. كمت رجعت للباب شلت الطبله اضرب باليده بكل قوتي، مبين مقفول من وره بقفل سلقي. شمرت الطبله ونزعت المانتو والحذاء. رجعت للباب اسحب وادفر حيل لمن رجليه طكت. سمعت طكطكه خليت اذني عالباب اتسنط. صار هدوء ماكو. دكيته صحت: فتحوووووااا وينكمممم!

دنكت شلت الطبله. رحت للجام درت الرجلين مالتها وكمت اضرب يادوب اتكسر قليل بس افطور صار. ماعرف شنو من جام هيج قوي. اجتني ريحه خنكتني مثل الفطيسه. دنكت باوعت اريد اشوف شي لو اعرف هالريحه مال شنو. مكان مثل الترك ضيق غيره ماكو. سديت خشمي رجعت لمكاني لان تعبت. الجو بارد والكاع اتصل، ريحه زفره الدم وجيفه بره احس اريد اتقيأ. شلت المانتو خليته على رجليه لفيت روحي خليت راسي غمضت تعبانه انفت.

وين شمرتي روحج ناي هاي الماجنتي حاسبه حسابها. عاشق يمه راح بدمعته اذا متت راح يضل عمره كله كارهني دخيل ربي. شلت راسي للسكف همست: ربي دخيلك لاعتراض على حكمك بس هذا يموت بدوني متعلق بيه لو تبرد كلبه وتشيلني من فكره لو تساعدني. وعلاوي اذا ما خليت ايدي على وجهه ما يغفه. خليت ايدي على كلبي هيا وين تكدر تعيش بهالدنيا بفهاوتها حتى ما وصيت عاشق يحميها من الوكت.

يارب بعدهم صغار ما لحكوا يشبعون من حضني ولا لحكت اعلمهم اشلون يكدرون يعيشون وحدهم. كمشت المداليه عاشق: اندعيلي يم ربك لخاطر هالجهال. والله ندمت لو اعرف هاي نهايتي مجان صحت على واحد بيهم جان تركت الدراسه وكضيتها العب وياهم ما حرمتهم حتى من الطلعه بس ردتلهم مستقبل. يمه عاشق اشلون بيك راح يضربوك محد يتحملك. عضيت ايدي اشلون جنت اضربه وحاسبه.

ربي ادري سويت هواي اغلاط بحياتي وادري دتحاسبني واستاهل كلشي يصيرلي بس اطفالي امانتك يارب احميهم بعدهم زغار وكلبهم مايتحمل الوجع. غمضت اجت ضحكت عاشق كدامي تخيلته يمي سحبته اشتم بركبته وابوس بي. شهكت بعدني ما شبعت منهم بعدني ما لعبت وياهم ولا سولفت بعدني ما شاركتهم هموهم ولا حميتهم. ون الرجال. -دخيلك احجي ولك عندي اطفال عينهم بالباب منتظرين جيتي. -اااااه. -والله عندي ابنيه اذا خافت تتمرض ما تعرف حتى تكول اشبيها.

-بووووي الحكني. -احجي ابوس ايدك ولك تركت وراي يتيم اذا ما رديتله راح ينظلم. عاشق محد يحمله راح يعذبوا كره بيه. -اخذوهن ما اريد رجعوني. -منو همه وليش ماخذينه؟ ما رد بس عصر نفسه وغمض. رجعت عضت المانتو ابجي بحركه وقهر مو على نفسي على التركتهم وراي. لليل واني على كعدتي وكلما جايه الريحه تكثر من كثر البرد مثانتي انملت. لميت روحي وتلفلفت بالمانتو حتى ادفه. صارت ظلمه حتى ضوه كمر ماكو الجام معتم.

اسمع طكطكه وقفل الباب ينفتح. عدلت كعدتي وجسمي يرجف. انفتحت الباب دخل رجال ما اشوفه. فتح الايت واشوف انصدمت واني اشوف كدامي اخو مرت خالي. دخل ودخل ورا خالي بيده بطل مي يشرب بي. شافني ضحك. كمت وكفت. اجو يمي دفعني وكعت ليورا. خله رجله على صدري كال: لبالج مانصيدج. -والله عرفتك انت ماكو ناقص يغدر غدر نسوان غيرك. -من يومج كح -وبدون تربيه بس اااخ اشلون ماكتلتج بذيج الليله. -غلطه عمرك وراح اتعض اصابيعك ندم وراها.

-هههههههه ملحوكه الماصار قبل يصير هسه بس خلينه نستفاد منج بالاول شتكول جبار؟ -اووف انطينياها ساعه اطفي ناري بيها وكتلها بعدها. -الك بس مو هسه خلي اشكد يدفع بيها. -اي والله اطعم الشغله تصير اووف شراح اسوي بيج املخج تمليخ. -ورجلها الي اذا ما خليته يبجي مثل الزعطوط وطلع الضرب من بين اعيونه مانه ابوك يا سامر. -خلصتوا لعد اسمع بالفصحه لا يلدغ المرء من الجحر مرتين وبالعامي الضاكها ما عاود. -شتقصدين بت ارزيد الساقط؟

-قضيتك اتسلمت بيد المحامي جنت حاسبه حساب هيج شي ومسجله فيديو ذاكره اسمائكم الرباعيه. اذا اختفيت انتم سبب اختفائي. -وين التسجيل؟ -للاسف يم غيث ونسخه ثانيه يم المحامي والثالث يم شخص لو اتخلي روحك ماتعرفه راح يقدمه للمحكمة بعد اختفائي بأربعه وعشرين ساعه. -ههههههه عود نتلاكه بجهنم. -ليش كتلت عاشق؟ -اغسل عار امج مثل ما هسه راح اغسل عاري. كالها وضربني دفره على صدري نيمتني بالكاع من قوتها.

سحك على ركبتي خنكني. ادفع برجله بس ما اكدر ذاب حيله. احس الهوا بده يخلص انكطع التنفس كمت ارفس. دفعه جبار كله: مو كلتلك نفسي بيها لا تكتلها كبل لا استلذ بلحمتها. -شبعوا بيها بس خلي احصل من الزمال مالتها كم دينار واخذوها لا تردوها لمن ترسوها نغوله. رد ركعني بالبطل وطلع. كعد جبار مد ايده على صدري عصره. كمشت ايده دخلت اضافيري بيهن حيل وسحبتهن هنه واللحم. جرها بسرعه.

كمش اديه اتماطل اريد احرر روحي ما اكدر. دنك رد يبوسني تفلت بحلكه. وخر راسه ركعني راجدي سطر راسي بالحايط. كام. -راجعلج اذا ما اشلخج كدام رجلج واخليج تفرفحين جواي ما اتسمى عالرياجيل هيج اعيد امجاد امج بذيج الليله. -كون صدك رجال وتسويها كدامه لبالك كلها جبار. -كلها وقت يحلوه ما ضال هواي حضريلي روحج هالزرور البيض اريدهن يرفرفن بين رجليه. -قذر وناقص تفووو.

-اووف حتى تفلتها تنمص بويييه شيجيب الصبح بس لو ماخذ الزركه اااخ شبيه نسيتها انتظريني رادلج. -قبل لا تفكر تسوي شي اتخيل اهلك كلها معدومين وكدام عينك وروح اخوي الزلم الواري ما يرحمون احد. -شوفي هذا الكدامج شنو مصيره وهو ربع شغلتج ما مسويها وانتي قيسي حضري نفسج. باسني بالهوا وطلع. قفلوا الباب. لميت روحي اريد اسيطر على جسمي من الرجفه ما اكدر.

راح يسويها هذا ناقص دخيل ربي بس لا صدك كدام غيث لالااا دخيلك يارب كلشي اتحمل بس ذيج نظرات بابا لسه بعيوني لا تعيدها عليه. ضميت وجهي سنوني وحده اطك بالثانيه لنص الليل واحس حتى عقلي من الخوف راح يختل. مجرد اتخيل عقلي يوكف. رجع الرجال يون انت شنو سالفتك هم ماذيهم لو وراك فلوس. الريحه كلما جايه اتزود والبرد يدخل جوه العظم. ظلمه ما اشوف كلشي بس اسمع ونت الرجال لوجه الصبح حتى حيلي خلص.

مثانتي بعد ما اكدر اتحمل احسها سجاجين تتملخ. شلت راسي لكيت الرجال فاقد ما اكدر اكوم كد ما محصوره. زحفت يمه ندسته ماكو صوت هزيته هم ماكو بس يتنفس. اخذت البطل ورحت بالزويه مال الحايط خليت كدامي المانتو سد بينه عالسريع وكمت تأكدت من الرجال ماكو منه صوت. رجعت لمكاني كعدت ولفيت روحي خليت راسي على رجليه ما جان عندي غير اندعي كون يكتلوني ولا يسون الي براسهم.

من التفكير والتعب رحت بالنوم. ما كعدت غير على شمس الضهر داخله من الجام. فتحت عيوني اباوع للرجال حلكه يطلع منه دم ويتنفس بطيئ. غمضت درت وجهي. مرت ساعه والثانيه صار المغرب وماكو احد حتى الشارع سنطه. فجأه انفتحت الباب دخلوا ثنين شباب ملثمين واحد شمر علاكه عليه والثاني اخذلي صوره طلعوا حتى ما لحكت احجي. فتحت العلاكه بيها نص كرصه خبز ونص بطل مي. من جوعي اكلت بدون لا فكر بيهن شي. داشرب المي واجه بالي خالين بي منوم.

شربت غطه واحد نزلته. درت بيدي غسلت وجهي خليته بصفي منتظره اذا تعده نص ساعه ما حسيت بدوخه يعني نضيف حتى اشرب لان ميته عطش. لليل واني الخوف يمشي بجسمي كل شويه اشرب شويه مي واغسل وجهي لنص الليل واني اترقب احس عقلي انشل هلكد حملته خوف وتفكير. رفعت راسي للسما كلتله: امانتك يارب تعبت. خليت ايدي جوه راسي اتغطيت بالمانتو ونمت. صار اليوم الثاني واني على وضعي ماكو احد دخل ولا سمعت احد بالبيت.

رغم الرجال مابي لا يحجي ولا يتحرك بس حسيت بالامان اقلها نفس وياي بالمكان. هلكد ما فتريت بالغرفه وحاولت ادور مكان انهزم منه. مليت وبطلت لان مأمنين المكان مبين ماكو بشر يمر منا لا اكو منفذ الواحد يطلع منه. كاعده وكت المغربيه واسمع انفتحت باب حديد وصوت رجلين بس هواي. انفتحت الباب دخل ابو صلاح شافني ضحك كال: ناااي. -الله ياخذكم مابيكم شريف نكسين. جنت متوقعه وياهم واني اكول الجلب بدون اذنه وذيله اشلون يمشي.

-ما ضل لليل وخلي الجلاب اتركصج على ال -دخلوووا. هو كالها واندفع كدامه غيث مربط وراسه عليه جيس. كمت متفاجأه ركضت كمشته همس: لا تحجين. ابو صلاح.: -تذكرين اشلون كطع ليله عرسنا بس لا تهتمين اليوم لو باجر بالاكثر اعوضج وكدامه وراح يكون الشاهد هههههههههه. جبار. : -اني حاجز كدامك. -نتشارك الشركه حلوه هههههههه. غيث. : -خليكم مثبتين على كلامكم وعمه الساده مقابيل كل جلمه وحده من اعراضكم وكدام العالم موش بالختله.

-لالا سبع شو وخر هذا. اجه راد يضربه. دفعته ضربني راجدي وكعني. وخر الجيس من وجهه بعده ما شايل ايده وركعه غيث كله كعده بمكانه. ركض جبار ضربه بوكس بحركه سريعه دفره بين رجلي. دخلوا الشباب يتماطلون ويا يردون يكمشوا ما يكوروله لمن ضرب خلف راسه بحديده كعد على اركبه. خالي. : -تركوووا صاحي خلي يسلمونه الفلوس وسوه التردوا. غيث: أنت حصتي من دونهم. ضحك غيث: ههههه حصة مِنو؟ غير جنك جريدي ووقعت بيدي! لم يرد، بس صك على سنونه.

أنا، أنا، ودير بالك تالي هيج صيدتك سهلة. اتخسى أنت وربعك الناقصين، الساحلهم وراك، موش أنا اللي أنقضب، لو ما أسلمك نفسي لا أنت ولا عشيرتك كلها تكدر توصلني. وفرت عليّ، ربطوا! شغلك وياي، اتركها اتروح! ربطوا! خليك مرة واحدة زلمة، واجهني، تاتستاهل ينكتب على قبرك اسم يدل على جنسك. جاء اثنان وأمسكاه من كتفيه، وواحد انحنى على رجليه يربطها، وهو يصرخ: اتركهاااا! الفلوس اللي جبتها قليلة، اتفقنا على هيج؟

لك يا النكس، هاي عرضك اتركها! وشتريد فلوس؟ اتصل بأركان يحولك. لعد إيش قد حمار صدقت أتركها؟ رفعوا! غيث يتوعد، عيونه تريد تطلع من الحرقان، وخالي واقف يضحك. وضعوا الطاولة، صعد عليها واحد، رمى الحبل بحديدة معلقة بالسقف، رفعوه بالمقلوب، ربطه ونزل. لميت رجليّ، دموعي تنزل وأنا أشوفهم إيش يسوون بيه. شقوا قميصه وجابوا واير، غمضت عيوني ما أكدر أشوف وهمه يضربوه، مال واحد متحاملين عليه وعندهم ثأر وياه.

ما تركوه لمن دمّوه، فتحت عيوني لقيته منتهي، يباوع لهم بتعب. دخل جبار وبيده بوري، قفزت رحت بوجهه قلت له: كافييي كتلوني! ربطوها! جبان وحيوان، اتركه! بالليل أعلمك الجبان إيش يسوي. تفوو عليك، ناقص مرجلة تتختل مثل الجاهل. ما ظل شيء يا حلوة وشوفي الجاهل بعينج. هسه عرفت ماما ليش كانت ضامة السالفة، أثاري تعرفكم حيوانات ما عدكم صلة بالرجولة أبد. أنا أحكي وما حسيت إلا الضربني برجلي، قعدني بالكاع، أمسكه أبو صلاح،

قال له: خليها صاحية نحتاجها. ردت أقوم، أمسكني واحد من الشباب، واحد بلش يضرب بغيث. أشوف إيش لون يضربون بدون رحمة وأنا أتخبلت، قمت ردت أركض ما خلاني، لزمني جرني، انداريت أريد أفتح إيده، قبضته قوية، قمت أقفز ما أعرف إيش أسوي، كل ضربة ببطنه أقول انتهى. رد لظهره، غمضت ما قدرت أتحمل، حس ضغطت أسنونه عن لا يطلع صوته لمن صاح: آآخ بويه. دفعت الشاب حيل، عتني رجعني لمكاني، واحد جاب حبل، قمت أتوسل بخالي يتركه. ربطوها وشمروها!

دخيلك خالي، راح يموووت! يلا لك، سد حلكها وياك. لا لا خاليييي، خالي أطلب فلوس مكانه، لا تقتله، هذا غني وجبير، أحفادهم راح ينطوك مكانه هواي. أبو صلاح: ههههههه متانيج يا القشطة، ولكم إيشوكت يجي الليل بويه، مو خدود صارت فراولات. ولك كلبببب، راح يموت، محد ينطيك والله مو ببالك غشمه وثولان مثلك، إذا ما تأكدوا عدل دينار ما ينطون. ربطوهااااا! أمسكني الولد يربط وأنا أتوسل وأغلط، عيني بيه وعين بغيث مغمض صاك على سنونه.

رمني بالزاوية، قال لهم: كافي، اتركوه يلا، وشوفوا هذا مات لو بعده. أبو صلاح: اسحلوا، جنّه شيطان ما يرضى يموت، مجلب بالدنيا. جبار: انطوا عشا إلهن خطية جوعانات. راحوا اثنان شالوا رجلي، طلعوا يسحلون بيه، فتح عيونه يباوع لهم بترجي. طلعوا سدوا الباب قفلوا، باوعت لغيث، حجيت بغصة: غيث أصحى فدوة. الله يعثرج. زحفت وصلت يمه، خليت راسه على راسه، شهقت، فتح عيونه حمر، بسته، ابتسم، همس: متأخرة يا الهتره. آذوك الجلاب.

ناي، الدم نزل براسي. إيش لون أفتحك؟ إيديّ مربطة. غمض يأخذ النفس وينفخ بهدوء حتى يعادل الدم براسه. احتاريت إيش أسوي، دنكت أريد ألوح رجليه ما قدرت. زحفت للبوري بالكاع، انداريت أمسكته، خليت إيديّ أريد أفتح هم ما قدرت. يا الصكعة. اجيت اجيت. رجعت أزحف وصلت يمه. ما أكدر غيث، زين تكدر تفتحهن بسنونك؟ أغبياء حتى حبلهم مثلهم مال ملابس. راح أندار وحاول تفتحهن. أشر إي. قعدت على ركبتي، خليت إيديّ على حلكه، حسيت قوة سنونه ضعيفة.

وخرت، رجعت أزحف للبوري، أمسكته وكملت زحف للجام. قعدت على ركبي، انداريت للرازونة، أمسكتها بسنوني، اتجيت، ردت أوقف فلتت وقعدت أباوع لغيث يأخذ أنفاسه بصعوبة. رجعت كررت المحاولة مرة واثنين، وكل وقعة أقوى من اللي قبلها، بالثالثة قدرت أوقف. انطيت ظهري للجام، ثبت البوري بنهاية ظهري، أمسكته حيل ورجعت بكل قوتي، اجت بالجام. درت وجهي لقيتها مفطورة، رجعت ضربته مرة ثانية، حسيتها انكسرت، ما درت وجهي، رجعت ضربته أقوى، سمعت تكسر.

رميت البوري، رجعت أتلمس بأصابعي، أمسكت قطعة جريتها حيل طكت واجت باللحم، غمضت وعصرت نفسي. قعدت أفتح، دنكت على رجليه فتحتهن، ما اهتميت للدم، ركضت لغيث، ضربته حيل على وجهه، صاح: أنجعلج بالكسر بجاه محمد. ببالي مغمي عليك، إيش لون أنزلك؟ افتح إيديّ. تمام هسه. قمت شلت البوري، كسرت قطعة من الجام أكبر، رحت لإيديه فتحتهن.

جریت الطاولة، صعدت عليها، رفعت أصابعي أقطع بالحبل وما ينشلع، تعبت إيده، حسيتها ماتت، نزلتها، ردت أفرك إيدي شفت الدم تارس رداني. رجعت شلتها، ظليت أقطع إشوية إشوية لمن وقع غيث على وجهه، قفزت شلت راسه خليته بحضني، مسحت على وجهه، فتح عيونه، ابتسم، دنك وباسه. بعد إيش؟ إيش جابك وراي؟ وسفة عجل أخليج تغلبيني بشغلة. غيث، هذا موت مو لعبة، لمن تركت جهالنا؟ بروح أخيج لمسوج؟ لا والله، بس هذا الكلب خالي يمكن باعني.

سندني أريد أعدل ظهري. قمت جريتها وهو اتسند عالكاع قعد بصعوبة، سحب روحه للحايط قعد اتجى عليه وغمض، قمت شلت المانتو غطيته، فتح عيونه أشر: تعالي. بردان. إشوية، هاي إيدج تنزف لفيها بقميصي. ما بيها شيء، مو جرح قوي، شنو اللي يوجعك؟ قلبي. غيث. تعالي يولي دفيني، بردان. شلت القميص رحت يمه ردت ألبسه، أخذه وسحبني لحضنه، أمسك إيدي يلف بيها، أباوع لإيده ترجف وكل إشوية يعصر نفسه بألم ويرد يكمل، خلص دخلني بحضنه ولفني بالمانتو.

خليت راسي على صدره. إيش لونه عاشق؟ أخذ حسرة. بكى وراي مو؟ يتعلم، كلنا بكينا وقمنا. يعني راح نموت هاي هي؟ ما همني الموت، أول وتالي لاحقنا، إن كان هسه لو بعد قرن، بس الجهال كاسرين ظهري. ليش ما ظليت وياهم؟ عرفتك ناويه تردين بالاتفاق وناويه تموتين وحدج. رفعت راسي باوعت له مغمض، همست: راح يذبحونه ما تخاف؟ لا خايف أنذبح قبلك ويأذوك وراي، خايف تنذبحين قدام عيني، ما أعرف ساعتها راح أحمل المنظر لو عقلي يزل.

رجعت راسي على صدره: راح تربيهم عمتي ما عليهم. يم لحن وأركان. ليش أخذتهم منها؟ المكان ندلوا وذوله ناقصين مرجلة ما يهمهم لا صغير ولا يعرفون جبير. طلقت أسماء؟ يولي راح نموت. ترى حرام عليك بالدنيا شريكة، بالآخرة شريكة، أريد مرة وحدة أحس أنت بس إلي حتى لآخر دقايق. هاي العشق ما طلقها. ضربته على صدره، أمسك إيدي ضحك، جرها باسها، ردها جوه الغطا.

ظلينا على قعدتنا لليل منتظرين أجلنا، كلما تظلم أكثر كلما تزيد رجفة جسمي، ما خايفة من الموت بس خايفة لا ينفذون اللي قالوا عليه. صارت ظلمة كلش، قويت الريحة مال الفطيسة، ضميت راسي بصدرو حيل، سمعنا صوت كلاب وراها صرخة مكتومة مال واحد يتعذب، سد أذاناتي غيث بسرعة. شنو هاي غيث؟ ناي أحجي لي عن حياتج القديمة. صوت صرخة. ما سمعت، اتركج منها، أحجي لي أي شيء ولا تنقطعين. عن شنو تريدني أسولف؟ إيدك شيلها عن أذاني، ترى عاصرهن حيل.

وخر إيديه همس: أي شيء، ورجع سدهن. طلعت مهزومة، شايلة اثنين أطفال والثالث ببطني، محتارة وين أروح، اكو مرة دزت ناس عليّ أخذوني إلها، دخلت بيها وأنا شايلة على كتفي همّ الدنيا، بس أول ما شفت وجهها وأول ما شميت عطرها حنيتها وهي تحضني، انزال كل شيء. كانت مو أم لي، لا منبع حنان، اتحملتني بجميع حالاتي، بالليل تسهر ويه أطفالي، بالنهار تطبخ وتبيع عالأسواق.

شجعتني، خلتني أكمل دراستي، ما عزت عليّ فلوسها، باعت تراكيها جهزتني أول جامعة، وباعت آخر قطعة ذهب جهزتني للتخرج. ما تأكل إذا ما تشوفنا كلنا شبعنا، دمعتها تنزل قبل دموعنا. رفعت راسي باوعت له همست: جنت أحسدك عليها. هذا كله ما مر بيه؟ أكثر الوقت أقعد صافنة، مثل هيج حنية وقلب طيب، إيش لون اتخلت عن عائلتها؟ بالليل تنومتني على صدرها وهي. تغني لك: حبيتك حب لهفة بلهفة. هه، بس اللهفة اتحولت حقد وكره.

ما تمر ليلة إذا ما تطلع صورتك وتشمها وتخليها على صدرها. إيش لون اندليتها؟ طالعة من باب البيت لقيتها تمشي بالشارع، قلت لها خالة أنتِ أم غيث، أشرت إي. حتى فشلة من رب العالمين تموتين وأنتِ الجذبة قابضة بطرف لسانك. هم صدك، أستغفر الله، غيث هم اتندمت على شيء سويته؟ إي، على معرفتك، أكلت طن تبن، زلمة قاضيها ملاهي وحريم، إيش جابني لطياح الحظ. عضيته، صاح: آااه! لعد انضب. سكت يباوع للحياطين، أخذ له بالساعة، وخر إيديه عن أذاني،

قال: بعدي. وين تريد؟ يولي، بعدي عني لا تأخريني وقومي ساعديني. وخرت، ببالي يريد يتبول، قام اتجى عالحايط، طق ظهره، راح دنك شال البوري، خلى الطاولة صعد عليها شلع التهوية. رماها، بده يدك بحواشي الحايط، يدك بيهن ويوخر الحجار اللي توكع، رغم الألم الواضح عليه بس مبين متعود مو جديدة عليه الشغلة، مقاوم ومستمر، ظل يفلش لمن تعب من صدك. نزل قعد عالطاولة يرتاح. ترى مكان صغير كلش، ما راح تكدر تفلشه. نحاول ما خاسرين أكثر من حياتنا.

أكمل مكانك ترى أكدر. ما توصلين. راح أتشلب عليك. عجل وين جنتِ، هسه توك تتشلبين؟ غيث راح نموت، عقلك وين شاطح؟ جيب! أخذتها من إيده، خليت رجلي عالطاولة، صعدت عليها ما لحقت. صعدت رجلي خليتها بين رجلي، قال: لا دخيلك اتركني، أموت برجولتي أفضل ما أعيش ناقص. اسكت ما أدوس حيل. بت العثرة رجلججج! غيث إذا ما سكتت أرد أهفك بوري بنص راسك وأسحك بـ... أستغفر الله، إيش لون يوسخ لساني. عاد إيش لون لسان هو؟

ولج صدك العالم تدق بيج وأنتِ تغلطين، إيش ما تنهجبين وتنكتمين لو جايج بوري بنص حلكج. ما يكدر خالي جبان بس ذاك أخو مرته هو راس البلوة. نزلي يولي ما ظل وقت. قفزت وهو أخذ البوري رد يدك، لا ساعة ولا ساعتين، الحايط عريض، صح المكان من طين ورطب بس مبين مهجور من زمان، قوي صعب تفليشه.

تعبت من الوقفة، رجعت قعدت، لفيت روحي وأباوع له إيش لون مستمر بالتفليش، متحمل الوجع، كل إشوية يمسح وجهه يأخذ نفس ويرد، هسه عرفت بدعة، صح كانت ترباتها من تعودهم عالألم والتعب من صغرهم، حاسبة حساب هيج أيام. ما أعرف إيش لون بس حسيت بأمان وهو يمي، عيني بيه أباوع له لمن راحت بالنوم بدون لا أدري. قعدت على أصابعه يمشيهن على خدي، فتحت عيوني، ابتسم، أخذني لحضنه دنك أخذ نفس طويل همس: ما عشقت لا قبلك ولا بعدك.

ما حسيت روحي عايش غير وأنا بحضنج. وخرت راسي باسني، قال: ديري بالج عالجهال. شنو غيث؟ كومي يله ما ضل وقت، راح يجون وقت تسليم الفلوس. ما أروح بدونك. ناي عاشق ما يكدر ينام غير بحضنچ، لا تحرميه مثل ما انحرمنا. لااااا غيث! لا تجون لگبري أمانة، وعمة السادة ما أكدر أدحگ دموعچ وهي نازلة. تواعدنا نموت سوى. رديت بكلمتي، ما أريدچ وياي، مليت منچ عتقيني. ما أتركك.

كومي ناي لا تعبيني، كافي راح أموت محروم. ناي بروح أهلچ اقلها عوضيني بفاتحتي، جيبيلي حاتات يلطمن عليه. غيث تعال وياي. ما أكدر أعبر، اكو فقرة طاگة بضهري والمچان ضيگ. كومي ناي بروح عاشق لا تزيديها عليه. قام گوه، گومني، مدّ إيده گمت. أخذني لحضنه، شهگت. وخّر راسي باسني، كال: يله طر الفجر راح يجون، ناي الجهال مناطريچ. ما أروح بدونك، الجهال ما عليهم، عمتي يمهم. راح نموت هيچ وهمه يضيعون. ناي، تگدرين تنقذيني بس استعجلي.

إشلون؟ دحگي يولي، اكو شارع هينه، بس يمنى لو يسرة ما أعرف، يجن عليه سيارات حمل. إشمدريچ؟ من إجينه الطريج موش وعر صافي، اكو صوت هورنات مستمرة مال سيارات حمل، يعني هذا الطريج مال نقل مگطوع. وين ألگى هذا الطريق؟ اتزحّي لجدام عدل، لا تنحدرين لا يمنى ولا يسرة، لمن تصيرن گريبة من صوت الهورنات، أكفي وفتحي دماغچ المحجر حصري للمشاكل تاتركزين منين الصوت. تمام.

من تصلين دحگي عدل، قبل لا تصل السيارة بكم متر گطعي الشارع. أكفي بنصو تا يوگفون، لأن المچان مگطوع ما يوگفون لأحد بسبب قطّاعين الطرق، بس هيچ غصبًا عن أبهاتهم راح يوگفون. وبعدها إشسوي؟ هاي شغلتچ، تدخلين بعينهم وتطلبين الحماية. أول شغلة تتصلين بأركان وهو يعرف الباقي إشيعمل. انتظريني راجعتلك، لا تخليهم يكتلوك، ما أطول بالحچي وياهم. ميخالف بس استعجلي. غيث لا تضحك عليّ. يولي مسودن أخليچ وحدچ تلعبين.

أباوع الثقب زغير، صعدت ع الطبلة اتشلّبيت، دخلت راسي. احتاريت إشلون أعبر، رد سحبني نزلني. صعد هو، انطاني إيده صعدت وياه، رفعني من خصري كال: عبري رجليچ أول. گلبني، خليت رجليه، رفعني طلعتهن وانگلبْت على بطني. باسني، نزلت دموعي. وعديني ما تبچين. لا تروح وتخلينا. روحي ناي ولا تدحگين لتحت، كبل عبري. هزيت راسي دفعني وأني دندلت رجليه، المچان كلش ضيگ، حشر صدري. دا أحچي ودفعني حيل، شاطت روحي. اتحملي يولي. ما أگدر غير اختنگت.

حاولي اتسحبين روحچ، كتمي النفس. ما دا أگدر، إنگطع حتى النفس، غيث راح أموت. ضغط عليّ حيل ورد دفعني، حسيت جسمي انصلخ. بعدني ما مكمشة، استوني أنزل فلتت إيدي ووگعت ليجوه بس على شي. صاح غيث: ناااي لا تدحگين تحتچ، كومييي. گمت وأني مغمضة بس الريحة تذبح، حسيت مثل الحيوانات المعفنة جوّاي. اتشلبيت عالحايط، عبرته، طفرت ع الگاع. كال: ته عبرت. ديري بالچ عالجهال ناااي، أخذيهم وردّي لتركيا. انتظرني غيث.

حللي ذمتچ وعوضيني، أنطي فلوس لشكو صاكة خلي تزورني بگبري. إنگتم غييث. روحي يا روح غيث. أباوع صحراء ماكو أحد، لا بيت ولا بشر، مكان مگطوع بس هياكل أثر بيوت. انتظرني راجعتلك. وركضت، طلعت كبل بكل سرعتي، ما نداريت ولا توقفت. بعدني ما واصلة للهيكل وأسمع صوت طلقات ثارت من داخل البيت الچنت بي. وگفت انداريت أباوع للبيت، گعدت بالكاع دموعي تنزل. لا غيث، وعدتني...